1. Wetin na sɔm blɛsin dɛn we wi de ɛnjɔy bikɔs wi de na Jiova in ɔganayzeshɔn?

 NA BIG big ɔnɔ wi gɛt fɔ de na Jiova in ɔganayzeshɔn insay dis las dez we tin rili tranga. As tin de bad-ɔf na di wɔl mɔ ɛn mɔ, Jiova dɔn mek wi gɛt brɔda ɛn sista dɛn fɔ ɛp wi. (Sam 133:1) I de ɛp wi fɔ gɛt famili we gɛt wanwɔd ɛn gladi-at. (Ɛfi. 5:33–6:1) Ɛn i de gi wi di sɛns we wi nid fɔ bia we wi gɛt pwɛlat ɛn fɔ gɛt gladi-at.

2. Wetin wi nid fɔ du? Wetin mek?

² Bɔt wi nid fɔ wok tranga wan fɔ kɔntinyu fɔ sav Jiova fetful wan. Wetin mek? Na bikɔs sɔntɛnde, wi brɔda ɛn sista dɛn go tɔk ɔ du sɔntin we go mek wi fil bad. Sɔntɛm wi at go pwɛl bak we wi mek mistek dɛn, mɔ if wi de ripit di sem mistek dɛn igen ɛn igen. Wi nid fɔ kɔntinyu fɔ sav Jiova (1) we wi kɔmpin Kristian ɔfɛnd wi, (2) we wi man ɔ wɛf disapɔynt wi, ɛn (3) we wi at pwɛl bikɔs wi mek mistek. Insay dis atikul, wi go tɔk bɔt dɛn tri pɔynt dɛn ya. Wi go tɔk bak bɔt wetin wi go lan frɔm wan pan Jiova in fetful savant we di Baybul tɔk bɔt.

KƆNTINYU FƆ FETFUL TO JIOVA WE YU KƆMPIN KRISTIAN ƆFƐND YU

3. Wetin nɔ kin izi fɔ Jiova in pipul dɛn?

³ Di tin we nɔ kin izi. Sɔm pan wi kɔmpin Kristian dɛn kin gɛt abit dɛn we wi nɔ lɛk. Sɔntɛm ɔda wan dɛn kin disapɔynt wi ɔ trit wi bad. Di ɛlda dɛn na di kɔngrigeshɔn kin mek mistek dɛn. Dɛn prɔblɛm dɛn ya kin mek sɔm pipul dɛn dawt if dis na Gɔd in ɔganayzeshɔn. Bifo dɛn kɔntinyu fɔ sav Gɔd wit “wanwɔd” wit dɛn brɔda ɛn sista dɛn, sɔntɛm dɛn go stɔp fɔ tɔk to di wan dɛn we dɔn ɔfɛnd dɛn ɛn ivin stɔp fɔ atɛnd di mitin dɛn. (Zɛf. 3:9)  Yu tink se i mek sɛns fɔ du dat? Lɛ wi si wetin wi go lan frɔm pɔsin we di Baybul tɔk bɔt we bin gɛt dɛn sem prɔblɛm dɛn ya.

4. Us prɔblɛm dɛn apɔsul Pɔl bin gɛt?

⁴ Ɛgzampul na di Baybul. Apɔsul Pɔl bin no se in brɔda ɛn sista dɛn nɔ pafɛkt. Fɔ ɛgzampul, sɔm brɔda ɛn sista dɛn na di kɔngrigeshɔn na Jerusɛlɛm bin de fred Pɔl di tɛm we i jɔs bi Kristian. (Akt 9:26) Leta, sɔm pipul dɛn bin de tɔk bad tin bɔt am fɔ mek ɔda pipul dɛn nɔ biliv am igen. (2 Kɔr. 10:10) Pɔl bin si we wan ɛlda du tin we nɔ rayt, we bin fɔ dɔn mek ɔda brɔda ɛn sista dɛn nɔ kɔntinyu fɔ sav Gɔd fetful wan. (Gal. 2:11, 12) Ɛn wan pan Pɔl in tayt padi we na Mak, bin rili disapɔynt am. (Akt 15:37, 38) Pɔl bin fɔ dɔn alaw ɛniwan pan dɛn prɔblɛm dɛn ya fɔ mek i avɔyd di pɔsin we bin ɔfɛnd am. Bɔt i bin kɔntinyu fɔ valyu in brɔda ɛn sista dɛn ɛn kɔntinyu fɔ sav Jiova fetful wan. Wetin bin ɛp Pɔl fɔ kɔntinyu fɔ sav Jiova fetful wan?

5. Wetin bin ɛp Pɔl fɔ mek i kɔntinyu fɔ bia wit in brɔda ɛn sista dɛn? (Koloshians 3:​13, 14) (Luk bak di pikchɔ.)

⁵ Pɔl bin lɛk in brɔda ɛn sista dɛn. Di lɛk we i bin lɛk ɔda pipul dɛn bin mek i nɔ pe atɛnshɔn pan dɛn mistek dɛn, bɔt i bin de pe atɛnshɔn pan dɛn fayn kwaliti dɛn. Lɔv bin ɛp Pɔl bak fɔ fɔgiv ɔda pipul dɛn we na tin we i tɛl wi fɔ du na Koloshians 3:13, 14. (Rid.) Notis aw Pɔl bin fɔgiv Mak. Pan ɔl we Mak bin lɛf am di tɛm we i bin de du in fɔs mishɔnari patrol, Pɔl nɔ bin kɔntinyu fɔ vɛks pan am. Leta, we Pɔl bin rayt wan fayn lɛta to di kɔngrigeshɔn na Kolose, i bin prez Mak as in kɔmpin wokman we i valyu ɛn we bin “rili kɔrej” am. (Kol. 4:10, 11) We Pɔl bin de na prizin na Rom, na insɛf sɛf bin sɛn kɔl Mak fɔ mek i go kam ɛp am. (2 Tim. 4:11) Dis sho klia wan se Pɔl bin de fɔgiv in brɔda ɛn sista dɛn ɛn kɔntinyu fɔ gɛt tayt padi biznɛs wit dɛn. Wetin wi go lan frɔm Pɔl?

6-7. Aw wi go kɔntinyu fɔ sho lɔv to wi brɔda ɛn sista dɛn pan ɔl we dɛn kin mek mistek dɛn? (1 Jɔn 4:7)

⁶ Di lɛsin. Jiova want wi fɔ kɔntinyu fɔ sho lɔv to wi brɔda ɛn sista dɛn. (Rid 1 Jɔn 4:7.) We wi brɔda ɛn sista dɛn nɔ trit wi di we aw Kristian fɔ trit in kɔmpin, wi fɔ biliv se dɛn nɔ min fɔ du wi bad ɛn dɛn de tray fɔ du wetin Jiova se rayt.  (Prɔv. 12:18) Gɔd lɛk in fetful savant dɛn pan ɔl we dɛn kin mek mistek dɛn. I de kɔntinyu fɔ bi wi padi ɛn i nɔ de kɔntinyu fɔ vɛks pan wi pan ɔl we wi kin mek mistek dɛn. (Sam 103:9) I rili impɔtant fɔ mek wi falamakata wi Papa we de fɔgiv!​—Ɛfi. 4:32–5:1.

⁷ Mɛmba bak se as di ɛnd de kam nia, wi nid fɔ kɔntinyu fɔ gɛt tayt padi biznɛs wit wi brɔda ɛn sista dɛn. Wi fɔ ɛkspɛkt se pipul dɛn go mek wi sɔfa pas aw dɛn de mek wi sɔfa naw. Sɔntɛm dɛn go put wi na prizin bikɔs ɔf wi fet. If dat apin, wi go nid wi brɔda ɛn sista dɛn pas ɛni ɔda tɛm. (Prɔv. 17:17) Tink bɔt wetin bin apin to Josɛf, a we na wan ɛlda na Spen. Dɛn bin put in ɛn sɔm brɔda dɛn na prizin bikɔs dɛn nyutral. I tɔk se: “Insay prizin, wi ɔl bin de togɛda, so sɔntɛnde wi kin du sɔntin we go mek di ɔda pɔsin fil bad. Wi bin gɛt fɔ bia wisɛf ɛn fɔgiv wisɛf fɔ fri. Dis bin ɛp wi fɔ kɔntinyu fɔ de togɛda ɛn fɔ protɛkt wisɛf. Ɔda prizina dɛn bin de wit wi we nɔ bin de sav Jiova. Wan tɛm, a bin wund na mi an ɛn dɛn bin bandej am, so a nɔ bin ebul fɔ yuz am fɔ du ɛnitin fɔ misɛf. Bɔt wan pan mi brɔda dɛn bin de bruk mi klos dɛn ɛn ɛp mi fɔ du tin dɛn we a nɔ bin ebul fɔ du. I bin sho mi di kayn lɔv we a bin rili nid da tɛm de.” Wi rili gɛt gud rizin dɛn fɔ sɔlv prɔblɛm wit wi kɔmpin dɛn naw!

KƆNTINYU FƆ BIA WE YU MAN Ɔ WƐF DISAPƆYNT YU

8. Us prɔblɛm mared pipul dɛn kin gɛt?

⁸ Di tin we nɔ kin izi. Ɔl mared-os gɛt dɛn prɔblɛm dɛn. Di Baybul tɔk klia wan se pipul dɛn we mared go “gɛt prɔblɛm dɛn.” (1 Kɔr. 7:28) Wetin mek? Na bikɔs di wan dɛn we kin mared nɔ pafɛkt ɛn dɛn gɛt difrɛn abit dɛn, tin dɛn we dɛn lɛk, ɛn tin dɛn we dɛn nɔ lɛk. Sɔntɛm dɛn gɛt difrɛn kɔlchɔ dɛn ɔ dɛn kɔmɔt difrɛn say. Sɔntɛm as tɛm de go, dɛn go bigin sho sɔm abit dɛn we di ɔda pɔsin nɔ bin no bɔt bifo dɛn mared. Ɛniwan pan dɛn tin dɛn de go mek prɔblɛm de na di mared-os. Bifo dɛn gri se dɛn ɔltu dɔn mek mistek ɛn dɛn fɔ wok togɛda fɔ sɔlv di prɔblɛm, sɔntɛm dɛn go de blem dɛnsɛf. Sɔntɛm, dɛn go ivin bigin fɔ tink se dɛn fɔ sɛpret ɔ dayvɔs. Bɔt yu tink se fɔ sɛpret ɔ dayvɔs go sɔlv di prɔblɛm? b Lɛ wi lan frɔm wan uman we bin kɔntinyu fɔ fetful to Jiova pan ɔl we in man bin de mek tin nɔ izi fɔ am na in mared-os.

9. Us prɔblɛm Abigɛl bin gɛt?

⁹ Ɛgzampul na di Baybul. Abigɛl bin mared to Nebal, we di Baybul se bin ash ɛn bin de biev bad. (1 Sam. 25:3) I go mɔs bi se i nɔ bin izi fɔ Abigɛl fɔ de wit da kayn man de. Fɔ se Abigɛl bin gɛt chans fɔ ɛnd in mared? Yɛs, i bin gɛt di chans we Devid we bin fɔ bi kiŋ na Izrɛl bin kam fɔ kil in man bikɔs i kɔs Devid ɛn in man dɛn. (1 Sam. 25:9-13) Abigɛl bin fɔ dɔn rɔnawe ɛn alaw Devid fɔ kil Nebal. Bɔt i nɔ bin du dat, bifo dat, i mek Devid ɔndastand wetin mek i nɔ fɔ kil Nebal. (1 Sam. 25:23-27) Wetin mek i bin du dat?

10. Wetin go dɔn mek Abigɛl kɔntinyu fɔ bia pan ɔl we tin nɔ bin izi fɔ am na in mared-os?

 ¹⁰ Abigɛl bin lɛk Jiova ɛn i rɛspɛkt in lɔ dɛn bɔt mared. Wan dawt nɔ de se Abigɛl bin no wetin Gɔd tɛl Adam ɛn Iv we I bin mek di fɔs mared. (Jɛn. 2:24) Abigɛl bin no se Jiova de si mared as sɔntin we oli. I bin want fɔ mek Gɔd gladi, ɛn na dat go dɔn mek i du wetin i ebul fɔ sev in man ɛn di wan dɛn we de na in os. I nɔ bin westɛm fɔ du sɔntin fɔ stɔp Devid fɔ mek i nɔ kil Nebal. I bin rɛdi bak fɔ se sɔri fɔ di bad tin we Nebal bin du. Wan dawt nɔ de se Jiova bin lɛk dis uman we bin gɛt maynd, ɛn we nɔ bin jɔs de tink bɔt insɛf. Wetin maredman ɛn mareduman dɛn go lan frɔm Abigɛl in ɛgzampul?

11. (a) Wetin Jiova de ɛkspɛkt mared pipul dɛn fɔ du? (Ɛfishians 5:33) (b) Wetin yu lan frɔm di we aw Kamɛl bin wok tranga wan fɔ mek in mared nɔ pwɛl? (Luk bak di pikchɔ.)

¹¹ Di lɛsin. Jiova want maredman ɛn in wɛf fɔ kɔntinyu fɔ de togɛda ivin we wan pan dɛn at fɔ de wit. Jiova de rili gladi we i de si mared pipul dɛn de wok tranga wan fɔ sɔlv dɛn prɔblɛm dɛn ɛn fɔ sho se dɛn lɛk ɛn rɛspɛkt dɛnsɛf. (Rid Ɛfishians 5:33.) Tink bɔt Kamɛl in ɛgzampul. Afta dɛn dɔn mared fɔ siks ia, Kamɛl bigin fɔ stɔdi wit Jiova Witnɛs dɛn ɛn leta i baptayz. I tɔk se: “Mi man nɔ bin lɛk wetin a disayd fɔ du. I bin de vɛks we a bin de atɛnd di mitin dɛn ɛn we a mekɔp mi maynd fɔ sav Jiova. I bin de kɔs mi ɛn trɛtin fɔ lɛf mi.” Bɔt pan ɔl dat, Kamɛl bin kɔntinyu fɔ bia na in mared-os. Fɔ 50 ia, i bin de wok tranga wan fɔ lɛk ɛn rɛspɛkt in man. I kɔntinyu fɔ tɔk se: “As tɛm de go, a bin tray fɔ ɔndastand gud gud wan aw mi man bin de fil ɛn tek tɛm tɔk to am fayn. Bikɔs a no se mared na sɔntin we oli na Jiova in yay, a bin de du ɔl wetin a ebul fɔ protɛkt mi mared. A nɔ bin ɛva tray fɔ lɛf mi man bikɔs a bin lɛk Jiova.” c If yu gɛt prɔblɛm na yu mared-os, na fɔ biliv se Jiova go sɔpɔt yu ɛn ɛp yu fɔ bia.

KƆNTINYU FƆ SAV JIOVA WE YU AT PWƐL BIKƆS YU KƆMIT SIRIƆS SIN

12. Wetin sɔntɛm nɔ go izi if wi kɔmit siriɔs sin?

¹² Di tin we nɔ kin izi. Sɔntɛm wi at go rili pwɛl if wi kɔmit siriɔs sin. Di Baybul tɔk se wi sin kin mek wi “at rili pwɛl” ɛn mek wi “fil bad.” (Sam 51:17) Wan brɔda we nem Rɔbɔt bin wok tranga wan  fɔ lɔng tɛm fɔ mek i go kwalifay fɔ bi ministerial savant. Bɔt i kɔmit siriɔs sin ɛn i bin kam fɔ si se i dɔn kɔmɔt biɛn Jiova. I tɔk se: “Mi kɔnshɛns bin de rili mɔna mi we a bin kam fɔ no wetin a dɔn du. A bin rili fil bad. A bin kray, ɛn pre to Jiova. A mɛmba we a bin tink se Jiova nɔ go ɛva lisin to mi prea igen bikɔs a dɔn disapyɔnt am.” If wi kɔmit siriɔs sin, sɔntɛm wi at go so pwɛl dat wi go bigin tink se Jiova dɔn lɛf wi ɛn wi nɔ gɛt ɛni rizin fɔ sav am igen. (Sam 38:4) If yu dɔn fil dis we, tink bɔt pɔsin we di Baybul tɔk bɔt we bin kɔntinyu fɔ sav Jiova pan ɔl we i kɔmit siriɔs sin.

13. Us siriɔs sin apɔsul Pita bin kɔmit? Us ɔda mistek dɛn i bin mek bifo dat?

¹³ Ɛgzampul na di Baybul. Di nɛt bifo dɛn kil Jizɔs, apɔsul Pita bin mek bɔku mistek dɛn, ɛn bikɔs ɔf dat i bin kɔmit siriɔs sin. Fɔs, Pita bin gɛt kɔnfidɛns pasmak, i bin de bost se i go pruv se i fetful ivin if di ɔda apɔsul dɛn lɛf Jizɔs. (Mak 14:27-29) Leta, we dɛn bin de na di gadin na Gɛtsimani, Pita nɔ bin kɔntinyu fɔ de wach. (Mak 14:32, 37-41) Dɔn, Pita bin lɛf Jizɔs we pipul dɛn kam fɔ arɛst am. (Mak 14:50) Faynali, Pita bin dinay tri tɛm se i nɔ sabi Jizɔs, ɛn i bin ivin swɛ fɔ sho se i nɔ sabi am. (Mak 14:​66-71) Wetin Pita bin du we i kam fɔ no se i dɔn kɔmit siriɔs sin? I kray bita bita wan ɛn sɔntɛm in at bin rili pwɛl bikɔs i bin de fil gilti. (Mak 14:72) Jɔs imajin aw Pita in at bin rili pwɛl we leta dɛn bin kil in padi Jizɔs. I go mɔs bi se Pita bin fil se i nɔ gɛt wan yus!

14. Wetin bin ɛp Pita fɔ kɔntinyu fɔ sav Jiova? (Luk di pikchɔ na di frɔnt pej.)

¹⁴ Bɔku rizin dɛn de we mek Pita kɔntinyu fɔ sav Jiova. I nɔ bin tray fɔ de in wangren; i go to in spirichwal brɔda dɛn ɛn wan dawt nɔ de se dɛn bin kɔrej am. (Lyuk 24:33) Dɔn bak, we Jizɔs bin gɛt layf bak i bin apia to Pita, i go mɔs bi se i bin du dat fɔ ɛnkɔrej am. (Lyuk 24:34; 1 Kɔr. 15:5) Leta, bifo Jizɔs tɔk pan Pita fɔ di mistek dɛn we i bin dɔn mek, i bin tɛl in padi se i go gi am mɔ wok. (Jɔn 21:15-17) Pita bin no se i dɔn sin siriɔs wan, bɔt i bin kɔntinyu fɔ tray fɔ du wetin rayt. Wetin mek? Na bikɔs i bin biliv tranga wan se in Masta we na Jizɔs, bin stil lɛk am. Ɛn Pita in spirichwal brɔda dɛn bin kɔntinyu fɔ sɔpɔt am. Wetin wi kin lan frɔm Pita in ɛgzampul?

15. Wetin Jiova want wi fɔ biliv tranga wan? (Sam 86:5; Romans 8:​38, 39) (Luk bak di pikchɔ.)

 ¹⁵ Di lɛsin. Jiova want wi fɔ biliv tranga wan se i lɛk wi ɛn i rɛdi fɔ fɔgiv wi. (Rid Sam 86:5; Romans 8:38, 39.) We wi sin, wi kin fil gilti. Dat na nɔmal tin ɛn i fayn fɔ fil da we de. Bɔt wi nɔ fɔ fil se Jiova nɔ lɛk wi igen ɔ i nɔ go fɔgiv wi. Bifo dat, wi fɔ go to di ɛlda dɛn fɔ ɛp wi ɛn wi nɔ fɔ westɛm fɔ du dat. Rɔbɔt, we wi bin dɔn tɔk bɔt, tɔk se: “A sin bikɔs a bin abop pan mi yon trɛnk fɔ avɔyd fɔ du bad we sɔntin tɛmt mi.” I bin kam fɔ no se i nid fɔ tɔk to di ɛlda dɛn. I se: “We a tɔk to di ɛlda dɛn, dɛn bin ɛp mi fɔ si se Jiova lɛk mi, ɛn a bin si se di ɛlda dɛn bak lɛk mi. Di ɛlda dɛn nɔ bin giv-ɔp pan mi. Dɛn bin ɛp mi fɔ biliv se Jiova nɔ lɛf mi.” Wisɛf go ebul biliv tranga wan se Jiova lɛk wi ɛn i rɛdi fɔ fɔgiv wi if wi ripɛnt we wi kɔmit sin, go to di ɛlda dɛn fɔ ɛp wi, ɛn du wi bɛst nɔ fɔ ripit wi mistek dɛn igen. (1 Jɔn 1:8, 9) If wi biliv tranga wan se Jiova lɛk wi ɛn want fɔ fɔgiv wi, wi nɔ go stɔp fɔ sav am ivin afta wi mek mistek.

16. Wetin mek yu dɔn mekɔp yu maynd fɔ kɔntinyu fɔ sav Jiova?

¹⁶ Jiova rili valyu di tray we wi de tray tranga wan fɔ sav am insay dis las dez we tin rili tranga. Wit Jiova in ɛp, wi go ebul fɔ kɔntinyu fɔ sav am fetful wan pan ɔl we wi at go pwɛl bikɔs ɔf wi mistek dɛn, ɛn ɔda pipul dɛn mistek dɛn. Wi go ebul sho se wi lɛk wi brɔda ɛn sista dɛn ɛn fɔgiv dɛn ivin if dɛn ɔfɛnd wi. Wi go ebul sho aw wi rili lɛk wi Gɔd ɛn di rɛspɛkt we wi gɛt fɔ mared bay we wi du ɔl wetin wi ebul fɔ sɔlv prɔblɛm dɛn we wi go gɛt na wi mared-os. Ɛn if wi kɔmit siriɔs sin, wi go tɔn to Jiova fɔ ɛp wi, gri se i lɛk wi, ɛn i rɛdi fɔ fɔgiv wi, ɛn wi go ebul kɔntinyu fɔ sav am. Wi nɔ gɛt wan dawt se Jiova go rili blɛs wi if “wi nɔ giv-ɔp fɔ du wetin fayn.”​—Gal. 6:9.