1. Wetin mek wi fɔ lan frɔm ol wan dɛn?

 WI ƆL nid advays we go ɛp wi fɔ disayd fɔ du di rayt tin dɛn. Wi kin gɛt bɔku pan dɛn advays dɛn de frɔm ɛlda dɛn ɛn ɔda machɔ Kristian dɛn. If dɛn ol pas wi, dat nɔ fɔ mek wi fil se di advays we dɛn de gi dɔn kɔmɔt na stayl. Jiova want lɛ wi lan frɔm di wan dɛn we dɔn ol. Bikɔs dɛn dɔn liv fɔ lɔng pas wi, dɛn dɔn gɛt ɛkspiriɛns, sɛns, ɛn dɛn ebul fɔ ɔndastand tin dɛn pas wi.—Job 12:12.

2. Wetin wi go tɔk bɔt insay dis atikul?

² Insay di tɛm we dɛn bin de rayt di Baybul, Jiova bin yuz fetful pipul dɛn we dɔn ol fɔ ɛnkɔrej ɛn gayd in pipul dɛn. Sɔm pan dɛn pipul dɛn ya na Mozis, Devid, ɛn apɔsul Jɔn. Dɛn bin liv difrɛn tɛm dɛn, ɛn di tin dɛn we bin de apin to dɛn bin difrɛn. We tɛm nɔ bin de fa igen fɔ mek dɛn day, dɛn bin gi fayn advays to di wan dɛn we dɛn big pas. Dɛn fetful man dɛn ya we bin dɔn ol bin tɔk bɔt wetin mek i impɔtant fɔ obe Gɔd. Jiova mek dɛn rayt di tin dɛn we dɛn tɔk na di Baybul fɔ mek wi lan frɔm dɛn. Ilɛk wi yɔŋ ɔ ol, wi go bɛnifit we wi stɔdi di advays dɛn we dɛn bin gi. (Rom. 15:4; 2 Tim. 3:16) Insay dis atikul, wi go tɔk bɔt di las wɔd dɛn we dɛn tri man dɛn ya we bin dɔn ol tɔk, ɛn di lɛsin dɛn we wi go lan frɔm wetin dɛn bin tɔk.

“UNA [GO] KƆNTINYU FƆ DE FƆ LƆNG TƐM”

3. Us wok dɛn Mozis bin du?

³ Mozis bin wok tranga wan fɔ Jiova te i day. In na bin prɔfɛt, jɔj, kɔmanda, ɛn pɔsin we de rayt istri. Mozis bin gɛt bɔku ɛkspiriɛns! I bin lid di Izrɛlayt dɛn fɔ kɔmɔt na Ijipt usay dɛn bin de as slev dɛn, ɛn i bin si di bɔku  mirekul dɛn we Jiova bin pafɔm. Jiova bin yuz am fɔ rayt di fɔs fayv buk dɛn na di Baybul, na in rayt Sam 90, ɛn i go bi se na in rayt Sam 91. I go bi bak se na in rayt di Baybul buk we nem Job.

4. Udat dɛn Mozis bin ɛnkɔrej? Wetin mek?

⁴ Jɔs bifo Mozis day we i bin ol 120 ia, i bin kɔl ɔl di Izrɛlayt dɛn fɔ mɛmba dɛn bɔt di tin dɛn we dɛn dɔn si Jiova du fɔ dɛn. We dɛn bin yɔŋ, bɔku pan di wan dɛn we bin de lisin to am bin si di bɔku sayn ɛn mirekul dɛn we Jiova bin pafɔm ɛn aw i bin pɔnish di Ijipshian dɛn. (Ɛks. 7:​3, 4) Dɛn bin waka midul di Rɛd Si ɛn si aw Jiova dɔnawe wit Fɛro ɛn in sojaman dɛn. (Ɛks. 14:​29-31) We dɛn bin de na di wildanɛs, dɛn bin si aw Jiova protɛkt ɛn kia fɔ dɛn. (Dyu. 8:​3, 4) We i nɔ de fa igen fɔ mek dɛn ɛnta na di Prɔmis land, Mozis bin yuz dis las chans fɔ ɛnkɔrej di pipul dɛn. a

5. Us kɔnfidɛns di Izrɛlayt dɛn bin gɛt we dɛn yɛri di las wɔd dɛn we Mozis bin tɔk na Dyutarɔnɔmi 30:​19, 20?

⁵ Wetin Mozis bin se? (Rid Dyutarɔnɔmi 30:​19, 20.) Di Izrɛlayt dɛn bin gɛt chans fɔ ɛnjɔy gud layf. Wit Jiova in blɛsin, di Izrɛlayt dɛn go ebul liv fɔ lɔng tɛm na di land we i bin dɔn prɔmis dɛn. Di land bin fayn ɛn i bin de bia bɔku tin dɛn fɔ it. We Mozis bin de tɔk bɔt di land, i bin se i gɛt: ‘Big ɛn fayn siti dɛn we dɛn nɔ bil, os dɛn we ful-ɔp wit ɔlkayn gud tin dɛn we dɛn nɔ wok fɔ, ston sistɛn dɛn we dɛn nɔ dig, vayn gadin dɛn, ɛn ɔliv stik dɛn we dɛn nɔ plant.’—Dyu. 6:​10, 11.

6. Wetin mek Gɔd bin alaw ɔda neshɔn dɛn fɔ win di Izrɛlayt dɛn pan fɛt?

⁶ Mozis bin wɔn di Izrɛlayt dɛn bak. Fɔ mek dɛn go kɔntinyu fɔ de na di fayn land we Jiova gi dɛn, dɛn bin nid fɔ obe Jiova in lɔ dɛn. Mozis bin ɛnkɔrej dɛn fɔ “pik layf” bay we dɛn de lisin to Jiova ɛn “kɔntinyu fɔ de biɛn am.” Bɔt di Izrɛlayt dɛn nɔ bin kɔntinyu fɔ obe Jiova. So as tɛm de go, Gɔd bin alaw di Asirian dɛn ɛn leta di Babilonian dɛn fɔ win di Izrɛlayt dɛn pan fɛt ɛn go wit dɛn na ɛgzayl.—2 Kiŋ 17:​6-8, 13, 14; 2 Kro. 36:​15-17, 20.

7. Wetin wi lan frɔm di tin dɛn we Mozis bin tɔk? (Luk bak di pikchɔ.)

⁷ Wetin na di lɛsin fɔ wi? We wi de obe, dat go sev wi layf. Jɔs lɛk di Izrɛlayt dɛn we nɔ bin de fa fɔ ɛnta na di Prɔmis Land, na so i nɔ de fa igen fɔ mek wisɛf ɛnta insay di nyu wɔl we Gɔd dɔn prɔmis wi. I nɔ go te igen dis wɔl go bi paradays bak. (Ayz. 35:1; Lyuk 23:43) Setan ɛn in dimɔn dɛn nɔ go de igen. (Rɛv. 20:​2, 3) No rilijɔn nɔ go de igen we go tich pipul dɛn lay lay tin dɛn bɔt Jiova. (Rɛv. 17:16) Mɔtalman gɔvmɛnt dɛn nɔ go sɔprɛs di wan dɛn we dɛn de rul oba igen. (Rɛv. 19:​19, 20) Wikɛd pipul dɛn nɔ go de na Paradays. (Sam 37:​10, 11) Ɔlman we go de na di wɔl da tɛm de go obe Jiova in lɔ dɛn we go mek dɛn gɛt pis ɛn wanwɔd. So, ɔlman go lɛk in kɔmpin ɛn dɛn go trɔst dɛnsɛf. (Ayz. 11:9) Wi de rili wet fɔ da tɛm de! Ɛn wetin pas ɔl na dat, if wi obe Jiova, wi nɔ go jɔs de na paradays fɔ lɔng tɛm, bɔt wi go de de sote go.—Sam 37:29; Jɔn 3:16.

8. Aw di prɔmis fɔ gɛt layf we go de sote go bin ɛp wan mishɔnari we dɔn de sav Jiova fɔ lɔng tɛm? (Jud 20, 21)

 ⁸ If wi de tink bɔt Gɔd in prɔmis fɔ gi wi layf we go de sote, wi go want fɔ kɔntinyu fɔ sav am ilɛk us prɔblɛm mit wi. (Rid Jud 20, 21.) Da prɔmis de go ɛp wi bak fɔ fɛt agens di say dɛn we wi wik. Wan brɔda we dɔn bi mishɔnari na Afrika fɔ lɔng tɛm tɔk se, bɔku tɛm i bin de gɛt tɛmteshɔn fɔ du sɔntin we nɔ go mek Jiova gladi. I tɔk se: “We a mɛmba se dat go mek a lɔs di chans fɔ gɛt layf we go de sote go, i bin ɛp mi fɔ mek-ɔp mi maynd fɔ obe Jiova ɛn a bin de pre to am ɔltɛm. Jiova bin ɛp mi fɔ mek a nɔ du da tin de.”

“BƐTƐ GO FALA YU”

9. Us prɔblɛm dɛn Devid bin gɛt?

⁹ Devid na bin pawaful kiŋ. In na bin myuzishian, pɔsin we de rayt pɔym, fɛtman, ɛn prɔfɛt. I bin gɛt bɔku prɔblɛm dɛn. Fɔ lɔng tɛm, i bin de ayd bikɔs Kiŋ Sɔl bin de tray fɔ kil am. Afta Devid bi kiŋ, i bin rɔnawe bak fɔ in layf bikɔs in pikin Absalɔm bin want fɔ bi kiŋ ɛn i bin de tray fɔ kil am. Pan ɔl we Devid bin de gɛt prɔblɛm dɛn ɛn i bin de mek mistek dɛn, i bin kɔntinyu fɔ sav Gɔd fetful wan te i day. Jiova bin tɔk bɔt am se: “Na man we de mek [In] at gladi.” So i mek sɛns fɔ lisin to di advays we Devid bin gi!—Akt 13:22; 1 Kiŋ 15:5.

10. Wetin mek Devid bin advays in pikin Sɔlɔmɔn we bin fɔ bi kiŋ afta am?

¹⁰ Fɔ ɛgzampul, lɛ wi tɔk bɔt di advays we Devid bin gi in pikin Sɔlɔmɔn we bin fɔ bi kiŋ afta am. Jiova bin pik Sɔlɔmɔn fɔ mek i ɛp di pipul dɛn fɔ kɔntinyu fɔ wɔship am di rayt we ɛn fɔ bil tɛmpul fɔ am. (1 Kro. 22:5) Tin nɔ go izi fɔ Sɔlɔmɔn we i de du dis wok. Us advays Devid go gi am? Lɛ wi si.

11. Akɔdin to 1 Kiŋ 2:​2, 3, us advays Devid bin gi Sɔlɔmɔn? Wetin bin apin we Sɔlɔmɔn fala di advays? (Luk bak di pikchɔ.)

¹¹ Wetin Devid bin se? (Rid 1 Kiŋ 2:​2, 3.) Devid bin tɛl in pikin se if i obe Jiova, bɛtɛ go fala am. Ɛn bɛtɛ bin fala Sɔlɔmɔn fɔ lɔng tɛm. (1 Kro. 29:​23-25) I bin bil di wɔndaful tɛmpul ɛn rayt sɔm buk dɛn na di Baybul, ɛn sɔm pan di tin dɛn we i bin tɔk de na ɔda Baybul buk dɛn. Bɔku pipul dɛn bin sabi am fɔ di sɛns ɛn jɛntri we i bin gɛt. (1 Kiŋ 4:34) Bɔt jɔs lɛk aw Devid bin tɔk, di wangren tin we go mek bɛtɛ fala Sɔlɔmɔn na we i kɔntinyu fɔ obe Jiova Gɔd. Bɔt i sɔri fɔ no se, leta we Sɔlɔmɔn bin dɔn ol, i bigin fɔ wɔship ɔda gɔd dɛn. Jiova nɔ bin kɔntinyu fɔ sɔpɔt am, ɛn i nɔ bin gɛt sɛns  igen fɔ rul di pipul dɛn di rayt we ɛn fɔ trit dɛn fia wan.—1 Kiŋ 11:​9, 10; 12:4.

12. Wetin wi lan frɔm di wɔd dɛn we Devid bin tɔk?

¹² Wetin na di lɛsin fɔ wi? We wi obe, bɛtɛ go fala wi. (Sam 1:​1-3) Na tru se Jiova nɔ prɔmis fɔ gi wi di jɛntri ɛn di glori we Sɔlɔmɔn bin gɛt. Bɔt if wi obe wi Gɔd, i go gi wi di sɛns we wi nid fɔ disayd fɔ du di rayt tin dɛn. (Prɔv. 2:​6, 7; Jems 1:5) In prinsipul dɛn go ɛp wi we wi de disayd us wok fɔ du, ɔmɔs buk fɔ lan, aw wi fɔ ɛnjɔy wisɛf, ɛn aw fɔ si mɔni. We wi fala di sɛns we de insay Gɔd in Wɔd, dat go ɛp wi fɔ protɛkt wi padi biznɛs wit am, ɛn i go ɛp wi fɔ gɛt layf we go de sote go. (Prɔv. 2:​10, 11) Wi go gɛt tayt padi biznɛs wit pipul dɛn. Ɛn wi go gɛt di sɛns we wi nid fɔ gɛt gladi-at na wi famili.

13. Wetin Kamɛn bin du fɔ mek bɛtɛ fala am?

¹³ Kamɛn we de na Mɔzambik bin fil se i fɔ lan bɔku buk fɔ lɛ bɛtɛ fala am. I go na yunivasiti ɛn lan aw fɔ dizayn bildin dɛn. I tɔk se: “A bin lɛk wetin a bin de lan. Bɔt a bin de yuz bɔku pan mi tɛm ɛn trɛnk fɔ du am. A kin de na skul frɔm 7:30 na mɔnin te 6 oklɔk ivintɛm. I nɔ bin izi fɔ mek a go di mitin dɛn ɛn mi padi biznɛs wit Jiova nɔ bin de go bifo. Insay mi at a bin no se a de tray fɔ wok fɔ tu masta dɛn.” (Mat. 6:24) I bin pre bɔt wetin de apin to am ɛn yuz wi pɔblikeshɔn dɛn fɔ du risach. I bin tɔk bak se: “Afta a lisin to di fayn advays we sɔm machɔ brɔda dɛn ɛn mi mama gi mi, a bin disayd fɔ lɛf di yunivasiti ɛn kam sav Jiova ful-taym. Dis bin ɛp mi fɔ disayd fɔ du di bɛst tin dɛn, ɛn a nɔ rigrɛt natin.”

14. Wetin na di men tin we Mozis ɛn Devid bin tɔk bɔt?

¹⁴ Mozis ɛn Devid bin rili lɛk Jiova ɛn dɛn bin no se i rili impɔtant fɔ obe am. Insay di las wɔd dɛn we dɛn tɔk, dɛn bin ɛnkɔrej di wan dɛn we bin de lisin to dɛn fɔ falamakata dɛn fayn ɛgzampul ɛn kɔntinyu fɔ sav Jiova fetful wan. Dɛn ɔltu bin wɔn di wan dɛn we bin de lisin to dɛn bak se if dɛn kɔmɔt biɛn Jiova, i nɔ go gladi fɔ dɛn ɛn dɛn nɔ go gɛt di blɛsin dɛn we i dɔn prɔmis dɛn. Wisɛf de bɛnifit tide frɔm di advays we dɛn bin gi. Lɔng  tɛm afta dat, wan ɔda pɔsin we bin de sav Jiova bin sho wetin mek i impɔtant fɔ mek wi kɔntinyu fɔ sav Gɔd fetful wan.

“NO GLADI-AT NƆ DE WE PAS DIS”

15. We apɔsul Jɔn bin de alayv, wetin na sɔm tin dɛn we apin we i bin si?

¹⁵ Apɔsul Jɔn bin gɛt tayt padi biznɛs wit Jizɔs Krays. (Mat. 10:2; Jɔn 19:26) Jɔn bin de wit Jizɔs we i bin de du in prichin wok, i bin si di mirekul dɛn we i bin pafɔm, ɛn i bin kɔntinyu fɔ de wit am di tɛm dɛn we tin nɔ bin izi. I bin de we dɛn kil Jizɔs ɛn i si am we i gɛt layf bak. I bin de bak di tɛm we bɔku pipul dɛn bi Kristian. Jɔn bin de alayv te dɛn “prich” di gud nyuz “ɔlsay na di wɔl.”—Kol. 1:23.

16. Udat dɛn dɔn bɛnifit frɔm di lɛta dɛn we Jɔn bin rayt?

¹⁶ Jɔn bin liv fɔ lɔng tɛm, bɔt we tɛm bin de nia fɔ mek i day, i bin gɛt chans fɔ rayt sɔm buk dɛn na di Baybul. Na in bin rayt bɔt di wɔndaful “tin dɛn we Gɔd sho Jizɔs Krays.” (Rɛv. 1:1) Na Jɔn rayt di Gɔspɛl we gɛt in nem. I bin rayt bak tri lɛta dɛn. I bin rayt in tɔd lɛta to wan fetful Kristian we nem Geɔs, we i bin de si as in spirichwal pikin we i rili lɛk. (3 Jɔn 1) I go mɔs bi se dɛn tɛm dɛn de, Jɔn bin gɛt bɔku pipul dɛn we i bin de si lɛk in spirichwal pikin dɛn. Di tin dɛn we dis fetful man we bin dɔn ol rayt dɔn ɛnkɔrej Jizɔs in disaypul dɛn ɔl te to wi yon tɛm.

17. Akɔdin to wetin de na 3 Jɔn 4, wetin kin mek pɔsin rili gladi?

¹⁷ Wetin Jɔn bin rayt? (Rid 3 Jɔn 4.) Jɔn bin rayt bɔt di gladi-at we i bin de gɛt we i de si pipul dɛn de obe Gɔd. Arawnd di tɛm we Jɔn rayt in tɔd lɛta, sɔm pipul dɛn bin dɔn bigin fɔ prɛd lay lay tichin dɛn ɛn mek di kɔngrigeshɔn nɔ gɛt wanwɔd. Bɔt ɔda pipul dɛn bin kɔntinyu fɔ “de na di trut.” Dɛn bin “kɔntinyu fɔ obe [Jiova] in lɔ dɛn.” (2 Jɔn 4, 6) Dɛn fetful Kristian dɛn ya nɔ bin jɔs mek Jɔn gladi, bɔt dɛn bin mek Jiova insɛf gladi.—Prɔv. 27:11.

18. Wetin wi go lan frɔm di wɔd dɛn we Jɔn bin tɔk?

¹⁸ Wetin na di lɛsin fɔ wi? We wi fetful to Jiova, dat de mek wi ɛn ɔda pipul dɛn gladi. (1 Jɔn 5:3) Fɔ ɛgzampul, wi kin gladi we wi no se wi de mek Jiova gladi. Jiova kin gladi we i de si se wi nɔ de du di tin dɛn we kin tɛmpt wi ɛn wi de obe am. (Prɔv. 23:15) Di enjɛl dɛnsɛf we de na  ɛvin de gladi. (Lyuk 15:10) Wisɛf kin gladi we wi de si wi kɔmpin dɛn de kɔntinyu fɔ sav Jiova fetful wan, mɔ we dɛn de mek dɛn sɔfa ɛn we dɛn de tɛmt dɛn fɔ du tin we nɔ rayt. (2 Tɛs. 1:4) Dɔn, we Setan dis in wikɛd wɔl go dɔn, wi go gladi fɔ no se wi bin sho se wi de biɛn Jiova pan ɔl we wi bin de na wɔl we Setan de kɔntrol.

19. Wetin wan sista we nem Rechɛl tɔk bɔt aw i de fil we i de tich ɔda pipul dɛn di tru tin dɛn insay di Baybul? (Luk bak di pikchɔ.)

¹⁹ Wi kin gladi mɔ we wi de tɛl ɔda pipul dɛn di tru tin dɛn we de insay di Baybul. Rechɛl, we de na di Dɔminikan Ripɔblik fil se na big big ɔnɔ wi gɛt fɔ tɛl ɔda pipul dɛn bɔt di wɔndaful Gɔd we wi de sav. We i de tink bɔt di spirichwal pikin dɛn we i dɔn gɛt, i tɔk se: “I at fɔ tɔk bɔt di gladi-at we a de gɛt we a de si di wan dɛn we a dɔn ɛp fɔ lan bɔt Jiova de sho se dɛn lɛk am, abop pan am, ɛn de chenj di we aw dɛn de liv fɔ mek i gladi. Di gladi-at we a kin gɛt pas ɛni wok ɔ sakrifays we a dɔn mek fɔ tich dɛn.”

BƐNIFIT FRƆM DI LAS WƆD DƐN WE FETFUL MAN DƐN BIN TƆK

20. Us we dɛn wi fiba Mozis, Devid, ɛn Jɔn?

²⁰ Di tɛm we Mozis, Devid, ɛn Jɔn bin de, difrɛn frɔm wi yon tɛm ɛn di tin dɛn we bin de apin to dɛn difrɛn frɔm wetin de apin to wi tide. Bɔt wi fiba pan bɔku tin dɛn. Na di tru Gɔd dɛn bin de wɔship jɔs lɛk wi. Jɔs lɛk dɛn, wi de pre to Jiova, abop pan am fɔ ɛp wi, ɛn gi wi advays. Ɛn jɔs lɛk dɛn man dɛn de we bin de trade, wisɛf gɛt kɔnfidɛns se Jiova de blɛs di wan dɛn we de obe am.

21. Us blɛsin dɛn go de fɔ di wan dɛn we de lisin to di advays we dɛn fetful man dɛn ya we na Mozis, Devid, ɛn Jɔn bin gi?

²¹ So lɛ wi fala di advays we dɛn ol man dɛn ya bin gi bay we wi de obe Jiova in lɔ dɛn. We wi du dat, bɛtɛ go fala wi pan ɔl wetin wi de du. Wi go “kɔntinyu fɔ de fɔ lɔng tɛm,” wi go de sote go! (Dyu. 30:20) Ɛn wi go gɛt di galdi-at we pɔsin de gɛt we i de du wetin wi Papa we de na ɛvin we lɛk wi want, ɛn we de du ɔl di tin dɛn we i dɔn prɔmis pas aw wi de ɛkspɛkt ɔ imajin.—Ɛfi. 3:20.