1-2. Aw apɔsul Pɔl in ɛgzampul go ɛp ɛlda dɛn tide?

 APƆSUL Pɔl bin lɛk in brɔda ɛn sista dɛn. I bin de du ɔl wetin i ebul fɔ ɛp dɛn. (Akt 20:​31) Na dat bin mek in brɔda ɛn sista dɛn bin rili lɛk am. Wantɛm, we di ɛlda dɛn na Ɛfisɔs bin kam fɔ no se dɛn nɔ go ɛva si Pɔl igen, “dɛn kray bita bita wan.” (Akt 20:​37) Wi ɛlda dɛnsɛf rili lɛk dɛn brɔda ɛn sista dɛn, ɛn dɛn de du ɔl wetin dɛn ebul fɔ ɛp dɛn. (Fil. 2:​16, 17) Bɔt sɔntɛnde, i nɔ kin izi fɔ di ɛlda dɛn fɔ du ɔl wetin dɛn fɔ du. Wetin go ɛp dɛn?

² Wi ɛlda dɛn we de wok tranga wan kin tink bɔt Pɔl in ɛgzampul. (1 Kɔr. 11:​1) I nɔ bin gɛt di pawa we di enjɛl dɛn gɛt. Pɔl na bin man we nɔ pafɛkt, ɛn sɔntɛnde i nɔ bin de izi fɔ am fɔ du wetin rayt. (Rom. 7:​18-20) Ɛn i bin de gɛt difrɛn prɔblɛm dɛn. Bɔt dat nɔ bin stɔp am fɔ wok tranga wan fɔ in brɔda ɛn sista dɛn ɔ fɔ mek i nɔ gladi we i de wok fɔ dɛn. We ɛlda dɛn falamakata Pɔl in ɛgzampul, dɛn go kɔntinyu fɔ sav Jiova wit gladi-at, ilɛksɛf dɛn gɛt prɔblɛm dɛn. Lɛ wi si aw.

3. Wetin wi go tɔk bɔt insay dis atikul? Wetin bak wi go lan?

³ Insay dis atikul, wi go tɔk bɔt 4 tin dɛn we nɔ kin izi fɔ di ɛlda dɛn fɔ du: (1) fɔ ajɔst dɛn tɛm fɔ du di prichin wok ɛn ɔl di ɔda wok dɛn we dɛn nid fɔ du, (2) fɔ fɛn tɛm fɔ ɛnkɔrej di brɔda ɛn sista dɛn, (3) fɔ bia wit dɛn yon mistek dɛn, ɛn (4) fɔ wok wit dɛn brɔda ɛn sista dɛn we nɔ pafɛkt. Wi go tɔk bɔt wetin bin ɛp Pɔl ɛn aw ɛlda dɛn go falamakata in ɛgzampul.

4. Wetin mek sɔntɛnde i nɔ kin izi fɔ ɛlda dɛn fɔ sɛt gud ɛgzampul fɔ du di prichin wok?

⁴ Wetin mek dat nɔ kin izi? Ɛlda dɛn gɛt bɔku wok dɛn fɔ du apat frɔm fɔ de bifo fɔ du di prichin wok. Fɔ ɛgzampul, bɔku tɛm dɛn kin yuz bɔku pan dɛn fɔ bi chiaman na di midwik mitin ɛn fɔ kɔndɔkt di Kɔngrigeshɔn Baybul Stɔdi. Dɛn kin gi tɔk dɛn bak. Dɛn kin du bɔku wok fɔ tren ministerial savant dɛn, ɛn dɛn gladi fɔ kɔntinyu fɔ ɛnkɔrej di brɔda ɛn sista dɛn. (1 Pit. 5:​2) Sɔm ɛlda dɛn de ɛp fɔ bil ɛn kia fɔ Kiŋdɔm Ɔl dɛn ɛn ɔda bildin dɛn we wi de yuz fɔ wɔship Jiova. Bɔt lɛk ɔl di brɔda ɛn sista dɛn na di kɔngrigeshɔn, di wok we impɔtant pas ɔl to ɛlda dɛn na di prichin wok.—Mat. 28:​19, 20.

5. Us ɛgzampul Pɔl sɛt fɔ du di prichin wok?

⁵ Wetin ɛlda dɛn kin lan frɔm Pɔl in ɛgzampul? Insay Filipians 1:​10, Pɔl tɛl wi di men tin we bin ɛp am fɔ du di prichin wok gud gud wan. Insay de, i advays wi fɔ “mek shɔ ɔf di tin dɛn we rili impɔtant.” Pɔl bin fala in yon advays. I bin gɛt di wok fɔ prich, ɛn fɔ lɔng tɛm, di prichin wok na bin di tin we impɔtant to am pas ɔl ɔda tin. I bin de prich “na pɔblik ɛn frɔm os to os.” (Akt 20:​20) I nɔ bin gɛt wan patikyula tɛm we i bin de prich fɔ di de ɔ fɔ di wik. I bin de yuz ɛni chans we i gɛt fɔ du di prichin wok. Fɔ ɛgzampul, we i bin de wet fɔ in kɔmpin dɛn na Atɛns, i bin prich di gud nyuz to impɔtant pipul dɛn, ɛn sɔm pan dɛn bin lisin. (Akt 17:​16, 17, 34) Ivin we Pɔl bin de na “prizin,” i bin de prich to di wan dɛn we bin de arawnd am.—Fil. 1:​13, 14; Akt 28:​16-24.

6. Wetin Pɔl bin tren ɔda brɔda dɛn fɔ du?

⁶ Pɔl bin yuz in tɛm di bɛst we. Bɔku tɛm, i bin de kɔl ɔda brɔda dɛn fɔ jɔyn am fɔ du di prichin wok. Fɔ ɛgzampul, we i bin de du in fɔs mishɔnari patrol, i bin go wit Jɔn Mak; ɛn fɔ di sɛkɔn wan, i bin go wit Timoti. (Akt 12:​25; 16:​1-4) Wan dawt nɔ de se Pɔl bin du in bɛst fɔ tich dɛn man dɛn ya aw fɔ ɔganayz kɔngrigeshɔn, aw fɔ ɛnkɔrej dɛn brɔda ɛn sista dɛn, ɛn aw fɔ bi gud ticha dɛn.—1 Kɔr. 4:​17.

7. Aw ɛlda dɛn go fala di advays we Pɔl gi na Ɛfishians 6:​14, 15?

⁷ Wetin na di lɛsin? Ɛlda dɛn go falamakata Pɔl bay we dɛn rɛdi fɔ prich ɛnitɛm ɛn ɛnisay we dɛn gɛt chans fɔ prich, nɔto frɔm os to os nɔmɔ. (Rid Ɛfishians 6:​14, 15.) Fɔ ɛgzampul, dɛn kin prich we dɛn go fɔ go bay sɔntin ɔ we dɛn de na  wokples. Ɔ we dɛn de ɛp fɔ bil Kiŋdɔm Ɔl, dɛn kin prich di gud nyuz to pipul dɛn we de arawnd di Kiŋdɔm Ɔl ɔ pipul dɛn we de sɛl tin dɛn to dɛn. Lɛk Pɔl, ɛlda dɛn kin yuz di tɛm we dɛn de spɛn na di prichin wok fɔ tren ɔda pipul dɛn, ivin ministerial savant dɛn.

8. Wetin ɛlda dɛn nid fɔ du sɔntɛnde?

⁸ Ɛlda dɛn nɔ fɔ tu bizi wit dɛn wok na di kɔngrigeshɔn ɔ na di sakit te dɛn nɔ gɛt tɛm fɔ du di prichin wok. Fɔ mek dɛn go gɛt tɛm fɔ du ɔl di tin dɛn we dɛn nid fɔ du, sɔntɛnde dɛn nɔ fɔ gri fɔ tek mɔ wok dɛn. We dɛn dɔn tek tɛm tink ɛn pre bɔt am, sɔntɛm dɛn go kam fɔ no se if dɛn tek di wok dɛn nɔ go ebul fɔ du di tin dɛn we rili impɔtant. Di tin dɛn we rili impɔtant kin bi fɔ kɔndɔkt famili wɔship ɛni wik, fɔ du di prichin wok wit zil, ɔ fɔ tren dɛn pikin dɛn fɔ prich. I nɔ kin izi fɔ sɔm ɛlda dɛn fɔ se nɔ to sɔm wok dɛn, bɔt dɛn no se Jiova ɔndastand se dɛn want fɔ du dɛn bɛst fɔ kia fɔ ɔl dɛn wok dɛn.

9. Wetin nɔ kin izi fɔ ɛlda dɛn bikɔs dɛn gɛt bɔku wok fɔ du?

⁹ Wetin mek dat nɔ kin izi? Bɔku prɔblɛm dɛn kin mit Jiova in pipul dɛn. Insay dis las dez, wi ɔl nid ɛnkɔrejmɛnt, sɔpɔt, ɛn kɔrej. Ɛn sɔntɛnde, sɔm kin nid ɛp fɔ avɔyd fɔ du tin we bad. (1 Tɛs. 5:​14) Ɛlda dɛn nɔ go ebul fɔ pul ɔl di prɔblɛm dɛn we de mit Jiova in pipul dɛn. Bɔt stil, Jiova want ɛlda dɛn fɔ du ɔl wetin dɛn ebul fɔ ɛnkɔrej ɛn protɛkt in ship dɛn. Aw ɛlda dɛn we ɔlrɛdi gɛt bɔku wok fɔ du go ebul fɛn tɛm fɔ gi di ɛp we di brɔda ɛn sista dɛn nid?

10. Wetin 1 Tɛsalonians 2:​7 se Pɔl bin du fɔ kia fɔ Jiova in pipul dɛn?

¹⁰ Wetin ɛlda dɛn kin lan frɔm Pɔl in ɛgzampul? Pɔl bin de luk fɔ we dɛn ɔltɛm fɔ tɛl in brɔda dɛn tɛnki ɛn fɔ ɛnkɔrej dɛn. I go fayn fɔ mek ɛlda dɛn fala in ɛgzampul bay we dɛn de trit Jiova in pipul dɛn wit lɔv. (Rid 1 Tɛsalonians 2:​7.) Pɔl bin mek in kɔmpin Kristian dɛn no se i lɛk dɛn ɛn Jiova sɛf lɛk dɛn. (2 Kɔr. 2:​4; Ɛfi. 2:​4, 5) Pɔl bin de trit di wan dɛn we de na di kɔngrigeshɔn as in padi dɛn; i bin de spɛn tɛm wit dɛn. I bin sho se i biliv in brɔda dɛn bay we i bin de tɔk bɔt di tin dɛn we bin de mek i fred ɛn in yon prɔblɛm dɛn. (2 Kɔr. 7:​5; 1 Tim. 1:​15) Bɔt Pɔl nɔ bin pe atɛnshɔn pan in yon prɔblɛm dɛn. Bifo dat, i bin want fɔ ɛp in brɔda dɛn.

11. Wetin mek Pɔl bin de advays in brɔda ɛn sista dɛn?

¹¹ Sɔntɛnde, Pɔl bin nid fɔ advays in brɔda ɛn sista dɛn. Bɔt i nɔ bin de ɛva du am bikɔs i vɛks. I bin de advays dɛn bikɔs i bisin bɔt dɛn ɛn i want fɔ protɛkt dɛn frɔm difrɛn prɔblɛm dɛn. I tray fɔ mek in advays izi fɔ ɔndastand, ɛn i bin  want fɔ mek dɛn gri fɔ tek in advays. Fɔ ɛgzampul, insay wan lɛta we Pɔl bin rayt to di Kristian dɛn na Kɔrint, i bin gi dɛn strɔng advays. Afta i rayt da lɛta de, i bin sɛn Taytɔs to dɛn. Pɔl bin rili want fɔ no aw in lɛta afɛkt in brɔda dɛn. I bin rili gladi fɔ no se dɛn bin tek di advays.—2 Kɔr. 7:​6, 7.

12. Aw ɛlda dɛn go ɛp dɛn kɔmpin Kristian dɛn fɔ gɛt strɔng fet?

¹² Wetin na di lɛsin? Ɛlda dɛn go fala Pɔl in ɛgzampul bay we dɛn de spɛn tɛm wit dɛn kɔmpin Kristian dɛn. Wan we fɔ du dis na we dɛn de kam mitin kwik so dat dɛn go ebul fɔ tɔk to dɛn brɔda ɛn sista dɛn ɛn ɛnkɔrej dɛn. Bɔku tɛm, na smɔl tɛm nɔmɔ dɛn nid fɔ se sɔntin we go rili ɛnkɔrej wan brɔda ɔ sista. (Rom. 1:​12; Ɛfi. 5:​16) Ɛlda we de falamakata Pɔl in ɛgzampul de ɛp in kɔmpin Kristian dɛn bak fɔ gɛt strɔng fet bay we i de yuz Gɔd in Wɔd fɔ ɛnkɔrej dɛn ɛn fɔ mek dɛn no se Gɔd lɛk dɛn. Dɔn bak, i de mek shɔ se dɛn no se i lɛk dɛn. I de tɔk to dɛn ɔltɛm ɛn luk fɔ rizin dɛn fɔ tɛl dɛn tɛnki. We ɛlda de gi advays, i de mek shɔ se in advays gri wit wetin Gɔd in Wɔd se. I de gi di advays bɔt patikyula tin bɔt i de sho bak se i gud, bikɔs i want di brɔda ɔ sista fɔ du wetin i de advays am.—Gal. 6:​1.

13. Aw di mistek dɛn we ɛlda dɛn kin mek kin afɛkt dɛn?

¹³ Wetin mek dat nɔ kin izi? Ɛlda dɛn nɔ pafɛkt. Jɔs lɛk ɔlman, dɛn kin mek mistek dɛn. (Rom. 3:​23) I nɔ kin izi fɔ dɛn sɔntɛnde fɔ tink di rayt we bɔt di mistek dɛn we dɛn de mek. Sɔm kin pe atɛnshɔn pan wetin dɛn nɔ ebul fɔ du te dɛn at pwɛl. Ɔda wan dɛn kin tink se di mistek dɛn we dɛn kin mek nɔ impɔtant ɛn dɛn nɔ nid fɔ du ɛnitin fɔ chenj.

14. Akɔdin to Filipians 4:​13, aw di ɔmbul we Pɔl bin ɔmbul bin ɛp am fɔ tink di rayt we bɔt in mistek dɛn?

¹⁴ Wetin ɛlda dɛn kin lan frɔm Pɔl in ɛgzampul? Bikɔs Pɔl bin ɔmbul, i bin ɔndastand se i nid ɛp fɔ mek i go bia in mistek dɛn. I bin nid di trɛnk we Gɔd de gi. Fɔs, Pɔl bin gɛt zil fɔ du bad tin to Kristian dɛn. Bɔt leta, i ɔndastand se i bin rɔng ɛn i bin rɛdi fɔ chenj in abit dɛn ɛn di we aw i bin de biev. (1 Tim. 1:​12-16) Jiova bin ɛp Pɔl fɔ lɛ i bi shɛpad we lɛk di ship dɛn, we gɛt sɔri-at, ɛn we ɔmbul. I bin no se i dɔn mek bɔku mistek dɛn, bɔt i nɔ bin kɔntinyu fɔ tink bɔt dɛn. Bifo dat, i bin biliv se Jiova go fɔgiv am. (Rom. 7:​21-25) I nɔ bin de ɛkspɛkt se i fɔ pafɛkt. Bifo dat, i bin de wok tranga wan fɔ gɛt Kristian kwaliti dɛn mɔ ɛn mɔ, ɛn i put  insɛf dɔŋ fɔ abop pan di ɛp we Jiova de gi am fɔ dɔn in wok.—1 Kɔr. 9:​27; rid Filipians 4:​13.

15. Aw ɛlda go tink di rayt we bɔt in mistek dɛn?

¹⁵ Wetin na di lɛsin? Dɛn nɔ apɔynt ɛlda dɛn bikɔs dɛn pafɛkt. Bɔt Jiova want fɔ mek dɛn gri se dɛn mek mistek ɛn tray fɔ gɛt Kristian abit dɛn mɔ ɛn mɔ. (Ɛfi. 4:​23, 24) Ɛlda fɔ tek tɛm yuz Gɔd in Wɔd fɔ wach insɛf ɛn mek ɛni ajɔstmɛnt we i nid fɔ mek. Dɔn Jiova go ɛp am fɔ gladi ɛn fɔ bi gud ɛlda.—Jems 1:​25.

16. Wetin go apin if ɛlda pe atɛnshɔn to di mistek dɛn we in brɔda ɛn sista dɛn de mek?

¹⁶ Wetin mek dat nɔ kin izi? We ɛlda dɛn de spɛn bɔku tɛm wit dɛn brɔda ɛn sista dɛn na di kɔngrigeshɔn, i izi fɔ si di mistek dɛn we dɛn brɔda ɛn sista dɛn de mek. Bɔt if ɛlda dɛn nɔ tek tɛm, dɛn go vɛks, ash, ɔ jɔj dɛn brɔda ɛn sista dɛn di rɔng we. Pɔl bin wɔn Kristian dɛn se Setan go want fɔ mek dɛn du dat.—2 Kɔr. 2:​10, 11.

17. Aw Pɔl bin de si in brɔda ɛn sista dɛn?

¹⁷ Wetin ɛlda dɛn kin lan frɔm Pɔl in ɛgzampul? I bin de tink di rayt we bɔt in brɔda ɛn sista dɛn ɔltɛm. I bin no se dɛn de mek mistek dɛn, bikɔs sɔntɛnde, wetin dɛn bin de du bin de mek i fil bad. Bɔt Pɔl bin no se jɔs bikɔs pɔsin mek mistek, dat nɔ min se in na bad pɔsin. I bin lɛk in brɔda ɛn sista dɛn, ɛn i bin de pe atɛnshɔn pan dɛn gud kwaliti dɛn. If i nɔ bin izi fɔ in brɔda ɛn sista dɛn fɔ du di rayt tin, i bin de tink se dɛn want fɔ du wetin rayt ɛn dɛn jɔs nid ɛp.

18. Wetin yu lan frɔm wetin Pɔl bin du we i kam fɔ no se pis nɔ bin de bitwin Yuodia ɛn Sintiki? (Filipians 4:​1-3)

¹⁸ Fɔ ɛgzampul, tink bɔt aw Pɔl bin ɛp tu sista dɛn na di kɔngrigeshɔn we bin de na Filipay. (Rid Filipians 4:​1-3.) I bin tan lɛk se prɔblɛm bin de bitwin Yuodia ɛn Sintiki, ɛn dɛn tu nɔto bin padi igen. Pɔl nɔ bin ash ɔ jɔj dɛn di rɔng we. Bifo dat, i bin pe atɛnshɔn pan dɛn gud kwaliti dɛn. Dɛn fetful sista dɛn ya bin dɔn sav Jiova fɔ lɔng tɛm. Pɔl bin no se Jiova lɛk dɛn. Bikɔs Pɔl bin de tink di rayt we bɔt dɛn sista dɛn ya, dat bin muv am fɔ ɛnkɔrej dɛn fɔ mek pis. Dɔn bak, bikɔs Pɔl bin de pe atɛnshɔn pan di gud kwaliti dɛn we in brɔda ɛn sista dɛn gɛt, i bin ebul fɔ kɔntinyu fɔ gɛt gladi-at ɛn fɔ gɛt tayt padi biznɛs wit di brɔda ɛn sista dɛn we de na da kɔngrigeshɔn de.

19. (a) Aw ɛlda dɛn go kɔntinyu fɔ tink di rayt we bɔt dɛn kɔmpin Kristian dɛn? (b) Wetin yu lan frɔm di pikchɔ we de sho wan ɛlda we de klin di Kiŋdɔm Ɔl?

¹⁹ Wetin na di lɛsin? Ɛlda dɛn, una luk fɔ di gud kwaliti dɛn we una brɔda ɛn sista dɛn gɛt. Dɛn ɔl nɔ pafɛkt; bɔt dɛn ɔl  gɛt kwaliti dɛn we wi kin kɔle. (Fil. 2:​3) Na tru se frɔm tɛm to tɛm, ɛlda dɛn go nid fɔ ɛp wan brɔda ɔ sista fɔ ajɔst di we aw i de tink. Bɔt jɔs lɛk Pɔl, ɛlda dɛn fɔ tray tranga wan nɔ fɔ pe atɛnshɔn pan di wɔd we dɛn brɔda ɔ sista dɛn tɔk ɔ di tin dɛn we dɛn du we mek dɛn fil bad. Bifo dat, dɛn fɔ pe atɛnshɔn pan di lɛk we da pɔsin de lɛk Jiova, di bia we i de bia fɔ sav Gɔd, ɛn di gud we i go ebul fɔ du. Ɛlda we de pe atɛnshɔn pan di gud kwaliti we ɔda pipul dɛn gɛt go ɛp di brɔda ɛn sista dɛn fɔ no se ɔlman na di kɔngrigeshɔn lɛk dɛn.

20. Aw ɛlda dɛn go kɔntinyu fɔ bɛnifit frɔm Pɔl in ɛgzampul?

²⁰ Ɛlda dɛn, i go rili fayn if una kɔntinyu fɔ stɔdi bɔt Pɔl in ɛgzampul. Fɔ ɛgzampul, insay di Watch Tower Publications Index, yu kin luk ɔnda di men ɛdin we se “Paul,” dɔn na di sɔbɛdin we se “example for elders.” As yu de rid sɔm pan di matirial dɛn we de de, aks yusɛf, ‘Aw Pɔl in ɛgzampul go ɛp mi fɔ kɔntinyu fɔ gɛt gladi-at we a de du mi wok as ɛlda?’

21. Wetin ɛlda dɛn gɛt kɔnfidɛns bɔt?

²¹ Ɛlda dɛn, una mɛmba se Jiova nɔ de ɛkspɛkt una fɔ bi pipul dɛn we pafɛkt, bɔt i jɔs want una fɔ bi pipul dɛn we fetful. (1 Kɔr. 4:​2) Jiova bin gladi wit di tranga wok we Pɔl bin de du ɛn aw i bin fetful. Yusɛf go gɛt kɔnfidɛns se Gɔd valyu di wok we yu de du fɔ am. Jiova nɔ go ɛva “fɔgɛt una wok ɛn di we aw una dɔn sho se una lɛk in nem bay we una de wok ɛn kɔntinyu fɔ wok fɔ di oli wan dɛn.”—Ibru. 6:​10.