1. Uskayn prɔblɛm dɛn we Jiova in pipul dɛn kin gɛt?

YU DE go tru siriɔs prɔblɛm? Sɔntɛm sɔmbɔdi na di kɔngrigeshɔn dɔn ɔfɛn yu. (Jems 3:​2) Ɔ sɔntɛm yu wokmet ɔ skulmet dɛn de provok yu bikɔs yu de sav Jiova. (1 Pit. 4:​3, 4) Ɔ pɔsin na yu famili de tray fɔ stɔp yu mek yu nɔ go mitin ɔ mek yu nɔ tɔk to ɔda pipul dɛn bɔt wetin yu biliv. (Mat. 10:​35, 36) If di tin we de mɔna yu de mek yu at rili pwɛl, sɔntɛm yu go de tink se i bɛtɛ lɛ yu stɔp fɔ sav Jiova. Bɔt yu fɔ gɛt kɔnfidɛns se i nɔ mata wetin de apin to yu, Jiova go gi yu sɛns fɔ dil wit di prɔblɛm, ɛn yu go gɛt di trɛnk fɔ bia am.

2. Wetin Romans 15:​4 se go apin we wi rid di Baybul?

² Jiova mek shɔ se dɛn rayt bɔt ɛgzampul dɛn insay di Baybul we de sho wi aw pipul dɛn we nɔ pafɛkt bin ebul bia di prɔblɛm dɛn we bin de mit dɛn. Wetin mek? So dat wi go lan frɔm dɛn ɛgzampul dɛn. Na dat Jiova bin mek lɛ di apɔsul Pɔl rayt. (Rid Romans 15:​4.) We wi rid bɔt dɛn ɛgzampul dɛn ya, i de gi wi kɔrej ɛn op. Bɔt fɔ lɛ wi go bɛnifit, wi nɔ fɔ jɔs rid di Baybul. Wi fɔ alaw di Skripchɔ dɛn fɔ shep di we aw wi de tink, ɛn alaw am fɔ tɔch wi at. Wetin wi go du if wi de luk fɔ we aw fɔ sɔlv wan prɔblɛm we wi gɛt? Wi kin du dɛn 4 tin dɛn ya: (1) Pre, (2) Imajin, (3) Tink gud gud wan, ɛn (4) Du wetin yu dɔn lan. Lɛ wi tɔk bɔt aw wi go du ɛniwan pan dɛn tin dɛn ya. * Dɔn wi go yuz dɛn we dɛn ya fɔ stɔdi fɔ  lan frɔm wetin bin apin to Kiŋ Devid ɛn apɔsul Pɔl.

3. Bifo yu bigin fɔ rid di Baybul, wetin yu fɔ du? Wetin mek?

³ (1) Pre. Bifo yu bigin fɔ rid di Baybul, aks Jiova fɔ ɛp yu so dat yu go ebul fɔ si aw yu go bɛnifit frɔm wetin yu de rid. Fɔ ɛgzampul, if yu de luk fɔ advays fɔ mek yu go no aw fɔ bia wit wan prɔblɛm, aks Jiova fɔ ɛp yu fɔ luk fɔ prinsipul dɛn we de insay in Wɔd we go gayd yu.—Fil. 4:​6, 7; Jems 1:​5.

4. Wetin go ɛp yu fɔ ɔndastand di tin we yu de rid bɔt na di Baybul?

⁴ (2) Imajin. Wan wɔndaful we aw Jiova mek wi, na we wi ebul fɔ imajin. Fɔ mek yu go ebul fɔ ɔndastand wetin yu de rid na di Baybul, tray fɔ imajin wetin de apin, ɛn tray fɔ si yusɛf lɛk di pɔsin we yu de rid bɔt. Tray fɔ si di tin we di pɔsin we yu de rid bɔt insɛf si, ɛn tray fɔ fil di we aw insɛf go dɔn fil.

5. Wetin yu fɔ tink gud gud wan bɔt, ɛn aw yu go du am?

⁵ (3) Tink gud gud wan. Yu fɔ tink gud gud wan bɔt wetin yu de rid ɛn bɔt aw wetin yu de rid go ɛp yu. We yu tink gud gud wan, i go ɛp yu fɔ ɔndastand wetin yu de rid. Fɔ rid di Baybul we yu nɔ de tink gud gud wan bɔt am jɔs tan lɛk we telɔ de kɔt kɔt matirial, bɔt i nɔ so am. Fɔ tink gud gud wan tan lɛk we telɔ de so di kɔt kɔt matirial dɛn. Dat go mek i si di fayn klos we i go dɔn so dɔn. Fɔ mek yu go ebul tink gud gud wan, yu kin aks ɛn ansa dɛn kwɛstyɔn dɛn ya: ‘Wetin di pɔsin we a de rid bɔt na di Baybul bin du fɔ ɛp insɛf? Aw Jiova bin ɛp am? Aw di lɛsin dɛn we a lan go ɛp mi fɔ bia prɔblɛm dɛn?’

6. Wetin mek wi fɔ du di tin dɛn we wi de lan?

⁶ (4) Du wetin yu dɔn lan. Jizɔs bin se if wi nɔ de du wetin wi de lan, wi go jɔs tan lɛk wan man we bil in os pan sansan. I wok tranga wan, bɔt ɔl wetin i du go fɔ natin. Wetin mek? Bikɔs we briz blo di os ɛn bɔku wata kam insay de, di os fɔdɔm. (Mat. 7:​24-27) Semweso, if wi pre, imajin, ɛn tink gud gud wan, bɔt wi nɔ du wetin wi de lan, ɔl wetin wi de du go go fɔ natin. So we prɔblɛm mit wi ɔ pipul dɛn mek wi sɔfa, wi fet nɔ go strɔng. Bɔt we wi stɔdi ɛn du wetin wi de lan, wi go ebul disayd fɔ du tin dɛn di rayt we, wi go gɛt pis, ɛn wi go gɛt strɔng fet. (Ayz. 48:​17, 18) Lɛ wi yuz di 4 tin dɛn we wi jɔs dɔn tɔk bɔt, ɛn si wetin wi go lan frɔm wetin bin apin to Kiŋ Devid.

7. Us ɛgzampul na di Baybul wi de kam tɔk bɔt?

⁷ Yu padi ɔ yu fambul dɔn du yu bad? If na so i bi, yu go bɛnifit bay we yu lan bɔt Kiŋ Devid in bɔypikin Absalɔm, we bin du in papa bad ɛn tray fɔ bi kiŋ.—2 Sam. 15:​5-14, 31; 18:​6-14.

8. Wetin yu go du fɔ mek Jiova ɛp yu?

⁸ (1) Pre. As yu de tink bɔt di Baybul ɛgzampul, tɛl Jiova aw yu de fil bɔt di bad we we dɛn bin trit yu. (Sam 6:​6-9) Tɛl Jiova aw yu de rili fil. Dɔn aks Jiova fɔ ɛp yu fɔ fɛn prinsipul dɛn we go gayd yu as yu de tray fɔ bia di prɔblɛm we yu gɛt.

9. Tɔk smɔl bɔt wetin apin bitwin Devid ɛn Absalɔm.

⁹ (2) Imajin. Tink bɔt wetin apin na dis ɛgzampul, ɛn imajin aw i go dɔn afɛkt Kiŋ Devid. Fɔ lɔng tɛm, Devid in  bɔypikin Absalɔm bin de du tin dɛn fɔ mek di pipul dɛn lɛk am. (2 Sam. 15:​7) We Absalɔm tink se tɛm dɔn rich fɔ mek dɛn mek am kiŋ, i sɛn spay dɛn ɔlsay na Izrɛl fɔ rɛdi di pipul dɛn so dat dɛn go tek am as dɛn kiŋ. I bin ivin mek Aitofɛl we na Devid in tayt padi ɛn advaysa jɔyn am fɔ tɔn in bak pan Devid. Absalɔm mek insɛf kiŋ, dɔn i tray fɔ kech ɛn kil Devid, we sɔntɛm bin sik siriɔs wan da tɛm de. (Sam 41:​1-9) Devid kam fɔ no bɔt Absalɔm in plan, ɛn i rɔnawe kɔmɔt na Jerusɛlɛm. Absalɔm in sojaman dɛn bin fɛt wit Devid in sojaman dɛn we nɔ kɔmɔt biɛn am. Devid in sojaman dɛn win di fɛt, ɛn dɛn kil Absalɔm.

10. Wetin Kiŋ Devid bin fɔ dɔn du?

¹⁰ Dɔn, imajin aw Devid go dɔn fil we ɔl dɛn tin ya bin de apin to am. I bin lɛk Absalɔm, ɛn i bin trɔst Aitofɛl. Bɔt dɛn ɔl tu kɔmɔt biɛn am. Dɛn bin rili mek Devid fil bad, ɛn dɛn ivin tray fɔ kil am. Dat bin fɔ dɔn mek Devid nɔ trɔst in ɔda padi dɛn igen, bikɔs i go dɔn tink se dɛnsɛf bin jɔyn Absalɔm. Devid bin fɔ dɔn tink bɔt insɛf nɔmɔ ɛn tray fɔ rɔnawe kɔmɔt na di kɔntri in wan. Ɔ dis bin fɔ dɔn mek in at rili pwɛl. Bɔt Devid nɔ bin du ɛniwan pan dɛn tin dɛn ya. Bifo dat, i fɛn we fɔ bia di prɔblɛm. Wetin mek i bin ebul fɔ du dat?

11. Wetin Devid bin du we i gɛt dis prɔblɛm?

¹¹ (3) Tink gud gud wan. Us prinsipul dɛn we yu go lan frɔm dis ɛgzampul? Ansa dis kwɛstyɔn we se, “Wetin Devid du fɔ ɛp insɛf?” Devid nɔ bin fred ɛn disayd fɔ du sɔntin wantɛm wantɛm we nɔ mek sɛns. Dɔn bak, i nɔ bin so wɔri dat i nɔ bin ebul fɔ disayd fɔ du sɔntin. Bifo dat, i pre fɔ mek Jiova ɛp am. I aks in padi dɛn bak fɔ ɛp am. Ɛn i du sɔntin kwik kwik wan so dat i go du wetin i dɔn disayd fɔ du. Pan ɔl we Devid bin rili fil bad, dat nɔ mek i nɔ trɔst in padi dɛn igen, ɛn i nɔ et dɛn. I kɔntinyu fɔ trɔst Jiova ɛn in padi dɛn.

12. Wetin Jiova bin du fɔ ɛp Devid?

¹² Aw Jiova bin ɛp Devid? We yu du risach, yu go lan se Jiova bin gi Devid di trɛnk we i nid fɔ bia dis prɔblɛm. (Sam 3:​1-8; di ɛdin) Jiova bin blɛs di tin dɛn we Devid bin disayd fɔ du. Ɛn i sɔpɔt Devid in padi dɛn we nɔ bin kɔmɔt biɛn am as dɛn bin de fɛt fɔ protɛkt dɛn kiŋ.

13. Aw yu go falamakata Devid if ɔda pɔsin du sɔntin we mek yu rili fil bad? (Matyu 18:​15-17)

¹³ (4) Du wetin yu dɔn lan. Aks yusɛf dis kwɛstyɔn, ‘Aw a go falamakata Devid?’ Yu go nid fɔ du sɔntin wantɛm wantɛm fɔ sɔlv di prɔblɛm. Akɔdin to wetin apin, yu kin fala di advays we Jizɔs gi na Matyu chapta 18, ɔ yu kin fala di prinsipul we de de. (Rid Matyu 18:​15-17.) Bɔt yu nɔ fɔ disayd fɔ du sɔntin wantɛm wantɛm we yu vɛks. Yu fɔ pre mek Jiova ɛp yu fɔ tek tɛm du tin ɛn fɔ gi yu sɛns fɔ mek yu no wetin fɔ du. Kɔntinyu fɔ trɔst yu padi dɛn, ɛn rɛdi fɔ mek dɛn ɛp yu. (Prɔv. 17:​17, NWT) Di tin we impɔtant pas ɔl na fɔ fala di advays we Jiova de gi yu insay in Wɔd.—Prɔv. 3:​5, 6.

14. Ustɛm 2 Timoti 1:​12-16; 4:​6-11, 17-22 go ɛnkɔrej yu?

¹⁴ Pipul dɛn na yu famili de agens yu bikɔs yu de sav Jiova? Ɔ yu de na kɔntri  usay dɛn ban di wok we Jiova in pipul dɛn de du, ɔ dɛn nɔ de alaw wi brɔda dɛn fɔ du ɔltin we i kam pan dɛn wɔship? If na so i bi, wetin de na 2 Timoti 1:​12-16 ɛn 4:​6-11, 17-22 * go ɛnkɔrej yu we yu rid dɛn. Pɔl bin rayt dis pat na di Baybul we i bin de na prizin.

15. Wetin yu fɔ aks Jiova fɔ?

¹⁵ (1) Pre. Bifo yu rid dɛn vas dɛn de, tɛl Jiova bɔt yu prɔblɛm, ɛn tɛl am aw dat de mek yu rili fil. Dɔn aks Jiova fɔ ɛp yu mek yu fɛn prinsipul dɛn insay wetin yu de rid bɔt wetin apin to Pɔl we go ɛp yu fɔ no wetin fɔ du wit di prɔblɛm we yu gɛt.

16. Tɔk smɔl bɔt wetin apin to Pɔl.

¹⁶ (2) Imajin. Imajin se yu na Pɔl. Dɛn chen am, ɛn i de na prizin na Rom. Dɛn bin dɔn put am na prizin bifo dis tɛm, bɔt dis tɛm i bin no se dɛn go kil am. Sɔm pan in padi dɛn bin dɔn lɛf am, ɛn i bin rili taya.—2 Tim. 1:​15.

17. Wetin Pɔl bin fɔ dɔn du?

¹⁷ Pɔl bin fɔ dɔn tink bɔt wetin bin apin to am trade. I bin fɔ dɔn tink se if i nɔ bin fɔ dɔn bi Kristian, sɔntɛm dɛn nɔ bin fɔ arɛst am. I bin fɔ dɔn vɛks pan di man dɛn we de na Eshia distrikt we bin lɛf am, ɛn i nɔ bin fɔ trɔst in ɔda padi dɛn igen. Bɔt Pɔl nɔ du ɛniwan pan dɛn tin dɛn de. Wetin mek Pɔl bin shɔ se in padi dɛn nɔ go kɔmɔt biɛn am ɛn Jiova go blɛs am?

18. Wetin Pɔl bin du we i gɛt dis prɔblɛm?

¹⁸ (3) Tink gud gud wan. Ansa dis kwɛstyɔn we se, “Wetin Pɔl du fɔ ɛp insɛf?” Pan ɔl we Pɔl bin no se i go day jisnɔ, dat nɔ bin mek i fɔgɛt se i rili impɔtant fɔ briŋ glori to Jiova. Ɛn i bin kɔntinyu fɔ tink bɔt aw i go ɛnkɔrej ɔda pipul dɛn. I bin sho se i abop pan Jiova bay we i bin de pre ɔltɛm. (2 Tim. 1:​3) Bifo i kɔntinyu fɔ tink bɔt di wan dɛn we kɔmɔt biɛn am, i sho se i rili gladi fɔ di ɛp we in padi dɛn we nɔ kɔmɔt biɛn am bin gi am. Pantap dat, Pɔl bin kɔntinyu fɔ stɔdi Gɔd in Wɔd. (2 Tim. 3:​16, 17; 4:​13) Wetin bin impɔtant pas ɔl, na we i bin gɛt kɔnfidɛns se Jiova ɛn Jizɔs lɛk am. Dɛn nɔ bin kɔmɔt biɛn am, ɛn i bin gɛt kɔnfidɛns se dɛn go blɛs am fɔ di wok we i du.

19. Aw Jiova bin ɛp Pɔl?

¹⁹ Jiova bin tɛl Pɔl se i go gɛt fɔ bia we pipul dɛn mek i sɔfa fɔ we in na Kristian. (Akt 21:​11-13) Aw Jiova bin ɛp Pɔl? I bin ansa Pɔl in prea dɛn, ɛn as tɛm bin de go, i gi am pawa. (2 Tim. 4:​17) Jiova tɛl Pɔl se i go gɛt di blɛsin we i dɔn wok tranga wan fɔ. Dɔn bak, Jiova bin yuz Pɔl in padi dɛn we nɔ bin kɔmɔt biɛn am fɔ ɛp am.

20. Aw wi go falamakata Pɔl we wi mɛmba wetin de na Romans 8:​38, 39?

²⁰ (4) Du wetin yu dɔn lan. Aks yusɛf dis kwɛstyɔn, ‘Aw a go falamakata Pɔl?’ Jɔs lɛk Pɔl, wi fɔ ɛkspɛkt se pipul dɛn go mek wi sɔfa bikɔs wi de sav Jiova. (Mak 10:​29, 30) Fɔ mek wi go kɔntinyu fɔ fetful to Jiova we wi gɛt prɔblɛm, wi fɔ de pre to am ɛn stɔdi in Wɔd ɔltɛm. Ɛn wi fɔ mɛmba ɔltɛm se di tin we impɔtant pas ɔl na fɔ briŋ glori to Jiova. Wi gɛt kɔnfidɛns se Jiova nɔ go ɛva kɔmɔt biɛn wi, ɛn natin nɔ de we pɔsin go du we go mek I lɛf fɔ lɛk wi.—Rid Romans 8:​38, 39; Ibru. 13:​5, 6.

21. Wetin bin ɛp Aya ɛn Ɛktɔ fɔ sɔlv dɛn prɔblɛm dɛn?

²¹ Ilɛk wetin apin to wi, di ɛgzampul dɛn na di Baybul go ɛp wi fɔ mek wi gɛt di trɛnk we wi nid fɔ bia ɛni prɔblɛm. Fɔ ɛgzampul, wan payɔnia na Jepan we nem Aya bin se di stori bɔt Jona bin ɛp am fɔ mek i nɔ fred we i de du pɔblik prichin. Wan yɔŋ brɔda we de na Indonishia we nem Ɛktɔ, we in mama ɛn papa nɔ de sav Jiova, bin se Rut in ɛgzampul bin ɛp am fɔ mek i lan bɔt Jiova ɛn sav am.

22. Wetin go ɛp yu fɔ mek yu bɛnifit frɔm Baybul drama dɛn ɔ di “Imitate Their Faith” atikul dɛn?

²² Usay yu go fɛn Baybul ɛgzampul dɛn we go ɛp yu? Wi vidio dɛn, odio drama dɛn, ɛn di “Imitate Their Faith” atikul dɛn go ɛp wi fɔ ɔndastand wetin de insay di Baybul. * Bifo yu wach, lisin, ɔ rid dɛn ɛgzampul dɛn ya na di Baybul, na fɔ pre to Jiova mek i ɛp yu fɔ si impɔtant lɛsin dɛn we yu go lan frɔm. Imajin se na yu na di pɔsin we yu de lan bɔt. Tink gud gud wan bɔt wetin Jiova dɛn in fetful dɛn ya bin du, ɛn aw Jiova ɛp dɛn fɔ sɔlv dɛn prɔblɛm dɛn. Dɔn bak, du wetin yu dɔn lan we yusɛf gɛt prɔblɛm dɛn. Tɛl Jiova tɛnki fɔ we i de ɛp yu. Ɛn sho se yu gladi fɔ di tin dɛn we Jiova dɔn du fɔ yu, bay we yu de luk fɔ we dɛn fɔ ɛnkɔrej ɛn sɔpɔt ɔda pipul dɛn.

23. Akɔdin to Ayzaya 41:​10, 13, wetin Jiova dɔn prɔmis fɔ du fɔ wi?

²³ Layf na Setan in wɔl nɔ kin rili izi, ɛn sɔntɛnde, wi nɔ kin no wetin fɔ du. (2 Tim. 3:​1) Bɔt wi nɔ nid fɔ wɔri ɔ fred. Jiova sabi di prɔblɛm dɛn we wi gɛt. We wi fɔdɔm, Jiova dɔn prɔmis se i go ol wi wit in rayt an we rili strɔng. (Rid Ayzaya 41:​10, 13.) Wi shɔ se Jiova go ɛp wi, ɛn di Baybul de gi wi trɛnk fɔ mek wi bia ɛni prɔblɛm we wi gɛt.