1. Akɔdin to Matyu 28:​18-20, wetin Jizɔs bin tɛl in disaypul dɛn fɔ du?

AFTA Jizɔs gɛt layf bak, i bin apia to in disaypul dɛn we bin gɛda na Galili. I bin gɛt impɔtant tin fɔ tɛl dɛn. Wetin na da tin de? Di tin dɛn we i bin tɔk de na Matyu 28:​18-20.—Rid.

2. Us kwɛstyɔn dɛn wi go tɔk bɔt?

² Gɔd in savant dɛn tide nid fɔ mek pipul dɛn bi disaypul jɔs lɛk aw Jizɔs bin se. So lɛ wi tɔk bɔt tri kwɛstyɔn dɛn we gɛt fɔ du wit dis wok we Jizɔs dɔn gi wi fɔ du. Fɔs, us ɔda tin wi fɔ du apat frɔm we wi de tich pipul dɛn bɔt wetin Gɔd want wi fɔ du? Sɛkɔn, wetin ɔl di pɔblisha dɛn na di kɔngrigeshɔn go du fɔ ɛp Baybul studɛnt dɛn fɔ kam nia Jiova? Tɔd, aw wi go ɛp wi kɔmpin Kristian dɛn we inaktiv fɔ bigin prich bak?

3. Us patikyula tin we Jizɔs bin tɛl wi fɔ du?

³ Di tin we Jizɔs tɛl wi fɔ du nɔ at fɔ ɔndastand. I bin se wi fɔ tich pipul dɛn di tin dɛn we i dɔn tɛl wi fɔ du. Bɔt wan impɔtant tin de we wi nɔ fɔ fɔgɛt. Jizɔs nɔ bin se: ‘Una tich dɛn ɔl di tin dɛn we a dɔn tɛl una.’ Bɔt i bin se: Una tich dɛn “fɔ du ɔl di tin dɛn we a dɔn tɛl una.” Fɔ mek wi go du wetin Jizɔs bin dɔn tɛl wi fɔ du we wi de tich wi Baybul studɛnt dɛn, wi nɔ fɔ jɔs tich dɛn, bɔt wi fɔ gayd dɛn bak. (Akt 8:​31) Wetin mek wi fɔ du dat?

4. Wetin i min fɔ du wetin pɔsin tɛl wi? Gi wan ɛgzampul.

 ⁴ Fɔ “du” wetin pɔsin tɛl wi fɔ du min se wi fɔ obe am. Lɛ wi tɔk bɔt wan ɛgzampul we go ɛp wi fɔ no aw wi go tich pɔsin fɔ du wetin Krays tɛl wi fɔ du ɔ fɔ obe am. Aw pɔsin we de tich pipul dɛn aw fɔ drayv go tich dɛn fɔ obe di trafik lɔ dɛn? Fɔs, we dɛn de na klas, i go tich dɛn di lɔ dɛn we dɛn fɔ fala we dɛn de drayv. Bɔt i fɔ du ɔda tin fɔ lɛ i go sho dɛn aw dɛn fɔ obe dɛn lɔ dɛn de. I go nid fɔ de wit di studɛnt as i de drayv ɛn tray fɔ fala di tin dɛn we i dɔn lan. Wetin wi go lan frɔm dis ɛgzampul?

5. (a) Akɔdin to Jɔn 14:​15 ɛn 1 Jɔn 2:​3, wetin wi nid fɔ tich wi Baybul studɛnt dɛn fɔ du? (b) Gi ɛgzampul dɛn bɔt tin dɛn we wi go du fɔ gayd wi studɛnt dɛn.

⁵ We wi de stɔdi di Baybul wit ɔda pipul dɛn, wi de tich dɛn bɔt wetin Gɔd want wi fɔ du. Bɔt nɔto dat nɔmɔ wi fɔ du. Wi fɔ tich wi Baybul studɛnt dɛn fɔ du di tin dɛn we dɛn de lan ɛvride na dɛn layf. (Rid Jɔn 14:​15; 1 Jɔn 2:​3.) Wi kin yuz wi ɛgzampul fɔ sho wi studɛnt dɛn aw dɛn fɔ fala di prinsipul dɛn na di Baybul we dɛn de na skul, na wokples, ɔ we dɛn de ɛnjɔy dɛnsɛf. Wi kin tɛl dɛn bak se we wi fala Baybul prinsipul, dat dɔn mek bad tin nɔ mit wi, ɛn i bin ɛp wi fɔ disayd fɔ du di rayt tin. We wi de wit wi studɛnt dɛn, wi kin pre to Jiova fɔ mek i gayd dɛn wit in oli spirit.—Jɔn 16:​13.

6. Us ɔda tin wi fɔ du we wi de tich wi studɛnt dɛn fɔ du wetin Jizɔs tɛl wi?

⁶ Us ɔda tin wi fɔ du we wi de tich wi studɛnt dɛn fɔ du wetin Jizɔs tɛl wi? Wi nid fɔ ɛp wi Baybul studɛnt dɛn fɔ lɛk di prichin wok. Sɔm studɛnt dɛn kin fred we dɛn de mɛmba se dɛn gɛt fɔ prich. So wi nid fɔ peshɛnt wit dɛn we wi de ɛp dɛn fɔ ɔndastand di tru na di Baybul fɔ mek dɛn gɛt mɔ fet, ɛn dat go mek di tin we dɛn de lan tɔch dɛn at, ɛn dɛn go want fɔ prich to ɔda pipul dɛn. Wetin wi go du fɔ ɛp wi studɛnt dɛn fɔ mek dɛn lɛk di prichin wok?

7. Aw wi go ɛp wi studɛnt fɔ mek i lɛk fɔ prich di gud nyuz to ɔda pipul dɛn?

⁷ Sɔntɛm wi kin aks wi Baybul studɛnt kwɛstyɔn dɛn lɛk: “Aw di Kiŋdɔm mɛsej dɔn ɛp yu fɔ liv bɛtɛ layf? Yu tink se ɔda pipul dɛn nid fɔ yɛri dis mɛsej? Wetin yu go du fɔ ɛp dɛn?” (Prɔv. 3:​27; Mat. 9:​37, 38) Sho di studɛnt di trakt dɛn we de na wi Tichin Tulbɔks ɛn mek i pik di wan dɛn we i fil se go fayn fɔ in fambul dɛn, in padi dɛn, ɔ in wokmet dɛn. Gi am sɔm pan di trakt dɛn. Dɔn una praktis aw i go tɔk fayn we i de prich wit di trakt. Ɛn afta we wi studɛnt bi ɔnbaptayz pɔblisha, wi nid fɔ prich wit am fɔ ɛp am.—Ɛkli. 4:​9, 10; Lyuk 6:​40.

8. Wetin mek i impɔtant fɔ lɛ wi studɛnt dɛn lɛk Gɔd ɛn dɛn neba mɔ ɛn mɔ? (Luk di bɔks we se “ Aw Wi Go Ɛp Wi Baybul Studɛnt dɛn fɔ Lɛk Gɔd Mɔ ɛn Mɔ?”)

⁸ Mɛmba se Jizɔs bin tɛl wi se wi fɔ tich pipul dɛn “fɔ du ɔl di tin dɛn” we i dɔn tɛl wi. Dat min se wi fɔ tich dɛn di tu lɔ dɛn we pas ɔl, we na fɔ lɛk Gɔd ɛn wi neba, ɛn dɛn tu lɔ dɛn ya gɛt sɔntin fɔ du wit di wok fɔ prich ɛn fɔ mek disaypul. (Mat. 22:​37-39) Aw dɛn kɔnɛkt? Wan men rizin we  mek wi de prich na bikɔs wi lɛk Gɔd ɛn wi neba dɛn. Wi ɔndastand se sɔm pan wi Baybul studɛnt dɛn kin fred fɔ prich. Bɔt wi kin mek dɛn no se Jiova go ɛp dɛn smɔl smɔl fɔ mek dɛn nɔ fred mɔtalman. (Sam 18:​1-3; Prɔv. 29:​25) Di bɔks we de insay dis atikul tɔk bɔt difrɛn tin dɛn we wi go du fɔ ɛp wi studɛnt fɔ mek i lɛk Gɔd mɔ ɛn mɔ. Apat frɔm dat, wetin di kɔngrigeshɔn go du fɔ ɛp wi Baybul studɛnt dɛn fɔ lɛk Gɔd mɔ?

9. Insay di ɛgzampul bɔt pɔsin we de lan fɔ drayv, aw di studɛnt go lan fayn lɛsin dɛn?

⁹ Tink bak bɔt di ɛgzampul bɔt pɔsin we de lan fɔ drayv. Aw dis pɔsin go lan we in ticha sidɔm nia am we i de drayv? Na we i de lisin to in ticha ɛn wach ɔda pipul dɛn we de tek tɛm drayv. Fɔ ɛgzampul, in ticha go sho am pɔsin we alaw ɔda drayva fɔ go bifo am. Ɔ i go sho am drayva we de dɔl in layt fɔ lɛ ɔda drayva dɛn si. Dɛn ɛgzampul dɛn de, de tich di studɛnt fayn lɛsin bɔt tin dɛn we insɛf go du we i de drayv.

10. Wetin go ɛp Baybul studɛnt fɔ go bifo pan Gɔd biznɛs?

¹⁰ Semweso, we Baybul studɛnt de stat fɔ sav Jiova, i nɔ jɔs de lan frɔm in ticha bɔt i de lan bak frɔm ɔda pipul dɛn we de sav Jiova ɛn we de sɛt fayn ɛgzampul. So wetin go rili ɛp Baybul studɛnt dɛn fɔ go bifo pan Gɔd biznɛs? Na we dɛn de atɛnd wi mitin dɛn. Wetin mek? Na bikɔs di tin dɛn we dɛn de yɛri na mitin go ɛp dɛn fɔ lan mɔ, gɛt strɔng fet, ɛn lɛk Gɔd mɔ ɛn mɔ. (Akt 15:​30-32) Apat frɔm dat, we di studɛnt go mitin, in Baybul ticha kin sho am to sɔm brɔda ɛn sista dɛn we dɔn go tru di sem tin dɛn we de apin to am. Dɔn bak, di studɛnt go si brɔda ɛn sista dɛn we de sho lɔv na di kɔngrigeshɔn. Lɛ wi tɔk bɔt sɔm ɛgzampul dɛn.

11. Us ɛgzampul dɛn we Baybul studɛnt go si na di kɔngrigeshɔn? Aw dat go afɛkt di studɛnt?

¹¹ Wan Baybul studɛnt we na in wan de mɛn in pikin dɛn kin si wan sista na di kɔngrigeshɔn we insɛf na in wan de mɛn in pikin dɛn. We i si aw di sista de du in bɛst fɔ kam Kiŋdɔm Ɔl wit in smɔl pikin dɛn, dat kin rili tɔch in at. Ɔ wan studɛnt we de tray fɔ lɛf fɔ smok kam fɔ sabi wan brɔda we insɛf bin ebul fɔ lɛf fɔ smok. Di brɔda tɛl am se na di lɔv we i gɛt fɔ Jiova de ɛp am fɔ du wetin I want. (2 Kɔr. 7:​1; Fil. 4:​13) Afta we di brɔda tɛl di studɛnt bɔt aw i bin lɛf fɔ smok, i tɛl am se, “Yusɛf go ebul lɛf fɔ smok.” Dat bin ɛnkɔrej di studɛnt ɛn i bin kam fɔ biliv se insɛf go ebul lɛf fɔ smok. Wan ɔda Baybul studɛnt we na yɔŋuman notis se wan yɔŋ sista gladi we i de sav Jiova. Dis tin we di Baybul studɛnt notis bɔt di yɔŋ sista mek insɛf want fɔ lan mɔ bɔt wetin mek dis yɔŋ sista gladi ɔltɛm.

12. Wetin mek wi go se ɔlman we de na di kɔngrigeshɔn gɛt sɔntin fɔ du fɔ ɛp Baybul studɛnt dɛn?

¹² We Baybul studɛnt dɛn no difrɛn fetful brɔda ɛn sista dɛn, dɛn go ebul lan frɔm dɛn ɛgzampul ɛn no wetin i min fɔ obe Krays in lɔ we se wi fɔ lɛk Gɔd ɛn wi neba. (Jɔn 13:​35; 1 Tim. 4:​12) Apat frɔm dat, jɔs lɛk aw wi bin dɔn tɔk, Baybul studɛnt kin lan frɔm brɔda ɛn sista dɛn we de go tru di sem kayn prɔblɛm dɛn we insɛf gɛt. Dɛn  ɛgzampul dɛn de ɛp am fɔ no se i go ebul mek di chenj dɛn we i nid fɔ mek fɔ bi Krays in disaypul. (Dit. 30:​11) Ɔlman na di kɔngrigeshɔn go ebul du difrɛn tin dɛn we go ɛp Baybul studɛnt dɛn fɔ go bifo pan Gɔd biznɛs. (Mat. 5:​16) So wi kin aks wisɛf dis kwɛstyɔn we se: “Wetin mi kin du fɔ ɛnkɔrej Baybul studɛnt dɛn we kin kam na mitin?”

13-14. Aw Jizɔs bin trit in apɔsul dɛn we dɛn bin de fil bad bɔt dɛnsɛf?

¹³ Wi want fɔ ɛp wi brɔda ɛn sista dɛn we inaktiv fɔ bigin prich bak ɛn mek disaypul dɛn. Jizɔs bin sɛt fayn ɛgzampul bɔt aw wi go du dat bay di we aw i bin trit in apɔsul dɛn we bin de fil bad bɔt dɛnsɛf.

¹⁴ Jɔs bifo dɛn kil Jizɔs, di apɔsul dɛn ɔl bin “lɛf am ɛn rɔnawe.” (Mak 14:​50; Jɔn 16:​32) Wetin Jizɔs bin du da tɛm de we in apɔsul dɛn at bin pwɛl? Jɔs afta we Jizɔs bin gɛt layf bak, i bin tɛl sɔm pan in disaypul dɛn se: “Una nɔ fred! Una go tɛl mi brɔda dɛn [se a dɔn gɛt layf bak].” (Mat. 28:​10a) Jizɔs nɔ bin lɛf in apɔsul dɛn. Pan ɔl we dɛn bin dɔn lɛf am, i bin stil kɔl dɛn in “brɔda dɛn.” Jizɔs bin falamakata Jiova fɔ sho se i gɛt sɔri-at ɛn i de fɔgiv.—2 Kiŋ 13:​23.

15. Aw wi kin fil bɔt di wan dɛn we dɔn lɛf fɔ prich?

¹⁵ Wisɛf rili bisin bɔt di wan dɛn we dɔn lɛf fɔ prich. Dɛn na wi brɔda ɛn sista dɛn, ɛn wi lɛk dɛn! Wi kin stil mɛmba ɔl di wok we dɛn brɔda ɛn sista dɛn ya bin du fɔ Jiova, ɛn sɔm pan dɛn bin du am fɔ lɔng tɛm. (Ibru. 6:​10) Wi de rili mis dɛn! (Lyuk 15:​4-7) Aw wi go falamakata Jizɔs fɔ sho se wi bisin bɔt dɛn?

16. Aw wi go sho se wi bisin bɔt wi brɔda ɛn sista dɛn we inaktiv?

¹⁶ Tɔk to dɛn fayn we yu de invayt dɛn fɔ atɛnd mitin. Wan we aw Jizɔs bin ɛnkɔrej in apɔsul dɛn we dɛn bin de fil bad bɔt dɛnsɛf, na we i bin invayt dɛn fɔ go wan mitin. (Mat. 28:​10b; 1 Kɔr. 15:​6) Wisɛf kin ɛnkɔrej di inaktiv wan dɛn fɔ atɛnd mitin if dɛn nɔ de du dat. Wi no se sɔntɛm wi go nid fɔ invayt dɛn bɔku tɛm bifo dɛn kam. Jizɔs bin gladi we in disaypul dɛn bin gri fɔ atɛnd di mitin.—Luk Matyu 28:​16 ɛn Lyuk 15:​6.

17. Wetin wi fɔ du we wan brɔda ɔ sista we inaktiv atɛnd mitin?

¹⁷ Wɛlkɔm dɛn fayn. We Jizɔs ɛn in disaypul dɛn bin mitɔp, i bin sho se i gladi fɔ si dɛn bay we in fɔs bin tɔk to dɛn. (Mat. 28:​18) Wetin wi go du we wan brɔda ɔ sista we inaktiv kam na Kiŋdɔm Ɔl? Na wi fɔs fɔ go mit am ɛn wɛlkɔm am fayn. Sɔntɛm we wi jɔs si am, wi go de wɔri se wi nɔ go no wetin fɔ tɔk. Wi nɔ fɔ mek i shem, bɔt wi fɔ tɛl am se wi rili gladi fɔ si am.

18. Aw wi go ɛnkɔrej inaktiv pɔblisha dɛn?

¹⁸ Ɛnkɔrej dɛn. I go mɔs bi se Jizɔs in disaypul dɛn bin de fil se dɛn nɔ go ebul prich ɔlsay na di wɔl. So Jizɔs bin ɛnkɔrej dɛn bay we i se: “A de wit una ɔltɛm.” (Mat. 28:​20) Yu tink se dis bin ɛp di disaypul dɛn? Yɛs, i bin ɛp dɛn. Insay shɔt tɛm, dɛn bin bizi de “tich ɛn tɔk bɔt di gud nyuz.” (Akt 5:​42) Inaktiv pɔblisha dɛnsɛf nid ɛnkɔrejmɛnt. Sɔntɛm dɛn go fred we dɛn mɛmba se dɛn go nid fɔ bigin prich  bak. Wi kin ɛnkɔrej dɛn bay we wi go ɛp dɛn fɔ no se dɛn nɔ go nid fɔ du dat bay dɛnsɛf. Wi kin jɔyn dɛn fɔ go prich di tɛm we dɛn rɛdi fɔ du dat. Dɛn go mɔs gladi fɔ we wi de ɛp dɛn di tɛm we dɛn de stat fɔ prich bak. We wi sho di inaktiv wan dɛn se wi stil de si dɛn as wi brɔda ɛn sista dɛn, sɔntɛm dat go ɛp dɛn fɔ bigin kam mitin ɛn fɔ prich bak. Ɛn ɔlman na di kɔngrigeshɔn go gladi we dat apin.

19. Wetin wi rili want fɔ du? Wetin mek?

¹⁹ Aw lɔng wi go kɔntinyu fɔ prich ɛn mek disaypul? Wi go kɔntinyu fɔ du dis wok te di ɛnd kam. (Mat. 28:​20; luk Baybul Wɔd dɛn Minin, “Tɛm (dɛn).”) Fɔ se wi go ebul fɔ prich ɛn mek disaypul te da tɛm de? Wi dɔn mekɔp wi maynd se na dat wi go du! Wi kin gladi fɔ yuz wi tɛm, wi ɛnaji, ɛn wi mɔni fɔ fɛn di wan dɛn “we rili sho se dɛn want fɔ gɛt layf we go de sote go.” (Akt 13:​48) We wi du dis, wi de fala Jizɔs in ɛgzampul. I bin se: “Mi it na fɔ du wetin di Wan we sɛn mi want ɛn fɔ dɔn in wok.” (Jɔn 4:​34; 17:​4) Na dat wisɛf rili want fɔ du. Wi want fɔ dɔn di wok we Jizɔs dɔn gi wi. (Jɔn 20:​21) Ɛn wi want lɛ ɔda pipul dɛn, ivin di inaktiv wan dɛn, jɔyn wi fɔ du dis wok.—Mat. 24:​13.

20. Akɔdin to Filipians 4:​13, wetin mek wi go ebul fɔ du di wok we Jizɔs tɛl wi fɔ du?

²⁰ Na tru se i nɔ izi fɔ du wetin Jizɔs tɛl wi fɔ du. Bɔt wi nɔ de du dis wok bay wisɛf. Jizɔs bin dɔn prɔmis wi se i go de wit wi. Lɛ wi mɛmba se as wi de du dis wok, wi na “Gɔd in kɔmpin wokman dɛn” ɛn “Krays in disaypul dɛn.” (1 Kɔr. 3:​9; 2 Kɔr. 2:​17) So wi go ebul fɔ du dis wok. Na big big ɔnɔ wi gɛt fɔ du dis wok ɛn fɔ ɛp ɔda pipul dɛn fɔ jɔyn wi, ɛn wi kin gladi fɔ du am!—Rid Filipians 4:​13.