1. Wetin mama ɛn papa dɛn want fɔ dɛn pikin dɛn?

 MAMA ɛn papa dɛn, wi no se una want fɔ ɛp una pikin dɛn fɔ no ɛn lɛk Jiova. Bɔt wi nɔ de si Gɔd. Aw yu go ɛp yu pikin dɛn fɔ si am as rial Pɔsin ɛn kam nia am?—Jems 4:​8.

2. Aw mama ɛn papa dɛn go tich dɛn pikin dɛn bɔt Jiova in kwaliti dɛn?

² Wan impɔtant we fɔ ɛp pikin dɛn fɔ kam nia Jiova na bay we yu de stɔdi di Baybul wit dɛn. (2 Tim. 3:​14-17) Bɔt di Baybul sho ɔda we aw yɔŋ wan dɛn kin lan bɔt Jiova. Insay di buk we nem Prɔvabs, wan papa bin mɛmba in pikin klia wan fɔ mek i nɔ ɛva fɔgɛt bɔt Jiova in kwaliti dɛn we i de si pan di tin dɛn we I mek. (Prɔv. 3:​19-21) Wi de kam tɔk bɔt sɔm we dɛn aw mama ɛn papa dɛn go yuz di tin dɛn we Gɔd mek fɔ ɛp dɛn pikin dɛn fɔ lan bɔt di kayn Pɔsin we Jiova bi.

3. Aw mama ɛn papa dɛn fɔ ɛp dɛn pikin dɛn?

³ Di Baybul tɔk se “frɔm we Gɔd mek di wɔl, mɔtalman dɔn de no Gɔd in kwaliti dɛn klia klia wan, pan ɔl we dɛn nɔ de si dɛn, . . . bikɔs dɛn de si am pan di tin dɛn we i mek.” (Rom. 1:​20) Mama ɛn papa dɛn, i go bi se una kin ɛnjɔy fɔ spɛn tɛm na do wit una pikin dɛn. Yuz dis tɛm fɔ ɛp yu pikin dɛn fɔ si wetin “di tin dɛn we [Gɔd] mek” gɛt fɔ du wit Jiova in fayn fayn kwaliti dɛn. Lɛ wi si wetin mama ɛn papa dɛn kin lan frɔm Jizɔs in ɛgzampul.

4. Aw Jizɔs bin yuz di tin dɛn we Gɔd mek fɔ tich in disaypul dɛn? (Lyuk 12:​24, 27-30)

 ⁴ Notis aw Jizɔs bin yuz di tin dɛn we Gɔd mek fɔ tich. Wan tɛm, i bin aks in disaypul dɛn fɔ tek tɛm luk wan bɔd we dɛn kɔl revin ɛn wan flawa we dɛn kɔl lili. (Rid Lyuk 12:​24, 27-30.) Jizɔs bin fɔ dɔn tɔk bɔt ɛni animal ɔ plant, bɔt i bin chuz wan bɔd ɛn wan flawa we in disaypul dɛn bin rili sabi. Di disaypul dɛn go mɔs dɔn si revin dɛn de flay na di skay ɛn we flawa dɛn de gro. Yu ebul fɔ imajin aw Jizɔs bin de pɔynt to dɛn tin dɛn ya as i bin de tɔk? Ɛn wetin i du afta i dɔn tɔk bɔt dɛn ɛgzampul dɛn ya? I bin tich in disaypul dɛn wan pawaful lɛsin bɔt aw in Papa we de na ɛvin gud ɛn gɛt fri-an. Di lɛsin na dat: Jiova go fid ɛn gi klos to in fetful savant dɛn, jɔs lɛk aw i kin du fɔ di revin bɔd dɛn ɛn di flawa dɛn.

5. Aw mama ɛn papa dɛn go yuz di tin dɛn we Gɔd mek fɔ tich dɛn pikin bɔt Jiova?

⁵ Mama ɛn papa dɛn, una go falamakata di we aw Jizɔs de tich? Sɔntɛm yu kin tɛl yu pikin bɔt wan tin we Gɔd mek we yu rili lɛk, lɛk yu bɛst animal ɔ plant. We yu de tɛl yu pikin bɔt dis, mek shɔ se yu ɛksplen wetin da tin de de tich wi bɔt Jiova. Sɔntɛm yu kin aks yu pikin bɔt di animal ɔ plant we i rili lɛk. If yu tɔk bɔt sɔntin we Gɔd mek we yu pikin rili lɛk, sɔntɛm i go pe atɛnshɔn mɔ we yu de tɔk bɔt Jiova in kwaliti dɛn.

6. Wetin wi kin lan frɔm Kristofa in mama in ɛgzampul?

⁶ Yu tink se mama ɛn papa dɛn nid fɔ spɛn bɔku tɛm fɔ stɔdi wan patikyula animal ɔ plant bifo dɛn tɔk bɔt wetin da tin de tich dɛn bɔt Jiova? Nɔ. Jizɔs nɔ bin ɛksplen bɔku tin bɔt aw di revin bɔd kin it ɔ aw di flawa we dɛn kɔl lili kin gro. Ivin if yu pikin lɛk fɔ lan mɔ bɔt di tin dɛn we Jiova mek, sɔntɛnde simpul tin we yu kin se ɔ kwɛstyɔn kin du fɔ ɛp yu pikin fɔ ɔndastand yu pɔynt. Si wetin wan brɔda we nem Kristofa mɛmba frɔm di tɛm we i bin smɔl. I se: “Mi mama bin de tɔk simpul tin dɛn we bin de ɛp wi fɔ valyu di tin dɛn we Gɔd mek we bin de arawnd wi. Fɔ ɛgzampul, we wi de nia mawntin dɛn, i go tɔk se: ‘Luk aw da mawntin big ɛn fayn ba! Jiova wɔndaful, nɔto so?’ Ɔ we wi bin de na bich, i go se: ‘Luk di kayn pawa we di swɛlin dɛn gɛt! Gɔd pawaful, nɔto so?’” Kristofa se: “Dɛn simpul bɔt impɔtant tin dɛn we i bin de tɔk bin de rili mek wi tink.”

7. Aw yu go tren yu pikin dɛn fɔ tink bɔt di tin dɛn we Gɔd mek?

⁷ As yu pikin dɛn de big, yu kin tren dɛn fɔ stat fɔ tink bɔt di tin dɛn we Gɔd mek ɛn fɔ lan bɔt Jiova. Yu kin tɔk bɔt wan pan di tin dɛn we Gɔd mek ɛn aks yu pikin dɛn dis kwɛstyɔn, “Wetin dis tich yu bɔt Jiova?” Sɔntɛm yu go sɔprayz fɔ yɛri wetin dɛn go se.—Mat. 21:​16.

8. Us chans Izrɛlayt mama ɛn papa dɛn bin gɛt we dɛn bin de travul na ‘rod’?

⁸ Jiova bin tɛl di Izrɛlayt mama ɛn papa dɛn fɔ tich dɛn pikin dɛn bɔt in kɔmandmɛnt dɛn we dɛn de waka na ‘rod.’ (Dit. 11:​19) Rod dɛn bin de na di vilej dɛn we de na Izrɛl. Dɛn bin de si bɔku difrɛn animal dɛn, bɔd dɛn, ɛn flawa dɛn de. We Izrɛlayt famili dɛn bin de travul na rod, di mama ɛn papa dɛn bin gɛt di chans fɔ tɔk to dɛn pikin dɛn bɔt di tin dɛn we Jiova mek. I go bi se una we na mama ɛn papa dɛn kin gɛt dɛn sem kayn  chans dɛn ya fɔ yuz di tin dɛn we Gɔd mek fɔ tich una pikin dɛn. Lɛ wi si aw sɔm mama ɛn papa dɛn dɔn du dis.

9. Wetin yu kin lan frɔm Punita ɛn Katya?

⁹ Wan mama we nem Punita, we de na wan big siti na India tɔk se: “We mi ɛn mi man wit wi pikin dɛn kin go fɛn wi fambul dɛn na vilej, wi kin si am as fayn chans fɔ ɛp wi pikin dɛn fɔ lan bɔt di fayn tin dɛn we Jiova mek. A kin si se mi pikin dɛn kin ɔndastand di tin dɛn we Gɔd mek mɔ we dɛn de fa frɔm strit dɛn we gɛt krawd ɛn di trafik na di siti.” Mama ɛn papa dɛn, i pɔsibul se una pikin dɛn nɔ go ɛva fɔgɛt di tɛm we dɛn de spɛn wit una na ples we fayn. Wan sista we nem Katya we kɔmɔt Mɔldova se: “Di tin dɛn we a kin mɛmba mɔ frɔm di tɛm we a smɔl na di tɛm dɛn we a spɛn wit mi mama ɛn papa na vilej. A gladi fɔ we dɛn tich mi frɔm we a smɔl fɔ stɔp ɛn tek tɛm wach wetin Jiova mek, ɛn fɔ no am frɔm dɛn tin dɛn de.”

10. Wetin mama ɛn papa dɛn fɔ du if i nɔ izi fɔ lɛ dɛn travul kɔmɔt na di siti? (Rid di bɔks we gɛt di taytul “ Tin dɛn we Go Ɛp Mama ɛn Papa Dɛn.”)

¹⁰ Wetin yu go du if i nɔ pɔsibul fɔ lɛ yu travul go na vilej? Amɔl, we insɛf de na India, tɔk se: “Usay a de, mama ɛn papa dɛn nid fɔ wok fɔ lɔng tɛm, ɛn fɔ travul go na vilej na bɔku mɔni. Pan ɔl dat, fɔ go na smɔl pak ɔ viranda we de ɔp di os kin mek yu ebul fɔ tek tɛm wach di tin dɛn we Jiova mek ɛn tɔk bɔt in kwaliti dɛn.” If yu tek tɛm luk, yu go mɔs si bɔku pan di tin dɛn we Gɔd mek nia yu os we yu go sho yu pikin dɛn. (Sam 104:​24) Sɔntɛm yu go fɛn bɔd dɛn, insɛkt dɛn, plant dɛn, ɛn ɔda tin dɛn. Karina we kɔmɔt Jamani tɔk se: “Mi mama lɛk flawa dɛn, so we a bin smɔl, i bin de sho mi fayn fayn flawa dɛn ɛnitɛm we wi  de waka togɛda.” Mama ɛn papa dɛn, una kin yuz bak di bɔku vidio, buk, ɛn magazin dɛn we de tɔk bɔt di tin dɛn we Gɔd mek we wi ɔganayzeshɔn dɔn mek fɔ tich una pikin dɛn. Ilɛk usay yu de, yu kin ɛp yu pikin dɛn fɔ tek tɛm wach wetin Gɔd mek. Naw lɛ wi tɔk bɔt sɔm pan Jiova in kwaliti dɛn we yu kin sho yu pikin dɛn.

11. Aw mama ɛn papa dɛn go ebul ɛp dɛn pikin dɛn fɔ no bɔt Jiova in lɔv?

¹¹ Fɔ ɛp yu pikin dɛn fɔ ɔndastand Jiova in lɔv, yu kin sho dɛn aw bɔku animal dɛn kin tek tɛm kia fɔ dɛn pikin dɛn. (Mat. 23:​37) Yu kin sho dɛn bak di wɔndaful difrɛn difrɛn tin dɛn we wi kin rili ɛnjɔy we i kam pan di tin dɛn we Gɔd mek. Karina we wi bin dɔn tɔk bɔt, tɔk se: “We wi bin de go waka, mi mama kin ɛnkɔrej mi fɔ stɔp ɛn tek tɛm wach aw ɛni flawa difrɛn ɛn aw di fayn we i fayn de sho Jiova in lɔv. Te tide, a kin tek tɛm luk flawa dɛn, aw dɛn difrɛn, dɛn dizayn, ɛn dɛn kɔlɔ dɛn. Dɛn de kɔntinyu fɔ mɛmba mi bɔt di kayn lɔv we Jiova gɛt fɔ wi.”

12. Aw mama ɛn papa dɛn go ebul ɛp dɛn pikin dɛn fɔ no bɔt Gɔd in sɛns? (Sam 139:​14) (Luk bak di pikchɔ.)

¹² Ɛp yu pikin dɛn fɔ no bɔt Gɔd in sɛns. Wan dawt nɔ de se Jiova gɛt sɛns pas wi fa fawe. (Rom. 11:​33) Fɔ ɛgzampul, yu kin tɛl yu pikin aw wata kin go ɔp fɔ mek klawd, ɛn aw dɛn klawd dɛn de kin muv wata izi wan frɔm wan ples to ɔda ples. (Job 38:​36, 37) Yu kin tɛl am bak bɔt di wɔndaful we aw Gɔd mek mɔtalman bɔdi. (Rid Sam 139:​14.) Lɛ wi tɔk bɔt aw wan papa we nem Vladimia bin du dat. I tɔk se: “Wan de, wi bɔypikin bin fɔdɔm we i de rayd in baysikul ɛn wund. Afta sɔm tɛm, di wund bin wɛl. Mi ɛn mi wɛf bin ɛksplen se Jiova mek wi bɔdi di kayn we we i go mɛn insɛf. Wi ɛp am fɔ si se di tin dɛn we mɔtalman mek nɔ ebul du dis kayn tin. Fɔ ɛgzampul, motoka nɔ ebul mek insɛf we i pwɛl pan aksidɛnt. Dis tin we bin apin bin ɛp wi bɔypikin fɔ ɔndastand Jiova in sɛns.”

13. Aw mama ɛn papa dɛn go ebul ɛp dɛn pikin dɛn fɔ no bɔt Gɔd in pawa? (Ayzaya 40:​26)

¹³ Jiova want wi fɔ luk ɔp di skay ɛn tink bɔt aw in wɔndaful pawa de mek ɔl di sta dɛn de usay dɛn fɔ de. (Rid Ayzaya 40:​26.) Yu kin ɛnkɔrej yu pikin dɛn fɔ luk ɔp di skay ɛn tink bɔt wetin dɛn de si. Wan sista we de na Taywan we nem Tingting, bin mɛmba sɔntin we bin apin to am we i bin smɔl. I se: Wantɛm, mi ɛn mi mama bin go waka na say usay bɛtɛ layt nɔ de ɛn wi bin ebul fɔ si bɔku sta dɛn na di skay. Da tɛm de, a bin de wɔri se a nɔ go ebul fɔ kɔntinyu fɔ fetful to Jiova bikɔs mi klasmet dɛn bin de mek i nɔ izi fɔ mi fɔ obe Jiova. Mi mama bin ɛnkɔrej mi fɔ tink bɔt di kayn pawa we Jiova bin yuz fɔ mek ɔl di sta dɛn ɛn fɔ mɛmba mi se I go mɔs yuz da pawa de fɔ ɛp mi fɔ bia ɛni tɛst. Afta we a bin tek tɛm wach di tin dɛn we Gɔd mek da tɛm de we mi ɛn mi mama bin go waka, dat bin muv mi fɔ tray fɔ no Jiova mɔ, ɛn a bin mekɔp mi maynd fɔ sav am.”

14. Aw mama ɛn papa dɛn go ebul yuz di tin dɛn we Gɔd mek fɔ ɛp dɛn pikin dɛn fɔ si Jiova as Gɔd we gladi?

¹⁴ Di tin dɛn we Jiova mek de sho se in na Gɔd we gladi ɛn i want wisɛf fɔ gladi. Sayɛnsman dɛn dɔn kam fɔ no se bɔku animal dɛn de ple, ivin di bɔd ɛn fish dɛn. (Job 40:​20) Yu pikin dɛn dɔn ɛva laf we dɛn de wach we animal de ple? Sɔntɛm dɛn dɔn si we smɔl pus dɛn ɔ pikin dɔg dɛn de ple togɛda. Di nɛks tɛm we yu si yu pikin dɛn de laf bikɔs dɛn de wach di fɔni tin dɛn we animal dɛn kin du, yu nɔ tink se i go fayn fɔ mɛmba dɛn se wi de sav Gɔd we gladi?—1 Tim. 1:​11.

15. Wetin go ɛp mama ɛn papa dɛn fɔ tray fɔ no wetin dɛn pikin dɛn de tink? (Prɔvabs 20:​5) (Luk bak di pikchɔ.)

¹⁵ Sɔntɛnde, i nɔ kin izi fɔ lɛ mama ɛn papa dɛn mek dɛn pikin dɛn tɔk bɔt di prɔblɛm dɛn we de mit dɛn. If na dat de apin to yu, sɔntɛm yu nid fɔ tray fɔ no wetin yu pikin dɛn de tink.  (Rid Prɔvabs 20:​5.) Sɔm mama ɛn papa dɛn dɔn si se i izi fɔ du dat we dɛn wit dɛn pikin dɛn de kɔle di tin dɛn we Gɔd mek. Wetin mek? Wan rizin na dat bɔku tin dɛn nɔ de we de tek di pikin dɛn ɛn dɛn mama ɛn papa dɛn atɛnshɔn. Wan papa we nem Masaiko we de na Taywan tɔk bɔt wan ɔda rizin. I se: “We wi de spɛn tɛm na do wit wi pikin dɛn, lɛk fɔ klem ɔp dɛn il dɛn ɔ fɔ go waka na bich, bɔku tɛm dat kin mek dɛn rilaks. Dat kin mek i izi fɔ wi fɔ tray fɔ tɔk to dɛn ɛn no wetin dɛn de tink.” Katya we wi bin dɔn tɔk bɔt, tɔk se: “We skul kɔmɔt, mi mama bin de kɛr mi go na wan fayn pak. We wi kin de na da kayn fayn ples de, i kin izi fɔ mek a tɛl am wetin apin na skul ɔ di tin we de mek a wɔri.”

16. Aw famili dɛn go rilaks ɛn gɛt gud taym we dɛn de ɛnjɔy fɔ wach di tin dɛn we Jiova mek?

¹⁶ We famili dɛn de ɛnjɔy di tin dɛn we Jiova mek, dat kin mek dɛn rilaks ɛn gɛt gud taym togɛda, dis go ɛp dɛn fɔ lɛk dɛnsɛf mɔ ɛn mɔ. Di Baybul se “tɛm de fɔ laf” ɛn “tɛm de fɔ gladi.” (Ɛkli. 3:​1, 4) Jiova dɔn mek fayn ples dɛn na di wɔl usay wi kin du di tin dɛn we wi lɛk. Bɔku famili dɛn kin lɛk fɔ de togɛda na fayn ples usay bɔku pan di tin dɛn we Jiova mek de, lɛk na vilej, ɔp dɛn il dɛn, ɔ na bich. Sɔm pikin dɛn kin lɛk fɔ rɔn ɛn ple na pak, tek tɛm wach animal dɛn, ɔ swim na riva, lek, ɔ na bich. Wi gɛt bɔku chans fɔ kɔle di tin dɛn we Jiova mek ɛn fɔ ɛnjɔy wisɛf we wi de nia dɛn!

17. Wetin mek mama ɛn papa dɛn fɔ ɛp dɛn pikin dɛn fɔ ɛnjɔy di tin dɛn we Gɔd mek?

¹⁷ Insay Gɔd in nyu wɔl, mama ɛn papa dɛn ɛn dɛn pikin dɛn go ɛnjɔy di tin dɛn we Jiova mek pas aw dɛn de ɛnjɔy am naw. Da tɛm de, wi nɔ go gɛt ɛni rizin fɔ fred animal dɛn ɛn dɛnsɛf nɔ go fred wi. (Ayz. 11:​6-9) Wi go gɛt bɔku bɔku tɛm fɔ ɛnjɔy di tin dɛn we Jiova mek. (Sam 22:​26) Bɔt mama ɛn papa dɛn, una nɔ wet te da tɛm de fɔ ɛp una pikin dɛn fɔ bigin ɛnjɔy di tin dɛn we Gɔd mek. As una de yuz di tin dɛn we Gɔd mek fɔ tich una pikin dɛn bɔt Jiova, sɔntɛm dɛnsɛf go gri wit wetin Kiŋ Devid bin tɔk, we i se: ‘E Jiova no Gɔd nɔ de we dɔn du wetin yu dɔn du.’—Sam 86:​8.