1-2. (a) Us ɛgzampul sho se mɔtalman dɛn rili want pɔsin fɔ ɛnkɔrej dɛn ɛn dɛnsɛf ebul fɔ ɛnkɔrej ɔda pipul dɛn? (b) Us bad tin dɛn dɔn du to sɔm pikin dɛn?

MƆTALMAN dɛn rili want pɔsin we de ɛnkɔrej dɛn ɛn dɛn ebul fɔ ɛnkɔrej ɔda pipul dɛn. Fɔ ɛgzampul, we smɔl pikin fɔdɔm ɛn wund na in ni we i de ple, i go rɔn go to Mama ɔ Papa de kray. Di mama ɔ papa nɔ go ebul mɛn di wund, bɔt i go ebul ɛnkɔrej di pikin. I go aks di pikin wetin apin, wep di kray wata na in yay, bɛl-bɛl am, ɛn sɔntɛm put mɛrɛsin ɔ plasta pan di wund. I nɔ go te, di pikin go stɔp fɔ kray ɛn i go ivin kɔntinyu fɔ ple. As tɛm de go, di wund kin wɛl.

² Bɔt sɔntɛnde, sɔntin kin wund pikin dɛn siriɔs wan. Dɛn kin du mami ɛn dadi biznɛs wit sɔm pan dɛn. Sɔntɛm na wangren tɛm dɛn du am, ɔ sɔntɛm dɛn du am bɔku tɛm. Ɛni aw i bi, di pwɛl at we dɛn kin gɛt kin ambɔg dɛn fɔ lɔng tɛm. Sɔntɛnde, dɛn kin kech ɛn pɔnish di pɔsin we du mami ɛn dadi biznɛs wit dɛn. Bɔt ɔda tɛm dɛn, i kin tan lɛk se di pɔsin we du mami ɛn dadi biznɛs wit pikin kin go fri. Bɔt ilɛksɛf dɛn pɔnish di pɔsin we du mami ɛn dadi biznɛs wit pikin wantɛm wantɛm, di pikin kin stil sɔfa te i tɔn big pɔsin.

3. Frɔm wetin de na Sɛkɛn Lɛta Fɔ Kɔrint 1:​3, 4, wetin Jiova want? Us kwɛstyɔn dɛn wi go tɔk bɔt?

³ Wetin go ɛp wi Kristian brɔda ɔ sista we dɛn bin dɔn du mami ɛn dadi biznɛs wit we i smɔl ɛn we stil gɛt pwɛl at?  (Rid Sɛkɛn Lɛta Fɔ Kɔrint 1:​3, 4.) Wi dɔn si klia wan se Jiova want in savant dɛn we i valyu fɔ gɛt di lɔv ɛn ɛnkɔrejmɛnt we dɛn nid. So lɛ wi tɔk bɔt tri kwɛstyɔn dɛn: (1) Wetin mek di wan dɛn we dɛn bin dɔn du mami ɛn dadi biznɛs wit frɔm we dɛn smɔl nid ɛnkɔrejmɛnt? (2) Udat go ɛnkɔrej dɛn? (3) Aw wi go ɛnkɔrej dɛn fayn fayn wan?

4-5. (a) Wetin mek i impɔtant fɔ no se pikin dɛn difrɛn frɔm big pɔsin? (b) We dɛn du mami ɛn dadi biznɛs wit pikin, aw dat go afɛkt di we aw i trɔst ɔda pipul dɛn?

⁴ Sɔm big pipul dɛn we dɛn bin dɔn du mami ɛn dadi biznɛs wit we dɛn smɔl go stil nid ɛnkɔrejmɛnt, pan ɔl we i dɔn tek lɔng tɛm. Wetin mek? Fɔ lɛ wi ebul ɔndastand, fɔs wi fɔ no se pikin dɛn difrɛn frɔm big pɔsin. Bad tin kin afɛkt pikin dɛn difrɛn we frɔm aw i de afɛkt big pipul dɛn. Lɛ wi tɔk bɔt sɔm ɛgzampul dɛn.

⁵ Pikin dɛn nid fɔ trɔst ɛn gɛt tayt padi biznɛs wit di wan dɛn we de mɛn dɛn ɛn di wan dɛn we de kia fɔ dɛn. Dɛn kayn padi biznɛs dɛn de kin mek di pikin fil sef ɛn kin lan dɛn fɔ trɔst ɔda pipul dɛn we lɛk dɛn. (Sam 22:​9) I sɔri fɔ no se bɔku tɛm, na insay di os we di pikin de dɛn kin du mami ɛn dadi biznɛs wit am, ɛn na fambul dɛn ɔ padi dɛn kin du dat to am. If pɔsin we di pikin trɔst du dis kayn tin to am, i nɔ kin izi fɔ lɛ di pikin trɔst ɔda pipul dɛn ilɛk na afta lɔng tɛm.

6. Wetin mek fɔ du mami ɛn dadi biznɛs wit pikin na wikɛd tin ɛn na tin we de ambɔg di pikin?

⁶ Pikin dɛn nɔ ebul protɛkt dɛnsɛf, ɛn fɔ du mami ɛn dadi biznɛs wit pikin na wikɛd tin ɛn i de ambɔg di pikin. Fɔ fos pikin dɛn fɔ du ɛnitin we gɛt fɔ du wit mami ɛn dadi biznɛs bifo dɛn machɔ kin rili ambɔg am. We sɔmbɔdi du mami ɛn dadi biznɛs wit pikin, dat kin mek di pikin nɔ tink di rayt we bɔt mami ɛn dadi biznɛs. Dis kin mek di pikin fil lɛk i nɔ impɔtant ɛn i nɔ de trɔst ɔda pipul dɛn.

7. (a) Wetin mek i izi fɔ mek sɔmbɔdi ful pikin? Aw di wan dɛn we kin du mami ɛn dadi biznɛs wit pikin kin du dat? (b) Wetin kin apin we dɛn tɛl pikin lay lay tɔk dɛn?

⁷ Pikin dɛn nɔ sabi aw fɔ tink bɔt sɔntin, fɔ disayd fɔ du sɔntin, ɔ fɔ sabi ɛn avɔyd denja. (1 Kɔr. 13:​11) So i izi fɔ mek sɔmbɔdi ful dɛn ɛn du mami ɛn dadi biznɛs wit dɛn. Di wan dɛn we kin du mami ɛn dadi biznɛs wit pikin dɛn kin tɛl dɛn lay lay tin dɛn. Dɛn kin tɛl dɛn se na di pikin dɛn fɔlt, dɛn nɔ fɔ tɛl ɛnibɔdi bɔt wetin apin, ilɛksɛf dɛn go tɔk nɔbɔdi nɔ go biliv dɛn ɔ ɛp dɛn, ɔ we big pɔsin ɛn pikin du mami ɛn dadi biznɛs na we dat fɔ sho se dɛn rili lɛk dɛnsɛf. I kin tek lɔng tɛm fɔ mek di pikin ɔndastand se dɛn kayn tɔk dɛn de na lay lay. Dɛn kayn pikin dɛn de kin gro ɔp fɔ tink se dɛn dɔti, dɛn nɔ impɔtant, ɛn dɛn nɔ fit fɔ lɛ ɛnibɔdi lɛk dɛn ɔ ɛnkɔrej dɛn.

8. Wetin mek wi shɔ se Jiova go ɛnkɔrej di wan dɛn we dɛn bin dɔn du bad tin to?

⁸ Wi nɔ sɔprayz fɔ no se di wan dɛn we dɛn kin du mami ɛn dadi biznɛs wit we dɛn smɔl kin sɔfa fɔ lɔng tɛm. Dis na kraym we rili wikɛd! Dɛn kayn tin dɛn ya we de apin ɔlsay na di wɔl de sho klia wan se wi de na di las dez. Dis na tɛm we bɔku pipul dɛn “nɔ go gɛt sɔri at” ɛn “wikɛd pipul ɛn dɛn wan we de mek pipul ful go de wɔs mɔ ɛn mɔ.” (2 Tim. 3:​1-5, 13) Setan in trik dɛn rili bad, ɛn i sɔri we mɔtalman dɛn de du wetin Setan want. Bɔt Jiova gɛt pawa fa fawe pas Setan ɔ di wan dɛn we de du wetin i want. Jiova sabi  wetin Setan de du ɔltɛm. Wi shɔ se Jiova no di pen we wi kin de fil, ɛn i go ɛnkɔrej wi. Na big blɛsin fɔ sav di Gɔd we “de kɔrej wi ɔltɛm. I de kɔrej wi ɔltɛm we wi de pan trɔbul, so dat di kɔrej we i de kɔrej wi kin mek wisɛf ebul fɔ kɔrej ɔda pipul ɛnitɛm we dɛn de pan trɔbul.” (2 Kɔr. 1:​3, 4) Bɔt na udat dɛn Jiova de yuz fɔ ɛnkɔrej ɔda pipul dɛn?

9. Frɔm wetin Kiŋ Devid tɔk na Sam 27:​10, wetin Jiova go du fɔ di wan dɛn we dɛn mama ɛn papa nɔ bin protɛkt?

⁹ Na di wan dɛn mɔ we dɛn mama ɛn papa nɔ bin protɛkt ɔ di wan dɛn we pɔsin we dɛn yus to du mami ɛn dadi biznɛs wit dɛn nid ɛnkɔrejmɛnt. Kiŋ Devid bin no se wi kin abop pan Jiova ɔltɛm fɔ ɛnkɔrej wi. (Rid Sam 27:​10.) Devid bin biliv tranga wan se Jiova de bi Papa to di wan dɛn we dɛn fambul dɛn bin dɔn trit bad. Aw Jiova kin du dat? I kin yuz di wan dɛn we de sav am fetful wan fɔ du dat. Wi brɔda ɛn sista dɛn na di kɔngrigeshɔn tan lɛk famili to wi. Fɔ ɛgzampul, Jizɔs bin tɔk se na di wan dɛn we in ɛn dɛn de wɔship Jiova, na dɛn na in brɔda dɛn, sista dɛn, ɛn mama.—Mat. 12:​48-50.

10. Wetin di apɔsul Pɔl bin tɔk bɔt di wok we i bin de du as ɛlda?

¹⁰ Lɛ wi si aw di kɔngrigeshɔn tan lɛk famili. Di apɔsul Pɔl na bin pɔsin we ebul wok, ɛn na bin ɛlda we fetful. I bin sɛt fayn ɛgzampul, ɛn Gɔd bin ivin mek i tɛl ɔda pipul dɛn fɔ falamakata am jɔs lɛk aw i falamakata Krays. (1 Kɔr. 11:​1) Notis wetin Pɔl bin tɔk bɔt di wok we i bin de du as ɛlda: “Wi go kɛlɛkɛlɛ wit una lɛkɛ aw kɔmbra kin bayo bayo in pikin dɛn.” (1 Tɛs. 2:​7) Semweso, ɛlda dɛn we fetful tide kin tek tɛm we dɛn de yuz di Baybul fɔ ɛnkɔrej pɔsin we nid ɛp.

11. Wetin sho se nɔto di ɛlda dɛn nɔmɔ go ebul fɔ ɛnkɔrej ɔda pipul dɛn?

¹¹ Fɔ se na ɛlda dɛn nɔmɔ fɔ ɛnkɔrej di wan dɛn we dɛn bin dɔn du mami ɛn  dadi biznɛs wit we dɛn smɔl? Nɔ, nɔto so i bi. Wi ɔl gɛt di wok ‘fɔ kɔrej wi kɔmpin Kristian dɛn.’ (1 Tɛs. 4:​18) Machɔ Kristian sista dɛn kin ebul fɔ ɛnkɔrej ɔda sista dɛn we nid ɛp. I rili fayn we Jiova kɔmpia insɛf to mama we de ɛnkɔrej in pikin. (Ayz. 66:​13) Di Baybul tɔk bɔt uman dɛn we bin ɛnkɔrej ɔda pipul dɛn we dɛn at pwɛl. (Job 42:​11) Jiova go mɔs gladi we i de si Kristian uman dɛn tide de ɛnkɔrej dɛn kɔmpin sista dɛn we gɛt pwɛl at! Sɔntɛnde, di ɛlda dɛn kin kɔl wan machɔ sista na kɔna fɔ tɛl am fɔ ɛp ɔda sista we gɛt dis kayn prɔblɛm. *

12. Wetin wi fɔ avɔyd fɔ du we wi de tray fɔ ɛp wi brɔda ɔ sista?

¹² We wi de tray fɔ ɛp wi brɔda ɔ sista, wi fɔ tek tɛm lɛ wi nɔ aks am bɔt tin dɛn we i nɔ rɛdi fɔ tɔk bɔt. (1 Tɛs. 4:​11) Bɔt wetin wi go du fɔ ɛp ɛn ɛnkɔrej di wan dɛn we nid ɛp? Lɛ wi tɔk bɔt fayv tin dɛn we di Baybul tɔk bɔt we wi kin yuz fɔ ɛp ɔda pipul dɛn.

13. Frɔm wetin de na 1 Kiŋ 19:​5-8, wetin Jiova in enjɛl du fɔ Ilayja? Aw wi go falamakata di enjɛl?

¹³ Du sɔntin fɔ ɛp di pɔsin we de sɔfa. We di prɔfɛt Ilayja bin de rɔnawe bikɔs dɛn want fɔ kil am, in at bin rili pwɛl ɛn i bin want fɔ day. Jiova bin sɛn wan mayti enjɛl fɔ go visit Ilayja. Di enjɛl bin gi Ilayja wetin i nid. I gi Ilayja wam wam it ɛn i ɛnkɔrej am fɔ it. (Rid 1 Kiŋ 19:​5-8.) Da stori de ɛp wi fɔ ɔndastand wan tru tin: Sɔntɛnde, di simpul tin dɛn we wi kin du fɔ sɔmbɔdi na in kin ɛp di pɔsin. Sɔntɛm, i go bi it, fayn gift, ɔ rayt fayn fayn wɔd dɛn na kad fɔ mek di brɔda ɔ sista we in at pwɛl no se wi lɛk am ɛn wi bisin bɔt am. If i nɔ izi fɔ wi fɔ tɔk wit sɔmbɔdi bɔt di we aw i de fil, wi kin sho se wi bisin bɔt am bay we wi de du dɛn tin ya fɔ ɛp am.

14. Us lɛsin wi lan frɔm Ilayja in stori?

¹⁴ Mek lɛ di pɔsin we in at pwɛl fil sef ɛn nɔ fred. Wi kin lan ɔda tin bak frɔm Ilayja in stori. Jiova bin yuz in pawa fɔ gi di prɔfɛt wetin i nid fɔ waka fɔ lɔng tɛm go na Mawnt Orɛb. Sɔntɛm, Ilayja bin fil sef fɔ de na da fa fa ples de usay Jiova bin dɔn mek agrimɛnt wit in pipul dɛn. I go mɔs bi se Ilayja bin de fil naw se i nɔ de nia di wan dɛn we bin want fɔ kil am. Wetin wi lan frɔm dis ɛgzampul? If wi want fɔ ɛnkɔrej di wan dɛn we dɛn bin dɔn du mami ɛn dadi wit we dɛn bin smɔl, fɔs wi nid fɔ ɛp dɛn fɔ fil sef. Fɔ ɛgzampul, ɛlda dɛn fɔ de mɛmba se sista we in at pwɛl go fil fri ɔ sef if i ɛn dɛn sidɔm na os de drink kol sɔv-drink ɛn tɔk pas if dɛn sidɔm na di sɛkɔn ɔl na Kiŋdɔm Ɔl de tɔk. Bɔt ɔda pɔsin go want fɔ tɔk bɔt wetin apin to am na Kiŋdɔm Ɔl.

15-16. Wetin-ɛn-wetin fɔ du fɔ bi pɔsin we de tek tɛm lisin?

¹⁵ Tek tɛm lisin. Di Baybul gi wi dis klia advays: “Una fɔ shap una yes fɔ yɛri wetin pipul de tɔk, bɔt una fɔ tek tɛm tɔk.” (Jems 1:​19) Wi na pipul dɛn we de tek tɛm lisin? Sɔntɛm, wi go de tink se fɔ tek tɛm lisin min se wi fɔ jɔs de luk di pɔsin ɛn nɔ tɔk natin. Bɔt ɔda tin dɛn de we wi fɔ du. Fɔ ɛgzampul, Ilayja bin ɛnd-ɔp fɔ tɛl Jiova se i rili de fil bad, ɛn Jiova bin tek tɛm lisin to am. Jiova ɔndastand se Ilayja bin de fred, i bin de fil se na in wangren de, ɛn i bin de tink se ɔl di wok we i bin dɔn du na fɔ natin. Jiova bin tek tɛm ɛp Ilayja fɔ stɔp fɔ de fil dɛn  we dɛn de. I sho se i tek tɛm lisin to Ilayja.—1 Kiŋ 19:​9-11, 15-18.

¹⁶ Aw wi go sho se wi gɛt sɔri-at we wi de tek tɛm lisin to wi brɔda ɔ sista? Sɔntɛnde, wi kin tek tɛm tɔk fayn fayn wɔd dɛn we de sho aw wi fil. Yu kin se: “A rili fil bad we tin lɛk dis apin to yu! Dɛn nɔ fɔ trit no pikin da we de!” Sɔntɛm, yu kin aks am wan ɔ tu kwɛstyɔn dɛn fɔ mek shɔ se yu ɔndastand wetin yu padi we gɛt pwɛl at de tɔk. Yu kin aks am se: “Duya, yu go ɛp mi fɔ ɔndastand wetin yu min?” ɔ “We yu tɔk dat, a bin ɔndastand am se . . . Na dat yu bin min?” Dɛn fayn wɔd dɛn de we yu de tɛl di pɔsin go mek i no gud gud wan se yu rili de lisin to am, ɛn yu de tray fɔ mek shɔ se yu ɔndastand am.—1 Kɔr. 13:​4, 7.

17. Wetin mek wi fɔ peshɛnt ɛn “tek tɛm tɔk”?

¹⁷ Bɔt na fɔ tray tranga wan so dat yu go “tek tɛm tɔk.” Nɔ kɔt wɔd na in mɔt fɔ gi am advays ɔ fɔ kɔrɛkt di we aw di pɔsin de tink. Na fɔ peshɛnt! We Ilayja bin de tɛl Jiova aw i bin de fil, i bin yuz wɔd dɛn we de sho se in at rili pwɛl. Leta, afta we Jiova dɔn ɛnkɔrej Ilayja, i bin tɛl Jiova aw i de fil bak ɛn i bin yuz di sem wɔd dɛn. (1 Kiŋ 19:​9, 10, 13, 14) Wetin dis de tich wi? Sɔntɛnde, nɔto wan tɛm nɔmɔ di wan dɛn we gɛt pwɛl at go nid fɔ tɔk bɔt aw dɛn de fil. Jɔs lɛk Jiova, wi want fɔ peshɛnt lisin we di pɔsin de tɔk. Bifo wi tray fɔ tɛl dɛn aw fɔ sɔlv dɛn prɔblɛm, wi fɔ sho sɔri-at ɛn sho se wi lɛk di pɔsin.—1 Pit. 3:​8.

18. Wetin mek i fayn fɔ pre wit di pɔsin we in at pwɛl?

¹⁸ Pre wit ɔl yu at wit di pɔsin we in at pwɛl. Di wan dɛn we dɛn at rili pwɛl nɔ kin ebul fɔ pre. Di pɔsin go de fil se i nɔ fit fɔ tɔk to Jiova. If wi want fɔ ɛnkɔrej da kayn pɔsin de, wi fɔ kɔl in nem we wi de pre wit am. Insay di prea, wi kin tɛl Jiova aw wi ɛn di brɔda ɛn sista dɛn na di  kɔngrigeshɔn lɛk di pɔsin we in at rili pwɛl. Wi kin beg Jiova fɔ ɛp in savant fɔ fil sef ɛn nɔ fred. Dɛn kayn prea dɛn de kin rili ɛnkɔrej di pɔsin.—Jems 5:​16.

19. Wetin wi fɔ tink bɔt we wi de ɛnkɔrej sɔmbɔdi?

¹⁹ Yuz wɔd dɛn we go ɛp ɛn ɛnkɔrej di pɔsin. Tink bifo yu tɔk. Wɔd we yu nɔ tink bɔt bifo yu tɔk kin mek di pɔsin fil bad. Gud wɔd kin ɛp di pɔsin. (Prɔv. 12:​18) So pre to Jiova fɔ ɛp yu fɔ yuz gud wɔd dɛn, ɔ wɔd dɛn we go ɛnkɔrej di pɔsin ɛn mek i fil fayn. Mɛmba se di bɛst say fɔ gɛt wɔd dɛn we go ɛnkɔrej pɔsin na insay di Baybul.—Ibru 4:​12.

20. Wetin sɔm brɔda ɔ sista dɛn de tink bɔt dɛnsɛf bikɔs dɛn bin dɔn du mami ɛn dadi biznɛs wit dɛn we dɛn smɔl? Wetin wi want mek dɛn no?

²⁰ We dɛn du mami ɛn dadi biznɛs wit pikin, dat kin mek i biliv se i dɔti, i nɔ impɔtant, ɛn i nɔ fit fɔ mek ɛnibɔdi lɛk am. Dat na big big lay! So yuz di Baybul fɔ mɛmba dɛn se Jiova rili lɛk dɛn. (Luk di bɔks we gɛt di taytul “ Ɛnkɔrejmɛnt Frɔm di Baybul.”) Mɛmba aw wan enjɛl bin tek tɛm ɛnkɔrej di prɔfɛt Daniɛl we i bin de fil wik ɛn in at bin pwɛl. Jiova bin want di prɔfɛt fɔ no se i rili valyu am ɛn i impɔtant. (Dan. 10:​2, 11, 19) Semweso, wi brɔda ɛn sista dɛn we dɛn at rili pwɛl valyu to Jiova!

21. Wetin go apin to ɔl dɛn wan dɛn we dɔn du bad tin ɛn nɔ gri fɔ ripɛnt? Wetin wi ɔl fɔ mekɔp wi maynd fɔ du fɔ dɛn wan dɛn we dɛn nɔ trit fia wan?

²¹ We wi de ɛnkɔrej ɔda pipul dɛn, wi de ɛp dɛn fɔ no se Jiova lɛk dɛn. Ɛn wi nɔ fɔ ɛva fɔgɛt bak se Jiova na Gɔd we de du tin tret. Jiova no bɔt ɔl dɛn wan dɛn we dɛn dɔn du mami ɛn dadi biznɛs wit we dɛn smɔl, ivin if nɔbɔdi nɔ no bɔt dat. Jiova de si ɔltin, ɛn i nɔ go mek di pɔsin we du mami ɛn dadi biznɛs wit pikin we nɔ ripɛnt go fri. I go mɔs pɔnish am. (Nɔm. 14:​18) So lɛ wi du ɔl wetin wi ebul fɔ sho se wi lɛk di wan dɛn we dɛn bin dɔn du mami ɛn dadi biznɛs wit we dɛn smɔl. Bɔt wi rili gladi fɔ no se Jiova gɛt fɔ gi gladi-at to ɔl di wan dɛn we Setan ɛn in wɔl dɔn du wikɛd tin to! I nɔ go te igen, wi nɔ go ɛva mɛmba dɛn bad bad tin dɛn ya.—Ayz. 65:​17.