1. Wetin na di men tin we kin afɛkt wi abit dɛn?

 ILƐK wi jɔs dɔn baptayz fɔ tu-tri dez ɔ wi dɔn baptayz fɔ lɔng tɛm, wi ɔl want fɔ gɛt di abit dɛn we Jiova lɛk. Fɔ bi da kayn pɔsin de, wi nid fɔ kɔntrol di we aw wi de tink. Wetin mek? Na bikɔs di tin dɛn we wi de tink bɔt na di men tin we kin afɛkt wi abit dɛn. If wi de kɔntinyu fɔ tink bɔt tin dɛn we wi bɔdi want, wi go tɔk ɛn du tin dɛn we bad. (Ɛfi. 4:​17-19) Bɔt if wi de tink bɔt gud tin dɛn, i go mɔs bi se wi go tɔk ɛn du tin dɛn di we we go mek wi Papa, Jiova gladi.—Gal. 5:​16.

2. Us kwɛstyɔn dɛn wi go tɔk bɔt insay dis atikul?

² Lɛk aw wi bin dɔn tɔk na di atikul bifo dis wan, wi nɔ go ebul fɔ stɔp ɔl di bad tin dɛn we de kam na wi maynd. Bɔt wi go ebul fɔ disayd se wi nɔ go du di tin dɛn we wi de tink bɔt. Bifo wi baptayz, wi nid fɔ lɛf fɔ tɔk ɛn du tin dɛn we Jiova et. Dat na di fɔs tin we wi fɔ du fɔ lɛf di ol abit dɛn, ɛn na in impɔtant pas ɔl. Bɔt fɔ mek Jiova rili gladi fɔ wi, di ɔda tin we wi fɔ du na fɔ fala di lɔ we se: “Una fɔ gɛt di nyu abit dɛn.” (Kol. 3:​10) Insay dis atikul, wi go ansa dɛn kwɛstyɔn dɛn ya: Wetin na “di nyu abit dɛn”? Aw wi go gɛt di nyu abit dɛn ɛn kɔntinyu fɔ gɛt dɛn?

3. Frɔm wetin de na Galeshians 5:​22, 23, wetin na “di nyu abit dɛn”? Aw pɔsin de gɛt dɛn?

³ “Di nyu abit dɛn” na di abit dɛn we de mek wi tink ɛn du tin lɛk Jiova. Pɔsin de gɛt di nyu abit dɛn bay we i de sho se i gɛt di kwaliti dɛn we Gɔd in spirit de mek pɔsin  gɛt, ɛn we i de alaw di oli spirit fɔ afɛkt di tin dɛn we i de tink bɔt, di we aw i de fil, ɛn di tin dɛn we i de du. (Rid Galeshians 5:​22, 23.) Fɔ ɛgzampul, i lɛk Jiova ɛn In pipul dɛn. (Mat. 22:​36-39) Da kayn pɔsin de, de kɔntinyu fɔ gladi pan ɔl we i de bia prɔblɛm dɛn. (Jems 1:​2-4) Na pɔsin we de mek pis. (Mat. 5:​9) I de peshɛnt ɛn de trit ɔda pipul dɛn fayn. (Kol. 3:​13) I lɛk wetin gud ɛn i de du am. (Lyuk 6:​35) I de du tin dɛn we de sho se i gɛt strɔng fet pan in Papa we de na ɛvin. (Jems 2:​18) I de kɔntinyu fɔ tek tɛm du tin ilɛk dɛn mek i vɛks, ɛn i de kɔntrol insɛf we sɔntin tɛmt am.—1 Kɔr. 9:​25, 27; Tay. 3:​2.

4. Fɔ mek wi gɛt di nyu abit dɛn, fɔ se na wan bay wan wi fɔ tray fɔ gɛt di kwaliti dɛn we Galeshians 5:​22, 23 tɔk bɔt? Ɛksplen.

⁴ Fɔ mek wi gɛt di nyu abit dɛn, wi nid fɔ gɛt ɔl di kwaliti dɛn we Galeshians 5:​22, 23 tɔk bɔt, ɛn ivin di wan dɛn we ɔda vas dɛn tɔk bɔt. * Dɛn kwaliti dɛn ya nɔ tan lɛk difrɛn klos dɛn we pɔsin kin wɛr wan bay wan. Infakt, bɔku pan dɛn kwaliti dɛn ya fiba ɔda wan dɛn. Fɔ ɛgzampul, if yu rili lɛk yu neba, yu go peshɛnt wit am ɛn trit am fayn. Ɛn fɔ lɛ yu bi pɔsin we rili gud, yu fɔ tek tɛm du tin ɛn kɔntrol yusɛf.

5. Wetin i min fɔ “no aw Krays de tink”? Wetin mek wi fɔ stɔdi bɔt Jizɔs in layf? (1 Kɔrintians 2:​16)

⁵ Rid 1 Kɔrintians 2:​16. Fɔ mek wi gɛt di nyu abit dɛn, wi nid fɔ “no aw Krays de tink.” So dis min se wi fɔ lan aw Jizɔs de tink ɛn falamakata am. Jizɔs de sho se i gɛt di kwaliti dɛn we Gɔd in spirit de mek pɔsin gɛt pafɛkt wan. Jɔs lɛk glas we nɔ gɛt wan bɔt, Jizɔs de rili sho Jiova in kwaliti dɛn pafɛkt wan. (Ibru. 1:​3) Di mɔ wi de tink lɛk Jizɔs, na di mɔ wi go du tin lɛk am ɛn na di mɔ wi go ebul fɔ gɛt di nyu abit dɛn.—Fil. 2:​5.

6. Wetin wi fɔ mɛmba we wi de tray fɔ gɛt di nyu abit dɛn?

⁶ I rili pɔsibul fɔ lɛ wi falamakata Jizɔs in ɛgzampul? Sɔntɛm wi go de tink se: ‘Jizɔs pafɛkt. A nɔ go ɛva ebul falamakata am pafɛkt wan.’ If na so yu de fil, mɛmba dɛn tin ya. Fɔs, Jiova mek yu fɔ lɛ yu go ebul bi lɛk in ɛn Jizɔs. So i lɛf to  yu fɔ disayd if yu go falamakata dɛn, ɛn yu go ebul fɔ bi lɛk dɛn we i kam to sɔm tin dɛn. (Jɛn. 1:​26) Sɛkɔn, Gɔd in oli spirit na di tin we pawaful pas ɛni ɔda tin na di wan ol wɔl. Wit di oli spirit in ɛp, yu go ebul du tin dɛn we yu nɔ fɔ bin ɛva ebul du bay yusɛf. Tɔd, Jiova nɔ de ɛkspɛkt se rayt naw yu fɔ gɛt di kwaliti dɛn we di spirit de gi pafɛkt wan. Infakt, wi Papa we lɛk wi dɔn gi di wan dɛn we gɛt di op fɔ de na dis wɔl sote go 1,000 ia fɔ mek dɛn pafɛkt. (Rɛv. 20:​1-3) Di tin we Jiova want lɛ wi du naw na fɔ tray wi bɛst ɛn abop pan am fɔ ɛp wi.

7. Wetin wi de kam tɔk bɔt?

⁷ So aw wi go ebul fɔ falamakata Jizɔs? Lɛ wi tɔk bɔt 4 kwaliti dɛn we Gɔd in spirit de gi. As wi de tɔk bɔt ɛniwan pan dɛn kwaliti dɛn ya, wi go si wetin wi kin lan frɔm di we aw Jizɔs bin sho dɛn. Ɛn wi go tɔk bɔt sɔm kwɛstyɔn dɛn we go ɛp wi fɔ si if wi dɔn rili gɛt di nyu abit dɛn.

8. Aw Jizɔs bin sho lɔv?

⁸ Bikɔs Jizɔs rili lɛk Jiova, dat bin mek i mek sakrifays dɛn fɔ in Papa ɛn fɔ wi. (Jɔn 14:​31; 15:​13) Jizɔs bin sho se i rili lɛk pipul dɛn bay di we aw i liv in layf na dis wɔl. Ɛvride, i bin de sho se i gɛt lɔv ɛn sɔri-at, pan ɔl we sɔm pipul dɛn bin de agens am. Wan men we aw i sho se i lɛk pipul dɛn na we i bin de tich dɛn bɔt Gɔd in Kiŋdɔm. (Lyuk 4:​43, 44) Jizɔs bin sho bak se i nɔ jɔs bisin bɔt insɛf ɛn i lɛk Gɔd ɛn mɔtalman bay we i bin rɛdi fɔ sɔfa ɛn day na sina dɛn an. We i du dis, i mek am pɔsibul fɔ lɛ ɔlman go gɛt layf we go de sote go.

9. Aw wi go falamakata Jizɔs fɔ sho lɔv?

⁹ Wi bin gi wi layf to Jiova ɛn baptayz bikɔs wi lɛk wi Papa we de na ɛvin. So lɛk Jizɔs, wi fɔ sho se wi lɛk Jiova bay di we aw wi de trit pipul dɛn. Apɔsul Jɔn bin rayt se: “Di wan we nɔ lɛk in brɔda, we i dɔn si, nɔ go ebul fɔ lɛk Gɔd, we i nɔ wande si.” (1 Jɔn 4:​20) Wi kin aks wisɛf dɛn kwɛstyɔn dɛn ya: ‘A dɔn lan fɔ rili lɛk pipul dɛn? A de sho se a gɛt sɔri-at fɔ ɔda pipul dɛn, ilɛksɛf dɛn biev rud we to mi? A de alaw lɔv fɔ muv mi fɔ yuz mi tɛm ɛn di tin dɛn we a gɛt fɔ ɛp ɔda pipul dɛn fɔ lan bɔt Jiova? A rɛdi fɔ du dis ilɛksɛf bɔku pipul dɛn nɔ gladi fɔ wetin a de du ɔ dɛn de agens mi? A go ebul fɛn we dɛn fɔ spɛn mɔ tɛm na di wok fɔ mek disaypul?’—Ɛfi. 5:​15, 16.

10. Aw Jizɔs bin de sho se in na pɔsin we de mek pis?

¹⁰ Jizɔs na man we bin de mek pis. We pipul dɛn bin de trit am bad, i nɔ bin de tɔn-am-gi dɛn. Bɔt i bin de du pas dat. I bin de du in bɛst fɔ mek pis de ɛn ɛnkɔrej ɔda pipul dɛn fɔ sɛtul dɛn cham-mɔt. Fɔ ɛgzampul, i bin tich dɛn se dɛn fɔ mek pis wit dɛn brɔda dɛn if dɛn want fɔ mek Jiova gladi fɔ dɛn wɔship. (Mat. 5:​9, 23, 24) Ɛn bɔku tɛm, i bin de ɛp di apɔsul dɛn fɔ lɛf fɔ agyu bɔt uswan pan dɛn impɔtant pas dɛn ɔl.—Lyuk 9:​46-48; 22:​24-27.

11. Aw wi go bi pɔsin we de mek pis?

¹¹ Fɔ lɛ wi bi pɔsin we de mek pis, wi nɔ fɔ jɔs de avɔyd fɔ kɔz prɔblɛm. Wi nid fɔ tray fɔ mek pis wit ɔda pipul dɛn ɛn ɛnkɔrej wi brɔda ɛn sista dɛn fɔ sɛtul dɛn cham-mɔt. (Fil. 4:​2, 3; Jems 3:​17, 18) Wi kin aks wisɛf dɛn kwɛstyɔn dɛn ya: ‘Wetin a rɛdi fɔ sakrifays fɔ lɛ a mek pis wit ɔda pipul dɛn? We mi brɔda ɔ sista du sɔntin we mek a fil bad, a de kip grɔj na mi at fɔ am? A de wet fɔ lɛ di  ɔda pɔsin in kam fɔ mek pis wit mi, ɔ na mi fɔs kin go fɔ mek pis wit am, ilɛksɛf i tan lɛk se na di ɔda pɔsin kɔz di prɔblɛm? We di rayt tɛm rich, a de ɛnkɔrej ɔda pipul dɛn fɔ mek pis?’

12. Aw Jizɔs bin sho se i de trit pipul dɛn fayn?

¹² Jizɔs bin de trit ɔda pipul dɛn fayn. (Mat. 11:​28-30) I bin de du dis bay we i bin de tek tɛm du tin ɛn we i nɔ de pin pan sɔntin, ilɛksɛf i gɛt fɔ du wit aw i de fil. Fɔ ɛgzampul, we wan Fonishian uman bin beg am fɔ mɛn in pikin, fɔs, i nɔ bin du wetin di uman aks am fɔ du. Bɔt we di uman sho se i rili gɛt fet, Jizɔs mɛn in pikin. (Mat. 15:​22-28) Pan ɔl we Jizɔs bin de trit pipul dɛn fayn, i nɔ bin de avɔyd fɔ gi dɛn kɔrɛkshɔn. Sɔntɛnde, i bin de sho se i de trit pipul dɛn fayn bay we i bin de kɔrɛkt di wan dɛn we i lɛk. Fɔ ɛgzampul, we Pita bin tray fɔ pwɛl Jizɔs in at fɔ mek i nɔ du wetin Jiova want, Jizɔs bin tɔk pan am bifo di ɔda disaypul dɛn. (Mak 8:​32, 33) I nɔ bin du dis fɔ mek Pita shem, bɔt na fɔ tren Pita ɛn wɔn di ɔda disaypul dɛn se dɛn fɔ sɔpɔt am ɛn nɔ tray fɔ stɔp am fɔ du wetin Gɔd want. I go mɔs bi se Pita bin shem, bɔt i bin bɛnifit frɔm di kɔrɛkshɔn.

13. Aw wi go sho se wi de rili trit pipul dɛn fayn?

¹³ Fɔ lɛ yu rili trit di wan dɛn we yu lɛk fayn, sɔntɛnde yu go nid fɔ kɔrɛkt dɛn. We yu du dat, falamakata Jizɔs bay we yu de gi dɛn kɔrɛkshɔn we kɔmɔt frɔm di prinsipul dɛn we de na Gɔd in Wɔd. Du tin saful wan. Tek am se di pɔsin want fɔ du wetin rayt, ɛn biliv se di wan dɛn we lɛk Jiova ɛn we lɛk yu go gri fɔ lisin to di kɔrɛkshɔn we yu de gi dɛn. Aks yusɛf dɛn kwɛstyɔn dɛn ya: ‘A gɛt maynd fɔ tɔk we a si pɔsin we a lɛk de du bad? If a nid fɔ kɔrɛkt pɔsin, a kin tɔk fayn, ɔ a kin tɔk ash wan? Wetin kin mek a kɔrɛkt pɔsin? A kin gi kɔrɛkshɔn bikɔs a vɛks pan di pɔsin, ɔ na bikɔs a want fɔ ɛp am?’

14. Aw Jizɔs bin sho se i gud?

¹⁴ Jizɔs nɔ jɔs no wetin gud, bɔt i de du am. Jizɔs lɛk in Papa, so i de du di rayt tin fɔ di rayt rizin ɔltɛm. If wi na gud pɔsin, wi go si am bay di we aw i de afɛkt ɔda pipul dɛn. Fɔ sho se wi gɛt dis kwaliti, wi nid fɔ du tin dɛn fɔ ɛp pipul dɛn. I nɔ jɔs du fɔ mek wi no wetin na di rayt tin fɔ du, bɔt wi fɔ du di rayt tin fɔ di rayt rizin. Sɔntɛm pɔsin go want fɔ aks se, ‘I pɔsibul fɔ du di rayt tin fɔ di rɔng rizin?’ Yɛs, i pɔsibul. Fɔ ɛgzampul, Jizɔs bin tɔk bɔt di wan dɛn we bin de gi gift to po pipul dɛn, bɔt we bin de mek shɔ se ɔda pipul dɛn no bɔt di gift we dɛn gi dɛn. Pan ɔl we i tan lɛk se na gud tin dɛn bin de du we dɛn de gi gift to po pipul dɛn, dɛn nɔ bin de mek Jiova gladi.—Mat. 6:​1-4.

15. Aw wi go sho se wi rili gud?

¹⁵ Di wangren we aw wi go sho se wi rili gud na we wi de du di rayt tin fɔ di rayt rizin. So aks yusɛf dɛn kwɛstyɔn dɛn ya: ‘A jɔs no wetin na di rayt tin fɔ du ɔ a kin du am? Wetin na di rizin we kin mek a du gud tin dɛn?’

16. Wetin wi fɔ du ɛvride? Wetin mek?

¹⁶ Wi nɔ fɔ tink se wi fɔ lɛf fɔ tray fɔ gɛt di nyu abit dɛn afta wi baptayz. Wi nyu abit dɛn tan lɛk “nyu klos” we wi nid fɔ kɔntinyu fɔ ol fayn. Wan we aw wi go du dat na we wi de luk fɔ we dɛn ɛvride fɔ sho di kwaliti dɛn we Gɔd in spirit  de mek pɔsin gɛt. Wetin mek? Na bikɔs Jiova na Gɔd we lɛk fɔ du tin dɛn, ɛn i kin yuz in spirit fɔ du tin dɛn. (Jɛn. 1:​2) So ɔl di kwaliti dɛn we di spirit de mek pɔsin gɛt go mek wi du sɔntin, ɛn wi fɔ du am. Fɔ ɛgzampul, di disaypul Jems bin rayt se: “Pɔsin we gɛt fet bɔt nɔ de du natin, in fet dɔn day.” (Jems 2:​26) Wi go tɔk di sem tin bɔt ɔl di ɔda kwaliti dɛn we Gɔd in spirit de mek pɔsin gɛt. Ɛnitɛm we wi de sho se wi gɛt dɛn kwaliti dɛn de, wi de sho se Gɔd in spirit de ɛp wi.

17. Wetin wi fɔ du if tɛm dɛn de we wi nɔ de sho di kwaliti dɛn we di spirit de mek pɔsin gɛt?

¹⁷ Sɔntɛnde, ivin Kristian dɛn we dɔn baptayz fɔ lɔng tɛm nɔ kin sho di kwaliti dɛn we di spirit de mek pɔsin gɛt. Bɔt di impɔtant tin na dat wi nɔ fɔ giv-ɔp. Tink bɔt dis ɛgzampul. If yu chɛr yu klos we yu lɛk, yu go trowe am wantɛm wantɛm fɔ dat? Nɔ. I go mɔs bi se yu go tray fɔ mek di pat we pwɛl if i pɔsibul. Ɛn yu go tek tɛm wit di klos afta dat. Semweso, if wan wantɛm yu nɔ kin trit pipul dɛn fayn, yu nɔ kin peshɛnt, ɔ sho lɔv to pipul dɛn, nɔ pwɛl-at fɔ dat. If yu tɔk se yu rili sɔri, dat go ɛp fɔ mek una kɔntinyu fɔ bi padi. Mekɔp yu maynd fɔ bi bɛtɛ pɔsin.

18. Wetin wi shɔ bɔt?

¹⁸ Wi rili gladi we Jizɔs sɛt fayn ɛgzampul fɔ wi. Di mɔ wi de falamakata di we aw i de tink, na di mɔ i go izi fɔ lɛ wi du tin lɛk am. Ɛn di mɔ wi de du tin lɛk Jizɔs, na di mɔ wi go ebul fɔ gɛt di nyu abit dɛn. Insay dis atikul, wi dɔn tɔk bɔt 4 kwaliti dɛn we Gɔd in spirit de mek pɔsin gɛt. Yu nɔ tink se i go fayn fɔ lɛ yu mek tɛm fɔ stɔdi di ɔda kwaliti dɛn we di spirit de mek pɔsin gɛt ɛn si if yu de sho dɛn kwaliti dɛn de? Yu go si sɔm atikul dɛn bɔt dis tɔpik na di Risach Gayd fɔ Jiova Witnɛs Dɛn ɔnda di tɔpik we nem “Di We Aw Kristian Fɔ Liv” dɔn “Kwaliti dɛn we di Spirit De Gi.” Wan dawt nɔ de se if yu du yu bɛst fɔ gɛt di nyu abit dɛn ɛn kɔntinyu fɔ gɛt dɛn, Jiova go ɛp yu.