1-2. Us blɛsin dɛn yu go gɛt afta yu baptayz?

 WI KIN gladi we wi baptayz ɛn de pat pan Jiova in famili. Di wan dɛn we gɛt di ɔnɔ fɔ gɛt tayt padi biznɛs wit Jiova go gri wit wetin Devid we na wan pan di man dɛn we rayt di sam buk tɔk, we i se: “Di wan we yu [Jiova] pik ɛn drɔ nia yu go gladi fɔ de nia yu kɔmpawn dɛn.”​—Sam 65:4.

² Jiova nɔ jɔs de briŋ ɛni kayn pɔsin na in kɔmpawn. As wi bin dɔn tɔk na di atikul bifo dis wan, i kin disayd fɔ kam nia pipul dɛn we dɔn sho se dɛn want fɔ gɛt tayt padi biznɛs wit am. (Jems 4:8) We yu gi yu layf to Jiova ɛn baptayz, yu de kam nia am wan spɛshal we. Afta yu dɔn baptayz, biliv se i go mek “blɛsin kam pan [yu] lɛk flɔd te [yu] nɔ want natin igen.”​—Mal. 3:10; Jɛr. 17:7, 8.

3. Us siriɔs wok Kristian dɛn we dɔn gi dɛn layf to Jiova ɛn baptayz gɛt? (Ɛkliziastis 5:​4, 5)

³ Fɔ baptayz na wan pan di fɔs tin dɛn we yu nid fɔ du fɔ bigin sav Jiova. Afta yu dɔn baptayz, yu go want fɔ du yu bɛst fɔ kip di prɔmis we yu dɔn mek fɔ sav Jiova ɛn kɔntinyu fɔ fetful to am, ivin we sɔntin tɛmt yu ɔ we yu de gɛt prɔblɛm dɛn. (Rid Ɛkliziastis 5:4, 5.) As wan pan Jizɔs in disaypul dɛn, yu go fala in ɛgzampul ɛn obe ɔl di tin dɛn we i tɛl wi fɔ du? (Mat. 28:19, 20; 1 Pit. 2:21) Dis atikul go ɛp yu fɔ du dat.

“KƆNTINYU FƆ FALA” JIZƆS PAN ƆL WE YU DE GƐT PRƆBLƐM ƐN TƐMTESHƆN DƐN

4. Wetin i min fɔ mek Jizɔs in disaypul dɛn tot di “tik we [dɛn] go sɔfa pan?” (Lyuk 9:23)

⁴ Ivin afta yu dɔn baptayz, yu go stil gɛt prɔblɛm dɛn. Infakt, Jizɔs bin mek wi no klia wan se in disaypul dɛn  go tot di “tik we [dɛn] go sɔfa pan.” Dɛn go du dat “ɛvride.” (Rid Lyuk 9:23.) Fɔ se Jizɔs bin de tɔk se in disaypul dɛn go de sɔfa ɔltɛm? Nɔ. Bɔt, i bin de tɔk se pan ɔl we dɛn go gɛt blɛsin dɛn, prɔblɛm dɛn go mit dɛn bak. Sɔntɛm sɔm pan di prɔblɛm dɛn we go mit dɛn go rili at fɔ bia.​—2 Tim. 3:12.

5. Us blɛsin dɛn Jizɔs prɔmis di wan dɛn we de mek sakrifays dɛn fɔ sav Jiova?

⁵ Sɔntɛm yu famili de agens yu, ɔ sɔntɛm yu dɔn sakrifays mɔni ɛn ɔda tin dɛn fɔ put Gɔd in Kiŋdɔm fɔs na yu layf. (Mat. 6:33) If na so i bi, gɛt kɔnfidɛns se Jiova no ɔl wetin yu dɔn du fɔ am. (Ibru. 6:10) Sɔntɛm yu dɔn si se di wɔd dɛn we Jizɔs tɔk na tru we i se: “Ɛnibɔdi we dɔn lɛf os ɔ brɔda dɛn ɔ sista dɛn ɔ mama ɔ papa ɔ pikin dɛn ɔ fam dɛn fɔ mi sek ɛn fɔ di gud nyuz in sek go gɛt dɛn tin ya pas 100 tɛm naw. I go gɛt os dɛn, brɔda dɛn, sista dɛn, mama dɛn, pikin dɛn, fam dɛn, dɔn pipul dɛn go mek i sɔfa, bɔt i go gɛt layf we go de sote go tumara bambay.” (Mak 10:29, 30) Wan dawt nɔ de se di blɛsin dɛn we yu dɔn gɛt bɔku fa fawe pas ɛni sakrifays we yu dɔn mek.​—Sam 37:4.

6. Wetin mek yu nid fɔ kɔntinyu fɔ fɛt agens “di tin dɛn we di bɔdi want” afta yu dɔn baptayz?

⁶ Yu go stil nid fɔ fɛt agens “di tin dɛn we di bɔdi want,” afta yu dɔn baptayz. (1 Jɔn 2:16) Dis na bikɔs yu nɔ pafɛkt. Sɔntɛnde, yu go fil lɛk aw apɔsul Pɔl bin fil. I bin rayt se: “Insay mi at, a rili lɛk Gɔd in lɔ, bɔt insay mi bɔdi wan ɔda lɔ de we de fɛt di lɔ we de na mi maynd, ɛn i de mek a bi slev to sin in lɔ we de insay mi bɔdi.” (Rom. 7:22, 23) Sɔntɛm yu at go pwɛl we yu mɛmba se yu nid fɔ fɛt agens di rɔng tin dɛn we yu de fil fɔ du. Bɔt we yu tink bɔt di prɔmis we yu bin dɔn mek to Jiova we yu gi yu layf to am, dat go ɛp yu fɔ fɛt agens ɛnitin we go tɛmt yu. Di tru na dat we sɔntin tɛmt yu, di gi we yu dɔn gi yu layf to Jiova go ɛp yu. Aw?

7. Aw di gi we yu dɔn gi yu layf to Jiova go ɛp yu fɔ kɔntinyu fɔ fetful to am?

⁷ We yu gi yu layf to Jiova, yu dɔn sho se yu nɔ de fɔ yusɛf igen. Dis min se yu dɔn disayd nɔ fɔ du ɛnitin we go mek Jiova nɔ gladi. (Mat. 16:24) So we sɔntin tɛst yu, yu nɔ go gɛt wan dawt bɔt wetin fɔ du. Yu go dɔn ɔlrɛdi disayd wetin fɔ du, dat na fɔ kɔntinyu fɔ fetful to Jiova. Yu go mekɔp yu maynd fɔ kɔntinyu fɔ du tin dɛn we go mek Jiova gladi. We yu du dat, yu go tan lɛk Job. Pan ɔl we i bin gɛt siriɔs prɔblɛm dɛn, i bin sho se i dɔn mekɔp in maynd bay we i tɔk se: “A nɔ go lɛf fɔ waka tret na Gɔd in yay!”​—Job 27:5.

8. We yu de tink bɔt di pre we yu bin pre to Jiova fɔ gi yu layf to am, aw dat go ɛp yu nɔ fɔ alaw ɛnitin fɔ tɛmt yu?

⁸ We yu de tink bɔt di pre we yu bin pre to Jiova fɔ gi yu layf to am, dat go ɛp yu fɔ mek yu nɔ alaw ɛnitin fɔ tɛmt yu fɔ du sɔntin we bad. Fɔ ɛgzampul, yu tink se yu fɔ mek pɔsin we yu nɔ mared to fil se yu want am? Wan dawt nɔ de se yu nɔ go du dat! Yu bin dɔn ɔlrɛdi prɔmis Jiova se yu nɔ go du da kayn tin de. If yu nɔ alaw bad tin dɛn fɔ de na yu at, yu nɔ go nid fɔ fɛt leta fɔ pul dɛn kɔmɔt de. Yu nɔ go “gri” fɔ go na “di wikɛd pɔsin in rod.”​—Prɔv. 4:14, 15.

9. We yu de tink bak bɔt di pre we yu pre fɔ gi yu layf to Jiova, aw dat go ɛp yu fɔ put Jiova fɔs na yu layf?

⁹ Wetin yu go du if dɛn gi yu wok we go  mek yu nɔ ebul atɛnd di mitin dɛn ɔltɛm? Yu ɔlrɛdi no wetin fɔ du. Bifo dɛn gi yu di wok, yu bin dɔn disayd nɔ fɔ tek ɛni wok we go mek yu nɔ atɛnd di mitin dɛn ɔltɛm. So yu nɔ go alaw ɛnitin fɔ tɛmt yu fɔ tek da kayn wok de ɛn stil tray fɔ put Jiova fɔs na yu layf. We wi tink gud wan bɔt Jizɔs in ɛgzampul, dat go ɛp wi. I bin mekɔp in maynd fɔ du tin dɛn we go mek in Papa gladi. Lɛk Jizɔs, mekɔp yu manyd nɔ fɔ du ɛnitin we go mek di Gɔd we yu dɔn gi yu layf to nɔ gladi.​—Mat. 4:10; Jɔn 8:29.

10. Aw Jiova go ɛp yu fɔ “kɔntinyu fɔ fala” Jizɔs afta yu dɔn baptayz?

¹⁰ Di prɔblɛm dɛn we de mit wi ɛn di tin dɛn we kin tɛmt wi de gi wi chans fɔ sho se wi dɔn mekɔp wi maynd fɔ “kɔntinyu fɔ fala” Jizɔs. As yu de du dat, gɛt kɔnfidɛns se Jiova go ɛp yu. Di Baybul se: “Gɔd fetful, i nɔ go alaw tɛmteshɔn we una nɔ ebul fɔ bia fɔ mit una; bɔt we tɛmteshɔn mit una, i go mek we bak so dat una go ebul fɔ bia am.”​—1 Kɔr. 10:13.

WETIN YU GO DU FƆ KƆNTINYU FƆ FALA JIZƆS?

11. Wetin na wan pan di bɛst tin dɛn we yu go du fɔ mek yu kɔntinyu fɔ fala Jizɔs afta yu baptayz? (Luk bak di pikchɔ.)

¹¹ Jizɔs bin sav Jiova wit ɔl in at ɛn i bin kɔntinyu fɔ de nia am bay we i bin de pre to am. (Lyuk 6:12) Infakt, wan pan di bɛst tin dɛn we go ɛp yu fɔ kɔntinyu fɔ fala Jizɔs afta yu baptayz, na we yu de du tin dɛn we go mek yu kam nia Jiova mɔ ɛn mɔ. Di Baybul tɔk se: “Ilɛk aw wi dɔn go bifo, lɛ wi kɔntinyu fɔ waka di kɔrɛkt we lɛk aw wi dɔn de du.” (Fil. 3:16) Wan wan tɛm, yu go de yɛri ɛkspiriɛns  dɛn bɔt brɔda ɛn sista dɛn we dɔn disayd fɔ du mɔ fɔ sav Jiova. Sɔntɛm, dɛn bin atɛnd di Skul fɔ Pipul dɛn We De Prich bɔt Gɔd in Kiŋdɔm ɔ sɔntɛm dɛn go de na say usay dɛn nid mɔ pipul dɛn fɔ prich. I go rili fayn if yu ebul fɔ sɛt da kayn gol de. Jiova in pipul dɛn rɛdi fɔ du mɔ pan di prichin wok. (Akt 16:9) Bɔt wetin yu go du if yu nɔ ebul sɛt da gol de naw? Nɔ tink se di wan dɛn we ebul fɔ du am bɛtɛ pas yu. Di tin we impɔtant na fɔ mek yu kɔntinyu fɔ bia. (Mat. 10:22) Nɔ fɔgɛt se yu go mek Jiova gladi we yu du wetin yu ebul fɔ sav am. Dat na wan impɔtant we we yu go sho se yu de kɔntinyu fɔ fala Jizɔs afta yu baptayz.​—Sam 26:1.

12-13. Wetin yu go du if yu notis se yu nɔ gɛt bɛtɛ zil igen? (1 Kɔrintians 9:​16, 17) (Luk bak di bɔks we gɛt di taytul “ Kɔntinyu fɔ De na di Res.”)

¹² Wetin yu go du if yu notis se yu nɔ de pre wit ɔl yu at igen ɔ yu nɔ de ɛnjɔy di prichin wok lɛk aw yu bin de ɛnjɔy am trade? Ɔ wetin yu go du if yu nɔ de ɛnjɔy fɔ rid di Baybul lɛk trade? If na so yu de fil afta yu dɔn baptayz, nɔ tink se yu nɔ gɛt Jiova in spirit igen. Yu na mɔtalman we nɔ pafɛkt, ɛn di we aw yu de fil kin chenj as tɛm de go. If yu nɔ gɛt bɛtɛ zil igen, tink bɔt apɔsul Pɔl in ɛgzampul. Pan ɔl we i bin tray fɔ falamakata Jizɔs, i bin no se tɛm dɛn go de we i nɔ go gɛt bɛtɛ zil lɛk ɔda tɛm dɛn. (Rid 1 Kɔrintians 9:16, 17.) I bin tɔk se: “Ilɛksɛf a du am we a nɔ want fɔ du am, a stil gɛt wok we dɛn gi mi.” Pɔl bin de tɔk se i dɔn mekɔp in maynd fɔ du di prichin wok pan ɔl we tɛm dɛn go de we i nɔ de fil fɔ du am.

¹³ Semweso, nɔ alaw di we aw yu de fil  fɔ disayd fɔ yu. Mekɔp yu maynd fɔ du wetin rayt pan ɔl we nɔto dat yu go want fɔ du. If yu kɔntinyu fɔ du wetin rayt, as tɛm de go di we aw yu de fil go chenj. Bɔt te da tɛm de, we yu de du yu pasɔnal stɔdi, pre, atɛnd di mitin dɛn, ɛn prich, dat go ɛp yu fɔ kɔntinyu fɔ fala Jizɔs afta yu baptayz. We di brɔda ɛn sista dɛn si se yu de bia we yu de sav Jiova, dat bak go ɛnkɔrej dɛn.​—1 Tɛs. 5:11.

“GO DE CHƐK [YUSƐF] . . . GO DE PRUV TO [YUSƐF]”

14. Wetin yu fɔ de du ɔltɛm? Wetin mek? (2 Kɔrintians 13:5)

¹⁴ Wan ɔda tin we go ɛp yu afta yu dɔn baptayz, na we yu de chɛk yusɛf ɔltɛm. (Rid 2 Kɔrintians 13:5.) Wan wan tɛm, na fɔ tek tɛm chɛk yusɛf ɛn di tin dɛn we yu de du fɔ si if yu de pre ɔltɛm, rid ɛn stɔdi di Baybul, atɛnd di mitin dɛn, ɛn du di prichin wok. Tray fɔ fɛn we dɛn fɔ ɛnjɔy ɛn bɛnifit mɔ frɔm dɛn tin dɛn ya. Fɔ ɛgzampul, yu kin aks yusɛf kwɛstyɔn dɛn lɛk: ‘A ebul ɛksplen di men tin dɛn we di Baybul de tich to ɔda pipul dɛn? Tin dɛn de we a go du we go mek a ɛnjɔy di prichin wok mɔ? We a de pre, a kin pre bɔt patikyula tin dɛn ɛn sho Jiova se a abop pan am wit ɔl mi at? A kin atɛnd di mitin dɛn ɔltɛm? Wetin a go du fɔ pe atɛnshɔn mɔ ɛn kɔmɛnt we a de na mitin?’

15-16. Wetin yu lan frɔm wan brɔda in ɛkspiriɛns bɔt aw wi nɔ fɔ alaw ɛnitin fɔ tɛmt wi?

¹⁵ I impɔtant bak fɔ lɛ yu no di say dɛn we yu wik. Fɔ ɛp wi fɔ ɔndastand dis, lɛ wi tɔk bɔt wan brɔda we nem Rɔbɔt in ɛkspiriɛns. I se: “We a bin ol lɛk 20 ia, a bin gɛt pat-taym wok. Wan de afta wi dɔn wok, wan pan mi wokmet we na uman invayt mi na in os. I bin tɔk se na wi tu nɔmɔ go de ɛn wi go ‘ɛnjɔy wisɛf.’ Fɔs, a nɔ bin gi am gud rizin dɛn we mek a nɔ go go. Bɔt leta, a bin tɛl am se a nɔ go go ɛn a ɛksplen wetin mek.” Rɔbɔt bin avɔyd di tɛmteshɔn ɛn dat bin rili fayn. Bɔt leta, we i tink bɔt wetin bin apin, i kam fɔ si se i fɔ dɔn du tin difrɛn we. I tɔk se: “A nɔ bin tɛl am se a nɔ go go wantɛm wantɛm lɛk aw Josɛf nɔ bin westɛm fɔ du di rayt tin we Pɔtifa in wɛf tɛmt am. (Jɛn. 39:​7-9) Infakt, a bin sɔprayz fɔ no se i nɔ bin izi fɔ mi fɔ se nɔ. Dis tin we bin apin ɛp mi fɔ no se a nid fɔ mek mi padi biznɛs wit Jiova tayt mɔ ɛn mɔ.”

 ¹⁶ Sɔntɛm yu go bɛnifit we yu chɛk yusɛf lɛk aw Rɔbɔt bin du. Pan ɔl we yu nɔ du bad we sɔntin tɛmt yu, i go fayn fɔ mek yu aks yusɛf dis kwɛstyɔn, ‘Ɔmɔs tɛm pas bifo a se nɔ?’ If yu si say dɛn we yu nid fɔ ajɔst, nɔ pwɛlat. Bifo dat, gladi bikɔs yu dɔn no di say we yu wik. Pre bɔt am ɛn du tin dɛn we go mek yu mekɔp yu maynd mɔ fɔ liv yu layf di we aw Jiova want.​—Sam 139:​23, 24.

17. Aw Rɔbɔt in ɛkspiriɛns bin gɛt sɔntin fɔ du wit Jiova in nem?

¹⁷ Ɔda tin de bak we wi lan frɔm Rɔbɔt in ɛkspiriɛns. I kɔntinyu fɔ tɔk se: “Afta a tɛl mi wokmet se a nɔ go go na in os, i tɔk se, ‘Yu dɔn pas di tɛst!’ A aks am wetin mek i tɔk dat. I ɛksplen se wan pan in padi dɛn we na bin Jiova Witnɛs tɛl am se ɔl Jiova Witnɛs dɛn we na yɔŋ pipul dɛn go du wetin bad sikrit wan if dɛn gɛt di chans fɔ du am. So mi wokmet bin tɛl in padi se i go tɛst mi. A bin gladi fɔ no se a dɔn mek Jiova in nem gɛt prez.”

18. Wetin yu dɔn mekɔp yu maynd fɔ du afta yu baptayz? (Luk bak di bɔks we gɛt di taytul “ Tu Atikul dɛn we Yu Go Ɛnjɔy fɔ Rid.”)

¹⁸ We yu gi yu layf to Jiova ɛn baptayz, yu de sho se yu want fɔ mek in nem oli ilɛk wetin apin. Ɛn yu kin gɛt kɔnfidɛns se Jiova no di prɔblɛm dɛn we de mit yu ɛn di tɛmteshɔn dɛn we yu de avɔyd. I go blɛs yu fɔ we yu de kɔntinyu fɔ fetful to am. Gɛt kɔnfidɛns se i go yuz in oli spirit fɔ gi yu di trɛnk we yu nid fɔ du dat. (Lyuk 11:​11-13) Wit Jiova in ɛp, yu go ebul fɔ kɔntinyu fɔ fala Jizɔs afta yu baptayz.