Dis fiaful tin we apin mek a chenj mi layf bikɔs na da tɛm de a bin stat fɔ tray fɔ no bɔt Gɔd. Bɔt bifo a tɛl yu di ɔda tin we apin da nɛt de we di ples bin rili dak, mek a tɛl yu sɔm tin dɛn we apin we mi na bin pikin we bin mek a want fɔ lan bɔt Gɔd.

A bɔn 1937 na Genan, we na wan tɔŋ we de na di nɔt pat na Frans usay dɛn de du maynin wok. Mi papa na bin pɔsin we de mayn kol, ɛn i tich mi se i impɔtant fɔ wok tranga wan. Mi papa bin tich mi se wan tin we a fɔ et na we dɛn nɔ de trit pipul dɛn fia wan. I bin de si se bɔku pan di pipul dɛn we bin de mayn, dɛn nɔ bin de trit dɛn fia wan, ɛn dɛn bin de wok na say we dɛn bin de put dɛn layf pan denja, ɛn i bin want fɔ ɛp dɛn. So i bin jɔyn ɔganayzeshɔn dɛn we bin de fɛt fɔ di rayt fɔ di wan dɛn we bin de du di maynin wok. I bin de vɛks bak we i bin de si di we aw di lokal prist dɛn ipokrit. Pan ɔl we bɔku pan dɛn bin de liv pɔsh layf, dɛn bin stil de aks di po pipul dɛn we de du di maynin wok fɔ gi dɛn it ɛn mɔni. Mi papa  bin rili vɛks we i si aw di prist dɛn bin de biev, ɛn dat bin mek i nɔ tich mi natin bɔt rilijɔn biznɛs. Infakt, wi nɔ bin de ɛva tɔk bɔt Gɔd.

As a bin de gro-ɔp, misɛf bin stat fɔ et di we aw dɛn nɔ bin de trit pipul dɛn fia wan. Wan pan di tin dɛn we a bin tink se nɔ fia na we bɔku pipul dɛn we bin de arawnd mi bin de sho se dɛn nɔ lɛk di fɔrina dɛn we de na Frans. A bin de ple futbɔl wit di fɔrina dɛn pikin dɛn, ɛn a bin de ɛnjɔy fɔ spɛn tɛm wit dɛn. Infakt, misɛf yon mama nɔ bɔn na Frans, na Poland i kɔmɔt. A bin rili want fɔ si we pis de bitwin pipul dɛn we kɔmɔt difrɛn say dɛn ɛn we dɛn de trit dɛn ɔl di sem we.

Di gɔvmɛnt bin se a fɔ jɔyn di ami insay 1957. Na da we de a ɛnd-ɔp fɔ de ɔp di mawntin dɛn Aljiria da nɛt we a bin stat fɔ tɔk bɔt. Afta we a bin kray to Gɔd fɔ lɛ i ɛp mi, a kam fɔ si se nɔto mi ɛnimi in futstɛp a bin de yɛri, na wan bush dɔnki in yon. Mi at bin kam dɔŋ. Bɔt stil, da tin de we bin apin ɛn di wɔ we bin de na da kɔntri de mek a tink mɔ bɔt di rizin we mek Gɔd mek wi. A bin de tink bɔt kwɛstyɔn dɛn lɛk, Wetin mek wi de na dis wɔl? Gɔd bisin bɔt wi? Wi go ɛva gɛt pis we go de sote go?

Leta, we a bin go fɛn mi mama ɛn papa, a mit wan Jiova Witnɛs. I gi mi wan Katolik Baybul we de insay Frɛnch, ɛn a bin stat fɔ rid am we a go bak na Aljiria. Wan pat na di Baybul we a bin rili tink bɔt na Rɛvɛleshɔn 21:​3, 4 we se: “Gɔd in tɛnt de wit mɔtalman . . . Ɛn i go wep ɔl di kray wata na dɛn yay, ɛn day nɔ go de igen, pwɛlat ɛn pen nɔ go de igen, ɛn dɛn nɔ go kray igen bikɔs dɛn at pwɛl.” * A bin sɔprayz we a rid dɛn wɔd dɛn de, ɛn a bin de aks misɛf if dɛn tin dɛn de go ɛva kam tru. Da tɛm de, a nɔ bin no bɛtɛ tin bɔt Gɔd ɛn di Baybul.

Afta a lɛf di ami insay 1959, a mit wan Jiova Witnɛs we nem Franswa. Na in bin tich mi bɔku tin dɛn bɔt di Baybul. Fɔ ɛgzampul, i sho mi insay di Baybul se Gɔd gɛt nem we na Jiova. (Sam. 83:​18, NWT) Franswa bin sho mi bak se Jiova go briŋ jɔstis kam na di wɔl, i go tɔn dis wɔl to Paradays, ɛn i go mek wetin de na Rɛvɛleshɔn 21:​3, 4 kam tru.

Dɛn tin dɛn de we i tich mi bin rili mek sɛns, ɛn dɛn bin tɔch mi at. Bɔt a bin vɛks bad bad wan pan di prist dɛn, ɛn a bin want fɔ kɔndɛm dɛn fɔ we dɛn de tich tin dɛn we nɔ de insay di Baybul. A bin stil de tink lɛk mi papa, ɛn a bin want fɔ fɛt agens dɛn wan dɛn we nɔ de trit pipul dɛn fia wan. A nɔ bin want fɔ wet. A bin want fɔ du sɔntin wantɛm wantɛm.

Franswa ɛn mi nyu Jiova Witnɛs padi dɛn bin ɛp mi fɔ mek a nɔ vɛks pasmak. Dɛn bin tɛl mi se di wok we wi Kristian dɛn de du nɔto fɔ jɔj ɔda pipul dɛn, bɔt na fɔ ɛp dɛn bay we wi de tɛl dɛn di gud nyuz bɔt Gɔd in Kiŋdɔm. Na da wok de Jizɔs bin de du, ɛn na dis sem wok i gi in disaypul dɛn fɔ du. (Mat. 24:​14; Lyuk 4:​43) A bin nid fɔ lan aw fɔ tɔk to pipul dɛn fayn wan, ivin if a nɔ gri wit wetin  dɛn biliv. Di Baybul se: “Di Masta in slev nɔ nid fɔ agyu, bɔt i fɔ tek tɛm du tin wit ɔlman.”—2 Tim. 2:​24.

A chenj di tin dɛn we a bin nid fɔ chenj na mi layf, ɛn a bin baptayz as Jiova Witnɛs insay 1959 na wan sakit asɛmbli. Na da asɛmbli de a mit wan yɔŋ sista we nem Anjɛl, we a bin lɛk. A bigin fɔ go fɛn am na in kɔngrigeshɔn, ɛn wi mared insay 1960. In na wɔndaful uman, gud wɛf, ɛn mi gift we Jiova dɔn gi mi we rili gɛt valyu.—Prɔv. 19:​14.

Insay dɛn ia ya we dɔn pas, a dɔn lan bɔku impɔtant lɛsin dɛn frɔm brɔda dɛn we gɛt sɛns ɛn ɛkspiriɛns. Wan pan di lɛsin dɛn we impɔtant pas ɔl di ɔda wan dɛn we a lan na dat if wi gɛt asaynmɛnt we nɔ izi fɔ du, i go kɔmɔt fayn if wi put wisɛf dɔŋ ɛn fala wetin de na Prɔvabs 15:​22, we se: “If yu gɛt bɔku advays bɛtɛ go fala yu.”

Insay 1964, a bin rili nid fɔ fala da advays de. A bigin fɔ sav as sakit ovasia, ɛn mi wok na bin fɔ go fɛn difrɛn kɔngrigeshɔn dɛn fɔ ɛnkɔrej di brɔda ɛn sista dɛn ɛn ɛp dɛn fɔ kam nia Jiova mɔ ɛn mɔ. Bɔt a bin jɔs ol 27 ia da tɛm de, ɛn a nɔ bin gɛt ɛkspiriɛns. So a bin de mek mistek dɛn. Bɔt a tray fɔ lan frɔm dɛn. Pantap dat, a lan bɔku lɛsin dɛn we valyu frɔm di “advays” dɛn we brɔda dɛn we gɛt sɛns ɛn ɛkspiriɛns bin gi mi.

A mɛmba sɔntin we bin apin we a bin jɔs bi sakit ovasia. Bifo wi lɛf wan kɔngrigeshɔn usay wi bin go du di sakit wok na Paris, wan brɔda we gɛt ɛkspiriɛns bin tɛl mi se i want tɔk to mi. A tɛl am se, “Oke.”

I aks mi se, “Lui, na udat dɔktɔ dɛn kin ɛp, na di wan dɛn we sik ɔ di wan dɛn we gɛt wɛlbɔdi?”

A tɛl am se, “Na di wan dɛn we sik.”

I tɔk se, “Na tru. Bɔt a dɔn si se yu de spɛn mɔ tɛm wit dɛn wan dɛn we gɛt tayt padi biznɛs wit Jiova, lɛk di kɔngrigeshɔn ovasia. Wi kɔngrigeshɔn gɛt bɔku brɔda ɛn sista dɛn we dɛn at pwɛl, we jɔs baptayz, ɔ we de shem. If yu de spɛn tɛm wit dɛn, yu go rili ɛnkɔrej dɛn, yu kin ivin go na dɛn os fɔ go it.”

A bin rili gladi fɔ da gud advays de we da brɔda de bin gi mi. Di lɛk we i lɛk Jiova in ship dɛn bin rili tɔch mi at. So pan ɔl we i nɔ bin  izi fɔ mek a gri se a dɔn mek mistek, a bin du wetin di brɔda se wantɛm wantɛm. A tɛl Jiova tɛnki fɔ we i mek wi gɛt brɔda dɛn lɛk dat na di kɔngrigeshɔn.

Insay di ia 1969 ɛn 1973, dɛn bin mek mi as ovasia fɔ di Fud Savis Dipatmɛnt na wi tu intanashɔnal kɔnvɛnshɔn dɛn we wi bin gɛt na Kolomb, Paris. Na di 1973 kɔnvɛnshɔn, na lɛk 60,000 pipul dɛn wi bin nid fɔ fid fɔ fayv dez. A nɔ bin no aw wi go ebul fɔ du dis. Bɔt dis tɛm bak, di tin we bin ɛp mi fɔ sɔlv di prɔblɛm na di advays we de Prɔvabs 15:​22 we se wi fɔ lisin to di advays we ɔda pipul dɛn de gi wi. A bin aks machɔ brɔda dɛn we gɛt ɛkspiriɛns pan fud biznɛs fɔ ɛp mi. Sɔm pan dɛn na bin buchaman dɛn, dɛn wan dɛn we de wok na fam, dɛn wan dɛn we de kuk, ɛn we de bay-bay. Wi ɔl bin wok togɛda fɔ du dis wok we bin rili tranga.

Insay 1973, dɛn bin invayt mi ɛn mi wɛf fɔ wok na Bɛtɛl na Frans. Mi fɔs asaynmɛnt we a bin gɛt nɔ bin rili izi. A bin gɛt fɔ fɛn we dɛn fɔ kɛr wi pɔblikeshɔn dɛn to wi brɔda dɛn na Kamɛrun we de na Afrika usay dɛn bin ban di wok insay 1970 ɛn 1993. Dis tɛm bak, a nɔ bin no if a go ebul fɔ du dis wok. Di branch ovasia we bin de na Frans go dɔn notis aw a bin de fil, so i ɛnkɔrej mi bay we i se: “Di brɔda dɛn na Kamɛrun rili nid wi pɔblikeshɔn dɛn. Wi nid fɔ kia fɔ dɛn!” Ɛn na dat wi bin du.

A bin travul bɔku tɛm fɔ go na kɔntri dɛn we de nia Kamɛrun fɔ mit wit di ɛlda dɛn we de na da kɔntri de. Dɛn brɔda dɛn ya bin gɛt maynd ɛn dɛn bin gɛt sɛns. Dɛn bin ɛp mi fɔ fɛn we dɛn fɔ sɛn wi pɔblikeshɔn dɛn to wi brɔda ɛn sista dɛn ɔltɛm na Kamɛrun. Jiova bin blɛs wetin wi bin de du. Infakt, fɔ lɛk 20 ia so, Jiova in pipul dɛn we bin de na da kɔntri de bin de gɛt ɔl Di Wachtawa dɛn ɛn wan pɔblikeshɔn we bin de kɔmɔt ɛvri mɔnt we dɛn kɔl Our Kingdom Service.

Frɔm we mi ɛn Anjɛl bigin wach wisɛf fɔ mared, a bin kam fɔ no se i gɛt tayt padi biznɛs wit Jiova. Afta we wi mared, a bin de si dat mɔ ɛn mɔ. Fɔ ɛgzampul, di ivintɛm afta wi mared, i bin aks mi fɔ pre bɔt wetin wi want fɔ du, we na fɔ sav Jiova mɔ ɛn mɔ as maredman ɛn mareduman. Jiova bin ansa da prea de.

Anjɛl dɔn ɛp mi bak fɔ mek a abop pan Jiova mɔ ɛn mɔ. Fɔ ɛgzampul, insay 1973, we dɛn bin invayt wi fɔ go wok na Bɛtɛl, a nɔ bin want fɔ go bikɔs a bin lɛk di sakit wok. Bɔt Anjɛl bin mɛmba mi se wi dɔn gi wi layf to Jiova, so wi fɔ du ɛnitin we in ɔganayzeshɔn aks wi fɔ du. (Ibru. 13:​17) A bin gri wit am. So wi go na Bɛtɛl. Mi wɛf gɛt sɛns, ɛn i nɔ de pin. I rili lɛk Jiova. Dɛn in fayn kwaliti dɛn ya dɔn ɛp fɔ mek wi gɛt tayt padi biznɛs na wi mared-os ɛn fɔ lɛ wi disayd fɔ du di rayt tin dɛn ɔl dis tɛm we wi dɔn de togɛda.

Naw we wi dɔn ol, Anjɛl dɔn kɔntinyu fɔ bi gud wɛf we de sɔpɔt mi gud gud wan. Fɔ ɛgzampul, fɔ mek wi go ebul fɔ go tiokratik skul dɛn we dɛn de du insay Inglish, mi ɛn Anjɛl bigin fɔ wok tranga wan fɔ sabi da langwej de. So wi bin jɔyn wan kɔngrigeshɔn we dɛn de tɔk Inglish, pan ɔl we wi bin dɔn pas 70 ia da tɛm de. Bikɔs ɔf mi wok dɛn we a gɛt as mɛmba na di Frans Branch Kɔmiti, i nɔ bin izi fɔ mek a lan ɔda langwej. Bɔt mi ɛn Anjɛl bin de ɛp wisɛf. Naw we wi dɔn pas 80 ia, wi de kɔntinyu fɔ pripia fɔ wi mitin dɛn insay Inglish ɛn Frɛnch. Wi kin tray bak fɔ de atɛnd di mitin dɛn ɛn fɔ prich wit wi kɔngrigeshɔn. Jiova dɔn blɛs di tray we wi de tray fɔ lan Inglish.

Wi bin gɛt wan big blɛsin insay 2017. Dɛn bin invayt mi ɛn Anjɛl fɔ atɛnd di Skul fɔ Branch Kɔmiti Mɛmba dɛn ɛn Dɛn Wɛf dɛn, we bin de na di Watchtower Educational Center na Patasin, Nyu Yɔk.

Fɔ tru, Jiova na di Bɛst Ticha. (Ayz. 30:​20) So wi nɔ sɔprayz fɔ no se Jiova de tich in pipul dɛn di bɛst we, ilɛksɛf wi yɔŋ ɔ ol. (Dit. 4:​5-8) Fɔ tru, a dɔn kam fɔ si se yɔŋ wan dɛn we de lisin to Jiova ɛn to brɔda ɛn sista dɛn we gɛt ɛkspiriɛns kin disayd fɔ du di rayt tin ɛn sav Jiova fetful wan we dɛn big. Prɔvabs 9:​9 mɛmba wi se: “If yu tich pɔsin we gɛt sɛns, i go gɛt mɔ sɛns; if yu tich pɔsin we de waka tret na PAPA GƆD in yay, i go no bɔt mɔ tin dɛm.”

Sɔntɛnde, a kin tink bɔt da fiaful dak nɛt we a bin de ɔp di mawntin dɛn na Aljiria; i dɔn pas lɛk 60 ia so we dat bin apin. Da nɛt de, a nɔ bin no se a go gɛt dis kayn gladi-at na mi layf. A dɔn lan bɔku tin frɔm ɔda pipul dɛn. Jiova dɔn gi mi ɛn Anjɛl wɔndaful layf, ɛn i dɔn de blɛs wi. So wi dɔn mekɔp wi maynd se wi go kɔntinyu fɔ lan frɔm wi Papa we de na ɛvin, ɛn frɔm wi brɔda ɛn sista dɛn we lɛk am ɛn we gɛt sɛns ɛn ɛkspiriɛns.