Sera bin ɛksplen se, * “Mi na pɔsin we de shem, ɛn a nɔ gɛt bɛtɛ kɔnfidɛns pan misɛf. So a nɔ kin fil fayn we a de wit pipul dɛn we gɛt kɔnfidɛns pan dɛnsɛf, ɛn we lɛk fɛt-fɛt. Bɔt a kin fil fayn we a de wit sɔmbɔdi we nɔ de vɛks kwik ɛn we ɔmbul. A kin fil fri fɔ tɔk to da kayn pɔsin de, tɛl am aw a de fil, ɛn tɛl am mi prɔblɛm dɛn. Na so mi bɛst padi dɛn de.”

Di tin we Sera tɔk mek wi no se if wi nɔ de vɛks kwik, ɔda pipul dɛn go want fɔ bi wi padi. We wi nɔ de vɛks kwik, dat de mek Jiova gladi bak. Jiova in Wɔd ɛnkɔrej wi se: “Una nɔ fɔ dil wit ɔda pipul traŋa wan.” (Kɔl. 3:​12) Wetin i min nɔ fɔ vɛks kwik? Aw Jizɔs bin sho se i nɔ de vɛks kwik? Ɛn aw dis kwaliti go mek wi gɛt gladi-at?

Pɔsin we nɔ de vɛks kwik gɛt kol-at. Pɔsin we nɔ de vɛks kwik nɔ de dil wit ɔda pipul dɛn traŋa wan, i gud to ɔda pipul dɛn, ɛn i de bia ɛn kɔntrol insɛf we dɛn du am sɔntin.

We pɔsin nɔ de vɛks kwik nɔ min se i wik. Di Grik wɔd we dɛn yuz fɔ pɔsin we nɔ de vɛks kwik de tɔk bɔt wayl ɔs we dɛn dɔn tren. Di ɔs kin stil gɛt in trɛnk, bɔt dɛn dɔn tren am fɔ kɔntrol in pawa. Semweso, we wi sho se wi nɔ de vɛks kwik, wi de tren udat wi bi ɛn tray fɔ gɛt pis wit ɔda pipul dɛn.

Sɔntɛm, yu go de tink se ‘mi na pɔsin we nɔ gɛt di kwaliti fɔ mek a nɔ de vɛks kwik.’ Wi de na wɔl we pipul dɛn lɛk fɛt-fɛt ɛn nɔ gɛt wan peshɛnt, so i go bi se i nɔ rili izi fɔ wi fɔ mek wi nɔ vɛks kwik. (Rom 7:​19) So dat min se wi fɔ tray tranga wan nɔ fɔ de vɛks kwik, bɔt na Jiova in oli spirit go ɛp wi fɔ kɔntinyu fɔ bi pɔsin we nɔ de vɛks kwik. (Gal. 5:​22, 23, NWT) Wetin mek wi fɔ tray tranga wan fɔ bi pɔsin we nɔ de vɛks kwik?

Fɔ bi pɔsin we nɔ de vɛks kwik na kwaliti we de mek pipul dɛn kam nia yu. Jɔs lɛk Sera we wi bin dɔn tɔk bɔt, wi kin lɛk fɔ de wit pipul dɛn we nɔ de vɛks kwik. Jizɔs na wan fayn ɛgzampul bɔt pɔsin we gud ɛn we nɔ de vɛks kwik. (2 Kɔr. 10:​1) Ivin pikin dɛn we nɔ wande sabi Jizɔs want fɔ kam nia am.—Mak 10:​13-16.

We wi nɔ de vɛks kwik, dat de protɛkt wi ɛn di wan dɛn we de arawnd wi. If wi nɔ de  vɛks kwik, wi nɔ go kwik fɔ giv-ɔp ɔ vɛks we wi de du sɔntin. (Prɔv. 16:​32) So wi go avɔyd fɔ de fil bad afta we wi dɔn du bad to sɔmbɔdi, mɔ di pɔsin we wi lɛk. Ɔda pipul dɛn go bɛnifit bikɔs wi de kɔntrol di we aw wi de fil ɛn di we aw wi de biev, ɛn nɔ mek ɔda pipul dɛn fil bad.

Pan ɔl we Jizɔs bin gɛt big wok ɛn i bin rili bizi, i nɔ bin de vɛks kwik pan pipul dɛn. Bɔku pipul dɛn bin de sɔfa ɛn gɛt ebi lod ɛn dɛn nid fɔ fil fayn. I go bi se dɛn bin rili fil fayn we Jizɔs bin tɛl dɛn se: “Una kam to mi, . . . bikɔs a de tek tɛm du tin ɛn a ɔmbul”!—Mat. 11:​28, 29, NWT.

Wetin wi kin lan bɔt Jizɔs we nɔ bin de vɛks kwik? We wi stɔdi Gɔd in Wɔd, wi go lan aw Jizɔs bin trit pipul dɛn ɛn wetin i bin du we tin nɔ bin izi. Dɔn, we wi gɛt prɔblɛm we tɛst wi if wi nɔ de vɛks kwik, wi fɔ tray fɔ bi lɛk Jizɔs. (1 Pit. 2:​21, NWT) Lɛ wi tɔk bɔt tri tin dɛn we bin ɛp Jizɔs nɔ fɔ de vɛks kwik.

Jizɔs na bin ɔmbul pɔsin. Jizɔs bin se i “de tek tɛm du tin ɛn [i] ɔmbul.” (Mat. 11:​29, NWT) Di Baybul tɔk bɔt dɛn tu kwaliti dɛn ya togɛda bikɔs di kwaliti nɔ fɔ de vɛks kwik gɛt sɔntin fɔ du wit fɔ ɔmbul. (Ɛfi. 4:​1-3) Wetin mek wi se so?

We wi ɔmbul, dat de mek wi nɔ kwik fɔ vɛks we ɔda pipul dɛn du wi bad ɔ ɔfɛn wi. Wetin Jizɔs bin du we ɔda pipul dɛn bin tɔk bad bɔt am se i “awaŋɔt” ɛn in na “drɔnkɔman”? I bin sho se dat nɔto tru bay in ɛgzampul ɛn i tɔk saful wan se, “di tin dɛn we pɔsin de du go sho if na Gɔd in sɛns i tek du dɛn.”—Mat. 11:​19.

If sɔmbɔdi tɔk bad bɔt yu kɔlɔ, di say we yu kɔmɔt, ɔ if yu na man ɔ uman, yu nɔ tink se i go fayn fɔ tɔk saful wan? Pita, we na ɛlda na Sawt Afrika bin se: “We a vɛks bikɔs ɔf wetin sɔmbɔdi tɔk, a kin aks misɛf se, ‘If na bin Jizɔs wetin i bin fɔ dɔn du?’” I kɔntinyu fɔ tɔk se: “A dɔn lan nɔ fɔ de vɛks kwik.”

Jizɔs bin no se mɔtalman nɔ pafɛkt. Jizɔs in disaypul dɛn bin want fɔ du gud tin dɛn, bɔt sɔntɛnde bikɔs dɛn nɔ pafɛkt, dat kin mek dɛn nɔ ebul fɔ du dɛn tin dɛn de. Fɔ ɛgzampul, di nɛt bifo Jizɔs day, Pita, Jems, ɛn Jɔn nɔ bin gi Jizɔs di sɔpɔt we i bin nid. Jizɔs bin ɔndastand wetin mek dat apin bay we i se, “una want du di rayt tin bɔt una nɔ gɛt di pawa fɔ du am.” (Mat. 26:​40, 41) Bikɔs Jizɔs bin ɔndastand se in apɔsul dɛn nɔ pafɛkt, dat bin mek i nɔ vɛks pan dɛn.

Mandi na wan sista we bin dɔn yus fɔ de fɛn fɔlt pan ɔda pipul dɛn, bɔt naw i de tray tranga wan fɔ falmakata Jizɔs in ɛgzampul fɔ trit ɔda pipul dɛn fayn. I bin se, “A tray fɔ ɔdastand se mɔtalman nɔ pafɛkt ɛn fɔ si di gud kwaliti pan ɔda pipul dɛn, we na sɔntin we Jiova de si.” Yu tink se di we aw Jizɔs bin sɔri fɔ mɔtalman bikɔs dɛn nɔ pafɛkt go ɛp yu bak fɔ trit ɔda pipul dɛn fayn?

Jizɔs bin abop pan Gɔd. We Jizɔs bin de na di wɔl, i bin bia we dɛn bin de trit am bad. Dɛn nɔ bin de ɔndastand am, dɛn nɔ lɛk am, ɛn dɛn bin mek i sɔfa. Pan ɔl dat, i nɔ bin de vɛks kwik bikɔs i “lɛf in kes na Gɔd an, bikɔs na Gɔd de jɔj tret wan.” (1 Pit. 2:​23) Jizɔs bin no se in Papa we de na ɛvin go kia fɔ am ɛn i go pɔnish di wan dɛn we bin de trit am bad di rayt tɛm.

If wi vɛks we dɛn du wi sɔntin we nɔ rayt ɛn tray fɔ fɛt fɔ wisɛf, sɔntɛm wi go du tin pasmak ɛn mek di prɔblɛm big. Na dat mek di Baybul mɛmba wi se: “Mɔtalman in wamat nɔ de mek wetin rayt na Gɔd in yay apin.” (Jems 1:​20, NWT) Ilɛksɛf wi gɛt gud rizin fɔ vɛks, bikɔs wi nɔ pafɛkt dat go mek wi du sɔntin we nɔ rayt.

Wan sista na Jamani we nem Kati bin yus fɔ tink se, ‘If yu nɔ fɛt fɔ yusɛf, nɔbɔdi nɔ go fɛt fɔ yu.’ Bɔt we i lan fɔ abop pan Jiova, di we aw i de tink bin chenj. I bin se: “A nɔ nid fɔ de fɛt fɔ misɛf igen. A kin fil fri fɔ du tin saful wan, bikɔs a no se Jiova ebul fɔ kɔrɛkt ɔl di tin  dɛn we nɔ rayt na di wɔl.” If dɛn dɔn ɛva du yu sɔntin we nɔ rayt, we yu fala Jizɔs in ɛgzampul fɔ abop pan Gɔd, dat go ɛp yu fɔ kɔntinyu nɔ fɔ de vɛks kwik.

Jizɔs bin mek wi no klia wan se if wi want fɔ gladi, wi nɔ fɔ de vɛks kwik. I bin se, “Di wan dɛn we ɔmbul gɛt gladi-at.” (Mat. 5:​5, NWT) Notis aw we wi nɔ de vɛks kwik kin ɛp pan dɛn tin dɛn ya we kin apin.

We wi nɔ de vɛks kwik, dat kin ɛp fɔ ridyus prɔblɛm insay mared-os. “Wan brɔda we nem Rɔbɔt we de na Ɔstrelia bin se: “A dɔn tɔk bɔku bad tin dɛn to mi wɛf ɛn a nɔ kin rili min am. Bɔt we wi kwik fɔ tɔk sɔntin we wi vɛks, wi nɔ go ebul fɔ rivas am. A bin rili fil am we a si se a dɔn du tin we mek i fil bad.”

“Wi ɔl de du tin we nɔ rayt” we wi de tɔk, ɛn we wi tɔk bifo wi tink, dat kin mek prɔblɛm de na di mared-os. (Jems 3:​2) We dɛn kayn tin dɛn de apin, we wi nɔ de vɛks kwik, dat kin ɛp wi fɔ kɔntrol wetin wi de tɔk.—Prɔv. 17:​27.

Rɔbɔt bin tray tranga wan nɔ fɔ de vɛks kwik ɛn fɔ kɔntrol insɛf. Wetin na bin di rizɔlt? I bin se: “Naw, ɛnitɛm we prɔblɛm de a kin tray tranga wan fɔ tek tɛm lisin, nɔ vɛks we a de tɔk, ɛn kɔntrol misɛf. Mi ɛn mi wɛf dɔn gɛt tayt padi biznɛs naw pas trade.”

We wi nɔ de vɛks kwik, dat kin ɛp wi fɔ bi padi to ɔda pipul dɛn. Di wan dɛn we kin kwik fɔ vɛks kin ɛnd-ɔp nɔ fɔ gɛt bɛtɛ padi dɛn. Bɔt we wi nɔ de vɛks kwik, dat de ɛp wi “fɔ tray ɔltɛm fɔ mek di wanwɔd we Gɔd in Spirit de gi, nɔ dɔn.” (Ɛfi. 4:​2, 3) Kati we wi bin dɔn tɔk bɔt bin se: “We a nɔ de vɛks kwik, dat dɔn ɛp mi fɔ ɛnjɔy fɔ de wit ɔda pipul dɛn pan ɔl we sɔm pipul dɛn at fɔ dil wit.”

We wi nɔ de vɛks kwik de mek wi gɛt pis. Di Baybul se “di sɛns we Gɔd de gi” gɛt sɔntin fɔ du wit nɔ fɔ vɛks kwik ɛn pis. (Jems 3:​13, 17) Pɔsin we nɔ de vɛks kwik “gɛt kolat.” (Prɔv. 14:​30) Matin we bin dɔn tray tranga wan fɔ gɛt di kwaliti nɔ fɔ vɛks kwik bin se, “Naw, a nɔ de pin pan sɔntin ɛn a de tɔk fayn, ɛn a de ɛnjɔy pis ɛn gladi-at.”

Fɔ tru, wi go nid fɔ tray tranga wan fɔ mek wi nɔ de vɛks kwik. Wan brɔda bin se: “Fɔ tɔk tru, ivin naw a kin vɛks wan wantɛm.” Bɔt Jiova we de ɛnkɔrej wi nɔ fɔ vɛks kwik, go ɛp wi as wi de tray fɔ du dat. (Ayz. 41:​10; 1 Tim. 6:​11) I ‘go dɔn fɔ tren wi’; i go ‘mek wi tinap tranga wan.’ (1 Pit. 5:​10, NWT) As tɛm de go, lɛk di apɔsul Pɔl, wi go “falamakata Krays we de tek tɛm du tin ɛn we de du gud.”—2 Kɔr. 10:​1, NWT.