1. Wetin go kɔrej wi we wi fil se na wi wangren de ɔ we prɔblɛm dɛn de mɔna wi? (Sam 118:​5-7)

YU DƆN ɛva fil se na yu wangren de, ɛn dat pɔsin nɔ de fɔ ɛp yu fɔ bia yu prɔblɛm dɛn? Bɔku pipul dɛn dɔn fil da we de, ivin Jiova in fetful savant dɛn. (1 Kiŋ 19:​14) If dat ɛva apin to yu, mɛmba se Jiova bin dɔn prɔmis yu se: “A nɔ go ɛva lɛf yu, ɛn a nɔ go ɛva lɛf fɔ ɛp yu.” So wi go tɔk wit kɔnfidɛns se: “Na Jiova de ɛp mi; a nɔ go fred.” (Ibru. 13:​5, 6) Di apɔsul Pɔl bin rayt dɛn wɔd dɛn ya to in kɔmpin Kristian dɛn na Judia arawnd di ia 61 afta Krays. Dɛn wɔd dɛn ya we i tɔk mek wi mɛmba di wɔd dɛn we de na Sam 118:​5-7.—Rid.

2. Wetin wi go tɔk bɔt insay dis atikul? Wetin mek?

² Jɔs lɛk di man we rayt Sam 118, Pɔl bin no se Jiova de ɛp am bikɔs i bin dɔn ɛp am bɔku ɔda tɛm dɛn. Fɔ ɛgzampul, arawnd tu ia bifo Pɔl rayt in lɛta to di Ibru Kristian dɛn, i bin travul di tɛm we di si bin rɔf. (Akt 27:​4, 15, 20) Da tɛm de we Pɔl bin de na di si, ɛn ivin bifo dat, Jiova ɛp am difrɛn difrɛn we dɛn. Wi go tɔk bɔt tri pan dɛn. Jiova bin yuz Jizɔs ɛn di enjɛl dɛn, pipul dɛn we de na pawa, ɛn in kɔmpin Kristian dɛn fɔ ɛp am. Di tin dɛn we wi de kam lan bɔt wetin bin apin to Pɔl go ɛp wi fɔ lɛ wi biliv pan Gɔd in prɔmis mɔ ɛn mɔ se i go ansa wi prea dɛn.

3. Wetin Pɔl go dɔn tink bɔt? Wetin mek?

³ Pɔl bin nid ɛp. Arawnd di ia 56 afta Krays, bɔku pipul dɛn drɛg am kɔmɔt na di tɛmpul na Jerusɛlɛm ɛn tray fɔ kil am. Di nɛks de, we dɛn briŋ Pɔl na di Sanɛndrin, in ɛnimi dɛn bin dɔn bit am bad bad wan. (Akt 21:​30-32; 22:​30; 23:​6-10) I go mɔs bi se bay da tɛm de, Pɔl go de tink to insɛf se, ‘Aw lɔng a go kɔntinyu fɔ bia dis kayn bad we aw dɛn de trit mi?’

4. Aw Jiova bin yuz Jizɔs fɔ ɛp Pɔl?

⁴ Aw Jizɔs bin ɛp Pɔl? Di nɛt afta we dɛn arɛst Pɔl, “di Masta,” Jizɔs, bin tinap nia am ɛn tɛl am se: “Tek kɔrej! Jɔs lɛk aw yu dɔn de prich bɔt mi gud gud wan na Jerusɛlɛm, na so yu gɛt fɔ prich bɔt mi na Rom.” (Akt 23:​11) Dis bin rili ɛnkɔrej Pɔl. Jizɔs bin tɛl Pɔl tɛnki fɔ we i bin dɔn prich na Jerusɛlɛm. Ɛn i prɔmis Pɔl se i go rich sef wan na Rom usay i go kɔntinyu fɔ prich. Afta we Jizɔs mek dis prɔmis to Pɔl, i go dɔn fil sef jɔs lɛk aw pikin kin fil sef we in papa kin ol am.

5. Aw Jiova bin yuz enjɛl fɔ ɛp Pɔl? (Luk di pikchɔ na di frɔnt pej.)

⁵ Us ɔda prɔblɛm bin mit Pɔl? Arawnd tu ia afta dis tin we bin apin na Jerusɛlɛm, Pɔl bin de na ship fɔ go Itali we big big briz bigin fɔ blo. Di briz bin so big dat di ɔda pipul dɛn na di ship bin fil se dɛn go day. Bɔt Pɔl nɔ bin fred. Wetin mek? I tɛl di ɔda pipul dɛn se: “Dis nɛt di Gɔd we gɛt mi ɛn we a de sav, in enjɛl kam tinap nia mi ɛn tɔk se: ‘Pɔl, nɔ fred. Yu go mɔs tinap bifo Siza, ɛn Gɔd dɔn gi yu ɔl di wan dɛn we de wit yu insay dis ship.’” Jiova bin yuz enjɛl fɔ mek di sem prɔmis we I bin dɔn yuz Jizɔs fɔ mek to Pɔl. Ɛn Pɔl bin rich na Rom jɔs lɛk aw Jiova bin prɔmis.—Akt 27:​20-25; 28:​16.

6. Us prɔmis Jizɔs gi wi we go gi wi trɛnk? Wetin mek?

⁶ Aw Jizɔs de ɛp wi? Jizɔs go ɛp wi lɛk aw i bin ɛp Pɔl. Fɔ ɛgzampul, Jizɔs bin prɔmis ɔl di wan dɛn we de fala am se: “A de wit una ɔltɛm te di tɛm want fɔ dɔn.” (Mat. 28:​20) Jizɔs in wɔd dɛn rili de ɛnkɔrej wi. Wetin mek? Na bikɔs sɔntɛnde i nɔ kin rili izi fɔ lɛ wi bia wetin de apin to wi. Fɔ ɛgzampul, we pɔsin we wi lɛk day, wi at nɔ kin pwɛl fɔ jɔs smɔl tɛm nɔmɔ, bɔt i go mɔs bi se wi at kin pwɛl fɔ lɔng tɛm. Ɔda  pipul dɛn gɛt prɔblɛm dɛn bikɔs dɛn dɔn ol. Stil ɔda wan dɛn kin gɛt tɛm dɛn we dɛn kin fil bad bikɔs dɛn at pwɛl pasmak. Bɔt pan ɔl dat, wi stil ebul gɛt trɛnk fɔ bia bikɔs wi no se Jizɔs de wit wi “ɔltɛm,” ivin we tin nɔ rili izi fɔ wi.—Mat. 11:​28-30.

7. Akɔdin to Rɛvɛleshɔn 14:​6, aw Jiova de ɛp wi tide?

⁷ Gɔd in Wɔd de ɛp wi fɔ no se Jiova de yuz in enjɛl dɛn fɔ ɛp wi. (Ibru. 1:​7, 14) Fɔ ɛgzampul, enjɛl dɛn kin sɔpɔt ɛn gayd wi we wi de prich di “gud nyuz bɔt di Kiŋdɔm” na “ɔl di neshɔn dɛn, . . . trayb dɛn, ɛn [to] pipul dɛn we de tɔk difrɛn difrɛn langwej dɛn.”—Mat. 24:​13, 14; rid Rɛvɛleshɔn 14:​6.

8. Aw Jiova bin yuz wan ami kɔmanda fɔ ɛp Pɔl?

⁸ Aw di wan dɛn we bin de na pawa bin ɛp Pɔl? Insay di ia 56, Jizɔs bin mek Pɔl no se i go rich na Rom. Bɔt sɔm Ju dɛn na Jerusɛlɛm bin plan fɔ le ambush fɔ Pɔl ɛn kil am. We di Roman ami kɔmanda we nem Klɔdiɔs Lisias bin kam fɔ no bɔt di plan, i bin ɛp Pɔl. Kwik kwik tɛm, Klɔdiɔs bin tɛl bɔku sojaman dɛn fɔ protɛkt Pɔl ɛn fɔ go wit am na Sizeria. I mek dɛn pas na say we de lɛk 65 mayl frɔm Sizeria to Jerusɛlɛm. We dɛn rich na Sizeria, Gɔvnɔ Fɛliks bin tɛl sɔm sojaman dɛn fɔ “gayd Pɔl na Ɛrɔd in os.” Di Ju dɛn we bin want fɔ kil Pɔl nɔ bin ebul fɔ du am natin.—Akt 23:​12-35.

9. Aw Gɔvnɔ Fɛstɔs bin ɛp Pɔl?

⁹ Tu ia afta dat, Pɔl bin stil de na prizin na Sizeria. Fɛstɔs tek Fɛliks in ples as gɔvnɔ. Di Ju dɛn bin beg Fɛstɔs fɔ sɛn Pɔl na Jerusɛlɛm fɔ jɔj am de, bɔt Fɛstɔs nɔ bin gri. Sɔntɛm di gɔvnɔ bin no se di Ju dɛn bin de “plan fɔ le ambush fɔ Pɔl ɛn kil am na rod.”—Akt 24:​27–25:​5.

10. Wetin Gɔvnɔ Fɛstɔs bin du we Pɔl bin se i want mek Siza luk insay in kes?

¹⁰ Leta, dɛn bin jɔj Pɔl na Sizeria. Bikɔs Fɛstɔs bin want “fɔ lɛ di Ju dɛn lɛk am,” i bin aks Pɔl se: “Yu go want fɔ go ɔp na Jerusɛlɛm fɔ mek di jɔjmɛnt bɔt dis kes go apin de bifo mi?” Pɔl bin no se if i go na Jerusɛlɛm, sɔntɛm dɛn go kil am, ɛn i bin no bak wetin i fɔ du fɔ sev in layf, rich na Rom, ɛn kɔntinyu fɔ du in prichin wok. So i bin se: “A want lɛ Siza luk insay mi kes!” Afta we Fɛstɔs tɔk to in kanselɔ dɛn, i tɛl Pɔl se: “Ɛnti yu want mek Siza luk insay yu kes, yu de go to Siza.” Bikɔs Fɛstɔs bin sɛn Pɔl na Rom, dat bin mek Pɔl in ɛnimi dɛn nɔ kil am. We Pɔl go rich na Rom, i go de fa frɔm di Ju dɛn we bin de tray fɔ kil am.—Akt 25:​6-12.

11. Wetin Pɔl go dɔn de tink bɔt we bin ɛnkɔrej am?

¹¹ We Pɔl bin de wet fɔ tek ship fɔ go na Itali, i go bi se i bin de tink bɔt di wɔnin we prɔfɛt Ayzaya bin gi to pipul dɛn we bin de agens Jiova. Jiova bin mek Ayzaya rayt se: “Una ɛŋed o, bɔt i nɔ go min natin; una tɔk wetin una fil, na fɔ natin, bikɔs PAPA GƆD de wit wi.” (Ayz. 8:​10) Pɔl bin no se Gɔd go ɛp am, ɛn dat bin gi am trɛnk fɔ bia di prɔblɛm dɛn we go mit am leta.

12. Aw Juliɔs bin trit Pɔl, ɛn wetin Pɔl bin kam fɔ ɔndastand?

¹² Insay di ia 58 afta Krays, Pɔl bin tek ship fɔ go na Itali. Dɛn bin an ova Pɔl to  wan Roman ami ɔfisa we nem Juliɔs bikɔs Pɔl na bin prizina. Frɔm da tɛm de naw, Juliɔs bin gɛt di pawa fɔ trit Pɔl bad ɔ fɔ du gud to am. Bɔt aw Juliɔs bin yuz in pawa? Di nɛks de, we dɛn rich na dray land, “Juliɔs trit Pɔl fayn ɛn alaw am fɔ go to in padi dɛn.” Leta, Juliɔs bin ivin sev Pɔl in layf. Aw i du dat? Di sojaman dɛn bin want fɔ kil ɔl di prizina dɛn we bin de na di ship, bɔt Juliɔs bin stɔp dɛn. Wetin mek Juliɔs bin du dat? I “bin rili want fɔ kam wit Pɔl sef wan.” I go bi se Pɔl bin ɔndastand se Jiova de yuz dis gud ɔfisa fɔ ɛp ɛn protɛkt am.—Akt 27:​1-3, 42-44.

13. Aw Jiova kin yuz pipul dɛn we de na pawa?

¹³ Us ɛp we wisɛf go gɛt? Jiova kin yuz in pawaful oli spirit fɔ mek pipul dɛn we de na pawa du wetin i want. Kiŋ Sɔlɔmɔn bin rayt se: “Lɛkɛ aw i izi fɔ PAPA GƆD fɔ kɔntrol wata we de rɔn, na so i izi fɔ am fɔ kɔntrol wetin kiŋ de plan ɛn du, ɛn na usay i want am fɔ go i de kɛr am.” (Prɔv. 21:​1) Wetin dis vas min? Mɔtalman kin mek ɔda rod fɔ mek wata go usay dɛn want am fɔ go. Semweso, Jiova kin yuz in spirit fɔ mek di wan dɛn we de na pawa du wetin i want. We dat apin, pipul dɛn we de na pawa kin disayd fɔ du sɔntin we kin bɛnifit Gɔd in pipul dɛn.—Luk Ɛzra 7:​21, 25, 26.

14. Akɔdin to Akt 12:​5, udat wi fɔ pre fɔ?

¹⁴ Wetin wi go du? Wi kin pre “fɔ kiŋ dɛn ɛn ɔl di wan dɛn we gɛt pawa” ɛnitɛm we dɛn go nid fɔ disayd bɔt tin dɛn we go afɛkt wi Kristian layf ɛn prichin wok. (1 Tim. 2:​1, 2, futnot; Nɛi. 1:​11) Wi kin falamakata di fɔstɛm Kristian dɛn bay we wi go pre fɔ wi brɔda ɛn sista dɛn we de na prizin. (Rid Akt 12:​5; Ibru. 13:​3) Apat frɔm dat, wi kin pre fɔ di prizin ɔfisa dɛn we de in chaj ɔf wi brɔda ɛn sista dɛn. Wi kin beg Jiova fɔ mek i gayd di we aw di prizin ɔfisa dɛn de tink so dat dɛn go biev lɛk Juliɔs ɛn trit wi brɔda ɛn sista dɛn we de na prizin fayn.

15-16. Aw Jiova bin yuz Aristakɔs ɛn Lyuk fɔ ɛp Pɔl?

¹⁵ Aw Pɔl in kɔmpin Kristian dɛn bin ɛp am? We Pɔl bin de go na Rom, Jiova bin  de yuz di brɔda ɛn sista dɛn fɔ ɛp am bɔku tɛm. Lɛ wi tɔk bɔt sɔm ɛgzampul dɛn.

¹⁶ Aristakɔs ɛn Lyuk we na bin fetful padi dɛn to Pɔl bin disayd fɔ travul wit am fɔ go na Rom. * Dɛn bin rɛdi fɔ risk dɛn layf fɔ de wit Pɔl, pan ɔl we di Baybul nɔ tɛl wi se Jizɔs bin prɔmis dɛn se dɛn go rich na Rom sef wan. Na leta we dɛn bin de travul we di si rɔf, na in dɛn kam no se dɛn nɔ go day. So we Aristakɔs ɛn Lyuk bin stat di patrol na Sizeria, Pɔl go dɔn pre to Jiova wit ɔl in at ɛn tɛl am tɛnki fɔ we i yuz in tu padi dɛn we gɛt maynd fɔ ɛp am da tɛm de.—Akt 27:​1, 2, 20-25.

17. Aw Jiova bin yuz di brɔda ɛn sista dɛn fɔ ɛp Pɔl?

¹⁷ Di brɔda ɛn sista dɛn bin ɛp Pɔl bɔku tɛm we i bin de travul. Fɔ ɛgzampul, we dɛn rich na Saydɔn, Juliɔs bin alaw Pɔl “fɔ go to in padi dɛn fɔ mek dɛn tek kia ɔf am.” Dɔn leta, we dɛn rich na Pyutiolay, Pɔl ɛn in padi dɛn bin “si brɔda dɛn de, ɛn dɛn beg [Pɔl ɛn in padi dɛn] fɔ de wit dɛn fɔ sɛvin dez.” We di brɔda dɛn bin de tek kia ɔf Pɔl ɛn in padi dɛn, Pɔl insɛf bin de mek di brɔda dɛn gladi bay we i bin de tɛl dɛn ɛkspiriɛns dɛn we go ɛnkɔrej dɛn. (Luk Akt 15:​2, 3.) Afta we dɛn dɔn gɛt ɛnkɔrejmɛnt, Pɔl ɛn in padi dɛn kɔntinyu fɔ travul.—Akt 27:​3; 28:​13, 14.

18. Wetin bin mek Pɔl tɛl Gɔd tɛnki ɛn tek kɔrej?

¹⁸ We Pɔl bin de rich na Rom, i go bi se i bin dɔn de tink bɔt wetin i bin dɔn rayt to di kɔngrigeshɔn we de na da siti de tri ia bifo da tɛm de. I bin se: “Fɔ sɔm ia naw, a rili want fɔ kam to una.” (Rom. 15:​23) Bɔt i nɔ bin de tink se i go kam de as prizina. I go mɔs dɔn fil gud we i si di brɔda dɛn frɔm Rom de wet fɔ am na  rod fɔ grit am. “We Pɔl si dɛn, i tɛl Gɔd tɛnki ɛn tek kɔrej.” (Akt 28:​15) Notis se Pɔl bin tɛl Gɔd tɛnki fɔ we i si di brɔda dɛn. Wetin mek? Bikɔs dis tɛm bak, Pɔl bin si se Jiova de yuz di brɔda ɛn sista dɛn fɔ ɛp am.

19. Akɔdin to 1 Pita 4:​10, aw Jiova kin yuz wi fɔ ɛp di wan dɛn we nid ɛp?

¹⁹ Wetin wi go du? Yu no bɔt brɔda ɔ sista dɛn na yu kɔngrigeshɔn we gɛt pwɛlat bikɔs dɛn nɔ wɛl ɔ bikɔs dɛn gɛt ɔda prɔblɛm dɛn? Ɔ sɔntɛm pɔsin we dɛn lɛk dɔn day? If wi no bɔt sɔmbɔdi we nid ɛp, wi kin aks Jiova fɔ ɛp wi fɔ se ɔ du sɔntin we gud ɛn we go sho se wi lɛk am. I go bi se di tin we wi go se ɛn du go bi di ɛnkɔrejmɛnt we wi brɔda ɔ sista nid. (Rid 1 Pita 4:​10.) * If wi ɛp dɛn, dɛn go kam fɔ biliv bak di prɔmis we Jiova bin dɔn mek we se, “A nɔ go ɛva lɛf yu, ɛn a nɔ go ɛva lɛf fɔ ɛp yu.” Yu nɔ tink se dat go mek yu gladi?

20. Wetin mek wi go tɔk wit kɔnfidɛns se: “Na Jiova de ɛp mi”?

²⁰ Jɔs lɛk aw Pɔl ɛn in padi dɛn bin de gɛt prɔblɛm dɛn, na so wisɛf de gɛt prɔblɛm dɛn tide. Bɔt wi no se wi fɔ tek kɔrej bikɔs Jiova de wit wi. I de yuz Jizɔs ɛn di enjɛl dɛn fɔ ɛp wi. Dɔn bak, Jiova kin yuz di wan dɛn we de na pawa fɔ ɛp wi, if dat de akɔdin to wetin i want. Bɔku pan wi dɔn si se Jiova kin yuz in oli spirit fɔ mek wi brɔda ɛn sista dɛn ɛp wi. So jɔs lɛk Pɔl, wi gɛt bɔku rizin fɔ tɔk wit kɔnfidɛns se: “Na Jiova de ɛp mi; a nɔ go fred. Wetin mɔtalman ebul du mi?”—Ibru. 13:​6.