1, 2. (a) Wetin kin mek Gɔd in pipul dɛn gladi tide? (b) Aw mama ɛn papa dɛn we na Kristian ɛn ɛlda dɛn go ɛp yɔŋ wan dɛn fɔ ɔndastand wetin i min fɔ baptayz?

WAN ɛlda bin tɛl wan 12 ia ol bɔbɔ we nem Kristofa, se: “A dɔn sabi yu frɔm we dɛn bɔn yu ɛn a gladi fɔ yɛri se yu want fɔ baptayz. Bɔt a go lɛk fɔ aks yu, ‘Wetin mek yu want fɔ baptayz?’” Da ɛlda de bin gɛt gud rizin we mek i aks da kwɛstyɔn de. Wi kin gladi fɔ si we bɔku yɔŋ pipul dɛn de baptayz ɛni ia. (Ɛkliziastis 12:​1) Bɔt Kristian mama ɛn papa dɛn ɛn ɛlda dɛn na di kɔngrigeshɔn fɔ mek shɔ se yɔŋ pipul dɛn disayd fɔ dɛnsɛf ɛn ɔndastand wetin i min fɔ baptayz.

² Insay di Baybul, wi lan se we pɔsin de gi in layf to Jiova ɛn baptayz, i dɔn bigin nyu layf. Dis nyu layf go mek i gɛt bɔku blɛsin frɔm Jiova, bɔt Setan go tray fɔ stɔp am. (Prɔvabs 10:​22; Pita In Fɔs Lɛta 5:​8) Na dat mek mama ɛn  papa dɛn we na Kristian fɔ fɛn tɛm fɔ tich dɛn pikin dɛn wetin i rili min fɔ bi Krays in disaypul. If yɔŋ wan dɛn nɔ gɛt mama ɛn papa dɛn we na Kristian, di ɛlda dɛn na di kɔngrigeshɔn go tek tɛm ɛp dɛn fɔ ɔndastand wetin i min fɔ gi dɛn layf to Jiova ɛn fɔ baptayz. (Rid Lyuk 14:​27-30, NW.) Jɔs lɛk aw pɔsin kin pripia bifo i bil os fɔ lɛ i go ebul fɔ dɔn am, na so bak yɔŋ wan dɛn fɔ pripia bifo dɛn baptayz so dat dɛn go ebul sav Jiova fetful wan ‘sote dɛn day.’ (Matyu 24:​13) Wetin go ɛp yɔŋ wan dɛn fɔ mekɔp dɛn maynd fɔ sav Jiova sote go? Lɛ wi si wetin go ɛp dɛn.

3. (a) Aw di wɔd dɛn we Jizɔs ɛn Pita bin tɔk de tich wi wetin mek i impɔtant fɔ baptayz? (Matyu 28:​19, 20; Pita In Fɔs Lɛta 3:​21) (b) Us kwɛstyɔn dɛn wi go tɔk bɔt? Wetin mek?

³ Yu na yɔŋ pɔsin we want fɔ baptayz? If na so i bi, dat na fayn tin we yu dɔn plan! Na big big ɔnɔ fɔ baptayz fɔ bi wan pan Jiova Witnɛs dɛn. Dis na sɔntin we Kristian fɔ du ɛn na wan impɔtant tin fɔ ɛnibɔdi we go want fɔ sev di tɛm we da big trɔbul go kam. (Matyu 28:​19, 20; Pita In Fɔs Lɛta 3:​21) We yu baptayz, yu de sho se yu dɔn prɔmis fɔ sav Jiova sote go ɛn yu rili want fɔ kip da prɔmis de. So dɛn kwɛstyɔn dɛn ya we wi de kam tɔk bɔt go ɛp yu fɔ si if yu dɔn rɛdi fɔ baptayz: (1) A dɔn rili machɔ fɔ disayd fɔ du dis? (2) Na sɔntin we misɛf sɛf want du so? (3) A dɔn ɔndastand wetin i min fɔ gi mi layf to Jiova? Lɛ wi tɔk bɔt dɛn kwɛstyɔn dɛn ya.

4, 5. (a) Wetin mek nɔto big pipul dɛn nɔmɔ fɔ baptayz? (b) Wetin i min fɔ bi pɔsin we machɔ?

⁴ Di Baybul nɔ tɔk se na di wan dɛn nɔmɔ we dɔn big ɔ di wan dɛn we dɔn rich wan patikyula ej fɔ baptayz. Prɔvabs 20:​11 se: “Pikin dɛn de sho dɛnsɛf bay wetin dɛn de du, if na di rayt tin dɛn de du.” Dis de sho se ivin pikin kin ɔndastand wetin i min fɔ du wetin rayt ɛn fɔ gi in layf to di Wan we mek am. So, fɔ baptayz na wan impɔtant tin we fayn fɔ ɛni yɔŋ pɔsin we dɔn sho se i machɔ ɛn we dɔn gi in layf to Jiova.—Prɔvabs 20:​7.

⁵ Wetin i min fɔ bi pɔsin we machɔ? Fɔ bi pɔsin we machɔ nɔ jɔs min ɔmɔs ia di pɔsin ol ɔ aw i de gro. Di Baybul se machɔ pipul dɛn dɔn tren dɛnsɛf “fɔ no wetin gud ɛn bad.” (Di Ibru Pipul Dɛn 5:​14) Pɔsin we machɔ no wetin rayt ɛn i dɔn disayd na in at fɔ du am. So i nɔ izi fɔ lɛ dɛn mek i du wetin nɔ rayt. Ɛn nɔto ɔltɛm i kin nid pɔsin fɔ tɛl am fɔ du wetin rayt. So wi shɔ se we yɔŋ pɔsin baptayz, i go du wetin rayt ivin if in mama ɛn papa ɔ ɔda big pɔsin nɔ de arawnd.—Luk Lɛta Fɔ Filipay 2:​12.

6, 7. (a) Us prɔblɛm dɛn bin mit Daniɛl we i bin de na Babilɔn? (b) Aw Daniɛl bin sho se i machɔ?

⁶ Yu tink se yɔŋ pɔsin go rili sho se i machɔ da kayn we de? Tink bɔt Daniɛl in ɛgzampul. I go mɔs bi se Daniɛl na bin yɔŋ pɔsin we dɛn pul am na in mama ɛn  papa dɛn an ɛn kɛr am go na Babilɔn. So Daniɛl bin kam fɔ de wit pipul dɛn we nɔ bin de obe Gɔd in lɔ dɛn. Bɔt lɛ wi tek tɛm luk aw Daniɛl in layf bin tan lɛk na Babilɔn. Dɛn bin de trit am lɛk spɛshal pɔsin na Babilɔn. In na bin wan pan di yɔŋ pipul dɛn we dɛn bin dɔn tek tɛm pik fɔ wok fɔ di kiŋ. Ɛn di wan dɛn we dɛn bin pik fɔ wok fɔ di kiŋ nɔ bin bɔku. (Daniɛl 1:​3-5, 13) I tan lɛk se di wok we Daniɛl bin gɛt na Babilɔn bin bɛtɛ pas di wok we i bin fɔ dɔn ɛva gɛt na Izrɛl.

⁷ So, wetin Daniɛl bin du? Yu tink se i bin alaw di pipul dɛn na Babilɔn fɔ chenj am ɔ mek i nɔ gɛt bɛtɛ fet igen? Nɔ, nɔto so i bi! Di Baybul se we Daniɛl bin de na Babilɔn, i bin “mek ɔp in maynd se i nɔ go dɔti insɛf,” we min se i nɔ go put an pan ɛnitin we gɛt fɔ du wit lay lay wɔship. (Daniɛl 1:​8) Dis bin sho se i rili machɔ!

8. Wetin yu kin lan frɔm Daniɛl in ɛgzampul?

⁸ Wetin yu kin lan frɔm Daniɛl in ɛgzampul? We yɔŋ pɔsin machɔ, i go tinap tranga wan fɔ wetin i biliv, ivin if i nɔ izi fɔ am. I nɔ go tan lɛk kɔmiɛl we de chenj in kɔlɔ to di kɔlɔ we de arawnd am. I nɔ de mek lɛk se in na Gɔd in padi we i de na Kiŋdɔm Ɔl bɔt we i de na skul, in na padi to di pipul dɛn na di wɔl. Bɔt ivin if dɛn tɛst in fet, i go stil du wetin rayt.—Rid Lɛta Fɔ Ɛfisɔs 4:​14, 15.

9, 10. (a) Us bɛnifit yɔŋ pɔsin go gɛt we i tink bɔt wetin i bin du di las tɛm we sɔntin tɛst in fet? (b) Wetin i min fɔ baptayz?

⁹ Na tru se nɔbɔdi nɔ pafɛkt. Ɛn sɔntɛnde yɔŋ wan dɛn ɛn big pipul dɛn kin mek mistek. (Ɛkliziastis 7:​20) Bɔt if yu want fɔ baptayz, i go mek sɛns fɔ lɛ yu no if yu rili dɔn mekɔp yu maynd fɔ obe Jiova in lɔ dɛn. Yu kin aks yusɛf dis kwɛstyɔn, ‘A dɔn de obe Jiova fɔ sɔm tɛm naw?’ Tink bɔt wetin yu bin du di las tɛm we sɔntin apin fɔ tɛst yu fet. Yu bin ebul fɔ disayd wetin na di rayt tin  fɔ du? Jɔs lɛk Daniɛl, ɛnibɔdi bin dɔn ɛnkɔrej yu fɔ yuz yu sɛns na Setan in wɔl? We sɔntin lɛk dis de tɛmt yu, yu ebul fɔ ɔndastand wetin Jiova want?—Lɛta Fɔ Ɛfisɔs 5:​17.

¹⁰ Wetin mek i impɔtant fɔ lɛ wi no di ansa to dɛn kwɛstyɔn dɛn ya? Na bikɔs dɛn go ɛp yu fɔ no wetin mek i rili impɔtant fɔ baptayz. We yu baptayz, yu de sho ɔda pipul dɛn se yu dɔn mek wan impɔtant prɔmis to Jiova. Yu prɔmis am se yu go lɛk am ɛn sav am wit ɔl yu at sote go. (Mak 12:​30) Ɛnibɔdi we baptayz fɔ mekɔp in maynd fɔ kip di prɔmis we i dɔn mek to Jiova.—Rid Ɛkliziastis 5:​4, 5.

11, 12. (a) If ɛnibɔdi want fɔ baptayz, us impɔtant tin i fɔ du? (b) Wetin go ɛp yu fɔ no se di rizin we mek yu de baptayz na rizin we Jiova go gladi fɔ?

¹¹ Di Baybul tɔk se ɔl Jiova in pipul dɛn, ivin di yɔŋ wan dɛn go “gladi” fɔ sav am. (Sam 110:​3) So ɛnibɔdi we want fɔ baptayz fɔ mek shɔ se na sɔntin we insɛf sɛf want fɔ du. Dis min se yu fɔ tek tɛm tink gud wan bɔt wetin yu want fɔ du, mɔ if yu na pɔsin we mɛn na di trut.

¹² As yu de big, i go mɔs bi se yu dɔn si we bɔku pipul dɛn de baptayz, sɔntɛm sɔm pan dɛn na yu padi dɛn ɔ yu bɛlɛ-bɔn brɔda ɛn sista dɛn. Bɔt tek tɛm lɛ yu nɔ bigin fil se yu fɔ baptayz bikɔs yu dɔn rich wan patikyula ej ɔ bikɔs yu de si ɔlman de baptayz. Aw yu go no se di rizin we mek yu de baptayz na rizin we Jiova go gladi fɔ? Tek tɛm tink bɔt wetin mek i impɔtant fɔ baptayz. Yu go si bɔku gud rizin dɛn insay dis atikul ɛn di ɔda wan.

13. Aw yu go no if di disayd we yu dɔn disayd fɔ baptayz kɔmɔt na yu at?

¹³ Wan we we yu go no if di disayd we yu disayd fɔ baptayz kɔmɔt na yu at na we yu wach di we aw yu de pre. Yu kin pre to Jiova ɔltɛm? We yu de pre, yu gɛt sɔm patikyula tin dɛn we yu kin pre fɔ? Di ansa to dɛn kwɛstyɔn ya go sho aw yu padi biznɛs wit Jiova tayt. (Sam 25:​4) Bɔku tɛm Jiova kin yuz di Baybul fɔ ansa wi prea dɛn. So wan ɔda we we yu go no if yu rili want fɔ kam nia Jiova mɔ ɛn sav am wit ɔl yu at na we yu de wach di we aw yu de stɔdi. (Jɔshwa 1:​8) Aks yusɛf dɛn kwɛstyɔn ya: ‘A kin stɔdi di Baybul ɔltɛm? A kin gladi fɔ tek pat pan wi famili wɔship?’ Di ansa we yu go gi to dɛn kwɛstyɔn ya go ɛp yu fɔ no if di disayd we yu dɔn disayd fɔ baptayz na tin we yusɛf sɛf want fɔ du.

14. Ɛksplen wetin i min fɔ gi yu layf to Jiova ɛn fɔ baptayz.

¹⁴ Sɔm yɔŋ wan dɛn nɔ kin rili no se fɔ gi yu layf to Jiova ɛn fɔ baptayz na tu difrɛn tin. Sɔm kin se dɛn dɔn gi dɛn layf to Jiova bɔt dɛn nɔ rɛdi yet fɔ baptayz. Bɔt yu tink se dis rili pɔsibul? Wetin i min fɔ gi yu layf to Jiova? I min se yu fɔ pre to am fɔ prɔmis am se yu go sav am sote go. We yu baptayz, yu de sho ɔda pipul dɛn se yu dɔn ɔlrɛdi gi yu layf to Jiova. So bifo yu baptayz, yu nid fɔ ɔndastand wetin i min fɔ gi yu layf to Gɔd.

15. Wetin i min fɔ gi yu layf to Jiova?

¹⁵ We yu gi yu layf to Jiova, yu de tɛl  am se na in gɛt yu naw. Yu de prɔmis am se di tin we go impɔtant pas ɔl na yu layf na fɔ sav am. (Rid Matyu 16:​24.) Dis prɔmis we yu mek to Gɔd rili siriɔs! (Matyu 5:​33) So aw yu go sho se yu no se nɔto yu gɛt yusɛf igen na Jiova gɛt yu naw?—Lɛta Fɔ Rom 14:​8.

16, 17. (a) Gi ɛgzampul fɔ sho wetin i min fɔ gi yusɛf to Jiova. (b) We pɔsin gi in layf to Jiova, wetin i rili de tɛl am?

¹⁶ Lɛ wi tɔk bɔt wan ɛgzampul. Imajin se yu padi bay motoka fɔ yu. I gi yu ɔl di motoka in pepa dɛn ɛn se: “Dis motoka na yu yon.” Bɔt i tɛl yu se: “A go kip di ki dɛn. Ɛn nɔto yu go de drayv di motoka, na mi go de drayv am.” Aw yu go fil bɔt dis gift? Aw yu go fil bɔt yu padi we gi yu di motoka?

¹⁷ We sɔmbɔdi gi in layf to Jiova, i de tɛl am se: “A de gi yu mi layf. Na yu gɛt mi naw.” Jiova want lɛ da pɔsin de kip di prɔmis we i dɔn mek to am. Bɔt if da pɔsin de bigin fɔ ayd fɔ du tin we Jiova nɔ want, lɛk fɔ kip bɔy frɛnd ɔ gal frɛnd we nɔ de sav Jiova, ɔ i tek wok we go mek i nɔ gɛt bɛtɛ tɛm igen fɔ go prich ɔ we go mek i nɔ de go mitin ɔltɛm, da pɔsin de nɔ de kip di prɔmis we i bin dɔn mek to Jiova. I go tan lɛk se da pɔsin de, de kip di motoka in ki dɛn. We wi gi wi layf to Jiova, wi de tɛl am se, “Na yu gɛt mi layf naw, nɔto mi gɛt am igen.” So wi fɔ du wetin Jiova want ɔltɛm ivin if nɔto sɔntin we wi want fɔ du. Lɛ wi falamakata Jizɔs, we se: “A nɔ kɔmɔt na ɛvin kam fɔ du wetin a want, a kam fɔ du wetin di wan we sɛn mi want mi fɔ du.”—Jɔn 6:​38.

18, 19. (a) Aw di tin dɛn we Roz ɛn Kristofa tɔk sho se fɔ baptayz na big big ɔnɔ we de kam wit bɔku blɛsin? (b) Aw yu fil bɔt di ɔnɔ we yu gɛt fɔ baptayz?

¹⁸ Wi dɔn si klia wan se fɔ baptayz na sɔntin we rili siriɔs. Na big big ɔnɔ fɔ gi yu layf to Jiova ɛn baptayz. Yɔŋ wan dɛn we lɛk Jiova ɛn we ɔndastand wetin i min fɔ gi dɛn layf to Jiova nɔ de fred fɔ gi dɛn layf to Gɔd ɛn baptayz. Dɛn nɔ kin rigrɛt we dɛn disayd fɔ du dis. Wan yɔŋ sista we dɔn baptayz we nem Roz tɔk se: “A lɛk Jiova, ɛn natin nɔ go mek a gladi pas fɔ sav am. We a baptayz, a rili biliv se a dɔn du di rayt tin. A nɔ ɛva shɔ bɔt ɛnitin so na mi layf.”

¹⁹ Bɔt wetin wi go se bɔt Kristofa we wi bin tɔk bɔt na di biginin? Aw i fil we i disayd fɔ baptayz we i ol 12 ia? I se i rili gladi we i bin disayd fɔ du dat. I bi rɛgyula payɔnia we i ol 17 ia ɛn i bi ministerial savant we i ol 18 ia. Tide i de wok na Bɛtɛl. I se: “Fɔ baptayz na di rayt tin we a bin disayd fɔ du. A de fil fayn we a de wok fɔ Jiova ɛn in ɔganayzeshɔn.” Aw yu go pripia if yu want fɔ baptayz? Di nɛks atikul go ansa da kwɛstyɔn de.