1. Wetin Jiova de ɛnkɔrej wi fɔ du?

 JIOVA kin rili gladi fɔ sho lɔv we nɔ de ɛva chenj. (Ozie 6:​6) I want in savant dɛn fɔ gladi fɔ sho da kayn lɔv de bak. Jiova bin yuz prɔfɛt Mayka fɔ ɛnkɔrej wi “fɔ kɔntinyu fɔ sho lɔv” we nɔ de ɛva chenj. (Mayk. 6:​8, futnot) Bɔt, bifo wi go ebul fɔ du dat, wi nid fɔ no wetin na lɔv we nɔ de ɛva chenj.

2. Wetin na lɔv we nɔ de ɛva chenj?

² Wetin na lɔv we nɔ de ɛva chenj? Di wɔd dɛn “lɔv we nɔ de ɛva chenj” de lɛk 230 tɛm insay di New World Translation of the Holy Scriptures. Wetin na dis lɔv? If pɔsin gɛt lɔv we nɔ de ɛva chenj, i go rili lɛk ɔda pɔsin, ɛn dat go mek i kɔntinyu fɔ lɛk am ɛn fetful to am. Jiova na di bɛst ɛgzampul we de sho dis kayn lɔv. Insay dis atikul, wi go tɔk bɔt aw Jiova de sho lɔv we nɔ de ɛva chenj to mɔtalman. Insay di nɛks atikul, wi go tɔk bɔt aw Jiova in savant dɛn kin falamakata am bay we dɛn de sho lɔv we nɔ de ɛva chenj to ɔda pipul dɛn.

3. Wetin Jiova bin tɛl Mozis bɔt insɛf?

³ I nɔ bin tu te afta we di Izrɛlayt dɛn kɔmɔt na Ijipt we Jiova bin tɛl Mozis bɔt In nem ɛn In kwaliti dɛn. I bin se: ‘Jiova, Jiova, di PAPA GƆD we gud ɛn de sho masi, we nɔ gɛt shɔtat, we gɛt pasmak lɔv we nɔ de ɛva chenj, ɛn PAPA GƆD we pɔsin kin put in op ɛn trɔs pan. A de sho lɔv to tawzin pan tawzin pipul dɛn ɛn de fɔgiv udat du bad.’ (Ɛks. 34:​6, 7) Wit dɛn fayn wɔd dɛn ya, Jiova bin  tɛl Mozis sɔntin we rili spɛshal bɔt In lɔv we nɔ de ɛva chenj. Wetin na da tin de?

4-5. (a) Aw Jiova tɔk bɔt insɛf? (b) Us kwɛstyɔn dɛn wi de kam tɔk bɔt?

⁴ Jiova nɔ bin jɔs tɔk bɔt insɛf as pɔsin we gɛt lɔv we nɔ de ɛva chenj, bɔt i bin tɔk bɔt insɛf as pɔsin we gɛt “pasmak lɔv we nɔ de ɛva chenj.” Di Baybul yuz dɛn wɔd dɛn de siks mɔ tɛm. (Nɔm. 14:​18; Nɛi. 9:​17; Sam 86:​15; 103:​8; Joɛl 2:​13; Jona 4:​2, NWT) Ɛn na Jiova nɔmɔ di Baybul tɔk bɔt da we de, i nɔ ɛva tɔk bɔt dat fɔ mɔtalman. I nɔ rili wɔndaful fɔ si se bɔku tɛm Jiova tɔk bɔt insɛf na di Baybul da we de? So wi si se lɔv we nɔ de ɛva chenj rili impɔtant to am. * No wɔnda we Kiŋ Devid bin se: “PAPA GƆD [“Jiova,” NWT], wi nɔ ebul mɛzhɔ di lɛk we yu lɛk wi [we nɔ de ɛva chenj]. . . . Wi nɔ go gi prayz to yu lɔv [we nɔ de ɛva chenj]! Yu de kɔba big ɛn smɔl wan lɛkɛ aw fɔl de kɔba in pikin.” (Sam 36:​5, 7) Wi rili valyu Gɔd in lɔv we nɔ de ɛva chenj lɛk aw Devid bin valyu am?

⁵ Fɔ lɛ wi ɔndastand gud gud wan wetin lɔv we nɔ de ɛva chenj min, lɛ wi tɔk bɔt tu kwɛstyɔn dɛn: Udat Jiova kin sho lɔv we nɔ de ɛva chenj? Ɛn aw wi de bɛnifit we Jiova sho wi lɔv we nɔ de ɛva chenj?

6. Na to udat dɛn Jiova de sho lɔv we nɔ de ɛva chenj?

⁶ Udat dɛn Jiova kin sho lɔv we nɔ de ɛva chenj? Di Baybul tɔk se wi kin lɛk bɔku tin dɛn lɛk “fam wok,” “rɔm ɛn ɛkspɛnsiv it,” ‘kɔrɛkshɔn,’ “fɔ lan,” ɛn ‘sɛns.’ (2 Kro. 26:​10; Prɔv. 12:​1; 21:​17; 29:​3) Bɔt dɛn nɔ de sho lɔv we nɔ de ɛva chenj to tin dɛn, na to pipul dɛn nɔmɔ. Bɔt nɔto ɔlman Jiova de sho lɔv we nɔ de ɛva chenj. I de sho am to di wan dɛn we gɛt tayt padi biznɛs wit am. Wi Gɔd nɔ de ɛva kɔmɔt biɛn in padi dɛn. I gɛt wɔndaful tin we i want fɔ du fɔ dɛn, ɛn i nɔ go ɛva stɔp fɔ lɛk dɛn.

7. Aw Jiova dɔn sho lɔv to ɔl mɔtalman?

⁷ Jiova dɔn sho lɔv to ɔl mɔtalman. Jizɔs bin tɛl wan man we nem Nikodimɔs se: “Bikɔs Gɔd rili lɛk di wɔl [ɔ mɔtalman], na dat mek i gi in wangren Pikin we insɛf sɛf mek, so dat ɛnibɔdi we sho se i gɛt fet pan am Gɔd nɔ go dɔnawe wit  am, bɔt i go gɛt layf we go de sote go.”—Jɔn 3:​1, 16; Mat. 5:​44, 45.

8-9. (a) Wetin mek Jiova de sho lɔv we nɔ de ɛva chenj to in savant dɛn? (b) Wetin wi de kam tɔk bɔt?

⁸ Lɛk aw wi bin dɔn tɔk, di wan dɛn nɔmɔ we Jiova de sho lɔv we nɔ de ɛva chenj na di wan dɛn we gɛt tayt padi biznɛs wit am, dat na in savant dɛn. Wi kin si dis frɔm wetin Kiŋ Devid ɛn prɔfɛt Daniɛl bin tɔk. Fɔ ɛgzampul, Devid bin se: “Kɔntinyu fɔ sho yu lɔv [we nɔ de ɛva chenj] to udat no yu.” ‘PAPA GƆD [“Jiova,” NWT] go sho lɔv we nɔ de ɛva chenj to ɔl udat gɛt fred ɛn rɛspɛkt fɔ am.’ Ɛn Daniɛl bin tɔk se: “Di lɛk we [Jiova] lɛk di wan dɛn we lɛk am ɛn de du wetin i se, nɔ de [ɛva chenj].” (Sam 36:​10; 103:​17; Dan. 9:​4) Akɔdin to dɛn wɔd dɛn ya, Jiova de sho lɔv we nɔ de ɛva chenj to in savant dɛn bikɔs dɛn no am, dɛn de fred am, dɛn lɛk am, ɛn dɛn de du wetin i se. Di wan dɛn nɔmɔ we Jiova de sho lɔv we nɔ de ɛva chenj to, na in pipul dɛn we de wɔship am di rayt we.

⁹ Bifo wi bigin fɔ sav Jiova, i bin de sho wi di sem lɔv we i de sho to ɔl mɔtalman. (Sam 104:​14) Bɔt naw we wi de wɔship am, i de sho wi bak in lɔv we nɔ de ɛva chenj. Infakt, Jiova de ɛnkɔrej in savant dɛn se: “Di lɛk we a lɛk una we nɔ de chenj, nɔ go dɔn.” (Ayz. 54:​10) Fɔ tru, lɛk aw Devid insɛf bin kam fɔ no, “Jiova go trit di wan we nɔ de kɔmɔt biɛn am spɛshal we.” (Sam 4:​3, NWT) Wetin dis fɔ mek wi du? Wan pan di man dɛn we rayt di sam buk bin se: “Udat no wetin bɛtɛ, fɔ de mɛmba ɔl dɛn tin dɛn ya ɛn tink bɔt di kayn lɔv [we nɔ de ɛva chenj] we PAPA GƆD [“Jiova,” NWT] gɛt fɔ mɔtalman.” (Sam 107:​43) Dis fayn advays kɔmɔt frɔm Jiova. So naw, lɛ wi tɔk bɔt tri we dɛn aw Jiova de sho in lɔv we nɔ de ɛva chenj, ɛn aw wi kin bɛnifit frɔm am.

10. We wi no se Jiova in lɔv we nɔ de ɛva chenj go de sote go, aw dat de ɛp wi? (Sam 31:​7)

¹⁰ Gɔd in lɔv we nɔ de ɛva chenj go de  sote go. Dɛn tɔk bɔt dis 26 tɛm insay Sam 136. Di fɔs vas se: “Tɛl Jiova tɛnki, bikɔs i gud; in lɔv we nɔ de ɛva chenj go de sote go.” (Sam 136:​1, NWT) Insay ɔl di vas dɛn, frɔm vas 2 to 26, di Baybul yuz di wɔd dɛn we se, “in lɔv we nɔ de ɛva chenj go de sote go.” As wi de rid di ɔda vas dɛn na dis sam, wi de kɔle di bɔku we dɛn aw Jiova dɔn de sho in lɔv we nɔ de ɛva chenj ɔltɛm. We dɛn ripit di wɔd dɛn we se, “in lɔv we nɔ de ɛva chenj go de sote go,” dat de sho wi se Gɔd in lɔv fɔ in pipul dɛn nɔ de chenj. I de rili ɛnkɔrej wi fɔ no se Jiova nɔ kin jɔs stɔp fɔ lɛk in savant dɛn kwik kwik wan. Bifo dat, we i bigin fɔ sho se i lɛk pɔsin we de sav am, i nɔ de ɛva lɛf am, mɔ we di pɔsin gɛt prɔblɛm. Aw wi de bɛnifit? We wi no se Jiova de nia wi, dat de gi wi di gladi-at ɛn trɛnk we wi nid fɔ bia ɛni prɔblɛm ɛn kɔntinyu fɔ sav am.—Rid Sam 31:​7.

11. Akɔdin to Sam 86:​5 (NWT), wetin de muv Jiova fɔ fɔgiv?

¹¹ Gɔd in lɔv we nɔ de ɛva chenj de muv am fɔ fɔgiv wi. We Jiova de luk sina we want fɔ ripɛnt ɛn we dɔn lɛf fɔ du bad tin dɛn, in lɔv we nɔ de ɛva chenj de muv Am fɔ fɔgiv. Devid bin tɔk bɔt Jiova se: “I nɔ de pɔnish wi lɛk aw i fɔ pɔnish wi, ɛn [i] nɔ de pe wi fɔ we wi du bad.” (Sam 103:​8-11) Di tin dɛn we bin apin to Devid bin mek i no bɔt aw pɔsin in at kin rili pwɛl we i gɛt gilti kɔnshɛns. Bɔt i bin lan bak se Jiova “rɛdi fɔ fɔgiv.” Wetin de muv Jiova fɔ fɔgiv? Di ansa de na Sam 86:​5, (NWT). (Rid.) Fɔ tru, jɔs lɛk wetin Devid se na in prea, Jiova de fɔgiv bikɔs i rili gɛt lɔv we nɔ de ɛva chenj fɔ ɔl di wan dɛn we de aks fɔ fɔgivnɛs.

12-13. If wi de fil gilti ɛn wi at pwɛl bikɔs ɔf sin we wi bin dɔn kɔmit, wetin go ɛp wi?

¹² We wi kɔmit sin, i kin rayt ɛn ivin gud fɔ mek wi fil sɔri fɔ wetin wi dɔn du. Dis kin muv wi fɔ ripɛnt ɛn du tin dɛn fɔ kɔrɛkt wi mistek dɛn. Bɔt sɔm pipul dɛn nɔ de stɔp fɔ fil gilti bikɔs ɔf di mistek dɛn we dɛn bin dɔn mek. Dɛn kin stil tink se Jiova nɔ go ɛva fɔgiv dɛn, pan ɔl we dɛn go dɔn aks fɔ fɔgivnɛs ɛn stɔp fɔ  du bad tin dɛn. If yu ɔndastand gud gud wan se Jiova rili want fɔ sho in lɔv we nɔ de ɛva chenj to yu, dat go ɛp yu fɔ stɔp fɔ fil da we de.

¹³ Aw wi de bɛnifit? Pan ɔl we wi nɔ pafɛkt, wi go gladi fɔ sav Jiova wit klin kɔnshɛns. Dis pɔsibul bikɔs “in Pikin Jizɔs in blɔd de pul wi pan sin.” (1 Jɔn 1:​7) We yu at pwɛl bikɔs ɔf yu sin, mɛmba se Jiova rili want fɔ fɔgiv yu if yu ripɛnt. Notis aw Devid bin kɔnɛkt lɔv we nɔ de ɛva chenj ɛn fɔgivnɛs. I bin rayt se: “Lɛkɛ aw di spes bitwin ɛvin ɛn ath big, na so di lɔv [we nɔ de ɛva chenj] we PAPA GƆD gɛt fɔ udat de fred ɛn rɛspɛkt am tan; lɛkɛ aw Ist de fa frɔm Wɛst, na so PAPA GƆD dɔn push wi sin fa frɔm wi.” (Sam 103:​11, 12) Fɔ tru, Jiova rɛdi fɔ “fɔgiv [pɔsin] fɔ ɔl wetin i dɔn du.”—Ayz. 55:​7, NWT.

14. Aw Devid bin tɔk bɔt di we aw Jiova in lɔv we nɔ de ɛva chenj de protɛkt wi?

¹⁴ Gɔd in lɔv we nɔ de ɛva chenj de gi wi spirichwal protɛkshɔn. We Devid bin de pre to Jiova, i bin se: “Yu na ples fɔ ayd fɔ mi. Yu de protɛkt mi frɔm prɔblɛm. Yu go sɔrawnd mi ɛn ala wit gladi-at fɔ sev mi. . . . Jiova in lɔv we nɔ de ɛva chenj sɔrawnd di wan we abop pan Am.” (Sam 32:​7, 10, NWT) Insay di tɛm we dɛn bin de rayt di Baybul, di wɔl dɛn we bin de rawnd di siti dɛn bin de protɛkt di pipul dɛn frɔm dɛn ɛnimi. Jiova in lɔv we nɔ de ɛva chenj tan lɛk wɔl we de protɛkt wi frɔm ɛnitin we go pwɛl wi padi biznɛs wit am. Dɔn bak, Jiova in lɔv we nɔ de ɛva chenj de muv am fɔ drɔ wi nia am.—Jɛr. 31:​3.

15. Aw Jiova in lɔv we nɔ de ɛva chenj tan lɛk ples fɔ ayd?

¹⁵ Devid bin yuz ɔda ɛgzampul fɔ ɛp wi fɔ ɔndastand aw Gɔd de protɛkt in pipul dɛn. I bin rayt se: “Gɔd na mi ples fɔ ayd, di Gɔd we de sho lɔv we nɔ de ɛva chenj to mi.” Devid bin tɔk bɔt Jiova bak se: “In na mi lɔv we nɔ de ɛva chenj ɛn di wan we de fɛt fɔ mi, mi ples fɔ ayd ɛn di wan we de sev mi, mi shild ɛn di Wan we a dɔn tek as mi os.” (Sam 59:​17, NWT; 144:​2, NWT) Wetin mek Devid bin kɔmpia Jiova in lɔv we nɔ de ɛva chenj wit ples fɔ ayd ɛn pɔsin we de fɛt fɔ am? Ilɛk usay wi de na di wɔl, wans wi na Jiova in savant, i go gi wi ɔl wetin wi nid fɔ protɛkt wi padi biznɛs wit am we rili valyu. Da sem prɔmis de, de bak na Sam 91. Di man we rayt da sam de bin tɔk se: ‘A go tɛl PAPA GƆD [“Jiova,” NWT] se nain de kɔba mi ɛn fɛt fɔ mi.’ (Sam 91:​1-3, 9, 14) Mozis bin yuz dɛn sem wɔd dɛn de. (Sam 90:​1) Dɔn bak, jɔs bifo Mozis day, i yuz ɔda fayn ɛgzampul fɔ tɔk bɔt di we aw Jiova de kɔba wi. I rayt se: “Gɔd na ples fɔ ayd frɔm trade trade, in an dɛn we de sote go de ɔnda una.” (Dyu. 33:​27, NWT) Wetin di wɔd dɛn “in an dɛn we de sote go de ɔnda una” tɛl wi bɔt Jiova?

16. Us tu we dɛn Jiova de ɛp wi? (Sam 136:​23)

¹⁶ We wi abop se Jiova go protɛkt wi, dat kin mek wi fil sef. Bɔt sɔntɛnde, wi at kin rili pwɛl ɛn wi nɔ ebul stɔp fɔ fil da we de. We dat apin, wetin Jiova go du fɔ wi? (Rid Sam 136:​23.) I go put in an dɛn ɔnda wi, tek tɛm es wi, ɛn ɛp wi fɔ stɔp fɔ fil bad. (Sam 28:​9; 94:​18) Aw wi de bɛnifit? We wi no se wi kin abop pan Gɔd ɔltɛm, dis de ɛp wi tu we dɛn. Fɔs, ilɛk usay wi de, wi no se Jiova de protɛkt wi ɔltɛm. Sɛkɔn, wi Papa we de na ɛvin we lɛk wi, rili bisin bɔt wi.

17. Bikɔs ɔf Gɔd in lɔv we nɔ de ɛva chenj, wetin wi shɔ bɔt? (Sam 33:​18-22)

¹⁷ As wi dɔn lan, ɛnitɛm we wi gɛt prɔblɛm, wi shɔ se Jiova go ɛp wi fɔ kɔntinyu fɔ fetful to Am. (2 Kɔr. 4:​7-9) Prɔfɛt Jɛrimaya bin rayt se: “Na bikɔs Jiova gɛt lɔv we nɔ de ɛva chenj, na dat mek wi nɔ day yet, bikɔs in sɔri-at nɔ de ɛva dɔn.” (Lam. 3:​22, NWT) Wi shɔ se Jiova go kɔntinyu fɔ sho wi lɔv we nɔ de ɛva chenj bikɔs di Baybul tɛl wi se, “PAPA GƆD [“Jiova,” NWT] yay de pan ɔl udat abop pan am; ɛn i de wach dɛn wan we abop pan in lɔv we nɔ de chenj.”—Rid Sam 33:​18-22.

18-19. (a) Wetin wi want fɔ mɛmba? (b) Wetin wi go tɔk bɔt insay di nɛks atikul?

¹⁸ Wetin wi want fɔ de mɛmba? Bifo wi bigin sav Jiova, wi bin de bɛnifit frɔm di lɔv we Jiova de sho to ɔl mɔtalman. Bɔt as in savant dɛn, wi de bɛnifit bak frɔm in lɔv we nɔ de ɛva chenj. Na da lɔv de, de muv Jiova fɔ drɔ wi kam nia am ɛn protɛkt wi. I go kɔntinyu fɔ drɔ wi kam nia am, ɛn i go du ɔl di tin dɛn we i dɔn prɔmis wi. I want wi fɔ bi in padi dɛn sote go. (Sam 46:​1, 2, 7) So, ilɛk uskayn prɔblɛm mit wi, Jiova go gi wi di trɛnk we wi nid fɔ kɔntinyu fɔ fetful to am.

¹⁹ Wi dɔn si aw Jiova de sho lɔv we nɔ de ɛva chenj to in savant dɛn. I want wi bak fɔ sho lɔv we nɔ de ɛva chenj to ɔda pipul dɛn. Aw wi go du dat? Di nɛks atikul go tɔk bɔt dis impɔtant tɔpik.