1. Wetin Jiova de invayt in savant dɛn fɔ du?

 UDAT wi go tɔn to we wi nid pɔsin fɔ kɔrej ɛn gayd wi? Wi no di ansa fɔ da kwɛstyɔn de. Wi kin pre to Jiova Gɔd. Na dat Jiova de invayt wi fɔ du. I want wi fɔ “pre ɔltɛm.” (1 Tɛs. 5:​17) Wi kin fil fri fɔ pre to am ɛn beg am fɔ mek i gayd wi pan ɔltin we wi de du na layf. (Prɔv. 3:​5, 6) Bikɔs Jiova na Gɔd we gɛt fri-an, i nɔ tɛl wi ɔmɔs tɛm wi fɔ pre to am.

2. Wetin wi go tɔk bɔt insay dis atikul?

² Wi valyu di gift fɔ pre. Bɔt bikɔs ɔf di tin dɛn we wi gɛt fɔ du, sɔntɛm i nɔ kin izi fɔ mek wi fɛn tɛm fɔ pre. Sɔntɛm wi go fil se nid de fɔ mek wi sabi fɔ pre fayn wan. Wi gladi fɔ we wi ebul fɔ fɛn tin dɛn na di Baybul we go ɛnkɔrej ɛn gayd wi. Insay dis atikul, wi go tɔk bɔt aw wi go ebul mek tɛm fɔ pre bay we wi tink bɔt Jizɔs in ɛgzampul. Wi go tɔk bak bɔt wetin wi go du fɔ mek wi sabi fɔ pre fayn wan bay we wi ad fayv impɔtant tɔpik dɛn na wi prea.

3. Wetin Jizɔs bin no bɔt prea?

³ Jizɔs bin ɔndastand se Jiova valyu prea. Lɔng tɛm bifo i kam na di wɔl, i bin de si aw in Papa bin de ansa fetful man ɛn uman dɛn prea dɛn. Fɔ ɛgzampul, Jizɔs  bin de nia in Papa we I bin de ansa Ana, Devid, Ilayja ɛn bɔku ɔda pipul dɛn prea. (1 Sam. 1:​10, 11, 20; 1 Kiŋ 19:​4-6; Sam 32:​5) Na dat mek Jizɔs bin tich in disaypul dɛn fɔ pre ɔltɛm ɛn gɛt kɔnfidɛns se Jiova go ansa dɛn prea!—Mat. 7:​7-11.

4. Wetin wi lan frɔm Jizɔs in prea dɛn?

⁴ Jizɔs sɛt ɛgzampul we in disaypul dɛn fɔ fala bay we i bin de pre to Jiova. We Jizɔs bin de prich, i bin de pre ɔltɛm. I bin nid fɔ mek tɛm fɔ pre bikɔs bɔku tɛm i bin bizi ɛn bɔku pipul dɛn bin de arawnd am ɔltɛm. (Mak 6:​31, 45, 46) I bin wek ali mɔnin so dat i go gɛt tɛm fɔ pre in wangren. (Mak 1:​35) Di Baybul tɛl wi bɔt wan tɛm we i bin pre ol nɛt bifo i disayd fɔ du wan impɔtant tin. (Lyuk 6:​12, 13) Ɛn Jizɔs bin pre bɔku tɛm di nɛt bifo i day, ɛn i bin pe atɛnshɔn fɔ dɔn di wok we bin at fɔ du pas ɛni ɔda wok we i bin dɔn du na di wɔl.—Mat. 26:​39, 42, 44.

5. Aw wi go ebul fɔ falamakata Jizɔs we wi de pre?

⁵ Jizɔs in ɛgzampul de tich wi se ilɛk aw wi bizi, wi nid fɔ mek tɛm fɔ pre. Jɔs lɛk Jizɔs, wi nid fɔ fɛn tɛm fɔ pre. Sɔntɛm, wi go nid fɔ wek ali mɔnin ɔ nɔ slip kwik fɔ pre. We wi du dat, wi de sho Jiova se wi gladi fɔ dis spɛshal gift. Wan sista we nem Lin tɔk se we i bin kam fɔ no bɔt di ɔnɔ we i gɛt fɔ pre fɔ di fɔs tɛm, dat bin rili muv am. I tɔk se, “We a kam fɔ no se a go ebul fɔ tɔk to Jiova ɛnitɛm, dat bin ɛp mi fɔ si am as mi tayt Padi ɛn mek a want fɔ sabi aw fɔ pre.” Wan dawt nɔ de se bɔku pan wi de fil da sem we de. So lɛ wi tɔk bɔt fayv men tɔpik dɛn we wi go ebul fɔ ad insay wi prea dɛn.

6. Akɔdin to Rɛvɛleshɔn 4:​10, 11, wetin Jiova fit fɔ gɛt?

⁶ Prez Jiova. Insay wan wɔndaful vishɔn, apɔsul Jɔn bin si 24 ɛlda dɛn na ɛvin de wɔship Jiova. Dɛn bin prez Gɔd ɛn gri se i fit fɔ gɛt “di glori, di ɔnɔ, ɛn di pawa.” (Rid Rɛvɛleshɔn 4:​10, 11.) Fetful enjɛl dɛn bak gɛt bɔku bɔku rizin dɛn fɔ prez ɛn ɔnɔ Jiova. Dɛn de na ɛvin  wit am, ɛn dɛn dɔn kam fɔ no am gud gud wan. Dɛn de si in kwaliti dɛn pan di tin dɛn we i de du. As dɛn de tek tɛm wach di tin dɛn we Jiova de du, dat de muv dɛn fɔ prez am.—Job 38:​4-7.

7. Wetin wi fɔ prez Jiova fɔ?

⁷ Wisɛf fɔ prez Jiova we wi de pre to am. Wi kin du dat bay we wi de tɛl am wetin wi lɛk bɔt am ɛn di tin dɛn we i de du we wi gladi fɔ. As yu de rid ɛn stɔdi di Baybul, tray fɔ si di kwaliti dɛn we Jiova bin sho we yu rili lɛk. (Job 37:​23; Rom. 11:​33) Dɔn tɛl Jiova aw yu de fil bɔt dɛn kwaliti dɛn de. Wi kin prez Jiova bak fɔ we i de sɔpɔt wi ɛn wi brɔda ɛn sista dɛn we de ɔlsay na di wɔl. I de kia fɔ wi ɛn protɛkt wi ɔltɛm.—1 Sam. 1:​27; 2:​1, 2.

8. Wetin na sɔm pan di bɔku rizin dɛn we mek wi fɔ tɛl Jiova tɛnki? (1 Tɛsalonians 5:​18)

⁸ Tɛl Jiova tɛnki. Wi gɛt bɔku rizin dɛn fɔ tɛl Jiova tɛnki we wi de pre. (Rid 1 Tɛsalonians 5:​18.) Wi kin tɛl am tɛnki fɔ ɛni gud tin we wi gɛt bikɔs na frɔm am ɔl gud gift kɔmɔt. (Jems 1:​17) Fɔ ɛgzampul, wi kin sho se wi gladi fɔ di kayn we aw di wɔl fayn ɛn di fayn fayn tin dɛn we i mek. Wi kin tɛl am tɛnki bak fɔ wi layf, wi famili, wi padi dɛn, ɛn wi op. Ɛn wi want fɔ tɛl Jiova tɛnki fɔ we i alaw wi fɔ ɛnjɔy di fayn padi biznɛs we wi gɛt wit am.

9. Wetin mek wi nid fɔ gɛt di abit fɔ sho se wi gladi fɔ wetin Jiova de du fɔ wi?

⁹ Sɔntɛm wi go nid fɔ tray tranga wan fɔ tink bɔt di rizin dɛn we wi gɛt fɔ tɛl Jiova tɛnki. Wi de na wɔl usay pipul dɛn nɔ gɛt tɛnki. Bɔku tɛm, pipul dɛn jɔs de pe atɛnshɔn pan wetin dɛn want, ɛn dɛn nɔ de pe atɛnshɔn pan wetin dɛn go du fɔ sho se dɛn gladi fɔ wetin dɛn gɛt. If wi alaw da we de aw dɛn de biev fɔ afɛkt wi, wi go jɔs de aks Gɔd fɔ tin dɛn we wi pre to am. Fɔ mek dat nɔ go apin, wi fɔ kɔntinyu fɔ gɛt di abit fɔ sho se wi gladi fɔ ɔl wetin Jiova de du fɔ wi.—Lyuk 6:​45.

10. We wan sista bin gɛt di abit fɔ sho se i gɛt tɛnki, aw dat bin ɛp am fɔ bia? (Luk bak di pikchɔ.)

¹⁰ We wi gɛt di abit fɔ de tɛl tɛnki, dat go ɛp wi fɔ bia we wi gɛt prɔblɛm dɛn. Tink bɔt wan sista we nem Yɔŋ-Suk in ɛkspiriɛns, we de na di Janwari 15, 2015, Wachtawa. I bin kam fɔ no se i gɛt kansa na in lɔngs we bin rili siriɔs. I bin tɔk se: “Dis wɛlbɔdi prɔblɛm bin ambɔg mi bad. A bin de fil se a dɔn lɔs ɔltin ɛn a bin de fred bad.” Wetin bin ɛp am fɔ bia? I tɔk se ɛni nɛt bifo i slip, i de go ɔp na in os ɛn pre lawd wan bɔt fayv tin dɛn we i gladi fɔ da de de. Dis bin mek i fil fayn ɛn dat muv am fɔ sho Jiova se i lɛk am. I bin si aw Jiova de ɛp in fetful savant dɛn we gɛt prɔblɛm dɛn we nɔ rili  izi, ɛn i bin kam fɔ no se di blɛsin dɛn we wi gɛt bɔku pas di prɔblɛm dɛn we de mit wi. Jɔs lɛk Yɔŋ-Suk, wi gɛt bɔku rizin dɛn fɔ tɛl Jiova tɛnki, ivin if wi gɛt prɔblɛm. We wi sho se wi gɛt tɛnki we wi de pre to Jiova, dat go ɛp wi fɔ bia ɛn nɔ gɛt pwɛlat.

11. Wetin mek Jizɔs in disaypul dɛn bin nid fɔ gɛt maynd afta Jizɔs go bak na ɛvin?

¹¹ Pre to Jiova fɔ mek i gi yu maynd fɔ du di prichin wok. Jɔs bifo Jizɔs go bak na ɛvin, i bin mɛmba in disaypul dɛn bɔt di wok we i dɔn gi dɛn we na fɔ prich bɔt am “na Jerusɛlɛm, ɛn ɔlsay na Judia ɛn Sameria, ɛn na di say we fa pas ɔl na di wɔl.” (Akt 1:​8; Lyuk 24:​46-48) Shɔt tɛm afta dat, di Ju bigman dɛn pan Gɔd biznɛs bin arɛst apɔsul Pita ɛn Jɔn ɛn go wit dɛn bifo di Sanɛndrin ɛn tɛl dɛn fetful man dɛn ya fɔ stɔp fɔ prich. Dɛn bin ivin trɛtin dɛn. (Akt 4:​18, 21) Wetin Pita ɛn Jɔn bin du?

12. Akɔdin to Akt 4:​29, 31, wetin di disaypul dɛn bin du?

¹² Pita ɛn Jɔn bin ansa di Ju bigman dɛn pan Gɔd biznɛs se: “If i rayt na Gɔd in yay fɔ lisin to una pas fɔ lisin to Gɔd, una jɔj fɔ unasɛf. Bɔt wi nɔ go stɔp fɔ tɔk bɔt di tin dɛn we wi dɔn si ɛn yɛri.” (Akt 4:​19, 20) We dɛn bin fri Pita ɛn Jɔn, di disaypul dɛn bin pre to Jiova fɔ du wetin i want. Dɛn bin pre se: “Mek yu slev dɛn kɔntinyu fɔ gɛt maynd fɔ tɔk bɔt yu wɔd.” Jiova bin ansa dɛn prea.—Rid Akt 4:​29, 31.

13. Wetin wi lan frɔm Jin-Yuk in ɛgzampul?

¹³ Wi go ebul fɔ falamakata di disaypul dɛn if di gɔvmɛnt tɛl wi se wi fɔ stɔp fɔ prich. Tink bɔt Jin-Yuk in ɛgzampul, we na wan brɔda we dɛn bin put na prizin bikɔs i nɔ bin gri fɔ jɔyn soja. We i bin de na prizin, dɛn bin gi am di wok fɔ kia fɔ sɔm prizina dɛn we na dɛn wangren de na dɛn sɛl. Bɔt dɛn nɔ bin alaw am fɔ tɔk bɔt ɛnitin we nɔ gɛt fɔ du wit in wok, i nɔ fɔ ivin tɔk bɔt di Baybul. I bin pre fɔ mek i gɛt maynd ɛn tek tɛm tɔk bɔt di trut ɛnitɛm we i gɛt chans. (Akt 5:​29) I tɔk se: “Jiova bin ansa mi prea dɛn bay we i gi mi di maynd ɛn sɛns fɔ stat fayv-minit Baybul stɔdi na di sɛl domɔt dɛn. Dɔn na nɛt, a bin de rayt lɛta dɛn we a go gi to di prizina dɛn di nɛks de.” Lɛk Jin-Yuk, wisɛf kin pre fɔ gɛt maynd ɛn sɛns, ɛn gɛt kɔnfidɛns se Jiova go ɛp wi fɔ du wi prichin wok.

14. Wetin go ɛp wi we wi de bia prɔblɛm dɛn? (Sam 37:​3,  5)

¹⁴ Pre to Jiova fɔ mek i ɛp yu fɔ bia prɔblɛm dɛn. Bɔku pan wi de sɔfa bikɔs wi gɛt wɛlbɔdi prɔblɛm ɔ wi at rili pwɛl, pɔsin we wi lɛk dɔn day, wi gɛt famili prɔblɛm we nɔ izi, pipul dɛn de mek wi sɔfa, ɔ wi gɛt ɔda prɔblɛm. Ɛn tin dɛn lɛk pandɛmik ɛn wɔ dɔn mek bɔku pan dɛn prɔblɛm dɛn ya tranga mɔ fɔ bia. Pre to Jiova ɛn tɛl am ɔl wetin de na yu at. Tɛl am bɔt wetin de apin to yu jɔs lɛk aw yu go tɛl yu tayt padi. Biliv tranga wan se Jiova “go mɔs ɛp yu.”—Rid Sam 37:​3,  5.

15. Aw prea go ɛp wi fɔ “bia we [wi] gɛt prɔblɛm”? Gi wan ɛgzampul.

¹⁵ We wi nɔ taya fɔ pre, dat go ɛp wi fɔ “bia we [wi] gɛt prɔblɛm.” (Rom. 12:​12) Jiova no wetin de apin to in savant dɛn, “i de yɛri we dɛn kray to am.” (Sam 145:​18, 19) Wan payɔnia we nem  Kristi, we ol 29 ia bin kam fɔ no se dat na tru. I bin bigin fɔ gɛt siriɔs wɛlbɔdi prɔblɛm dɛn we i nɔ bin de ɛkspɛkt. So dat bin mek in at rili pwɛl. Leta, i bin kam fɔ no se in mama gɛt siriɔs sik we go kil am. Kristi se: “A bin rili pre to Jiova fɔ mek i gi mi trɛnk fɔ bia ɛnide. A bin tray fɔ du tin dɛn we go ɛp mi fɔ gɛt tayt padi biznɛs wit Jiova bay we a bin de atɛnd mitin dɛn ɛn du mi pasɔnal stɔdi.” I kɔntinyu fɔ tɔk se: “Prea bin ɛp mi fɔ bia dɛn tɛm dɛn de we tin nɔ bin rili izi. A bin no se Jiova de de fɔ ɛp mi ɔltɛm, ɛn dat bin ɛp mi fɔ gɛt kɔrej. Pan ɔl we mi wɛlbɔdi prɔblɛm nɔ bin dɔn wantɛm wantɛm, Jiova bin ansa mi prea dɛn bay we i bin gi mi pis ɛn kolat.” Lɛ wi nɔ ɛva fɔgɛt se “Jiova no aw fɔ pul pipul dɛn we fetful to am, pan prɔblɛm.”—2 Pit. 2:​9.

16. Wetin mek wi nid Jiova in ɛp fɔ mek wi nɔ du bad we sɔntin tɛmt wi?

¹⁶ Pre to Jiova fɔ ɛp yu fɔ mek yu nɔ du bad we sɔntin tɛmt yu. As mɔtalman dɛn we nɔ pafɛkt, ɔltɛm wi de tray tranga wan fɔ mek wi nɔ du bad we sɔntin tɛmt wi. Setan de du ɔl wetin i ebul fɔ mek tin tranga fɔ wi. Wan we we i de tray fɔ ambɔg di we aw wi de tink na we i de yuz tin dɛn fɔ ɛnjɔy we nɔ fayn. Dɛn kayn ɛnjɔymɛnt dɛn de go mek wi put tin dɛn na wi maynd we nɔ klin, dat na tin dɛn we go dɔti di pɔsin we wi bi insay ɛn we go mek wi kɔmit siriɔs sin.—Mak 7:​21-23; Jems 1:​14, 15.

17. Afta wi dɔn pre fɔ mek Jiova ɛp wi, wetin wi nid fɔ du fɔ avɔyd tɛmteshɔn? (Luk bak di pikchɔ.)

¹⁷ Wi nid Jiova in ɛp fɔ mek wi go avɔyd fɔ du bad we sɔntin tɛmt wi. Jizɔs bin ad dɛn wɔd dɛn ya insay di prea we i bin tich in disaypul dɛn. I bin se: “Nɔ  alaw tɛmteshɔn fɔ ebul wi, bɔt sev wi frɔm di wikɛd wan.” (Mat. 6:​13) Jiova want fɔ ɛp wi, bɔt wi nid fɔ aks am fɔ mek i ɛp wi. Wi fɔ du bak tin dɛn we gri wit wi prea dɛn. Wi kin du wi bɛst fɔ avɔyd fɔ rid ɛn lisin to rɔng tin dɛn we kɔmɔn na Setan in wɔl. (Sam 97:​10) Wi go ebul put tin dɛn na wi maynd we fayn bay we wi de rid ɛn stɔdi di Baybul. We wi de atɛnd di mitin dɛn ɛn du di prichin wok, dat bak go gayd di we aw wi de tink. Ɛn Jiova prɔmis se i nɔ go alaw tɛmteshɔn we wi nɔ ebul fɔ bia fɔ mit wi.—1 Kɔr. 10:​12, 13.

18. We i kam to prea, wetin wi ɔl nid fɔ du?

¹⁸ Wi ɔl nid fɔ pre naw pas ɛni ɔda tɛm fɔ kɔntinyu fɔ fetful to Jiova insay dis las dez we tin nɔ rili izi. Mek tɛm ɛvride fɔ pre wit ɔl yu at. Prez Jiova ɛn tɛl am tɛnki fɔ ɔl wetin i de du. Aks am fɔ ɛp yu fɔ gɛt maynd fɔ du di prichin wok. Beg am fɔ ɛp yu fɔ bia ɛni prɔblɛm ɛn fɔ mek yu nɔ du bad we sɔntin tɛmt yu. Nɔ alaw ɛnitin ɔ ɛnibɔdi fɔ stɔp yu fɔ mek yu nɔ pre to Jiova ɔltɛm. Bɔt aw Jiova de ansa wi prea dɛn? Wi go tɔk bɔt da impɔtant kwɛstyɔn de insay di nɛks atikul.