1. Wetin nɔ bin izi fɔ bɔku pipul dɛn?

 YU DƆN ɛva sɛt spirichwal gol bɔt i nɔ izi fɔ mek yu rich am? b If na so i bi, nɔto yu wan dis dɔn apin to. Fɔ ɛgzampul, Filip bin want fɔ du mɔ fɔ sabi pre fayn wan ɛn fɔ de pre ɔltɛm, bɔt i nɔ bin izi fɔ am fɔ mek tɛm fɔ pre. Ɛrika in gol na bin fɔ de go mitin fɔ fil savis bifo tɛm; bɔt, i stil bin de go let ɔlmost ɔl di mitin dɛn. Tɔmash bin de tray bɔku tɛm fɔ rid di wan ol Baybul. I tɔk se: “A jɔs nɔ bin de ɛnjɔy fɔ rid di Baybul. A tray fɔ du am tri tɛm, bɔt ɔl tri dɛn tɛm dɛn de na Livitikɔs nɔmɔ a bin de rich bifo a faynali stɔp.”

2. Wetin mek wi nɔ fɔ pwɛlat if wi gɛt spirichwal gol we wi nɔ ebul fɔ rich?

² If yu ɔlrɛdi gɛt gol we yu nɔ rich yet, duya nɔ pwɛlat. Bɔku tɛm, pɔsin go nid mɔ tɛm ɛn wok tranga wan fɔ mek i ivin rich simpul gol. Bikɔs yu stil want fɔ rich yu gol, dat de sho se yu valyu yu padi biznɛs wit Jiova ɛn yu want fɔ gi am yu bɛst. Jiova valyu di tray we yu de tray tranga wan fɔ du dat. As wi no, i nɔ de ɛkspɛkt yu fɔ du pas wetin yu ebul du. (Sam 103:​14; Mayk. 6:​8) So we yu de sɛt gol, mek shɔ se yu ebul fɔ rich am. Afta yu dɔn pik yu gol, wetin yu go du fɔ rich am? Lɛ wi tɔk bɔt sɔm advays dɛn we go ɛp wi.

3. Wetin mek i impɔtant fɔ gɛt tin we go muv yu fɔ du sɔntin?

³ I rili impɔtant fɔ gɛt sɔntin we go muv yu fɔ rich yu  gol dɛn. We pɔsin gɛt sɔntin we go muv am fɔ du mɔ, dat go mek i rili want fɔ wok tranga wan fɔ rich in gol. Wi go kɔmpia di tin we de muv wi fɔ du sɔntin to briz we de muv bot fɔ rich usay i de go. If di briz kɔntinyu fɔ blo, di selɔ go ebul fɔ rich usay i de go. Ɛn if di briz de blo ɛvi wan, sɔntɛm i go ivin rich kwik. Semweso, di mɔ wi gɛt tin we de muv wi fɔ du sɔntin, na di mɔ i go pɔsibul fɔ rich wi gol dɛn. Wan brɔda we nem Devid we de na Ɛl Salvadɔ tɔk se: “We yu gɛt tin we de muv yu fɔ du sɔntin, yu go tray tranga wan. Yu go tray fɔ mek natin nɔ stɔp yu fɔ rich yu gol.” So, wetin yu go du fɔ mek yu rili want fɔ du mɔ?

4. Wetin wi go pre fɔ? (Filipians 2:​13) (Luk bak di pikchɔ.)

⁴ Pre fɔ mek yu gɛt sɔntin we go muv yu mɔ ɛn mɔ. Jiova go yuz in spirit fɔ muv yu fɔ rich yu gol. (Rid Filipians 2:​13.) Sɔntɛnde, wi kin sɛt gol bikɔs wi no se wi fɔ du dat, ɛn dat na gud tin. Bɔt sɔntɛm wi nɔ kin rili want fɔ rich am. Na dat bin apin to wan sista na Yuganda we nem Norina. I bin sɛt gol fɔ kɔndɔkt Baybul stɔdi, bɔt i nɔ bin rili want fɔ rich da gol de bikɔs i bin de tink se in nɔto gud ticha. Wetin bin ɛp am? I tɔk se: “A bigin fɔ beg Jiova ɛvride fɔ ɛp mi fɔ mek a rili want fɔ kɔndɔkt Baybul stɔdi. Da sem tɛm de, a bin de tray tranga wan fɔ sabi fɔ tich gud gud wan. Afta sɔm mɔnt, a bin notis se a rili want fɔ kɔndɔkt Baybul stɔdi. Da sem ia de, a bin stat fɔ stɔdi di Baybul wit tu pipul dɛn.”

5. Wetin wi fɔ tink gud wan bɔt we go muv wi fɔ rich wi gol?

⁵ Tink gud wan bɔt wetin Jiova dɔn du fɔ yu. (Sam 143:​5) Apɔsul Pɔl bin tink gud wan bɔt di spɛshal gudnɛs we Jiova bin sho am, ɛn dat bin muv am fɔ wok tranga wan fɔ Jiova. (1 Kɔr. 15:​9, 10; 1 Tim. 1:​12-14) Semweso, di mɔ yu tink bɔt wetin Jiova dɔn du fɔ yu, na di mɔ yu go rili want fɔ rich yu gol. (Sam 116:​12) Tink bɔt wetin bin ɛp wan sista we de na Ɔnduras fɔ rich in gol fɔ bi rɛgyula payɔnia. I tɔk se: “A bin tink gud wan bɔt aw Jiova lɛk mi. I ɛp mi fɔ fɛn in pipul dɛn. I de kia fɔ mi ɛn protɛkt mi. We a tink gud wan bɔt dat, a kam fɔ lɛk am mɔ ɛn mɔ ɛn a bin want fɔ wok tranga wan fɔ bigin payɔnia.”

6. Wetin bak go muv wi mɔ fɔ du sɔntin?

⁶ Pe atɛnshɔn pan di blɛsin we yu go gɛt we yu ebul fɔ rich yu gol. Notis wetin bin ɛp Ɛrika we wi bin dɔn tɔk bɔt fɔ rich in gol fɔ de go kwik na mitin fɔ fil savis. I tɔk se: “A kam fɔ si se a bin de mis bɔku tin we a de let fɔ mitin fɔ fil savis. Bɔt we a go kwik, a go ebul fɔ grit di brɔda ɛn sista dɛn ɛn spɛn tɛm wit dɛn. A go ebul bak fɔ lisin to fayn aydia dɛn we go ɛp  mi fɔ ɛnjɔy ɛn sabi fɔ prich gud gud wan.” Ɛrika bin pe atɛnshɔn pan di bɛnifit dɛn we i go gɛt if i go kwik na fil savis, ɛn i bin ebul fɔ rich in gol. Us blɛsin dɛn yu fɔ pe atɛnshɔn pan? If yu gol na fɔ du mɔ pan yu Baybul ridin ɔ prea, tink bɔt aw dat go ɛp yu fɔ gɛt tayt padi biznɛs wit Jiova. (Sam 145:​18, 19) If yu gol na fɔ gɛt wan Kristian kwaliti, pe atɛnshɔn pan aw dat go ɛp yu fɔ gɛt tayt padi biznɛs wit ɔda pipul dɛn. (Kol. 3:​14) Yu nɔ tink se i go fayn fɔ mek list ɛn put ɔl di rizin dɛn we mek yu want fɔ rich yu gol? Go de wach da list de ɔltɛm. Tɔmash, we wi bin dɔn tɔk bɔt, tɔk se: “We a gɛt bɔku rizin dɛn fɔ rich mi gol, a go wok tranga wan fɔ rich am.”

7. Wetin bin ɛp Ulio ɛn in wɛf fɔ rich dɛn gol?

⁷ Spɛn tɛm wit di wan dɛn we go ɛnkɔrej yu fɔ rich yu gol. (Prɔv. 13:​20) Notis wetin bin ɛp Ulio ɛn in wɛf fɔ rich dɛn gol fɔ du mɔ na di prichin wok. Ulio tɔk se: “Wi pik padi dɛn we bin ɛnkɔrej wi fɔ rich wi gol, ɛn wi bin de tɔk bɔt wi gol wit dɛn. Bɔku pan dɛn bin ɔlrɛdi dɔn rich dɛn sem gol dɛn de, so dɛn bin ebul gi wi aydia dɛn we go ɛp wi. Wi padi dɛn bin de aks wi aw wi plan dɛn de go, ɛn we wi nid ɛnkɔrejmɛnt, dɛn bin de ɛnkɔrej wi.

8. Wetin go apin if wi tray fɔ rich wi gol di tɛm nɔmɔ we wi gɛt tin we de muv wi? (Luk bak di pikchɔ.)

⁸ Fɔ tɔk tru, wi ɔl gɛt tɛm dɛn we wi nɔ kin rili want fɔ du sɔntin. Fɔ se dat min se wi nɔ go tray fɔ rich wi gol? Nɔ. Fɔ ɛgzampul, briz kin rili ɛp fɔ push bot fɔ mek i rich di say we i de go. Bɔt sɔm de dɛn de we bɛtɛ briz nɔ kin blo, ɛn sɔm de dɛn briz nɔ kin blo atɔl. Fɔ se dis min se di selɔ nɔ go kɔntinyu fɔ muv di bot? Nɔ, i nɔ min dat. Fɔ ɛgzampul, sɔm bot dɛn gɛt moto; ɔda wan dɛn gɛt padul dɛn. Di selɔ kin yuz di moto ɔ padul fɔ kɔntinyu fɔ muv di bot fɔ rich usay i de go. Wi go kɔmpia di tin we kin muv wi fɔ du sɔntin to di briz. Sɔm de dɛn de wi kin rili want fɔ du sɔntin pas ɔda de dɛn. Ɛn sɔm de dɛn de, wi nɔ kin want fɔ tray atɔl fɔ rich wi gol. So if wi want fɔ rich wi gol di tɛm nɔmɔ we wi gɛt tin we go muv wi, sɔntɛm wi nɔ go ɛva ebul fɔ rich am. Bɔt jɔs lɛk aw di selɔ de fɛn ɔda we fɔ rich usay i de go, wi go stil ebul rich wi gol ivin if wi nɔ gɛt tin we de muv wi fɔ du dat sɔm de dɛn. Fɔ tru, dat nɔto izi tin fɔ du. Bɔt yu go gladi we yu rich yu gol. Bifo wi tɔk bɔt wetin wi go du, lɛ wi tɔk bɔt wan kwɛstyɔn we sɔntɛm pɔsin go aks.

9. Fɔ se wi fɔ kɔntinyu fɔ tray tranga wan fɔ rich wi gol pan ɔl we wi nɔ rili want fɔ du am? Ɛksplen.

⁹ Jiova want wi fɔ gladi we wi de sav  am ɛn fɔ du am wit ɔl wi at. (Sam 100:​2; 2 Kɔr. 9:​7) So fɔ se wi fɔ kɔntinyu fɔ tray tranga wan fɔ rich wan spirichwal gol ilɛksɛf wi nɔ want fɔ du dat? Lɛ wi tɔk bɔt apɔsul Pɔl in ɛgzampul. I bin tɔk se: “A de sɔfa mi bɔdi ɛn trit am lɛk slev.” (1 Kɔr. 9:​25-27, stɔdi not fɔ vas 27) Pɔl bin fos insɛf fɔ du wetin bin rayt pan ɔl we sɔntɛnde i nɔ bin want fɔ du am. Fɔ se Jiova bin gladi fɔ wetin Pɔl bin du fɔ am? Wan dawt nɔ de se i bin gladi. Jiova bin blɛs am fɔ ɔl wetin i bin du.—2 Tim. 4:​7, 8.

10. Wetin na di bɛnifit dɛn we wi go gɛt we wi tray tranga wan fɔ rich wi gol pan ɔl we wi nɔ gɛt sɔntin we de muv wi?

¹⁰ Semweso, Jiova kin gladi fɔ si we wi de tray tranga wan fɔ rich wi gol pan ɔl we wi nɔ gɛt sɔntin we de muv wi fɔ du am. I kin gladi bikɔs i no se pan ɔl we wi nɔ lɛk di wok we wi de du, wi de du am bikɔs wi lɛk am. Jɔs lɛk aw Jiova bin blɛs Pɔl, na so i go blɛs wi bak fɔ ɔl wetin wi de du fɔ am. (Sam 126:​5) As wi de si aw Jiova de blɛs wi, sɔntɛm dat go muv wi fɔ du mɔ. Wan sista we de na Poland we nem Lutsina bin tɔk se: “Sɔntɛnde, a nɔ kin want fɔ go fil savis, mɔ di tɛm dɛn we a kin taya. Bɔt stil, di gladi-at we a kin gɛt afta a kɔmɔt fil savis na wɔndaful gift.” So lɛ wi si wetin wi go ebul fɔ du di tɛm dɛn we wi nɔ gɛt tin we de muv wi fɔ du sɔntin.

11. Aw Jiova go ɛp wi fɔ mek wi ebul kɔntrol wisɛf mɔ ɛn mɔ?

¹¹ Pre fɔ mek yu ebul kɔntrol yusɛf. Fɔ mek pɔsin kɔntrol insɛf min se i fɔ ebul kɔntrol di we aw i de fil ɛn di tin dɛn we i de du. Bɔku tɛm, dɛn wɔd dɛn ya kin min fɔ avɔyd fɔ du wetin bad. Bɔt wi nid fɔ kɔntrol wisɛf bak fɔ du gud, mɔ if di wok we wi gɛt fɔ du nɔ izi ɔ wi nɔ gɛt tin we de muv wi fɔ du am. Mɛmba se fɔ ebul kɔntrol wisɛf na wan pan di kwaliti dɛn we di spirit de gi, so na fɔ aks Jiova fɔ in oli spirit fɔ ɛp yu fɔ gɛt dis impɔtant kwaliti. (Lyuk 11:​13; Gal. 5:​22, 23) Devid we wi bin dɔn tɔk bɔt, bin ɛksplen aw prea bin ɛp am. I bin want fɔ du in pasɔnal stɔdi ɔltɛm. I tɔk se: “A bin pre to Jiova fɔ ɛp mi fɔ ebul kɔntrol misɛf. Jiova bin ɛp mi fɔ stat gud stɔdi program ɛn fɔ du am ɔltɛm.”

12. Aw di advays we de na Ɛkliziastis 11:​4 de ɛp wi fɔ rich wi spirichwal gol dɛn?

¹² Nɔ wet te ɔltin fayn. Insay dis wɔl, sɔntɛm i nɔ go ɛva pɔsibul fɔ mek ɔltin fayn. If wi se wi de wet fɔ mek ɔltin fayn, wi nɔ go ɛva rich wi gol. (Rid Ɛkliziastis 11:​4.) Wan brɔda we nem Daniɛl tɔk se: “Nɔto ɔltɛm tin go fayn. So wi nɔ fɔ wet, wi fɔ jɔs du wetin wi want fɔ du.” Wan brɔda we nem Pɔl we de na Yuganda tɔk bɔt ɔda rizin we mek wi nɔ fɔ westɛm fɔ du sɔntin. I tɔk se: “Wi jɔs nid fɔ stat, pan ɔl we i nɔ kin izi, Jiova kin ɛp wi.”—Mal. 3:​10.

13. Wetin mek i fayn fɔ bigin wit smɔl smɔl gol dɛn?

¹³ Bigin smɔl smɔl. Sɔntɛnde, wi nɔ kin gɛt sɔntin we de muv wi bikɔs i kin tan lɛk se i nɔ rili izi fɔ rich wi gol. If na so i bi fɔ yu, tray fɔ sɛt smɔl smɔl gol dɛn we go ɛp yu fɔ rich di wan we nɔ izi fɔ rich. If yu gol na fɔ gɛt wan kwaliti, yu nɔ tink se i go fayn fɔ mek yu luk fɔ smɔl smɔl we dɛn fɔs we yu go sho da kwaliti de? If yu gol na fɔ rid di wan ol Baybul, yu nɔ tink se i go fayn fɔ mek yu stat bay we yu de rid am fɔ shɔt tɛm? I nɔ bin izi fɔ Tɔmash we wi bin dɔn tɔk bɔt fɔ rich in gol we na fɔ rid di Baybul insay wan  ia. I tɔk se: “A bin kam fɔ no se di shɛdul we a bin de yuz fɔ rid bin tu fast fɔ mi. So a bin disayd fɔ tray bak, bɔt dis tɛm, a bin plan fɔ rid tu-tri paregraf dɛn ɛvride ɛn tink gud gud wan bɔt dɛn. Dis bin mek a stat fɔ ɛnjɔy fɔ rid di Baybul.” As Tɔmash de ɛnjɔy fɔ rid mɔ ɛn mɔ, i bigin fɔ rid fɔ lɔng tɛm. Afta sɔm tɛm, i bin dɔn fɔ rid di wan ol Baybul. c

14. Us tin dɛn kin apin we kin mek i nɔ izi fɔ rich wi gol?

¹⁴ I sɔri fɔ no se pan ɔl we wi kin gɛt tin we de muv wi fɔ du sɔntin ɛn wi kin dɔn tren wisɛf gud gud wan, tin dɛn kin apin we kin mek i nɔ izi fɔ mek wi du di tin dɛn we wi bin want fɔ du. Fɔ ɛgzampul, “tin dɛn we . . . [wi] nɔ de ɛkspɛkt” kin tek wi tɛm ɛn atɛnshɔn, ɛn dat kin mek na smɔl tɛm nɔmɔ wi go gɛt fɔ du di tin we go ɛp wi fɔ rich wi gol. (Ɛkli. 9:​11, NWT) Wi kin gɛt prɔblɛm dɛn we kin mek wi at pwɛl ɛn nɔ gɛt bɛtɛ trɛnk. (Prɔv. 24:​10) Bikɔs wi nɔ pafɛkt, wi kin du tin dɛn we kin mek i nɔ rili izi fɔ rich wi gol. (Rom. 7:​23) Ɔ sɔntɛnde wi kin jɔs taya. (Mat. 26:​43) If sɔntin apin we de mek i nɔ izi fɔ mek wi rich wi gol, wetin go ɛp wi?

15. If tin dɛn apin we stɔp wi fɔ rich wi gol dɛn, dat min se wi dɔn fel? Ɛksplen. (Sam 145:​14)

¹⁵ Mɛmba se if sɔntin stɔp yu, i nɔ min se yu dɔn fel. Di Baybul tɔk se prɔblɛm dɛn go de mit wi. Bɔt i mek wi no bak klia wan se wi go ebul rich wi gol, mɔ we Jiova ɛp wi. (Rid Sam 145:​14.) Filip we wi bin dɔn tɔk bɔt, bin sho wetin go mek pɔsin go bifo. I bin se: “A nɔ kin pe atɛnshɔn pan di tɛm dɛn we a nɔ bin ebul rich mi gol. Bifo dat, a kin pe atɛnshɔn pan di tɛm dɛn we a bigin du sɔntin fɔ rich mi gol bak.” Devid we wi bin dɔn  tɔk bɔt bin se: “A kin tray nɔ fɔ si di tin dɛn we kin stɔp mi fɔ rich mi gol ɛn di tɛm dɛn we mi at kin pwɛl as prɔblɛm dɛn, bɔt a kin si dɛn as chans fɔ sho Jiova aw a rili lɛk am.” Fɔ tru, we wi kɔntinyu fɔ du tin dɛn fɔ rich wi gol pan ɔl we wi kin gɛt tin dɛn we de stɔp wi fɔ du dat, wi de sho se wi rili want fɔ mek Jiova gladi. Wan dawt nɔ de se Jiova kin gladi we i de si yu de kɔntinyu fɔ tray tranga wan fɔ rich yu gol.

16. Wetin yu go lan if sɔntin apin we mek yu nɔ ebul rich yu gol?

¹⁶ Lan frɔm di tɛm dɛn we sɔntin apin we mek yu nɔ ebul rich yu gol. Tink bɔt wetin bin apin ɛn aks yusɛf dis kwɛstyɔn, ‘Wetin a go du fɔ mek dis nɔ apin igen?’ (Prɔv. 27:​12) Bɔt sɔntɛnde, if i nɔ izi fɔ mek yu rich yu gol, dat de sho se i nɔ pɔsibul fɔ mek yu rich da gol de. If na so i bi fɔ yu, tink bɔt yu gol bak fɔ si if yu d go stil ebul fɔ rich am. Jiova nɔ go si yu as pɔsin we dɔn fel bikɔs yu nɔ ebul fɔ rich yu gol.—2 Kɔr. 8:​12.

17. Wetin mek wi fɔ kɔntinyu fɔ tink bɔt di tin dɛn we wi dɔn ɔlrɛdi du?

¹⁷ Kɔntinyu fɔ tink bɔt di tin dɛn we yu ɔlrɛdi dɔn du. Di Baybul tɔk se “Gɔd nɔ de du wetin nɔ rayt, so i nɔ go fɔgɛt [yu] wok.” (Ibru. 6:​10) So yu bak nɔ fɔ fɔgɛt wetin yu dɔn du. Tink bɔt wetin yu ɔlrɛdi dɔn du. I kin bi di tayt padi biznɛs we yu dɔn gɛt wit Jiova, di prich we yu prich to ɔda pipul dɛn bɔt am, ɔ di baptayz we yu dɔn baptayz. Jɔs lɛk aw yu bin go bifo ɛn rich spirichwal gol dɛn trade, na so yu go ebul kɔntinyu fɔ go bifo pan di gol we yu dɔn sɛt naw.—Fil. 3:​16.

18. Wetin wi fɔ mɛmba fɔ du as wi de tray fɔ rich wi gol? (Luk bak di pikchɔ.)

¹⁸ Wit Jiova in ɛp, yu go ebul fɔ rich yu gol, jɔs lɛk selɔ we kin gladi we i rich usay i de go. Bɔt mɛmba bak se, bɔku selɔ dɛn kin gladi we dɛn de travul. Semweso, as yu de kɔntinyu fɔ wok tranga wan fɔ rich yu gol, tray ɔltɛm fɔ si aw Jiova de ɛp yu ɛn dat go mek yu gladi as yu de tray fɔ rich yu gol. (2 Kɔr. 4:7) If yu nɔ giv-ɔp, yu go gɛt bɔku bɔku blɛsin dɛn.—Gal. 6:​9.