1-2. Wetin wan man we de rayt buk dɛn bin se, ɛn wetin wi go tɔk bɔt insay dis atikul?

BƆKU pipul dɛn tide de tɔk se dɛn biliv Jizɔs, bɔt dɛn nɔ de fala di tin dɛn we i bin de tich. (2 Tim. 4:​3, 4) Infakt, wan man we de rayt buk dɛn bin tɔk se: “If wi gɛt ɔda man tide we tan lɛk Jizɔs, we bin tɔk ɔl di tin dɛn lɛk aw Jizɔs bin se . . . , wi go lɛf fɔ fala am lɛk aw pipul dɛn bin lɛf fɔ fala Jizɔs trade trade? . . . Di ansa go bi: Yɛs.”

² We Jizɔs bin de na dis wɔl, bɔku pipul dɛn bin yɛri wetin i tich, ɛn dɛn si we i pafɔm mirekul dɛn, bɔt dɛn nɔ bin put fet pan am. Wetin mek? Insay di atikul bifo dis wan, wi bin tɔk bɔt 4 rizin dɛn we mek pipul dɛn nɔ bin lisin to wetin Jizɔs bin de se ɛn du. Lɛ wi tɔk bɔt ɔda 4 rizin dɛn. Wi go si bak wetin mek pipul dɛn tide nɔ de lisin to Jizɔs in disaypul, ɛn wetin go ɛp wi fɔ mek wi nɔ stɔp fɔ biliv di tru tin dɛn we wi dɔn lan.

3. Wetin Jizɔs bin du we mek sɔm pipul dɛn nɔ bin lisin to am?

³ We Jizɔs bin de na di wɔl, i bin de spɛn tɛm wit ɔlkayn pipul dɛn. I bin de it wit di wan dɛn we gɛt mɔni ɛn di wan dɛn we gɛt pawa, bɔt i bin de spɛn bɔku tɛm bak wit di wan dɛn we po ɛn di wan dɛn we de sɔfa. Pantap dat, i bin gɛt sɔri-at fɔ di wan dɛn we pipul dɛn bin de si as “sina dɛn.” Sɔm pipul dɛn we bin de mek prawd nɔ bin de lisin to Jizɔs bikɔs ɔf wetin i bin de du. Dɛn bin aks in disaypul dɛn se: “Wetin mek una de it ɛn drink wit sina dɛn ɛn pipul dɛn we de gɛda taks?” Jizɔs ansa dɛn se: “Di wan dɛn we gɛt wɛlbɔdi nɔ nid dɔktɔ; bɔt di wan dɛn we sik nid dɔktɔ. A nɔ  kam fɔ kɔl pipul dɛn we de du wetin rayt, a kam fɔ tɛl sina dɛn fɔ ripɛnt.”—Lyuk 5:​29-32.

4. Akɔdin to prɔfɛt Ayzaya, wetin di Ju pipul dɛn fɔ dɔn no bɔt di Mɛsaya?

⁴ Wetin di Baybul se? Lɔng tɛm bifo di Mɛsaya kam, prɔfɛt Ayzaya bin tɔk se pipul dɛn na di wɔl nɔ go lɛk am. Di prɔfɛsi bin se: “Mɔtalman dɛn luk dɔŋ pan am, ɛn shub am fa. . . . [I bin tan] lɛk udat pipul dɛn de ayd fes pan dɛn luk dɔŋ pan am, ɛn wi nɔ rɛspɛkt am atɔl.” (Ayz. 53:​3) Di prɔfɛsi bin tɔk se “mɔtalman dɛn” go shub di Mɛsaya fa. So di Ju pipul dɛn we bin de insay Jizɔs in tɛm fɔ dɔn no se dɛn nɔ go lisin to Jizɔs.

5. Aw bɔku pipul dɛn tide de si Jizɔs in disaypul dɛn?

⁵ Wi de si di sem prɔblɛm tide? Yɛs, wi de si am. Bɔku bigman dɛn pan Gɔd biznɛs kin gladi we di pipul dɛn we de jɔyn dɛn, na pipul dɛn we impɔtant, we gɛt mɔni, ɛn we di pipul dɛn na di wɔl de si se gɛt sɛns. Dɛn kin alaw dɛn kayn pipul dɛn ya fɔ de na dɛn chɔch pan ɔl we dɛn de du tin dɛn we Jiova et. Bɔt dɛn sem bigman dɛn ya pan Gɔd biznɛs nɔ valyu Jiova in savant dɛn we gɛt zil ɛn we de du wetin Jiova want, bikɔs bɔku pipul dɛn na di wɔl de tink se dɛn nɔ impɔtant. Jɔs lɛk aw Pɔl bin se, Gɔd dɔn pik di wan dɛn we “pipul dɛn nɔ tek mek natin.” (1 Kɔr. 1:​26-29) Jiova rili valyu ɔl in fetful savant dɛn.

6. Wetin Jizɔs bin tɔk na Matyu 11:​25, 26, ɛn aw wi go falamakata am?

⁶ Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? (Rid Matyu 11:​25, 26.) Nɔ alaw di we aw pipul dɛn na di wɔl de si Gɔd in savant dɛn fɔ afɛkt yu. Mɛmba se na ɔmbul pipul dɛn nɔmɔ Jiova de yuz fɔ du wetin i want. (Sam 138:​6) Dɔn tink bɔt ɔl wetin Jiova dɔn du bay we i yuz pipul dɛn we di wɔl nɔ de si as sɛnsman dɛn ɛn masta sabi bukman dɛn.

7. Wetin mek Jizɔs bin se di Faresi dɛn ipokrit, ɛn wetin dat bin mek dɛn du?

⁷ Jizɔs nɔ bin fred fɔ kɔndɛm di bigman dɛn pan Gɔd biznɛs we bin de insay in tɛm bikɔs dɛn nɔ bin de tich pipul dɛn fɔ wɔship Jiova di rayt we. Fɔ ɛgzampul, i bin sho se di Faresi dɛn ipokrit bikɔs dɛn bisin mɔ bɔt aw dɛn de was dɛn an pas aw dɛn bisin bɔt dɛn mama ɛn papa dɛn. (Mat. 15:​1-11) I go bi se Jizɔs in disaypul dɛn bin sɔprayz we i tɔk dɛn wɔd dɛn de. Infakt, dɛn bin aks Jizɔs se: “Yu no se wetin yu se mek di Faresi dɛn fil bad?” Jizɔs ansa dɛn se: “Mi Papa we de na ɛvin go rut ɛni plant we i nɔ plant. Una lɛf dɛn. Dɛn blayn, bɔt dɛn want fɔ sho ɔda pipul dɛn di rod. If blaynman de lid in kɔmpin blaynman, dɛn ɔl tu go fɔdɔm insay ol.” (Mat. 15:​12-14) Jizɔs nɔ bin alaw di vɛks we di bigman dɛn pan Gɔd biznɛs bin vɛks pan am fɔ stɔp am fɔ mek i nɔ tɔk di tru.

8. Aw Jizɔs bin sho se nɔto ɔl wetin pipul dɛn biliv bɔt Gɔd na tru?

⁸ Jizɔs bin tɔk bak se sɔm pan di tin dɛn we dɛn bin de tich bɔt Gɔd na lay lay tin dɛn. I nɔ bin se ɔl di tin dɛn we dɛn biliv na tru. Bifo dat, i bin tɔk se bɔku pipul dɛn de pas na di rod we wayd, ɛn we go mek pɔsin ɛnd-ɔp fɔ day. Bɔt di wan dɛn we de pas na di rod we nɔ big we go mek pɔsin ɛnd-ɔp fɔ gɛt layf nɔ bɔku. (Mat. 7:​13, 14) I bin tɔk klia wan se sɔm pipul dɛn go se dɛn de sav Gɔd, bɔt dɛn nɔ rili de sav am. I bin se: “Tek tɛm wit dɛn lay lay prɔfɛt dɛn we de kam to una ɛn mek lɛk se dɛn na ship, bɔt we tan lɛk wulf dɛn we dɔn angri  bad bad wan. Una go no dɛn bay wetin dɛn de du.”—Mat. 7:​15-20.

9. Wetin na sɔm tin dɛn we pipul dɛn bin de tich bɔt Gɔd we Jizɔs bin sho se na lay lay tichin dɛn?

⁹ Wetin di Baybul se? Baybul prɔfɛsi bin dɔn tɔk se di Mɛsaya go rili gɛt zil fɔ Jiova in os. (Sam 69:​9; Jɔn 2:​14-17) Da zil de bin mek Jizɔs nɔ fred fɔ sho di tin dɛn we dɛn biliv bɔt Gɔd ɛn di tin dɛn we dɛn bin de du we na bin lay lay tin dɛn. Fɔ ɛgzampul, di Faresi dɛn bin biliv se di sol nɔ de day, bɔt Jizɔs bin tich se di wan dɛn we dɔn day de slip. (Jɔn 11:​11) Di Sadyusi dɛn nɔ bin biliv se di wan dɛn we dɔn day go gɛt layf bak, bɔt Jizɔs bin gi layf bak to in padi we nem Lazarɔs. (Jɔn 11:​43, 44; Akt 23:​8) Di Faresi dɛn bin de tich se na Gɔd ɔ sɔntin we gɛt pawa we wi nɔ de si de mak ɔl wetin de apin to wi ɔ wetin wi go du, bɔt Jizɔs bin tich se mɔtalman gɛt fridɔm fɔ disayd if i go sav Gɔd ɔ if i nɔ go sav am.—Mat. 11:​28.

10. Wetin mek di tin dɛn we wi de tich de mek bɔku pipul dɛn nɔ lisin to wi?

¹⁰ Wi de si di sem prɔblɛm tide? Yɛs, wi de si am. Bɔku pipul dɛn nɔ de lisin to wi bikɔs wi de yuz di Baybul fɔ sho dɛn se sɔm pan di tin dɛn we dɛn de tich bɔt Gɔd na lay lay tin dɛn. Di bigman dɛn pan Gɔd biznɛs kin tich dɛn mɛmba dɛn se Gɔd de pɔnish di wikɛd wan dɛn na ɛlfaya. Dɛn de yuz da lay lay tichin de fɔ kɔntrol di pipul dɛn. Bikɔs wi de wɔship Jiova, we na di Gɔd we gɛt lɔv, wi de ɛp pipul dɛn fɔ ɔndastand se dis na lay lay tichin. Dɔn bak, di bigman dɛn pan Gɔd biznɛs de tich se di sol nɔ de day. Wi de ɛp pipul dɛn fɔ no se da lay lay tichin de kɔmɔt frɔm di pegan dɛn, bikɔs if da tichin de na tru tichin, dat min se nid nɔ de fɔ lɛ ɛnibɔdi we dɔn day gɛt layf bak. Ɛn pan ɔl we bɔku rilijɔn dɛn de tich se na Gɔd ɔ sɔntin we gɛt pawa we wi nɔ de si de mak ɔl wetin wi de du, wi de tich se mɔtalman gɛt fridɔm, ɛn i lɛf to wi fɔ disayd if wi go sav Gɔd. Wetin di bigman dɛn pan Gɔd biznɛs kin du we wi kin sho se dɛn na lay lay ticha dɛn? Bɔku tɛm, dɛn kin vɛks bad bad wan.

11. Akɔdin to di wɔd dɛn we Jizɔs tɔk na Jɔn 8:​45-47, wetin Gɔd want in pipul dɛn fɔ du?

 ¹¹ Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? If wi lɛk di tru tin dɛn we wi dɔn lan, wi fɔ obe di tin dɛn we Gɔd dɔn tɔk. (Rid Jɔn 8:​45-47.) Wi nɔ go tan lɛk Setan di Dɛbul we nɔ bin kɔntinyu fɔ tinap tranga wan fɔ di trut. Wi nɔ go du ɛnitin we nɔ gri wit wetin wi biliv. (Jɔn 8:​44) Gɔd want in pipul dɛn fɔ “rili et wetin wikɛd” ɛn “rili lɛk wetin gud,” jɔs lɛk aw Jizɔs bin du.—Rom. 12:​9; Ibru. 1:​9.

12. Wetin mek bɔku Ju dɛn nɔ bin lisin to Jizɔs bikɔs dɛn nel am pan tik?

¹² Us ɔda rizin bin mek di Ju dɛn nɔ bin lisin to Jizɔs? Pɔl bin se: “Wi de prich se dɛn nel Krays na di tik, to di Ju dɛn dis tan lɛk ston we de mek dɛn fɔdɔm.” (1 Kɔr. 1:​23) Wetin mek bɔku Ju dɛn nɔ bin lisin to Jizɔs bikɔs dɛn nel am pan tik? To dɛn, bikɔs Jizɔs bin day pan tik, dat dɔn mek i bi kriminal ɛn sina. So dat mek dɛn nɔ biliv se in na di Mɛsaya.—Dit. 21:​22, 23.

13. Wetin di pipul dɛn we nɔ bin de lisin to Jizɔs nɔ bin no?

¹³ Sɔm pan di Ju dɛn we nɔ bin lisin to Jizɔs nɔ bin no se i inosɛnt, dɛn bin lay pan am, ɛn dɛn nɔ bin trit am fia wan. Di wan dɛn we bin de jɔj Jizɔs nɔ bin bisin bɔt fɔ trit am fia wan. Di jɔj dɛn na di Ju ay kɔt bin kam togɛda kwik kwik wan fɔ jɔj Jizɔs, ɛn dɛn nɔ obe di lɔ bɔt aw fɔ jɔj. (Lyuk 22:​54; Jɔn 18:​24) Di jɔj dɛn nɔ bin du tin fia wan we dɛn bin de lisin to di tin dɛn we dɛn se Jizɔs du ɛn we dɛn bin kam wit ɛvidɛns agens am. Dɔn bak, dɛnsɛf sɛf bin de luk fɔ “pipul dɛn we go tɔk lay lay tin bɔt Jizɔs so dat dɛn go kil am.” Bɔt dɛn nɔ bin ebul fɔ du dat, so di ay prist tray fɔ mek Jizɔs tɔk sɔntin we nɔ kɔrɛkt fɔ mek dɛn se i gilti. Di tin we dɛn bin du nɔ bin gri wit wetin di lɔ se. (Mat. 26:​59; Mak 14:​55-64) Afta we Jizɔs gɛt layf bak, di jɔj dɛn we nɔ de du wetin rayt bin pe di Roman sojaman dɛn we bin de gayd di grev “bɔku silva mɔni” fɔ mek dɛn tɔk lay lay stori bɔt wetin mek di grev bin ɛmti.—Mat. 28:​11-15.

14. Wetin di Baybul bin dɔn tɔk bɔt di Mɛsaya?

 ¹⁴ Wetin di Baybul se? Pan ɔl we bɔku pan di Ju dɛn insay Jizɔs in tɛm nɔ bin de tink se di Mɛsaya go nid fɔ day, lɛ wi si wetin wan prɔfɛsi na di Baybul bin se: “I gi insɛf fɔ day fɔ di wɔl . . . , ɛn dɛn bin kɔnt am as wan sina; pan ɔl dat, i tot bɔku pipul sin, ɛn bin pre fɔ di pipul dɛn we de kɔmit sin.” (Ayz. 53:​12) So pan ɔl we dɛn bin tɔk se Jizɔs du sɔntin we rili bad ɛn dɛn kil am, dat nɔto bin gud rizin fɔ mek di Ju dɛn nɔ lisin to am.

15. Us bad tin dɛn we dɛn se Jiova Witnɛs dɛn du we mek sɔm pipul dɛn nɔ de lisin to dɛn?

¹⁵ Wi de si di sem prɔblɛm tide? Yɛs, wi de si di sem tin. Dɛn bin lay pan Jizɔs, ɛn dɛn bin tɔk se i gilti fɔ wetin i nɔ du, ɛn tide sɛf, dɛn de du di sem tin to Jiova Witnɛs dɛn. Lɛ wi si sɔm ɛgzampul dɛn. Insay dɛn 1930 ɛn 1940 na Amɛrika, wi bin gɛt bɔku kɔt kes dɛn fɔ mek dɛn alaw wi fɔ wɔship Gɔd fri wan. Sɔm jɔj dɛn nɔ bin de shem fɔ tek ɔda pipul dɛn bɛtɛ pas wi. Insay Kyubɛk, na Kanada, di Chɔch ɛn di gɔvmɛnt bin de wok togɛda fɔ stɔp wi wok. Dɛn bin put bɔku pɔblisha dɛn na jel jɔs bikɔs dɛn bin de tɔk to dɛn neba dɛn bɔt Gɔd in Kiŋdɔm. Dɛn bin kil bɔku fetful yɔŋ brɔda dɛn na Jamani, we di Nazi gɔvmɛnt bin de rul. Ɛn dɛn biɛn tɛm ya, dɛn dɔn put bɔku pan wi brɔda dɛn na prizin na Rɔshia bikɔs dɛn de tɔk bɔt di Baybul bay we di gɔvmɛnt se dɛn “de agens” dɛn. Dɛn dɔn ivin ban di New World Translation of the Holy Scriptures we de insay di Rɔshian langwej, ɛn dɛn si am as “buk we de agens di gɔvmɛnt” bikɔs dɛn yuz Jiova in nem de.

16. Frɔm wetin de na 1 Jɔn 4:​1, wetin mek wi nɔ fɔ fred di lay lay tin dɛn we pipul dɛn de tɔk bɔt Jiova in pipul dɛn?

¹⁶ Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? Tray fɔ no wetin na di tru. We Jizɔs bin de tich ɔp wan mawntin, i bin wɔn di wan dɛn we bin de lisin to am se sɔm pipul dɛn go “lay . . . bad bad wan” pan dɛn. (Mat. 5:​11) Ɔl dɛn lay dɛn de kɔmɔt frɔm Setan. I de mek di wan dɛn we de agens wi de tɔk bad bad lay bɔt di wan dɛn we lɛk di trut. (Rɛv. 12:​9, 10) So wi nɔ fɔ lisin to di lay dɛn we di wan dɛn we de agens wi de tɔk. Mek wi nɔ ɛva alaw dɛn kayn lay dɛn de fɔ mek wi fred fɔ sav Gɔd ɔ fɔ mek wi nɔ gɛt bɛtɛ fet igen.—Rid 1 Jɔn 4:​1.

17. Aw di tin dɛn we apin bifo Jizɔs day dɔn mek bɔku pipul dɛn nɔ lisin to am?

¹⁷ Jɔs bifo Jizɔs day, wan pan in 12 apɔsul dɛn bin ɛp pipul dɛn fɔ arɛst am. Pantap dat, wan pan in ɔda apɔsul dɛn bin dinay am tri tɛm, ɛn ɔl in apɔsul dɛn bin lɛf am di ivintɛm bifo i day. (Mat. 26:​14-16, 47, 56, 75) Jizɔs nɔ bin sɔprayz. I bin dɔn ivin tɔk se dis go apin. (Jɔn 6:​64; 13:​21, 26, 38; 16:​32) We dɛn tin dɛn de apin, sɔm pipul dɛn go dɔn disayd se dɛn nɔ go want fɔ bi in disaypul. Dɛn go dɔn tink se, ‘If na so Jizɔs in apɔsul dɛn du, a nɔ go want fɔ bi wan pan in disaypul dɛn.’

18. Us prɔfɛsi dɛn we apin we bin dɔn tɔk bɔt di tin dɛn we go bi jɔs bifo Jizɔs day?

¹⁸ Wetin di Baybul se? Lɔng lɔng tɛm bifo Jizɔs kam na di wɔl, Jiova bin dɔn tɔk na in Wɔd se dɛn go ɛp pipul dɛn fɔ arɛst di Mɛsaya fɔ 30 silva mɔni. (Zɛk. 11:​12, 13) Di wan we go ɛp pipul dɛn fɔ arɛst Jizɔs na wan pan in tayt padi dɛn. (Sam 41:​9) Prɔfɛt Zɛkaraya bin rayt bak se: “We dɛn ambɔg di lida . . . , di pipul dɛn go rɔnawe go ɔlɔbɔt.” (Zɛk. 13:​7) We dɛn tin dɛn ya apin, di wan dɛn we lɛk Jiova nɔ go stɔp fɔ  lisin to Jizɔs. Bifo dat, dɛn go gɛt mɔ fet as dɛn de si se di prɔfɛsi dɛn we dɛn bin dɔn tɔk bɔt Jizɔs de apin.

19. Wetin di wan dɛn we rili lɛk Jiova no?

¹⁹ Wi de si di sem prɔblɛm tide? Yɛs, wi de si am. Insay wi yon tɛm, sɔm Jiova Witnɛs dɛn we bɔku pan wi sabi dɔn lɛf di trut, dɛn dɔn jɔyn lay lay Kristian dɛn, ɛn dɛn de tray fɔ mek ɔda pipul dɛnsɛf lɛf di trut. Dɛn de tɔk bad tin bɔt wi, tin dɛn we nɔto ɔltin tru, ɛn dɛn de lay bɔt Jiova Witnɛs dɛn na redio, nyuzpepa, tɛlivishɔn program dɛn, ɛn na di Intanɛt. Bɔt di wan dɛn we rili lɛk Jiova nɔ de lisin to dɛn. Bifo dat, dɛn no se di Baybul bin dɔn tɔk se dɛn tin dɛn ya go apin.—Mat. 24:​24; 2 Pit. 2:​18-22.

20. Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan, ɛn nɔ lisin to di wan dɛn we dɔn lɛf di trut? (2 Timoti 4:​4, 5)

²⁰ Wetin go ɛp wi fɔ lɛ wi nɔ stɔp fɔ biliv di tru tin dɛn we wi dɔn lan? Wi fɔ kɔntinyu fɔ gɛt strɔng fet bay we wi de stɔdi ɛn pre ɔltɛm, ɛn we wi de kɔntinyu fɔ du di wok we Jiova dɔn gi wi fɔ du. (Rid 2 Timoti 4:​4, 5.) If wi gɛt fet, wi nɔ go wɔri we wi yɛri pipul dɛn de tɔk bad tin bɔt Jiova Witnɛs dɛn. (Ayz. 28:​16) Di lɛk we wi lɛk Jiova, in Wɔd di Baybul, ɛn wi brɔda ɛn sista dɛn go ɛp wi fɔ kɔntinyu fɔ biliv di tru tin dɛn we wi dɔn lan ɛn nɔ lisin to di wan dɛn we dɔn lɛf di trut.

21. Pan ɔl we bɔku pipul dɛn nɔ de lisin to wi mɛsej, wetin wi shɔ bɔt?

²¹ Insay Jizɔs in tɛm, bɔku pipul dɛn nɔ bin de lisin to am, ɛn dɛn tɔn dɛn bak pan am. Bɔt stil, bɔku ɔda pipul dɛn bin lisin to am. Sɔm pan di pipul dɛn we bin lisin to Jizɔs na wan pan di mɛmba dɛn na di Ju ay kɔt ɛn ivin “bɔku bɔku prist dɛn.” (Akt 6:​7; Mat. 27:​57-60; Mak 15:​43) Semweso tide, bɔku pipul dɛn dɔn disayd fɔ lisin to Jizɔs. Wetin mek? Na bikɔs dɛn dɔn no ɛn lɛk di tru tin dɛn we dɛn fɛn na di Baybul. Gɔd in Wɔd se: “Di wan dɛn we lɛk yu lɔ rili gɛt pis; natin nɔ go mek dɛn fɔdɔm.”—Sam 119:​165, NWT.