STƆDI ATIKUL 21
Wetin Rɛvɛleshɔn Se bɔt Yu Tumara Bambay?
“Emɛn! Kam, Masta Jizɔs.”—RƐV. 22:20.
SIŊ 142 Wi Op De Mek Wi Tinap Tranga Wan
WETIN WI GO LAN? *
1. Us impɔtant tin ɔl mɔtalman nid fɔ disayd?
PIPUL dɛn tide gɛt impɔtant tin fɔ disayd. Fɔ se dɛn go sɔpɔt Jiova Gɔd as di Wan we gɛt rayt fɔ rul di wan ol wɔl, ɔ dɛn go sɔpɔt in wikɛd ɛnimi we na Setan di Dɛbul? Nɔbɔdi nɔ go ebul fɔ de midul. Wetin dɛn disayd go sho if dɛn go gɛt layf we go de sote go ɔ dɛn nɔ go gɛt am. (Mat. 25:31-33, 46) Insay di tɛm fɔ da “big big trɔbul,” dɛn go mak dɛn fɔ sev ɔ fɔ day.—Rɛv. 7:14; 14:9-11; Izi. 9:4, 6.
2. (a) Wetin Ibruz 10:35-39 ɛnkɔrej wi fɔ du? (b) Aw di Baybul buk we nem Rɛvɛleshɔn go ɛp wi?
2 Rid Ibruz 10:35-39. If yu dɔn disayd fɔ sɔpɔt Jiova in rul, yu dɔn disayd fɔ du di rayt tin. Naw yu want fɔ ɛp ɔda pipul dɛn fɔ disayd fɔ du di rayt tin. Yu kin yuz di infɔmeshɔn dɛn we de insay di Baybul buk we nem Rɛvɛleshɔn. Da impɔtant buk de de sho wetin gɛt fɔ apin to di wan dɛn we de agens Jiova, bɔt i tɔk bak bɔt di blɛsin dɛn we di wan dɛn we de sɔpɔt in rul go gɛt. Wi fɔ stɔdi dɛn impɔtant tin dɛn ya. If wi du dat, i go ɛp wi fɔ mekɔp wi maynd mɔ fɔ kɔntinyu fɔ sav Jiova. Dɔn bak, wi go yuz wetin wi dɔn lan fɔ ɛp ɔda pipul dɛn fɔ disayd fɔ sav Jiova ɛn fɔ kɔntinyu fɔ du so.
3. Wetin wi go tɔk bɔt insay dis atikul?
3 Insay dis atikul, wi go tɔk bɔt dɛn kwɛstyɔn dɛn ya: Wetin go apin to di wan dɛn we de sɔpɔt Gɔd in rul? Wetin go apin to di wan dɛn we de sɔpɔt di wayl animal we gɛt brayt rɛd kɔlɔ, we Rɛvɛleshɔn tɔk bɔt?
WETIN GO APIN TO DI WAN DƐN WE FETFUL TO JIOVA?
4. Us grup apɔsul Jɔn si wit Jizɔs na ɛvin?
4 Insay wan vishɔn, apɔsul Jɔn si tu grup dɛn we de sɔpɔt Jiova in rul ɛn we gɛt layf we go de sote go. Na 144,000 pipul dɛn bin de na di fɔs grup. (Rɛv. 7:4) Na frɔm di wɔl dɛn tek dɛn fɔ go mek wan gɔvmɛnt ɔ Kiŋdɔm wit Jizɔs na ɛvin. Dɛn ɛn Jizɔs go rul di wɔl. (Rɛv. 5:9, 10; 14:3, 4) Insay di vishɔn, Jɔn si dɛn tinap wit Jizɔs na Mawnt Zayɔn we na ɛvin.—Rɛv. 14:1.
5. Wetin go apin jisnɔ to di wan dɛn we dɔn lɛf we de pat pan di 144,000?
5 Frɔm di apɔsul dɛn tɛm te naw, Gɔd dɔn pik bɔku pipul dɛn fɔ de pat pan di 144,000. (Lyuk 12:32; Rom. 8:17) Bɔt dɛn tɛl Jɔn se na di wan dɛn nɔmɔ we dɔn lɛf, ɔ wan smɔl nɔmba, go de alayv na di wɔl insay di las dez. Dɛn wan dɛn ya ‘we dɔn lɛf’ go gɛt dɛn las “stamp” we de sho se Jiova gladi fɔ dɛn bifo da big big trɔbul bigin. (Rɛv. 7:2, 3; 12:17) Dɔn insay di big big trɔbul, dɛn wan dɛn ya we dɔn lɛf go go na ɛvin fɔ go jɔyn di balans 144,000, we dɔn ɔlrɛdi day fetful wan. Dɛn go jɔyn Jizɔs fɔ rul na Gɔd in Kiŋdɔm.—Mat. 24:31; Rɛv. 5:9, 10.
6-7. (a) Us ɔda grup Jɔn bin si? Wetin wi lan bɔt dɛn? (b) Wetin mek di anɔyntɛd dɛn we dɔn lɛf ɛn di “bɔku bɔku pipul dɛn” fɔ gladi fɔ si wetin Rɛvɛleshɔn chapta 7 tɔk bɔt de apin?
6 Afta we Jɔn dɔn si di grup we fɔ go na ɛvin, i bin si bak “bɔku bɔku pipul dɛn.” Di fɔs grup we Jɔn bin si bin gɛt nɔmba we na 144,000, bɔt di Baybul nɔ sho ɔmɔs pipul dɛn de na dis ɔda grup. (Rɛv. 7:9, 10) Wetin wi lan bɔt dɛn? Dɛn tɛl Jɔn se: “Na dɛn wan ya kɔmɔt pan di big big trɔbul, ɛn dɛn dɔn was dɛn lɔng klos insay di Yɔŋ Ship in blɔd ɛn mek dɛn wayt.” (Rɛv. 7:14) Afta dɛn “bɔku bɔku pipul dɛn” ya go dɔn sev di tɛm fɔ da big big trɔbul, dɛn go de na di wɔl ɛn ɛnjɔy bɔku blɛsin dɛn.—Sam 37:9-11, 27-29; Prɔv. 2:21, 22; Rɛv. 7:16, 17.
7 Ilɛksɛf wi de na di grup we go go na ɛvin ɔ di grup we go de na di wɔl, wi biliv se wi go si we di tin dɛn we Rɛvɛleshɔn chapta 7 tɔk bɔt de apin? Wi fɔ biliv dat. Dɛn tu grup dɛn ya we na Jiova in savant dɛn go rili gladi. Wi go gladi pasmak fɔ we wi disayd fɔ sɔpɔt Jiova in rul. Wetin bak Rɛvɛleshɔn tɛl wi bɔt di big big trɔbul?—Mat. 24:21.
WETIN GO APIN TO DI WAN DƐN WE DE AGENS GƆD?
8. Aw da big big trɔbul go stat? Aw i go afɛkt bɔku pipul dɛn?
8 Insay di atikul bifo dis wan, wi bin lan se i nɔ go te igen di gɔvmɛnt dɛn go atak Babilɔn di Gret, we na ɔl di lay lay rilijɔn dɛn. (Rɛv. 17:16, 17) Dis atak we dɛn go atak Babilɔn di Gret go bi di biginin fɔ da big big trɔbul. Bɔt fɔ se dat go mek bɔku pipul dɛn bigin fɔ wɔship Jiova? Nɔ, nɔto so i go bi. Rɛvɛleshɔn chapta 6 sho se da tɛm de we tin nɔ gɛt fɔ izi, pipul dɛn we nɔ de sav Jiova go luk to di bigman dɛn na pɔlitiks ɛn dɛn big biznɛsman dɛn na di wɔl fɔ protɛkt dɛn, we di Baybul kɔmpia to mawntin dɛn. Bikɔs dɛn pipul dɛn de nɔ go sɔpɔt Gɔd in Kiŋdɔm, Jiova go si dɛn as ɛnimi dɛn.—Lyuk 11:23; Rɛv. 6:15-17.
9. Aw Jiova in pipul dɛn go difrɛn di tɛm fɔ da big big trɔbul? Wetin go apin to dɛn?
9 Fɔ tru, Jiova in fetful savant dɛn go difrɛn frɔm ɔda pipul dɛn da tɛm de we tin nɔ go rili izi. Dɛn go stil bi di wangren grup na di wɔl we de sav Jiova Gɔd ɛn we nɔ go gri fɔ sɔpɔt “di wayl animal.” (Rɛv. 13:14-17) Bikɔs dɛn go kɔntinyu fɔ fetful to Jiova, di wan dɛn we de agens Jiova go vɛks bad bad wan pan dɛn. Ɛn dat go mek di neshɔn dɛn ɔl go kam togɛda as wan grup fɔ atak Gɔd in pipul dɛn ɔlsay na di wɔl. Di Baybul kɔl dis atak Gɔg we de na Megɔg.—Izi. 38:14-16.
10. Akɔdin to Rɛvɛleshɔn 19:19-21, wetin Jiova go du we dɛn atak in pipul dɛn?
10 Wetin Jiova go du we dɛn go atak in pipul dɛn? I tɛl wi se: “Mi bad vɛks go grap.” (Izi. 38:18, 21-23) Rɛvɛleshɔn chapta 19 tɔk bɔt wetin go apin nɛks. Jiova go sɛn In Bɔypikin fɔ protɛkt In pipul dɛn ɛn fɔ dɔnawe wit dɛn ɛnimi dɛn. “Di sojaman dɛn na ɛvin,” we na di fetful enjɛl dɛn ɛn di 144,000, go jɔyn Jizɔs fɔ fɛt dis wɔ agens Gɔg we de na Megɔg. (Rɛv. 17:14; 19:11-15) Aw dis wɔ go ɛnd? Dɛn go dɔnawe wit ɔl mɔtalman ɛn ɔganayzeshɔn dɛn we de agens Jiova.—Rid Rɛvɛleshɔn 19:19-21.
DI MARED WE GO BI AFTA DI WƆ
11. Us spɛshal tin we impɔtant pas ɔl we Rɛvɛleshɔn tɔk bɔt?
11 Tray fɔ imajin aw fetful wan dɛn na di wɔl go fil we dɛn go sev di tɛm we Gɔd go dɔnawe wit in ɛnimi dɛn kpatakpata! Na tɛm we ɔlman na di wɔl go gladi. Pan ɔl we bɔku gladi gladi go de na ɛvin we dɛn go dɔn dɔnawe wit Babilɔn di Gret, ɔda tin bak go apin we go mek dɛn gladi mɔ. (Rɛv. 19:1-3) Na wan impɔtant tin we Rɛvɛleshɔn tɔk bɔt, we na ‘di Yɔŋ Ship in mared.’—Rɛv. 19:6-9.
12. Akɔdin to Rɛvɛleshɔn 21:1, 2, ustɛm di Yɔŋ Ship in mared go apin?
12 Ustɛm di mared go apin? Ɔl di 144,000 go de na ɛvin jɔs bifo dɛn fɛt di wɔ we na Amagɛdɔn. Bɔt dat nɔ go bi di tɛm fɔ di Yɔŋ Ship in mared. (Rid Rɛvɛleshɔn 21:1, 2.) Di Yɔŋ Ship in mared go apin afta dɛn dɔn fɛt di wɔ we na Amagɛdɔn ɛn dɔnawe wit Gɔd in ɛnimi dɛn ɔl.—Sam 45:3, 4, 13-17.
13. Wetin di Yɔŋ Ship in mared rili min fɔ di wan dɛn we gɛt fɔ tek pat?
13 Wetin di Yɔŋ Ship in mared rili min fɔ di wan dɛn we gɛt fɔ tek pat? Mared de mek man ɛn uman kam togɛda. Semweso, di Yɔŋ Ship in mared go mek di Kiŋ we na Jizɔs Krays, wit in “yawo” we na di 144,000, kam togɛda. Da impɔtant tin de we gɛt fɔ apin go mek Jizɔs ɛn di 144,000 bigin rul di wɔl fɔ 1,000 ia.—Rɛv. 20:6.
WAN FAYN SITI ƐN YU TUMARA BAMBAY
Rɛvɛleshɔn chapta 21 tɔk se di siti we nem Nyu Jerusɛlɛm “de kɔmɔt to Gɔd na ɛvin de kam dɔŋ.” Insay di Wan Tawzin Ia we Krays go de rul, di Nyu Jerusɛlɛm go briŋ bɔku blɛsin dɛn fɔ di pipul dɛn we de obe Jiova (Luk na paregraf 14 to 16)
14-15. Wetin Rɛvɛleshɔn chapta 21 kɔmpia di 144,000 to? (Luk di pikchɔ na di frɔnt pej.)
14 Rɛvɛleshɔn chapta 21 kɔmpia bak di 144,000 to wan fayn siti we dɛn kɔl “Nyu Jerusɛlɛm.” (Rɛv. 21:2, 9) Dis siti de pan 12 fawndeshɔn ston dɛn usay “di Yɔŋ Ship in 12 apɔsul dɛn 12 nem dɛn” bin rayt. Wetin mek Jɔn bin want fɔ no mɔ bɔt dis? Na bikɔs i bin si in nem pan wan pan dɛn ston dɛn de. Dat na big big ɔnɔ!—Rɛv. 21:10-14; Ɛfi. 2:20.
15 Dis siti nɔ fiba ɛni ɔda siti. I gɛt men strit we dɛn mek wit fayn gold, 12 get dɛn we dɛn mek wit pal, wɔl ɛn fawndeshɔn dɛn we dɛn mek wit ston dɛn we gɛt valyu, ɛn di we aw i lɔng, wayd, ɛn ay ɔl na di sem. (Rɛv. 21:15-21) Bɔt sɔntin de we Jɔn nɔ bin si. Notis di nɛks tin we Jɔn tɛl wi. I se: “A nɔ si tɛmpul insay de, bikɔs Jiova Gɔd we na di Ɔlmayti ɛn di Yɔŋ Ship na dɛn na di tɛmpul. Ɛn di siti nɔ nid di san ɔ di mun fɔ shayn de, bikɔs na Gɔd in glori bin de shayn de, ɛn in lamp na di Yɔŋ Ship.” (Rɛv. 21:22, 23) Di wan dɛn we de pat pan di Nyu Jerusɛlɛm go de wit Jiova. (Ibru. 7:27; Rɛv. 22:3, 4) So Jiova ɛn Jizɔs na di tɛmpul na da siti de.
Udat dɛn go bɛnifit frɔm di blɛsin dɛn we di “riva” ɛn di “tik dɛn” tinap fɔ? (Luk na paregraf 16 ɛn 17)
16. Wetin go apin to mɔtalman insay di Wan Tawzin Ia we Gɔd in Kiŋdɔm go de rul?
16 Di anɔyntɛd dɛn rili gladi we dɛn de tink bɔt dis siti. Bɔt di wan dɛn bak we valyu di op fɔ de na dis wɔl gɛt rizin fɔ no mɔ bɔt am. Insay di Wan Tawzin Ia we Gɔd in Kiŋdɔm go de rul, di Nyu Jerusɛlɛm go briŋ blɛsin na di wan ol wɔl. Jɔn si dɛn blɛsin dɛn ya de flo lɛk “riva we gɛt wata we de gi layf.” Ɛn di tu say dɛn na di riva gɛt “tik dɛn we de gi layf” we de bia lif dɛn “fɔ mɛn di neshɔn dɛn.” (Rɛv. 22:1, 2) Ɔl mɔtalman we go de alayv go gɛt di chans fɔ bɛnifit frɔm dɛn gud tin dɛn de. Smɔl smɔl, ɔl mɔtalman dɛn we de obe Gɔd go pafɛkt. Sik nɔ go de igen, pen nɔ go de igen, ɛn nɔbɔdi nɔ go kray igen bikɔs in at pwɛl.—Rɛv. 21:3-5.
17. Akɔdin to Rɛvɛleshɔn 20:11-13, udat dɛn go bɛnifit frɔm di Wan Tawzin Ia we Gɔd in Kiŋdɔm go de rul?
17 Udat dɛn go bɛnifit frɔm dɛn wɔndaful tin dɛn ya? Di fɔs wan dɛn we go bɛnifit na di bɔku bɔku pipul dɛn we go sev di tɛm fɔ Amagɛdɔn ɛn ɛni pikin we dɛn go bɔn insay di nyu wɔl. Bɔt Rɛvɛleshɔn chapta 20 prɔmis bak se di wan dɛn we dɔn day go gɛt layf bak. (Rid Rɛvɛleshɔn 20:11-13.) Fetful wan dɛn we bin de “du wetin rayt” we bin dɔn day, ɛn di wan dɛn we “nɔ du wetin rayt” we nɔ bin gɛt di chans fɔ lan bɔt Jiova go gɛt layf bak fɔ de na di wɔl. (Akt 24:15; Jɔn 5:28, 29) Fɔ se dis min se ɔl di wan dɛn we dɔn day go gɛt layf bak na di wɔl insay di Wan Tawzin Ia we Gɔd in Kiŋdɔm go de rul? Nɔ. Di wan dɛn we wikɛd ɛn we tɔn dɛn bak pan di chans we dɛn bin gɛt fɔ sav Jiova bifo dɛn day nɔ go gɛt layf bak. Dɛn bin gɛt di chans fɔ lan bɔt am, bɔt dɛn sho se dɛn nɔ fit fɔ de na Paradays na dis wɔl.—Mat. 25:46; 2 Tɛs. 1:9; Rɛv. 17:8; 20:15.
DI LAS TƐST
18. Aw tin go tan lɛk na di wɔl bay di tɛm we di 1,000 ia go dɔn?
18 Te di 1,000 ia go dɔn, ɔl di wan dɛn we de na di wɔl go dɔn gɛt pafɛkt layf. Di sin we Adam bin kɔmit nɔ go afɛkt nɔbɔdi igen. (Rom. 5:12) Di swɛ we Gɔd bin swɛ Adam bikɔs i bin sin nɔ go ɛva de igen. So dat min se di wan dɛn we de na di wɔl go “gɛt layf” as pafɛkt mɔtalman dɛn we di 1,000 ia go dɔn.—Rɛv. 20:5.
19. Wetin mek i go fayn fɔ mek mɔtalman gɛt wan las tɛst?
19 Wi no se Jizɔs bin kɔntinyu fɔ fetful to Gɔd ivin we Setan bin tɛmt am. Bɔt fɔ se ɔl pafɛkt mɔtalman go rɛdi fɔ fetful to Jiova we Setan tray fɔ tɛst am? Wi ɔl go ebul fɔ ansa dis kwɛstyɔn fɔ wisɛf we dɛn go pul Setan na prizin di tɛm we di 1,000 ia go dɔn. (Rɛv. 20:7) Di wan dɛn we kɔntinyu fɔ fetful insay dis tɛm fɔ di las tɛst go gɛt layf we go de sote go ɛn faynali ɛnjɔy tru tru fridɔm. (Rom. 8:21) Di wan dɛn we tɔn dɛn bak pan Jiova, dɛn go dɔnawe wit dɛn, Setan, ɛn in dimɔn dɛn kpatakpata.—Rɛv. 20:8-10.
20. Aw yu fil bɔt di fayn fayn prɔfɛsi dɛn we de na di Baybul buk we nem Rɛvɛleshɔn?
20 Aw yu fil afta wi dɔn tɔk smɔl bɔt di Baybul buk we nem Rɛvɛleshɔn? Yu gladi fɔ si yusɛf insay dɛn wɔndaful prɔfɛsi dɛn ya? Fɔ tru, dis dɔn mek yu want fɔ invayt ɔda pipul dɛn fɔ jɔyn wi fɔ wɔship wi Gɔd di rayt we, nɔto so? (Rɛv. 22:17) Naw we wi dɔn tɔk bɔt dɛn tin dɛn ya we go apin tumara bambay, wi gladi ɛn wi want fɔ tɔk di sem tin we apɔsul Jɔn bin tɔk, we i se: “Emɛn! Kam, Masta Jizɔs.”—Rɛv. 22:20.
SIŊ 27 Gɔd Go Sho In Pikin Dɛn
[Futnot]
^ Dis na di las atikul na di siriz we de tɔk bɔt di Baybul buk we nem Rɛvɛleshɔn. Insay dis atikul, wi go lan se di wan dɛn we kɔntinyu fɔ fetful to Jiova go gladi tumara bambay, bɔt dɛn go dɔnawe wit di wan dɛn we de agens Gɔd in rul.
