1-2. Wetin wi kin tink bɔt sɔntɛnde we i kam to wi prea dɛn?

 YU DƆN ɛva wɔnda if Jiova de ansa yu prea dɛn? If na so i bi, nɔto yu wan kin fil da we de. Bɔku brɔda ɛn sista dɛn dɔn tɔk se dɛnsɛf kin tink da sem we de, mɔ we dɛn gɛt prɔblɛm dɛn. If wi de sɔfa, sɔntɛm i nɔ go izi fɔ si aw Jiova de ansa wi prea dɛn.

² Lɛ wi tɔk bɔt wetin mek wi fɔ gɛt kɔnfidɛns se Jiova de ansa in savant dɛn prea dɛn. (1 Jɔn 5:​15) Wi go tɔk bak bɔt dɛn kwɛstyɔn dɛn ya: Wetin mek sɔntɛnde i kin luk lɛk se Jiova nɔ de ansa wi prea dɛn? Us we dɛn Jiova de ansa prea dɛn tide?

3. Wetin mek Jiova want wi fɔ pre to am?

³ Di Baybul tɛl wi se Jiova rili lɛk wi ɛn wi valyu to am. (Egay 2:​7; 1 Jɔn 4:​10) Na dat mek i de ɛnkɔrej wi fɔ pre to am fɔ mek i ɛp wi. (1 Pit. 5:​6, 7) I want fɔ ɛp wi fɔ kɔntinyu fɔ de nia am ɛn fɔ bia di prɔblɛm dɛn we de mit wi.

4. Aw wi no se Jiova de ansa in savant dɛn prea? (Luk bak di pikchɔ.)

⁴ Insay di Baybul, wi kin rid bɔku tɛm bɔt aw Jiova bin de ansa in savant dɛn prea dɛn. Yu ebul tink bɔt ɛni ɛgzampul? Wan pan dɛn na Kiŋ Devid. Frɔm we i bin smɔl, i bin gɛt bɔku bad bad ɛnimi dɛn, ɛn bɔku tɛm i bin de  pre to Jiova fɔ mek i ɛp am. Wantɛm, i bin beg Jiova se: “PAPA GƆD [“Jiova”, NWT] duya yɛri mi prea. Lisin we a de beg yu fɔ [sɔri fɔ mi]; bikɔs yu de du tin tret wan ɛn yu de kip to yu prɔmis, kam ɛp mi.” (Sam 143:​1) Jiova bin ansa Devid in prea fɔ mek i sev am. (1 Sam. 19:​10, 18-20; 2 Sam. 5:​17-25) Dat bin mek Devid bin gɛt kɔnfidɛns fɔ se: “Jiova de nia ɔl di wan dɛn we de kɔl am.” Wisɛf go ebul fɔ gɛt da sem kɔnfidɛns de.—Sam 145:​18.

5. Fɔ se na ɔltɛm Jiova bin de ansa in savant dɛn prea di we aw dɛn bin de ɛkspɛkt? Gi wan ɛgzampul. (Luk bak di pikchɔ.)

⁵ Sɔntɛm Jiova nɔ go ansa wi prea dɛn di we aw wi de ɛkspɛkt. Na dat bin apin to apɔsul Pɔl. I bin aks Gɔd fɔ pul wan prɔblɛm we tan lɛk “chukchuk na [in] bɔdi.” Pɔl bin pre bɔt dis patikyula prɔblɛm we bin rili siriɔs, tri tɛm. Fɔ se Jiova bin ansa dɛn prea dɛn de? Yɛs, bɔt i nɔ ansa dɛn di we aw Pɔl bin de ɛkspɛkt. Bifo Jiova pul di prɔblɛm, i bin gi am di pawa we i bin nid fɔ kɔntinyu fɔ sav Am fetful wan.—2 Kɔr. 12:​7-10.

6. Wetin mek tɛm dɛn kin de we i kin luk lɛk se Jiova nɔ de ansa wi prea dɛn?

⁶ Sɔntɛnde, i go bi se wisɛf kin gɛt ansa we difrɛn frɔm di ansa we wi de ɛkspɛkt. Bɔt wi fɔ gɛt kɔnfidɛns se Jiova no di bɛst we aw fɔ ɛp wi. I kin ivin “du mɔ pas ɔl di tin dɛn we wi de aks fɔ ɔ tink bɔt fa fawe.” (Ɛfi. 3:​20) Na dat mek i kin ansa wi prea dɛn di tɛm ɔ di we aw wi nɔ de ɛkspɛkt.

7. Wetin go mek wi nid fɔ chenj wetin wi de pre fɔ? Gi wan ɛgzampul.

⁷ Sɔntɛm wi go nid fɔ chenj wetin wi de pre fɔ we wi kam fɔ ɔndastand wetin Jiova want mɔ ɛn mɔ. Tink bɔt Matin Pɔtzinga in ɛgzampul. Jɔs afta Brɔda Pɔtzinga mared, dɛn bin put am na prizin na wan Nazi kɔnsɛntreshɔn kamp. Fɔs, i bin de pre to Jiova fɔ mek i kɔmɔt na di kɔnsɛntreshɔn kamp so dat i go kia fɔ in wɛf ɛn bigin du di prichin wok bak. Bɔt afta tu wiks, i bin luk lɛk se Jiova nɔ go mek dɛn fri am. So i bin bigin fɔ pre se: “Jiova, duya sho mi wetin yu want mi fɔ du.” Afta dat, i bigin tink bɔt wetin de apin to di ɔda brɔda dɛn na di  kamp. Bɔku pan dɛn bin de rili wɔri bɔt dɛn wɛf ɛn dɛn pikin dɛn. Dɔn Brɔda Pɔtzinga pre se: “Jiova, tɛnki fɔ mi nyu asaynmɛnt. Ɛp mi fɔ mek a go ebul ɛnkɔrej mi brɔda dɛn ɛn ɛp dɛn fɔ gɛt trɛnk.” I bin ebul fɔ du dat insay di nayn ia we i bin de na di kamp dɛn!

8. Us impɔtant tin wi fɔ mɛmba we wi de pre?

⁸ Wi nid fɔ mɛmba se Jiova gɛt tin dɛn we i want fɔ du ɛn i go du dɛn di tɛm we i dɔn pik. Wan pan di tin dɛn we i want fɔ du na fɔ mek ɔl di prɔblɛm dɛn we de mek wi sɔfa nɔ de igen. Prɔblɛm dɛn lɛk nachɔral dizasta, sik, ɛn day. Jiova go yuz in Kiŋdɔm fɔ du wetin i want. (Dan. 2:​44; Rɛv. 21:​3, 4) Bɔt te da tɛm de rich, Jiova de alaw Setan fɔ rul di wɔl. b (Jɔn 12:​31; Rɛv. 12:​9) If Jiova bin fɔ dɔn sɔlv mɔtalman dɛn prɔblɛm dɛn naw, i go luk lɛk se Setan de rul di wɔl fayn. Bɔt bikɔs wi de wet fɔ mek Jiova du sɔm pan di tin dɛn we i dɔn prɔmis, dat nɔ min se i nɔ de ɛp wi. Lɛ wi tɔk bɔt sɔm we dɛn we Jiova de ɛp wi.

9. Aw Jiova go ɛp wi we wi nid fɔ disayd fɔ du tin dɛn? Gi wan ɛgzampul.

⁹ I de gi wi sɛns. Jiova dɔn prɔmis fɔ gi wi di sɛns we wi nid fɔ disayd fɔ du di rayt tin dɛn. Wi kin nid Gɔd in sɛns mɔ we wi kin nid fɔ disayd fɔ du sɔntin we go afɛkt wi layf, lɛk if wi fɔ mared ɔ wi nɔ fɔ mared. (Jems 1:​5) Tink bɔt wan sista we nɔ mared we nem Maria in ɛkspiriɛns. c I bin de ɛnjɔy fɔ sav as rɛgyula payɔnia we i mit wan brɔda. I tɔk se: “Di mɔ we wi padi biznɛs bin de tayt, na di mɔ wi bin de gɛt filin fɔ wisɛf. A bin no se a go nid fɔ disayd wetin fɔ du. A bin pre bɔt dis fɔ lɔng tɛm. A bin nid fɔ mek Jiova gayd mi, bɔt a bin no bak se nɔto Jiova go disayd fɔ mi wetin a fɔ du.” Maria bin si se Jiova bin ansa in prea fɔ gi am sɛns. Aw? We i bin de du risach na wi pɔblikeshɔn dɛn, i bin ebul fɔ fɛn sɔm patikyula atikul dɛn we bin ɛp am fɔ fɛn ansa to in kwɛstyɔn dɛn. I bin lisin bak to di fayn advays we in fetful mama bin gi am. Da advays de bin ɛp Maria fɔ tink bɔt aw i de fil. So i bin ebul fɔ disayd fɔ du di rayt tin.

10. Akɔdin to Filipians 4:​13, wetin Jiova go du fɔ ɛp in savant dɛn? Gi wan ɛgzampul. (Luk bak di pikchɔ.)

¹⁰ I de gi wi di pawa fɔ bia. Jiova go gi wi di pawa we wi go nid fɔ bia wi prɔblɛm dɛn, jɔs lɛk aw i bin du fɔ apɔsul Pɔl.  (Rid Filipians 4:​13.) Tink bɔt aw Jiova bin ɛp wan brɔda we nem Bɛnjamin fɔ bia siriɔs prɔblɛm dɛn. We Bɛnjamin bin yɔŋ, in ɛn in famili bin de liv na rɛfyuji kamp dɛn na Afrika. Bɛnjamin tɔk se: “A bin de pre to Jiova ɔltɛm, ɛn a bin de aks am fɔ gi mi di pawa fɔ du wetin rayt na in yay. Jiova bin ansa mi prea dɛn bay we i mek a gɛt kolat, i gi mi di maynd we a nid fɔ kɔntinyu fɔ prich, ɛn pɔblikeshɔn dɛn we go ɛp mi fɔ kɔntinyu fɔ de nia am.” I kɔntinyu fɔ tɔk se: “We a bin de rid ɛkspiriɛns dɛn bɔt mi brɔda ɛn sista dɛn ɛn lan bɔt aw Jiova bin ɛp dɛn fɔ bia, dat bin ɛp mi fɔ mekɔp mi maynd mɔ fɔ kɔntinyu fɔ fetful.”

11-12. Aw Jiova go yuz wi brɔda ɛn sista dɛn fɔ ansa wi prea? (Luk bak di pikchɔ.)

¹¹ I de yuz wi brɔda ɛn sista dɛn. Di nɛt bifo Jizɔs sakrifays in layf, i bin pre siriɔs wan. I beg Jiova lɛ i nɔ mek dɛn kɔndɛm am as pɔsin we de tɔk bad bɔt Gɔd. Bɔt Jiova nɔ du dat, bifo dat, i ɛp Jizɔs bay we i sɛn wan pan di enjɛl dɛn fɔ go kɔrej am. (Lyuk 22:​42, 43) Sɔntɛm Jiova go ɛp wi bak bay we i go mek wi brɔda ɔ sista kɔl wi ɔ kam fɛn wi fɔ ɛnkɔrej wi. Wi ɔl fɔ luk fɔ chans fɔ tɔk “gud wɔd” to wi kɔmpin Kristian dɛn.—Prɔv. 12:​25, NWT.

¹² Tink bɔt wan sista we nem Meriam in ɛkspiriɛns. Jɔs afta Meriam in man day, i bin de na os in wan ɛn in at bin rili pwɛl. I bin de kray bita wan ɛn i bin nid fɔ tɔk to pɔsin. I tɔk se: “A nɔ bin gɛt di trɛnk fɔ kɔl ɛnibɔdi so a pre to Jiova. We a bin stil de kray ɛn pre, mi fon riŋ. Na wan ɛlda we na mi gud padi bin kɔl.” Di ɛlda ɛn in wɛf bin ebul kɔrej Meriam. I biliv tranga wan se na Jiova bin mek da brɔda de kɔl am.

13. Gi wan ɛgzampul bɔt aw Jiova kin yuz di wan dɛn we nɔ de sav am fɔ ansa wi prea dɛn.

¹³ I kin yuz pipul dɛn we nɔ de sav am. (Prɔv. 21:​1) Sɔntɛnde, Jiova kin ansa in savant dɛn prea bay we i de mek di wan dɛn we nɔ de sav am ɛp dɛn. Fɔ ɛgzampul, i bin mek Kiŋ Atazaksis alaw  Nɛimaya fɔ go bak na Jerusɛlɛm so dat i go ɛp fɔ bil di siti bak. (Nɛi. 2:​3-6) Tide bak, Jiova kin mek ivin di wan dɛn we nɔ de sav am gi wi di ɛp we wi nid.

14. Wetin yu lɛk bɔt Su Yiŋ in ɛkspiriɛns? (Luk bak di pikchɔ.)

¹⁴ Wan sista we nem Su Yiŋ bin si se Jiova ɛp am bay we i yuz in dɔktɔ. In bɔypikin bin gɛt siriɔs ed prɔblɛm. We in pikin bin gɛt wan siriɔs aksidɛnt, in ɛn in man bin lɛf dɛn wok so dat dɛn go kia fɔ am. Dat bin mek dɛn gɛt mɔni prɔblɛm. Su Yiŋ se i bin fil lɛk se i nɔ go ebul fɔ bia dis prɔblɛm igen. So i bin tɛl Jiova ɔl wetin de na in at ɛn i aks am fɔ ɛp dɛn. Di dɔktɔ bin disayd fɔ fɛn we fɔ ɛp in ɛn in famili. Dis bin mek dɛn ebul gɛt di ɛp we di gɔvmɛnt de gi pipul dɛn ɛn fɔ gɛt os we dɛn go ebul fɔ de we chip. Leta, Su Yiŋ bin se: “Wi bin si se Jiova de ɛp wi. Fɔ tru, in na ‘di Wan we de yɛri prea.’”—Sam 65:​2.

15. Wetin bin ɛp wan sista fɔ si se Jiova de ansa in prea dɛn?

¹⁵ Bɔku tɛm, Jiova nɔ kin ansa wi prea dɛn di we we wi go kɔle. Bɔt di ansa dɛn we wi kin gɛt na wetin wi nid fɔ kɔntinyu fɔ de biɛn wi Papa we de na ɛvin. So, go de luk fɔ di we dɛn aw Jiova de ansa yu prea dɛn. Wan sista we nem Yoko bin fil se Jiova nɔ de ansa in prea dɛn. Bɔt i bin stat fɔ rayt di tin dɛn we i de aks Jiova fɔ. Afta sɔm tɛm, i bin luk di buk usay i rayt in prea dɛn ɛn i bin kam fɔ si se Jiova dɔn ansa bɔku pan dɛn, ivin sɔm pan di wan dɛn we i bin dɔn fɔgɛt bɔt. Frɔm tɛm to tɛm, wi nid fɔ stɔp ɛn tink bɔt aw Jiova de ansa wi prea dɛn.—Sam 66:​19, 20.

16. Aw wi go sho se wi gɛt fet we i kam to prea? (Ibruz 11:​6)

¹⁶ Wi go sho se wi gɛt fet we wi pre to Jiova ɛn gri se i dɔn ansa wi prea dɛn ilɛk aw i ansa dɛn. (Rid Ibruz 11:​6.) Tink bɔt Mayk ɛn in wɛf Krisi dɛn ɛgzampul. Dɛn bin gɛt di gol fɔ wok na Bɛtɛl. Mayk se: “Mi ɛn mi wɛf bin aplay fɔ wok na Bɛtɛl bɔku tɛm ɛn wi bin de pre to Jiova bɔt dis wi gol ɔltɛm, bɔt dɛn nɔ bin ɛva kɔl wi.” Mayk ɛn Krisi bin kɔntinyu fɔ gɛt kɔnfidɛns se Jiova no di  bɛst we aw fɔ yuz dɛn na in savis. Dɛn kɔntinyu fɔ du ɔl wetin dɛn ebul bay we dɛn bin de sav as rɛgyula payɔnia dɛn usay dɛn bin nid mɔ pɔblisha dɛn ɛn bay we dɛn bin de sɔpɔt di bildin wok dɛn we di ɔganayzeshɔn de du. Tide, dɛn de du di sakit wok. Mayk se: “Nɔto ɔltɛm Jiova dɔn ansa wi prea dɛn di we aw wi de ɛkspɛkt, bɔt i dɔn ansa dɛn di we we ivin bɛtɛ pas wetin wi bin de imajin.”

17-18. Akɔdin to Sam 86:​6, 7, us kɔnfidɛns wi fɔ gɛt?

¹⁷ Rid Sam 86:​6, 7. Devid we na wan pan di man dɛn we rayt di sam buk bin shɔ se Jiova de yɛri ɛn ansa in prea dɛn. Yusɛf go ebul fɔ gɛt da sem kɔnfidɛns de. Di ɛgzampul dɛn we wi dɔn tɔk bɔt na dis atikul de ɛp wi fɔ no se Jiova go gi wi di sɛns ɛn trɛnk we wi nid fɔ bia. I go yuz wi brɔda ɛn sista dɛn ɔ ivin di wan dɛn we nɔ de sav am rayt naw fɔ ɛp wi sɔm we dɛn.

¹⁸ Na tru se sɔntɛm Jiova nɔ go ansa wi prea dɛn di we aw wi de ɛkspɛkt ɔltɛm, bɔt wi no se i go ansa dɛn. I go gi wi wetin wi nid di rayt tɛm we wi nid am. So kɔntinyu fɔ pre ɛn gɛt fet se Jiova go yɛri yu. Biliv tranga wan se Jiova go kia fɔ yu naw ɛn i go “satisfay ɔltin we gɛt layf ɛn . . . gi dɛn wetin dɛn want” na di nyu wɔl we de kam.—Sam 145:​16, NWT.