I NƆ kin izi fɔ yu fɔ du yu pasɔnal Baybul stɔdi ɛvri wik ɛn fɔ ɛnjɔy fɔ du am? Sɔntɛnde wi ɔl kin fil da we de. Bɔt tink bɔt ɔda tin dɛn we wi kin du ɔltɛm, lɛk fɔ was. I kin tek tɛm ɛn ɛfɔt fɔ was, bɔt we wi du am, wi kin fil fayn. Semweso, fɔ stɔdi di Baybul tan lɛk we wi de “was . . . wit di wata we na Gɔd in wɔd.” (Ɛfi. 5:26) Lɛ wi tɔk bɔt sɔm tin dɛn we go ɛp yu:

• Mek shɛdul. Pasɔnal Baybul stɔdi na wan pan di “tin dɛn we rili impɔtant” we Kristian fɔ du. (Fil. 1:10) Fɔ mek yu go stɔdi di tɛm we yu dɔn plan fɔ stɔdi, yu nɔ tink se i go fayn fɔ put yu shɛdul say we yu go de si am, lɛk na notisbɔd ɔ di frij in domɔt? Ɔ sɔntɛm if yu sɛt alam na yu fon we go alam shɔt tɛm bifo di tɛm rich fɔ stɔdi, dat go ɛp yu.

• Tink bɔt wetin go ɛp yu fɔ pe atɛnshɔn. I kin izi fɔ yu fɔ pe atɛnshɔn fɔ lɔng tɛm ɔ na fɔ shɔt tɛm yu ebul fɔ pe atɛnshɔn? Na yu sabi wetin yu ebul fɔ du. Ajɔst di tɛm dɛn we yu de yuz fɔ stɔdi fɔ fit wetin yu ebul fɔ du. If yu nɔ de fil fɔ stɔdi we di tɛm rich, yu nɔ tink se i go fayn fɔ mek yu tray fɔ stɔdi fɔ jɔs tɛn minit? Pan ɔl we yu go jɔs stɔdi fɔ shɔt tɛm, i bɛtɛ pas we yu nɔ stɔdi atɔl. Ɛn we yu bigin fɔ stɔdi sɔntɛm yu go want fɔ kɔntinyu fɔ du am.—Fil. 2:13.

• Pik di tɔpik dɛn we yu go want fɔ stɔdi bɔt bifo tɛm. If we di tɛm rich fɔ lɛ yu stɔdi na da tɛm de yu de tink bɔt wetin fɔ stɔdi, yu nɔ go de “yuz [yu] tɛm di bɛst we.” (Ɛfi. 5:16) Yu nɔ tink se i go fayn fɔ mek yu gɛt list fɔ di atikul ɔ tɔpik dɛn we yu go want fɔ stɔdi bɔt? Ɛnitɛm yu gɛt kwɛstyɔn bɔt sɔntin, rayt am. Ɛn sɔntɛm bay di tɛm we yu de dɔn fɔ stɔdi, yu go ad ɔda tin dɛn na yu list we yu go want fɔ stɔdi.

• Go de ajɔst. Tray fɔ ajɔst yu shɛdul, lɛk ɔmɔs tɛm yu go want fɔ spɛn fɔ stɔdi ɔ di tɔpik dɛn we yu go pik fɔ stɔdi. Wetin impɔtant na fɔ mek yu stɔdi ɛvri wik, nɔto ustɛm yu de du am, aw lɔng, ɔ wetin yu de stɔdi.

Wi de rili bɛnifit we wi de stɔdi ɛvri wik. Wi padi biznɛs wit Jiova de tayt mɔ ɛn mɔ, wi de lan fɔ du tin dɛn wit sɛns, ɛn wi de fil fayn.—Jɔsh. 1:8.