1. Us dawt sɔm pan Jiova in fetful savant dɛn kin gɛt?

 WI GLADI fɔ no se Jiova gladi fɔ in pipul dɛn! Di Baybul se: “Jiova gladi fɔ in pipul dɛn.” (Sam 149:4) Bɔt sɔntɛnde, sɔm pipul dɛn at kin pwɛl pasmak ɛn dat kin mek dɛn dawt if Jiova gladi fɔ dɛn. Bɔku pan Jiova in fetful savant dɛn we di Baybul tɔk bɔt bin dɔn fil da sem we de.​—1 Sam. 1:6-10; Job 29:2, 4; Sam 51:11.

2. Udat dɛn Jiova gladi fɔ?

² Di Baybul sho klia wan se mɔtalman dɛn we nɔ pafɛkt go ebul mek Jiova gladi fɔ dɛn. Aw? Wi fɔ sho se wi gɛt fet pan Jizɔs ɛn baptayz. (Jɔn 3:16) We wi du dɛn tin dɛn ya, wi de sho ɔda pipul dɛn se wi dɔn ripɛnt fɔ wi sin dɛn ɛn wi dɔn prɔmis fɔ du wetin Gɔd want. (Akt 2:38; 3:19) Jiova de gladi we wi du dɛn tin dɛn ya fɔ mek wi go gɛt tayt padi biznɛs wit am. Wans wi du wi bɛst fɔ kip wi prɔmis fɔ se wi go sav am, Jiova go gladi fɔ wi ɛn i go si wi as in tayt padi dɛn.​—Sam 25:14.

3. Wetin wi go tɔk bɔt?

³ Bɔt wetin mek sɔntɛnde sɔm pipul dɛn kin fil se Gɔd nɔ gladi fɔ dɛn? Aw Jiova de sho se i gladi fɔ pɔsin? Ɛn aw pɔsin we na Kristian go gɛt mɔ kɔnfidɛns se Gɔd gladi fɔ am?

 WETIN MEK SƆM PIPUL DƐN KIN FIL SE JIOVA NƆ GLADI FƆ DƐN?

4-5. Ivin if wi de fil se wi nɔ gɛt valyu, wetin wi fɔ biliv tranga wan?

⁴ Frɔm we wi na bin pikin dɛn, bɔku pan wi dɔn de fil se wi nɔ gɛt wan valyu. (Sam 88:15) Wan brɔda we nem Edrian tɔk se: “A bin de fil ɔltɛm se a nɔ gɛt valyu. We a bin smɔl, a mɛmba we a bin pre fɔ mek mi famili go de na Paradays, pan ɔl we a bin fil se a nɔ fit fɔ de de.” Toni, we nɔ mɛn as Kristian tɔk se: “Mi mama ɛn papa nɔ ɛva tɛl mi se dɛn lɛk mi ɔ dɛn gladi fɔ mi. Dis bin de mek a fil se natin nɔ de we a go du fɔ mek dɛn gladi.”

⁵ If sɔntɛnde wi de fil se wi nɔ gɛt wan valyu, i go fayn fɔ mek wi mɛmba se na Jiova insɛf sɛf drɔ wi kam to am. (Jɔn 6:44) I de si di fayn kwaliti dɛn we wi gɛt we wi nɔ ebul fɔ si ɛn i no di kayn pɔsin we wi rili bi. (1 Sam. 16:7; 2 Kro. 6:30) So i go fayn fɔ mek wi biliv am we i se wi valyu to am.​—1 Jɔn 3:19, 20.

6. Aw apɔsul Pɔl bin de fil bɔt di sin dɛn we i bin dɔn kɔmit?

⁶ Bifo sɔm pan wi lan di trut, wi bin dɔn du tin dɛn we mek wi stil de fil gilti. (1 Pit. 4:3) Ivin fetful Kristian dɛn kin stil fɛt tranga wan nɔ fɔ du di bad tin dɛn we dɛn kin fil fɔ du. Sɔntɛnde yusɛf kin fil se Jiova nɔ go fɔgiv yu? If yu de fil da we de, yu go gɛt kɔrej we yu no se Jiova in fetful savant dɛn bin de fil da sem we de. Fɔ ɛgzampul, apɔsul Pɔl in at bin rili pwɛl we i tink bɔt di mistek dɛn we i bin dɔn mek. (Rom. 7:24) Na tru se Pɔl bin dɔn ripɛnt fɔ in sin dɛn ɛn baptayz. Bɔt stil, i bin kɔl insɛf “di wan we nɔ impɔtant bɛtɛ pan di apɔsul dɛn” ɛn di sina we “wɔs pas dɛn ɔl.”​—1 Kɔr. 15:9; 1 Tim. 1:15.

7. Wetin wi fɔ mɛmba bɔt di sin dɛn we wi bin dɔn kɔmit?

⁷ Wi Papa we de na ɛvin prɔmis se i go fɔgiv wi if wi ripɛnt. (Sam 86:5) So if wi rili sɔri fɔ di sin dɛn we wi bin dɔn kɔmit, wi go biliv se wetin Jiova tɔk na tru ɛn i dɔn fɔgiv wi.—Kol. 2:13.

8-9. Wetin go ɛp wi fɔ lɛf fɔ fil se wi nɔ go ɛva ebul mek Jiova gladi fɔ wi ilɛk wetin wi du?

⁸ Wi ɔl want fɔ du ɔl wetin wi ebul fɔ sav Jiova. Bɔt, sɔm kin fil se dɛn nɔ go ɛva ebul fɔ mek Jiova gladi fɔ dɛn ilɛk wetin dɛn du. Wan sista we nem Amanda tɔk se: “Bɔku tɛm, a kin tink se fɔ gi Jiova mi bɛst min se a nid fɔ du mɔ ɔltɛm. So dis mek bɔku tɛm, a bin de ɛkspɛkt se a fɔ du pas wetin a ebul fɔ du. We a nɔ ebul fɔ du dat, a kin fil lɛk se Jiova no gladi fɔ mi jɔs lɛk aw a nɔ gladi fɔ misɛf.”

⁹ Aw wi go lɛf fɔ fil se Jiova nɔ go ɛva gladi fɔ wi ilɛk wetin wi du? Mɛmba se Jiova nɔ de pin. I nɔ de ɛva aks wi fɔ du pas wetin wi ebul fɔ du. I de gladi fɔ ɛnitin we wi ebul fɔ du wans na wi bɛst. Dɔn bak, tink bɔt Baybul ɛgzampul dɛn bɔt di wan dɛn we bin sav Jiova wit ɔl dɛn at. Tink bɔt Pɔl in ɛgzampul. I bin wok tranga wan fɔ lɔng tɛm, travul go fa fa say dɛn, ɛn bigin bɔku kɔngrigeshɔn dɛn. Bɔt we tɛm bin rich we i nɔ ebul fɔ du mɔ na di prichin wok lɛk aw i bin de du, fɔ se Gɔd nɔ bin gladi fɔ am? Nɔ. I bin kɔntinyu fɔ du wetin i ebul fɔ du ɛn Jiova bin blɛs am. (Akt 28:30, 31) Semweso, sɔntɛnde di tin dɛn we wi de du fɔ Jiova kin chenj. Bɔt wetin impɔtant to am na di rizin we mek wi de du am. Naw, lɛ wi tɔk bɔt sɔm we dɛn we Jiova de sho se i gladi fɔ wi.

 AW JIOVA DE SHO SE I GLADI FƆ WI?

10. Aw wi go “yɛri” we Jiova de tɔk se i gladi fɔ wi? (Jɔn 16:27)

¹⁰ I de yuz di Baybul. Jiova de luk fɔ we dɛn fɔ sho in pipul dɛn se i lɛk dɛn ɛn i gladi fɔ dɛn. Di Baybul tɔk bɔt tu tɛm we I tɛl Jizɔs se in na In Bɔypikin we I rili lɛk ɛn gladi fɔ. (Mat. 3:17; 17:5) Yu go lɛk fɔ yɛri we Jiova de tɛl yu se i gladi fɔ yu? Jiova nɔ de tɔk to wi frɔm ɛvin, bɔt i de yuz in Wɔd di Baybul fɔ tɔk to wi. Wi go ebul fɔ yɛri Jiova in vɔys we i de tɛl wi se i gladi fɔ wi we wi de rid Jizɔs in wɔd dɛn we de insay di Gɔspɛl dɛn. (Rid Jɔn 16:27.) Jizɔs bin sho pafɛkt wan di kayn pɔsin we in Papa bi. So we wi rid bɔt aw Jizɔs bin sho in fetful disaypul dɛn we nɔ bin pafɛkt se i gladi fɔ dɛn, wi go ebul fɔ imajin we Jiova de tɛl wi dɛn wɔd dɛn de.​—Jɔn 15:9, 15.

11. Wetin mek we wi de gɛt prɔblɛm dɛn dat nɔ min se Jiova nɔ gladi fɔ wi? (Jems 1:12)

¹¹ Di tin dɛn we i de du. Jiova rili want fɔ ɛp wi, ɛn i de gi wi di tin dɛn we wi nid fɔ liv. Bɔt sɔntɛnde, sɔntɛm Jiova go alaw bad tin dɛn fɔ apin to wi jɔs lɛk aw i bin alaw bad tin dɛn fɔ apin to Job we na man we bin de du wetin rayt. (Job 1:8-11) We wi gɛt prɔblɛm dɛn dat nɔ min se Jiova nɔ gladi fɔ wi. Bɔt dɛn de gi wi chans fɔ sho se wi rili lɛk Gɔd ɛn wi abop pan am. (Rid Jems 1:12.) Ɛn we wi de gɛt dɛn prɔblɛm dɛn de, wi go ebul fɔ si aw i lɛk wi ɛn aw i de ɛp wi fɔ bia.

12. Wetin wi kin lan frɔm Dimitri in ɛkspiriɛns?

¹² Tink bɔt wan brɔda we de na Eshia we nem Dimitri. I bin lɔs in wok ɛn i nɔ bin ebul fɔ fɛn wok fɔ sɔm mɔnt. So i disayd fɔ abop pan Jiova bay we i bin de du mɔ na di prichin wok. Sɔm mɔnt pas ɛn i stil nɔ ebul fɔ gɛt wok. Dɔn i kam gɛt siriɔs wɛlbɔdi prɔblɛm we mek i nɔ ebul fɔ kɔmɔt na bed. I bin bigin fɔ tink se in nɔto gud maredman ɛn papa igen. I bin de wɔnda if Jiova gladi fɔ am. Dɔn wan ivintɛm in galpikin print di wɔd dɛn we de na Ayzaya 30:15 na pepa we se: “Una go gɛt trɛnk we una nɔ wɔri ɛn sho se una abop pan mi.” In pikin gi am ɛn tɔk se, “Papa, ɛnitɛm we yu fil bad na fɔ  mɛmba dis skripchɔ.” Dimitri bin kam fɔ no se Jiova bin de mek in famili gɛt tin fɔ it, klos fɔ wɛr, ɛn say fɔ de, so dat bin mek i gladi. I tɔk se: “Di tin we a bin nid fɔ du na fɔ lɛf fɔ wɔri ɛn kɔntinyu fɔ abop pan mi Gɔd.” If yu de gɛt da sem kayn prɔblɛm, na fɔ biliv se Jiova bisin bɔt yu ɛn i go ɛp yu fɔ bia.

13. Udat dɛn Jiova kin yuz sɔntɛnde fɔ sho se i gladi fɔ wi? Aw i kin du dat?

¹³ I de yuz wi kɔmpin Kristian dɛn. Jiova de yuz wi brɔda ɛn sista dɛn fɔ sho se i gladi fɔ wi. Fɔ ɛgzampul, sɔntɛm i go mek ɔda pipul dɛn tɔk wɔd dɛn we de ɛnkɔrej wi di rayt tɛm. Dis bin apin to wan sista we de na Eshia di tɛm we i bin rili strɛs. I bin lɔs in wok ɛn leta i bin sik siriɔs wan. Dɔn in man kɔmit siriɔs sin ɛn i nɔ bin kwalifay fɔ bi ɛlda igen. Di sista tɔk se: “A nɔ bin ɔndastand wetin mek dis bin de apin. A bin tink se sɔntɛm a dɔn du sɔntin we rɔng ɛn Jiova nɔ gladi fɔ mi igen.” Wi sista bin beg Jiova fɔ mek i ɛp am fɔ no se i gladi fɔ am. Aw Jiova bin du dat? Di sista tɔk se: “Di ɛlda dɛn na di kɔngrigeshɔn tɔk wit mi ɛn dɛn ɛp mi fɔ no se Jiova lɛk mi.” Leta, i bin pre to Jiova bak fɔ mek i go ɛp am. I tɔk se: “Da sem de de, sɔm brɔda ɛn sista dɛn na di kɔngrigeshɔn sɛn lɛta to mi. We a bin de rid di fayn wɔd dɛn we dɛn rayt, a bin si se Jiova dɔn ansa mi prea.” Fɔ tru, bɔku tɛm Jiova de sho se i gladi fɔ wi bay we i de yuz ɔda pipul dɛn fɔ tɔk fayn wɔd dɛn to wi.​—Sam 10:17.

14. Us ɔda we bak Jiova de sho se i gladi fɔ wi?

¹⁴ Jiova de sho bak se i gladi fɔ wi bay we i de yuz wi kɔmpin Kristian dɛn fɔ gi wi advays di tɛm we wi nid am.  Fɔ ɛgzampul, insay di fɔstɛm Kristian dɛn tɛm, Jiova bin yuz apɔsul Pɔl fɔ rayt 14 lɛta dɛn to in kɔmpin Kristian dɛn. Insay dɛn lɛta dɛn de, Pɔl bin gi dɛn strɔng advays, bɔt i du am di kayn we we bin sho se i lɛk dɛn. Wetin mek Jiova yuz Pɔl fɔ gi dɛn kayn advays dɛn de? Jiova na Papa we gud, ɛn i de kɔrɛkt in pikin dɛn “we i lɛk.” (Prɔv. 3:11, 12) So we pɔsin yuz di Baybul fɔ advays wi, i nɔ min se Jiova nɔ gladi fɔ wi, bɔt i de sho se Jiova stil lɛk wi. (Ibru. 12:6) Us ɔda we dɛn Jiova de sho se i gladi fɔ wi?

ƆDA WE DƐN WE WI GO EBUL NO SE JIOVA GLADI FƆ WI

15. Udat dɛn Jiova de gi in oli spirit? Wetin mek dis de mek wi gɛt kɔnfidɛns?

¹⁵ Jiova de gi in oli spirit to di wan dɛn we i gladi fɔ. (Mat. 12:18) Wi kin aks wisɛf dis kwɛstyɔn, ‘A kin sho se a gɛt sɔm pan di kwaliti dɛn we Gɔd in spirit de mek pɔsin gɛt?’ Yu de peshɛnt naw wit ɔda pipul dɛn pas trade we yu nɔ bin no Jiova? Di mɔ we yu de tray fɔ gɛt di fayn kwaliti dɛn we Gɔd in spirit de mek pɔsin gɛt, na di mɔ yu go gɛt kɔnfidɛns se Jiova gladi fɔ yu.—Luk di bɔks we gɛt di taytul “ Di Kwaliti dɛn we di Spirit De Mek Pɔsin Gɛt Na . . . ”

16. Udat dɛn Jiova de yuz fɔ prich di gud nyuz? Aw dat de mek yu fil? (1 Tɛsalonians 2:4)

¹⁶ Jiova gladi fɔ gi di wok fɔ prich di gud nyuz to pipul dɛn we i gladi fɔ. (Rid 1 Tɛsalonians 2:4.) Notis aw wan sista we nem Joslin bin bɛnifit bikɔs i de prich di gud nyuz to ɔda pipul dɛn. Wan mɔnin, Joslin in at bin rili pwɛl we i wek. I tɔk se: “A nɔ bin gɛt trɛnk ɛn a bin fil se a nɔ go ebul du natin. Bɔt a bin de payɔnia ɛn na bin mi de fɔ prich. So a pre ɛn go fil savis.” Da mɔnin de Joslin bin mit wan uman we nem Meri we bin gri fɔ stɔdi di Baybul. Afta sɔm mɔnt, Meri bin tɔk se, i bin dɔn de pre to Gɔd fɔ ɛp we Joslin nak na in domɔt. We Joslin de tink bɔt dis ɛkspiriɛns, i tɔk se: “A bin fil lɛk se Jiova bin de tɛl mi se, ‘a gladi fɔ.’” As wi ɔl no, nɔto ɔlman go gladi fɔ lisin to wi we wi de prich. Bɔt wi shɔ se Jiova kin gladi we wi de tray wi bɛst fɔ prich di gud nyuz to ɔda pipul dɛn.

17. Wetin yu lan frɔm di wɔd dɛn we Viki tɔk bɔt di prayz we Jizɔs pe fɔ bay wi bak? (Sam 5:12)

 ¹⁷ Jiova de mek di wan dɛn we i gladi fɔ bɛnifit frɔm di prayz we Jizɔs bin pe fɔ bay wi bak. (1 Tim. 2:​5, 6) Bɔt wetin wi go du if wi stil de fil se Jiova nɔ gladi fɔ wi pan ɔl we wi gɛt fet pan di prayz we Jizɔs pe fɔ bay wi bak ɛn wi dɔn baptayz? Mɛmba se, wi nɔ go abop pan di we aw wi de fil ɔltɛm, bɔt wi kin abop pan Jiova ɔltɛm. I de si di wan dɛn we gɛt fet pan di prayz we Jizɔs bin pe fɔ bay wi bak as pipul dɛn we de du wetin rayt na in yay ɛn i prɔmis fɔ blɛs dɛn. (Rid Sam 5:12; Rom. 3:26) Afta Viki tink gud gud wan bɔt di prayz we Jizɔs pe fɔ bay wi bak, dat bin ɛp am. I tɔk se: “Jiova rili dɔn peshɛnt wit mi fɔ lɔng tɛm. . . . Bɔt i bin tan lɛk a bin de tɛl am se: ‘Yu lɔv nɔ du fɔ mi. Yu Pikin in sakrifays nɔ du fɔ fri mi.’” We i tink gud gud wan bɔt di prayz we Jizɔs pe fɔ bay wi bak, i bin bigin fɔ si se Jiova lɛk am. Wisɛf go ebul si se Jiova lɛk wi ɛn no se i gladi fɔ wi we wi tink bɔt di prayz we Jizɔs pe fɔ bay wi bak.

18. Us kɔnfidɛns wi go gɛt if wi kɔntinyu fɔ lɛk wi Papa we de na ɛvin?

¹⁸ Pan ɔl we wi go tray tranga wan fɔ aplay di tin dɛn we wi dɔn lan na dis atikul, sɔntɛm, tɛm dɛn go de we wi at go pwɛl ɛn wi go de wɔnda if Jiova gladi fɔ wi. If dat apin, mɛmba se Jiova gladi fɔ “di wan dɛn we kɔntinyu fɔ lɛk Am.” (Jems 1:12) So kɔntinyu fɔ kam nia Jiova ɛn luk fɔ ɔl di we dɛn we i de sho se i gladi fɔ yu. Mɛmba ɔltɛm se Jiova “nɔ de fa frɔm ɛniwan pan wi.”​—Akt 17:27.