Di Baybul buk we nem Lyuk tɔk se Jizɔs opin di skrol * we Ayzaya rayt, i rid am, ɛn rol am fɔ fol am bak. Di tɛm we Jɔn bin de dɔn fɔ rayt di las pat pan di Baybul buk we nem Jɔn, insɛf bin tɔk bɔt skrol. I bin tɔk se i nɔ bin ebul fɔ rayt ɔl di sayn dɛn we Jizɔs pafɔm, na in skrol.—Lyuk 4:​16-20; Jɔn 20:​30; 21:​25.

Aw dɛn bin de mek skrol dɛn? Dɛn bin de yuz matirial dɛn lɛk lɛda, ship ɔ got kanda, ɔ wan plant we dɛn kɔl papyrus. Dɛn bin de glu dɛn kayn matirial dɛn ya togɛda fɔ mek wan rol. Dɛn bin de rap am pan stik ɛn di raytin kin de insay. Di raytin dɛn bin de insay kolɔm dɛn we shɔt ɛn stret. If di skrol lɔng, i kin gɛt stik dɛn na di tu sayd dɛn we di skrol ɛnd so dat di wan we de rid am, go rol am wit wan an fɔ opin am ɛn yuz di ɔda an fɔ lɔk am te i fɛn di say we i want fɔ rid.

Wan dikshɔnari we dɛn kɔl The Anchor Bible Dictionary, bin tɔk se: “Wan gud tin bɔt skrol na dat i kin lɔng [lɛk 33 fit, (dat na 10 mita)]. Skrol lɛk dat kin tek wan ol buk ɛn i kin stil smɔl we yu rol am.” I go mɔs bi se di Baybul buk we nem Lyuk bin lɔng lɛk 31 fit so. Sɔntɛnde, dɛn bin de trim di ɔp ɛn di bɔtɔm pat na di skrol ɛn dɛn bin de yuz wan ston we dɛn kɔl pumice stone fɔ smut am. Dɔn afta dat, dɛn kin day am.

Frɔm di tɛm we di Izrɛlayt dɛn bigin fɔ du prist wok, na wan man bin de bi ay prist, ɛn i kin bi ay prist te i day. (Di Nɔmba Dɛm 35:25) Na Erɔn na di fɔs pɔsin we bi ay prist. We ɛnibɔdi bi ay prist, afta i day, na in fɔs bɔypikin kin bi ay prist afta am. (Ɛksodɔs 29:9) Bɔku pan di man dɛn we bin de na Erɔn in famili bin bi prist, bɔt di wan dɛn we bin bi ay prist nɔ bin bɔku.

We di Izrɛlayt dɛn bin de ɔnda rula dɛn we nɔto bin Izrɛlayt, na di rula dɛn bin de pik di wan dɛn we dɛn want fɔ bi ay prist ɛn na dɛn bin de pul di wan dɛn we dɛn nɔ want. Bɔt i bin apin se sɔm pan di wan dɛn we dɛn bin de pik, na frɔm gud famili dɛn ɛn bɔku pan dɛn bin kɔmɔt frɔm Erɔn in fambul dɛn. Di “bigman dɛn we bin de mek sakrifays dɛn fɔ pipul sin” na di wan dɛn we bin de oba di ɔda prist dɛn. Di bigman dɛn we bin de mek sakrifays fɔ pipul dɛn sin go dɔn bi di wan dɛn we de oba di ɔda prist dɛn we dɛn sheb to 24 grup dɛn. Dɛn pipul dɛn ya na bin bigman dɛn we bin de na prist famili dɛn; ɛn ay prist dɛn we dɛn bin dɔn pul pan prist wok. Anas na bin wan ay prist we dɛn pul pan prist wok.​—Fɔs Kronikul 24:1-19; Matyu 16:21; Mak 8:31; Di Apɔsul Dɛn Wok [Akt] 4:6.