1-2. Wetin mek Kristian dɛn tide fɔ gladi fɔ lan frɔm di Baybul buk we nem Lɛvitikɔs?

DI APƆSUL Pɔl bin mɛmba in yɔŋ padi we nem Timoti se “na Gɔd tɛl pipul ɔltin we rayt nain Buk, ɛn ɔl dɛn tin de gud.” (2 Tim. 3:​16) Lɛvitikɔs na wan pan dɛn buk dɛn de. Aw yu de si dis Baybul buk? Sɔntɛm sɔm pipul dɛn go si am as buk we gɛt bɔku lɔ dɛn we wi nɔ nid tide, bɔt tru Kristian dɛn de si am difrɛn we.

² I dɔn pas 3,500 ia we Jiova mek Mozis rayt Lɛvitikɔs, bɔt I mek dɛn kip am fɔ “lan wi sɔntin.” (Rom 15:​4) Wi fɔ gladi fɔ lan frɔm di Baybul buk we nem Lɛvitikɔs bikɔs i de ɛp wi fɔ ɔndastand aw Jiova de tink ɛn fil bɔt sɔm tin dɛn. Fɔ tru, bɔku lɛsin dɛn de we wi kin lan frɔm dis buk we Gɔd mek dɛn rayt. Lɛ wi tɔk bɔt 4 pan dɛn.

3. Wetin mek dɛn bin de mek sakrifays ɛvri ia di De fɔ Fɔgiv Sin?

³ Fɔs lɛsin: Wi nid fɔ mek Jiova gladi bifo i tek wi sakrifays dɛn. Ɛvri ia, di Izrɛlayt dɛn bin de kam togɛda fɔ mek di ay prist go mek animal sakrifays dɛn di De fɔ Fɔgiv Sin. Dɛn sakrifays dɛn de bin de ɛp di Izrɛlayt dɛn fɔ mɛmba se dɛn nid Jiova fɔ fɔgiv dɛn sin. Bɔt bifo di ay prist kɛr ɛni animal in blɔd fɔ sakrifays na di Ples we Oli Pas Ɔl da de de, i bin nid fɔ du sɔntin fɔs. Ɛn dis tin bin impɔtant pas di sakrifays we i fɔ mek fɔ lɛ Jiova fɔgiv dɛn sin.

4. Frɔm wetin de na Lɛvitikɔs 16:​12, 13, wetin di ay prist bin de du di fɔs tɛm we i go insay di Ples we Oli Pas Ɔl di De fɔ Fɔgiv Sin? (Luk di pikchɔ na di frɔnt pej.)

 ⁴ Rid Lɛvitikɔs 16:​12, 13. Tray fɔ imajin wetin bin de apin di De fɔ Fɔgiv Sin: Di ay prist go insay di tabanakul. Dis na di fɔstɛm pan di tri tɛm dɛn we i fɔ go insay di Ples we Oli Pas Ɔl da de de. I kin ol pan we gɛt insɛns we de smɛl fayn na wan an, dɔn na in ɔda an, i ol gold tre we gɛt chakol we gɛt faya. I wet smɔl bifo di kɔtin we de bifo di Ples we Oli Pas Ɔl. I go insay di Ples we Oli Pas Ɔl wit rɛspɛkt ɛn tinap bifo di agrimɛnt bɔks. We i du dis, i tan lɛk se i tinap bifo Jiova Gɔd! Di prist tek tɛm tɔn di oli insɛns pan di chakol we gɛt faya, ɛn di wan ol rum smɛl fayn. * Leta, i kin go bak na di Ples we Oli Pas Ɔl wit di animal we dɛn dɔn sakrifays in blɔd. Notis se i bɔn di insɛns bifo i gi di animal in blɔd as sakrifays dɛn fɔ sin.

5. Wetin wi kin lan frɔm di insɛns we di ay prist bin de yuz di De fɔ Fɔgiv Sin?

⁵ Wetin wi kin lan frɔm di insɛns we di ay prist bin de yuz di De fɔ Fɔgiv Sin? Di Baybul sho se Jiova in fetful savant dɛn prea tan lɛk insɛns. (Sam 141:​2; Rɛv. 5:​8) Mɛmba se we di ay prist bin de go wit di insɛns bifo Jiova, i bin de du am wit dip rɛspɛkt. Semweso, we wi de pre to Jiova wi de du am wit rɛspɛkt. Wi rili gladi we di Wan we mek ɔltin de alaw wi fɔ pre to am ɛn go nia am, jɔs lɛk aw pikin de go nia in papa. (Jems 4:​8) I kin gri fɔ mek wi bi in padi dɛn! (Sam 25:​14) Wi rili gladi fɔ dis big big ɔnɔ we wi gɛt, na dat mek wi nɔ want fɔ du ɛnitin we go mek Jiova nɔ gladi.

6. Wetin wi kin lan frɔm di bɔn we di ay prist bin de bɔn insɛns fɔs bifo i mek di sakrifays dɛn?

⁶ Mɛmba se di ay prist bin gɛt fɔ bɔn insɛns bifo i mek di sakrifays dɛn. Bay da we de, i bin de mek shɔ se Jiova gladi wit am we i de mek di sakrifays dɛn. Wetin wi lan frɔm dat? We Jizɔs bin de na dis wɔl, bifo i sakrifays in layf, i bin gɛt fɔ du sɔntin we rili impɔtant pas di sakrifays we i mek fɔ sev mɔtalman. Wetin na da tin de? Jizɔs bin nid fɔ obe Jiova we i bin de na dis wɔl te i day fɔ mek Jiova tek in sakrifays. Bay da we de, Jizɔs sho se fɔ du wetin Jiova want na di bɛst tin fɔ du. Jizɔs sɔpɔt ɔ pruv se na in Papa gɛt di rayt fɔ rul.

7. Wetin mek Jizɔs in Papa bin gladi wit di we aw i liv in layf na dis wɔl?

⁷ We Jizɔs bin de na dis wɔl, i bin de du wetin Jiova want ɔltɛm. Pan ɔl we dɛn bin tɛmt am, tin nɔ bin izi fɔ am, ɛn i bin no se i gɛt fɔ sɔfa bifo i day, i bin rɛdi fɔ sho se di we aw in Papa de rul na di bɛst we. (Fil. 2:​8, NW) We tin nɔ bin izi fɔ Jizɔs, i “ala lawd ɛn kray wɛn i de pre.” (Ibru 5:​7) In prea dɛn bin sho se i bin de biɛn Jiova ɛn dɛn mek i rɛdi fɔ obe am mɔ ɛn mɔ. To Jiova, Jizɔs in prea dɛn bin tan lɛk di fayn smɛl we insɛns gɛt. Jizɔs bin rili mek in Papa gladi bay di we aw i liv in layf, ɛn i sho se na in Papa gɛt di rayt fɔ rul.

8. Aw wi go falamakata di we aw Jizɔs bin liv in layf?

⁸ Wi go falamakata Jizɔs bay we wi de du wi bɛst fɔ obe Jiova ɛn kɔntinyu fɔ de  biɛn am. We tin nɔ kin izi fɔ wi, wi kin pre to Jiova fɔ mek i ɛp wi bikɔs wi want fɔ du tin we go mek i gladi. We wi de du dɛn tin dɛn ya, wi de sho se wi de sɔpɔt di we aw Jiova de rul. Wi no se Jiova nɔ go ansa wi prea dɛn if wi de du tin dɛn we i et. Bɔt if wi de du tin dɛn we Jiova lɛk, wi shɔ se i go si wi prea dɛn we de kɔmɔt na wi at lɛk insɛns we gɛt fayn smɛl. Wan ɔda tin we wi shɔ bɔt na dat wi Papa we de na ɛvin kin gladi we wi kɔntinyu fɔ de biɛn am ɛn tinap tranga wan fɔ du wetin rayt.—Prɔv. 27:​11.

9. Wetin mek di Izrɛlayt dɛn bin de mek pis ɔfrin?

⁹ Sɛkɔn lɛsin: Wi de sav Jiova bikɔs wi gladi fɔ wetin i dɔn du. Fɔ lɛ wi no mɔ bɔt dis rizin, lɛ wi lan bɔt di pis ɔfrin dɛn we na bin impɔtant pat pan di Izrɛlayt dɛn wɔship trade. * Di Baybul buk we nem Lɛvitikɔs ɛp wi fɔ no se ɛni Izrɛlayt bin de mek pis ɔfrin bikɔs “i wan fɔ tɛl PAPA GƆD tɛnki.” (Lɛv. 7:​11-13, 16-18) I nɔ bin de mek dis ɔfrin bikɔs dɛn fos am fɔ du am, bɔt na bikɔs i gladi fɔ du am. So dis na ɔfrin we pɔsin bin rɛdi fɔ mek bikɔs i lɛk in Gɔd Jiova. Di pɔsin we bin de mek di ɔfrin, in famili, ɛn di prist dɛn bin de it di bif we de pan di animal we dɛn sakrifays. Bɔt sɔm pat dɛn de pan di animal we dɛn bin de gi Jiova in wangren. Us pat dɛn?

10. Aw di pis ɔfrin we Lɛvitikɔs 3:​6, 12, 14-16 tɔk bɔt, fiba Jizɔs in savis to Jiova?

 ¹⁰ Tɔd lɛsin: Wi de gi Jiova wi bɛst bikɔs wi lɛk am. Jiova bin de si di fat we de pan animal as di bɛst pat. I bin tɔk bak se sɔm ɔda pat dɛn pan animal lɛk di kidni bin spɛshal to am. (Rid Lɛvitikɔs 3:​6, 12, 14-16.) So Jiova bin de gladi mɔ we di Izrɛlayt dɛn bin de gi am di fat ɛn di ɔda pat dɛn we de pan di animal we dɛn de sakrifays. Di Izrɛlayt dɛn we bin de mek da ɔfrin de bin de sho se dɛn rili want fɔ gi Jiova dɛn bɛst. Na di sem we Jizɔs insɛf bin gladi fɔ gi Jiova in bɛst bay we i sav am wit ɔl in at bikɔs i lɛk am. (Jɔn 14:​31) Jizɔs bin lɛk fɔ du wetin Gɔd want; i bin rili lɛk Gɔd in lɔ. (Sam 40:​8) Jiova bin rili gladi fɔ si se Jizɔs de sav am wit ɔl in at!

11. Aw di wɔship we wi de wɔship Jiova fiba di pis ɔfrin we di Izrɛlayt dɛn bin de mek, ɛn aw dat de ɛnkɔrej wi?

¹¹ Di wɔship we wi de wɔship Jiova fiba dɛn pis ɔfrin dɛn de, bikɔs na da we de wi de sho Jiova aw wi de fil bɔt am. Wi de gi wi bɛst to Jiova bikɔs wi lɛk am wit ɔl wi at. Jiova kin rili gladi we i de si aw bɔku bɔku pipul dɛn de sav am bikɔs dɛn lɛk am, ɛn dɛn lɛk di tin dɛn we i de du. Wan tin we kin ɛnkɔrej wi na we wi de mɛmba se Jiova nɔ jɔs de si ɛn valyu wetin wi de du, bɔt i no ɛn valyu wetin mek wi de du sɔntin. Fɔ ɛgzampul, if yu na ol pɔsin we nɔ ebul fɔ du ɔl wetin yu go want fɔ du, mɛmba se Jiova ɔndastand wetin de apin to yu. Sɔntɛm yu de fil se yu nɔ ebul du bɔku tin fɔ Jiova, bɔt i de si se yu rili lɛk am, ɛn i no se na dat de mek yu du wetin yu ebul fɔ du. I kin gladi fɔ tek di bɛst tin we yu ebul fɔ gi am.

12. Aw Jiova bin de fil bɔt di pis ɔfrin we di Izrɛlayt dɛn bin de mek, ɛn aw dat de ɛnkɔrej yu?

¹² Wetin wi go lan frɔm di pis ɔfrin we di Izrɛlayt dɛn bin de mek trade? We di faya bin de bɔn di bɛst pat pan di animal, di smɔk bin de go ɔp, ɛn dat bin de mek Jiova gladi. Na fɔ no se Jiova kin gladi we yu de du wetin i want, ɛn we yu de du am wit ɔl yu at. (Kɔl. 3:​23, NW) Tray fɔ imajin aw i kin gladi fɔ yu. Ilɛksɛf wetin yu de du fɔ Jiova bɔku ɔ smɔl, mɛmba se i rili valyu wetin yu de du ɛn i nɔ go ɛva fɔgɛt am.—Mat. 6:​20; Ibru 6:​10.

13. Frɔm wetin de na Lɛvitikɔs 9:​23, 24, aw Jiova bin sho se i gladi fɔ di prist dɛn we i bin pik?

¹³ Nɔmba 4 lɛsin: Jiova de blɛs di pat pan in ɔganayzeshɔn we de na dis wɔl. Tink bɔt wetin bin apin insay di ia 1512 bifo Krays, di tɛm we dɛn mek di tabanakul dɔŋ Mawnt Saynay. (Ɛks. 40:​17) Na Mozis bin de bifo di sɛrimɔni we dɛn mek fɔ Erɔn ɛn in bɔy pikin dɛn we Jiova bin pik fɔ bi prist. Ɔl di Izrɛlayt dɛn bin gɛda togɛda fɔ wach we di prist dɛn de mek dɛn fɔs animal sakrifays dɛn. (Lɛv. 9:​1-5) Aw Jiova bin sho se i gladi fɔ di nyu prist dɛn we I dɔn pik? We Mozis ɛn Erɔn bin de blɛs di pipul dɛn, Jiova mek faya kɔmɔt na ɛvin ɛn bɔn di sakrifays we bin dɔn lɛf na di ɔlta.—Rid Lɛvitikɔs 9:​23, 24.

14. Wetin mek i impɔtant fɔ no se Jiova bin gladi fɔ Erɔn ɛn in bɔy pikin dɛn we i bin pik fɔ bi prist?

¹⁴ Wetin di faya we kɔmɔt na ɛvin bin sho? Jiova sɛn di faya fɔ sho se i de sɔpɔt Erɔn ɛn in bɔy pikin dɛn we i dɔn pik fɔ bi prist. We di Izrɛlayt dɛn si klia wan se Jiova de sɔpɔt di prist dɛn, dat ɛp dɛn fɔ  no se dɛnsɛf nid fɔ sɔpɔt di prist dɛn. Yu tink se da tin de we bin apin trade gɛt ɛnitin fɔ du wit wi tide? Yɛs! Wetin du? Na bikɔs di prist dɛn we bin de insay di Izrɛlayt dɛn tɛm tinap fɔ prist dɛn we gɛt fɔ de wit Krays na ɛvin, ɛn we go bɛtɛ pas di wan dɛn we bin de trade. Krays na di Ay Prist we pas ɔl di ɔda ay prist dɛn, ɛn i gɛt 144,000 pipul dɛn we go bi kiŋ ɛn prist wit am na ɛvin.—Ibru 4:​14; 8:​3-5; 10:​1.

15-16. Aw Jiova dɔn sho se i gladi fɔ di wok we di “slev we fetful ɛn gɛt sɛns” de du?

¹⁵ Insay 1919, Jizɔs bin pik sɔm anɔyntɛd brɔda dɛn fɔ bi “di slev we fetful ɛn gɛt sɛns.” Na dis slev de bifo di prichin wok, ɛn dɛn de gi Krays in disaypul dɛn “it di rayt tɛm.” (Mat. 24:​45, NW) Yu nɔ tink se di tin dɛn we de apin de ɛp wi fɔ no se Jiova gladi fɔ di slev we fetful ɛn gɛt sɛns?

¹⁶ Setan ɛn di wan dɛn we de sɔpɔt am de tray fɔ pwɛl di wok we di slev we fetful ɛn gɛt sɛns de du. Bɔt bikɔs Jiova de ɛp dɛn, dat de mek Setan ɛn di wan dɛn we de sɔpɔt am nɔ ebul pwɛl dɛn wok. Pan ɔl we tu wɔl wɔ bin dɔn bi, mɔni prɔblɛm de ɔlsay na di wɔl, ɛn pipul dɛn de mek Gɔd in savant dɛn sɔfa, di slev we fetful ɛn gɛt sɛns de kɔntinyu fɔ gi Krays in disaypul dɛn wetin dɛn nid fɔ bi Gɔd in padi. Tink bɔt di bɔku bɔku buk, magazin, ɛn ɔda tin dɛn we wi gɛt tide. I pas 900 langwej dɛn we dɛn dɔn translet dɛn, ɛn dɛn ɔl na fri. Dis de sho klia wan se Jiova de sɔpɔt di fetful slev. Di prichin wok na wan ɔda we we de sho klia wan se Jiova de blɛs in ɔganayzeshɔn. Fɔ tru, di gud nyuz dɔn  rich “ɔlman na [di] wɔl.” (Mat. 24:​14) Wi nɔ gɛt wan dawt fɔ se Jiova de gayd ɛn blɛs in ɔganayzeshɔn tide.

17. Aw wi go sho se wi de sɔpɔt di ɔganayzeshɔn we Jiova de yuz tide?

¹⁷ I go fayn fɔ mek wi aks wisɛf dis kwɛstyɔn, ‘A gladi fɔ de pat pan Jiova in ɔganayzeshɔn we de na dis wɔl?’ Jɔs lɛk aw Jiova bin mek faya kɔmɔt na ɛvin insay Mozis in tɛm fɔ sho se i gladi fɔ di wan dɛn we i bin dɔn anɔynt fɔ bi prist, na so i de sho klia wan se na dis ɔganayzeshɔn i de yuz tide. Wi rili gɛt bɔku tin fɔ tɛl Jiova tɛnki fɔ. (1 Tɛs. 5:​18, 19) Aw wi go sho se wi de sɔpɔt Jiova in ɔganayzeshɔn we i de yuz? Wi go du dat we wi fala di advays dɛn we de insay di Baybul, wi buk ɛn magazin dɛn, ɛn ɔda tin dɛn we wi kin lan na wi mitin dɛn, asɛmbli, ɛn kɔnvɛnshɔn dɛn. Apat frɔm dis, wi go sho se wi de sɔpɔt Jiova in ɔganayzeshɔn bay we wi de du ɔl wetin wi ebul fɔ prich ɛn tich.—1 Kɔr. 15:​58.

18. Wetin yu dɔn mekɔp yu maynd fɔ du?

¹⁸ Lɛ wi mekɔp wi maynd fɔ du wetin wi dɔn lan insay di Baybul buk we nem Lɛvitikɔs. Lɛ wi tray fɔ du tin we go mek Jiova gladi fɔ di sakrifays dɛn we wi de mek. Lɛ wi sav Jiova bikɔs wi gladi fɔ wetin i dɔn du. Lɛ wi kɔntinyu fɔ gi Jiova wi bɛst bikɔs wi lɛk am wit ɔl wi at. Ɛn lɛ wi kɔntinyu fɔ du ɔl wetin wi ebul fɔ sɔpɔt Jiova in ɔganayzeshɔn we i de yuz tide wit ɔl wi at. We wi du dɛn tin dɛn ya, wi go sho se wi gladi fɔ di ɔnɔ we wi gɛt fɔ wɔship am as in Witnɛs dɛn.