Kwɛstyɔn dɛn we Pipul dɛn Kin Aks
Wetin mek di man we di Baybul kɔl “Padiman” bin tɔk se i go “lɔsis” if i mared Rut? (Rut 4:1, 6, NWT)
Insay di tɛm we dɛn bin de rayt di Baybul, if maredman nɔ bɔn pikin bifo i day, dis na sɔm kwɛstyɔn dɛn we nid ansa: Wetin go apin to in land? Fɔ se in famili nem go lɔs sote go? Di Lɔ we Gɔd bin gi Mozis ɛp wi fɔ ansa dɛn kwɛstyɔn dɛn ya.
Wetin go apin to di man we day in land ɔ we po ɛn sɛl in land? Di man in brɔda ɔ fambul go bay bak da land de. So di famili go stil gɛt di land.—Lɛv. 25:23-28; Nɔm. 27:8-11.
Aw dat go mek di man we dɔn day in famili nem nɔ lɔs? Na we di brɔdɛnlɔ mared di uman, lɛk wetin bin apin to Rut. Di man go mared in brɔda in wɛf so dat dɛn go bɔn pikin we go gɛt di man we dɔn day in nem ɛn in prɔpati. Dis fayn arenjmɛnt bin mek dɛn ebul kia bak fɔ di uman we in man dɔn day.—Dit. 25:5-7; Mat. 22:23-28.
Lɛ wi tɔk bɔt wetin bin apin to Naomi. I bin mared to wan man we nem Ɛlimilɛk. We in man ɛn dɛn tu bɔypikin dɛn bin day, no man nɔ bin de na di famili we go kia fɔ am. (Rut 1:1-5) Afta we Naomi go bak na Juda wit Rut, we na in dɔtɛnlɔ, i bin tɛl Rut fɔ aks Boaz fɔ bay bak dɛn land. Boaz na bin klos fambul to Ɛlimilɛk. (Rut 2:1, 19, 20; 3:1-4) Bɔt Boaz bin no se ɔda man de we di Baybul kɔl “Padiman,” we na klos fambul to Ɛlimilɛk pas am. So na in fɔs gɛt di chans fɔ disayd if i go want fɔ bay Rut bak.—Rut 3:9, 12, 13, NWT.
Fɔs, di man bin rɛdi fɔ ɛp. (Rut 4:1-4, NWT) I bin no se i go nid fɔ spɛn sɔm mɔni fɔ bay di land, bɔt i bin no bak se Naomi bin tu ol fɔ bɔn pikin we go gɛt Ɛlimilɛk in land. Di man go gɛt di land ɛn i go de pat pan in prɔpati, so dis na bin fayn tin fɔ am.
Bɔt di man bin chenj in maynd we i no se i go gɛt fɔ mared Rut. I bin se: “A nɔ ebul fɔ bay am bak, bikɔs a go lɔsis.” (Rut 4:5, 6, NWT) Wetin mek i bin chenj in maynd?
If di man ɔ ɔda pɔsin mared Rut ɛn i bɔn bɔypikin, da pikin de go gɛt Ɛlimilɛk in land. Aw dis go mek di man “lɔsis”? Di Baybul nɔ tɔk bɔt dat, bɔt dis na sɔm we dɛn we i pɔsibul se i go lɔsis.
Fɔs, i go lɔs di mɔni we i spɛn fɔ bay Ɛlimilɛk in land, bikɔs as tɛm de go di land nɔ go bi in yon igen. Na Rut in bɔypikin go gɛt am.
Sɛkɔn, na in go gɛt di wok fɔ fid ɛn kia fɔ Naomi ɛn Rut.
Tɔd, if Rut bɔn ɔda pikin wit di man, dɛn go sheb di prɔpati wit ɛniwan pan di pikin dɛn we i gɛt.
Nɔmba 4, if di man nɔ gɛt ɔda pikin dɛn we i bɔn, di bɔypikin we Rut bɔn go gɛt rayt oba Ɛlimilɛk in land ɛn di man in land. So we i day, na di bɔypikin we gɛt Ɛlimilɛk in nem go gɛt in land. Di man nɔ bin want fɔ lɔs in prɔpati fɔ ɛp Naomi. I disayd fɔ alaw di nɛks pɔsin we gɛt di rayt fɔ bay Rut bak, we na Boaz, fɔ du dat. Boaz bin du dat fɔ mek “di man we dɔn day in nem go kam bak pan in prɔpati.”—Rut 4:10, NWT.
I tan lɛk se di man bin want fɔ mek in yon nem ɛn prɔpati kɔntinyu fɔ de. I bin jɔs de tink bɔt insɛf. Bɔt pan ɔl we di man bin tray tranga wan fɔ mek in nem kɔntinyu fɔ de, tide wi nɔ ivin no wetin na bin in nem. I bin mis bak di spɛshal ɔnɔ we Boaz bin gɛt, we na fɔ bi gret gret granpa to di Mɛsaya, we na Jizɔs Krays. Di man we di Baybul kɔl Padiman bin lɔs ɔl dis bikɔs i bin jɔs bisin bɔt insɛf ɛn nɔ gri fɔ ɛp pɔsin we nid ɛp!—Mat. 1:5; Lyuk 3:23, 32.
