1. Akɔdin to Matyu 7:​13, 14, wetin mek wi se wi ɔl de travul?

WI ƆL de travul. Di say we wi de go na di nyu wɔl usay Jiova go de rul wi wit lɔv. Ɛvride, wi de tray fɔ waka na di rod we go mek wi gɛt layf. Bɔt jɔs lɛk aw Jizɔs bin se, di rod nɔ big ɛn sɔntɛnde i at fɔ waka. (Rid Matyu 7:​13, 14.) Bikɔs wi nɔ pafɛkt, i izi fɔ lɛ wi lɛf fɔ waka na dis rod.—Gal. 6:​1.

2. Wetin wi go tɔk bɔt insay dis atikul? (Luk di bɔks we se “ We Wi Ɔmbul, Dat De Ɛp Wi fɔ Ajɔst Wisɛf.”)

² If wi want fɔ de na di rod we de gi layf, wi fɔ rɛdi fɔ ajɔst di we aw wi de tink, di tin dɛn we wi lɛk, di tin dɛn we wi nɔ lɛk, ɛn di tin dɛn we wi de du. Di apɔsul Pɔl bin ɛnkɔrej di Kristian dɛn na Kɔrint fɔ mek dɛn kɔntinyu fɔ ‘ajɔst dɛnsɛf.’ (2 Kɔr. 13:​11) Da advays de aplay to wisɛf. Insay dis atikul, wi go tɔk bɔt aw di Baybul kin ɛp wi fɔ mek chenj na wi layf ɛn aw wi machɔ padi dɛn kin ɛp wi fɔ kɔntinyu fɔ waka na di rod we de gi layf. Wi go tɔk bak bɔt wetin mek i nɔ kin izi fɔ mek wi du wetin Jiova in ɔganayzeshɔn kin tɛl wi fɔ du. If wi ɔmbul, wi go si aw wi go ebul fɔ mek chenj na wi layf ɛn kɔntinyu fɔ sav Jiova wit gladi-at.

3. Aw Gɔd in Wɔd go ɛp yu?

³ I nɔ kin izi fɔ mek wi chɛk di tin dɛn we wi de tink bɔt ɛn aw wi de fil. Wetin mek? Na bikɔs wi at disitful, so i nɔ kin izi fɔ lɛ wi no wetin wi at want wi fɔ du. (Jɛr. 17:​9) I izi fɔ lɛ wi “ful [wisɛf] wit di we aw wi de tink we nɔto tru.” (Jems 1:​22) So wi fɔ yuz Gɔd in Wɔd fɔ chɛk wisɛf. Gɔd in Wɔd de ɛp wi fɔ no “wetin [wi] de tink” ɛn di tin dɛn we wi de plan na wi at. (Ibru. 4:​12, 13) So wi go se  Gɔd in Wɔd tan lɛk X-ray mashin we de ɛp wi fɔ si wetin de insay wi. Bɔt wi fɔ ɔmbul if wi want fɔ bɛnifit frɔm di advays we wi de gɛt frɔm Gɔd in Wɔd ɔ di pipul dɛn we Gɔd de yuz.

4. Wetin sho se tɛm bin kam we Kiŋ Sɔl bigin mek prawd?

⁴ Kiŋ Sɔl in ɛgzampul go ɛp wi fɔ no wetin go apin if wi nɔ ɔmbul. Tɛm bin kam we Sɔl bin so prawd dat i nɔ bin gri fɔ si se i nid fɔ chenj di we aw i bin de tink ɛn di tin dɛn we i bin de du. (Sam 36:​1, 2; Aba. 2:​4) Fɔ ɛgzampul, we Jiova bin tɛl Sɔl wetin i fɔ du afta we i win di Amalɛkayt dɛn pan fɛt, Sɔl nɔ bin obe Jiova. Ɛn we prɔfɛt Samiɛl bin tɔk to am bɔt dat, Sɔl nɔ bin gri se i dɔn du bad. Bifo dat, i tɔk lɛk se nɔto siriɔs tin apin, ɛn i blem di pipul dɛn fɔ wetin i du. (1 Sam. 15:​13-24) Sɔl bin dɔn du da sem tin de bak wan ɔda tɛm. (1 Sam. 13:​10-14) Sɔl bin de mek prawd, so i nɔ chenj di we aw i bin de tink ɛn bikɔs ɔf dat, Jiova bin kɔrɛkt am ɛn mek i lɛf fɔ bi kiŋ.

5. Wetin wi kin lan frɔm Sɔl in ɛgzampul?

⁵ Fɔ mek wi lan frɔm Sɔl in ɛgzampul, wi fɔ aks wisɛf dɛn kwɛstyɔn dɛn ya: ‘We a kin rid di advays dɛn frɔm Gɔd in Wɔd, a kin tray fɔ fɛn rizin fɔ mek a nɔ du wetin a dɔn lan? A kin tink se di tin we a de du nɔ rili bad? A kin blem ɔda pipul dɛn fɔ wetin a de du?’ If wi ansa to ɛniwan pan dɛn kwɛstyɔn dɛn ya na yɛs, wi fɔ ajɔst di we aw wi de tink ɛn di we aw wi de biev. If nɔto dat, wi go so prawd dat Jiova nɔ go want wi fɔ bi in padi.—Jems 4:​6.

6. Wetin sho se Kiŋ Sɔl bin difrɛn frɔm Kiŋ Devid?

⁶ Kiŋ Sɔl bin difrɛn frɔm Kiŋ Devid we bin bi kiŋ afta am bikɔs Devid na man we bin lɛk PAPA GƆD [“Jiova,” NWT] in lɔ. (Sam 1:​1-3) Devid bin no se Jiova de sev di wan dɛn we ɔmbul, bɔt i de agens di wan dɛn we prawd. (2 Sam. 22:​28) So Devid bin alaw Gɔd in lɔ fɔ ajɔst di we aw i de tink. I bin rayt se: “A go prez PAPA GƆD [“Jiova,” NWT] bikɔs na in de tɛl mi wetin fɔ du; ivin na nɛt, a de tink bɔt wetin i de tɛl mi fɔ du.”—Sam 16:​7.

7. Wetin wi go du if wi ɔmbul?

⁷ If wi na pɔsin we ɔmbul, wi go alaw Gɔd in Wɔd fɔ kɔrɛkt di rɔng we aw wi de tink bifo wi du bad tin. Da tɛm de, Gɔd in Wɔd go tan lɛk vɔys we de tɛl wi se: “Na di rod dis, waka de.” I go wɔn wi if wi stat fɔ du bad tin. (Ayz. 30:​21) I fayn fɔ mek wi lisin to Jiova bikɔs wi go gɛt bɔku bɛnifit. (Ayz. 48:​17) Fɔ ɛgzampul, wi nɔ go shem bikɔs ɔda pɔsin kɔrɛkt wi ɛn wi go kam nia Jiova bikɔs wi no se i de trit wi lɛk papa we lɛk in pikin.—Ibru. 12:​7.

8. Akɔdin to Jems 1:​22-25, aw wi go yuz Gɔd in Wɔd as glas?

⁸ Gɔd in Wɔd tan lɛk glas fɔ wi. (Rid Jems 1:​22-25.) Plɛnti pan wi kin luk na glas ɛni mɔnin bifo wi kɔmɔt na os. We wi du dat, wi de ebul fɔ no if wi nid fɔ mek ɛni ajɔstmɛnt bifo ɔda pipul dɛn si wi. Semweso, we wi rid di Baybul ɛvride, wi go ebul fɔ si we dɛn aw wi go ajɔst di we aw wi de tink ɛn di we aw wi de biev. Bɔku pipul dɛn dɔn si se i fayn fɔ rid di deli tɛks ɛni mɔnin bifo dɛn kɔmɔt na os. Dɛn kin alaw wetin dɛn rid fɔ afɛkt di we aw dɛn de tink. Dɔn dɛn kin tink bɔt am ol de ɛn luk fɔ we dɛn fɔ fala di advays we de na Gɔd in Wɔd. Dɔn bak, wi fɔ stɔdi Gɔd in Wɔd ɛn tink gud gud wan bɔt am ɛvride. I go tan lɛk  dis nɔ at fɔ du, bɔt dis na wan pan di impɔtant tin dɛn we go ɛp wi fɔ de na di rod we de gi layf.

9. Wetin go mek yu padi nid fɔ kɔrɛkt yu?

⁹ Yu dɔn ɛva stat fɔ du sɔntin we bin dɔn bigin ambɔg yu padi biznɛs wit Jiova? (Sam 73:​2, 3) If yu machɔ padi bin gɛt maynd fɔ kɔrɛkt yu, yu bin lisin to am ɛn fala in advays? If yu bin fala di advays, yu bin du di rayt tin, ɛn wan dawt nɔ de se yu gladi fɔ we yu padi bin wɔn yu.—Prɔv. 1:​5.

10. Wetin yu fɔ du if yu padi kɔrɛkt yu?

¹⁰ Gɔd in Wɔd mɛmba wi se: “We yu padi ɔpoz [wund] yu na we i lɛk yu.” (Prɔv. 27:​6) Wetin dis min? Tink bɔt dis ɛgzampul: Imajin se yu de wet fɔ krɔs strit ɛn yu de wach sɔntin na yu fon. Yu bigin krɔs ɛn yu nɔ luk. As dat apin, yu padi grip yu an ɛn drɔ yu kɔmɔt na di rod. Yu padi grip yu tayt, so dat mek yu wund. Bɔt we i drɔ yu kwik, dat mek motoka nɔ bang yu. Ilɛksɛf yu de fil pen ɛn di wund nɔ wɛl afta sɔm dez, yu go vɛks pan yu padi bikɔs i grip yu? Nɔ, yu nɔ go vɛks, bifo dat yu go gladi fɔ we i ɛp yu. Semweso, if yu padi wɔn yu se di we aw yu de tɔk ɔ di we aw yu de du tin nɔ de in layn wit wetin Gɔd want, sɔntɛm yu go vɛks fɔs. Bɔt yu nɔ fɔ vɛks ɛn biev lɛk fulman we nɔ de tek advays. (Ɛkli. 7:​9) Bifo dat, yu fɔ gladi bikɔs yu padi gɛt maynd fɔ tɔk to yu.

11. Wetin go mek pɔsin nɔ gri fɔ tek advays frɔm in padi?

¹¹ Wetin go mek pɔsin nɔ gri fɔ tek advays frɔm in padi we lɛk am? Na prawd kin mek pɔsin du dat. Prawd pipul dɛn lɛk we dɛn de “tiklis dɛn yes” so dɛn kin “lɛf fɔ lisin to di trut.” (2 Tim. 4:​3, 4) Dɛn kin fil se dɛn gɛt sɛns pas ɔda pipul dɛn ɛn dɛn bɛtɛ pas dɛn. Bɔt apɔsul Pɔl bin rayt se: “If ɛnibɔdi de tink se in na sɔmbɔdi we in na natin, i de ful insɛf.” (Gal. 6:​3) Kiŋ Sɔlɔmɔn bin ɛksplen dat fayn we i bin se: “Yɔŋman we po ɛn gɛt sɛns bɛtɛ pas kiŋ we ol bɔt i fulish [ɛn] we nɔ de tek advays.”—Ɛkli. 4:​13.

12. Wetin wi go lan frɔm apɔsul Pita in ɛgzampul we de na Galeshians 2:​11-14?

¹² Tink bɔt wetin Pita bin du we Pɔl bin kɔrɛkt am usay ɔda pipul dɛn de. (Rid Galeshians 2:​11-14.) Pita bin fɔ dɔn vɛks bikɔs ɔf wetin Pɔl tɔk, i fɔ bin dɔn pe atɛnshɔn to di we aw Pɔl tɔk am, ɛn bikɔs i tɔk am usay ɔda pipul dɛn de. Bɔt i nɔ bin du dat, i bin sho se i gɛt sɛns. I bin gri fɔ tek di advays, ɛn i nɔ bin kip grɔj na in at fɔ Pɔl. Leta, i bin tɔk se Pɔl na in ‘brɔda we i rili lɛk.’—2 Pit. 3:​15.

13. Wetin wi fɔ tink bɔt bifo wi advays pɔsin?

¹³ Wetin yu fɔ tink bɔt if yu nid fɔ advays yu padi? Bifo yu go mit yu padi, na fɔ aks yusɛf dis kwɛstyɔn: ‘A de mek lɛk se a de du “wetin rayt tumɔs”?’ (Ɛkli. 7:​16, NWT) Pɔsin we de du wetin rayt tumɔs kin jɔj ɔda pipul dɛn bay wetin in tink, nɔto bay wetin Jiova tink, ɛn i nɔ kin gɛt sɔri-at fɔ ɔda pipul dɛn. If yu dɔn tink bɔt ɔl dɛn tin ya ɛn yu stil tink se yu nid fɔ tɔk to yu padi, tɛl yu padi wetin na di prɔblɛm ɛn yuz kwɛstyɔn dɛn fɔ ɛp am fɔ no se i dɔn mek mistek. Mek shɔ se wetin yu de tɔk kɔmɔt frɔm di Baybul ɛn mɛmba se na Jiova fɔ jɔj yu padi, nɔto yu. (Rom. 14:​10) Yuz di sɛns we de insay  Gɔd in Wɔd, ɛn we yu de advays pɔsin, na fɔ falamakata Jizɔs fɔ sho sɔri-at. (Prɔv. 3:​5; Mat. 12:​20) Wetin mek wi fɔ du dat? Na bikɔs Jiova go trit wi di sem we aw wi de trit ɔda pipul dɛn.—Jems 2:​13.

14. Wetin Gɔd in ɔganayzeshɔn de yuz fɔ tich wi?

¹⁴ Jiova de yuz di pat pan in ɔganayze- shɔn we de na dis wɔl fɔ gayd wi fɔ waka na di rod we de gi layf. In ɔganayzeshɔn kin yuz fim dɛn, buk, magazin, ɛn ɔda tin dɛn, ɛn wi mitin dɛn fɔ ɛp wi fɔ no aw fɔ du wetin de insay Gɔd in Wɔd. Ɔl di tin dɛn we dɛn de tich wi kɔmɔt frɔm di Baybul. We di Gɔvnin Bɔdi kin want fɔ no di bɛst we fɔ du di prichin wok, dɛn kin abop pan oli spirit. Bɔt stil, di Gɔvnin Bɔdi kin go ova wetin dɛn dɔn disayd fɔ si if nid de fɔ chenj di we aw dɛn ɔganayz di wok. Wetin mek? Na bikɔs “di wɔl we wi de si naw de chenj,” ɛn Gɔd in ɔganayzeshɔn fɔ ajɔst to di nyu we aw tin dɛn de apin.—1 Kɔr. 7:​31.

15. Wetin nɔ izi fɔ sɔm pɔblisha dɛn?

¹⁵ We Gɔd in ɔganayzeshɔn kin ɛksplen nyu we aw wi ɔndastand sɔntin na di Baybul, ɔ gi wi advays bɔt aw fɔ liv klin layf, wi kin gri fɔ du wetin dɛn tɛl wi. Bɔt wetin wi kin du we Gɔd in ɔganayzeshɔn mek chenj bɔt ɔda tin? Fɔ ɛgzampul, dis biɛn tɛm, di mɔni fɔ bil ɛn kia fɔ Kiŋdɔm Ɔl dɛn dɔn rili bɔku. So di Gɔvnin Bɔdi bin dɔn tɔk se mek bɔku kɔngrigeshɔn dɛn yuz wan Kiŋdɔm Ɔl, if dat pɔsibul. Bikɔs ɔf da ajɔstmɛnt de, dɛn bin jɔyn sɔm kɔngrigeshɔn dɛn ɛn dɛn bin ivin sɛl sɔm Kiŋdɔm Ɔl dɛn. Dɛn de yuz di mɔni fɔ ɛp bil Kiŋdɔm Ɔl dɛn na say dɛn we dɛn nid am mɔ. If yu de na say we dɛn dɔn sɛl di Kiŋdɔm Ɔl we una bin de yuz ɔ dɛn dɔn jɔyn yu kɔngrigeshɔn to ɔda kɔngrigeshɔn, sɔntɛm i nɔ go izi fɔ mek yu yus to dis nyu we aw fɔ du tin. Sɔm pɔblisha dɛn kin gɛt fɔ go fa pas usay dɛn bin de go trade fɔ atɛnd mitin. Ɔda wan dɛn we bin dɔn wok tranga wan fɔ bil ɔ kia fɔ Kiŋdɔm Ɔl, go de wɔnda wetin mek dɛn sɛl di Kiŋdɔm Ɔl. Sɔntɛm dɛn go de tink se dɛn bin jɔs west dɛn  tɛm ɛn ɛnaji. Bɔt stil, dɛn de gri fɔ sɔpɔt dis nyu arenjmɛnt ɛn wi fɔ tɛl dɛn tɛnki fɔ dat.

16. We wi fala di advays we de na Koloshians 3:​23, 24, aw dat go ɛp wi fɔ kɔntinyu fɔ gladi?

¹⁶ Wi go kɔntinyu fɔ gladi if wi de mɛmba se na Jiova wi de wok fɔ ɛn na in de dayrɛkt in ɔganayzeshɔn. (Rid Koloshians 3:​23, 24.) Kiŋ Devid bin sɛt fayn ɛgzampul we i bin de gi kɔntribyushɔn fɔ bil di tɛmpul. I bin se: “Udat na mi, ɛn udat na mi pipul dɛm we wi fɔ ebul gi wit ɔl wi at? Bikɔs ɔltin kɔmɔt to yu ɛn na pan wetin yu gi wi, wi dɔn gi yu so.” (1 Kro. 29:​14) We wi gi kɔntribyushɔn, wisɛf de gi Jiova frɔm wetin i bin dɔn gi wi. Ivin we na so i bi, Jiova kin stil gladi we wi gi am wi tɛm, wi trɛnk, ɛn mɔni as kɔntribyushɔn fɔ sɔpɔt di wok we i want fɔ mek wi du.—2 Kɔr. 9:​7.

17. Wetin mek yu nɔ fɔ fil bad if yu nid fɔ ajɔst di we aw yu de du tin?

¹⁷ Fɔ mek wi kɔntinyu fɔ waka na di rod we nɔ big we de gi layf, wi fɔ fala Jizɔs in futmak gud gud wan. (1 Pit. 2:​21) If i tan lɛk yu nid fɔ ajɔst di we aw yu de du tin, nɔ fil bad. We yu gri se yu nid fɔ chenj sɔm tin dɛn, dat de sho se yu want fɔ du wetin Jiova se. Mɛmba se Jiova no se wi nɔ pafɛkt, so i nɔ de ɛkspɛkt wi fɔ fala Jizɔs in ɛgzampul pafɛkt wan.

18. Wetin wi fɔ du fɔ rich na di say we wi de go?

¹⁸ Lɛ wi ɔl kɔntinyu fɔ tink gud wan bɔt tumara bambay ɛn lɛ wi rɛdi fɔ ajɔst di we aw wi de tink, di tin dɛn we wi lɛk, di tin dɛn we wi nɔ lɛk, ɛn di tin dɛn we wi de du. (Prɔv. 4:​25; Lyuk 9:​62) Lɛ wi kɔntinyu fɔ put wisɛf dɔŋ, “kɔntinyu fɔ gladi,” ɛn fɔ de “ajɔst [wisɛf].”(2 Kɔr. 13:​11) If wi du dat, “di Gɔd we gɛt lɔv ɛn pis go de wit [wi].” Ɛn wi nɔ go jɔs rich na di say we wi de go, bɔt wi go ɛnjɔy di patrol!