Sɔm prɔfɛsi dɛn we de na dis chat de sho sɔm tin dɛn we apin di sem tɛm. Ɔl dɛn prɔfɛsi dɛn ya de sho se wi de na “di tɛm we de ɛnd go kam.”—Dan. 12:​4.

• Skripchɔ Dɛn: Rɛv. 11:​7; 12:​13, 17; 13:​1-8, 12

  Prɔfɛsi: “Di wayl [animal]” dɔn de rul di wɔl fɔ di pas 3,000 ia naw. Insay di tɛm we di wɔl want fɔ dɔn, dɛn wund in ed we mek sɛvin. Leta di ed bin wɛl ɛn “di wan ol wɔl” bigin fala di wayl animal. Setan de yuz di wayl animal fɔ “fɛt [di uman] in ɔda pikin dɛn.”

  Aw I Apin? Afta di Flɔd, gɔvmɛnt dɛn we nɔ lɛk Jiova bin de rul oba pipul dɛn. Fɔ lɛk 3,000 ia afta dat, Briten we na pawaful gɔvmɛnt, bin lɔs bɔku pawa insay Wɔl Wɔ I. Bɔt i bin strɔng bak we i jɔyn wit Amɛrika. Insay dis tɛm we di wɔl want fɔ dɔn, Setan de yuz gɔvmɛnt dɛn na di wɔl fɔ mek Gɔd in pipul dɛn sɔfa.

• Skripchɔ: Dan. 11:​25-45

  Prɔfɛsi: Insay di tɛm we di wɔl want fɔ dɔn, di kiŋ na di nɔt ɛn di kiŋ na di sawt go de fɛt dɛnsɛf fɔ pawa.

  Aw I Apin? Jamani fɛt Briten ɛn Amɛrika. Insay 1945, di Sɔviɛt Yuniɔn ɛn in padi dɛn bi di kiŋ na di nɔt. Insay 1991, di Sɔviɛt Yuniɔn fɔdɔm, dɔn leta Rɔshia ɛn in padi dɛn bi di kiŋ na di nɔt.

• Skripchɔ Dɛn: Ayz. 61:​1, NWT; Mal. 3:​1; Lyuk 4:​18, NWT

  Prɔfɛsi: Jiova sɛn in “mɛsenja” fɔ “mek shɔ se ɔltin ɔlrayt” bifo di Kiŋdɔm bigin rul. Dis grup bigin fɔ prich di “gud nyus to di ɔmbul wan dɛn.”

  Aw I Apin? Frɔm di ia 1870, C. T. Rɔsɛl ɛn in padi dɛn stɔdi di Baybul gud gud wan fɔ no wetin i rili de tich. Insay 1881, dɛn kam fɔ no se i impɔtant fɔ mek Gɔd in pipul dɛn prich. Dɛn print atikul dɛn lɛk, “Wanted 1,000 Preachers” ɛn “Anointed to Preach.”

• Skripchɔ: Mat 13:​24-30; 36-43, NWT

  Prɔfɛsi: Wan man plant wit na in fam. Dɔn wan ɛnimi plant gras na di sem fam. Di gras gro ɛn kɔba di wit te di avɛst tɛm rich; dɔn dɛn sɛpret di gras frɔm di wit.

  Aw I Apin? Frɔm 1870, difrɛns bigin de bitwin tru Kristian dɛn ɛn lay lay Kristian dɛn. Insay di tɛm we di wɔl want fɔ dɔn, dɛn gɛda tru Kristian dɛn ɛn sɛpret dɛn frɔm lay lay Kristian dɛn.

• Skripchɔ: Dan. 2:​31-33, 41-43

  Prɔfɛsi: Di fut we miks wit ayɛn ɛn kle de pat pan wan imej we dɛn mek wit difrɛn tin dɛn.

  Aw I Apin? Di kle tinap fɔ di kɔmɔn pipul dɛn we de chalenj di we aw Briten ɛn Amɛrika de rul dɛn. Dɛn kayn pipul dɛn ya de mek dis gɔvmɛnt nɔ ebul fɔ yuz in pawa lɛk ayɛn.

• Skripchɔ: Mat. 13:​30; 24:​14, 45, NWT; 28:​19, 20

  Prɔfɛsi: Dɛn gɛda “di wit” ɛn put dɛn insay di “stɔ” dɔn dɛn pik “di slev we fetful ɛn gɛt sɛns” fɔ de oba di “savant dɛn.” Di “gud nyuz bɔt di Kiŋdɔm” rich na di “wan ol wɔl.”

  Aw I Apin? Insay 1919, dɛn pik di slev we fetful ɛn gɛt sɛns fɔ de oba Gɔd in pipul dɛn. Frɔm da tɛm de, di Baybul Studɛnt dɛn bigin fɔ prich mɔ ɛn mɔ. Insay wi tɛm, i pas 200 kɔntri dɛn usay Jiova Witnɛs dɛn de prich, ɛn dɛn de mek Baybul buk dɛn insay pas 1,000 langwej dɛn.

• Skripchɔ Dɛn: Dan. 12:​11; Rɛv. 13:​11, 14, 15, NWT

  Prɔfɛsi: Wan wayl animal we gɛt tu ɔn tɛl pipul dɛn we de na di wɔl fɔ mek “wan imej fɔ di wayl animal” ɛn “gi layf to di wayl animal in imej.”

  Aw I Apin? Na Briten ɛn Amɛrika de bifo fɔ mek di League of Nations. Ɔda kɔntri dɛn jɔyn dis ɔganayzeshɔn. Frɔm 1926 to 1933, di kiŋ na di nɔt insɛf bin jɔyn di League of Nations. Pipul dɛn bin biliv se di League of Nations ɛn United Nations (UN) go bring pis, bɔt na Gɔd in Kiŋdɔm nɔmɔ go ebul du dat.

• Skripchɔ: Dan. 8:​23, 24

  Prɔfɛsi: Wan wikɛd kiŋ go “de pwɛl ɛn kil.”

  Aw I Apin? Briten ɛn Amɛrika dɔn kil bɔku pipul dɛn ɛn pwɛl bɔku say dɛn. Fɔ ɛgzampul, insay Wɔl Wɔ II, Amɛrika bin sɛn tu atɔmik bɔm dɛn na wan kɔntri we na bin ɛnimi to dɛn, ɛn Briten. Ɛn da bɔm de bin kil ɛn pwɛl bɔku tin dɛn pas ɛni ɔda bɔm we dɛn bin sɛn bifo da tɛm de.

• Skripchɔ Dɛn: Dan. 11:​31; Rɛv. 17:​3, 7-11

  Prɔfɛsi: Di “rɛd” kɔlɔ wayl animal we gɛt tɛn ɔn dɛn we kɔmɔt na di ol we nɔ gɛt bɔtɔm, na di kiŋ we mek et. Insay di Baybul buk we nem Daniɛl, dɛn kɔl dis kiŋ di “tin we PAPA GƆD nɔ lɛk we go briŋ trɔbul.”

  Aw I Apin? Di League of Nations bin ɛnd insay Wɔl Wɔ II. Afta di wɔ, na in dɛn “briŋ” di UN. Lɛk aw dɛn bin prez di League, na so dɛn prez UN bak fɔ se dɛn go ebul fɔ du wetin Gɔd in Kiŋdɔm ebul fɔ du. Di UN go atak rilijɔn.

• Skripchɔ Dɛn: 1 Tɛs. 5:​3; Rɛv. 17:​16

  Prɔfɛsi: Di neshɔn dɛn go se “ɔltin rayt, natin nɔ de fɔ fred” dɔn “di tɛn ɔn dɛn” ɛn “di wayl [animal]” go atak “di uman we de liv fri layf” ɛn dɔnawe wit am. Afta dat, dɛn go dɔnawe wit di neshɔn dɛn.

  Aw I Go Apin? Di neshɔn dɛn go tɔk se dɛn dɔn mek pis de na di wɔl ɛn natin nɔ de fɔ fred. Dɔn di neshɔn dɛn we de sɔpɔt di UN, go dɔnawe wit ɔl dɛn lay lay rilijɔn dɛn. Na da tɛm de di big trɔbul go stat. Da trɔbul de go dɔn di tɛm fɔ Amagɛdɔn we Jizɔs go dɔnawe wit ɔltin na Setan in wɔl.

• Skripchɔ Dɛn: Izi. 38:​11, 14-17; Mat. 24:​31

  Prɔfɛsi: Gɔg go ɛnta na di land we Gɔd in pipul dɛn de. Dɔn di enjɛl dɛn go gɛda di wan dɛn we dɛn dɔn “pik.”

  Aw I Go Apin? Di kiŋ na di nɔt wit di ɔda gɔvmɛnt dɛn go atak Gɔd in pipul dɛn. Afta dis atak, di balans anɔyntɛd dɛn we de na di wɔl go go na ɛvin.

• Skripchɔ Dɛn: Izi. 38:​18-23; Dan. 2:​34, 35, 44, 45; Rɛv. 6:​2; 16:​14, 16; 17:​14; 19:​20

  Prɔfɛsi: “Di wan we de rayd” di “wayt ɔs” go “dɔn [fɔ] win” bay we I dɔnawe wit Gɔg ɛn in ami. Dɛn go ib “di wayl [animal]” insay di “wata we faya de kech” ɛn dɛn go dɔnawe wit di imej.

  Aw I Go Apin? Jizɔs we na di Kiŋ na Gɔd in Kiŋdɔm, go sev Gɔd in pipul dɛn. Jizɔs, di 144,000, ɛn di enjɛl dɛn, go dɔnawe wit ɔl di neshɔn dɛn we go atak Gɔd in pipul dɛn; ɛn na da tɛm de Setan in wɔl go dɔn.