1-2. (a) Us kwɛstyɔn dɛn wi go tɔk bɔt? (b) Wetin sho se Jiova rili want fɔ ɛp wi?

 JIOVA de ɛp wi fɔ bia wi prɔblɛm dɛn ɛn fɔ gɛt gladi-at we wi de sav am. Us we dɛn i de ɛp wi? Ɛn aw wi go rili bɛnifit frɔm di ɛp we Jiova de gi wi? Wi go ansa dɛn kwɛstyɔn dɛn ya insay dis atikul. Bɔt bifo wi tɔk bɔt di ansa dɛn, lɛ wi tɔk bɔt dis kwɛstyɔn: Fɔ se Jiova rili rɛdi fɔ ɛp wi?

² Wan wɔd we apɔsul Pɔl bin yuz na in lɛta to di Ibru Kristian dɛn ɛp wi fɔ fɛn di ansa. Pɔl bin rayt se: “Na Jiova de ɛp mi; a nɔ go fred. Wetin mɔtalman ebul du mi?” (Ibru. 13:​6) Buk dɛn we de tɔk bɔt di Baybul tɔk se di wɔd dɛn ‘pɔsin we de ɛp’ we de na dis vas, min pɔsin we de rɔn fɔ ɛp ɔda pɔsin we de kray fɔ ɛp. Imajin we Jiova de rɔsh fɔ sev pɔsin we gɛt prɔblɛm. Fɔ tru, yu go gri se dɛn wɔd dɛn ya sho se Jiova rili want fɔ ɛp wi. We Jiova de ɛp wi, wi go ebul bia wi prɔblɛm dɛn wit gladi-at.

3. Us tri we dɛn Jiova de ɛp wi fɔ bia wi prɔblɛm dɛn wit gladi-at?

³ Wetin na sɔm we dɛn we Jiova de ɛp wi fɔ bia wi prɔblɛm dɛn wit gladi-at? Fɔ ansa da kwɛstyɔn de, lɛ wi rid di Baybul buk we nem Ayzaya. Wetin mek? Bikɔs bɔku pan di prɔfɛsi dɛn we Jiova bin mek Ayzaya rayt aplay to Gɔd in savant dɛn tide. Dɔn bak, bɔku tɛm we Ayzaya bin de tɔk bɔt Jiova, i bin de yuz wɔd dɛn we izi fɔ ɔndastand. Ayzaya chapta 30 gɛt sɔm ɛgzampul dɛn. Insay da chapta de, Ayzaya bin yuz fayn ɛgzampul dɛn fɔ tɔk bɔt aw Jiova de ɛp in pipul dɛn. I bin rayt se Jiova de ɛp wi (1) bay we i de tek tɛm lisin ɛn ansa wi prea dɛn, (2) bay we i de gayd wi, ɛn (3) bay we i de blɛs wi naw ɛn tumara bambay. Lɛ wi tɔk bɔt dɛn tri we dɛn ya we Jiova de ɛp wi.

4. (a) Aw Jiova bin kɔl di Ju dɛn insay Ayzaya in tɛm? Wetin I bin alaw fɔ apin? (b) Us op Jiova bin gi to di fetful Ju dɛn? (Ayzaya 30:​18, 19, NWT)

⁴ Insay di fɔs vas dɛn na Ayzaya chapta 30, Jiova bin kɔl di Ju dɛn “traŋayes pikin dɛm,” we de “ad sin pan sin.” I kɔntinyu fɔ tɔk se: “Dɛn na pipul [dɛn] we traŋayes, . . . we nɔ de yɛri PAPA GƆD [“Jiova,” NWT] in wɔd.” (Ayz. 30:​1, 9) Bikɔs di pipul dɛn nɔ bin de gri fɔ lisin to Jiova, Ayzaya bin tɔk se Jiova go alaw dɛn fɔ sɔfa. (Ayz. 30:​5, 17; Jɛr. 25:​8-11) Ɛn na dat bin apin we di Babilonian dɛn bin kɛr dɛn go na Babilɔn as prizina dɛn. Bɔt sɔm Ju pipul dɛn bin de we fetful, ɛn Ayzaya bin gɛt mɛsej fɔ dɛn we go gi dɛn op. I tɛl dɛn se wan de Jiova go alaw dɛn fɔ kam bak ɛn kɔntinyu fɔ de na Izrɛl. (Rid Ayzaya 30:​18, 19, NWT.) Ɛn na dat bin apin. Jiova bin fri dɛn frɔm Babilɔn. Bɔt lɔng tɛm bin pas bifo Jiova fri dɛn. Di wɔd dɛn we se “Jiova de peshɛnt wet fɔ sho se i lɛk una” bin sho se sɔm tɛm go pas bifo di fetful Ju dɛn go fri. Infakt, di Izrɛlayt dɛn bin spɛn 70 ia na ɛgzayl insay Babilɔn bifo dɛn alaw sɔm pan dɛn fɔ kam bak na Jerusɛlɛm. (Ayz. 10:​21; Jɛr. 29:​10) We di Izrɛlayt dɛn na bin prizina dɛn na Babilɔn, dɛn bin de kray bikɔs dɛn at bin rili pwɛl. Bɔt we dɛn go bak na dɛn om-tɔŋ, dɛn bin kray bikɔs dɛn bin rili gladi.

5. Us fayn tin Ayzaya 30:​19 (NWT) ɛp wi fɔ no?

⁵ Tide, wisɛf go gɛt kɔrej we wi yɛri di wɔd dɛn we se: “I go mɔs sɔri fɔ yu we yu de kray fɔ ɛp.” (Ayz. 30:​19, NWT) Ayzaya bin mek wi no se Jiova go tek tɛm lisin we wi kray to Am ɛn nɔ westɛm fɔ ansa wi prea dɛn. Ayzaya bin kɔntinyu fɔ tɔk se: “As i yɛri we yu de kray so, i go ansa yu.” Dɛn fayn wɔd dɛn ya mɛmba wi se wi Papa rili want fɔ ɛp di wan dɛn we de aks am fɔ ɛp. We wi no dis, i de ɛp wi fɔ bia wit gladi-at.

6. Aw Ayzaya in wɔd dɛn sho se Jiova de lisin to di prea we ɛniwan pan in savant dɛn de pre?

⁶ Wetin bak dis vas tich wi bɔt wi prea dɛn? Jiova de tek tɛm lisin to di prea we ɛniwan pan wi de pre. Wetin mek wi se dat? Insay di orijinal langwej, na di fɔs vas dɛn na Ayzaya chapta 30, dɛn yuz di wɔd “una” bikɔs Jiova bin de tɔk to in pipul dɛn as grup. Bɔt insay vas 19, dɛn yuz di wɔd “yu” bikɔs Jiova bin de tɔk to dɛn wan bay wan. Ayzaya rayt se: “Yu nɔ go kray”; “i go mɔs sɔri fɔ yu”; “i go ansa yu.” As Papa we lɛk wi, Jiova nɔ de tɛl in bɔypikin ɔ galpikin we gɛt pwɛlat se, “Yu fɔ strɔng lɛk yu brɔda ɔ sista.” Bɔt i bisin bɔt wi wan bay wan, ɛn i de lisin to ɛniwan pan wi prea.—Sam 116:​1; Ayz. 57:​15.

7. Aw Ayzaya ɛn Jizɔs sho se i impɔtant fɔ mek wi kɔntinyu fɔ pre?

⁷ We wi pre to Gɔd ɛn tɛl am bɔt sɔntin we de afɛkt wi, fɔs, sɔntɛm Jiova go gi wi di trɛnk we wi nid fɔ bia di prɔblɛm. Ɛn if wi prɔblɛm nɔ dɔn di tɛm we wi de ɛkspɛkt, sɔntɛm wi go nid fɔ pre to Jiova bɔku tɛm fɔ mek i gi wi trɛnk fɔ bia am. Na dat i want mek wi du. Na dat di wɔd dɛn we de na Ayzaya min, we i se: “Nɔ mek [Jiova] blo.” (Ayz. 62:​7) Wetin dat min? I min se wi fɔ kɔntinyu fɔ pre to Jiova te i tan lɛk se wi nɔ de alaw Jiova fɔ blo. Ayzaya in wɔd dɛn mɛmba wi bɔt di ɛgzampul dɛn we Jizɔs gi bɔt prea we de na Lyuk 11:​8-10, 13.  Insay da skripchɔ de, Jizɔs ɛnkɔrej wi fɔ “kɔntinyu fɔ pre” ɛn fɔ “kɔntinyu fɔ aks” fɔ oli spirit. Wi kin beg Jiova bak fɔ gayd wi so dat wi go ebul fɔ disayd fɔ du di rayt tin dɛn.

8. Insay di Izrɛlayt dɛn tɛm, aw di wɔd dɛn we de na Ayzaya 30:​20, 21 (NWT) bin kam tru?

⁸ Rid Ayzaya 30:​20, 21, NWT. We di Babilonian sojaman dɛn bin sɔrawnd Jerusɛlɛm fɔ wan ɛn af ia, di prɔblɛm we di Ju dɛn bin gɛt bin so bɔku dat i bin dɔn kɔmɔn lɛk bred ɛn wata. Bɔt akɔdin to vas 20 ɛn 21, Jiova bin prɔmis di Ju dɛn se if dɛn ripɛnt ɛn chenj di we aw dɛn de biev, i go sev dɛn. Ayzaya bin kɔl Jiova di “Ticha we Pas Ɔl Ɔda Ticha Dɛn” ɛn prɔmis di pipul dɛn se Jiova go tich dɛn aw fɔ wɔship Am di we aw I want. Dɛn wɔd dɛn de bin kam tru we di Ju dɛn bin fri frɔm Babilɔn. Jiova bin pruv fɔ bi dɛn Ticha we Pas Ɔl Ɔda Ticha Dɛn, ɛn bikɔs i bin de gayd in pipul dɛn, dɛn bin ebul fɔ wɔship am di rayt we bak. Wi rili gladi bikɔs Jiova na wi Ticha we Pas Ɔl Ɔda Ticha Dɛn tide.

9. Wetin na wan we we Jiova de gayd wi tide?

⁹ Insay dɛn vas dɛn ya, Ayzaya bin tɔk se wi tan lɛk studɛnt dɛn we Jiova de tich tu we dɛn. Fɔs, Ayzaya tɔk se: “Una go si una Ticha we Pas Ɔl Ɔda Ticha Dɛn wit una yon yay.” Na dis ɛgzampul, Ayzaya se di ticha tinap bifo in studɛnt dɛn. Na ɔnɔ wi gɛt fɔ mek Gɔd tich wi tide. Aw Jiova de tich wi? I de du dat bay we i de yuz in ɔganayzeshɔn. Wi rili gladi fɔ di klia tichin we wi de gɛt frɔm Jiova in ɔganayzeshɔn. Di tin dɛn we dɛn de tich wi na wi kɔngrigeshɔn mitin dɛn, asɛmbli dɛn, kɔnvɛnshɔn dɛn, wi pɔblikeshɔn dɛn, JW Brɔdkastin, ɛn bɔku ɔda we dɛn de ɛp wi fɔ bia wit gladi-at we wi gɛt prɔblɛm.

10. Us we wi de yɛri “vɔys biɛn [wi]”?

¹⁰ Ayzaya tɔk bɔt di sɛkɔn we we Jiova de tich wi, bay we i se: “Una yes go yɛri vɔys biɛn una.” Insay dɛn wɔd dɛn ya, di prɔfɛt tɔk se Jiova tan lɛk ticha we de waka biɛn in studɛnt dɛn, de tɛl dɛn usay dɛn fɔ go ɛn i de gayd dɛn. Tide wi de yɛri Gɔd in vɔys biɛn wi. Aw? Dɛn bin dɔn rayt Gɔd in wɔd frɔm trade trade. So we wi de rid di Baybul, i tan lɛk se wi de yɛri Gɔd in vɔys biɛn wi.—Ayz. 51:​4.

11. Fɔ mek wi go ebul fɔ bia wit gladi-at, wetin wi nid fɔ du? Wetin mek?

¹¹ Aw wi go rili bɛnifit frɔm di gayd we  Jiova de yuz in ɔganayzeshɔn ɛn in Wɔd fɔ gayd wi? Notis se Ayzaya bin tɔk bɔt tu tin dɛn. Fɔs i se, “dis na di rod.” Sɛkɔn i se, “waka de.” (Ayz. 30:​21, NWT) I nɔ jɔs du fɔ sabi “di rod.” Wi nid bak fɔ “waka de.” Jiova in Wɔd ɛn di tin dɛn we in ɔganayzeshɔn de ɛksplen de tich wi wetin Jiova want wi fɔ du. Wi de lan bak aw fɔ aplay wetin Jiova de tich wi. Fɔ mek wi go ebul fɔ bia wit gladi-at we wi de sav Jiova, wi nid fɔ du dɛn tu tin dɛn ya. Na dat nɔmɔ go mek wi shɔ se Jiova go blɛs wi.

12. Akɔdin to Ayzaya 30:​23-26, aw Jiova blɛs in pipul dɛn?

¹² Rid Ayzaya 30:​23-26. Aw dis prɔfɛsi bin kam tru fɔ di Ju dɛn we bin go bak na Izrɛl afta dɛn fri frɔm Babilɔn? Jiova bin gi dɛn bɔku tin dɛn fɔ ɛp dɛn fɔ liv ɛn fɔ kɔntinyu fɔ sav am. Jiova bin gi dɛn bɔku tin fɔ it. Bɔt di tin we impɔtant pas ɔl na dat i bin gi dɛn ɔl wetin dɛn nid fɔ mek dɛn gɛt tayt padi biznɛs wit am ɛn bigin fɔ wɔship am di rayt we bak. Gɔd in pipul dɛn da tɛm de nɔ bin dɔn ɛva gɛt dɛn kayn bɔku gud tin dɛn de frɔm Gɔd. Vas 26 sho se Jiova bin rili ɛp dɛn fɔ ɔndastand in wɔd gud gud wan. (Ayz. 60:​2) Jiova in blɛsin bin ɛp in savant dɛn fɔ kɔntinyu fɔ sav am wit gladi-at, ɛn dɛn bin gɛt trɛnk “bikɔs dɛn at gladi.”—Ayz. 65:​14.

13. Aw di prɔfɛsi fɔ bigin wɔship Gɔd di rayt we bak dɔn kam tru insay wi tɛm?

¹³ Fɔ se di prɔfɛsi fɔ bigin wɔship Gɔd di rayt we bak aplay to wi tide? Yɛs! Aw? Frɔm 1919 afta Krays, bɔku pipul dɛn nɔto slev igen to Babilɔn di Gret, we na ɔl di lay lay rilijɔn dɛn. Dɛn dɔn kɛr dɛn go na ples we bɛtɛ fawe pas Izrɛl dɛn Prɔmis Land. Dɛn dɔn kɛr dɛn go na spirichwal paradays. (Ayz. 51:​3; 66:​8) Wetin na da spirichwal paradays de?

14. Wetin na di spirichwal paradays? Udat dɛn de de tide? (Rid di Wɔd we Dɛn Ɛksplen.)

¹⁴ Frɔm 1919 afta Krays, di anɔyntɛd dɛn dɔn ɛnjɔy fɔ de na wan spirichwal paradays. b As tɛm de go, di wan dɛn we gɛt op fɔ de na dis wɔl, we na di “ɔda  ship dɛn,” dɛnsɛf dɔn jɔyn di anɔyntɛd dɛn fɔ de na dis spirichwal land ɛn de ɛnjɔy Jiova in bɔku bɔku blɛsin dɛn.—Jɔn 10:​16; Ayz. 25:​6; 65:​13.

15. Usay di spirichwal paradays de?

¹⁵ Usay di spirichwal land, ɔ paradays de tide? Di wan dɛn we de wɔship Jiova de ɔlsay na di wɔl. So di spirichwal paradays we dɛn de, de ɔlsay na di wɔl. So tide, ilɛk usay wi de na di wɔl, wi go ebul fɔ de na di spirichwal paradays wans wi de du wi bɛst fɔ sɔpɔt tru wɔship.

16. Aw wi go kɔntinyu fɔ si di fayn we di spirichwal paradays fayn?

¹⁶ Fɔ mek wi go kɔntinyu fɔ de na di spirichwal paradays, wi fɔ kɔntinyu fɔ sho se wi gladi fɔ di Kristian kɔngrigeshɔn dɛn we de ɔlsay na di wɔl. Aw wi go du dat? Na bay we wi de pe atɛnshɔn pan di fayn kwaliti dɛn we wi brɔda ɛn sista dɛn gɛt, nɔto di mistek dɛn we dɛn de mek. (Jɔn 17:​20, 21) Wetin mek dat rili impɔtant? Tink bɔt dis ɛgzampul. Wi go ɛkspɛkt fɔ si difrɛn difrɛn tik dɛn na wan fayn fɔrɛst. Semweso, insay wi kɔngrigeshɔn dɛn tide, wi gɛt difrɛn difrɛn pipul dɛn we tan lɛk tik dɛn. (Ayz. 44:​4; 61:​3) Wi nid fɔ mek shɔ se wi kɔntinyu fɔ pe atɛnshɔn pan di we aw di “fɔrɛst” fayn, nɔto di tin dɛn we nɔ fayn pan di “tik dɛn” we de nia wi. Wi nɔ fɔ alaw wi mistek dɛn ɔ ɔda pipul dɛn mistek dɛn na di kɔngrigeshɔn fɔ mek wi nɔ pe atɛnshɔn pan di fayn we di Kristian kɔngrigeshɔn we de ɔlsay na di wɔl fayn.

17. Wetin ɛniwan pan wi go du fɔ ɛp fɔ mek wanwɔd kɔntinyu fɔ de na di kɔngrigeshɔn?

¹⁷ Wetin ɛniwan pan wi go du fɔ ɛp fɔ mek di kɔngrigeshɔn kɔntinyu fɔ gɛt wanwɔd? Na we wi bi pipul dɛn we de mek pis. (Mat. 5:​9; Rom. 12:​18) Ɛnitɛm we wi fɔs du sɔntin we go ɛp fɔ mek pis kɔntinyu fɔ de na di kɔngrigeshɔn, wi de ad to di fayn we di spirichwal paradays fayn. Wi de mɛmba se na Jiova dɔn briŋ wi ɔl kam na di spirichwal paradays fɔ wɔship am di rayt we. (Jɔn 6:​44) Imajin aw Jiova de gladi fɔ si we wi de wok tranga wan fɔ ɛp fɔ mek pis ɛn wanwɔd kɔntinyu fɔ de bitwin in savant dɛn we i rili valyu.—Ayz. 26:​3; Egay 2:​7.

18. Wetin wi fɔ tink bɔt ɔltɛm? Wetin mek?

 ¹⁸ Jiova de gi in savant dɛn bɔku gud tin dɛn. So aw wi go rili bɛnifit frɔm dɛn tin dɛn de? Na we wi tink gud gud wan bɔt wetin wi de stɔdi na Gɔd in Wɔd ɛn wi pɔblikeshɔn dɛn we de tɔk bɔt di Baybul. We wi stɔdi ɛn tink gud wan, dat go ɛp wi fɔ gɛt Kristian kwaliti dɛn we go muv wi fɔ lɛk wisɛf na di kɔngrigeshɔn “lɛk aw brɔda dɛn kin lɛk dɛnsɛf.” (Rom. 12:​10) As wi de tink gud wan bɔt wi blɛsin dɛn naw, wi padi biznɛs wit Jiova de tayt mɔ ɛn mɔ. Ɛn we wi tink bɔt di gud tin dɛn we Jiova prɔmis fɔ gi wi tumara bambay, wi go kɔntinyu fɔ abop se wi go sav am sote go. Na ɔl dɛn tin dɛn ya go ɛp fɔ mek wi gɛt mɔ gladi-at we wi de sav Jiova naw.

19. (a) Akɔdin to Ayzaya 30:​18 (NWT), wetin wi shɔ bɔt? (b) Wetin go ɛp wi fɔ bia wit gladi-at?

¹⁹ Jiova “go grap” fɔ wi di tɛm we i go mek dis wikɛd wɔl dɔn. (Ayz. 30:​18, NWT) Wi gɛt kɔnfidɛns se Jiova we na “Gɔd we de du tin tret” nɔ go alaw Setan in wɔl fɔ kɔntinyu fɔ de pas di tɛm we i fɔ de. (Ayz. 25:​9) Wi de peshɛnt wet wit Jiova fɔ da de de we i go sev wi. Bɔt rayt naw, wi dɔn mekɔp wi maynd fɔ kɔntinyu fɔ valyu di ɔnɔ we wi gɛt fɔ pre, fɔ stɔdi ɛn aplay di tin dɛn we wi de lan na Gɔd in Wɔd, ɛn fɔ tink gud wan bɔt wi blɛsin dɛn. As wi de du dat, Jiova go ɛp wi fɔ bia wi prɔblɛm dɛn wit gladi-at we wi de wɔship am.