Sɔm Livayt dɛn we nɔto bin prist bin gɛt ɔda wok dɛn lɛk fɔ bi polisman dɛn. Na di kaptin we bin de na di tɛmpul bin de tɛl dɛn wetin fɔ du. Wan man we bin de rayt buk dɛn we na bin Ju, we nem Filo bin tɔk bɔt aw di ɔfisa dɛn wok bin tan lɛk, we i se: “Sɔm pan dɛn [Livayt dɛn] ya bin de gayd di domɔt dɛn na di tɛmpul usay pipul dɛn bin de pas go insay, ɔda wan dɛn bin de as gaydman dɛn insay [di tɛmpul] ɛn dɛn de mek shɔ se nɔbɔdi nɔ de go insay di tɛmpul we dɛn nɔ alaw am fɔ go de, ivin bay mistek sɛf. Sɔm kin waka rawnd di tɛmpul fɔ gayd am. Ɔda ɔfisa dɛn kin kam chenj shift we dɛn tɔn rich ɛn dɛn de wok bay tɔn de ɛn nɛt.”

Di Sanɛndrin kin aks dɛn polisman dɛn ya fɔ ɛp dɛn. Dis na bin di wangren Ju grup we di Roman gɔvmɛnt bin alaw fɔ ol wɛpɔn dɛn.

Wan masta sabi bukman we nem Joakim Jɛrimayas, bin ɛksplen se we di ɔfisa dɛn bin kam arɛst Jizɔs, i aks dɛn wetin mek dɛn nɔ bin arɛst am we i bin de tich na di tɛmpul. Jizɔs nɔ bin fɔ dɔn aks dis kwɛstyɔn if dɛn ɔfisa dɛn de nɔ bin de pat pan di polis dɛn we bin de na di tɛmpul. (Mat. 26:​55) Di sem masta sabi bukman bin biliv se, di wan dɛn we dɛn bin sɛn fɔs fɔ kam arɛst Jizɔs, dɛnsɛf na bin polisman dɛn we bin de na di tɛmpul. (Jɔn 7:​32, 45, 46) Leta, di Sanɛndrin bin sɛn sɔm ɔfisa dɛn ɛn dɛn kaptin dɛn we bin de na di tɛmpul fɔ go kam wit Jizɔs in disaypul dɛn. I go bi se bak, na di sem polisman dɛn we bin de na di tɛmpul bin go drɛg di apɔsul Pɔl kɔmɔt na di tɛmpul.—Akt 4:​1-3; 5:​17-27, NWT; 21:​27-30.