Sɔm pipul dɛn we nɔ kin tek tɛm rid dis akawnt kin aks da kwɛstyɔn de. Bɔt dɛn vas dɛn de tɔk bɔt tu difrɛn man dɛn we dɛn ɔl tu nem Mɛfiboshɛt, ɛn wi go lan sɔntin we wi tɔk bɔt wetin bin apin.

Kiŋ Sɔl we bin de na Izrɛl bin gɛt sɛvin bɔypikin ɛn tu galpikin dɛn. Sɔl in fɔs bɔypikin na bin Jonɛthan. Dɔn leta di kiŋ bin gɛt wan bɔypikin we nem Mɛfiboshɛt, we in galfrɛn we nem Rizpa bin bɔn fɔ am. Ɛn i bin kam bi se Jonɛthan bak bin gɛt bɔypikin we nem Mɛfiboshɛt. So Kiŋ Sɔl bin gɛt pikin we bin nem Mɛfiboshɛt ɛn granpikin we bin gɛt da sem nem de.

Kiŋ Sɔl bigin fɔ et di Gibiɔnayt dɛn, ɛn i bin tray fɔ kil dɛn ɔl. I bin kil bɔku pan dɛn. Bɔt dat bin rili bad. Wetin mek? Na bikɔs insay Jɔshwa in tɛm, di Izrɛlayt bigman dɛn bin dɔn mek pis agrimɛnt wit di Gibiɔnayt dɛn.—Jɔs. 9:​3-27.

Da agrimɛnt de bin stil ol wata insay Kiŋ Sɔl in tɛm. Bɔt di kiŋ bin go agens da agrimɛnt de bay we i bin tray fɔ kil ɔl di Gibiɔnayt dɛn. So “Sɔl ɛn in wan ol famili [bin] gɛt blɔd na dɛn ed.” (2 Sam. 21:​1, NWT) Faynali, Devid bin kam fɔ bi di kiŋ. Di Gibiɔnayt dɛn we Sɔl nɔ bin ebul fɔ kil bin tɔk to Devid bɔt di bad bad tin we Sɔl bin du. Devid bin aks dɛn wetin dɛn want am fɔ du fɔ pe fɔ di bad tin we Sɔl bin du ɛn we go opin di we fɔ lɛ Jiova blɛs di land. Di Gibiɔnayt dɛn nɔ bin aks fɔ mɔni, bifo dat, dɛn bin se di kiŋ fɔ gi dɛn sɛvin pan Sɔl, we “bin want fɔ mek dɛn ɔl day,” in bɔypikin dɛn fɔ mek dɛn go kil dɛn. (Nɔm. 35:​30, 31) Devid bin gi dɛn wetin dɛn aks fɔ.—2 Sam. 21:​2-6.

Bay da tɛm de, Sɔl ɛn Jonɛthan bin dɔn day pan wɔ, bɔt Jonɛthan in bɔypikin Mɛfiboshɛt bin stil de alayv. Mɛfiboshɛt bin gɛt aksidɛnt we i bin smɔl, ɛn dat bin mek i tɔn kripul. I nɔ bin jɔyn in granpa fɔ atak di Gibiɔnayt dɛn. Devid bin dɔn mek agrimɛnt wit Jonɛthan fɔ gɛt tayt padi biznɛs we go bɛnifit in pikin, ivin Jonɛthan in bɔypikin we na Mɛfiboshɛt. (1 Sam. 18:​1; 20:​42) Di akawnt se: “Bɔt, di kiŋ bin sho sɔri-at fɔ Mɛfiboshɛt, we na Jonɛtan in bɔypikin, ɛn Jonɛtan na Sɔl in pikin. I du dat bikɔs Devid ɛn Jonɛtan, we na Sɔl in bɔypikin, bin dɔn swɛ bifo Jiova.”—2 Sam. 21:​7, NWT.

Stil, Devid bin gi di Gibiɔnayt dɛn wetin dɛn aks fɔ. I bin gi tu pan Sɔl in bɔypikin dɛn, ɛn wan pan dɛn bin nem Mɛfiboshɛt, ɛn fayv pan Sɔl in granpikin dɛn. (2 Sam. 21:​8, 9) Dis tin we Devid bin du bin pul di blɔd we bin de na di land.

Dis tin we bin apin nɔto jɔs istri. Gɔd in lɔ bin klia. I bin se: “Pikin dɛn nɔ fɔ day fɔ wetin dɛn mami ɛn dɛn dadi dɛn du.” (Dit. 24:​16) Jiova nɔ fɔ bin dɔn alaw wetin bin apin to Sɔl in tu bɔypikin dɛn ɛn in fayv granpikin dɛn if dɛn bin inosɛnt. Di lɔ kɔntinyu fɔ se: “Ɔlman fɔ day fɔ in yon sin.” So i go bi se Sɔl in sɛvin pikin dɛn we day bin jɔyn am we i bin want fɔ dɔnawe wit di Gibiɔnayt dɛn. Dat bin mek dɛn ɔl sɛvin pe fɔ di bad tin we dɛn bin du.

Dis sho se pɔsin nɔ go gi ɛkskyuz fɔ di bad tin we i du bay we i go tink ɔ tɔk se i bin jɔs de du wetin dɛn tɛl am. Wan fayn prɔvab se: “Tek tɛm plan wetin yu de du, fɔ lɛ ɛnitin we yu de du go kɔmɔt fayn.”​—Prɔv. 4:​24-27; Ɛfi. 5:​15.