1. Wetin i min fɔ kɔntinyu fɔ tink di rayt we? (2 Timoti 4:​5)

 WE WI kin gɛt prɔblɛm dɛn, i nɔ kin izi fɔ lɛ wi kɔntinyu fɔ de biɛn Jiova ɛn in ɔganayzeshɔn. Aw wi go ebul fɔ sɔlv dɛn kayn prɔblɛm dɛn ya? Wi nid fɔ kɔntinyu fɔ tink di rayt we, wi nɔ fɔ slip, ɛn wi fɔ kɔntinyu fɔ gɛt strɔng fet. (Rid 2 Timoti 4:​5.) Wi go kɔntinyu fɔ tink di rayt we bay we wi nɔ de wɔri ɛn we wi de tray fɔ si tin di we aw Jiova de si am. We wi du dat, wi nɔ go alaw di we aw wi de fil fɔ kɔntrol wetin wi de tink bɔt.

2. Wetin wi go tɔk bɔt insay dis atikul?

² Insay di atikul bifo dis wan, wi bin tɔk bɔt tri prɔblɛm dɛn we kin mit wi, we nɔ gɛt fɔ du wit di kɔngrigeshɔn. Insay dis atikul, wi go tɔk bɔt tri prɔblɛm dɛn we kin mit wi insay di kɔngrigeshɔn we kin mek i nɔ izi fɔ lɛ wi kɔntinyu fɔ de biɛn Jiova. Dɛn prɔblɛm dɛn de na (1) we wi fil se wi kɔmpin Kristian nɔ trit wi fayn, (2) we Jiova kɔrɛkt wi, ɛn (3) we i nɔ izi fɔ lɛ wi ajɔst to di chenj dɛn we di ɔganayzeshɔn de mek. Aw wi go kɔntinyu fɔ tink di rayt we ɛn kɔntinyu fɔ de biɛn Jiova ɛn in ɔganayzeshɔn we dɛn kayn tin dɛn ya apin to wi?

3. Wetin wi kin du we wi fil se wi kɔmpin Kristian nɔ trit wi fayn?

³ Yu dɔn ɛva fil se yu kɔmpin Kristian nɔ trit yu fayn, sɔntɛm da pɔsin de na pɔsin we de bifo na di kɔngrigeshɔn? I go mɔs bi se yu brɔda nɔ bin min fɔ du sɔntin we go mek yu fil bad. (Rom. 3:​23; Jems 3:​2) Bɔt stil, di tin  we i du mek yu vɛks. I go bi se di tink we yu de tink bɔt wetin apin bin mek yu nɔ ebul fɔ slip. Sɔntɛm yu go dɔn ivin wɔnda se, ‘If mi brɔda du dis kayn tin to mi, fɔ se dis rili na Gɔd in ɔganayzeshɔn?’ Na da we de Setan want yu fɔ tink. (2 Kɔr. 2:​11) If wi de tink da we de, i go mek wi kɔmɔt nia Jiova ɛn in ɔganayzeshɔn. So if wi fil se wi brɔda ɔ sista nɔ trit wi fayn, aw wi go ebul fɔ kɔntinyu fɔ tink di rayt we ɛn avɔyd fɔ tink di we aw Setan want wi fɔ tink?

4. Aw Josɛf bin kɔntinyu fɔ tink di rayt we, we dɛn nɔ trit am fayn? Us lɛsin dɛn wi lan frɔm in ɛgzampul? (Jɛnɛsis 50:​19-21)

⁴ Nɔ kip grɔj. We Josɛf na bin tineja, in big brɔda dɛn nɔ bin trit am fayn. Dɛn bin et am, ɛn sɔm pan dɛn bin ivin want fɔ kil am. (Jɛn. 37:​4, 18-22) Dɛn bin leta sɛl am as slev. Dat bin mek Josɛf gɛt siriɔs prɔblɛm dɛn fɔ lɛk 13 ia. Josɛf bin fɔ dɔn tink se Jiova nɔ lɛk am. Ɛn i bin fɔ dɔn ivin wɔnda if Jiova dɔn lɛf am di tɛm we i bin rili nid ɛp. Bɔt Josɛf nɔ bin kip grɔj. Bifo dat, i kɔntinyu fɔ tink di rayt we bay we i nɔ bin de wɔri. We i bin mit in brɔda dɛn ɛn gɛt chans fɔ tɔn-dɛt, i nɔ bin du am. Bɔt i bin sho se i lɛk dɛn, ɛn i fɔgiv dɛn. (Jɛn. 45:​4, 5) Josɛf bin biev dis kayn we bikɔs i bin ebul fɔ tink di rayt we. I nɔ bin de tink bɔt in yon prɔblɛm dɛn, bɔt i kɔntinyu fɔ si di big pikchɔ, we na di tin we Jiova want. (Rid Jɛnɛsis 50:​19-21.) Wetin na di lɛsin? If dɛn dɔn trit yu bad, nɔ vɛks pan Jiova ɔ bigin wɔnda if i dɔn lɛf yu. Bifo dat, tink gud wan bɔt aw i de ɛp yu fɔ bia di prɔblɛm. Dɔn bak, we ɔda pipul dɛn nɔ trit yu fayn, tray fɔ alaw di lɔv we yu gɛt fɔ dɛn fɔ kɔba di mistek we dɛn mek.—1 Pit. 4:​8.

5. Aw Mikeas bin kɔntinyu fɔ tink di rayt we, we i bin fil se dɛn nɔ trit am fayn?

⁵ Tink bɔt wan ɛlda na Sawt Amɛrika we nem Mikeas in ɛgzampul. b Wan tɛm, i bin fil se sɔm ɛlda dɛn nɔ bin trit am fayn. I bin se: “A nɔ bin dɔn ɛva gɛt prɔblɛm we mek a strɛs lɛk dis wan. A bin de fred. A nɔ bin ebul slip na nɛt, ɛn a bin de kray bikɔs a bin de fil se natin nɔ de we a go ebul fɔ du.” Bɔt stil, Mikeas kɔntinyu fɔ tink di rayt we ɛn i tray tranga wan fɔ kɔntrol aw i de fil. I bin de pre ɔltɛm ɛn aks Jiova lɛ i gi am in oli spirit ɛn di trɛnk we i nid fɔ bia. Dɔn bak, i bin de rid tin dɛn na wi pɔblikeshɔn dɛn we go ɛp am. Wetin na di lɛsin? If yu fil se yu brɔda ɔ sista nɔ trit yu fayn, nɔ alaw dat fɔ mek yu wɔri ɛn tray fɔ kɔntrol ɛni bad we aw yu de fil. I go bi se yu nɔ no wetin mek di pɔsin tɔk ɔ du tin da we de. So pre to Jiova ɛn aks am lɛ i ɛp yu fɔ si tin di we aw di ɔda pɔsin de si am. We yu du dat, sɔntɛm i go ɛp yu fɔ tek am se yu brɔda ɔ sista nɔ bin min fɔ du yu bad ɛn sɔntɛm yu go ebul fɔ fɔgiv am. (Prɔv. 19:​11) Mɛmba se Jiova no wetin de apin to yu, ɛn i go gi yu di trɛnk we yu nid fɔ bia.—2 Kro. 16:​9; Ɛkli. 5:​8.

6. Wetin mek i impɔtant fɔ lɛ wi ɔndastand se Jiova de kɔrɛkt wi bikɔs i lɛk wi? (Ibruz 12:​5, 6, 11)

⁶ Wi kin rili fil am we Jiova kin kɔrɛkt wi. Bɔt if wi jɔs pe atɛnshɔn pan di bad we aw wi de fil, sɔntɛm wi go bigin tink se Jiova nɔ kɔrɛkt wi di rayt we ɛn wi nɔ fit fɔ gɛt da kɔrɛkshɔn de, ɔ di kɔrɛkshɔn tu ash. If wi de tink dis kayn we, i go mek wi nɔ ebul fɔ ɔndastand sɔntin we  rili impɔtant, we na, Jiova de kɔrɛkt wi bikɔs i lɛk wi. (Rid Ibruz 12:​5, 6, 11.) Ɛn if wi de alaw di we aw wi de fil fɔ kɔntrol wi, wi de gi Setan chans fɔ atak wi. I nɔ want fɔ mek wi tek di kɔrɛkshɔn, ɛn wetin bad pas dat, na we i want fɔ mek wi kɔmɔt nia Jiova ɛn di kɔngrigeshɔn smɔl smɔl. Aw yu go kɔntinyu fɔ tink di rayt we, we Jiova kɔrɛkt yu?

7. (a) Akɔdin to wetin de na di pikchɔ, aw Jiova bin ebul fɔ yuz Pita afta i gri fɔ tek kɔrɛkshɔn? (b) Wetin yu lan frɔm Pita in ɛgzampul?

⁷ Tek kɔrɛkshɔn, ɛn mek di chenj dɛn we yu nid fɔ mek. Nɔto wan tɛm nɔmɔ Jizɔs bin kɔrɛkt Pita bifo di ɔda apɔsul dɛn. (Mak 8:​33; Lyuk 22:​31-34) Dat go dɔn mek Pita shem bad bad wan. Bɔt Pita kɔntinyu fɔ de biɛn Jizɔs. I gri fɔ tek di kɔrɛkshɔn ɛn lan frɔm in mistek dɛn. Leta, Jiova bin blɛs Pita fɔ we i nɔ kɔmɔt biɛn am, ɛn i gi am impɔtant wok dɛn na di kɔngrigeshɔn. (Jɔn 21:​15-17; Akt 10:​24-33; 1 Pit. 1:​1) Wetin wi lan frɔm Pita in ɛgzampul? Wi go mek wi ɛn ɔda pipul dɛn bɛnifit we wi nɔ jɔs pe atɛnshɔn to di we aw di kɔrɛkshɔn mek wi shem, bɔt wi gri fɔ tek di kɔrɛkshɔn ɛn mek di chenj dɛn we wi nid fɔ mek. We wi du dat, i go mek Jiova ɛn wi brɔda dɛn ebul fɔ yuz wi mɔ ɛn mɔ.

8-9. Afta Jiova bin kɔrɛkt Banado, aw i bin fil fɔs? Wetin bin ɛp am fɔ ajɔst di we aw i de tink?

⁸ Tink bɔt wetin bin apin to wan brɔda na Mɔzambik, we nem Banado. Dɛn bin mek i stɔp fɔ bi ɛlda. Aw dis bin mek Banado fil fɔs? I se, “A bin vɛks bikɔs a nɔ bin lɛk di kɔrɛkshɔn we dɛn gi mi.” I bin de wɔri bɔt aw di brɔda ɛn sista dɛn na di kɔngrigeshɔn go si am. I tɔk se, “Sɔm mɔnt bin pas bifo a bigin tink di rayt we bɔt di kɔrɛkshɔn ɛn fɔ biliv Jiova ɛn in ɔganayzeshɔn bak.” Wetin bin ɛp Banado fɔ chenj di we aw i bin de tink?

⁹ Banado ajɔst di we aw i bin de tink. I ɛksplen se: “We mi na bin ɛlda, a bin de yuz Ibruz 12:​7 fɔ ɛp ɔda pipul dɛn fɔ si Jiova in kɔrɛkshɔn di rayt we. So a bin aks misɛf se, ‘Udat nid fɔ aplay dis skripchɔ?’ Na ɔlman we na Jiova in savant, ivin mi.” So Banado bin du ɔda tin dɛn fɔ mek i go biliv Jiova ɛn In ɔganayzeshɔn bak. I bigin rid di Baybul mɔ ɛn mɔ ɛn yuz mɔ tɛm fɔ tink gud wan bɔt wetin i de rid. Pan ɔl we i bin stil de wɔri bɔt aw in  brɔda ɛn sista dɛn de si am, i bin de wok wit dɛn na fil savis ɛn gi kɔmɛnt na mitin. Leta, dɛn bin mek Banado bi ɛlda bak. If Jiova dɔn kɔrɛkt yu lɛk Banado, tray nɔ fɔ pe atɛnshɔn pan di shem we yu de shem, tek di kɔrɛkshɔn, ɛn mek di chenj dɛn we yu nid fɔ mek. c (Prɔv. 8:​33; 22:​4) If yu du dat, wan dawt nɔ de se Jiova go blɛs yu fɔ we yu de kɔntinyu fɔ de biɛn in ɛn in ɔganayzeshɔn.

10. Us chenj go dɔn mek i nɔ izi fɔ lɛ sɔm Izrɛlayt man dɛn kɔntinyu fɔ de biɛn Jiova?

¹⁰ We di ɔganayzeshɔn kin mek chenj dɛn, i nɔ kin izi fɔ lɛ wi kɔntinyu fɔ de biɛn Jiova. If wi nɔ tek tɛm, wi go ivin alaw di chenj dɛn fɔ pul wi kɔmɔt nia Jiova. Fɔ ɛgzampul, tink bɔt aw tin bin chenj fɔ di Izrɛlayt dɛn. Bifo Jiova bin gi dɛn di Lɔ, di wan dɛn we bin de oba dɛn famili bin de du di wok dɛn we prist dɛn fɔ du. Dɛn bin de bil ɔlta dɛn ɛn mek sakrifays to Jiova fɔ dɛn famili dɛn. (Jɛn. 8:​20, 21; 12:​7; 26:​25; 35:​1, 6, 7; Job 1:​5) Bɔt we Jiova bin gi dɛn di Lɔ, i nɔ bin de alaw di wan dɛn we de oba dɛn famili fɔ du dɛn tin dɛn de igen. Jiova bin pik prist dɛn we kɔmɔt na Erɔn in famili fɔ mek sakrifays dɛn. Frɔm da tɛm de, if pɔsin we de oba in famili we nɔ kɔmɔt na Erɔn in famili layn bigin biev lɛk prist, dɛn fɔ kil am. d (Lɛv. 17:​3-6, 8, 9) Fɔ se dis chenj na wan pan di rizin dɛn we mek Kora, Detan, Abayram, ɛn 250 chif dɛn nɔ bin gri fɔ put dɛnsɛf ɔnda Mozis ɛn Erɔn? (Nɔm. 16:​1-3) Wɛl, wi nɔ shɔ bɔt dat. Bɔt ilɛk wetin na di rizin, Kora ɛn di ɔda man dɛn nɔ bin kɔntinyu fɔ de biɛn Jiova. Wetin yu go du if dɛn mek chenj na di ɔganayzeshɔn we mek i nɔ izi fɔ lɛ yu kɔntinyu fɔ de biɛn Jiova?

11. Wetin wi lan frɔm sɔm pan di Koatayt Livayt dɛn ɛgzampul?

¹¹ Sɔpɔt ɛni chenj we di ɔganayzeshɔn mek. We di Izrɛlayt dɛn bin de waka na di wildanɛs, di Koatayt dɛn bin de du wan spɛshal wok. Ɛnitɛm we di Izrɛlayt dɛn bin de muv dɛn kamp, ɔlman bin de si we sɔm Koatayt dɛn bin de tot di agrimɛnt bɔks. (Nɔm. 3:​29, 31; 10:​33; Jɔs. 3:​2-4) Dat na bin big big ɔnɔ! Bɔt tin bin chenj fɔ dɛn we di Izrɛlayt dɛn bin rich na di Prɔmis Land. Dɛn nɔ bin nid fɔ de muv di Ak ɔltɛm. So bay di tɛm we Sɔlɔmɔn bin de rul as kiŋ, sɔm pan di Koatayt dɛn bin de siŋ, sɔm na bin getman dɛn, ɛn ɔda wan dɛn bin de kia fɔ di stɔ dɛn. (1 Kro. 6:​31-33; 26:​1, 24) No say nɔ de na di Baybul we se di Koatayt dɛn bin de kɔmplen ɔ tɔk se dɛn want ɔda wok we impɔtant pas di wok dɛn we dɛn de du bikɔs dɛn bin de du spɛshal wok trade. Wetin na di lɛsin we wi lan? Sɔpɔt ɛni chenj we Jiova in ɔganayzeshɔn mek wit ɔl yu at, ivin if i afɛkt di wok we yu de du. Gladi fɔ du ɛni wok we dɛn gi yu. Mɛmba se nɔto di wok we yu de du de sho if Jiova valyu yu. Jiova valyu di obe we yu de obe am fa fawe pas ɛni wok we yu de du.—1 Sam. 15:​22.

12. Aw Zayna bin fil we dɛn chenj in asaynmɛnt?

¹² Tink bɔt wan sista we de na di Midul Ist, we nem Zayna in ɛgzampul. Dɛn bin  chenj in asaynmɛnt, ɛn i bin lɛf fɔ du wan wok we i bin rili lɛk. Dɛn bin sɛn am as spɛshal payɔnia afta i bin dɔn wok na Bɛtɛl fɔ pas 23 ia. I se: “A bin rili sɔprayz we dɛn chenj mi asaynmɛnt. A bin de fil lɛk se a nɔ gɛt yus, ɛn a kɔntinyu fɔ aks misɛf se, ‘Wetin na di rɔng tin we a du?’” I sɔri fɔ no se sɔm brɔda ɛn sista dɛn na di kɔngrigeshɔn bin de mek i fil bad mɔ bay we dɛn bin de tɛl am se: “If yu bin de du wɛl, di ɔganayzeshɔn nɔ fɔ dɔn mek yu lɛf Bɛtɛl.” Fɔ sɔm tɛm, Zayna in at bin so pwɛl dat i bin de kray ɛni nɛt. Bɔt i tɔk se: “A nɔ ɛva alaw misɛf fɔ dawt di ɔganayzeshɔn ɔ di lɛk we Jiova lɛk mi.” Aw Zayna bin ebul fɔ kɔntinyu fɔ tink di rayt we?

13. Wetin Zayna bin du fɔ lɛ i lɛf fɔ fil bad?

¹³ Zayna bin ebul fɔ chenj di bad we aw i bin de fil. Aw i bin du dat? I bin de rid atikul dɛn na wi pɔblikeshɔn dɛn we tɔk bɔt wetin bin de apin to am ɛn we bin ɛp am fɔ bia. Di atikul we gɛt di taytul “You Can Cope With Discouragement!” we de na di Fɛbwari 1, 2001, Wachtawa bin rili ɛp am. Da atikul de bin ɛksplen aw Mak we na wan pan di man dɛn we rayt di Baybul go dɔn fil di sem we aw i bin fil we dɛn bin chenj di wok we i bin de du. Zayna se, “Mak in ɛgzampul na di mɛrɛsin we a bin nid fɔ ɛp mi wit mi pwɛlat.” Dɔn bak, Zayna kɔntinyu fɔ de nia in padi dɛn. I nɔ bin de kip to insɛf, ɛn i nɔ bin de sɔri fɔ insɛf. I bin kam fɔ no se Jiova in spirit de gayd di tin dɛn we Jiova in ɔganayzeshɔn de disayd, ɛn di brɔda dɛn we de bifo bin rili lɛk am. Bɔt i bin kam fɔ no bak se di tin we rili impɔtant to Jiova in ɔganayzeshɔn na fɔ lɛ dɛn du Jiova in wok.

14. Us chenj di ɔganayzeshɔn bin mek we nɔ bin izi fɔ Vlado? Wetin bin ɛp am?

¹⁴ Vlado na wan ɛlda we ol 73 ia, we de na Slovenia. I nɔ bin izi fɔ am fɔ ajɔst to di chenj we dɛn mek bay we dɛn jɔyn in kɔngrigeshɔn wit wan ɔda kɔngrigeshɔn ɛn we dɛn lɔk di Kiŋdɔm Ɔl we i bin de atɛnd. I tɔk se: “A nɔ bin ɔndastand wetin mek dɛn lɔk dis Kiŋdɔm Ɔl we rili fayn. A bin fil am bikɔs wi bin jɔs dɔn mek di pat dɛn we pwɛl na di Kiŋdɔm Ɔl. Mi na kapɛnta, ɛn a bin ɛp fɔ mek sɔm  pan di nyu fɔnichɔ dɛn. Dɔn bak, wi di pɔblisha dɛn we dɔn ol bin nid fɔ mek bɔku ajɔstmɛnt dɛn we nɔ bin izi.” Wetin bin ɛp Vlado fɔ sɔpɔt di dayrɛkshɔn? I ɛksplen se: “We wi ajɔst to di chenj dɛn we Jiova in ɔganayzeshɔn de mek, dat de mek wi gɛt blɛsin ɔltɛm. I de rɛdi wi fɔ di big chenj dɛn we wi go gɛt fɔ mek tumara bambay.” Fɔ se i nɔ izi fɔ lɛ yu ajɔst bikɔs dɛn dɔn jɔyn yu kɔngrigeshɔn wit ɔda kɔngrigeshɔn ɔ dɛn dɔn chenj yu asaynmɛnt? Biliv tranga wan se Jiova ɔndastand aw yu de fil. We yu sɔpɔt dɛn chenj dɛn ya ɛn kɔntinyu fɔ de biɛn Jiova ɛn di ɔganayzeshɔn we i de yuz, i go mɔs blɛs yu.—Sam 18:​25.

15. Aw wi go kɔntinyu fɔ tink di rayt we, we wi gɛt prɔblɛm dɛn insay di kɔngrigeshɔn?

¹⁵ Di mɔ we di tɛm de kam nia fɔ lɛ di wɔl dɔn, na di mɔ wi fɔ ɛkspɛkt prɔblɛm dɛn we go apin insay di kɔngrigeshɔn. Dɛn prɔblɛm dɛn ya go mek i nɔ izi fɔ lɛ wi kɔntinyu fɔ de biɛn Jiova. So wi fɔ kɔntinyu fɔ tink di rayt we. If yu fil se yu kɔmpin Kristian nɔ trit yu fayn, nɔ alaw dat fɔ mek yu vɛks bad bad wan. If Jiova kɔrɛkt yu, nɔ pe atɛnshɔn to di shem we dat mek yu shem, gri fɔ tek di kɔrɛkshɔn, ɛn mek di chenj dɛn we yu nid fɔ mek. Ɛn we Jiova in ɔganayzeshɔn mek chenj dɛn we afɛkt yu, gri fɔ ajɔst to di chenj dɛn wit ɔl yu at ɛn obe di dayrɛkshɔn we dɛn de gi yu.

16. Aw yu go ebul kɔntinyu fɔ biliv Jiova ɛn in ɔganayzeshɔn?

¹⁶ Ilɛk i nɔ izi fɔ mek yu de biɛn Jiova ɛn in ɔganayzeshɔn, yu go stil ebul fɔ kɔntinyu fɔ biliv dɛn. Bɔt fɔ lɛ yu du dat, yu nid fɔ kɔntinyu fɔ tink di rayt we bay we yu nɔ de wɔri ɛn we yu de tray fɔ si tin di we aw Jiova de si am. Mekɔp yu maynd fɔ stɔdi bɔt pipul dɛn na di Baybul we bin bia wit dɛn kayn tin dɛn ya ɛn tink gud wan bɔt dɛn ɛgzampul. Pre to Jiova fɔ mek i ɛp yu. Ɛn nɔ ɛva kip to yusɛf. If yu du dɛn tin dɛn ya, ilɛk wetin go apin, Setan nɔ go ebul pul yu kɔmɔt nia Jiova ɔ In ɔganayzeshɔn.—Jems 4:​7.