BƆKU brɔda ɛn sista dɛn we bin dɔn go ovasi trade dɔn kam bak na dɛn kɔntri usay dɛn bɔn. Bikɔs dɛn lɛk Jiova ɛn dɛn kɔmpin mɔtalman, dat dɔn mek dɛn go na say dɛn usay dɛn nid mɔ pɔblisha dɛn fɔ prich. (Mat. 22:​37-39) Us chenj dɛn bin nid fɔ mek, wetin-ɛn-wetin dɛn bin lɛf biɛn fɔ du dat, ɛn aw Jiova bin blɛs dɛn? Fɔ fɛn di ansa, lɛ wi go na Kamɛrun, insay Wɛst Afrika.

Insay 1998, wan brɔda we nem Onɛsima bin lɛf in om kɔntri we na Kamɛrun ɛn go liv na ovasi fɔ 14 ia. Wan de we i bin de na mitin, i yɛri wan ɛgzampul bɔt di prichin wok. Di brɔda bin se, “If tu padi dɛn go fishin bɔt dɛn de difrɛn say dɛn, ɛn di ɔda wan de kech mɔ fish pas in kɔmpin, yu nɔ tink se di wan we nɔ de kech bɛtɛ fish go go na di say we in kɔmpin de kech bɔku fish?”

Da ɛgzampul de bin mek Onɛsima tink fɔ go bak na Kamɛrun usay bɔku pipul dɛn want fɔ stɔdi di Baybul ɛn ɛp di pɔblisha dɛn we de de. Bɔt i bin de wɔri if i go ebul yus fɔ liv na Kamɛrun bak, mɔ we i dɔn te we i de liv ovasi. Onɛsima bin kam liv na Kamɛrun fɔ siks mɔnt fɔ si if i go ebul fɔ liv de bak. Dɔn insay 2012, i bin kam bak fɔ kam liv na Kamɛrun.

Onɛsima bin se: “A bin nid fɔ ajɔst to di we aw ples wam, ɛn di we aw pipul dɛn de liv. We a de na Kiŋdɔm Ɔl, a bin nid fɔ yus fɔ sidɔm pan bɛnch bak.” I bin de smayl we i de tɔk se: “Di mɔ we a de pe atɛnshɔn to di program, na di mɔ a de fɔgɛt bɔt di fayn sit dɛn we a bin de sidɔm pan.”

Insay 2013, Onɛsima mared Jiraldin, we bin dɔn kam bak na Kamɛrun afta we i dɔn liv na Frans fɔ nayn ia. Aw Jiova bin blɛs dɛn bikɔs dɛn kɔntinyu fɔ put wetin I want fɔs na dɛn layf? Onɛsima bin se: “Wi ɔl tu bin atɛnd di Skul fɔ Pipul dɛn We De Prich bɔt Gɔd in Kiŋdɔm, ɛn leta wi wok na Bɛtɛl. Infakt, insay jɔs wan ia, 20 Baybul studɛnt dɛn bin baptayz na wi kɔngrigeshɔn. Naw a no se a de na di rayt ples fɔ ‘fishin.’” (Mak 1:​17, 18) Jiraldin bin se: “A dɔn gɛt bɔku blɛsin dɛn we a nɔ bin de ɛva tink se a go gɛt.”

Judit bin dɔn go de na Amɛrika, bɔt i bin want fɔ du mɔ fɔ Jiova. I bin tɔk se, “A bin de kam waka na Kamɛrun fɔ kam fɛn mi fambul dɛn. Bɔt ɛnitɛm we a kin gɛt fɔ go bak, a kin kray bikɔs a bin gɛt fɔ lɛf bɔku pipul dɛn we a bin dɔn bigin stɔdi di Baybul wit.”  Bɔt Judit bin de fred fɔ kam liv bak na Kamɛrun. I bin gɛt gud wok we bin de mek i gɛt mɔni fɔ pe fɔ in papa we nɔ bin wɛl we bin de na Kamɛrun. Bɔt Judit bin abop pan Jiova, ɛn i kam bak na Kamɛrun. I tɔk se i bin de mis sɔm pan di tin dɛn we i bin de ɛnjɔy we i bin de na Amɛrika. Bɔt i bin pre to Jiova fɔ mek i ɛp am fɔ ajɔst ɛn di sakit ovasia ɛn in wɛf bin ɛnkɔrej am.

Judit bin tɔk bak se, “Insay jɔs tri ia, a bin gladi fɔ gɛt 4 spirichwal pikin dɛn.” Judit bin bigin fɔ sav as spɛshal payɔnia. Naw, in ɛn in man Sam-Kasul, de ɛnjɔy di sakit wok. Bɔt wetin bin apin to Judit in papa? In ɛn in famili bin ebul fɔ fɛn wan ɔspitul we de na ɔda kɔntri, ɛn dɛn bin gri fɔ pe fɔ in papa in ɔpreshɔn. Ɛn di ɔpreshɔn bin kɔmɔt fayn.

Wan brɔda we nem Viktɔ bin go de na Kanada. Afta we i rid wan Wachtawa atikul bɔt bɔku buk lanin, i bin tink bɔt in yunivasiti biznɛs. I bin lɛf fɔ go na di yunivasiti ɛn i go na wan vokeshɔnal sɛnta fɔ lan tred. Viktɔ bin se: “Dat mek a gɛt wok kwik, ɛn i alaw mi fɔ du wetin a bin ɔlwez want fɔ du, we na fɔ payɔnia.” Leta, i mared wan sista we nem Karolayn, ɛn dɛn ɔl tu bin kam waka na Kamɛrun. We dɛn bin go, dɛn go waka na di branch ɔfis, ɛn sɔm brɔda dɛn bin ɛnkɔrej dɛn fɔ tink if dɛn go ebul fɔ kam prich na Kamɛrun. Viktɔ se: “Wi nɔ bin gɛt no rizin fɔ tɔk se wi nɔ go ebul kam. Bikɔs wi bin dɔn de liv simpul layf, i bin izi fɔ lɛ wi gri fɔ kam.” Pan ɔl we Karolayn bin de gɛt smɔl smɔl wɛlbɔdi prɔblɛm, dɛn bin disayd fɔ muf kam na Kamɛrun.

Viktɔ ɛn Karolayn bin bigin sav as rɛgyula payɔnia so dat dɛn go ɛp bɔku pipul dɛn we bin want fɔ no mɔ bɔt di Baybul. Fɔ sɔm tɛm, dɛn bin ebul fɔ yuz di mɔni we dɛn bin dɔn kip so dat dɛn nɔ go wok we dɛn jɔs kam. Afta dat, dɛn bin go wok fɔ sɔm mɔnt na Kanada so dat dɛn go gɛt mɔni fɔ kam bak na Kamɛrun ɛn kɔntinyu fɔ payɔnia. Aw Jiova bin blɛs dɛn? Dɛn bin atɛnd di Skul fɔ Pipul dɛn We De Prich bɔt Gɔd in Kiŋdɔm, dɛn bin sav as spɛshal payɔnia, ɛn naw dɛn na kɔnstrɔkshɔn savant dɛn. Viktɔ se, “We wi lɛf di tin dɛn we wi bin de ɛnjɔy ɛn abop pan Jiova, i kɔntinyu fɔ tek kia ɔf wi.”

Insay 2002, Alan na bin yunivasiti studɛnt na Jamani. I bin rid di trakt we nem Youths—What Will You Do With Your Life? Di tin dɛn we i bin rid na di trakt bin mek i sɛt nyu gol dɛn. Insay 2006, i bin atɛnd di Ministerial Training School, ɛn dɛn bin sɛn am na Kamɛrun, di kɔntri usay i bɔn.

We Alan kam na Kamɛrun, i bin fɛn wok we i nɔ bin de du ɛvride insay di wik. Leta, i bin gɛt wok we de mek i gɛt bɔku mɔni, bɔt i bin de wɔri se dat go mek i nɔ ebul fɔ spɛn bɛtɛ tɛm na di prichin wok. So we dɛn bin invayt am fɔ sav as spɛshal payɔnia, i bin gri kwik kwik wan. In bɔs bin tɛl am se i go gi am mɔ mɔni bɔt i nɔ bin gri, i disayd fɔ bi spɛshal payɔnia. Leta, Alan mared Stɛfni, we insɛf bin dɔn liv fɔ sɔm tɛm na Frans. Wetin nɔ bin izi fɔ Stɛfni afta we i kam bak na Kamɛrun?

I se: “A bin de gɛt af-af wɛlbɔdi prɔblɛm, bɔt a bin de manej fɔ gɛt tritmɛnt ɛn a bin de fil bɛtɛ.” Jiova bin blɛs in ɛn in man fɔ we dɛn de bia. Alan se, “We wi go prich na wan vilej we nem Kate, wi bin mit bɔku pipul dɛn we bin want fɔ stɔdi di Baybul. Leta, wi bin  de yuz fon fɔ kɔndɔkt Baybul stɔdi dɛn. Tu pan dɛn wi Baybul stɔdi dɛn ya bin baptayz, ɛn wi bin gɛt wan grup na da vilej de.” Stɛfni bin tɔk se: “No ɔda tin nɔ de mek wi gladi mɔ pas fɔ stɔdi di Baybul wit pipul dɛn te dɛn disayd fɔ gi dɛn layf to Jiova. Ɛn we wi dɔn kam ya, wi de si dat de apin bɔku tɛm.” Naw, Alan ɛn Stɛfni de du di sakit wok.

Gizɛl bin baptayz we i bin de go mɛdikal skul na Itali. I bin rili kɔle di we aw di sista ɛn in man we bin de stɔdi am bin de liv simpul layf, ɛn i bin want fɔ du mɔ na di prichin wok. So Gizɛl bin bigin fɔ rɛgyula payɔnia di tɛm we i bin de faynal ia.

Gizɛl bin want fɔ kam bak na Kamɛrun so dat i go ebul fɔ du mɔ fɔ sav Jiova, bɔt i bin gɛt sɔm tin dɛn we bin de mek i wɔri. I se, “A bin gɛt fɔ giv-ɔp mi rayt fɔ liv na Itali, ɛn a bin gɛt fɔ lɛf mi padi dɛn ɛn mi fambul dɛn we bin de de.” Bɔt pan ɔl dat, insay Me 2016, Gizɛl bin kam bak na Kamɛrun. Afta sɔm tɛm, i mared to wan brɔda we nem Lions, ɛn di branch ɔfis na Kamɛrun bin ɛnkɔrej dɛn fɔ muf go na wan tɔŋ we nem Ayɔs, usay dɛn nid mɔ pɔblisha dɛn fɔ prich.

Aw layf bin tan lɛk na Ayɔs? Gizɛl bin se: “Bɔku tɛm, layt nɔ kin de fɔ sɔm wiks, ɛn wi nɔ kin ebul fɔ chaj wi fon dɛn. So bɔku tɛm, di fon dɛn kin de ɔf. A bin lan fɔ kuk wit faya wud, ɛn wi bin de yuz wilbaro ɛn tɔchlayt fɔ go gɛt wata na nɛt we bɔku pipul dɛn nɔ kin de usay wi kin gɛt.” Wetin bin ɛp Gizɛl ɛn in man fɔ bia? Gizɛl se: “Na Jiova in spirit bin de ɛp wi fɔ bia. Mi ɛn mi man bin de sɔpɔt wisɛf, ɛn sɔm pan wi padi ɛn fambul dɛn bin de ɛnkɔrej wi. Ɛn sɔntɛnde, dɛn bin de sɛn mɔni fɔ wi.”

Gizɛl bin gladi we i kam bak na in kɔntri usay i bɔn? I se: “Yɛs, a bin rili gladi! We mi ɛn mi man bin jɔs kam, tin nɔ bin izi fɔ wi, ɛn sɔntɛnde wi at bin de pwɛl. Bɔt we dat lɛf fɔ apin, wi bin gladi ɛn wi no se wi bin du wetin wi nid fɔ du. Wi abop pan Jiova, ɛn wi dɔn kam nia am mɔ ɛn mɔ.” Lions ɛn Gizɛl bin atɛnd di Skul fɔ Pipul dɛn We De Prich bɔt Gɔd in Kiŋdɔm ɛn naw dɛn de sav as tɛmporari spɛshal payɔnia.

Jɔs lɛk aw fishaman kin gɛt maynd fɔ go fishin ɛn kech bɔku fish pan ɔl we i nɔ izi, na so di wan dɛn we de kam bak na dɛn kɔntri usay dɛn bɔn de lɛf bɔku tin dɛn biɛn so dat dɛn go ɛp pipul dɛn we want fɔ lan bɔt Gɔd in Kiŋdɔm. Wan dawt nɔ de se Jiova nɔ go ɛva fɔgɛt wetin dɛn pɔblisha dɛn ya dɔn du fɔ sho se dɛn lɛk in nem. (Nɛi. 5:​19; Ibru. 6:​10) If yu de liv ovasi, ɛn nid de fɔ mɔ pɔblisha dɛn na di kɔntri usay yu bɔn, yu go ebul fɔ go bak? If yu du dat, Jiova go blɛs yu.—Prɔv. 10:​22.