1. Wetin mek wi ɔl nid fɔ gɛt di sɛns we Gɔd de gi? (Prɔvabs 4:​7)

 IF YU dɔn ɛva gɛt impɔtant tin fɔ disayd, wan dawt nɔ de se yu bin pre fɔ sɛns bikɔs yu bin no se yu nid am. (Jems 1:​5) Kiŋ Sɔlɔmɔn bin rayt se: “Fɔ gɛt sɛns pas ɛni ɔda tin na [di] wɔl.” (Rid Prɔvabs 4:​7.) As wi no, Sɔlɔmɔn nɔ bin jɔs de tɔk bɔt ɛnikayn sɛns. I bin de tɔk bɔt di sɛns we Jiova Gɔd de gi. (Prɔv. 2:​6) Bɔt fɔ se di sɛns we Gɔd de gi go ɛp wi fɔ dil wit di kayn prɔblɛm dɛn we de mit wi tide? Yɛs, i go ɛp wi, as wi go si insay dis atikul.

2. Wetin na wan we aw wi go gɛt tru tru sɛns?

² Wan we aw wi go ebul fɔ gɛt tru tru sɛns na bay we wi de stɔdi ɛn du di tin dɛn we tu man dɛn we bin rili gɛt sɛns bin tich. Fɔs, wi go tɔk bɔt Sɔlɔmɔn. Di Baybul se “PAPA GƆD gi Sɔlɔmɔn sɛns we nɔbɔdi nɔ wande gɛt.” (1 Kiŋ 4:​29) Sɛkɔn, wi go tɔk bɔt Jizɔs we bin gɛt sɛns pas ɔlman we dɔn ɛva liv. (Mat. 12:​42) Di Baybul prɔfɛsay bɔt Jizɔs se: “PAPA GƆD [“Jiova,” NWT] in Spirit go sidɔm pan am, di spirit fɔ sɛns ɛn fɔ ɔndastand.”—Ayz. 11:​2.

3. Wetin wi go tɔk bɔt insay dis atikul?

³ Gɔd bin gi Sɔlɔmɔn ɛn Jizɔs bɔku sɛns, so dɛn bin ebul fɔ gi fayn advays bɔt tin dɛn we impɔtant to wi ɔl.  Insay dis atikul, wi go tɔk bɔt tri pan dɛn: Wetin mek wi nid fɔ tink di rayt we bɔt mɔni, wok, ɛn wisɛf?

4. We i kam pan mɔni ɛn prɔpati, aw Sɔlɔmɔn bin difrɛn frɔm Jizɔs?

⁴ Sɔlɔmɔn bin gɛt bɔku jɛntri, ɛn i bin de na fayn os we gɛt ɔltin. (1 Kiŋ 10:​7, 14, 15) Bɔt Jizɔs nɔ bin gɛt bɛtɛ prɔpati, ɛn i nɔ bin ivin gɛt os fɔ insɛf. (Mat. 8:​20) Bɔt dɛn tu man dɛn ya bin de tink di rayt we bɔt prɔpati bikɔs na Jiova Gɔd bin gi dɛn ɔl tu sɛns.

5. Aw Sɔlɔmɔn bin de tink di rayt we bɔt mɔni?

⁵ Sɔlɔmɔn bin gri se mɔni de ‘protɛkt’ pɔsin. (Ɛkli. 7:​12) We wi gɛt mɔni, wi go ebul fɔ gɛt di tin dɛn we wi nid na layf ɛn sɔm tin dɛn we wi want. Bɔt Sɔlɔmɔn we bin rili jɛntri bin no se tin dɛn de we impɔtant pas mɔni. Fɔ ɛgzampul, i bin rayt se: “Gud nem bɛtɛ pas jɛntri.” (Prɔv. 22:​1) Sɔlɔmɔn bin notis bak se pipul dɛn we lɛk mɔni nɔ go gɛt tru tru gladi-at bikɔs ɔf wetin dɛn gɛt. (Ɛkli. 5:​10, 12) Ɛn i bin wɔn wi fɔ mek wi nɔ put ɔl wi abop pan mɔni, bikɔs i nɔ mata ɔmɔs mɔni wi gɛt, i pɔsibul fɔ mek wi lɔs am kwik kwik wan.—Prɔv. 23:​4, 5.

6. Aw Jizɔs bin de tink di rayt we bɔt prɔpati? (Matyu 6:​31-33)

⁶ Jizɔs bin de tink di rayt we bɔt prɔpati. I bin de ɛnjɔy fɔ it ɛn fɔ drink. (Lyuk 19:​2, 6, 7) Wantɛm, i mek wayn we bin fayn pas ɔl di ɔda wayn dɛn, ɛn dat na bin in fɔs mirekul. (Jɔn 2:​10, 11) Ɛn di de we i day, i bin wɛr dia dia klos. (Jɔn 19:​23, 24) Bɔt Jizɔs nɔ bin alaw prɔpati fɔ bi di tin we impɔtant pas ɔl ɔda tin na in layf. I bin tɛl in disaypul dɛn se: “Nɔbɔdi nɔ go bi slev to tu masta . . . Una nɔ go ebul bi slev fɔ Gɔd ɛn fɔ Jɛntri.” (Mat. 6:​24) Jizɔs bin tich wi se if wi put di Kiŋdɔm fɔs, Jiova go mek shɔ se i gi wi ɔl wetin wi nid.—Rid Matyu 6:​31-33.

7. Aw wan brɔda bin bɛnifit we i de si mɔni di rayt we?

 ⁷ Bɔku pan wi brɔda ɛn sista dɛn dɔn bɛnifit bikɔs dɛn fala Jiova in fayn advays bɔt mɔni. Tink bɔt wan brɔda we nɔ mared we nem Daniɛl in ɛgzampul. I se: “We a bin yɔŋ, a bin disayd se di tin we go impɔtant pas ɔl na mi layf na fɔ sav Jiova.” Bikɔs Daniɛl de liv simpul layf, i dɔn ebul fɔ du bɔku difrɛn tin dɛn fɔ Jiova. I tɔk bak se: “A nɔ ɛva rigrɛt di tin we a disayd fɔ du wit mi layf. Fɔ tru, a bin fɔ dɔn gɛt bɔku mɔni, if na dat a bin put fɔs na mi layf. Bɔt a nɔ fɔ dɔn gɛt di fayn fayn padi dɛn we a gɛt rayt naw. Dɔn bak, if a bin fɔ dɔn put mɔni fɔs na mi layf, a nɔ bin fɔ gladi lɛk aw a gladi naw we a de put di Kiŋdɔm fɔs. No mɔni nɔ de we go bɔku rich di blɛsin dɛn we Jiova dɔn gi mi.” Wi dɔn si klia wan se wi de bɛnifit mɔ we wi pe atɛnshɔn pan wi savis to Jiova, ɛn nɔ pe atɛnshɔn pan mɔni.

8. Aw wi no se Sɔlɔmɔn bin de tink di rayt we bɔt wok? (Ɛkliziastis 5:​18, 19)

⁸ Sɔlɔmɔn bin kɔl di ɛnjɔymɛnt we wi kin gɛt frɔm di tranga wok we wi de du as “gift frɔm Gɔd.” (Rid Ɛkliziastis 5:​18, 19, NWT.) I bin rayt se: “Pɔsin we de wok tranga wan go bɛnifit.” (Prɔv. 14:​23, NWT) Sɔlɔmɔn bin no se dɛn wɔd dɛn ya na tru. In na man we bin de wok tranga wan. I bin bil os dɛn, plant vayn gadin dɛn, ɛn mek gadin ɛn pul dɛn. Dɔn bak, i bil siti dɛn. (1 Kiŋ 9:​19; Ɛkli. 2:​4-6) Dat na bin tranga wok, ɛn wan dawt nɔ de se dat bin de mek i gladi. Bɔt Sɔlɔmɔn bin no se fɔ mek i gɛt tru tru gladi-at, i nid fɔ du pas dat. I bin du bɔku tin dɛn bak fɔ Jiova. Fɔ ɛgzampul, i bin de bifo we dɛn bin de bil wan fayn tɛmpul usay dɛn go wɔship Jiova; na sɛvin ia dɛn bin tek fɔ bil am. (1 Kiŋ 6:​38; 9:​1) Afta Sɔlɔmɔn bin du bɔku difrɛn tin dɛn, i kam fɔ si se di tin we impɔtant pas ɔl na we pɔsin de sav Jiova. I bin rayt se: “Tɔk am go, tɔk am kam, una dɔn yɛri ɔltin. Fred PAPA GƆD ɛn du wetin i se fɔ du.”—Ɛkli. 12:​13.

9. Aw Jizɔs bin mek shɔ se in wok nɔ bin impɔtant to am pasmak?

⁹ Jizɔs na man we bin de wok tranga wan. We i bin yɔŋ, i bin de wok as kapɛnta. (Mak 6:​3) Wan dawt nɔ de se in mama ɛn papa bin rili gladi fɔ we i de ɛp dɛn we dɛn de wok tranga wan fɔ gi dɛn big famili wetin dɛn nid. Ɛn bikɔs Jizɔs bin pafɛkt, i bin sabi du in wok pafɛkt wan, so i go bi se bɔku pipul dɛn bin want di tin dɛn we i bin de mek. Jizɔs go dɔn ɛnjɔy di wok we i bin de du. Bɔt pan ɔl we in na bin gud wokman, i bin de mek shɔ se i gɛt tɛm fɔ sav Jiova. (Jɔn 7:​15) Leta, we i stat fɔ yuz ɔl in tɛm fɔ prich, i bin advays di wan dɛn we de lisin to am se: “Una nɔ wok fɔ it we de pwɛl, bɔt una wok fɔ it we nɔ de pwɛl ɛn we go gi layf we go de sote go.” (Jɔn 6:​27) Ɛn we Jizɔs bin de tich ɔp wan mawntin, i bin tɔk se: “Una kip una jɛntri na ɛvin.”—Mat. 6:​20.

10. Wetin kin bi prɔblɛm if wi na gud wokman?

¹⁰ We wi fala Jiova in fayn advays, wi go ebul fɔ tink di rayt we bɔt wok. As Kristian dɛn, wi de lan fɔ “wok tranga wan” ɛn fɔ du “gud wok.” (Ɛfi. 4:​28) Bɔku tɛm, di wan dɛn we wi kin wok fɔ kin si se wi ɔnɛs ɛn wi de wok tranga wan, ɛn dɛn kin tɛl wi se dɛn rili valyu di  we aw wi de wok. Sɔntɛm dis go mek wi bigin wok fɔ lɔng tɛm bikɔs wi want wi bɔsman fɔ tink gud tin bɔt Jiova Witnɛs dɛn. Bɔt if wi du dat, sɔntɛm wi nɔ go gɛt bɛtɛ tɛm fɔ wi famili ɔ fɔ du tin dɛn fɔ Jiova. Wi nid fɔ chenj so dat wi go gɛt mɔ tɛm fɔ du di tin dɛn we impɔtant pas ɔl.

11. Wetin wan brɔda bin lan bɔt aw fɔ tink di rayt we bɔt wok?

¹¹ Wan yɔŋ brɔda we nem Wiliam dɔn lan frɔm wan ɛlda we i bin de wok fɔ. I lan se i rili impɔtant fɔ tink di rayt we bɔt wok. Wiliam tɔk se: “[Dis brɔda] na fayn ɛgzampul bɔt pɔsin we de tink di rayt we bɔt wok. I kin wok tranga wan, ɛn i gɛt gud padi biznɛs wit in kɔstɔma dɛn bikɔs i de du in wok fayn. Bɔt we di tɛm fɔ wok dɔn, i kin stɔp fɔ wok ɛn yuz in tɛm ɛn trɛnk fɔ in famili ɛn fɔ Jiova. Ɛn yu no wetin? In na wan pan di pipul dɛn we a no we rili gladi.” *

12. Aw Sɔlɔmɔn bin sho se i de tink di rayt we bɔt insɛf? Aw i stɔp fɔ du dat?

¹² Di tɛm we Sɔlɔmɔn bin de wɔship Jiova fetful wan, i bin de tink di rayt we bɔt insɛf. We i bin yɔŋ, i bin gri se nɔto ɔltin i ebul fɔ du, ɛn i bin aks Jiova fɔ ɛp am. (1 Kiŋ 3:​7-9) We Sɔlɔmɔn bin jɔs stat fɔ rul, i bin no bak bɔt di denja we de fɔ mek prawd. I bin rayt se: “If yu de kak, yu go kapsay, wans yu gɛt mek mek, dɛn go brok yu fɛda dɔŋ.” (Prɔv. 16:​18) I sɔri fɔ no se Sɔlɔmɔn nɔ bin fala in yon advays. Afta sɔm tɛm we i dɔn rul as kiŋ, i bigin fɔ mek prawd ɛn i nɔ obe Gɔd in lɔ dɛn. Fɔ ɛgzampul, wan pan di lɔ dɛn bin tɔk se di Ibru kiŋ nɔ fɔ “gɛt plɛnti wɛf, bikɔs dat go mek in at kɔmɔt pan PAPA GƆD.” (Dit. 17:​17) Sɔlɔmɔn nɔ bin fala dis lɔ, ɛn i bin gɛt 700 wɛf dɛn ɛn 300 galfrɛn dɛn; bɔku pan dɛn bin de wɔship lay lay gɔd dɛn. (1 Kiŋ 11:​1-3) Sɔntɛm Sɔlɔmɔn bin de fil se dis nɔ go bi prɔblɛm  fɔ am. Bɔt wi no se Sɔlɔmɔn bin leta sɔfa bikɔs i nɔ bin obe Jiova.—1 Kiŋ 11:​9-13.

13. Wetin wi lan we wi tink bɔt aw Jizɔs bin ɔmbul?

¹³ Jizɔs bin kɔntinyu fɔ put insɛf dɔŋ ɛn fɔ tink di rayt we bɔt insɛf. Bifo i kam na di wɔl, i bin dɔn du bɔku wɔndaful tin dɛn we i de sav Jiova. Na Jizɔs “Gɔd yuz fɔ mek ɔl di ɔda tin dɛn we de na ɛvin ɛn na di wɔl.” (Kol. 1:​16) Di tɛm we Jizɔs bin de baptayz, i bin mɛmba tin dɛn we i bin dɔn du we i bin de wit in Papa. (Mat. 3:​16; Jɔn 17:​5) Bɔt Jizɔs nɔ bin mek prawd bikɔs i mɛmba dɛn tin dɛn de. I nɔ bin ɛva si insɛf se i impɔtant pas ɔda pipul dɛn. I bin tɛl in disaypul dɛn se i nɔ kam na di wɔl “fɔ mek pipul dɛn bi in savant, bɔt i kam fɔ bi savant ɛn fɔ gi in layf as prayz fɔ fri bɔku pipul dɛn.” (Mat. 20:​28) Dɔn bak, i bin tɛl in disaypul dɛn se i nɔ de du ɛnitin bay insɛf. (Jɔn 5:​19) Jizɔs bin rili ɔmbul! In na di bɛst ɛgzampul we wi fɔ fala.

14. Wetin wi lan frɔm Jizɔs bɔt aw wi fɔ tink di rayt we bɔt wisɛf?

¹⁴ Jizɔs bin tich in disaypul dɛn fɔ tink di rayt we bɔt dɛnsɛf. Wantɛm, Jizɔs mek dɛn no se Jiova “ivin no ɔmɔs ia de na [dɛn] ed.” (Mat. 10:​30) Dis tin we Jizɔs bin tɔk de rili ɛnkɔrej wi, mɔ if wi na pɔsin we de tink bad bɔt wisɛf. I min se wi Papa we de na ɛvin rili bisin bɔt wi ɛn wi valyu to am. If Jiova alaw wi fɔ wɔship am, ɛn i tink se wi fit fɔ de sote go insay in nyu wɔl, wi nɔ fɔ tink se di we aw I de tink nɔ kɔrɛkt.

15. (a) Aw Di Wachtawa ɛnkɔrej wi fɔ tink bɔt wisɛf? (b) Akɔdin to wetin de na di pikchɔ dɛn na pej 24, us blɛsin dɛn wi nɔ go ɛnjɔy if wi pe tumɔs atɛnshɔn pan wisɛf?

¹⁵ I dɔn pas 15 ia we wan Wachtawa bin tɔk se wi fɔ tink di rayt we bɔt wisɛf. I bin se: “Wi nɔ fɔ tink tumɔs bɔt wisɛf te wi stat fɔ mek prawd. Bɔt wi nɔ fɔ tink bak se wi nɔ min natin te wi at pwɛl. Bifo dat, wi fɔ tray fɔ tink di rayt we bɔt wisɛf, we min se wi fɔ ɔndastand se tin dɛn  de we wi ebul fɔ du ɛn tin dɛn de we wi nɔ ebul fɔ du. Wan uman we na Kristian put am dis we: ‘Mi nɔto pɔsin we rili bad, bɔt mi nɔto di bɛst pɔsin bak. A gɛt say dɛn we a gɛt trɛnk ɛn a gɛt say dɛn we a wik, jɔs lɛk ɛni ɔda pɔsin.’” * Wi dɔn si klia wan wetin mek i fayn fɔ tink di rayt we bɔt wisɛf.

16. Wetin mek Jiova de gi wi advays dɛn we rili mek sɛns?

¹⁶ Jiova de yuz in Wɔd fɔ gi wi advays dɛn we rili mek sɛns. I lɛk wi, ɛn i want wi fɔ gladi. (Ayz. 48:​17, 18) Di bɛst tin we wi go disayd fɔ du ɛn we go mek wi gɛt tru tru gladi-at na we wi kɔntinyu fɔ du di tin dɛn we go mek Jiova gladi. We wi du dat, wi go avɔyd bɔku pan di prɔblɛm dɛn we pipul dɛn de gɛt tide bikɔs dɛn pe tumɔs atɛnshɔn pan mɔni, wok, ɔ dɛnsɛf. Mek wi ɔl mekɔp wi maynd fɔ sho se wi gɛt sɛns ɛn mek Jiova gladi.—Prɔv. 23:​15.