1-2. Wetin mek sɔm skripchɔ dɛn kin impɔtant to wi mɔ we sɔntin chenj na wi layf?

 WE MAN ɛn uman de mared, bɔku tɛm dɛn kin lisin to tɔk we kɔmɔt na di Baybul bɔt mared. Nɔto nyu skripchɔ dɛn dɛn kin tɔk bɔt insay da tɔk de. Bɔt naw dɛn skripchɔ dɛn de go impɔtant to dɛn mɔ. Wetin mek? Na bikɔs dɛn go gɛt fɔ aplay dɛn as maredman ɛn mareduman.

² Na di sem tin we maredman ɛn in wɛf gɛt pikin. As tɛm de go, dɛn go dɔn de lisin to bɔku tɔk dɛn bɔt aw fɔ mɛn pikin dɛn. Bɔt naw di advays na dɛn tɔk dɛn de go impɔtant to dɛn mɔ. Dɛn go gɛt dɛn yon pikin we dɛn go mɛn. Dat na big big wok. So we tin kin chenj na wi layf, sɔm patikyula skripchɔ dɛn kin impɔtant to wi mɔ. Dis na wan rizin we mek Jiova in savant dɛn de rid di Baybul ɛn tink bɔt am “ɛvride” jɔs lɛk aw dɛn bin tɛl di Izrɛlayt kiŋ dɛn fɔ du.—Dit. 17:​19.

3. Wetin wi go tɔk bɔt insay dis atikul?

³ Mama ɛn papa dɛn, una gɛt wan pan di big big ɔnɔ dɛn we Kristian gɛt, we na fɔ tich una pikin dɛn bɔt Jiova. Bɔt una nɔ jɔs want fɔ tich dɛn di tru tin bɔt wi Gɔd. Una want fɔ ɛp una pikin dɛn fɔ rili lɛk am. Wetin una go du fɔ tich una pikin dɛn fɔ lɛk Jiova? Insay dis atikul, wi go tɔk bɔt 4 Baybul prinsipul dɛn we go ɛp una as mama ɛn papa dɛn. (2 Tim. 3:​16) Wi go tɔk bak bɔt aw sɔm Kristian mama ɛn papa dɛn dɔn bɛnifit we dɛn de fala di Baybul in advays.

4. Wetin na wan prinsipul we go ɛp mama ɛn papa dɛn fɔ ɛp dɛn pikin dɛn fɔ lɛk Jiova? (Jems 1:​5)

⁴ Di fɔs prinsipul: Luk to Jiova fɔ gayd yu. Beg Jiova fɔ mek i gi yu di sɛns we yu nid fɔ ɛp yu pikin dɛn fɔ lɛk am. (Rid Jems 1:​5.) In na di bɛst Pɔsin we go gi yu advays. Bɔku rizin dɛn de we sho dat. Lɛ wi tɔk bɔt tu. Fɔs, we i kam to kombra biznɛs, Jiova gɛt ɛkspiriɛns pas ɔl mama ɛn papa dɛn. (Sam 36:​9) Ɛn sɛkɔn, di fayn advays we i de gi de bɛnifit wi ɔltɛm.—Ayz. 48:​17.

5. (a) Wetin Jiova in ɔganayzeshɔn de gi fɔ ɛp mama ɛn papa dɛn? (b) Akɔdin to wetin de na di vidio, wetin yu lan frɔm di we Brɔda ɛn Sista Amorim mɛn dɛn pikin dɛn?

⁵ Jiova de yuz in Wɔd ɛn in ɔganayzeshɔn fɔ gi mama ɛn papa dɛn bɔku infɔmeshɔn dɛn frɔm di Baybul we go ɛp dɛn fɔ mɛn dɛn pikin dɛn fɔ lɛk Jiova. (Mat. 24:​45) Fɔ ɛgzampul, yu go ebul fɛn fayn advays dɛn insay di atikul siriz we gɛt di taytul “Help for the Family,” we dɛn bin dɔn de print fɔ lɔng tɛm na di Awake! magazin ɛn naw i de na wi wɛbsayt. Dɔn bak, bɔku vidio dɛn de na jw.org we go ɛp mama ɛn papa dɛn fɔ fala Jiova in advays we dɛn de mɛn dɛn pikin dɛn. *—Prɔv. 2:​4-6.

6. Aw wan papa de fil bɔt di gayd we Jiova in ɔganayzeshɔn de gayd in ɛn in wɛf?

⁶ Bɔku mama ɛn papa dɛn dɔn tɔk se dɛn rili gladi fɔ di ɛp we Jiova de yuz in ɔganayzeshɔn fɔ ɛp dɛn. Wan papa we nem Jo tɔk se: “I nɔ izi fɔ mɛn tri pikin dɛn insay di trut. Mi ɛn mi wɛf de pre to Jiova ɔltɛm fɔ ɛp wi. Ɛn bɔku tɛm, wi de si se wan atikul ɔ vidio kin kam jɔs di tɛm we wi nid am fɔ ɛp wi fɔ dil wit di prɔblɛm we wi gɛt. Wi kin abop pan Jiova in advays ɔltɛm.” Jo ɛn in wɛf dɔn kam fɔ si se dɛn atikul ɛn vidio dɛn ya de ɛp dɛn pikin dɛn fɔ kam nia Jiova.

7. Wetin mek i impɔtant fɔ mek mama ɛn papa dɛn du dɛn bɛst fɔ sɛt fayn ɛgzampul fɔ dɛn pikin dɛn? (Romans 2:​21)

⁷ Di sɛkɔn prinsipul: Tich bay yu ɛgzampul. Pikin dɛn de tek tɛm wach dɛn  mama ɛn papa dɛn ɛn bɔku tɛm dɛn de falamakata dɛn. Na tru se no mama ɔ papa nɔ de we pafɛkt. (Rom. 3:​23) Bɔt stil, mama ɛn papa dɛn fɔ du dɛn bɛst fɔ sɛt fayn ɛgzampul fɔ dɛn pikin dɛn. (Rid Romans 2:​21.) Na dis wan papa se bɔt pikin dɛn. I se: “Dɛn tan lɛk spɔnj we de sɔk ɔltin.” I kɔntinyu fɔ tɔk se: “Dɛn go tɛl wi we wi nɔ de du di tin dɛn we wi de tich dɛn fɔ du.” So if wi want wi pikin dɛn fɔ lɛk Jiova, dɛn fɔ si klia wan se wisɛf sɛf rili lɛk Jiova.

8-9. Wetin yu lan frɔm di tin dɛn we Andru ɛn Ɛma tɔk?

⁸ Bɔku we dɛn de we mama ɛn papa dɛn go tich dɛn pikin dɛn fɔ lɛk Jiova. Notis wetin wan 17 ia ol brɔda we nem Andru bin tɔk. I se: “Mi mama ɛn papa dɛn kin tich mi ɔltɛm se i rili impɔtant fɔ pre. Ɛni nɛt, Papa kin pre wit mi, ivin if a dɔn ɔlrɛdi pre. Mi mama ɛn papa dɛn kin mɛmba wi ɔltɛm se: ‘Yu kin tɔk to Jiova bɔku bɔku tɛm.’ Bikɔs ɔf dat, prea dɔn bi sɔntin we rili impɔtant to mi. Naw i izi fɔ mi fɔ pre ɛn fɔ si Jiova as Papa we lɛk mi.” Mama ɛn papa dɛn, una mɛmba ɔltɛm se di lɛk we una lɛk Jiova go ɛp una pikin dɛn fɔ lɛk am bak.

⁹ Lɛ wi tɔk bak bɔt Ɛma in ɛgzampul. We in papa bin lɛf di famili, i bin lɛf in mama wit bɔku dɛt. Ɛma se: “Bɔku tɛm dɛn bin de we mama nɔ bin gɛt bɛtɛ mɔni, bɔt i bin de tɔk ɔltɛm bɔt aw Jiova de kia fɔ in savant dɛn. Di we aw i bin de liv in layf bin sho se i rili biliv dat. Mama bin de du wetin i bin de tich mi. Wetin na di lɛsin? Mama ɛn papa dɛn go ebul tich dɛn pikin dɛn bay dɛn ɛgzampul ilɛk tin nɔ izi fɔ dɛn.—Gal. 6:​9.

10. Us chans bɔku Izrɛlayt mama ɛn papa dɛn bin gɛt fɔ tɔk wit dɛn pikin dɛn? (Ditarɔnɔmi 6:​6, 7)

¹⁰ Di tɔd prinsipul: Tɔk wit yu pikin dɛn ɔltɛm. Jiova bin tɛl di Izrɛlayt dɛn we bin de trade fɔ tich dɛn pikin dɛn bɔt am ɔltɛm. (Rid Ditarɔnɔmi 6:​6, 7.) Dɛn mama ɛn papa dɛn de bin gɛt bɔku chans insay di de fɔ tɔk wit dɛn pikin dɛn ɛn fɔ tich dɛn fɔ lɛk Jiova wit ɔl dɛn at. Fɔ ɛgzampul, sɔntɛm wan yɔŋ Izrɛlayt bɔbɔ go spɛn bɔku tɛm fɔ ɛp in papa fɔ plant tin fɔ it ɔ fɔ gɛda di tin dɛn we dɛn dɔn avɛst. Sɔntɛm in sista go spɛn bɔku tɛm fɔ ɛp in mama fɔ so ɛn fɔ du ɔda os wok dɛn. We di mama ɛn papa de wok togɛda wit dɛn pikin dɛn, dɛn kin yuz da tɛm de fɔ tɔk bɔt bɔku impɔtant tɔpik dɛn. Fɔ ɛgzampul, dɛn kin tɔk bɔt aw Jiova gud ɛn aw i de ɛp di famili.

11. Us chans Kristian mama ɛn papa dɛn gɛt fɔ tɔk wit dɛn pikin dɛn?

¹¹ Tide, layf difrɛn frɔm aw i bin de trade. Insay bɔku kɔntri dɛn, mama ɛn papa dɛn ɛn dɛn pikin dɛn nɔ kin spɛn bɔku tɛm togɛda insay di de. Di mama ɛn papa dɛn kin go wok ɛn di pikin dɛn kin go skul. Bikɔs ɔf dis, mama ɛn papa dɛn nid fɔ fɛn tɛm fɔ tɔk wit dɛn pikin dɛn. (Ɛfi. 5:​15, 16; Fil. 1:​10) Famili wɔship tɛm na wan pan di bɛst tɛm dɛn fɔ du dat. Wan yɔŋ brɔda we nem Alɛgzandra tɔk se: “Mi papa kin mek arenjmɛnt ɔltɛm fɔ famili wɔship, ɛn i nɔ de alaw natin fɔ stɔp wi fɔ mek wi nɔ spɛn tɛm togɛda. Afta di stɔdi, wi kin jɔs tɔk bɔt ɛnitin.”

12. Wetin di wan we de oba in famili fɔ mɛmba we dɛn de du famili wɔship?

¹² If na yu de oba yu famili, wetin yu go du fɔ mek yu pikin dɛn ɛnjɔy di famili  wɔship? Yu nɔ tink se i go fayn fɔ stɔdi di nyu buk we nem, Ɛnjɔy Layf Sote Go! wit yu pikin dɛn? Da buk de rili fayn. Da stɔdi de go mek am izi fɔ mek yu tɔk fayn wit yu pikin dɛn. Yu want yu pikin dɛn fɔ tɛl yu aw dɛn de fil ɛn wetin de mek dɛn wɔri, so nɔ yuz di famili wɔship tɛm fɔ tɔk pan dɛn ɔ fɔ kɔrɛkt dɛn. Ɛn tray nɔ fɔ vɛks if yu pikin dɛn tɔk sɔntin we nɔ gri wit wetin di Baybul se. Bifo dat, gladi bikɔs dɛn tɛl yu di tru bɔt aw dɛn de fil ɛn ɛnkɔrej dɛn fɔ mek dɛn kɔntinyu fɔ du dat. Di bɛst we fɔ ɛp yu pikin dɛn na we yu no aw dɛn de rili fil.

13. Us ɔda chans dɛn mama ɛn papa dɛn gɛt fɔ ɛp dɛn pikin dɛn fɔ kam nia Jiova?

¹³ Mama ɛn papa dɛn, una luk fɔ we dɛn insay di de fɔ ɛp una pikin dɛn fɔ kam nia Jiova. Una nɔ nid fɔ wet fɔ tɛm we una kin stɔdi di Baybul bifo una tich una pikin dɛn bɔt wi Gɔd we lɛk wi. Notis wetin wan mama we nem Lisa tɔk. I se: “Wi bin ɛp wi pikin dɛn fɔ lan bɔt Jiova frɔm di tin dɛn we i mek. Fɔ ɛgzampul, we wi dɔg bin de du fɔni tin we bin de mek wi pikin dɛn laf, wi bin de tɛl dɛn se dis sho se Jiova na Gɔd we gladi ɛn i dɔn mek am pɔsibul fɔ lɛ wisɛf gladi ɛn ɛnjɔy fɔni tin dɛn.

14. Wetin mek i impɔtant fɔ mama ɛn papa dɛn fɔ ɛp dɛn pikin dɛn fɔ tek tɛm pik dɛn padi dɛn? (Prɔvabs 13:​20)

¹⁴ Di nɔmba 4 prinsipul: Ɛp yu pikin dɛn fɔ gɛt gud padi dɛn. Gɔd in Wɔd mek wi no klia wan se wi padi dɛn kin mek wi du gud ɔ bad tin. (Rid Prɔvabs 13:​20.) Mama ɛn papa dɛn, una no una pikin dɛn padi dɛn? Una dɔn mit dɛn ɛn spɛn tɛm wit dɛn? Wetin yu go du fɔ ɛp yu pikin dɛn fɔ mek padi wit pipul dɛn we lɛk Jiova? (1 Kɔr. 15:​33) Yu kin ɛp yu pikin dɛn fɔ gɛt gud padi dɛn bay we yu de invayt pipul dɛn we gɛt tayt padi biznɛs wit Jiova fɔ du tin dɛn wit yu ɛn yu pikin dɛn.—Sam 119:​63.

15. Wetin mama ɛn papa dɛn go du fɔ ɛp dɛn pikin dɛn fɔ gɛt gud padi dɛn?

¹⁵ Tink bɔt wan papa we nem Toni in ɛkspiriɛns. I ɛksplen wetin in ɛn in wɛf  dɔn du fɔ ɛp dɛn pikin dɛn fɔ gɛt gud padi dɛn. I se: “Insay di ia dɛn we dɔn pas, mi ɛn mi wɛf dɔn de invayt bɔku difrɛn brɔda ɛn sista dɛn we yɔŋ ɛn ol fɔ kam na wi os. Dɛn kin it wit wi ɛn jɔyn wi fɔ du famili wɔship. Dis na fayn we fɔ sabi di wan dɛn we lɛk Jiova ɛn we de sav am wit gladi-at. Wi kin gladi bak fɔ mek sakit ovasia dɛn, mishɔnari dɛn, ɛn ɔda brɔda ɛn sista dɛn kam de wit wi na os. Wi pikin dɛn kin lan bɔku tin frɔm di ɛkspiriɛns dɛn we dɛn kin tɛl wi, di zil we dɛn gɛt, ɛn di tranga wok we dɛn de du na Jiova in savis. Ɔl dis bin ɛp wi pikin dɛn fɔ kam nia Jiova.” Mama ɛn papa dɛn, una mekɔp una maynd fɔ ɛp una pikin dɛn fɔ gɛt gud padi dɛn.

16. Wetin mama ɛn papa dɛn go du if dɛn pikin se i nɔ want fɔ sav Jiova?

¹⁶ Wetin yu go du if wan pan yu pikin dɛn se i nɔ want fɔ sav Jiova pan ɔl we yu dɔn wok tranga wan fɔ ɛp am? Nɔ ɛva fil se yu nɔ du yu wok as mama ɔ papa. Jiova dɔn gi ɔlman wan gift, ivin yu pikin, we na di fridɔm fɔ disayd if wi go sav am ɔ wi nɔ go sav am. If yu pikin dɔn disayd fɔ lɛf Jiova, nɔ stɔp fɔ abop se wande i go kam bak to Am. Mɛmba di stori bɔt di bɔbɔ we bin lɔs. (Lyuk 15:​11-19, 22-24) Da yɔŋman de bin du bɔku bad tin dɛn, bɔt leta, i bin kam bak. Sɔntɛm sɔm pipul dɛn go want fɔ se, “Bɔt dat na jɔs stori. Fɔ se mi yon pikin go ebul fɔ kam bak to Jiova?” Yɛs, i go ebul fɔ kam bak! Infakt, na dat wan yɔŋman we nem Ili bin du.

17. Aw Ili in ɛkspiriɛns ɛnkɔrej yu?

¹⁷ We Ili bin de tɔk bɔt in mama ɛn papa, i bin se: “Dɛn bin du dɛn bɛst fɔ ɛp mi fɔ lɛk Jiova ɛn in Wɔd di Baybul. Bɔt we a bin de arawnd 15 ia, a bigin mek trangayes.” Ili bin stat fɔ du bad tin dɛn na kɔna, ɛn pan ɔl we in mama ɛn papa tray fɔ ɛp am fɔ kɔntinyu fɔ de nia Jiova, i nɔ lisin to dɛn. Afta i lɛf os, i bin de du bad tin dɛn. Bɔt stil, tɛm dɛn bin de  we i bin de tɔk bɔt di Baybul wit wan pan in padi dɛn. Ili se: “Di mɔ we a bin de tɛl mi padi bɔt Jiova, na di mɔ a bin de tink bɔt Jiova. So pan ɔl we a bin dɔn tɔn mi bak pan di tru tin dɛn we mi mama ɛn papa bin de tich mi bɔt di Baybul, smɔl smɔl, a bigin fɔ tink bɔt dɛn bak ɛn a kam fɔ lɛk di tru we a bin dɔn lan.” Leta, Ili bin kam bak na di trut. * Imajin aw in mama ɛn papa bin gladi fɔ we dɛn bin tray fɔ tich Ili fɔ lɛk Jiova frɔm we i bin smɔl!—2 Tim. 3:​14, 15.

18. Aw yu de fil bɔt mama ɛn papa dɛn we de wok tranga wan fɔ tich dɛn pikin dɛn fɔ lɛk Jiova?

¹⁸ Mama ɛn papa dɛn, una gɛt wɔndaful gift, we na fɔ mɛn di nyu jɛnareshɔn we gɛt fɔ kam wɔship Jiova. (Sam 78:​4-6) Dat nɔto izi wok, ɛn wi de tɛl una tɛnki wit ɔl wi at fɔ we una de wok tranga wan fɔ ɛp una pikin dɛn! If una kɔntinyu fɔ du una bɛst fɔ ɛp una pikin dɛn fɔ lɛk Jiova, ɛn kɔntinyu fɔ de kɔrɛkt ɛn tren dɛn lɛk aw Jiova se, wan dawt nɔ de se una go mek wi Papa we de na ɛvin we lɛk wi, gladi.—Ɛfi. 6:​4.