1-2. Wetin na wan rizin we mek wi fɔ want fɔ no mɔ bɔt di Baybul buk we nem Rɛvɛleshɔn?

 DƐN dɔn ɛva tɛl yu fɔ luk pikchɔ dɛn na pɔsin in albɔm? We yu de luk di pikchɔ dɛn, yu si bɔku pipul dɛn we yu nɔ sabi. Bɔt yu stɔp ɛn tek tɛm luk wan patikyula pikchɔ. Wetin mek? Na bikɔs yu de na da pikchɔ de. We yu de luk di pikchɔ, yu tray fɔ mɛmba ustɛm ɛn usay dɛn snap una. Yu tray bak fɔ mɛmba ɔl di pipul dɛn we de na di pikchɔ. Da pikchɔ de rili spɛshal to yu.

² Di Baybul buk we nem Rɛvɛleshɔn tan lɛk da pikchɔ de. Wetin mek? Lɛ wi tɔk bɔt tu rizin dɛn. Fɔs, na fɔ wi dɛn rayt dis Baybul buk. Insay di fɔs vas, di Baybul se: “Dis na di tin dɛn we Gɔd sho Jizɔs Krays fɔ sho in slev dɛn di tin dɛn we go apin jisnɔ.” (Rɛv. 1:​1) So wetin rayt insay da buk de nɔto fɔ ɔlman, bɔt na fɔ wi we na Gɔd in savant dɛn. Bikɔs wi na Gɔd in pipul dɛn, wi nɔ sɔprayz fɔ no se wisɛf de ɛp fɔ mek di prɔfɛsi dɛn we de na dis wɔndaful buk kam tru. So we wi rid di buk we nem Rɛvɛleshɔn, wi de rid bɔt tin dɛn we de afɛkt wisɛf sɛf.

3-4. Akɔdin to di Baybul buk we nem Rɛvɛleshɔn, ustɛm in prɔfɛsi dɛn go kam tru? Wetin dat fɔ mek wi du?

³ Di sɛkɔn rizin we mek wi fɔ want fɔ no mɔ bɔt di prɔfɛsi dɛn we de na Rɛvɛleshɔn na bikɔs ɔf di tɛm we dɛn prɔfɛsi dɛn ya go kam tru. Apɔsul Jɔn bin sho di tɛm we  dɛn prɔfɛsi dɛn ya go kam tru bay we i bin tɔk se: “Di oli spirit mek a de na di Masta in de.” (Rɛv. 1:​10) We Jɔn bin rayt dɛn wɔd dɛn de arawnd di ia 96, “di Masta in de” bin stil de fa fɔs. (Mat. 25:​14, 19; Lyuk 19:​12) Bɔt akɔdin to Baybul prɔfɛsi, da de de bin bigin insay di ia 1914 we Jizɔs bi Kiŋ na ɛvin. Frɔm da ia de, di prɔfɛsi dɛn we de na Rɛvɛleshɔn, we gɛt sɔntin fɔ du wit Gɔd in pipul dɛn, bin stat fɔ kam tru. Fɔ tru, wi de na “di Masta in de”!

⁴ Bikɔs wi de insay dis fayn tɛm, na wi nid fɔ pe spɛshal atɛnshɔn to di fayn advays we de na Rɛvɛleshɔn 1:​3 we se: “Di wan we de rid dis prɔfɛsi lawd wan ɛn di wan dɛn we yɛri di wɔd dɛn we de de ɛn we du di tin dɛn we rayt de, gɛt gladi-at, bikɔs di rayt tɛm dɔn nia.” Fɔ tru, wi nid fɔ “rid dis prɔfɛsi lawd wan,” “yɛri di wɔd dɛn we de de,” ɛn “du” di tin dɛn we rayt de. Wetin na sɔm pan dɛn tin dɛn ya we wi nid fɔ du?

5. Aw Rɛvɛleshɔn sho wetin mek i impɔtant fɔ lɛ wi mek shɔ se Jiova gladi fɔ wi wɔship?

⁵ Frɔm di fɔs chapta na Rɛvɛleshɔn, wi lan se Jizɔs no ɔltin we de apin na di kɔngrigeshɔn usay in pipul dɛn de. (Rɛv. 1:​12-16, 20; 2:​1) Di mɛsej dɛn we Jizɔs bin sɛn to di sɛvin kɔngrigeshɔn dɛn na Eshia Maynɔ bin pruv dis. Insay dɛn mɛsej dɛn de, i bin sho patikyula tin dɛn we di fɔstɛm Kristian dɛn bin nid fɔ du fɔ mek shɔ se Jiova gladi fɔ dɛn wɔship. Ɛn wetin Jizɔs bin se insay dɛn mɛsej dɛn de aplay to ɔl Gɔd in pipul dɛn tide. Wetin na di lɛsin fɔ wi? Wi Lida we na Krays Jizɔs, no gud gud wan if wi gɛt tayt padi biznɛs wit Jiova. Na in de lid ɛn protɛkt wi, ɛn i de si ɔltin. I no wetin wi nid fɔ du fɔ mek Jiova go kɔntinyu fɔ gladi fɔ wi. Us dayrɛkshɔn i bin gi we wi nid fɔ fala tide?

6. (a) Akɔdin to Jizɔs in wɔd dɛn na Rɛvɛleshɔn 2:​3, 4, us prɔblɛm di kɔngrigeshɔn we bin de na Ɛfisɔs bin gɛt? (b) Us lɛsin wi lan frɔm dis?

⁶ Rid Rɛvɛleshɔn 2:​3, 4. Wi fɔ mek shɔ se wi gɛt di sem lɔv we wi bin gɛt fɔs fɔ Jiova. Jizɔs in mɛsej to di wan dɛn we bin de na di kɔngrigeshɔn insay Ɛfisɔs sho se dɛn bin de bia ɛn dɛn kɔntinyu fɔ sav Jiova pan ɔl we dɛn bin de gɛt difrɛn prɔblɛm dɛn. Bɔt pan ɔl dat, dɛn nɔ bin gɛt di sem lɔv we dɛn bin gɛt fɔs. If dɛn nɔ gɛt da sem lɔv de bak, Jiova nɔ go gladi fɔ dɛn wɔship. Semweso tide, nɔto bia nɔmɔ wi nid fɔ bia. Wi nid fɔ bia fɔ di rayt rizin dɛn. Nɔto jɔs wetin wi de du Gɔd bisin bɔt, i bisin bak bɔt wetin mek wi de du am. Di rizin dɛn we mek wi de du sɔntin impɔtant to am bikɔs i want mek wi wɔship am bikɔs wi rili lɛk am ɛn wi gladi fɔ wetin i dɔn du fɔ wi.—Prɔv. 16:​2; Mak 12:​29, 30.

7. (a) Akɔdin to Rɛvɛleshɔn 3:​1-3, us prɔblɛm di kɔngrigeshɔn we bin de na Sadis bin gɛt? (b) Wetin wi nid fɔ du?

⁷ Rid Rɛvɛleshɔn 3:​1-3. Wi fɔ kɔntinyu fɔ waydawek ɛn rɛdi. Di Kristian dɛn we bin de na di kɔngrigeshɔn na Sadis bin gɛt difrɛn prɔblɛm. Pan ɔl we dɛn bin de sav Jiova trade, dɛn bin leta rilaks pan dɛn savis to Jiova. So Jizɔs bin tɛl dɛn fɔ “wek.” Wetin na di wɔnin lɛsin fɔ wi? Fɔ tru, Jiova nɔ go fɔgɛt wi wok. (Ibru. 6:​10) Bɔt stil, wi nɔ fɔ jɔs abop pan wetin wi bin dɔn du na Jiova in savis trade. Pan ɔl we sɔntɛm wi nɔ go ebul fɔ du  wetin wi bin de du trade, wi nid fɔ kɔntinyu fɔ bizi fɔ “wok fɔ di Masta,” ɛn wi fɔ kɔntinyu fɔ waydawek ɛn rɛdi ɔltɛm te di ɛnd kam.—1 Kɔr. 15:​58; Mat. 24:​13; Mak 13:​33.

8. Akɔdin to Rɛvɛleshɔn 3:​15-17, us lɛsin wi lan frɔm Jizɔs in wɔd dɛn to di brɔda dɛn na Laodisia?

⁸ Rid Rɛvɛleshɔn 3:​15-17. Wi fɔ gɛt zil ɛn wɔship Jiova wit ɔl wi at. Jizɔs in mɛsej to di Kristian dɛn we bin de na Laodisia bin sho difrɛn prɔblɛm. Dɛn ‘nɔ bin kol ɛn dɛn nɔ bin wam’ we dɛn de wɔship Jiova. Bikɔs dɛn bin lezi, Jizɔs bin tɛl dɛn se dɛn “nɔ gɛt gladi-at” ɛn dɛn “sɔri.” Dɛn bin nid fɔ sho se dɛn rili gɛt zil fɔ Jiova ɛn in wɔship. (Rɛv. 3:​19) Wetin na di lɛsin fɔ wi? If wi nɔ gɛt bɛtɛ zil igen, wi nid fɔ sho se wi gladi fɔ ɔl di gud tin dɛn we Jiova ɛn in ɔganayzeshɔn dɔn du fɔ wi. (Rɛv. 3:​18) Wi nɔ fɔ ɛva tray tranga wan fɔ liv izi layf te wi wɔship to Jiova nɔ bi di tin we impɔtant pas ɔl ɔda tin na wi layf igen.

9. Akɔdin to Jizɔs in mɛsej dɛn to di Kristian dɛn na Pagamɔm ɛn Tayatayra, us denja wi nid fɔ avɔyd?

⁹ Wi nɔ fɔ lisin to wetin apɔstet dɛn de tich. Jizɔs bin tɔk pan sɔm brɔda dɛn na Pagamɔm bikɔs dɛn bin de tray fɔ mek wanwɔd nɔ de na di kɔngrigeshɔn. (Rɛv. 2:​14-16) I bin tɔk gud tin bɔt di brɔda dɛn na Tayatayra we bin avɔyd di “dip tin dɛn bɔt Setan,” ɛn i ɛnkɔrej dɛn fɔ “ol” di trut “wit tu an.” (Rɛv. 2:​24-26) Di Kristian dɛn we nɔ bin gɛt bɛtɛ fet ɛn we bin stat fɔ fala lay lay tichin dɛn bin nid fɔ ripɛnt. We wi tide? Wi nɔ fɔ lisin to ɛni tichin we de agens wetin Jiova de tink. Apɔstet dɛn go de “mek lɛk se dɛn de sav Gɔd,” bɔt dɛn “nɔ . . . de liv dɛn layf da we de.” (2 Tim. 3:​5) I izi fɔ mek wi no ɛn avɔyd fɔ lisin to lay lay tichin dɛn we wi de stɔdi Gɔd in Wɔd gud gud wan.—2 Tim. 3:​14-17; Jud 3, 4.

10. Us ɔda lɛsin wi lan frɔm wetin Jizɔs bin tɛl di kɔngrigeshɔn dɛn we bin de na Pagamɔm ɛn Tayatayra?

¹⁰ Wi nɔ fɔ put an pan ɛnikayn mami ɛn dadi biznɛs di we aw Gɔd nɔ want. Di brɔda dɛn we bin de na Pagamɔm ɛn Tayatayra bin gɛt wan ɔda prɔblɛm. Jizɔs bin kɔndɛm sɔm pan di wan dɛn we bin de na dɛn kɔngrigeshɔn dɛn de fɔ we dɛn nɔ bin de avɔyd mami ɛn dadi biznɛs di we aw Gɔd nɔ want. (Rɛv. 2:​14, 20) Wetin  na di lɛsin fɔ wi? Wi nɔ fɔ ɛkspɛkt Jiova fɔ sɔpɔt wi pan ɛni mami ɛn dadi biznɛs di we aw i nɔ want, ivin if wi dɔn sav am fɔ lɔng tɛm ɛn wi de du bɔku wok dɛn na di kɔngrigeshɔn. (1 Sam. 15:​22; 1 Pit. 2:​16) I de ɛkspɛkt wi fɔ fala in lɔ ɛn prinsipul dɛn we i kam pan mami ɛn dadi biznɛs, ilɛksɛf pipul dɛn na di wɔl nɔ de du dat.—Ɛfi. 6:​11-13.

11. Wetin wi dɔn lan? (Rid di bɔks we gɛt di taytul, “ Lɛsin dɛn fɔ Wi Tide.”)

¹¹ Wetin wi dɔn lan? Wi dɔn lan se wi fɔ mek shɔ se Jiova gladi fɔ wi wɔship. If wi de du sɔntin we go mek Jiova nɔ gladi fɔ wi wɔship, wi nid fɔ chenj wantɛm wantɛm so dat Gɔd go gladi fɔ wi. (Rɛv. 2:​5, 16; 3:​3, 16) Bɔt Jizɔs bin tɔk bɔt ɔda tin insay in mɛsej to di kɔngrigeshɔn dɛn. Wetin na da tin de?

12. Wetin wi lan frɔm Jizɔs in mɛsej to di brɔda dɛn na Smayna ɛn Filadɛlfia? (Rɛvɛleshɔn 2:​10)

¹² Naw, lɛ wi tɔk bɔt Jizɔs in mɛsej dɛn to di kɔngrigeshɔn dɛn we bin de na Smayna ɛn Filadɛlfia. I bin tɛl di Kristian dɛn we bin de de fɔ mek dɛn nɔ fred we ɔda pipul dɛn mek dɛn sɔfa, bikɔs Jiova go blɛs dɛn if dɛn kɔntinyu fɔ fetful. (Rid Rɛvɛleshɔn 2:​10; 3:​10) Wetin na di lɛsin fɔ wi tide? Wi fɔ ɛkspɛkt se pipul dɛn go mek wi sɔfa, ɛn wi fɔ rɛdi fɔ bia. (Mat. 24:​9, 13; 2 Kɔr. 12:​10) Wetin mek i impɔtant fɔ mek wi mɛmba dis?

13-14. Wetin dɔn apin to Gɔd in pipul dɛn bikɔs ɔf di tin dɛn we bin apin we Rɛvɛleshɔn chapta 12 tɔk bɔt?

¹³ Di Baybul buk we nem Rɛvɛleshɔn ɛp wi fɔ no se pipul dɛn go mek Gɔd in pipul dɛn sɔfa insay wi tɛm, we na “di Masta in de.” Rɛvɛleshɔn chapta 12 tɔk se wɔ bin de na ɛvin jɔs afta we Jizɔs bi Kiŋ na Gɔd in Kiŋdɔm. Maykɛl, we na Jizɔs Krays afta i go bak na ɛvin, ɛn in enjɛl dɛn bin fɛt agens Setan ɛn di dimɔn dɛn. (Rɛv. 12:​7, 8) Dɛn bin win Gɔd dɛn in ɛnimi dɛn de ɛn drɛb dɛn kam dɔŋ na di wɔl, usay dɛn de mek pipul dɛn sɔfa bad bad wan. (Rɛv. 12:​9, 12) Bɔt aw dis de afɛkt Gɔd in pipul dɛn?

¹⁴ Rɛvɛleshɔn tɛl wi wetin Setan du. I nɔ ebul igen fɔ go na ɛvin, so i de atak Gɔd in anɔyntɛd savant dɛn na di wɔl. Na dɛn de bifo fɔ sɔpɔt Gɔd in Kiŋdɔm na di wɔl, ɛn dɛn “gɛt di wok fɔ prich bɔt Jizɔs.” (Rɛv. 12:​17; 2 Kɔr. 5:​20; Ɛfi. 6:​19, 20) Aw dis prɔfɛsi dɔn kam tru?

15. Udat dɛn tinap fɔ di “tu witnɛs dɛn” we Rɛvɛleshɔn chapta 11 tɔk bɔt? Wetin bin apin to dɛn?

¹⁵ Setan bin mek Gɔd in ɛnimi dɛn atak di anɔyntɛd brɔda dɛn we bin de bifo fɔ prich bɔt di Kiŋdɔm. Na dɛn man dɛn de  bin tinap fɔ di “tu witnɛs dɛn” we Rɛvɛleshɔn tɔk se dɛn go kil. * (Rɛv. 11:​3, 7-11) Insay 1918, dɛn bin lay pan et brɔda dɛn we bin de bifo na di ɔganayzeshɔn. Dɛn bin se dɛn gilti fɔ sɔntin we dɛn nɔ du, ɛn dɛn sɛntɛns dɛn na prizin fɔ lɔng tɛm. Bɔku pipul dɛn bin tink se di wok we dɛn anɔyntɛd brɔda dɛn ya bin de du dɔn stɔp.

16. Wetin bin apin insay 1919 we pipul dɛn nɔ bin de ɛkspɛkt? Wetin Setan dɔn kɔntinyu fɔ du frɔm da tɛm de?

¹⁶ Di prɔfɛsi na Rɛvɛleshɔn chapta 11 tɔk bak se di “tu witnɛs dɛn” go gɛt layf bak afta shɔt tɛm. Pipul dɛn bin sɔprayz fɔ no se i nɔ ivin tek wan ia afta dɛn bin sɛntɛns dɛn brɔda dɛn de na prizin, we da prɔfɛsi de kam tru. Insay Mach 1919, dɛn bin pul dɛn anɔyntɛd brɔda dɛn de na prizin, ɛn leta dɛn bin drɔp di kes. Wantɛm wantɛm, di brɔda dɛn bigin fɔ tek di lid bak fɔ du di prichin ɛn tichin wok. Bɔt dat nɔ stɔp Setan fɔ mek i nɔ atak Gɔd in pipul dɛn. Frɔm da tɛm de, Setan dɔn mek Gɔd in pipul dɛn de rili sɔfa. (Rɛv. 12:​15) Fɔ tru, “na dis mek” wi ɔl “nid fɔ bia ɛn gɛt fet.”—Rɛv. 13:​10.

17. Us ɛp Gɔd in pipul dɛn dɔn gɛt we dɛn nɔ bin de ɛkspɛkt, pan ɔl we na dɛn mɔ Setan de atak?

¹⁷ Rɛvɛleshɔn chapta 12 tɔk se Gɔd in pipul dɛn go gɛt ɛp frɔm say we dɛn nɔ de ɛkspɛkt. Rɛvɛleshɔn ɛksplen se “di grɔn” opin in mɔt ɛn swɛla “di riva” we de mek wi sɔfa. (Rɛv. 12:​16) Na dis dɔn apin. Sɔntɛnde, sɔm tin dɛn na Setan in wɔl, lɛk sɔm ligal sistɛm dɛn, dɔn sho se dɛn gɛt sɛns bay we dɛn de ɛp Gɔd in pipul dɛn. Bɔku tɛm, Jiova in savant dɛn dɔn win kɔt kes dɛn we dɔn alaw dɛn fɔ gɛt sɔm fridɔm. Aw dɛn dɔn yuz dis fridɔm? Dɛn dɔn yuz ɛni chans we dɛn gɛt fɔ du di wok we Jiova gi dɛn. (1 Kɔr. 16:​9) Wetin na dis wok?

18. Wetin na wi men wok insay dis las dez?

¹⁸ Jizɔs bin prɔfɛsay se in pipul dɛn go prich di “gud nyuz bɔt [Gɔd in] Kiŋdɔm” na di wan ol wɔl bifo di ɛnd go kam. (Mat. 24:​14) We dɛn de prich, dɛn de gɛt ɛp frɔm di enjɛl dɛn, ɛn di Baybul tɔk se di enjɛl dɛn gɛt “gud nyuz we go de sote  go fɔ tɛl di wan dɛn we de na di wɔl, ɔl di neshɔn dɛn, pipul dɛn, trayb dɛn, ɛn pipul dɛn we de tɔk difrɛn difrɛn langwej dɛn.”—Rɛv. 14:​6.

19. Us ɔda mɛsej di wan dɛn we lɛk Jiova fɔ prich?

¹⁹ Di gud nyuz bɔt di Kiŋdɔm nɔto di wangren mɛsej we Gɔd in pipul dɛn fɔ tɔk. Dɛn nid bak fɔ sɔpɔt di wok we di enjɛl dɛn de du, we Rɛvɛleshɔn chapta 8 to 10 tɔk bɔt. Dɛn enjɛl dɛn ya anawns difrɛn prɔblɛm dɛn we go mit di wan dɛn we de agens Gɔd in Kiŋdɔm. So Jiova Witnɛs dɛn dɔn de prich bɔt di mɛsej we tan lɛk “ays blɔk ɛn faya” ɛn we de tɔk bɔt Gɔd in jɔjmɛnt agens difrɛn say dɛn na Setan in wikɛd wɔl. (Rɛv. 8:​7, 13) Pipul dɛn nid fɔ no se di ɛnd de kam jisnɔ so dat dɛn go mek siriɔs chenj dɛn na dɛn layf fɔ mek dɛn go sev di de we Jiova go vɛks. (Zɛf. 2:​2, 3) Bɔt dis mɛsej nɔto mɛsej we pipul dɛn dɔn yus fɔ yɛri. So wi nid fɔ gɛt maynd fɔ tɛl ɔda pipul dɛn bɔt am. Insay di big big trɔbul, pipul dɛn go vɛks mɔ we dɛn go yɛri di las jɔjmɛnt mɛsej.—Rɛv. 16:​21.

20. Wetin wi go tɔk bɔt insay di nɛks tu atikul dɛn?

²⁰ Wi rili nid fɔ obe ‘di wɔd dɛn we de na dis prɔfɛsi’ bikɔs wisɛf de ɛp fɔ mek wetin di Baybul buk we nem Rɛvɛleshɔn tɔk bɔt apin. (Rɛv. 1:​3) Bɔt aw wi go ebul fɔ bia we pipul dɛn de mek wi sɔfa ɛn kɔntinyu fɔ gɛt maynd fɔ prich dɛn mɛsej dɛn ya? Tu tin dɛn go ɛp wi: di fɔs wan na di tin dɛn we di Baybul buk we nem Rɛvɛleshɔn tɔk bɔt Gɔd in ɛnimi dɛn, ɛn di sɛkɔn wan na di blɛsin dɛn we wi go gɛt tumara bambay if wi kɔntinyu fɔ fetful to Jiova. Wi go tɔk bɔt dɛn tin dɛn ya na di nɛks tu atikul dɛn.