1-2. (a) Wetin mek di wan dɛn we jɔs mared fɔ abop pan Jiova? (Sam 37:​3, 4) (b) Wetin wi go tɔk bɔt insay dis atikul?

 YU DE kam mared, ɔ yu jɔs dɔn mared? If na so i bi, wan dawt nɔ de se yu de op fɔ ɛnjɔy yu layf wit di pɔsin we yu rili lɛk. Bɔt as wi no, mared layf nɔ kin izi ɔltɛm, ɛn impɔtant tin dɛn de we di wan dɛn we jɔs mared kin nid fɔ disayd. Di tin dɛn we una kin du di tɛm we tin nɔ izi ɛn di tin dɛn we una kin disayd go afɛkt di gladi-at we una go gɛt as tɛm de go. If una abop pan Jiova, una go disayd fɔ du di rayt tin dɛn, una mared-os go go bifo, ɛn una go gɛt mɔ gladi-at. Bɔt if una nɔ fala Gɔd in advays, i go mɔs bi se tin dɛn go apin we go kɔz prɔblɛm na una mared-os, ɛn una nɔ go gɛt gladi-at.—Rid Sam 37:​3, 4.

² Pan ɔl we dis atikul de mɔ fɔ di wan dɛn we jɔs mared, i go tɔk bak bɔt prɔblɛm dɛn we ɔl di wan dɛn we dɔn mared kin gɛt. Wi go tɔk bɔt wetin wi kin lan frɔm di ɛgzampul dɛn we fetful man ɛn uman dɛn na di Baybul dɔn sɛt fɔ wi. Dɛn Baybul ɛgzampul dɛn ya de tich wi lɛsin dɛn we wi kin aplay na wi layf ɛn wi mared-os. Wi go si bak wetin wi kin lan frɔm sɔm mared pipul dɛn tide.

3-4. Us prɔblɛm dɛn we man ɛn uman dɛn we jɔs mared kin gɛt?

³ Sɔm pipul dɛn kin ɛnkɔrej di wan dɛn we jɔs mared fɔ liv wetin dɛn de kɔl nɔmal layf. Fɔ ɛgzampul, sɔntɛm dɛn mama ɛn papa ɛn ɔda fambul dɛn go mɔna dɛn fɔ bigin bɔn pikin kwik kwik wan. Ɔ dɛn padi dɛn ɛn dɛn famili go ɛnkɔrej dɛn fɔ bay os ɛn ful-ɔp am wit bɔku fayn tin dɛn.

⁴ If maredman ɛn in wɛf nɔ tek tɛm, dɛn go disayd fɔ du tin dɛn we go mek dɛn gɛt bɔku dɛt. Ɛn sɔntɛm dat go mek dɛn spɛn bɔku tɛm fɔ wok so dat dɛn go pe dɛn dɛt. Ɛn i pɔsibul se di bɔku tɛm we dɛn de spɛn fɔ wok go mek dɛn nɔ gɛt bɛtɛ tɛm fɔ du pasɔnal Baybul stɔdi, famili wɔship, ɛn di prichin wok. I go bi se dɛn go ivin mis mitin dɛn so dat dɛn go wok ovataym fɔ gɛt ɛkstra mɔni ɔ fɔ mek shɔ se dɛn nɔ lɔs dɛn wok. If dɛn du dat, i go mek dɛn nɔ ebul fɔ du sɔm fayn tin dɛn na Jiova in savis.

5. Wetin yu lan frɔm Klaus ɛn Marisa dɛn ɛgzampul?

⁵ Ɛkspiriɛns dɛn dɔn sho se wi nɔ go gɛt gladi-at if wi de pe atɛnshɔn nɔmɔ fɔ gɛt bɔku mɔni ɛn prɔpati. Tink bɔt wetin Klaus ɛn Marisa bin kam fɔ lan. * We dɛn bin jɔs mared, dɛn ɔl tu bin de wok ful-taym so dat dɛn go gɛt bɔku mɔni ɛn prɔpati. Bɔt dip insay dɛn at, dɛn nɔ bin rili gladi. Klaus se: “Wi bin gɛt pas wetin wi nid, bɔt wi nɔ bin gɛt ɛni gol fɔ du mɔ fɔ Jiova. Usay tru de fɔ tɔk, wi layf bin miksɔp ɛn wi bin strɛs.” Sɔntɛm yusɛf go dɔn notis se yu nɔ rili gladi we yu de pe atɛnshɔn fɔ gɛt bɔku mɔni ɛn prɔpati. If na so i bi, nɔ pwɛlat. We yu tink bɔt di gud ɛgzampul we ɔda pipul dɛn dɔn sɛt, dat go ɛp yu fɔ mek ɛni chenj we yu nid fɔ mek. Fɔs, lɛ wi tɔk bɔt wetin maredman dɛn kin lan frɔm Kiŋ Jɛoshafat in ɛgzampul.

6. Akɔdin to di advays we de na Prɔvabs 3:​5, 6, wetin Kiŋ Jɛoshafat bin du we i bin gɛt siriɔs prɔblɛm?

⁶ Maredman dɛn, tɛm dɛn kin de we una kin fil se una nɔ go ebul du ɔl wetin una fɔ du? If na so i bi, una go bɛnifit frɔm Kiŋ Jɛoshafat in ɛgzampul. As kiŋ, Jɛoshafat bin gɛt di wok fɔ mek shɔ se di wan ol neshɔn sef. Aw i bin du dis impɔtant wok? Jɛoshafat bin du wetin i bin ebul du fɔ protɛkt in pipul dɛn. I bin mek di siti dɛn na Juda strɔng, ɛn i bin gɛda pas 1,160,000 pawaful sojaman dɛn. (2 Kro. 17:​12-19) Leta, Jɛoshafat bin gɛt siriɔs prɔblɛm. Bɔku bɔku sojaman dɛn we kɔmɔt na Amɔn, Moab, ɛn di mawntin pat na Sia bin trɛtin in, in  famili, ɛn in pipul dɛn. (2 Kro. 20:​1, 2) Wetin Jɛoshafat bin du? I bin beg Jiova fɔ ɛp am ɛn gi am trɛnk. Dis de in layn wit di fayn advays we de na Prɔvabs 3:​5, 6. (Rid.) Jɛoshafat in ɔmbul prea we de na Sɛkɛn Kronikul 20:​5-12 sho se i bin rili abop pan Jiova. Aw Jiova bin ansa Jɛoshafat in prea?

7. Aw Jiova bin ansa Jɛoshafat in prea?

⁷ Jiova bin yuz wan Livayt we nem Jeaziɛl fɔ tɔk to Jɛoshafat. Jiova bin se: “Una tek una pozishɔn ɛn tinap ɛn nɔ du natin, ɛn wach we PAPA GƆD [“Jiova,” NWT] de bit dɛn fɔ una.” (2 Kro. 20:​13-17) Fɔ shɔ, dis nɔto di nɔmal we aw dɛn kin fɛt wɔ. Bɔt, nɔto mɔtalman bin tɛl dɛn fɔ du da tin de, na Jiova. Ɛn bikɔs Jɛoshafat bin rili abop pan in Gɔd, i bin du wetin I tɛl am. We in ɛn di pipul dɛn bin de go fɔ mit dɛn ɛnimi dɛn, nɔto di sojaman dɛn we sabi fɛt i bin put bifo, bɔt na di man dɛn we de siŋ we nɔ ol natin fɔ fɛt. Jiova bin kip in prɔmis we i mek to Jɛoshafat; I bin win di ɛnimi dɛn.—2 Kro. 20:​18-23.

8. Wetin maredman dɛn kin lan frɔm Jɛoshafat in ɛgzampul?

⁸ Maredman dɛn, una kin lan frɔm Jɛoshafat in ɛgzampul. Bikɔs na yu gɛt di wok fɔ kia fɔ yu famili, yu de wok tranga wan fɔ protɛkt ɛn sɔpɔt dɛn. We yu gɛt prɔblɛm dɛn, sɔntɛm yu go fil se yu go ebul sɔlv am bay yusɛf. Bɔt, nɔ abop pan yu yon trɛnk. Bifo dat, we yu wangren de, na fɔ pre to Jiova mek i ɛp yu. Dɔn bak, pre gud gud wan wit yu wɛf. Luk fɔ Jiova in advays bay we yu de stɔdi di Baybul ɛn di pɔblikeshɔn dɛn we Gɔd in ɔganayzeshɔn de mek, dɔn na fɔ fala di advays we yu fɛn. We yu go dɔn disayd fɔ du sɔntin we de in layn wit di Baybul, sɔntɛm ɔda pipul dɛn nɔ go gri wit yu, ɛn dɛn go ivin tɛl yu se wetin yu de du nɔ mek sɛns. Dɛn go tɛl yu se di bɛst we fɔ protɛkt yu famili na we yu gɛt bɔku mɔni ɛn prɔpati. Bɔt mɛmba Jɛoshafat in ɛgzampul. I bin abop pan Jiova ɛn du tin dɛn we sho se i abop pan am. Jiova nɔ bin lɛf da fetful man de, ɛn i nɔ go lɛf yu bak. (Sam 37:​28; Ibru. 13:​5) Wetin bak maredman ɛn in wɛf go du fɔ mek shɔ se dɛn gɛt gladi-at?

9. Wetin wi go se bɔt prɔfɛt Ayzaya ɛn in wɛf?

⁹ Prɔfɛt Ayzaya ɛn in wɛf bin mek dɛn savis to Jiova bi di tin we impɔtant pas ɔl na dɛn layf. Ayzaya na bin prɔfɛt, ɛn i go mɔs bi se in wɛf sɛf bin gɛt in yon prɔfɛsi dɛn we i bin de tɔk bɔt, bikɔs di Baybul kɔl am “di prɔfɛtɛs [uman prɔfɛt].” (Ayz. 8:​1-4) Ayzaya ɛn in wɛf bin put dɛn wɔship to Jiova fɔs na dɛn layf. Dis na wɔndaful ɛgzampul fɔ maredman ɛn dɛn wɛf dɛn tide.

10. We mared pipul dɛn stɔdi di Baybul prɔfɛsi dɛn, aw dat go ɛp dɛn fɔ mekɔp dɛn maynd fɔ du ɔl wetin dɛn ebul fɔ Jiova?

¹⁰ Mared pipul dɛn kin mek dɛn savis to Jiova bi di tin we impɔtant pas ɔl bay we dɛn de du ɔl wetin dɛn ebul fɔ sav Jiova. Dɛn go ebul fɔ abop pan Jiova mɔ ɛn mɔ bay we dɛn de stɔdi Baybul prɔfɛsi togɛda ɛn si aw i de kam tru ɔltɛm. * (Tay. 1:​2) Dɛn kin tink bɔt wetin dɛn kin du fɔ ɛp mek sɔm Baybul prɔfɛsi  dɛn kam tru. Fɔ ɛgzampul, dɛn kin ɛp fɔ mek wan pan Jizɔs in prɔfɛsi dɛn kam tru; dat na di wan we se dɛn go prich di gud nyuz na di wan ol wɔl bifo di ɛnd kam. (Mat. 24:​14) Di mɔ we maredman ɛn in wɛf de biliv se Baybul prɔfɛsi dɛn de kam tru, na di mɔ dɛn go want fɔ du ɔl wetin dɛn ebul fɔ Jiova.

11. Wetin Prisila ɛn Akwila bin ebul fɔ du, ɛn wetin mek?

¹¹ Pipul dɛn we jɔs mared kin lan frɔm wan man ɛn in wɛf we nem Akwila ɛn Prisila. Dɛn na bin Ju pipul dɛn we bin de na Rom. Dɛn bin dɔn yɛri di gud nyuz bɔt Jizɔs, ɛn dɛn bin dɔn bi Kristian. Wan dawt nɔ de se dɛn bin satisfay wit dɛn layf. Bɔt, dɛn layf bin chenj kwik kwik wan we Ɛmparɔ Klɔdiɔs bin se ɔl di Ju dɛn fɔ lɛf Rom. Tink bɔt wetin dis bin min fɔ Akwila ɛn Prisila. Dɛn go gɛt fɔ lɛf di eria we dɛn sabi, fɛn nyu os, ɛn stat dɛn tɛnt biznɛs bak na nyu ples. Fɔ se dis dɛn prɔblɛm go mek dɛn nɔ put di Kiŋdɔm fɔs na dɛn layf igen? I go mɔs bi se yu sabi di ansa to da kwɛstyɔn de. We Akwila ɛn Prisila dɛn bin de na dɛn nyu ples na Kɔrint, dɛn bin stat fɔ ɛp di kɔngrigeshɔn ɛn wok wit apɔsul Pɔl fɔ ɛnkɔrej di brɔda dɛn we de de. Leta, dɛn bin de go na ɔda tɔŋ dɛn usay dɛn nid mɔ pipul dɛn fɔ prich. (Akt 18:​18-21; Rom. 16:​3-5) Dɛn bin rili bizi, bɔt dɛn bin gɛt tru tru gladi-at.

12. Wetin mek maredman ɛn in wɛf fɔ sɛt gol dɛn na dɛn savis to Jiova?

¹² Mared pipul dɛn kin falamakata Prisila ɛn Akwila bay we dɛn de put di Kiŋdɔm fɔs na dɛn layf. Di bɛst tɛm fɔ lɛ dɛn tɔk bɔt dɛn gol dɛn na we dɛn de wach dɛnsɛf fɔ mared. We dɛn sɛt gol fɔ dɛn savis to Jiova, ɛn dɛn wok tranga wan togɛda fɔ rich dɛn gol dɛn de, dɛn go gɛt mɔ chans fɔ si aw Jiova de ɛp dɛn. (Ɛkli. 4:​9, 12) Tink bɔt Rɔsɛl ɛn Ilizabɛt dɛn ɛkspiriɛns. Rɔsɛl se, “We wi bin de wach wisɛf fɔ mared, wi bin tɔk bɔt di patikyula gol dɛn we wi gɛt fɔ wi savis to Jiova.” Ilizabɛt se, “Wi bin tɔk  bɔt dɛn tin dɛn de so dat leta we wi gɛt fɔ disayd fɔ du ɔda tin dɛn, wi go mek shɔ se di tin dɛn we wi de disayd fɔ du nɔ go stɔp wi fɔ rich dɛn wi gol dɛn de.” Rɔsɛl ɛn Ilizabɛt bin ebul fɔ go na Maykronishia fɔ go prich usay dɛn nid mɔ pɔblisha dɛn.

13. Akɔdin to Sam 28:​7, wetin go apin we wi abop pan Jiova?

¹³ Jɔs lɛk Rɔsɛl ɛn Ilizabɛt, bɔku mared pipul dɛn dɔn disayd fɔ liv simpul layf so dat dɛn go spɛn bɔku tɛm fɔ prich ɛn tich di gud nyuz. We maredman ɛn in wɛf sɛt gol dɛn fɔ du ɔl wetin dɛn ebul fɔ Jiova, ɛn dɛn wok togɛda fɔ rich dɛn gol dɛn de, dat go mek bɔku gud tin dɛn apin. Dɛn go si aw Jiova de kia fɔ dɛn, dɛn go abop pan am mɔ ɛn mɔ, ɛn dɛn go gɛt tru tru gladi-at.—Rid Sam 28:​7.

14. Aw apɔsul Pita ɛn in wɛf bin sho se dɛn abop pan di prɔmis we de na Matyu 6:​25, 31-34?

¹⁴ Mared pipul dɛn kin lan bak frɔm apɔsul Pita ɛn in wɛf dɛn ɛgzampul. Afta lɛk siks mɔnt to wan ia bin dɔn pas frɔm we apɔsul Pita bin mit Jizɔs fɔ di fɔs tɛm, i bin nid fɔ disayd fɔ du wan impɔtant tin. Pita bin de du fishin wok fɔ kia fɔ in famili. So we Jizɔs bin tɛl Pita fɔ fala am, Pita bin nid fɔ tink bɔt in wɛf we i de disayd wetin i go du. (Lyuk 5:​1-11) Pita bin disayd fɔ jɔyn Jizɔs pan in prichin wok. Na di rayt tin i bin disayd fɔ du. Ɛn wi gɛt gud rizin fɔ biliv se Pita in wɛf bin sɔpɔt di tin we i disayd. Di Baybul sho wi se afta Jizɔs bin gɛt layf bak, Pita in wɛf bin de travul wit am fɔ sɔm tɛm. (1 Kɔr. 9:​5) Wan dawt nɔ de se na bikɔs in na bin gud Kristian wɛf na in mek Pita bin ebul gi advays fɔ maredman ɛn mareduman dɛn we na Kristian. (1 Pit. 3:​1-7) So wi si se Pita ɛn in wɛf bin abop pan Jiova in prɔmis fɔ se I go gi dɛn di tin dɛn we dɛn nid if dɛn put di Kiŋdɔm fɔs na dɛn layf.—Rid Matyu 6:​25, 31-34.

15. Wetin yu lan frɔm Tiago ɛn Ɛsta dɛn ɛkspiriɛns?

¹⁵ If i bi se una dɔn mared fɔ sɔm tɛm naw, aw una go ebul fɔ kɔntinyu fɔ du mɔ fɔ Jiova? Wan we na we una de lan bɔt ɔda mared pipul dɛn ɛgzampul. Fɔ ɛgzampul, una kin rid di atikul dɛn we nem “They Offered Themselves Willingly.” Dɛn atikul dɛn ya bin ɛp wan maredman ɛn in wɛf we nem Tiago ɛn Ɛsta, we kɔmɔt na Brazil. I ɛp dɛn fɔ bigin tink fɔ go prich usay dɛn nid mɔ pɔblisha dɛn. Tiago se: “We wi bin de rid bɔt aw Jiova bin ɛp in savant dɛn insay wi tɛm, wi bak bin want fɔ fala Jiova in advays ɛn si we i de ɛp wi.” Dɛn bin leta go na Paregway, ɛn dɛn dɔn de na di Pɔtyugiz fil frɔm 2014. Ɛsta se: “Wan skripchɔ we wi ɔl tu rili lɛk na Ɛfishians 3:​20. Bɔku tɛm, wi dɔn si we dɛn wɔd dɛn de dɔn kam tru as wi de sav Jiova.” Insay da lɛta de we Pɔl rayt to di Kristian dɛn na Ɛfisɔs, i prɔmis dɛn se Jiova go gi dɛn pas wetin dɛn aks fɔ fa fawe. Da prɔmis de dɔn rili kam tru bɔku tɛm.

16. We pipul dɛn we jɔs mared de tink bɔt dɛn gol dɛn, udat dɛn kin aks fɔ advays?

¹⁶ Pipul dɛn we jɔs mared kin bɛnifit frɔm di ɛkspiriɛns bɔt ɔda pipul dɛn we dɔn lan fɔ abop pan Jiova. Sɔm mared pipul dɛn dɔn spɛn lɔng tɛm na di ful-taym savis. I go fayn fɔ aks dɛn fɔ  advays if una de tink bɔt una gol dɛn. Dis na wan ɔda we fɔ sho se una de abop pan Jiova. (Prɔv. 22:​17, 19) Ɛlda dɛn bak kin ɛp pipul dɛn we jɔs mared fɔ sɛt ɛn rich dɛn gol dɛn na dɛn savis to Jiova.

17. Wetin bin apin to Klaus ɛn Marisa, ɛn wetin wi lan frɔm dɛn ɛkspiriɛns?

¹⁷ Sɔntɛnde, i go bi se wi gɛt wan patikyula tin we wi want fɔ du fɔ Jiova, bɔt i kin dayrɛkt wi fɔ du ɔda tin fɔ am. Na dis bin apin to Klaus ɛn Marisa we wi bin dɔn tɔk bɔt. Afta dɛn bin dɔn mared fɔ tri ia, dɛn bin lɛf usay dɛn de ɛn go vɔlɔntia fɔ du kɔnstrɔkshɔn wok na di Finland branch. Bɔt dɛn bin kam fɔ no se na fɔ siks mɔnt nɔmɔ dɛn go alaw dɛn fɔ de de. Fɔs, dɛn at bin pwɛl. Bɔt shɔt tɛm afta dat, dɛn bin invayt dɛn fɔ atɛnd wan Arabik langwej kɔz, ɛn naw dɛn gladi we dɛn de prich na di Arabik fil na wan ɔda kɔntri. We Marisa de tink bɔt wetin apin, i se: “A bin de fred fɔ du sɔntin we a nɔ bin dɔn ɛva du, ɛn a bin nid fɔ abop pan Jiova wit ɔl mi at. Bɔt a dɔn si aw Jiova dɔn ɛp wi ɔltɛm di we aw wi nɔ de ɛkspɛkt. Afta dis tin we apin, a dɔn abop pan Jiova mɔ ɛn mɔ.” Lɛk aw dis ɛgzampul sho, wan dawt nɔ de se Jiova go blɛs yu ɔltɛm if yu abop pan am wit ɔl yu at.

18. Wetin mared pipul dɛn go du fɔ mek dɛn kɔntinyu fɔ abop pan Jiova?

¹⁸ Mared na gift frɔm Jiova. (Mat. 19:​5, 6) I want fɔ mek mared pipul dɛn ɛnjɔy dis gift. (Prɔv. 5:​18) Pipul dɛn we jɔs mared, una nɔ tink se i go fayn fɔ tink bɔt wetin una de du wit una layf? Una de du ɔl wetin una ebul fɔ sho Jiova se una rili gladi fɔ di gift dɛn we i dɔn gi una? Pre to Jiova. Luk insay in Wɔd fɔ prinsipul dɛn we una go aplay. Dɔn, fala di advays dɛn we Jiova de gi una. Wan dawt nɔ de se una go gɛt tru tru gladi-at if una mek una savis to Jiova bi di tin we impɔtant pas ɔl na una layf.