1-2. Us prɔblɛm dɛn we kin mit bɔku pan wi brɔda ɛn sista dɛn?

APƆSUL Pɔl bin ɛnkɔrej Timoti, ɛn ɔl udat we na Kristian, fɔ kɔntinyu fɔ du in bɛst na di prichin wok. (2 Tim. 4:​5) So wi fɔ fala Pɔl in advays ɛn du wi bɛst we wi de sav Gɔd. Bɔt sɔntɛnde, i nɔ kin izi fɔ du. Bɔku pan wi brɔda ɛn sista dɛn de fred fɔ du di prichin wok. (2 Tim. 4:​2) Fɔ ɛgzampul, tink bɔt wi brɔda dɛn we de na say usay dɛn nɔ de alaw dɛn fɔ du ɔltin we i kam pan dɛn wɔship ɔ dɛn dɔn ivin ban wi prichin wok. Dɛn stil de prich pan ɔl we dɛn no se dɛn go put dɛn na prizin.

² Jiova in pipul dɛn kin gɛt bɔku prɔblɛm dɛn we kin mek dɛn at pwɛl. Fɔ ɛgzampul, plɛnti pan Jiova in pipul dɛn gɛt fɔ wok tranga wan fɔ gɛt di tin dɛn we dɛn famili nid. Dɛn kin want fɔ du mɔ na di prichin wok, bɔt te di wik de dɔn, dɛn nɔ kin gɛt bɛtɛ trɛnk igen. Ɔda wan dɛn nɔ ebul du mɔ fɔ sav Jiova igen bikɔs dɛn sik siriɔs wan ɔ dɛn dɔn ol, ɛn dɛn nɔ kin ivin ebul fɔ kɔmɔt na dɛn os. Stil, ɔda wan dɛn kin fil ɔltɛm se dɛn nɔ valyu to Jiova. Wan sista we nem Meri, * we de na di Midul Ist, bin se: “A gɛt fɔ wok tranga wan so dat a go ebul fɔ kɔntrol di we aw a de fil we mi at pwɛl, ɛn dat kin mek a rili taya. Dɔn, a kin fil gilti bikɔs i kin mek a nɔ gɛt bɛtɛ tɛm ɛn ɛnaji fɔ du mi prichin wok.”

3. Wetin wi go tɔk bɔt insay dis atikul?

³ Ilɛk us prɔblɛm wi gɛt, Jiova go gi wi di trɛnk we wi nid fɔ bia wi prɔblɛm dɛn ɛn stil sav am di we aw wi go ebul fɔ sav am. Bifo wi tɔk bɔt aw Jiova go ɛp wi, lɛ wi tɔk bɔt aw i bin gi Pɔl ɛn Timoti trɛnk fɔ mek dɛn go ebul fɔ du dɛn prichin wok pan ɔl we dɛn bin gɛt prɔblɛm dɛn.

4. Us prɔblɛm dɛn we Pɔl bin gɛt?

⁴ Pɔl bin gɛt bɔku prɔblɛm dɛn. I bin rili nid Jiova fɔ ɛp am di tɛm we dɛn bit am, ston am, ɛn put am na prizin. (2 Kɔr. 11:​23-25) Pɔl nɔ bin shem fɔ tɔk se sɔntɛnde i bin de wok tranga wan fɔ mek in at nɔ go pwɛl. (Rom. 7:​18, 19, 24) Dɔn bak, i bin gɛt wɛlbɔdi prɔblɛm we tan lɛk “chukchuk na [in] bɔdi,” ɛn i bin rili want fɔ lɛ Gɔd pul da prɔblɛm de kɔmɔt.—2 Kɔr. 12:​7, 8.

5. Wetin Pɔl bin ebul fɔ du pan ɔl we i bin gɛt prɔblɛm dɛn?

⁵ Jiova bin gi Pɔl trɛnk fɔ kɔntinyu fɔ du in prichin wok pan ɔl we i bin gɛt bɔku prɔblɛm dɛn. Tink bɔt ɔl wetin Pɔl bin ebul fɔ du. Fɔ ɛgzampul, we i bin de na prizin na wan os na Rom, i bin prich wit zil bifo di Ju bigman dɛn ɛn sɔntɛm bifo di bigman dɛn na gɔvmɛnt. (Akt 28:​17; Fil. 4:​21,22) I bin prich bak to bɔku pan di Kiŋ in Gaydman dɛn ɛn ɔl di wan dɛn we bin de go fɛn am. (Akt 28:​30, 31; Fil. 1:​13) Insay da sem tɛm de, Gɔd bin yuz Pɔl fɔ rayt lɛta dɛn we bin ɛp di tru Kristian dɛn trade, ɛn we stil de ɛp wi tide. Dɔn bak, Pɔl in ɛgzampul bin de ɛp di kɔngrigeshɔn na Rom, ɛn dat bin mek in brɔda dɛn bin “rili gɛt maynd fɔ prich Gɔd in wɔd ɛn dɛn nɔ de fred.” (Fil. 1:​14) Pan ɔl we tɛm dɛn bin de we Pɔl nɔ bin ebul du ɔl wetin i want fɔ du, i bin de du in bɛst, ɛn dat bin mek “di gud nyuz go bifo.”—Fil. 1:​12.

6. Akɔdin to 2 Kɔrintians 12:​9, 10, wetin bin ɛp Pɔl fɔ du in prichin wok?

⁶ Pɔl bin no se nɔto di trɛnk we i gɛt bin mek i du ɔl dɛn tin dɛn de we i bin de du fɔ sav Jiova, bɔt na bikɔs Jiova bin de gi am trɛnk. I bin tɔk se “na we pɔsin wik” na in Gɔd kin rili sho in pawa. (Rid 2 Kɔrintians 12:​9, 10.) Jiova bin yuz in oli spirit fɔ gi Pɔl di trɛnk we i nid fɔ du in prichin wok gud gud wan pan ɔl we pipul dɛn bin de mek i sɔfa, dɛn bin de put am na prizin, ɛn i bin de gɛt ɔda prɔblɛm dɛn.

7. Us prɔblɛm dɛn we Timoti bin gɛt we fɔ bin dɔn mek i nɔ izi fɔ lɛ i du in prichin wok?

⁷ Yɔŋ Timoti we bin de wit Pɔl as i de du in prichin wok insɛf bin nid fɔ abop pan Gɔd in pawa fɔ ɛp am fɔ du dis wok.  Timoti bin de go wit Pɔl we i bin de du in mishɔnari wok na difrɛn difrɛn say dɛn. Dɔn bak, Pɔl bin de sɛn am fɔ go na ɔda kɔngrigeshɔn dɛn fɔ go fɛn ɛn ɛnkɔrej dɛn. (1 Kɔr. 4:​17) I go bi se Timoti bin fil se i nɔ fit fɔ du da wok de. Na dat go dɔn mek Pɔl tɛl am se: “Nɔ alaw ɛnibɔdi fɔ tɛkɛ yu bikɔs yu yɔŋ.” (1 Tim. 4:​12) Dɔn bak, da sem tɛm de, Timoti bin de “sik fast fast,” ɛn dande bin tan lɛk insɛf yon chukchuk we i bin gɛt na in bɔdi. (1 Tim. 5:​23) Bɔt Timoti bin no se Jiova in pawaful oli spirit go gi am di trɛnk we i nid fɔ prich di gud nyuz ɛn fɔ wok fɔ in brɔda dɛn.—2 Tim. 1:​7.

8. Wetin Jiova de yuz fɔ gi in pipul dɛn trɛnk tide?

⁸ Tide, Jiova de gi in pipul dɛn “pawa we pas mɔtalman in yon” so dat dɛn go kɔntinyu fɔ sav am fetful wan. (2 Kɔr. 4:​7) Lɛ wi tɔk bɔt 4 tin dɛn we Jiova de gi wi fɔ mek wi gɛt trɛnk ɛn fɔ lɛ wi kɔntinyu fɔ sav am fetful wan. Dɛn tin dɛn de na prea, di Baybul, wi brɔda ɛn sista dɛn, ɛn wi prichin wok.

9. Aw prea kin ɛp wi?

⁹ Prea de ɛp wi fɔ gɛt trɛnk. Insay Ɛfishians 6:​18, Pɔl ɛnkɔrej wi fɔ pre to Gɔd “ɔltɛm.” Gɔd go ansa wi prea bay we i go gi wi di trɛnk we wi nid. Wan brɔda we nem Jɔni, we de na Bolivia, bin fil Jiova in sɔpɔt di tɛm we i bin gɛt bɔku prɔblɛm dɛn. In wɛf wit in mama ɛn papa bin sik siriɔs wan di sem tɛm. I nɔ bin izi atɔl fɔ lɛ Jɔni du ɔl wetin i fɔ du fɔ kia fɔ dɛn ɔl tri. In mama bin day, ɛn i bin te bifo in wɛf ɛn in papa bin ebul fɔ wɛl bak. We Jɔni bin de tɔk bɔt da tɛm de we nɔ bin rili izi fɔ am, i bin se, “Di tin we bin de ɛp mi ɔl di tɛm dɛn we a bin de wɔri pasmak, na we a bin de pre to Jiova ɛn tɛl am ɔltin bɔt aw a bin de fil.” Jiova bin gi Jɔni di trɛnk we i bin nid fɔ bia. Wan ɛlda na Bolivia we nem Rɔnald bin kam fɔ no se in mama gɛt kansa, ɛn i bin day afta wan mɔnt. Wetin bin ɛp Rɔnald da tɛm de we tin nɔ bin izi fɔ am? I bin se: “We a bin de pre to Jiova, a bin de tɛl am ɔl wetin de na mi at ɛn aw a bin de fil. A no se i ɔndastand mi pas di we aw ɛni ɔda pɔsin ɔndastand mi, ɛn i ivin pas di we aw a ɔndastand misɛf.” Tɛm dɛn kin de we wi kin fil se wi nɔ go ebul fɔ bia wi prɔblɛm dɛn ɛn wi nɔ kin ivin no wetin wi fɔ pre fɔ. Bɔt Jiova de ɛnkɔrej wi fɔ pre to am ilɛksɛf i nɔ izi fɔ lɛ wi tɛl am aw wi de tink ɛn fil.—Rom. 8:​26, 27.

10. Akɔdin to Ibruz 4:​12, wetin mek i rili impɔtant fɔ lɛ wi rid di Baybul ɛn tink gud gud wan bɔt wetin wi de rid?

¹⁰ Di Baybul de ɛp wi fɔ gɛt trɛnk. Pɔl bin de rid di Skripchɔ dɛn fɔ mek i go kɔrej am ɛn ɛp am fɔ gɛt trɛnk, wisɛf nid fɔ du di sem tin. (Rom. 15:​4) We wi de rid Gɔd in Wɔd ɛn tink gud gud wan bɔt am, Jiova kin yuz in spirit fɔ ɛp wi fɔ ɔndastand aw di Baybul go ebul fɔ ɛp wi. (Rid Ibruz 4:​12.) Rɔnald, we wi bin dɔn tɔk bɔt, bin se: “A gladi we a mek am abit fɔ de rid di Baybul ɛvri nɛt. A kin yuz bɔku tɛm fɔ tink gud gud wan bɔt Jiova in kwaliti dɛn ɛn aw i bin sho se i bisin bɔt in pipul dɛn. Dis de ɛp mi fɔ gɛt trɛnk bak.”

11. Aw di Baybul bin ɛp wan sista we bin gɛt pwɛlat?

¹¹ We wi de tink gud gud wan bɔt Gɔd in Wɔd, dat de ɛp wi fɔ tink di rayt we bɔt wi prɔblɛm dɛn. Lɛ wi tɔk bɔt aw di  Baybul bin ɛp wan sista we bin gɛt pwɛlat bikɔs in man day. Wan ɛlda bin tɛl am se if i rid di Baybul buk we nem Job, i go ebul fɔ lan fayn lɛsin dɛn. So i bin stat fɔ rid da Baybul buk de, bɔt fɔs i nɔ bin lɛk di rɔng we aw Job bin de tink. So insay in maynd i bin de tɛl Job se: “Job lɛf fɔ tink bɔt yu yon prɔblɛm dɛn nɔmɔ.” Bɔt i kam fɔ no se di we aw i de tink fiba di we aw Job bin de tink. Dis bin ɛp am fɔ ajɔst di we aw i de tink ɛn fɔ bia di pen we i de fil bikɔs ɔf di day we in man dɔn day.

12. Aw Jiova de yuz wi brɔda ɛn sista dɛn fɔ gi wi trɛnk?

¹² Wi brɔda ɛn sista dɛn de ɛp wi fɔ gɛt trɛnk. Wan ɔda we we Jiova de yuz fɔ gi wi trɛnk na wi brɔda ɛn sista dɛn. Pɔl bin rayt se i rili want fɔ si in Kristian brɔda ɛn sista dɛn so dat dɛn go ‘ɛnkɔrej dɛnsɛf.’ (Rom. 1:​11, 12) Meri, we wi bin dɔn tɔk bɔt, kin lɛk fɔ de wit in brɔda ɛn sista dɛn. I bin tɔk se: “Jiova dɔn yuz brɔda ɛn sista dɛn we nɔ bin ivin no bɔt mi prɔblɛm dɛn. Dɛn bin de tɔk sɔntin we bin de ɛnkɔrej mi, ɛn dɛn bin de sɛn kad to mi. Ɛn na dɛn tin dɛn de a bin rili nid. Wan ɔda tin we bin ɛp mi na we a bin de tɔk to sista dɛn we bin dɔn gɛt mi kayn prɔblɛm dɛn, ɛn we a bin de lan frɔm wetin dɛn bin du. Dɔn bak, di ɛlda dɛn bin de mek a no ɔltɛm se di brɔda ɛn sista dɛn na di kɔngrigeshɔn rili lɛk mi.”

13. Aw wi go ebul fɔ ɛnkɔrej wisɛf we wi atɛnd di mitin dɛn?

¹³ Wan pan di bɛst say dɛn we wi go go fɔ ɛnkɔrej wisɛf na di mitin dɛn. Yu nɔ tink se i go fayn fɔ lɛ yu ɛp yu brɔda ɛn sista dɛn bay we yu de tɛl dɛn tɛnki fɔ wetin dɛn de du ɛn we yu de tɛl dɛn se yu lɛk dɛn ɛnitɛm we yu go na mitin? Fɔ ɛgzampul, bifo di mitin, wan ɛlda we nem Pita bin tɔk to wan sista we in man nɔto Jiova Witnɛs. I bin tɛl di sista se: “Yu nɔ go ebul imajin aw yu de ɛnkɔrej wi ɛnitɛm we wi de si yu de kam mitin. Yu kin rɛdi yu siks pikin dɛn fayn fɔ di mitin ɛn yu kin ɛp dɛn fɔ de gi kɔmɛnt ɔltɛm.” Di sista bin rili gladi fɔ wetin di ɛlda tɛl am, ɛn dat mek kray wata gɛda na in yay we i bin de tɛl di ɛlda se: “A bin rili nid fɔ yɛri dis kayn tin tide.”

14. Aw di prichin wok kin ɛp wi?

¹⁴ Di prichin wok de ɛp wi fɔ gɛt trɛnk. We wi kin prich to pipul dɛn, wi kin fil fayn, ilɛk dɛn lisin to wi ɔ dɛn nɔ lisin. (Prɔv. 11:​25) Wan sista we nem Stesi bin kam fɔ no se di prichin wok de rili ɛp am fɔ gɛt trɛnk. In at bin pwɛl bad bad wan we dɛn bin disfɛloship wan pan in fambul dɛn, ɛn i bin de aks insɛf ɔltɛm se, ‘Fɔ se a fɔ bin dɔn ebul du mɔ tin dɛn fɔ ɛp am?’ I nɔ bin izi fɔ lɛ Stesi lɛf fɔ tink bɔt dis prɔblɛm. Bɔt wetin bin ɛp am fɔ fil bɛtɛ? Na di prichin wok. Di prichin wok bin ɛp am fɔ tink bɔt di pipul dɛn na di tɛritri we nid in ɛp. I bin se: “Da tɛm de, Jiova bin gi mi Baybul stɔdi we nɔ bin de westɛm fɔ du di tin dɛn we i de lan. Dat bin rili ɛnkɔrej mi. Di prichin wok na di tin we dɔn ɛp mi pas ɛni ɔda tin.”

15. Wetin yu lan frɔm wetin Meri tɔk?

¹⁵ Di tin dɛn we kin apin to sɔm brɔda ɛn sista dɛn kin mek dɛn fil se dɛn nɔ go ebul fɔ du di prichin wok fayn fayn wan. If na so yu de fil, mɛmba se Jiova go gladi if yu du yu bɛst. Lɛ wi tɔk bak bɔt Meri in ɛgzampul. We i bin go de na say usay dɛn de tɔk difrɛn langwej, i nɔ bin  tink se i go ebul ɛp fɔ du bɛtɛ tin. I bin se: “Fɔ sɔm tɛm, di tin dɛn nɔmɔ we a bin de du na fɔ gi simpul kɔmɛnt, rid skripchɔ, ɔ gi trakt na fil savis.” Dis bin mek i fil se i nɔ go ebul du bɛtɛ tin lɛk di wan dɛn we sabi tɔk di langwej fayn fayn wan. Bɔt i bin chenj di we aw i de tink. I bin kam fɔ no se Jiova go stil yuz am ilɛksɛf i nɔ sabi tɔk di langwej fayn fayn wan. I bin se, “Di tin dɛn we di Baybul de tɔk na simpul tin dɛn we go ebul fɔ chenj pipul dɛn layf.”

16. Wetin go ɛp di wan dɛn we nɔ ebul kɔmɔt na os fɔ gɛt di trɛnk we dɛn nid?

¹⁶ Jiova no se sɔm pan wi rili want fɔ du di prichin wok, bɔt wi nɔ ebul fɔ kɔmɔt na wi os. So i kin ɛp wi fɔ prich to dɛn wan dɛn we kin kam tek kia ɔf wi na os, ɔ to wi dɔktɔ ɛn nɔs dɛn. If wi de kɔmpia wetin wi de du naw to wetin wi bin ebul fɔ du trade, wi at go pwɛl. Bɔt if wi no aw Jiova de ɛp wi naw, wi go gɛt di trɛnk we wi nid fɔ bia ɛni prɔblɛm wit gladi-at.

17. Akɔdin to Ɛkliziastis 11:​6, wetin mek wi fɔ kɔntinyu fɔ prich ilɛksɛf wi nɔ de si se pipul dɛn de kam wɔship Jiova wantɛm wantɛm?

¹⁷ Wi nɔ no uswan pan di sid dɛn we wi plant go bigin fɔ gro. (Rid Ɛkliziastis 11:​6.) Fɔ ɛgzampul, wan sista we nem Babra we de arawnd 80 ia bin de yuz tɛlifon ɛn lɛta dɛn fɔ prich ɔltɛm. Insay wan pan in lɛta dɛn, i put di Mach 1, 2014, Wachtawa, we gɛt di atikul “What God Has Done for You.” I nɔ bin no se di mared pipul dɛn we i sɛn di lɛta to bin dɔn disfɛloship fɔ lɔng tɛm. Dɛn bin rid di magazin igen ɛn igen. Di maredman bin fil lɛk se na Jiova de tɔk to am. Dɛn mared pipul dɛn ya bin bigin fɔ atɛnd di mitin dɛn, ɛn leta, dɛn bin bi Jiova Witnɛs bak, dat na afta 27 ia bin dɔn pas. Jɔs tink bɔt aw dis go dɔn ɛnkɔrej Babra ɛn gi am trɛnk we i no se dis bin apin bikɔs ɔf wan lɛta we i rayt.

18. Wetin wi go du fɔ mek wi bɛnifit frɔm Gɔd in pawa?

¹⁸ Jiova dɔn mek bɔku we dɛn fɔ mek wi rili gɛt trɛnk. We wi yuz di tin dɛn we Jiova dɔn gi wi, lɛk prea, di Baybul, wi brɔda ɛn sista dɛn, ɛn di prichin wok, wi de sho se wi biliv se Jiova ebul ɛp wi ɛn i want fɔ ɛp wi. So lɛ wi abop pan wi Papa we de na ɛvin ɔltɛm, we gladi “fɔ sho in pawa fɔseka di wan dɛn we dɛn at klin fɔ am.”—2 Kro. 16:​9.