STƆDI ATIKUL 46
SIŊ 49 Lɛ Wi Mek Jiova in At Gladi
Brɔda dɛn, Una De Wok Tranga Wan fɔ Bi Ministerial Savant?
“We pɔsin gi, i de gladi mɔ pas we dɛn gi am.”—AKT 20:35.
MEN PƆYNT
Fɔ ɛnkɔrej brɔda dɛn we dɔn baptayz fɔ wok tranga wan ɛn kwalifay fɔ bi ministerial savant.
1. Aw apɔsul Pɔl bin de fil bɔt ministerial savant dɛn?
MINISTERIAL savant dɛn de du impɔtant wok dɛn na di kɔngrigeshɔn dɛn. Wan dawt nɔ de se apɔsul Pɔl bin gladi fɔ di wok we dɛn fetful man dɛn ya bin de du. Fɔ ɛgzampul, we i bin de rayt to di Kristian dɛn na Filipay, i bin mek shɔ se i grit di ministerial savant dɛn ɛn di ɛlda dɛn.—Fil. 1:1.
2. Aw wan brɔda we nem Luis de fil bɔt di wok we i de du as ministerial savant?
2 Bɔku brɔda dɛn we dɔn baptayz de gladi fɔ wok as ministerial savant dɛn ilɛk dɛn yɔŋ ɔ ol. Fɔ ɛgzampul, Davin bin ol 18 ia we dɛn mek am ministerial savant. Bɔt wan ɔda brɔda we nem Luis bin bi ministerial savant we i dɔn pas 50 ia. I tɔk sɔntin we de sho aw bɔku ministerial savant dɛn de fil. I tɔk se, “A rili gladi fɔ di chans we a gɛt fɔ wok as ministerial savant, mɔ we a tink bɔt aw di kɔngrigeshɔn dɔn sho se dɛn lɛk mi!”
3. Us kwɛstyɔn dɛn wi go tɔk bɔt?
3 If yu na brɔda we dɔn baptayz ɛn yu nɔ bi ministerial savant yet, yu nɔ tink se i go fayn fɔ mek dat bi yu gol? Wetin go mek yu want fɔ du dat? Us kwaliti dɛn di Baybul tɔk bɔt we yu go nid fɔ gɛt? Wi go tɔk bɔt di ansa dɛn to dɛn kwɛstyɔn dɛn ya insay dis atikul. Bɔt fɔs, lɛ wi tɔk bɔt di wok dɛn we ministerial savant dɛn kin du.
US WOK DƐN MINISTERIAL SAVANT DƐN KIN DU?
4. Us wok dɛn ministerial savant dɛn kin du? (Luk bak di pikchɔ.)
4 Ministerial savant na brɔda we dɔn baptayz we di oli spirit dɔn pik fɔ ɛp di ɛlda dɛn na di kɔngrigeshɔn fɔ du impɔtant wok dɛn. Sɔm ministerial savant dɛn kin mek shɔ se di pɔblisha dɛn gɛt say fɔ prich ɛn dɛn gɛt pɔblikeshɔn dɛn fɔ du di prichin wok. Ɔda wan dɛn kin ɛp fɔ klin ɛn mek di say dɛn we dɔn pwɛl na di Kiŋdɔm Ɔl. Ministerial savant dɛn kin bi atɛndant dɛn bak ɛn wok na di sawnd sistɛm di tɛm dɛn we mitin de. Bɔku pan dɛn wok dɛn ya na wok dɛn we dɛn kin du wit dɛn an. Bɔt di tin we impɔtant pas ɔl na dat, ministerial savant dɛn na spirichwal man dɛn we lɛk Jiova ɛn de obe in lɔ dɛn. Ɛn dɛn rili lɛk dɛn brɔda ɛn sista dɛn. (Mat. 22:37-39) Aw brɔda we dɔn baptayz go wok tranga wan fɔ bi ministerial savant?
Ministerial savant dɛn kin falamakata Jizɔs bay we dɛn rɛdi fɔ wok fɔ di brɔda ɛn sista dɛn (Luk na paregraf 4)
5. Wetin i min fɔ wok tranga wan fɔ bi ministerial savant?
5 Di Baybul tɔk bɔt di kwaliti dɛn we brɔda fɔ gɛt fɔ lɛ i bi ministerial savant. (1 Tim. 3:8-10, 12, 13) Yu go ebul fɔ bi ministerial savant bay we yu stɔdi dɛn kwaliti dɛn de we di Baybul tɔk bɔt ɛn tray tranga wan fɔ gɛt dɛn. Bɔt fɔs, yu nid fɔ tink gud gud wan bɔt wetin mek yu want fɔ bi ministerial savant.
WETIN MEK YU WANT FƆ BI MINISTERIAL SAVANT?
6. Wetin fɔ mek yu want fɔ du ɛni wok fɔ yu brɔda ɛn sista dɛn? (Matyu 20:28; luk bak di pikchɔ frɔnt pej.)
6 Tink bɔt Jizɔs Krays we sɛt di bɛst ɛgzampul fɔ wi, na bikɔs i lɛk in Papa ɛn pipul dɛn na dat mek i du ɔl di tin dɛn we i bin du. Na da lɔv de bin mek i wok tranga wan ɛn du wok dɛn fɔ pipul dɛn we ɔda pipul dɛn bin de tink se nɔ impɔtant. (Rid Matyu 20:28; Jɔn 13:5, 14, 15) If na lɔv mek yu want fɔ bi ministerial savant, Jiova go blɛs yu ɛn i go ɛp yu fɔ rich yu gol.—1 Kɔr. 16:14; 1 Pit. 5:5.
Jizɔs de tich in apɔsul dɛn bay in ɛgzampul fɔ put dɛnsɛf dɔŋ fɔ wok fɔ ɔda pipul dɛn ɛn nɔ tray fɔ gɛt pozishɔn we go mek dɛn tink se dɛn impɔtant pas ɔda pipul dɛn (Luk na paregraf 6)
7. Wetin mek brɔda nɔ fɔ tray fɔ bi ministerial savant jɔs bikɔs i want lɛ ɔda pipul dɛn prez am?
7 Insay di wɔl tide, bɔku tɛm pipul dɛn kin kɔle di wan dɛn we lɛk fɔ de bifo. Bɔt Jiova in pipul dɛn nɔ de so. Jɔs lɛk Jizɔs, brɔda we lɛk pipul dɛn nɔ go tray fɔ gɛt pawa jɔs fɔ de oba ɔda pipul dɛn ɔ fɔ mek dɛn si am as pɔsin we impɔtant. If dɛn pik brɔda we want pipul dɛn fɔ si se i impɔtant pas ɔda pipul dɛn fɔ bi ministerial savant na di kɔngrigeshɔn, sɔntɛm i nɔ go gri fɔ du di wok dɛn we pipul dɛn tink se nɔ impɔtant fɔ ɛp fɔ kia fɔ Jiova in ship dɛn we rili valyu. Sɔntɛm i go tink se i tu impɔtant fɔ du dɛn kayn wok dɛn de. (Jɔn 10:12) Jiova nɔ go blɛs ɛnibɔdi we want fɔ bi ministerial savant bikɔs i prawd ɔ bikɔs i want lɛ ɔda pipul dɛn prez am.—1 Kɔr. 10:24, 33; 13:4, 5.
8. Us advays Jizɔs bin gi in apɔsul dɛn?
8 Sɔntɛnde, ivin Jizɔs in tayt padi dɛn bin de wok tranga wan fɔ gɛt privilɛj dɛn fɔ di rɔng rizin. Tink bɔt wetin Jems ɛn Jɔn we na tu pan in apɔsul dɛn bin du. Dɛn bin tɛl Jizɔs fɔ gi dɛn impɔtant pozishɔn dɛn na in Kiŋdɔm. Jizɔs nɔ bin tɛl dɛn se na fayn tin dɛn du we dɛn aks fɔ dɛn pozishɔn dɛn de. Bifo dat, i bin tɛl ɔl in 12 apɔsul dɛn se: “Ɛnibɔdi we want fɔ bi di wan we impɔtant pan una na in fɔ bi una savant, ɛn ɛnibɔdi we want fɔ de bifo una, na in fɔ bi ɔlman in slev.” (Mak 10:35-37, 43, 44) Brɔda dɛn we de wok tranga wan fɔ gɛt privilɛj dɛn na di kɔngrigeshɔn fɔ di rayt rizin, dat na, fɔ wok fɔ dɛn brɔda ɛn sista dɛn go bi blɛsin to di kɔngrigeshɔn.—1 Tɛs. 2:8.
WETIN GO ƐP YU FƆ WANT FƆ WOK FƆ YU BRƆDA ƐN SISTA DƐN?
9. Wetin yu go du fɔ mek yu want fɔ wok fɔ yu brɔda ɛn sista dɛn?
9 Wan dawt nɔ de se yu lɛk Jiova ɛn yu want fɔ wok fɔ ɔda pipul dɛn. Bɔt sɔntɛm yu nɔ go want fɔ du di ɛkstra wok dɛn we ministerial savant dɛn kin du. Wetin yu go du fɔ mek yu want fɔ wok fɔ yu brɔda ɛn sista dɛn? Yu nɔ tink se i go fayn fɔ lɛ yu tink bɔt di gladi-at we yu go gɛt we yu de wok fɔ dɛn? Jizɔs bin tɔk se: “We pɔsin gi, i de gladi mɔ pas we dɛn gi am.” (Akt 20:35) Jizɔs bin du wetin i tɔk. I bin gɛt tru tru gladi-at we i bin de wok fɔ ɔda pipul dɛn ɛn yusɛf go ebul gɛt da sem gladi-at de.
10. Aw Jizɔs bin sho se i gladi fɔ wok fɔ ɔda pipul dɛn? (Mak 6:31-34)
10 Lɛ wi tɔk bɔt wan ɛgzampul we sho se Jizɔs bin gladi fɔ wok fɔ ɔda pipul dɛn. (Rid Mak 6:31-34.) Wan tɛm, Jizɔs ɛn in apɔsul dɛn bin taya. Dɛn bin de na rod fɔ go na ples we kwayɛt fɔ rɛst smɔl. Bɔt bɔku bɔku pipul dɛn bin rich de bifo dɛn ɛn dɛn bin de op se Jizɔs go tich dɛn. Jizɔs fɔ dɔn tɔk se i nɔ de tich dɛn. Afta ɔl, in ɛn in padi dɛn “nɔ bin gɛt tɛm fɔ dɛnsɛf, ivin fɔ it sɛf.” Ɔ sɔntɛm Jizɔs fɔ dɔn tɛl di pipul dɛn fɔ go afta i dɔn tich dɛn wan ɔ tu tin dɛn. Bɔt bikɔs i bin lɛk dɛn, i “bigin fɔ tich dɛn bɔku tin” dɛn. Ɛn i kɔntinyu fɔ tich dɛn te “tɛm . . . go.” (Mak 6:35) I nɔ du am bikɔs na tin we i bin fɔ du paopa, bɔt i du am bikɔs “i sɔri fɔ dɛn.” I bin want fɔ tich dɛn bikɔs i lɛk dɛn. Jizɔs bin de rili gladi we i bin de wok fɔ ɔda pipul dɛn.
11. Wetin Jizɔs bin du fɔ ɛp di pipul dɛn we bin de lisin to am? (Luk bak di pikchɔ.)
11 We Jizɔs bin de prich to di krawd, i nɔ bin jɔs tich dɛn. Bɔt i bin gi dɛn bak wetin dɛn nid. I bin pafɔm mirekul fɔ gi dɛn tin fɔ it ɛn mek in disaypul dɛn sheb sheb di it. (Mak 6:41) We i du dat, i tich in disaypul dɛn aw fɔ wok fɔ ɔda pipul dɛn. I bin sho dɛn bak se i impɔtant fɔ du wok dɛn fɔ ɛp ɔda pipul dɛn lɛk di wan dɛn we ministerial savant dɛn de du. Imajin di kayn gladi-at we di apɔsul dɛn bin gɛt we dɛn bin de ɛp Jizɔs fɔ sheb sheb di it we i pafɔm mirekul fɔ gɛt te “dɛn ɔl it ɛn bɛlful”! (Mak 6:42) As wi ɔl no, dis nɔto di wangren tɛm we Jizɔs put wetin ɔda pipul dɛn want bifo wetin i want. I bin yuz in wan ol layf fɔ wok fɔ ɔda pipul dɛn we i bin de na di wɔl. (Mat. 4:23; 8:16) Di tin we bin de mek Jizɔs satisfay ɛn gladi na we i bin de tich ɔda pipul dɛn ɛn gi dɛn di tin dɛn we dɛn nid. Wan dawt nɔ de se yusɛf go ebul gɛt tru tru gladi-at we yu de wok tranga wan fɔ bi ministerial savant fɔ di rayt rizin.
We yu lɛk Jiova ɛn want fɔ wok fɔ yu brɔda ɛn sista dɛn, dat go mek yu du ɛnitin we yu ebul fɔ ɛp dɛn (Luk na paregraf 11) a
12. Wetin mek nɔn pan wi nɔ fɔ tink se natin nɔ de we wi go ebul du fɔ di kɔngrigeshɔn?
12 If yu tink se natin nɔ de we yu sabi fɔ du, lɛ dat nɔ mek yu at pwɛl. Wan dawt nɔ de se yu gɛt kwaliti dɛn we yu kin yuz fɔ ɛp di kɔngrigeshɔn. Sɔntɛm yu go bɛnifit we yu pre ɛn rid di tin dɛn we Pɔl tɔk na 1 Kɔrintians 12:12-30. Di wɔd dɛn we Pɔl tɔk go mek yu no klia wan se jɔs lɛk ɔlman we de sav Jiova, tin dɛn de we yusɛf kin du na di kɔngrigeshɔn. If yu nɔ ebul fɔ bi ministerial savant rayt naw, nɔ pwɛlat. Bifo dat, tray fɔ du ɛnitin we yu ebul fɔ sav Jiova ɛn fɔ ɛp yu brɔda ɛn sista dɛn. Gɛt kɔnfidɛns se di ɛlda dɛn go tink bɔt wetin yu ebul fɔ du we dɛn de gi yu wok dɛn fɔ du.—Rom. 12:4-8.
13. Wetin na di tru bɔt bɔku pan di tin dɛn we brɔda dɛn fɔ du fɔ bi ministerial savant ɔ ɛlda?
13 Tink bɔt wan ɔda rizin we fɔ mek yu wok tranga wan fɔ bi ministerial savant: Ɔl Kristian dɛn fɔ gɛt bɔku pan di kwaliti dɛn we brɔda nid fɔ gɛt fɔ kwalifay fɔ bi ministerial savant. Infakt, ɔlman we na Kristian fɔ gɛt tayt padi biznɛs wit Jiova, ɛnjɔy di gladi-at we pɔsin de gɛt we i de gi, ɛn sɛt fayn ɛgzampul as Kristian. Us patikyula tin dɛn brɔda nid fɔ du fɔ bi ministerial savant?
WETIN YU FƆ DU FƆ BI MINISTERIAL SAVANT?
14. Wetin i min fɔ bi pɔsin we “siriɔs”? (1 Timoti 3:8-10, 12)
14 Naw lɛ wi tɔk bɔt sɔm pan di kwaliti dɛn we 1 Timoti 3:8-10, 12 (Rid) tɔk bɔt. Ministerial savant fɔ bi pɔsin we “siriɔs.” Dɛn kin translet dis wɔd bak as “pɔsin we fit fɔ lɛ dɛn rɛspɛkt am,” ɔ “we ɔda pipul dɛn de ɔnɔ.” Dis nɔ min se yu nɔ fɔ laf ɛn ɛnjɔy yusɛf. (Ɛkli. 3:1, 4) Bɔt yu fɔ tek ɔl di wok dɛn we yu fɔ du siriɔs. If yu kin dɔn di wok we dɛn gi yu ɔltɛm, ɛn yu de du am fayn, di brɔda ɛn sista dɛn na di kɔngrigeshɔn go no se yu na pɔsin we dɛn kin abop pan ɛn dɛn go gɛt rɛspɛkt fɔ yu.
15. Wetin i min fɔ bi pɔsin we “nɔ . . . gɛt tu-tɔŋ” ɛn pɔsin we nɔ “de fɛn ɔlkayn we fɔ bɛnifit [insɛf] nɔmɔ”?
15 Fɔ bi pɔsin we “nɔ . . . gɛt tu-tɔŋ” min se yu na pɔsin we de tɔk tru, we ɔnɛs, ɛn we ɔda pipul dɛn kin trɔst. Yu de du wetin yu tɔk, ɛn yu nɔ de tray fɔ ful pipul dɛn. (Prɔv. 3:32) Fɔ bi pɔsin we nɔ “de fɛn ɔlkayn we fɔ bɛnifit [insɛf] nɔmɔ” min se yu ɔnɛs we yu de du biznɛs wit ɔda pipul dɛn ɛn we dɛn gi yu di kɔntribyushɔn we brɔda ɛn sista de gi fɔ kip. Yu nɔ go yuz di fayn padi biznɛs we yu gɛt wit yu brɔda ɛn sista dɛn na di kɔngrigeshɔn fɔ mek mɔni.
16. (a) Wetin di Baybul min we i se “dɛn nɔ fɔ de drink bɔku wayn”? (b) Wetin i min fɔ “gɛt klin kɔnshɛns”?
16 Fɔ bi pɔsin we “nɔ . . . de drink bɔku wayn” min se yu nɔ de drink rɔn pasmak ɔ pipul dɛn nɔ sabi yu as pɔsin we de drink pasmak. Fɔ “gɛt klin kɔnshɛns” min se yu de liv yu layf di we aw Jiova want. Pan ɔl we yu nɔ pafɛkt, yu gɛt kolat bikɔs yu gɛt tayt padi biznɛs wit Gɔd.
17. Aw brɔda go sho se in na pɔsin we dɛn kin abop pan we ‘dɛn de tɛst am if i fit’? (1 Timoti 3:10; luk bak di pikchɔ.)
17 Fɔ mek ‘dɛn tɛst yu if yu fit’ min se yu dɔn ɔlrɛdi sho se dɛn kin abop pan yu we dɛn gi yu wok fɔ du. So we ɛlda dɛn gi yu wok fɔ du, tek tɛm fala di dayrɛkshɔn ɛn gaydlayn we di ɔganayzeshɔn gi. Mek shɔ se yu ɔndastand wetin di wok de bɔt ɛn di tɛm we yu fɔ dɔn am. We yu de du ɛni wok we dɛn gi yu fayn fayn wan, di brɔda ɛn sista dɛn na di kɔngrigeshɔn go notis ɛn dɛn go gladi bikɔs yu de go bifo. Ɛlda dɛn, una fɔ rɛdi fɔ tren brɔda dɛn we dɔn baptayz. (Rid 1 Timoti 3:10.) Fɔ se brɔda dɛn de na yu kɔngrigeshɔn we jɔs bi tineja ɔ we nɔ bi tineja yet? Dɛn de du dɛn pasɔnal stɔdi ɛn pripia fayn fayn wan fɔ di mitin dɛn? Dɛn kin gi kɔmɛnt na mitin ɛn go fil savis ɔltɛm? If dɛn de du dɛn tin dɛn ya, una gi dɛn wok we fit fɔ dɛn ej ɛn we dɛn go ebul fɔ du. If una du dat, ‘una go ebul tɛst dɛn if dɛn fit’. Dɔn we dɛn de bitwin 16 to 19 ia, sɔntɛm dɛn go kwalifay fɔ bi ministerial savant dɛn.
We ɛlda dɛn de gi brɔda dɛn we dɔn baptayz wok dɛn, dat go ɛp dɛn fɔ ‘tɛst dɛn if dɛn fit’ (Luk na paregraf 17)
18. Wetin i min fɔ bi pɔsin we dɛn “nɔ fɛn ɛni fɔlt pan”?
18 Fɔ bi pɔsin we dɛn “nɔ fɛn ɛni fɔlt pan” min se nɔbɔdi nɔ go tɔk se yu dɔn kɔmit siriɔs sin we yu nɔ du am. As wi ɔl no, sɔntɛnde, dɛn kin lay pan Kristian dɛn fɔ tin we dɛn nɔ du. Bɔku pipul dɛn bin lay pan Jizɔs fɔ tin dɛn we i nɔ du ɛn Jizɔs bin tɔk se dɛn go du di sem tin to bɔku pan in disaypul dɛn. (Jɔn 15:20) Bɔt if yu du di rayt tin jɔs lɛk aw Jizɔs bin du, yu go gɛt gudnem na di kɔngrigeshɔn.—Mat. 11:19.
19. Wetin i min fɔ gɛt “wan wɛf”?
19 “Na wan wɛf ministerial savant dɛn fɔ gɛt.” We Jiova bin mek di fɔs mared, i bin se mared fɔ de bitwin wan man ɛn wan uman ɛn na dis Kristian dɛn ɔl fɔ fala. (Mat. 19:3-9) Man we na Kristian nɔ fɔ ɛva du mami ɛn dadi biznɛs di we aw Gɔd nɔ want. (Ibru. 13:4) Bɔt nɔto dat nɔmɔ. Yu fɔ fetful to yu wɛf ɔltɛm, so yu nɔ fɔ ɛva mek ɔda uman fil se yu want am.—Job 31:1.
20. Aw man fɔ de oba in os “fayn wan”?
20 “Dɛn fɔ de oba dɛn pikin dɛn ɛn di wan dɛn we de na dɛn os fayn wan.” If na yu de oba yu famili, yu fɔ tek da wok de as sɔntin we siriɔs. Du famili wɔship ɔltɛm. Prich wit ɔlman na yu famili ɛnitɛm yu gɛt chans fɔ du am. Ɛp yu pikin dɛn fɔ gɛt dɛn yon padi biznɛs wit Jiova. (Ɛfi. 6:4) Man we de kia fɔ in famili de sho se i ebul kia fɔ di kɔngrigeshɔn.—Luk 1 Timoti 3:5.
21. If yu nɔ bi ministerial savant yet, wetin yu fɔ du?
21 Brɔda dɛn, if una nɔ bi ministerial savant yet, duya una pre ɛn tink gud wan bɔt di tin dɛn we wi dɔn tɔk bɔt insay dis atikul. Stɔdi bɔt di kwaliti dɛn we ministerial savant dɛn fɔ gɛt ɛn tray tranga wan fɔ gɛt dɛn kwaliti dɛn de. Tink bɔt aw yu lɛk Jiova ɛn yu brɔda ɛn sista dɛn. Tray fɔ lɛk yu brɔda ɛn sista dɛn mɔ ɛn tink bɔt wetin mek yu want fɔ bi ministerial savant. (1 Pit. 4:8, 10) Wok tranga wan fɔ bi ministerial savant ɛn yu go rili gladi we yu de wok fɔ yu brɔda ɛn sista dɛn na di kɔngrigeshɔn. Lɛ Jiova blɛs di wok we yu de wok tranga wan fɔ bi ministerial savant!—Fil. 2:13.
SIŊ 17 ‘A Wan Ɛp’
a SMƆL TIN BƆT DI PIKCHƆ : Na di lɛft, Jizɔs de put insɛf dɔŋ we i de wok fɔ in disaypul dɛn; na di rayt, wan ministerial savant de ɛp wan ol brɔda na di kɔngrigeshɔn.
