1. Wetin wi no bɔt wi yɔŋ brɔda dɛn?

YƆŊ brɔda dɛn, bɔku tin dɛn de we una go ebul fɔ du. Plɛnti pan una gɛt trɛnk ɛn bɔku ɛnaji. (Prɔv. 20:​29) Una kin du bɔku tin dɛn fɔ ɛp di brɔda ɛn sista dɛn na di kɔngrigeshɔn. Ɛn sɔntɛm, una go want fɔ bi ministerial savant. Bɔt sɔntɛm yu go de tink se ɔda pipul dɛn go se yu tu yɔŋ ɔ yu nɔ no bɛtɛ tin dɛn fɔ mek dɛn go gi yu impɔtant wok dɛn. Pan ɔl we yu yɔŋ, sɔm tin dɛn de we yu ebul du rayt naw fɔ mek dɛn rɛspɛkt ɛn abop pan yu na di kɔngrigeshɔn.

2. Wetin wi go tɔk bɔt insay dis atikul?

² Insay dis atikul, wi go tɔk mɔ bɔt Kiŋ Devid in ɛgzampul. Dɔn bak, wi go tɔk smɔl bɔt sɔm tin dɛn we bin apin to Esa ɛn Jɛoshafat, we na bin tu kiŋ dɛn na Juda. Wi go tɔk bɔt di prɔblɛm dɛn we bin mit dɛn tri man dɛn ya, wetin dɛn bin du fɔ sɔlv dɛn, ɛn us lɛsin dɛn yɔŋ brɔda dɛn kin lan frɔm dɛn ɛgzampul.

3. Wetin na wan pan di we dɛn we yɔŋ brɔda dɛn kin ɛp di ol wan dɛn na di kɔngrigeshɔn?

³ We Devid na bin yɔŋ man, i bin sabi fɔ du tin dɛn we bin de ɛp ɔda pipul dɛn. Devid bin gɛt tayt padi biznɛs wit Jiova, ɛn in na bin myuzishian. I bin de yuz da in talɛnt de fɔ ɛp Sɔl, we Gɔd bin pik as kiŋ. (1 Sam. 16:​16, 23) Yɔŋ man dɛn, ɛnitin de we una sabi  du ɛn we una kin yuz fɔ ɛp di brɔda ɛn sista dɛn na di kɔngrigeshɔn? Bɔku pan una gɛt tin dɛn we una sabi du. Fɔ ɛgzampul, yu go dɔn notis se sɔm brɔda ɛn sista dɛn we dɔn ol kin gladi we una kin ɛp dɛn fɔ mek dɛn sabi yuz dɛn tablɛt ɔ ɛni ɔda ilɛktronik tin dɛn fɔ mek dɛn du dɛn pasɔnal stɔdi ɛn fɔ di mitin dɛn. We yu sabi bɔt ilɛktronik tin dɛn, yu de ebul fɔ ɛp brɔda ɛn sista dɛn we dɔn ol fɔ mek dɛn go sabi yuz dɛn tin dɛn de.

4. Lɛk Devid, us kwaliti dɛn we yɔŋ brɔda dɛn fɔ gɛt? (Luk di pikchɔ na di frɔnt pej.)

⁴ Di tɛm we Devid bin de alayv, i bin sho se in na pɔsin we dɛn kin abop pan ɛn we de du in wok fayn. Fɔ ɛgzampul, we in na bin yɔŋ man, i bin de wok tranga wan fɔ kia fɔ in papa in ship dɛn. Da wok de bin de mek i put in layf pan denja. Devid leta tɛl Kiŋ Sɔl se “we i bin de mɛn in papa in ship dɛn, wan layɔn [ɛn] wan bia . . . atak dɛn ɛn tek wan pan di ship dɛn go. I se in . . . rɔnata di animal, wap am ɛn jɔg in ship kɔmɔt na di animal in mɔt.” (1 Sam. 17:​34, 35) Devid bin no se i fɔ kia fɔ in papa in ship dɛn, ɛn i nɔ bin de fred fɔ fɛt ɔda animal dɛn fɔ protɛkt dɛn. Yɔŋ brɔda dɛn kin falamakata Devid fɔ tray tranga wan fɔ du ɛnikayn wok we dɛn gi dɛn fɔ du.

5. Akɔdin to Prɔvabs 3:​32, wetin na di tin we impɔtant pas ɔl we yɔŋ brɔda dɛn kin du?

⁵ Yɔŋ Devid bin gɛt tayt padi biznɛs wit Jiova. Di padi biznɛs we Devid bin gɛt wit Jiova bin impɔtant pas di maynd we i bin gɛt, ɛn we i bin sabi fɔ ple myuzik. Jiova nɔ bin jɔs bi Devid in Gɔd nɔmɔ, bɔt dɛn na bin tayt padi bak. (Rid Prɔvabs 3:​32.) Yɔŋ brɔda dɛn, di tin we fɔ impɔtant pas ɔl na una layf na fɔ kɔntinyu fɔ gɛt tayt padi biznɛs wit una Papa we de na ɛvin, ɛn sɔntɛm dat go mek una gɛt bɔku wok dɛn fɔ du na di kɔngrigeshɔn.

6. Wetin na sɔm tin dɛn we pipul dɛn bin de tink bɔt Devid?

⁶ Wan prɔblɛm we Devid bin gɛt na we pipul dɛn bin de tink se i tu yɔŋ ɛn i nɔ ebul fɔ du natin. Fɔ ɛgzampul, we Devid bin se i go fɛt Golayath, Kiŋ Sɔl bin tray fɔ stɔp am bay we i se Devid “na smɔl bɔbɔ.” (1 Sam. 17:​31-33) Bifo da tɛm de,  Devid in yon brɔda sɛf tɛl am se i nɔ de du wok fayn. (1 Sam. 17:​26-30) Bɔt Jiova nɔ bin si Devid se i smɔl ɔ i nɔ de du wok fayn. I bin sabi dis yɔŋ man ya so gud gud wan. Ɛn Devid bin ebul fɔ kil Golayath bikɔs i bin abop pan in Padi, Jiova.—1 Sam. 17:​45, 48-51.

7. Wetin yu go lan frɔm wan tin we bin apin to Devid?

⁷ Wetin wi go lan frɔm wetin bin apin to Devid? Wi lan se wi nid fɔ peshɛnt. Sɔntɛm, i go tek tɛm fɔ mek di wan dɛn we bin sabi yu frɔm we yu smɔl stat fɔ si se yu dɔn tɔn big man. Bɔt mɛmba se Jiova nɔ de pe atɛnshɔn to aw yu luk lɛk. I sabi yu gud gud wan ɛn i no wetin yu ebul fɔ du. (1 Sam. 16:​7) Du wetin go mek yu padi biznɛs wit Jiova tayt. Devid bin du dat bay we i bin de kɔle di tin dɛn we Jiova dɔn mek. Devid bin de tink gud gud wan bɔt wetin dɛn tin dɛn de bin de tich am bɔt Jiova we mek dɛn. (Sam 8:​3, 4; 139:​14; Rom. 1:​20) Ɔda tin bak we yu kin du na we yu aks Jiova fɔ mek i gi yu trɛnk. Fɔ ɛgzampul, yu skulmet dɛn kin provok yu bikɔs yu na Jiova Witnɛs? If na so i bi, na fɔ pre to Jiova mek i ɛp yu fɔ bia dis prɔblɛm. Ɛn na fɔ du wetin yu de lan na di Baybul, wi buk ɛn magazin dɛn, ɛn wi vidio dɛn. Ɛnitɛm we yu si se Jiova de ansa yu prea we yu gɛt prɔblɛm, yu go kɔntinyu fɔ abop pan am mɔ ɛn mɔ. Dɔn bak, as ɔda pipul dɛn de si se yu de abop pan Jiova, na di mɔ dɛn go abop pan yu.

8-9. Wetin bin ɛp Devid fɔ mek i peshɛnt wet bifo i bigin fɔ rul as kiŋ? Wetin yɔŋ brɔda dɛn kin lan frɔm in ɛgzampul?

⁸ Lɛ wi tɔk bɔt ɔda prɔblɛm we bin mit Devid. Afta we dɛn bin anɔynt Devid fɔ bi kiŋ, i bin gɛt fɔ wet fɔ lɔng tɛm bifo i bigin fɔ rul as kiŋ na Juda. (1 Sam. 16:​13; 2 Sam. 2:​3, 4) Wetin bin ɛp Devid fɔ peshɛnt wet ɔl da tɛm de? Bifo Devid bin gɛt pwɛlat, i bin yuz di tɛm we i bin gɛt fɔ du ɔda tin dɛn. Fɔ ɛgzampul, we Devid bin de ayd pan Sɔl ɛn go na di Filistin dɛn tɛritri, i bin yuz da tɛm de fɔ fɛt Izrɛl dɛn ɛnimi dɛn. Ɛn we i bin de du dat, i bin de protɛkt Juda in tɛritri.—1 Sam. 27:​1-12.

⁹ Wetin yɔŋ brɔda dɛn kin lan frɔm Devid in ɛgzampul? Yuz ɛni chans we yu gɛt fɔ wok fɔ yu brɔda dɛn. Tink bɔt wetin bin apin to wan brɔda we nem Rikado. * We i bin de arawnd 13 ia, i bin want fɔ bi rɛgyula payɔnia. Bɔt di ɛlda dɛn bin tɛl am se i nɔ rɛdi yet. Bifo Rikado vɛks ɛn gɛt pwɛlat, i bin stat fɔ du mɔ na di prichin wok. I se: “We a de mɛmba, a si se i bin gud fɔ mek a mek sɔm ajɔstmɛnt dɛn. A bin de mek shɔ se a go bak to ɔl di wan dɛn we bin want fɔ no mɔ, ɛn a bin de pripia gud gud wan fɔ go de. A ivin kɔndɔkt mi fɔs Baybul stɔdi. Di mɔ we a bin de prich, na di mɔ a bin de gɛt kɔnfidɛns.” Naw Rikado de sav as rɛgyula payɔnia ɛn ministerial savant.

10. Wetin Devid bin du wan tɛm we i bin nid fɔ disayd fɔ du wan impɔtant tin?

¹⁰ Lɛ wi tɔk bɔt ɔda tin we bin apin to Devid. We Devid bin de ayd frɔm Sɔl na di Filistin dɛn tɛritri, in ɛn in man dɛn bin lɛf dɛn famili dɛn na os, ɛn dɛn go fɛt wɔ. We Devid ɛn in man dɛn nɔ bin de, ɛnimi dɛn kam na dɛn os ɛn kapchɔ dɛn famili dɛn. Devid bin fɔ dɔn tink se bikɔs i sabi fɛt wɔ, i fɔ bin dɔn izi fɔ mek i plan fɔ mek dɛn go tek dɛn famili dɛn bak. Bɔt  Devid bin aks Jiova fɔ mek i ɛp am. Wan prist we nem Abiata bin ɛp Devid we i de aks Jiova “if i fɔ rɔnata di pipul dɛn.” Jiova bin tɛl Devid mek i go, ɛn I bin tɛl am bak se i go ebul fɔ sev dɛn famili dɛn. (1 Sam. 30:​7-10) Wetin yu lan frɔm dis tin we apin?

11. Wetin yu go du bifo yu disayd fɔ du sɔm tin dɛn?

¹¹ Bifo yu disayd fɔ du sɔm tin dɛn, na fɔ aks ɔda pipul dɛn fɔ advays. Na fɔ tɔk to yu mama ɛn papa. Dɔn bak, yu kin gɛt gud advays we yu tɔk to ɛkspiriɛns ɛlda dɛn. Jiova trɔst dɛn man dɛn ya we i dɔn pik, ɛn yusɛf go ebul fɔ du so. Jiova de si dɛn man dɛn ya as “gift” we i dɔn gi di kɔngrigeshɔn. (Ɛfi. 4:​8) Yu go ebul fɔ disayd fɔ du di rayt tin if yu falamakata di fet we dɛn gɛt, ɛn we yu lisin to di fayn advays dɛn we dɛn de gi yu. Naw lɛ wi tɔk bɔt wetin wi go lan frɔm Kiŋ Esa.

12. Us kwaliti dɛn we Kiŋ Esa bin gɛt we i bigin fɔ rul?

¹² As yɔŋ man, Kiŋ Esa bin de put insɛf dɔŋ, ɛn i bin gɛt maynd. Fɔ ɛgzampul, afta we in papa we nem Abija bin day, Esa bin bi kiŋ, ɛn i stat fɔ pul ɔl di aydɔl dɛn we bin de na di land. Dɔn bak, i “tɛl Juda traŋa wan fɔ pre to PAPA GƆD [“Jiova,” NWT] we na dɛn papa dɛn Gɔd ɛn fɛnɔt wetin i want, obe di lɔ, ɛn du ɔl wetin i tɛl dɛn traŋa wan se, dɛn fɔ de du.” (2 Kro. 14:​1-7) Ɛn we Zera di Itiopian bin kam Juda wit 1,000,000 sojaman dɛn, Esa bin aks Jiova fɔ mek i ɛp am we i se: “PAPA GƆD [“Jiova,” NWT], nɔn Gɔd nɔ de we ebul ɛp wik pɔsin we pɔsin we gɛt trɛnk atak am, lɛk yu. Duya PAPA GƆD [“Jiova,” NWT] we na wi Gɔd, ɛp wi, bikɔs na yu wi abop pan.” Dɛn fayn wɔd dɛn ya we Esa bin tɔk sho se i gɛt strɔng fet pan Jiova in pawa fɔ sev in ɛn in pipul dɛn. Esa bin abop pan in Papa we de na ɛvin, ɛn “PAPA GƆD [“Jiova,” NWT] bit di Itiopian dɛm.”—2 Kro. 14:​8-12.

13. Wetin bin apin to Esa leta? Wetin mek?

¹³ Yusɛf go gri se yu bin fɔ dɔn fred we yu si 1,000,000 sojaman dɛn we kam fɔ fɛt yu. Bɔt Esa bin abop pan Jiova, ɛn i bin win. Bɔt we Esa bin gɛt ɔda  prɔblɛm, i nɔ bin abop pan Jiova. We wan wikɛd kiŋ we nem Baasha we bin de na Izrɛl bin trɛtin am, i bin tɔn to di kiŋ na Siria fɔ ɛp am. We i bin disayd fɔ du dat, i briŋ big prɔblɛm fɔ am. Jiova bin yuz in prɔfɛt we nem Anani fɔ tɛl Esa se: “Bikɔs yu abop pan di kiŋ na Siria, ɛn yu nɔ bin abop pan PAPA GƆD [“Jiova,” NWT] we na yu Gɔd, di kiŋ na Siria in ami dɔn kɔmɔt biɛn yu.” Infakt, frɔm da tɛm de, Esa bin de fɛt wɔ ɔltɛm. (2 Kro. 16:​7, 9; 1 Kiŋ 15:​32) Us lɛsin we wi lan?

14. Aw yu go ebul fɔ abop pan Jiova? Akɔdin to 1 Timoti 4:​12, wetin yu go bi if yu du dat?

¹⁴ Kɔntinyu fɔ put yusɛf dɔŋ ɛn abop pan Jiova. We yu bin baptayz, yu bin sho se yu gɛt strɔng fet pan Jiova, ɛn yu abop pan am. Ɛn Jiova bin rili gladi fɔ wɛlkɔm yu na in famili. Di tin we yu fɔ du naw na fɔ kɔntinyu fɔ abop pan Jiova. I tan lɛk se i kin izi fɔ abop pan Jiova ɛnitɛm we yu nid fɔ disayd fɔ du sɔm tin dɛn we rili impɔtant. Bɔt wetin yu go du ɔda tɛm dɛn? I rili impɔtant fɔ mek yu abop pan Jiova we yu go nid fɔ disayd fɔ du ɛnitin lɛk we i kam to fɔ ɛnjɔy yusɛf, us wok we yu go du, ɛn di gol dɛn we yu go sɛt. Nɔ abop pan yu yon sɛns. Bifo dat, na fɔ luk fɔ Baybul prinsipul dɛn we gɛt fɔ du wit wetin yu want fɔ disayd, ɛn tray fɔ fala da dayrɛkshɔn de. (Prɔv. 3:​5, 6) If yu du dat, yu go mek Jiova gladi, ɛn yu go gɛt rɛspɛkt frɔm yu brɔda ɛn sista dɛn na yu kɔngrigeshɔn.—Rid 1 Timoti 4:​12.

15. Akɔdin to Sɛkɛn Kronikul 18:​1-3; 19:​2, us mistek dɛn we Kiŋ Jɛoshafat bin mek?

¹⁵ Na tru se jɔs lɛk aw wi nɔ pafɛkt, na so yusɛf nɔ pafɛkt, ɛn sɔntɛnde, yu go mek mistek. Bɔt dat nɔ fɔ mek yu nɔ du wetin yu ebul du fɔ sav Jiova. Lɛ wi tɔk bɔt Kiŋ Jɛoshafat in ɛgzampul. I bin gɛt bɔku fayn kwaliti dɛn. We in na bin yɔŋ man, i “bin de wɔship in papa in Gɔd ɛn [i] bin de du wetin PAPA GƆD tɛl dɛn traŋa wan se dɛn fɔ de du.” Dɔn bak, i bin sɛn prins dɛn fɔ go ɔlsay na Juda fɔ tich di pipul dɛn bɔt Jiova. (2 Kro. 17:​4, 7) Pan ɔl we Jɛoshafat bin gɛt klinat, i bin de du sɔm tin dɛn we nɔ bin fayn. Jɛoshafat bin gɛt strɔng advays frɔm wan pan Jiova  in savant dɛn, bikɔs ɔf wan pan di tin dɛn we i bin disayd fɔ du. (Rid Sɛkɛn Kronikul 18:​1-3; 19:​2.) Us lɛsin yu lan frɔm in ɛgzampul?

16. Wetin yu lan frɔm Rajiv in ɛkspiriɛns?

¹⁶ Na fɔ tek advays, ɛn du wetin dɛn tɛl yu fɔ du. Sɔntɛm, lɛk bɔku yɔŋ man dɛn, i nɔ kin izi fɔ lɛ yu mek yu savis to Jiova bi di tin we impɔtant to yu pas ɛni ɔda tin. Yu nɔ fɔ pwɛlat. Tink bɔt wetin bin apin to wan brɔda we nem Rajiv. We i bin de tɔk bɔt wetin apin we i bin de arawnd 13 to 19 ia, i bin se: “Tɛm dɛn bin de we a nɔ bin no wetin a want fɔ du wit mi layf. Lɛk bɔku ɔda yɔŋ wan dɛn, a bin lɛk fɔ ple gem dɛn ɛn ɛnjɔy misɛf, bɔt a nɔ bin lɛk fɔ go mitin ɔ fil savis.” Wetin bin ɛp Rajiv? Wan ɛlda we bin bisin bɔt am bin gi am sɔm advays dɛn. Rajiv se: “I bin ɛp mi fɔ tink bɔt di prinsipul we de na 1 Timoti 4:​8.” Rajiv bin put insɛf dɔŋ ɛn lisin to di advays, ɛn dat bin ɛp am fɔ put wetin impɔtant fɔs na in layf. I se: “A bin disayd fɔ mek mi savis to Jiova bi di tin we impɔtant pas ɔl na mi layf.” Wetin bin apin we i du dat? Rajiv bin tɔk se: “Afta sɔm tɛm we da ɛlda advays mi, naw a de sav as ministerial savant.”

17. Aw di ol wan dɛn de fil bɔt di yɔŋ man dɛn we de sav Jiova?

¹⁷ Di wan dɛn we dɔn ol de gladi we dɛn si se dɛn ɛn una we na yɔŋ man dɛn de sav Jiova wit “wanwɔd.” (Zɛf. 3:​9, NWT) Dɛn kin lɛk we dɛn si se una de du di wok dɛn we dɛn gi una wit zil. Dɛn de gladi fɔ si una.—1 Jɔn 2:​14.

18. Akɔdin to Prɔvabs 27:​11, aw Jiova de fil bɔt yɔŋ man dɛn we de sav am?

¹⁸ Yɔŋ brɔda dɛn, una nɔ ɛva fɔgɛt se Jiova lɛk ɛn trɔst una. I bin tɔk se insay di las dez, wi go gɛt bɔku yɔŋ man dɛn we go rɛdi dɛnsɛf fɔ wok fɔ am. (Sam 110:​1-3, NWT) I no se una lɛk am, ɛn una want fɔ gi am una bɛst we una de sav am. So na fɔ peshɛnt wit ɔda pipul dɛn, ɛn peshɛnt wit yusɛf. We yu mek mistek, na fɔ gri fɔ tek di trenin ɛn kɔrɛkshɔn we yu go gɛt, ɛn si am se na frɔm Jiova i kɔmɔt. (Ibru. 12:​6) Wok tranga wan pan ɛni asaynmɛnt we dɛn gi yu fɔ du. Ɛn wetin impɔtant mɔ, ɛnitin we yu de du, na fɔ mek yu Papa we de na ɛvin gladi fɔ yu.—Rid Prɔvabs 27:​11.