1. Aw wi no se Jiova want fɔ kam nia wi?

 JIOVA de invayt wi fɔ kam nia am. (Jems 4:​8) I want fɔ bi wi Gɔd, wi Papa, ɛn wi Padi. I de ansa wi prea dɛn, ɛn i de ɛp wi tɛm dɛn we tin tranga. Ɛn i de yuz in ɔganayzeshɔn fɔ tich wi ɛn protɛkt wi. Bɔt wetin wi fɔ du fɔ kam nia Jiova?

2. Aw wi go ebul fɔ kam nia Jiova?

² Wi go ebul kam nia Jiova bay we wi de pre to am, rid in Wɔd, ɛn tink gud wan bɔt am. We wi de du dat, wi go kam fɔ lɛk am ɛn rili gladi fɔ am. Dat go mek wi want fɔ obe am ɛn gi am di prez we i fit fɔ gɛt. (Rɛv. 4:​11) Di mɔ we wi de kam fɔ no Jiova, na di mɔ wi go biliv in ɛn di ɔganayzeshɔn we i dɔn gi wi fɔ ɛp wi.

3. Aw Setan de tray fɔ pul wi kɔmɔt nia Jiova? Wetin go ɛp wi mek wi nɔ ɛva lɛf wi Gɔd ɛn in ɔganayzeshɔn? (Sam 31:​13, 14, NWT)

³ Bɔt Setan de tray fɔ pul wi kɔmɔt nia Jiova, mɔ di tɛm we wi gɛt prɔblɛm dɛn. Aw i de du dat? I kin tray smɔl smɔl fɔ mek wi stɔp fɔ biliv Jiova ɛn in ɔganayzeshɔn. Bɔt wi ebul fɔ avɔyd in tatiks dɛn. We wi fet strɔng ɛn biliv Jiova tranga wan, wi nɔ go lɛf wi Gɔd ɛn in ɔganayzeshɔn.—Rid Sam 31:​13, 14, NWT.

4. Wetin wi go tɔk bɔt insay dis atikul?

⁴ Insay dis atikul, wi go tɔk bɔt tri prɔblɛm dɛn we kin mit wi we nɔ kɔmɔt na di kɔngrigeshɔn; ɛniwan pan dɛn go ambɔg di biliv we wi biliv Jiova ɛn in ɔganayzeshɔn. Aw dɛn prɔblɛm dɛn de go pul wi kɔmɔt nia Jiova? Ɛn wetin wi go du fɔ mek wi kɔntinyu fɔ fetful to Jiova ɛn in ɔganayzeshɔn?

5. Aw prɔblɛm dɛn kin ambɔg di biliv we wi biliv Jiova ɛn in ɔganayzeshɔn?

⁵ Sɔntɛnde, wi kin gɛt prɔblɛm dɛn lɛk we wi famili de agens wi ɔ we wi lɔs wi wok. Aw dɛn kayn prɔblɛm dɛn de kin pul wi kɔmɔt nia Jiova ɛn ambɔg di biliv we wi biliv in ɔganayzeshɔn? We wi bia prɔblɛm dɛn fɔ lɔng tɛm, sɔntɛnde wi kin fil lɛk se op nɔ de ɛn wi at kin pwɛl. Setan kin yuz dɛn tɛm dɛn de fɔ mek wi tink se Jiova nɔ lɛk wi. Setan want mek wi tink se na Jiova ɔ In ɔganayzeshɔn de mek wi sɔfa. Dis sem kayn tin bin apin to sɔm Izrɛlayt dɛn we bin de na Ijipt. Fɔs, dɛn bin biliv se na Jiova pik Mozis ɛn Erɔn fɔ pul dɛn pan slev layf. (Ɛks. 4:​29-31) Bɔt leta, we Fɛro mek tin nɔ izi fɔ dɛn, dɛn bin blem Mozis ɛn Erɔn fɔ dɛn prɔblɛm dɛn, bay we dɛn tɔk se: ‘Una mek di kiŋ ɛn in ɔfisa dɛn et wi! Una dɔn put sɔd na dɛn an fɔ mek dɛn kil wi.’ (Ɛks. 5:​19-21) Dɛn bin blem Gɔd in fetful savant dɛn. Dat bin rili bad! If yu dɔn de bia prɔblɛm dɛn fɔ lɔng tɛm, aw yu go kɔntinyu fɔ mek di biliv we yu biliv Jiova ɛn in ɔganayzeshɔn strɔng?

6. Wetin wi lan frɔm prɔfɛt Abakɔk bɔt aw fɔ bia prɔblɛm dɛn? (Abakɔk 3:​17-19)

⁶ Tɛl Jiova ɔl wetin de na yu at, ɛn abop pan am fɔ sɔpɔt yu. Prɔfɛt Abakɔk bin gɛt bɔku prɔblɛm dɛn. Wan tɛm, i bin tan lɛk se i bin de dawt if Jiova rili bisin bɔt am. So i bin tɛl Jiova ɔl wetin de na in at we i bin de pre. I tɔk se: “E Jiova, aw lɔng a go kray to yu fɔ ɛp, bɔt yu nɔ de yɛri? . . . Wetin mek yu de alaw pipul dɛn fɔ sɔprɛs dɛn kɔmpin dɛn?” (Aba. 1:​2, 3, NWT) Jiova bin lisin to in fetful savant in prea. (Aba. 2:​2, 3) Afta we Abakɔk tek tɛm tink bɔt aw Jiova bin dɔn sev in pipul dɛn, dat bin mek i gɛt gladi-at bak. I bin kam fɔ biliv se Jiova bisin bɔt am, ɛn I go ɛp am fɔ bia ɛni prɔblɛm. (Rid Abakɔk 3:​17-19.) Wetin na di lɛsin fɔ wi? We yu gɛt prɔblɛm dɛn, pre to Jiova ɛn tɛl am aw yu de fil. Dɔn abop pan am fɔ sɔpɔt yu. We yu du dat, yu go gɛt kɔnfidɛns se Jiova go gi yu di trɛnk we yu nid fɔ bia. Ɛn we yu si aw i de sɔpɔt yu, yu fet go strɔng mɔ ɛn mɔ.

7. Wetin Shali in fambul dɛn bin tray fɔ mek i biliv? Wetin bin ɛp am fɔ mek i kɔntinyu fɔ gɛt fet pan Jiova?

⁷ Kɔntinyu fɔ du di tin dɛn we go ɛp yu fɔ de nia Jiova. Na dis bin ɛp wan sista we nem Shali, we de na Papua Nyu Gini, we i bin de gɛt prɔblɛm dɛn. b Shali in famili bin po, ɛn sɔntɛnde, i nɔ bin izi fɔ gɛt bɛtɛ tin fɔ it. Wan pan in fambul dɛn bin tray fɔ ambɔg di biliv we i biliv Jiova. I tɔk se: “Yu se Gɔd in oli spirit de ɛp yu, bɔt we di ɛp? Di famili stil po. Yu de west yu tɛm we yu de prich.” Shali tɔk se: “A bin aks misɛf: ‘Fɔ se Gɔd bisin bɔt wi ɔ i nɔ bisin bɔt wi?’ So wantɛm wantɛm a pre to Jiova ɛn tɛl am ɔltin we de na mi at. A kɔntinyu fɔ rid di Baybul ɛn wi pɔblikeshɔn dɛn, ɛn a kɔntinyu fɔ prich ɛn go di mitin dɛn.” I nɔ tu te, i kam fɔ no se Jiova de kia fɔ in famili. In famili bin de gɛt tin fɔ it ɔltɛm ɛn dɛn bin gladi. Shali tɔk se: “A bin si se Jiova de ansa mi prea dɛn.” (1 Tim. 6:​6-8) If yu kɔntinyu fɔ du di tin dɛn we go ɛp yu fɔ de nia Jiova, yusɛf nɔ go  alaw di prɔblɛm dɛn ɔ di dawt dɛn we yu gɛt fɔ pul yu kɔmɔt nia Jiova.

8. Sɔntɛnde wetin kin apin to di brɔda dɛn we de bifo na Jiova in ɔganayzeshɔn?

⁸ Wi ɛnimi dɛn kin yuz tin dɛn lɛk redio, tɛlvishɔn, nyuzpepa, ɛn soshal midia fɔ tɔk lay lay tin dɛn ɔ mek wi dawt di brɔda dɛn we de bifo na Jiova in ɔganayzeshɔn. (Sam 31:​13) Dɛn dɔn arɛst sɔm brɔda dɛn ɛn tɔk se dɛn na kriminal dɛn. Di fɔstɛm Kristian dɛnsɛf bin gɛt dis sem kayn prɔblɛm we dɛn bin lay pan apɔsul Pɔl ɛn arɛst am. Wetin dɛn bin du?

9. Wetin sɔm Kristian dɛn bin du we dɛn bin put apɔsul Pɔl na prizin?

⁹ Sɔm Kristian dɛn we bin de insay di fɔstɛm Kristian dɛn tɛm bin stɔp fɔ sɔpɔt apɔsul Pɔl we dɛn bin put am na prizin na Rom. (2 Tim. 1:​8, 15) Wetin mek? Fɔ se dɛn bin de shem bikɔs bɔku pipul dɛn bin de si Pɔl as kriminal? (2 Tim. 2:​8, 9) Ɔ fɔ se dɛn bin de fred se pipul dɛn go mek dɛnsɛf sɔfa? Ilɛk wetin na bin di rizin, imajin aw Pɔl go dɔn fil. I bin dɔn bia bɔku prɔblɛm dɛn ɛn ivin risk in layf fɔ dɛn sek. (Akt 20:​18-21; 2 Kɔr. 1:​8) Lɛ wi nɔ ɛva tan lɛk dɛn pipul dɛn de we bin lɛf Pɔl di tɛm we i bin nid ɛp. Wetin wi fɔ mɛmba we dɛn de mek di brɔda dɛn we de bifo sɔfa?

10. Wetin wi fɔ mɛmba we dɛn de mek di brɔda dɛn we de bifo sɔfa?

¹⁰ Mɛmba wetin mek pipul dɛn de mek wi sɔfa ɛn udat de mek dat apin. Sɛkɔn Timoti 3:​12 tɔk se: “Ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.” So wi nɔ fɔ sɔprayz we di wan dɛn mɔ we Setan de atak na di brɔda dɛn we de bifo. I want dɛn brɔda dɛn de fɔ stɔp fɔ fetful to Jiova, ɛn i want wi fɔ fred.—1 Pit. 5:​8.

11. Wetin wi lan frɔm Onɛsifɔrɔs in ɛgzampul? (2 Timoti 1:​16-18)

 ¹¹ Kɔntinyu fɔ sɔpɔt yu brɔda dɛn ɛn nɔ kɔmɔt biɛn dɛn. (Rid 2 Timoti 1:​16-18.) Wan fɔstɛm Kristian we bin nem Onɛsifɔrɔs nɔ bin du di sem tin we di ɔda Kristian dɛn bin du we Pɔl bin de na prizin. “I nɔ bin de shem bikɔs dɛn chen [Pɔl] na prizin.” Bifo dat, Onɛsifɔrɔs bin luk fɔ Pɔl, ɛn we i fɛn am, i bin tray fɔ ɛp Pɔl fɔ gɛt di tin dɛn we i nid. We Onɛsifɔrɔs bin de du dat, i bin de risk in yon layf. Wetin na di lɛsin fɔ wi? Wi nɔ fɔ alaw di fred we wi de fred mɔtalman fɔ stɔp wi fɔ sɔpɔt wi brɔda dɛn we dɛn de mek dɛn sɔfa. Bifo dat, lɛ wi du ɔl wetin wi ebul fɔ ɛp dɛn. (Prɔv. 17:​17, NWT) Dɛn nid wi lɔv ɛn sɔpɔt.

12. Wetin wi lan frɔm wi brɔda ɛn sista dɛn na Rɔshia?

¹² Tink bɔt aw wi brɔda ɛn sista dɛn na Rɔshia dɔn ɛp dɛn kɔmpin Kristian dɛn we de na prizin. We dɛn kin kɛr dɛn go na kɔt, bɔku pan wi brɔda ɛn sista dɛn kin go de fɔ sɔpɔt dɛn. Wetin na di lɛsin fɔ wi? We dɛn lay pan di brɔda dɛn we de bifo, arɛst dɛn, ɔ mek dɛn sɔfa, dat nɔ fɔ mek yu fred. Pre fɔ dɛn, kia fɔ di wan dɛn we de na dɛn famili, ɛn luk fɔ ɔda tin dɛn we yu go du fɔ sɔpɔt dɛn.—Akt 12:​5; 2 Kɔr. 1:​10, 11.

13. We dɛn de provok wi, aw dat kin ambɔg di biliv we wi biliv Jiova ɛn in ɔganayzeshɔn?

¹³ Sɔntɛm wi fambul dɛn we wi ɔl nɔ biliv di sem tin, wokmet dɛn, ɔ skulmet dɛn kin provok wi fɔ di prich we wi de prich ɔ we wi de fala Jiova in lɔ dɛn. (1 Pit. 4:​4) Sɔntɛm dɛn go se: “A lɛk yu, bɔt yu rilijɔn tu strikt ɛn i dɔn kɔmɔt na stayl.” Sɔntɛm sɔm go tɔk bad bɔt wetin wi kin du we pɔsin disfɛloship bay we dɛn go tɔk se: “Aw yu go se yu na pɔsin we lɛk ɔda pipul dɛn?” Dɛn kayn tɔk dɛn de kin mek wi bigin dawt if Jiova in lɔ dɛn rayt. Sɔntɛm wi go bigin aks se: ‘Fɔ se Jiova de ɛkspɛkt mi fɔ du pas wetin a ebul fɔ du? In ɔganayzeshɔn tu strikt?’ If yu gɛt dɛn kayn prɔblɛm dɛn de, aw yu go kɔntinyu fɔ de nia Jiova ɛn in ɔganayzeshɔn?

14. Wetin wi fɔ du we ɔda pipul dɛn de provok wi bikɔs wi de fala wetin Jiova se rayt ɛn wetin i se nɔ rayt? (Sam 119:​50-52)

¹⁴ Mekɔp yu maynd fɔ kɔntinyu fɔ du wetin Jiova se rayt. Job na bin man we bin de du wetin Jiova se rayt pan ɔl we dɛn bin de provok am fɔ we i de du dat. Wan pan Job in lay lay padi dɛn bin ivin tray fɔ mek i biliv se i nɔ mata to Gɔd if Job de fala wetin Jiova se rayt ɔ i nɔ de fala am. (Job 4:​17, 18; 22:​3) Bɔt Job nɔ bin gri fɔ biliv dɛn kayn lay dɛn de. Job bin no se wetin Jiova se rayt ɛn rɔng kɔrɛkt, ɛn i bin dɔn mekɔp in maynd fɔ du dɛn. I nɔ bin alaw ɔda pipul dɛn fɔ mek i nɔ kɔntinyu fɔ fetful. (Job 27:​5, 6) Wetin na di lɛsin fɔ wi? Nɔ alaw di provok we dɛn de provok yu fɔ mek yu wɔnda if wetin Jiova se rayt ɛn rɔng kɔrɛkt. Tink bɔt wetin dɔn apin insay yu yon layf. Yu nɔ dɔn si bɔku tɛm se wetin Jiova se rayt de bɛnifit yu? Mekɔp yu maynd fɔ sɔpɔt di ɔganayzeshɔn we de du wetin Jiova se rayt. We yu du dat, ilɛk dɛn provok yu, dat nɔ go ɛva pul yu kɔmɔt nia Jiova.—Rid Sam 119:​50-52.

15. Wetin mek dɛn bin de provok Brizit?

¹⁵ Tink bɔt wetin bin apin to wan sista  na India we nem Brizit. Di pipul dɛn we de na in famili bin de provok am bikɔs ɔf wetin i biliv. Shɔt tɛm afta i baptayz insay 1997, in man we nɔ de sav Jiova bin lɔs in wok. So in man disayd se in, Brizit, ɛn dɛn galpikin dɛn fɔ muf ɛn go tap wit in mama ɛn papa, we de na ɔda siti. Bɔt Brizit bin gɛt prɔblɛm dɛn we big pas dis. Bikɔs in man nɔ bin gɛt wok, Brizit bin gɛt fɔ wok ɔltɛm fɔ sɔpɔt in famili. Ɛn bak, di kɔngrigeshɔn we bin de nia dɛn bin de lɛk 350 kilomita (220 mayl) frɔm usay dɛn bin de. I sɔri fɔ no se in man in famili bin de agens am bikɔs ɔf wetin i biliv. Bikɔs tin bin so bad, dat bin mek Brizit in famili muf bak. Dɔn, jɔs lɛk dat, in man bin day. Leta, wan pan in galpikin dɛn we bin jɔs ol 12 ia bin day bikɔs ɔf kansa. Fɔ mek tin wɔs, Brizit in fambul dɛn bin blem am fɔ dɛn tin dɛn ya we bin apin. Dɛn tɔk se if in nɔto bin Jiova Witnɛs, ɔl dɛn tin dɛn de nɔ bin fɔ dɔn apin. Stil, Brizit bin kɔntinyu fɔ biliv Jiova ɛn de nia In ɔganayzeshɔn.

16. Aw Jiova bin blɛs Brizit fɔ we i kɔntinyu fɔ de nia Am ɛn In ɔganayzeshɔn?

¹⁶ Bikɔs Brizit bin rili de fa frɔm di kɔngrigeshɔn, wan sakit ovasia bin ɛnkɔrej am fɔ prich na di eria we i de ɛn fɔ du in mitin dɛn na os. Fɔs, i bin fil se i nɔ go izi. Bɔt i bin fala di dayrɛkshɔn we di brɔda bin gi am. I bin de prich di gud nyuz to ɔda pipul dɛn, ol di mitin dɛn na in os, ɛn mek tɛm fɔ famili wɔship wit in galpikin dɛn. Wetin na bin di rizɔlt? Brizit bin ebul fɔ stat ɛn kɔndɔkt bɔku Baybul stɔdi dɛn, ɛn bɔku pan in Baybul studɛnt dɛn bin baptayz. Insay 2005, i bigin fɔ rɛgyula payɔnia. Jiova bin blɛs am bikɔs i bin abop pan Am ɛn kɔntinyu fɔ de nia In ɔganayzeshɔn. In galpikin dɛn de sav Jiova fetful wan, ɛn naw dɛn dɔn gɛt tu kɔngrigeshɔn dɛn na da eria de. Brizit biliv tranga wan se na Jiova  bin gi am di trɛnk fɔ bia in prɔblɛm dɛn ɛn fɔ bia we in fambul dɛn nɔ bin trit am fayn.

17. Wetin wi fɔ mekɔp wi maynd fɔ du?

¹⁷ Setan want mek wi biliv se Jiova go lɛf wi we wi gɛt prɔblɛm dɛn ɛn di sɔpɔt we wi de sɔpɔt Jiova in ɔganayzeshɔn go jɔs mek layf tranga fɔ wi. Setan want mek wi fred we dɛn lay pan di brɔda dɛn we de bifo, mek dɛn sɔfa, ɔ put dɛn na prizin. We dɛn de provok wi, i want fɔ ambɔg di biliv we wi biliv Jiova in lɔ dɛn ɛn In ɔganayzeshɔn. Bɔt wi no ɔl Setan in tatiks dɛn, ɛn i nɔ ebul ful wi. (2 Kɔr. 2:​11) So mekɔp yu maynd fɔ avɔyd Setan in lay dɛn ɛn fɔ kɔntinyu fɔ de biɛn Jiova ɛn In ɔganayzeshɔn. Mɛmba se Jiova nɔ go ɛva lɛf yu. (Sam 28:​7) So nɔ alaw ɛnitin fɔ pul yu kɔmɔt nia Jiova.—Rom. 8:​35-39.

18. Wetin wi go tɔk bɔt insay di nɛks atikul?

¹⁸ Insay dis atikul, wi dɔn tɔk bɔt prɔblɛm dɛn we kin mit wi we nɔ kɔmɔt na di kɔngrigeshɔn. Bɔt di prɔblɛm dɛn bak we kin mit wi insay di kɔngrigeshɔn kin tɛst di biliv we wi biliv Jiova ɛn in ɔganayzeshɔn. Aw wi go ebul fɔ bia wit dɛn prɔblɛm dɛn de? Wi go tɔk bɔt dis insay di nɛks atikul.