A bɔn 1983. We a bin smɔl, a bin gɛt wɛlbɔdi. Bɔt we a bin ol tɛn ia, a bin bigin gɛt siriɔs pen dɛn na mi bɔdi. Arawnd tu ia afta dat, a wek wan mɔnin, ɛn a nɔ ebul muv mi bɔdi. A tray te fɔ muv mi lɛg dɛn, bɔt a nɔ bin ebul fɔ du am. Frɔm da tɛm de naw, a nɔ ebul fɔ waka igen. Dɔn bak di sik bin mek mi bɔdi lɛf fɔ gro. So te tide, a stil fiba lɛk smɔl pikin.

Afta sɔm mɔnt we a sik, a nɔ ebul fɔ lɛf mi os igen. Na da tɛm de tu Jiova Witnɛs dɛn kam fɛn mi. We pipul dɛn bin de kam fɛn mi, a bin de tray fɔ ayd, bɔt da de de a bin alaw di uman dɛn fɔ tɔk to mi. As dɛn bin de tɔk to mi bɔt Paradays, i mek a mɛmba wetin a bin dɔn yɛri we a bin de arawnd fayv ia. Da tɛm de, wan mishɔnari we nem Jɛtro we bin de na Surinam, bin de kam na wi vilej wan tɛm insay di mɔnt, ɛn i bin de stɔdi di Baybul wit mi papa. Jɛtro bin de rili trit mi fayn ɛn a bin lɛk am. Dɔn bak mi grani ɛn mi granpa bin de kɛr mi go na sɔm mitin dɛn we di Witnɛs dɛn bin de gɛt na wi vilej. So we wan pan di uman dɛn we bin kam fɛn mi da de de we nem Flɔrɛns bin aks mi if a go lɛk fɔ no mɔ, a bin se yɛs.

Flɔrɛns bin kam bak wit in man we nem Jɔstɔs, ɛn dɛn bin bigin fɔ stɔdi di Baybul wit mi. We dɛn bin notis se a nɔ sabi rid, dɛn bin ɛp mi fɔ lan fɔ rid. Afta sɔm tɛm, a bin sabi rid. Wan de, dɛn bin tɛl mi se dɛn dɔn sɛn dɛn fɔ go prich na Surinam. Ɛn nɔbɔdi nɔ bin de na Oriala fɔ stɔdi di Baybul wit mi. Bɔt a gladi we Jiova nɔ fɔgɛt mi.

I nɔ tu te, wan payɔnia we nem Flɔyd bin kam na Oriala, ɛn i mit mi we i bin de prich frɔm os to os. We i aks mi if a want fɔ stɔdi di Baybul, a smayl. I aks mi se, “Wetin mek yu de smayl?” A bin tɛl am se a bin dɔn ɔlrɛdi stɔdi di brosho we nem What Does God Require of Us? ɛn a bin dɔn bigin stɔdi di buk we nem Knowledge That Leads to Everlasting Life. * A ɛksplen wetin mek di stɔdi bin stɔp. Flɔyd bin dɔn fɔ stɔdi di Knowledge buk wit mi, bɔt dɛn bin sɛn insɛf fɔ go prich ɔdasay. A nɔ bin gɛt Baybul ticha bak.

 Bɔt insay 2004, dɛn bin sɛn Granvil ɛn Jɔshwa we na spɛshal payɔnia dɛn fɔ kam prich na Oriala. Dɛn bin de prich frɔm os to os, ɛn dɛn bin mit mi. We dɛn bin aks mi if a want fɔ stɔdi di Baybul, a bin smayl. A bin aks dɛn fɔ stɔdi di Knowledge buk wit mi frɔm di biginin. A bin want fɔ si if dɛn go tich mi di sem tin dɛn we mi ɔda ticha dɛn bin dɔn tich mi. Granvil bin tɛl mi bɔt di mitin dɛn we dɛn kin gɛt na di vilej. Pan ɔl we a nɔ bin lɛf mi os fɔ ɔlmost tɛn ia, a bin want fɔ go. So Granvil bin kam na mi os ɛn put mi na wilchia ɛn push mi go na Kiŋdɔm Ɔl.

Leta, Granvil bin ɛnkɔrej mi fɔ jɔyn di Tiokratik Ministri Skul. I bin se, “Na tru se yu nɔ ebul waka, bɔt yu ebul tɔk. Wan de, yu go gi pɔblik tɔk. I go mɔs apin.” Di wɔd dɛn we i tɛl mi bin mek a gɛt kɔnfidɛns.

A bin bigin fɔ go prich wit Granvil. Bɔt bɔku pan di rod dɛn nɔ bin ta, ɛn i bin bad fɔ wilchia. So a bin tɛl Granvil fɔ put mi na wilbaro. Di wilbaro bin izi fɔ yuz. Insay Epril 2005, a bin baptayz. Shɔt tɛm afta dat, di brɔda dɛn bin tren mi aw fɔ kia fɔ di pɔblikeshɔn dɛn na di kɔngrigeshɔn ɛn aw fɔ andul di sawnd sistɛm na di Kiŋdɔm Ɔl.

Insay 2007, mi papa bin day na bot aksidɛnt. Wi famili bin rili shɔk. Granvil bin pre wit wi, ɛn i bin rid sɔm ɛnkɔrejin skripchɔ dɛn to wi. Tu ia afta dat, wi bin gɛt ɔda shɔk we Granvil insɛf bin day na bot aksidɛnt.

Wi smɔl kɔngrigeshɔn nɔ bin gɛt no ɛlda igen pas wan ministerial savant. A bin rili fil am bikɔs mi padi Granvil dɔn day. I bin de ɛp mi ɔltɛm fɔ kam nia Jiova ɛn fɔ gɛt bɔku ɔda tin dɛn we a nid. Na mi bin fɔ rid di Wachtawa na di fɔs mitin afta we Granvil bin day. Na paregraf wan ɛn tu nɔmɔ a bin ebul fɔ rid na in a bigin kray, a kray te pas we dɛn pul mi na stej.

A bigin fɔ fil fayn we brɔda dɛn na ɔda kɔngrigeshɔn bin kam fɔ ɛp wi na Oriala. Dɔn di branch ɔfis bin sɛn Kojo we na spɛshal payɔnia. A bin gladi we mi mama ɛn mi smɔl brɔda bin stat fɔ stɔdi ɛn bin baptayz. Dɔn insay Mach 2015, dɛn bin mek mi ministerial savant. Afta sɔm tɛm, a bin gi mi fɔs pɔblik tɔk. Da de de, a bin kray ɛn a bin smayl we a tink bɔt wetin Granvil bin tɔk we i se, “Wan de, yu go gi pɔblik tɔk. I go mɔs apin.”

Di JW TV^® program dɛn de ɛp mi fɔ no bɔt mi kɔmpin Kristian dɛn we gɛt mi kayn prɔblɛm. Pan ɔl we dɛn sik, dɛn ebul fɔ du bɔku bɔku tin dɛn ɛn dɛn gladi. Misɛf ebul fɔ du sɔm tin dɛn. Bikɔs a bin want fɔ gi mi bɛst to Jiova, a bin stat fɔ rɛgyula payɔnia. Insay Sɛptɛmba 2019, dɛn bin tɛl mi sɔntin we a nɔ bin de ɛkspɛkt fɔ yɛri. A kam fɔ no se dɛn dɔn mek mi ɛlda na wi kɔngrigeshɔn we gɛt lɛk 40 pɔblisha dɛn so.

A gladi fɔ di brɔda ɛn sista dɛn we dɔn stɔdi wit mi ɛn we dɔn ɛp mi fɔ mek a sav Jiova. Bɔt di men tin we a gladi fɔ na we Jiova nɔ fɔgɛt mi.