1, 2. (a) Wetin dɔn sev bɔku pipul dɛn layf? (Luk di pikchɔ nia dis atikul in taytul.) (b) Wetin Gɔd de du fɔ mek in pipul dɛn go sev?

“STƆP, LUK, ƐN LISIN.” I dɔn pas 100 ia we dɛn bigin fɔ rayt dɛn wɔd ya pan big sayn bod dɛn na di jɔnkshɔn dɛn usay tren ɛn motoka kin pas na di nɔt pat na Amɛrika. Wetin mek dɛn rayt dɛn wɔd ya? Na fɔ lɛ tren dɛn we de kam wit spid nɔ bang motoka dɛn we de pas na di jɔnkshɔn. Bɔku pipul dɛn dɔn sev dɛn layf bikɔs dɛn du wetin di sayn dɛn se.

² Di tin we Jiova de du fɔ wi bɛtɛ pas di sayn dɛn we dɛn kin put fɔ sho wi usay denja de. Jiova de sho in pipul dɛn wetin fɔ du so dat dɛn go gɛt layf we go de sote go ɛn fɔ lɛ bad tin nɔ go mit dɛn. Jiova tan lɛk shɛpad we lɛk in ship dɛn, we de sho dɛn wetin fɔ du, ɛn wɔn dɛn so dat dɛn nɔ go go usay bad tin go mit dɛn.—Rid Ayzaya 30:​20, 21.

3. Wetin kam mek mɔtalman de day?

³ Frɔm di tɛm we Jiova mek mɔtalman, i dɔn de sho pipul dɛn wetin-ɛn-wetin fɔ du. Fɔ ɛgzampul, na di gadin we bin de na Idɛn, Jiova bin sho di fɔs man ɛn uman klia wan wetin-ɛn-wetin dɛn fɔ du fɔ mek dɛn gɛt layf we go de sote go  ɛn fɔ lɛ dɛn go gɛt gladi at. (Jɛnɛsis 2:​15-17) Bɔt Adam ɛn Iv nɔ bin du wetin dɛn Papa tɛl dɛn. Iv bin lisin to Setan, we bin yuz snek fɔ tɔk to am, ɛn Adam in bin lisin to in wɛf. Wetin bin apin we dɛn du dis? Dɛn ɔl tu bin sɔfa, ɛn we dɛn day, dɛn nɔ gɛt op se dɛn go gɛt layf bak. Bikɔs dɛn nɔ bin yɛri Gɔd in wɔd, ɔlman de day.

4. (a) Wetin mek Gɔd bin gi mɔ lɔ dɛn afta di Ebi Ren? (b) Aw di nyu lɔ we Gɔd bin gi bɔt blɔd de sho di we aw Gɔd de tink?

⁴ Gɔd bin sho Noa wetin-ɛn-wetin fɔ du fɔ mek pipul dɛn go sev dɛn layf. Afta di Ebi Ren, Jiova bin gi lɔ to in pipul dɛn se dɛn nɔ fɔ it ɔ drink blɔd. Wetin mek? Na bikɔs, naw, Jiova go alaw mɔtalman fɔ bigin it bif. Dis bin mek i gi dɛn nyu lɔ dɛn we go gayd dɛn. I bin tɛl dɛn se: “Una nɔ fɔ it ɛnitin we rɔ we gɛt blɔd pan am, bikɔs na di blɔd gɛt layf.” (Jɛnɛsis 9:​1-4) Frɔm dis lɔ we Gɔd gi, wi dɔn kam fɔ no wetin Gɔd de tink bɔt layf. Na in mek ɔltin ɛn na in gi wi layf, so i gɛt di rayt fɔ mek lɔ dɛn bɔt layf. Fɔ ɛgzampul, i bin gi lɔ se mɔtalman nɔ fɔ kil in kɔmpin mɔtalman. Gɔd de si layf ɛn blɔd as sɔntin we oli, ɛn i go pɔnish ɛnibɔdi we nɔ yuz am di rayt we.—Jɛnɛsis 9:​5, 6.

5. Wetin wi go tɔk bɔt naw? Wetin mek?

⁵ Afta Noa in tɛm, Gɔd bin kɔntinyu fɔ sho in pipul dɛn wetin-ɛn-wetin dɛn fɔ du. Insay dis atikul, wi go tɔk bɔt sɔm ɛgzampul dɛn bɔt aw i bin de gayd dɛn. Dis go mek wi mekɔp wi maynd fɔ fala di tin dɛn we Jiova go sho wi te wi go insay di nyu wɔl.

6. Wetin mek i bin impɔtant fɔ lɛ Gɔd in pipul dɛn obe di lɔ dɛn we i bin gi Mozis? Uskayn we di Izrɛlayt dɛn bin fɔ biev?

⁶ Insay Mozis in tɛm, Jiova bin sho in pipul dɛn klia wan aw dɛn fɔ biev ɛn aw dɛn fɔ wɔship am. Wetin mek? Na bikɔs sɔm tin dɛn bin dɔn chenj. I bin pas tu ɔndrɛd ia we di Izrɛlayt dɛn bin de na Ijipt ɛn plɛnti pipul dɛn na Ijipt bin de wɔship dayman, yuz aydɔl fɔ wɔship, ɛn du plɛnti tin dɛn we nɔ de sho wan rɛspɛkt fɔ Gɔd. So we Gɔd fri in pipul dɛn na Ijipt, dɛn bin nid fɔ gɛt nyu lɔ dɛn fɔ sho dɛn wetin fɔ du. I nɔ go te igen, dɛn go bi pipul dɛn we de fala Jiova in Lɔ nɔmɔ. Sɔm buk dɛn we masta sabi bukman dɛn rayt se di Ibru wɔd fɔ “lɔ” fiba di wɔd we min “fɔ sho pɔsin wetin-ɛn-wetin fɔ du, fɔ gayd, ɛn fɔ tich.” Di Lɔ bin de sho di Izrɛlayt dɛn wetin fɔ du so dat dɛn nɔ go fala di bad we we di ɔda neshɔn dɛn de liv ɛn dɛn lay lay rilijɔn dɛn. We di Izrɛlayt dɛn lisin to Gɔd, Gɔd bin de blɛs dɛn. We dɛn nɔ lisin, bad bad tin dɛn bin de apin to dɛn.—Rid Ditarɔnɔmi 28:​1, 2, 15.

7. (a) Wetin mek Jiova bin gi di Lɔ to in pipul dɛn? (b) Aw di Lɔ bin tan lɛk pɔsin we bin de gayd di Izrɛlayt dɛn?

⁷ Ɔda rizin bin de we mek dɛn bin nid nyu lɔ dɛn. Di Lɔ bin de pripia di Izrɛlayt dɛn fɔ wan impɔtant tin we Jiova bin want fɔ du, dat na di tɛm we Jizɔs Krays, we na di Mɛsaya, go kam. Di Lɔ bin de mɛmba di Izrɛlayt dɛn se dɛn nɔ pafɛkt. Ɛn i bin de ɛp dɛn fɔ no se dɛn nid sɔmbɔdi we fɔ day fɔ dɛn, we na wan pafɛkt sakrifays we go pul sin kɔmɔt kpatakpata. (Lɛta Fɔ Galeshya 3:​19; Di Ibru Pipul Dɛn 10:​1-10) Dɔn di Lɔ bin de protɛkt di famili usay di Mɛsaya fɔ kɔmɔt ɛn i bin de ɛp di Izrɛlayt dɛn fɔ sabi di Mɛsaya di tɛm we i go kam. So di Lɔ bin “tan lɛkɛ pɔsin” we bin de wit dɛn fɔ smɔl tɛm fɔ sho dɛn udat na di Krays.—Lɛta Fɔ Galeshya 3:​23, 24.

8. Wetin mek wi fɔ fala di advays dɛn we de insay di Lɔ we Gɔd bin gi Mozis?

 ⁸ Wisɛf tide we na Kristian kin bɛnifit frɔm di tin dɛn we de insay di Lɔ we Jiova bin gi in pipul dɛn. Aw wi go bɛnifit? Wi kin tek tɛm stɔp ɛn luk di advays dɛn we de insay di Lɔ. Pan ɔl we wi nɔ de ɔnda di Lɔ, plɛnti tin dɛn de insay di Lɔ we go ɛp wi fɔ no aw fɔ liv wi layf ɛn aw fɔ wɔship Jiova. Jiova bin mek dɛn put di Lɔ insay di Baybul, so dat wi go lan frɔm wetin de insay di Lɔ, yuz di advays dɛn fɔ gayd wi, ɛn gladi fɔ no se Jizɔs tɔk bɔt sɔntin we pas di Lɔ. Lisin to wetin Jizɔs bin tɔk, we i se: “Una dɔn yɛri wetin dɛn bin se, ‘Maredman nɔ fɔ tek ɔda man wɛf.’ Bɔt mi de tɛl una se: ɛni man we luk uman, we nɔto in wɛf, sote i want am fɔ insɛf, da man de dɔn tek ɔda man wɛf nain at.” So pɔsin we dɔn mared nɔ fɔ jɔs avɔyd fɔ du mami ɛn dadi biznɛs di we we nɔ rayt bɔt i nɔ fɔ ivin tink ɔ fil fɔ du mami ɛn dadi biznɛs wit pɔsin we nɔto in man ɔ wɛf.—Matyu 5:​27, 28.

9. Wetin bin apin we mek i bin impɔtant fɔ lɛ Jiova gi nyu lɔ dɛn bak?

⁹ Afta we Jizɔs bin kam as di Mɛsaya, Jiova bin gi nyu lɔ dɛn we bin tɔk mɔ bɔt wetin i want. Wetin mek i bin nid fɔ du dat? Na bikɔs insay di ia 33, Jiova bin pul an pan di Izrɛlayt dɛn ɛn chuz di pipul dɛn na di Kristian kɔngrigeshɔn. So tin bin chenj fɔ Gɔd in pipul dɛn bak.

10. Wetin mek Jiova bin gi nyu lɔ dɛn to di Kristian kɔngrigeshɔn? Aw dɛn lɔ ya bin difrɛn frɔm di wan dɛn we Jiova bin gi di Izrɛlayt dɛn?

¹⁰ Insay di Lɔ we Jiova bin gi Mozis, i bin want di Izrɛlayt dɛn fɔ no aw dɛn fɔ liv dɛn layf ɛn aw dɛn fɔ wɔship am. Frɔm di tɛm we di apɔsul dɛn bin de, Jiova nɔ bin de pik pipul dɛn frɔm wan neshɔn nɔmɔ, bɔt i bin de pik pipul dɛn fɔ kam sav am frɔm difrɛn neshɔn dɛn. Ɛn dɛn na pipul dɛn we tan lɛk Izrɛlayt na Gɔd in yay. Na dɛn mekɔp di Kristian kɔngrigeshɔn ɛn dɛn de ɔnda di nyu agrimɛnt. Jiova bin gi dɛn nyu lɔ dɛn ɔ ɛksplen mɔ bɔt sɔm lɔ dɛn we bin dɔn ɔlrɛdi de ɛn ɔl dɛn lɔ ya bin sho dɛn aw dɛn fɔ liv dɛn layf ɛn wɔship am. Fɔ tru, “Gɔd nɔ de luk ɛnibɔdi bɛtɛ pas in kɔmpin. Gɔd go mek ɛnibɔdi we rɛspɛkt am ɛn du wetin i want, bi in yon.” (Di Apɔsul Dɛn Wok [Akt] 10:​34, 35) Dɛn de fala “wetin Krays tɛl [dɛn] fɔ du,” ɛn di tin dɛn we Krays tɛl dɛn fɔ du nɔ rayt pan ston, bɔt i rayt insay dɛn at. Krays in lɔ go gayd dɛn ɛn i go bɛnifit ɛni Kristian we fala am.—Lɛta Fɔ Galeshya 6:​2.

11. Us tu impɔtant lɔ dɛn Krays bin gi to ɔlman we na Kristian?

¹¹ Di pipul dɛn we tan lɛk Izrɛlayt na Gɔd in yay bin bɛnifit plɛnti tɛm frɔm di lɔ dɛn we Jiova bin yuz Jizɔs fɔ gi dɛn. Jɔs bifo Jizɔs tɛl dɛn bɔt di nyu agrimɛnt, i gi dɛn tu impɔtant lɔ dɛn. Wan na bɔt di prichin wok. Di ɔda wan na bɔt di we aw Kristian dɛn fɔ biev ɛn aw dɛn fɔ trit dɛn kɔmpin mɔtalman. Dɛn lɔ ya na fɔ ɔlman we na Kristian, so na fɔ wi ɔl i de fɔ tide, ilɛksɛf di op we wi gɛt na fɔ gɛt layf we go de sote go na ɛvin ɔ na dis wɔl.

12. Wetin bin nyu bɔt di prichin wok?

¹² Trade, if pɔsin we nɔto Izrɛlayt want fɔ wɔship Jiova, i fɔ go na Izrɛl. (Fɔs Kiŋ 8:​41-43) Bɔt Jizɔs bin gi wan lɔ we de na Matyu 28:​19, 20. (Rid.) I bin tɛl in disaypul dɛn fɔ “go” to ɔlman. Insay Pɛntikɔst 33, Jiova bin sho se i want mek dɛn prich di gud nyus ɔlsay na di wɔl. Da  de de, na bin lɛk 120 pipul dɛn di oli spirit bin kam pan ɛn dɛn bigin fɔ tɔk difrɛn difrɛn langwej dɛn. Dɛn bigin fɔ tɔk to di Ju dɛn ɛn ɔda pipul dɛn we bin kam jɔyn di Ju pipul dɛn fɔ wɔship Jiova. (Di Apɔsul Dɛn Wok [Akt] 2:​4-11) Afta dat, di prichin wok bin go bifo te i rich di pipul dɛn we de na Sameria. Dɔn insay di ia 36, di prichin wok go bifo pas aw i bin de ɛn dis tɛm i rich pipul dɛn we nɔ sakɔmsayz, we kɔmɔt na ɔda neshɔn dɛn. So dis min se Kristian dɛn fɔ go prich to ɔlman na di wɔl!

13, 14. (a) Wetin de insay di “nyu lɔ” we Jizɔs bin gi? (b) Wetin wi lan frɔm Jizɔs in ɛgzampul?

¹³ Jizɔs bin gi wan “nyu lɔ” bɔt aw fɔ trit wi brɔda ɛn sista dɛn. (Rid Jɔn 13:​34, 35.) Wi fɔ sho se wi lɛk dɛn ɛvride, ɛn wi fɔ rɛdi fɔ gi wi layf fɔ dɛn. Dis tin we wi fɔ du na tin we di Lɔ we Jiova bin gi Mozis nɔ bin tɛl wi fɔ du.—Matyu 22:​39; Jɔn In Fɔs Lɛta 3:​16.

¹⁴ Jizɔs na di bɛst pɔsin we dɔn sho se i nɔ jɔs bisin bɔt insɛf nɔmɔ. I bin so lɛk in disaypul dɛn dat, i bin day fɔ dɛn. Ɛn i want ɔl di wan dɛn we de fala am fɔ du di sem tin. So wi fɔ rɛdi fɔ bia we prɔblɛm dɛn kam wi we ɛn ivin day fɔ wi brɔda ɛn sista dɛn.—Fɔs Lɛta Fɔ Tɛsalonayka 2:​8.

15, 16. Aw tin dɔn chenj fɔ wi? Aw Gɔd de gayd wi?

¹⁵ Jizɔs bin dɔn pik “di bɔy we tru to in masta ɛn we gɛt sɛns” fɔ gi di wan dɛn we de fala am “it wɛn di rayt tɛm rich.” (Matyu 24:​45-47) Dis it kin bi impɔtant lɔ dɛn fɔ Gɔd in pipul dɛn we tin dɛn go chenj. Aw tin dɔn chenj fɔ wi?

¹⁶ Wi de na di las dez, we na di tɛm “jɛs bifo Jizɔs kam bak,” ɛn i nɔ go te igen big big trɔbul go apin we wi nɔ wan de si.  (Sɛkɛn Lɛta To Timoti 3:​1; Mak 13:​19) Ɛn dɛn dɔn pul Setan ɛn in dɛbul dɛn na ɛvin ɛn ib dɛn dɔŋ na dis wɔl, ɛn dis dɔn mek mɔtalman de sɔfa tide. (Rɛvɛleshɔn 12:​9, 12) Pantap dat, wi de obe Jizɔs in lɔ fɔ prich to mɔ pipul dɛn ɛn insay bɔku langwej dɛn pas aw wi bin dɔn ɛva du am!

17, 18. Wetin wi go du we dɛn tɛl wi fɔ du sɔntin naw?

¹⁷ Gɔd in ɔganayzeshɔn dɔn gi wi plɛnti tin dɛn fɔ ɛp wi wit di prichin wok. Yu de yuz dɛn? Na wi mitin dɛn, dɛn kin sho wi aw fɔ yuz dɛn tin dɛn ya di bɛst we. Yu de si dɛn we ya as sɔntin we kɔmɔt frɔm Gɔd?

¹⁸ Fɔ lɛ wi go gɛt Gɔd in blɛsin, wi fɔ pe atɛnshɔn to ɔl di tin dɛn we Jiova de tɛl wi fɔ du na di kɔngrigeshɔn. If wi de du wetin dɛn tɛl wi fɔ du naw, i go mek am izi fɔ lɛ wi du wetin dɛn tɛl wi we da big “trɔbul” go kam, we Jiova go dɔnawe wit Setan ɛn ɔl di wan dɛn we de fala am. (Matyu 24:​21) Afta dat, wi go nid nyu lɔ dɛn we go ɛp wi fɔ liv insay di nyu wɔl we ɔlman go de du wetin rayt ɛn we Setan nɔ go de igen fɔ ful pipul dɛn.

19, 20. Us buk dɛn we dɛn go opin? Wetin go apin we dɛn opin dɛn?

¹⁹ Insay Mozis in tɛm, di Izrɛlayt dɛn bin nid nyu lɔ dɛn, so Gɔd gi dɛn di Lɔ. Leta, di Kristian kɔngrigeshɔn bin gɛt fɔ fala “wetin Krays tɛl [dɛn] fɔ du.” Semweso, di Baybul se insay di nyu wɔl, wi go gɛt buk dɛn we go gɛt nyu lɔ dɛn. (Rid Rɛvɛleshɔn 20:​12.) Sɔm tɛm, insay dɛn nyu buk ya, Jiova go tɛl wi wetin i want mek mɔtalman du da tɛm de. We wi stɔdi dɛn tin ya, ɔlman go ebul fɔ no wetin Gɔd want fɔ dɛn, ivin di wan dɛn we go gɛt layf bak. Di nyu buk dɛn go ɛp wi fɔ no aw Jiova de tink. We wi go dɔn no di Baybul gud gud wan, ɔlman na Paradays go lɛk, rɛspɛkt, ɛn ɔnɔ in kɔmpin. (Ayzaya 26:​9) Jɔs tink bɔt di plɛnti tin dɛn we wi go lan ɛn tich ɔda pipul dɛn we wi go de ɔnda di Kiŋ, Jizɔs Krays!

²⁰ We wi fala di tin dɛn we “rayt insay di . . . buk dɛn” ɛn wi kɔntinyu fɔ bi fetful to Jiova insay di tɛm we da las las tɛst go bi, Jiova go rayt wi nem dɛn na di “buk we dɛn pipul we gɛt layf sote go dɛn nem . . . rayt” ɛn i go de de sote go. Fɔ gɛt layf we go de sote go, wi fɔ du dɛn tin ya: Wi fɔ STƆP ɛn rid wetin di Baybul se gud gud wan, LUK gud fɔ ɔndastand wetin i min fɔ wi, ɛn LISIN bay we wi de du wetin Gɔd want wi fɔ du naw. If wi du dɛn tin ya, wi go sev we da big trɔbul go kam ɛn wi go ɛnjɔy fɔ lan bɔt wi Gɔd, Jiova sote go, we gɛt sɛns ɛn we lɛk mɔtalman.—Ɛkliziastis 3:​11; Lɛta Fɔ Rom 11:​33.