1. Wetin wi fɔ ɛkspɛkt? Wetin wi shɔ bɔt?

 WI FƆ ɛkspɛkt se sɔm pipul dɛn go de agens wi we wi de du wi prichin wok. Ɛn sɔntɛm, pipul dɛn go de agens wi mɔ ɛn mɔ tumara bambay. (Dan. 11:​44; 2 Tim. 3:​12; Rɛv. 16:​21) Bɔt stil, wi shɔ se Jiova go gi wi di ɛp we wi nid. Wetin mek? Na bikɔs Jiova dɔn de ɛp in savant dɛn ɔltɛm fɔ du di wok we i gi dɛn, ilɛk aw tin nɔ izi fɔ dɛn. Fɔ ɛgzampul, lɛ wi tɔk bɔt sɔm tin dɛn we bin apin to prɔfɛt Izikɛl, we bin prich to di Ju dɛn we bin de na ɛgzayl na Babilɔn.

2. Wetin Jiova bin tɔk bɔt di pipul dɛn we Izikɛl bin gɛt fɔ prich to? Wetin wi go tɔk bɔt insay dis atikul? (Izikɛl 2:​3-6)

² Uskayn pipul dɛn Izikɛl bin gɛt fɔ prich to? Jiova bin tɔk se na pipul dɛn we “rud ɛn traŋayes.” Dɛn bin denja lɛk chukchuk ɛn skɔpiɔn dɛn. Na dat mek Jiova bin tɛl Izikɛl bɔku tɛm se: “Nɔ fred”! (Rid Izikɛl 2:​3-6.) Izikɛl bin ebul fɔ du in prichin wok bikɔs (1) na Jiova bin sɛn am, (2) Gɔd in spirit bin gi am di trɛnk we i nid, ɛn (3) di wɔd dɛn we Gɔd tɔk bin ɛp am fɔ gɛt mɔ fet. Aw dɛn tri tin dɛn ya bin ɛp Izikɛl? Ɛn aw dɛn go ɛp wi tide?

3. Us wɔd dɛn go mɔs dɔn ɛp Izikɛl? Aw Jiova bin mek i no se I go sɔpɔt am?

³ Jiova bin tɛl Izikɛl se: “A de sɛn yu.” (Izi. 2:​3, 4) Dɛn wɔd dɛn de go mɔs dɔn ɛp Izikɛl. Wetin mek? Wan dawt nɔ de se Izikɛl go dɔn mɛmba se Jiova bin yuz dɛn sem wɔd dɛn de we I bin de sɛn Mozis ɛn Ayzaya as In prɔfɛt dɛn. (Ɛks. 3:​10; Ayz. 6:​8) Izikɛl bin no bak aw Jiova bin ɛp dɛn tu prɔfɛt dɛn de fɔ du wok dɛn we nɔ bin izi fɔ du.  So we Jiova bin tɛl Izikɛl tu tɛm se: “A de sɛn yu,” di prɔfɛt bin gɛt gud rizin fɔ biliv tranga wan se Jiova go sɔpɔt am. Dɔn bak, Izikɛl bin rayt bɔku tɛm se: “PAPA GƆD [“Jiova,” NWT] in wɔd kam to mi.” (Izi. 3:​16) Ɛn bɔku tɛm, i bin rayt se: ‘PAPA GƆD [“Jiova,” NWT] in wɔd kam to mi bak.’ (Izi. 6:​1) So Izikɛl bin biliv tranga wan se na Jiova sɛn am. Dɔn bak, bikɔs Izikɛl in papa na bin prist, i go mɔs dɔn tich Izikɛl bɔt aw Jiova bin de tɛl In prɔfɛt dɛn se I go ɛp dɛn. Fɔ ɛgzampul, Jiova bin tɛl Ayzak, Jekɔb, ɛn Jɛrimaya se: “A de wit yu.”—Jɛn. 26:​24; 28:​15; Jɛr. 1:​8.

4. Us fayn wɔd dɛn go dɔn gi Izikɛl di trɛnk we i nid?

⁴ Wetin bɔku Izrɛlayt dɛn go du we dɛn yɛri Izikɛl de prich? Jiova bin tɔk se: “Di Izrɛlayt dɛn nɔ go lisin to yu; bikɔs dɛn nɔ wilin fɔ lisin to mi.” (Izi. 3:​7) We di Izrɛlayt dɛn nɔ lisin to Izikɛl, i min se dɛn nɔ want fɔ lisin to Jiova. Dɛn wɔd dɛn de ɛp Izikɛl fɔ no se i nɔ du in wok as prɔfɛt bad we, pan ɔl we di pipul dɛn nɔ lisin to am. Jiova bin ɛp Izikɛl fɔ no bak se we di jɔjmɛnt we i de prich bɔt go kam tru, di pipul dɛn go “no se wan man we na prɔfɛt bin tap wit dɛm.” (Izi. 2:​5; 33:​33) Wan dawt nɔ de se dɛn fayn wɔd dɛn de bin gi Izikɛl di trɛnk we i nid fɔ du in prichin wok.

5. Wetin Ayzaya 44:​8 se go gi wi maynd?

⁵ Wisɛf gɛt maynd bikɔs wi no se na Jiova sɛn wi fɔ prich. I de ɔnɔ wi bay we i de kɔl wi in “witnɛs dɛn.” (Ayz. 43:​10) Dat na big big ɔnɔ! Jɔs lɛk aw Jiova bin tɛl Izikɛl se: “Nɔ fred,” na so Jiova de tɛl  wi bak se: “Una nɔ fred.” Wetin mek wi nɔ fɔ fred di wan dɛn we de agens wi? Jɔs lɛk Izikɛl, na Jiova sɛn wi ɛn I de sɔpɔt wi.—Rid Ayzaya 44:​8.

6. (a) Aw Jiova mek wi no se i go sɔpɔt wi? (b) Wetin de ɛnkɔrej wi?

⁶ Jiova prɔmis wi se i go ɛp wi. Fɔ ɛgzampul, jɔs bifo Jiova tɔk se: “Una na mi witnɛs dɛn,” i bin se: “We yu de pas na wata, a go de wit yu; ɛn we yu de pas na dɛn riva, yu nɔ go drawn; we yu waka insay faya, yu nɔ go bɔn ɛn di flem nɔ go kil yu.” (Ayz. 43:​2) We wi de du wi prichin wok, wi kin gɛt bɔku prɔblɛm dɛn we wi go kɔmpia to flɔd ɛn ɔda siriɔs prɔblɛm dɛn kin mit wi we tan lɛk faya. Bɔt pan ɔl dat, Jiova de ɛp wi fɔ kɔntinyu fɔ prich. (Ayz. 41:​13) Jɔs lɛk aw i bin de apin insay Izikɛl in tɛm, bɔku pipul dɛn nɔ de lisin to wi mɛsej. Bɔt dat nɔ min se wi nɔ de du wi prichin wok fayn wan. I de ɛnkɔrej wi we wi no se Jiova gladi bikɔs wi de kɔntinyu fɔ du di prichin wok fetful wan. Apɔsul Pɔl bin tɔk se: “Ɔlman go gɛt in yon pe akɔdin to aw i wok.” (1 Kɔr. 3:​8; 4:​1, 2) Wan sista we dɔn payɔnia fɔ lɔng tɛm tɔk se: “A kin rili gladi we a no se Jiova de blɛs wi ɛfɔt.”

7. Aw Izikɛl bin fil we i bin de tink bɔt di vishɔn we i bin si? (Luk di pikchɔ na di frɔnt pej.)

⁷ Izikɛl bin si aw Gɔd in spirit pawaful. Insay wan vishɔn, Izikɛl bin si aw oli spirit bin de ɛp pawaful enjɛl dɛn ɛn muv di big big wil dɛn we de na wan chariɔt. (Izi. 1:​20, 21) Wetin Izikɛl bin du? I se: “We a si am, a butu na grɔn.” Izikɛl bin so sɔprayz dat i butu na grɔn. (Izi. 1:​28) Leta, we Izikɛl bin de tink bɔt da wɔndaful vishɔn de we i bin si, dat go mɔs dɔn ɛp am fɔ biliv mɔ ɛn mɔ se Gɔd in spirit go ɛp am fɔ du in prichin wok.

8-9. (a) Wetin bin apin to Izikɛl we Jiova bin tɛl am fɔ “tinap”? (b) Us ɔda tin Jiova bin du fɔ ɛp Izikɛl fɔ prich to di stɔbɔn Izrɛlayt dɛn?

⁸ Jiova bin tɛl Izikɛl se: “Mɔtalman, grap tinap, ɛn a go tɔk to yu.” We Jiova bin tɛl Izikɛl fɔ tinap ɛn we Gɔd in spirit bin ɛp Izikɛl, dat bin mek Izikɛl bin gɛt di trɛnk we i nid fɔ grap na grɔn. Izikɛl bin rayt se: “Spirit kam insay mi ɛn es mi ɔp ɛn mek a tinap.” (Izi. 2:​1, 2) Leta ɛn ɔl di tɛm dɛn we Izikɛl bin de prich, Gɔd in “an” bin de gayd am, dat na Gɔd in oli spirit. (Izi. 3:​22; 8:​1; 33:​22; 37:​1; 40:​1) Gɔd in spirit bin gi Izikɛl di trɛnk we i nid fɔ du di wok we I bin gi am, dat na fɔ prich to pipul dɛn we dɛn “at traŋa” ɛn we “stɔbɔn.” (Izi. 3:​7) Jiova bin tɛl Izikɛl se: “A dɔn mek yu at traŋa lɛk dɛn yon, ɛn mek yu stɔbɔn lɛk dɛn. A dɔn mek yu at traŋa lɛk ayɛn ston; nɔ fred dɛn ɛn nɔ pwɛl at we yu si dɛn.” (Izi. 3:​8, 9) I bin tan lɛk se Jiova de tɛl Izikɛl se: ‘Nɔ alaw di pipul dɛn stɔbɔnɛs fɔ mek yu at pwɛl. A go gi yu trɛnk.’

⁹ Afta dat, Gɔd in spirit bin es Izikɛl ɛn kɛr am go na di say we i bin fɔ prich. Izikɛl bin rayt se: “PAPA GƆD [“Jiova,” NWT] in an bin de pan mi traŋa wan.” I bin tek di prɔfɛt wan wik fɔ mek i go ebul lan ɛn ɔndastand di mɛsej we i fɔ prich, so dat i go prich am wit zil. (Izi. 3:​14, 15) Dɔn, Jiova bin tɛl am fɔ go na wan vali plen usay “spirit kam insay [am].” (Izi. 3:​23, 24) Izikɛl bin rɛdi fɔ bigin in prichin wok.

10. Us ɛp wi nid fɔ du wi prichin wok? Wetin mek?

¹⁰ Us ɛp wi nid fɔ du wi prichin wok? Fɔ ansa da kwɛstyɔn de, tink bɔt wetin bin apin to Izikɛl. Bifo i bigin fɔ prich, Gɔd in spirit bin gi am di trɛnk we i nid. Tide, jɔs lɛk Izikɛl, na Gɔd in spirit nɔmɔ go ɛp wi fɔ du di prichin wok. Wetin mek? Na bikɔs Setan de fɛt wɔ agens wi fɔ mek i go stɔp wi prichin wok. (Rɛv. 12:​17) Bɔku pipul dɛn go tink se Setan gɛt pawa pas wi, ɛn wi nɔ go ebul fɔ win am pan fɛt. Bɔt bikɔs wi de du wi prichin wok, wi de win am. (Rɛv. 12:​9-11) Aw? We wi de prich, wi de sho se wi nɔ de fred Setan in trɛtin. So ɛnitɛm we wi prich, wi de win Setan. Wetin wi de si klia wan we wi de kɔntinyu fɔ prich pan ɔl we wi ɛnimi dɛn de agens wi? I klia se Jiova de yuz in oli spirit fɔ gi wi trɛnk, ɛn i gladi fɔ wi.—Mat. 5:​10-12; 1 Pit. 4:​14.

11. Wetin Gɔd in spirit go du fɔ wi? Aw wi go kɔntinyu fɔ gɛt am?

¹¹ Wetin bak wi lan we wi tink bɔt aw Jiova bin gi Izikɛl di trɛnk we i nid fɔ prich? Gɔd in spirit go gi wi di trɛnk we wi nid fɔ bia ɛni prɔblɛm we wi go gɛt na wi prichin wok. (2 Kɔr. 4:​7-9) So wetin wi go du fɔ mek shɔ se wi kɔntinyu fɔ gɛt Gɔd in spirit? Wi nid fɔ kɔntinyu fɔ pre fɔ am ɛn gɛt kɔnfidɛns se Jiova go yɛri wi prea dɛn. Jizɔs bin tɛl in disaypul dɛn se: “Una kɔntinyu fɔ aks, . . . una kɔntinyu fɔ luk . . . una kɔntinyu fɔ nak.” Wetin Jiova go du? Fɔ ansa wi prea, Jiova go “gi oli spirit to di wan dɛn we de aks am.”—Lyuk 11:​9, 13; Akt 1:​14; 2:​4.

12. Akɔdin to wetin de na Izikɛl 2:​9–3:​3, usay di skrol kɔmɔt? Wetin bin de insay de?

¹² Gɔd in spirit bin gi Izikɛl di maynd we i bin nid fɔ prich. Bɔt nɔto dat nɔmɔ.  Di wɔd dɛn we Gɔd tɔk bin ɛp Izikɛl bak fɔ gɛt mɔ fet. Insay wan vishɔn, Izikɛl bin si wan an we ol skrol. (Rid Izikɛl 2:​9–3:​3.) Usay di skrol kɔmɔt? Wetin bin de insay di skrol? Aw i bin ɛp Izikɛl? Lɛ wi si. Di skrol bin kɔmɔt na Gɔd in tron. I go mɔs bi se Jiova bin yuz wan pan di 4 enjɛl dɛn we Izikɛl bin dɔn si fɔ gi am di skrol. (Izi. 1:​8; 10:​7, 20) Di skrol bin gɛt di wɔd dɛn we Gɔd tɔk, we na wan lɔng jɔjmɛnt mɛsej we Izikɛl fɔ prich to di trangayes Ju dɛn we de na ɛgzayl. (Izi. 2:​7) Dɛn bin rayt di mɛsej na ɔl tu di say dɛn na di skrol.

13. Wetin Jiova bin tɛl Izikɛl fɔ du wit di skrol? Wetin mek di skrol bin swit?

¹³ Jiova bin tɛl in prɔfɛt fɔ it di skrol ɛn “mek [in] bɛlɛ ful wit am.” Izikɛl bin obe ɛn it ɔl di skrol. Wetin dis pat na di vishɔn min? Izikɛl bin nid fɔ ɔndastand gud gud wan di mɛsej we i fɔ prich. I fɔ biliv da mɛsej de, so dat i go muv am fɔ prich. Dɔn sɔntin we sɔprayz am bin apin. Izikɛl bin kam fɔ no se di skrol “bin swit lɛk ɔni.” (Izi. 3:​3) Wetin mek? Fɔ Izikɛl, di ɔnɔ we i bin gɛt fɔ tɔk fɔ Jiova na sɔntin we i bin de rili ɛnjɔy. (Sam 19:​8-11) I bin gladi bikɔs Jiova bin pik am as in prɔfɛt.

14. Wetin bin ɛp Izikɛl fɔ rɛdi fɔ du in wok?

¹⁴ Leta, Jiova bin tɛl Izikɛl se: “Lisin ɔl wetin a de tɛl yu wit yu yes ɛn kip am na yu at.” (Izi. 3:​10) Wit dɛn wɔd dɛn de, Jiova bin tɛl Izikɛl fɔ tray fɔ mɛmba wetin bin rayt na di skrol ɛn tink gud wan bɔt am. We Izikɛl bin du dat, in fet bin strɔng mɔ ɛn mɔ. Dɔn bak, di skrol bin gɛt pawaful mɛsej we i fɔ prich to di pipul dɛn. (Izi. 3:​11) We Izikɛl bin ɔndastand gud gud wan ɛn biliv Gɔd in mɛsej, i bin rɛdi fɔ bigin prich ɛn fɔ kɔntinyu te i dɔn in wok.—Sam 19:​14.

15. Fɔ mek wi go ebul du wi prichin wok, wetin wi nid fɔ ‘kip na wi at’?

¹⁵ Fɔ mek wi go ebul du wi prichin wok, wisɛf fɔ alaw di wɔd dɛn we Gɔd de tɔk fɔ kɔntinyu fɔ ɛp wi fɔ gɛt mɔ fet. Wi nid fɔ ‘kip na wi at’ ɔl wetin Jiova de tɛl wi. Tide, Jiova de yuz in Wɔd di Baybul fɔ tɔk to wi. Aw wi go mek shɔ se Gɔd in Wɔd kɔntinyu fɔ afɛkt di we aw wi de tink, fil, ɛn di rizin we mek wi de du tin?

16. Wetin wi fɔ du wit Gɔd in Wɔd? Aw wi go ɔndastand am gud gud wan?

¹⁶ Jɔs lɛk aw wi bɔdi de strɔng ɛn fayn mɔ ɛn mɔ we wi it fud ɛn dayjɛst am, na so wi fet go strɔng mɔ ɛn mɔ we wi stɔdi Gɔd in Wɔd ɛn tink gud wan bɔt am. Wi fɔ mɛmba di lɛsin we wi lan bɔt di skrol. We i kam to Gɔd in Wɔd, Jiova want wi fɔ ‘ful wi bɛlɛ wit am,’ dat na fɔ ɔndastand am gud gud wan. Wi go du dat bay we wi de pre, rid, ɛn tink gud gud wan. Fɔs, wi de pre fɔ pripia wi at so dat wi go lan fɔ tink di we aw Gɔd de tink. Dɔn, wi de rid di Baybul. Afta dat, wi de pɔz so dat wi go ebul tink gud wan bɔt wetin wi de rid. Wetin go apin we wi du dat? Di mɔ wi de tink gud wan, na di mɔ wi go ɔndastand Gɔd in Wɔd, ɛn i go ɛp wi fet fɔ strɔng mɔ ɛn mɔ.

17. Wetin mek i impɔtant fɔ tink gud wan bɔt wetin wi de rid na di Baybul?

¹⁷ Wetin mek i impɔtant fɔ rid di Baybul ɛn tink gud wan bɔt am? We wi du dat, i de ɛp wi fɔ gɛt di trɛnk we wi nid fɔ  prich di Kiŋdɔm mɛsej naw ɛn fɔ tɔk bɔt di jɔjmɛnt mɛsej we sɔntɛm wi go prich bɔt tumara bambay. Dɔn bak, we wi de tink gud wan bɔt Jiova in fayn kwaliti dɛn, wi padi biznɛs wit am de tayt mɔ ɛn mɔ. Ɛn dat go mek wi ɛnjɔy sɔntin we rili swit, dat na tru tru pis ɛn satisfay maynd.—Sam 119:​103.

18. Wetin di pipul dɛn na wi tɛritri go gri wit? Wetin mek?

¹⁸ Izikɛl na bin prɔfɛt, bɔt wi nɔto prɔfɛt. Bɔt wi dɔn mekɔp wi maynd fɔ kɔntinyu fɔ prich Jiova in mɛsej we i rayt na in Wɔd, te i satisfay ɛn se di prichin wok dɔn dɔn. We di tɛm fɔ jɔjmɛnt go rich, di pipul dɛn na wi tɛritri nɔ go gɛt ɛni rizin fɔ se dɛn nɔ bin yɛri di wɔnin ɔ Gɔd nɔ bin bisin bɔt dɛn. (Izi. 3:​19; 18:​23) Bifo dat, dɛn go gri se di mɛsej we wi bin de prich kɔmɔt frɔm Gɔd.

19. Wetin go gi wi di trɛnk we wi nid fɔ du wi prichin wok?

¹⁹ Wetin go gi wi di trɛnk we wi nid fɔ du wi prichin wok? Na di sem tri tin dɛn we bin ɛp Izikɛl. Wi de kɔntinyu fɔ prich bikɔs wi no se na Jiova sɛn wi, in oli spirit de gi wi di trɛnk we wi nid, ɛn Gɔd in Wɔd de ɛp wi fɔ gɛt mɔ fet. Wit Jiova in ɛp, wi go kɔntinyu fɔ du wi prichin wok ɛn bia “te di ɛnd.”—Mat. 24:​13.