1-2. Wetin na di “fayn wok” we ɛlda dɛn de du?

 IF YU dɔn bi ministerial savant fɔ sɔm tɛm, i go bi se yu dɔn de wok tranga wan fɔ gɛt kwaliti dɛn we go mek yu kwalifay fɔ bi ɛlda. Yu go lɛk fɔ tray tranga wan fɔ du da “fayn wok” de?​—1 Tim. 3:1.

² Us wok dɛn ɛlda dɛn de du? Dɛn kin de bifo fɔ prich, wok tranga wan fɔ shɛpad ɛn tich, ɛn ɛp di brɔda ɛn sista dɛn fɔ tinap tranga wan bay di tin dɛn we dɛn de tɔk ɛn du. So wi si wetin mek di Baybul kɔl ɛlda dɛn we de wok tranga wan man dɛn we na “gift.”​—Ɛfi. 4:8.

3. Aw brɔda go kwalifay fɔ bi ɛlda? (1 Timoti 3:1-7; Taytɔs 1:5-9)

³ Aw yu go kwalifay fɔ bi ɛlda? Fɔ mek brɔda go kwalifay fɔ bi ɛlda difrɛn frɔm we i de kwalifay fɔ gɛt wok. Bɔku tɛm, if yu sabi du di wok we pɔsin want yu fɔ du, i go gi yu di wok. Bɔt if yu want fɔ bi ɛlda, yu nɔ jɔs nid fɔ sabi prich ɛn tich. Yu nid fɔ gɛt di kwaliti dɛn we di Baybul tɔk bɔt we go mek pɔsin kwalifay fɔ bi ɛlda na 1 Timoti 3:1-7 ɛn Taytɔs 1:5-9. (Rid.). Dis atikul go tɔk bɔt tri men pɔynt dɛn we de sho di kwaliti dɛn we brɔda nid fɔ gɛt fɔ bi ɛlda: pipul dɛn fɔ tɔk fayn bɔt yu na di kɔngrigeshɔn ɛn na do, yu fɔ de sɛt fayn ɛgzampul as pɔsin we de oba in famili, ɛn yu fɔ rɛdi fɔ wok fɔ yu brɔda ɛn sista dɛn.

PIPUL DƐN FƆ TƆK FAYN BƆT YU

4. Wetin i min “fɔ bi pɔsin we dɛn nɔ de fɛn fɔlt pan”?

⁴ Fɔ mek yu go kwalifay fɔ bi ɛlda, yu “fɔ bi pɔsin we dɛn nɔ de fɛn fɔlt pan,” dat min se pipul dɛn fɔ de tɔk fayn bɔt yu na di kɔngrigeshɔn bikɔs yu de biev fayn. Pantap dat, “pipul dɛn na do fɔ de tɔk fayn bɔt [yu].” Pipul dɛn we nɔ  de sav Jiova go tɔk bad tin dɛn bɔt wetin yu biliv, bɔt dɛn nɔ fɔ gɛt ɛni rizin fɔ dawt se yu na pɔsin we ɔnɛs ɛn we de biev fayn. (Dan. 6:4, 5) Aks yusɛf, ‘Pipul dɛn de tɔk fayn bɔt mi na di kɔngrigeshɔn ɛn na do?’

5. Aw yu go sho se yu na pɔsin we “lɛk fɔ du gud”?

⁵ If yu na pɔsin we “lɛk fɔ du gud,” yu de luk fɔ di gud kwaliti dɛn we ɔda pipul dɛn gɛt ɛn prez dɛn fɔ dat. Yu de gladi bak fɔ du gud tin dɛn fɔ ɔda pipul dɛn, ivin tin dɛn we nɔbɔdi nɔ de ɛkspɛkt yu fɔ du. (1 Tɛs. 2:8; luk “lover of goodness” stɔdi not fɔ Taytɔs 1:8.) Wetin mek i rili impɔtant fɔ mek ɛlda dɛn gɛt dis kwaliti? Na bikɔs dɛn de yuz bɔku pan dɛn tɛm we valyu fɔ shɛpad di kɔngrigeshɔn ɛn du di asaynmɛnt dɛn we dɛn de gɛt. (1 Pit. 5:1-3) Bɔt pan ɔl dat, di gladi-at we dɛn de gɛt pas di sakrifays dɛn we dɛn de mek fa fawe.​—Akt 20:35.

6. Wetin na sɔm tin dɛn we pɔsin go du we de sho se i “lɛk strenja dɛn”? (Ibruz 13:2, 16; luk bak di pikchɔ.)

⁶ Yu go sho se yu na pɔsin we “lɛk strenja dɛn” bay we yu de du gud to ɔda pipul dɛn, ivin di wan dɛn we nɔto yu tayt padi dɛn. (1 Pit. 4:9) Wan Baybul dikshɔnari tɔk se: “Pɔsin we lɛk strenja dɛn de du gud to pipul dɛn we i nɔ ivin sabi ɛn i kin gladi fɔ invayt dɛn na in os.” Aks yusɛf, ‘Ɔda pipul dɛn no se mi na pɔsin we de du gud to strenja dɛn?’ (Rid Ibruz 13:2, 16.) Pɔsin we lɛk strenja dɛn de du gud to ɔlkayn pipul dɛn we kam fɛn am. Fɔ ɛgzampul, i de du gud to di wan dɛn we po, brɔda dɛn we kam gi tɔk na in kɔngrigeshɔn, ɛn to ɔda pipul dɛn we de wok tranga wan fɔ ɛnkɔrej di brɔda ɛn sista dɛn, lɛk sakit ovasia dɛn.​—Jɛn. 18:2-8; Prɔv. 3:27; Lyuk 14:13, 14; Akt 16:15; Rom. 12:13.

7. Aw ɛlda go sho se “i nɔ . . . lɛk mɔni”?

⁷ “I nɔ . . . lɛk mɔni.” Dis min se yu nɔ de pe atɛnshɔn pan mɔni ɛn prɔpati. Ilɛk yu jɛntri ɔ po, yu de put di Kiŋdɔm fɔs pan ɔl wetin yu de du. (Mat. 6:33) Yu de yuz yu tɛm, trɛnk, ɛn ɔda tin dɛn fɔ wɔship Jiova, fɔ kia fɔ yu famili, ɛn fɔ wok fɔ di kɔngrigeshɔn. (Mat. 6:24; 1 Jɔn 2:15-17) Aks yusɛf: ‘Aw a de si mɔni? A satisfay  wit di tin dɛn we a nid fɔ liv? Ɔ a de pe atɛnshɔn fɔ gɛt bɔku mɔni ɛn prɔpati?’​—1 Tim. 6:6, 17-19.

8. Wetin i min fɔ bi pɔsin we nɔ . . . de du tin pasmak” ɛn we “ebul kɔntrol insɛf”?

⁸ If yu na pɔsin we “nɔ . . . de du tin pasmak” ɛn yu “ebul kɔntrol [yusɛf],” dat min se yu de tink di rayt we pan ɔltin. I min bak se yu de avɔyd fɔ it pasmak, drink pasmak, drɛs di kayn we we nɔ fayn, ɛn yu nɔ de yuz tin dɛn we nɔ fayn fɔ ɛnjɔy yusɛf. Yu nɔ de liv yu layf lɛk pipul dɛn we nɔ de sav Jiova. (Lyuk 21:34; Jems 4:4) Yu nɔ de vɛks kwik ivin we ɔda pipul dɛn du yu bad. Yu nɔto “pɔsin we de chak” ɛn pipul dɛn nɔ sabi yu as pɔsin we de drink pasmak. Aks yusɛf, ‘Di we aw a de liv mi layf de sho se mi na pɔsin we nɔ de du tin pasmak ɛn a ebul kɔntrol misɛf?’

9. Wetin i min fɔ bi pɔsin we “de du tin wit sɛns” ɛn we “ɔganayz”?

⁹ If yu na pɔsin we de “du tin wit sɛns,” yu de tek tɛm tink bɔt Baybul prinsipul dɛn we yu de disayd fɔ du difrɛn tin dɛn. Yu dɔn tek tɛm tink bɔt dɛn Baybul prinsipul dɛn ya ɛn dat dɔn ɛp yu fɔ ɔndastand gud gud wan ɛn disayd fɔ du di rayt tin dɛn. Yu nɔ de rɔsh fɔ disayd fɔ du sɔntin. Bifo dat, yu de mek shɔ se yu gɛt ɔl di infɔmeshɔn we yu nid. (Prɔv. 18:13) Bikɔs ɔf dat, yu de disayd fɔ du di rayt tin dɛn we de sho se yu de tink lɛk aw Jiova de tink. If yu na pɔsin we “ɔganayz,” yu de tek tɛm arenj di tin dɛn we yu fɔ du ɛn yu de du dɛn di rayt tɛm. Pipul dɛn sabi yu as pɔsin we dɛn kin abop pan ɛn we de fala dayrɛkshɔn. Dɛn kwaliti dɛn ya go ɛp fɔ mek pipul dɛn tɔk fayn bɔt yu. Naw lɛ wi tɔk bɔt di kwaliti dɛn we di Baybul se ɛlda fɔ gɛt we go ɛp am fɔ sɛt fayn ɛgzampul as pɔsin we de oba in famili.

SƐT FAYN ƐGZAMPUL AS PƆSIN WE DE OBA IN FAMILI

10. Aw man go de “oba di wan dɛn we de na in os fayn wan”?

¹⁰ If yu na brɔda we mared ɛn yu want fɔ kwalifay fɔ bi ɛlda, wetin pipul dɛn de se bɔt yu famili go mek yu kwalifay ɔ yu nɔ kwalifay. So yu nid fɔ de “oba di wan dɛn we de na [yu] os fayn wan.” Pipul dɛn fɔ sabi yu as man we lɛk ɛn de kia fɔ in famili fayn wan. Dis min se na yu fɔ de bifo fɔ du ɔl di tin dɛn we go mek yu famili gɛt tayt padi biznɛs wit Jiova. Wetin mek dis rili impɔtant? Apɔsul Pɔl bin aks se: “If man nɔ no aw fɔ de oba in yon os, aw i go kia fɔ Gɔd in kɔngrigeshɔn?”​—1 Tim. 3:5.

11-12. Aw di we aw brɔda in famili de biev go mek i kwalifay ɔ nɔ kwalifay fɔ bi ɛlda? (Luk bak di pikchɔ.)

¹¹ If yu na papa, yu fɔ mek shɔ se yu pikin dɛn we nɔ rich 18 ia yet “de ɔnda [yu] ɛn dɛn fɔ rili siriɔs.” Yu nid fɔ tich ɛn tren dɛn we we de sho se yu lɛk dɛn. Jɔs lɛk ɔl ɔda pikin dɛn, dɛn go ɛnjɔy fɔ laf ɛn ple. Bɔt bikɔs yu de tren dɛn fayn, dɛn go de obe, rɛspɛkt ɔda pipul dɛn, ɛn biev fayn. Dɔn bak, yu fɔ du yu bɛst fɔ ɛp yu pikin dɛn fɔ gɛt tayt padi biznɛs wit Jiova, fala Baybul prinsipul dɛn, ɛn go bifo pan dɛn padi biznɛs wit Jiova te dɛn baptayz.

¹² I fɔ gɛt “pikin dɛn we biliv di Masta ɛn we pipul dɛn nɔ de se de liv bad layf ɔ dɛn nɔ de tek kɔntrol.” If pikin we na baptayz ɔ ɔnbaptayz pɔblisha kɔmit siriɔs sin, aw dat go afɛkt in papa? If di papa nɔ bin de tren ɛn kɔrɛkt in pikin, sɔntɛm dat go mek i nɔ kwalifay fɔ bi ɛlda.—Rid di Ɔktoba 15, 1996, Wachtawa, pej 21, paregraf 6 ɛn 7.

 WOK FƆ DI KƆNGRIGESHƆN

13. Aw yu go sho se yu na pɔsin we “nɔ . . . de pin” ɛn we “nɔ . . . de du wetin i fil fɔ du”?

¹³ Brɔda dɛn we gɛt fayn Kristian kwaliti dɛn de rili ɛp di kɔngrigeshɔn. Brɔda we “nɔ . . . de pin” de ɛp fɔ mek pis kɔntinyu fɔ de na di kɔngrigeshɔn. If yu want lɛ pipul dɛn sabi yu as pɔsin we nɔ de pin, na fɔ de lisin to ɔda pipul dɛn ɛn tray fɔ ɔndastand aw dɛn de tink. If bɔku pan di ɛlda dɛn disayd fɔ du sɔntin we nɔ pwɛl Baybul lɔ ɔ prinsipul, yu go rɛdi fɔ sɔpɔt wetin dɛn disayd pan ɔl we nɔto dat yu want? Fɔ bi pɔsin we “nɔ . . . de du wetin i fil fɔ du” min se yu nɔ de se paopa dɛn fɔ du tin yu yon we. Yu de gladi fɔ lisin to di advays dɛn we ɔda pipul dɛn de gi yu. (Jɛn. 13:8, 9; Prɔv. 15:22) Yu “nɔ . . . lɛk plaba” ɔ “de vɛks kwik.” Dat min se yu nɔto pɔsin we nɔ gɛt rɛspɛkt fɔ ɔda pipul dɛn ɛn we de agyu ɔda pipul dɛn. Bifo dat, yu de tek tɛm du tin ɛn tek tɛm tɔk to pipul dɛn. Bikɔs yu na pɔsin we lɛk fɔ mek pis, na yu fɔs de tray fɔ mek pis wit ɔda pipul dɛn ilɛksɛf i nɔ izi. (Jems 3:17, 18) Di fayn wɔd dɛn we yu de tɔk to pipul dɛn go mek dɛn nɔ vɛks, ivin di wan dɛn we de agens yu.—Jɔj. 8:1-3; Prɔv. 20:3; 25:15; Mat. 5:23, 24.

14. Wetin di Baybul min we i se pɔsin “nɔ fɔ bi nyu disaypul” ɔ i “nɔ de kɔmɔt biɛn Gɔd”?

¹⁴ Brɔda we kwalifay fɔ bi ɛlda “nɔ fɔ bi nyu disaypul.” Pan ɔl we i bi se yu nɔ nid fɔ baptayz fɔ lɔng tɛm bifo dɛn pik yu fɔ bi ɛlda, yu stil nid tɛm fɔ bi machɔ Kristian. Bifo dɛn pik yu fɔ bi ɛlda, jɔs lɛk Jizɔs yu fɔ dɔn sho se yu ɔmbul ɛn yu rɛdi fɔ peshɛnt wet fɔ mek Jiova gi yu mɔ asaynmɛnt na di kɔngrigeshɔn. (Mat. 20:23; Fil. 2:5-8) Yu kin pruv se yu na “pɔsin we nɔ de kɔmɔt biɛn Gɔd” bay we yu kɔntinyu fɔ fetful to Jiova ɛn fala in lɔ dɛn ɛn di dayrɛkshɔn we in ɔganayzeshɔn de gi.—1 Tim. 4:15.

15. Fɔ se ɛlda fɔ bi pɔsin we rili sabi gi tɔk? Ɛksplen.

 ¹⁵ Di Baybul tɔk klia wan se ovasia dɛn “fɔ kwalifay fɔ tich.” Fɔ se dis min se yu fɔ bi pɔsin we rili sabi gi tɔk? Nɔ. Bɔku ɛlda dɛn we rili kwalifay kin tich fayn wan we dɛn de prich ɛn we dɛn de du shɛpadin visit pan ɔl we dɛn nɔto di bɛst pɔblik spika dɛn. (Luk “qualified to teach” stɔdi not fɔ 1 Timoti 3:2; luk bak 1 Kɔrintians 12:28, 29 ɛn Ɛfishians 4:11.) Bɔt pan ɔl dat, yu nid fɔ kɔntinyu fɔ wok tranga wan fɔ sabi tich fayn fayn wan. Wetin go ɛp yu fɔ du dat?

16. Wetin go ɛp yu fɔ sabi tich fayn fayn wan? (Luk bak di pikchɔ.)

¹⁶ “I fɔ de rili fala Gɔd in wɔd we na tru.” Fɔ mek yu sabi tich fayn fayn wan, yu fɔ de yuz Gɔd in Wɔd fɔ tich na pɔblik ɛn fɔ gi advays. Yu nid fɔ de stɔdi di Baybul ɛn wi pɔblikeshɔn dɛn gud gud wan. (Prɔv. 15:28; 16:23; luk “holding firmly to the faithful word” stɔdi not fɔ Taytɔs 1:9.) As yu de stɔdi, pe atɛnshɔn fɔ si aw wi pɔblikeshɔn dɛn de ɛksplen di vas dɛn so dat yu go ebul fɔ aplay dɛn di rayt we. Ɛn we yu de tich, tray tranga wan fɔ mek yu tichin tɔch di wan dɛn we de lisin to yu dɛn at. Yu go sabi tich fayn fayn wan if yu de aks fɔ advays frɔm ɛlda dɛn we gɛt ɛkspiriɛns ɛn fala di advays. (1 Tim. 5:17) Ɛlda dɛn fɔ “ebul . . . ɛnkɔrej” dɛn brɔda ɛn sista dɛn, bɔt sɔntɛnde dɛn go nid fɔ gi advays ɔ ivin “kɔrɛkt” dɛn. We ɛlda dɛn de du ɛniwan pan dɛn tin dɛn de, dɛn fɔ tek tɛm du am ɔltɛm. If yu na pɔsin we de tek tɛm du tin, yu lɛk pipul dɛn, ɛn yu de yuz Gɔd in Wɔd fɔ tich, yu go sabi tich fayn fayn wan bikɔs yu de falamakata di Gret Ticha we na Jizɔs.​—Mat. 11:28-30; 2 Tim. 2:24.

 KƆNTINYU FƆ WOK TRANGA WAN FƆ BI ƐLDA

17. (a) Wetin go ɛp ministerial savant dɛn fɔ kɔntinyu fɔ wok tranga wan fɔ bi ɛlda? (b) Wetin ɛlda dɛn fɔ mɛmba we dɛn de disayd if brɔda kwalifay fɔ bi ɛlda? (Luk di bɔks we gɛt di taytul, “ Bi Pɔsin we No se Nɔto Ɔltin I Ebul fɔ Du we Una De Disayd if Brɔda Kwalifay fɔ Bi Ɛlda.”)

¹⁷ Afta sɔm ministerial savant dɛn go dɔn wach ɔl di kwaliti dɛn we brɔda nid fɔ gɛt fɔ bi ɛlda, sɔntɛm sɔm go tink se dɛn nɔ go ɛva ebul kwalifay. Bɔt mɛmba se Jiova ɛn in ɔganayzeshɔn nɔ de ɛkspɛkt yu fɔ sho dɛn kwaliti dɛn ya pafɛkt wan. (1 Pit. 2:21) Ɛn na Jiova in pawaful spirit go ɛp yu fɔ gɛt dɛn kwaliti dɛn ya we go mek yu kwalifay fɔ bi ɛlda. (Fil. 2:13) Fɔ se wan patikyula kwaliti de we yu nid fɔ impruv pan? Pre to Jiova bɔt dat. Du risach bɔt da kwaliti de ɛn aks wan pan di ɛlda dɛn fɔ advays bɔt aw fɔ impruv.

18. Wetin dɛn de ɛnkɔrej ɔl ministerial savant dɛn fɔ du?

¹⁸ Brɔda dɛn, lɛ wi ɔl, ivin di wan dɛn we na ɛlda dɛn kɔntinyu fɔ gɛt di kwaliti dɛn we wi dɔn tɔk bɔt na dis atikul. (Fil. 3:16) Yu na ministerial savant? Wok tranga wan fɔ bi ɛlda! Beg Jiova fɔ mek i tren ɛn shep yu so dat i go ebul yuz yu fɔ du mɔ wok dɛn na in savis ɛn di kɔngrigeshɔn. (Ayz. 64:8) Mek Jiova blɛs di tray we yu de tray tranga wan fɔ bi ɛlda.