STƆDI ATIKUL 36
Amagɛdɔn Na Gud Nyuz!
“Dɛn gɛda dɛn na . . . Amagɛdɔn.”—RƐV. 16:16, NW.
SIŊ 150 Luk to Gɔd fɔ Sev Yu
WETIN WI GO LAN? *
1-2. (a) Wetin mek Amagɛdɔn go mek mɔtalman gladi? (b) Us kwɛstyɔn dɛn wi go tɔk bɔt insay dis atikul?
SƆM pipul dɛn biliv se Gɔd go yuz wɔ, atkwek, ebi ebi ren ɛn briz fɔ dɔnawe wit di wɔl. Bɔt nɔto dat di Baybul de tich. Di Baybul se i nɔ go te igen wan wɔ go kam we go mek bɔku gud tin dɛn apin. Dɛn kɔl dis wɔ Amagɛdɔn, ɛn di tin dɛn we di Baybul tɔk bɔt dis wɔ go mek wi gladi. (Rɛv. 1:3) Amagɛdɔn wɔ nɔ go dɔnawe wit mɔtalman bɔt i go sev dɛn! Aw?
2 Di Baybul mek wi no klia wan se Amagɛdɔn go sev mɔtalman bay we i go dɔnawe wit mɔtalman gɔvmɛnt. Da wɔ de go sev mɔtalman bay we i go dɔnawe wit di wikɛd pipul dɛn ɛn sev di wan dɛn we de du wetin rayt na Gɔd in yay. I go protɛkt dis wɔl bak fɔ wi fɔ lɛ pipul dɛn nɔ pwɛl am kpatakpata. (Rɛv. 11:18) Fɔ ɛp wi fɔ ɔndastand dɛn pɔynt dɛn ya klia wan, lɛ wi tɔk bɔt 4 kwɛstyɔn dɛn: Wetin na Amagɛdɔn? Wetin-ɛn-wetin go apin bifo Amagɛdɔn? Aw wi go bi wan pan di wan dɛn we go sev di tɛm we Amagɛdɔn go kam? Aw wi go kɔntinyu fɔ de fetful wan as Amagɛdɔn de kam nia?
WETIN NA AMAGƐDƆN?
3. (a) Wetin di wɔd “Amagɛdɔn” min? (b) Frɔm wetin de na Rɛvɛleshɔn 16:14, 16, wetin mek wi se Amagɛdɔn nɔto rial ples?
3 Rid Rɛvɛleshɔn 16:14, 16, NW. Dɛn yuz di wɔd Amagɛdɔn wangren tɛm insay di Baybul, ɛn i kɔmɔt frɔm wan Ibru wɔd we min “Mɛgidɔ Mawntin.” (Rɛv. 16:16, NW; futnot) Mɛgidɔ na bin wan siti we bin de trade trade insay Izrɛl. (Jɔs. 17:11) Bɔt Amagɛdɔn nɔto rial ples we de na dis wɔl. I min di tin dɛn we gɛt fɔ apin we “ɔl dɛn wan we de rul na di wɔl” go gɛda agens Jiova. (Rɛv. 16:14) Bɔt insay dis atikul, wi go yuz bak di wɔd “Amagɛdɔn” fɔ tɔk bɔt di wɔ we gɛt fɔ apin jɔs afta we ɔl di wan dɛn we de rul na di wɔl gɛda agens Jiova. Aw wi no se Amagɛdɔn tinap fɔ sɔntin? Fɔs, no rial mawntin nɔ de we nem Mɛgidɔ. Sɛkɔn, di ples we de arawnd Mɛgidɔ nɔ big fɔ lɛ “di kiŋ dɛn we de na di wan ol wɔl” gɛda de wit dɛn sojaman dɛn ɛn dɛn mashin dɛn we dɛn de yuz fɔ fɛt. Tɔd, leta wi go lan frɔm dis atikul fɔ se, Amagɛdɔn go stat di tɛm we “di kiŋ dɛn” go atak Gɔd in pipul dɛn we de ɔlsay na di wɔl.
4. Wetin mek Jiova kɔl in gret wɔ Mɛgidɔ?
4 Wetin mek Jiova tɔk bɔt Mɛgidɔ we i bin de tɔk bɔt in gret wɔ? Insay di tɛm we dɛn bin de rayt di Baybul, dɛn bin de fɛt bɔku wɔ dɛn na Mɛgidɔ ɛn di vali we de na Jɛzril. Sɔntɛnde, Jiova bin de ɛp in pipul dɛn fɔ win di wɔ we dɛn bin de fɛt na dɛn say dɛn de. Fɔ ɛgzampul, ‘nia Riva Mɛgidɔ’ Gɔd bin ɛp di Izrɛlayt dɛn jɔj we nem Barak fɔ win di Kenanayt dɛn sojaman dɛn we Sisɛra bin de lid. Barak ɛn Dɛbora we na bin uman prɔfɛt bin tɛl Jiova tɛnki fɔ we i ɛp dɛn fɔ win di wɔ. Dɛn bin de siŋ se: “Di sta dɛnsɛf na di skay bin de fɛt . . . Sisɛra. Bɔku bɔku wata bɔs na Kishɔn we swip dɛn go.”—Jɔj 5:19-21.
5. Us big difrɛns go de bitwin di wɔ we Barak bin fɛt ɛn Amagɛdɔn?
5 Barak ɛn Dɛbora bin ɛnd dɛn siŋ wit dɛn wɔd ya: “PAPA GƆD [“Jiova,” NW], na so ɔl yu ɛnimi dɛn fɔ day, bɔt di wan dɛn we lɛk yu fɔ jɛs de shayn lɛk di san we i de kɔmɔt na mɔnin.” (Jɔj 5:31) Semweso, we Amagɛdɔn go kam, Gɔd in ɛnimi dɛn go day, bɔt di wan dɛn we lɛk Gɔd go sev. Bɔt wan big difrɛns de bitwin di tu wɔ dɛn. We Amagɛdɔn go kam, Gɔd in pipul dɛn nɔ go fɛt. Dɛn nɔ go ivin ol sɔntin fɔ fɛt! Dɛn “go sidɔm saful ɛn put [dɛn] trɔst” pan Jiova ɛn in sojaman dɛn we de na ɛvin.—Ayz. 30:15; Rɛv. 19:11-15.
6. Wetin Jiova go yuz fɔ dɔnawe wit in ɛnimi dɛn di tɛm we Amagɛdɔn go kam?
6 Aw Gɔd go dɔnawe wit in ɛnimi dɛn di tɛm we Amagɛdɔn go kam? Sɔntɛm, i go yuz difrɛn difrɛn we dɛn. Fɔ ɛgzampul, sɔntɛm, i go yuz atkwek, ren we fiba ays blɔk, ɛn laytin. (Job 38:22, 23; Izi. 38:19-22) Sɔntɛm, i go mek in ɛnimi dɛn fɛt agens dɛnsɛf. (2 Kro. 20:17, 22, 23) Ɛn sɔntɛm, i go yuz in enjɛl dɛn fɔ kil di wikɛd wan dɛn. (Ayz. 37:36) Ilɛk wetin Jiova yuz, na in go win. I go dɔnawe wit ɔl in ɛnimi dɛn. Ɛn ɔl di wan dɛn we de du wetin rayt na Gɔd in yay go sev.—Prɔv. 3:25, 26.
WETIN-ƐN-WETIN GO APIN JƆS BIFO AMAGƐDƆN STAT?
7-8. (a) Frɔm wetin de na Fɔs Lɛta fɔ Tɛsalonayka 5:1-6 (NW), us strenj tɔk we di lida dɛn na dis wɔl go tɔk? (b) Wetin mek dis tɔk na bad bad lay?
7 Bifo “Jiova in de de kam,” dɛn go anawns se “wi dɔn gɛt pis ɛn natin nɔ de fɔ fred!” (Rid Fɔs Lɛta fɔ Tɛsalonayka 5:1-6, NW.) Insay Fɔs Lɛta fɔ Tɛsalonayka 5:2 (NW), “Jiova in de” min ‘big big trɔbul.’ (Rɛv. 7:14) Aw wi go no di tɛm we da big big trɔbul go bigin? Di Baybul se dɛn go tɔk wan strenj tɔk. Ɛn dat go bi di sayn we de sho se di big big trɔbul go bigin.
8 Da tɛm de, di wɔd dɛn we di Baybul bin dɔn se pipul dɛn go tɔk fɔ se “wi dɔn gɛt pis ɛn natin nɔ de fɔ fred” go apin. Wetin mek di lida dɛn na dis wɔl go tɔk dat? Fɔ se di bigman dɛn pan Gɔd biznɛs go jɔyn dɛn? Sɔntɛm dɛn go jɔyn dɛn. Bɔt wi no se we di lida dɛn na di wɔl go tɔk se “wi dɔn gɛt pis ɛn natin nɔ de fɔ fred,” dat na lay lay tɔk we go kɔmɔt frɔm di dɛbul dɛn. Bɔt dis lay go rili bad bikɔs i go mek pipul dɛn biliv se natin nɔ de fɔ fred, we rili na da tɛm de di big big trɔbul go bigin. Dɔn, “na da tɛm de dɛn ɛnd go kam kwik kwik wan, jɔs lɛk di pen we bɛlɛ-uman kin fil we i want fɔ bɔn.” Wetin go apin to Jiova in fetful savant dɛn? Bikɔs dɛn nɔ no di rayt tɛm we di big big trɔbul go bigin, dat go mek dɛn sɔprayz, bɔt dɛn go dɔn rɛdi fɔ da de de.
9. Yu tink se Jiova go dɔnawe wit Setan in wan ol wɔl wantɛm wantɛm? Ɛksplen.
9 Jiova nɔ go dɔnawe wit Setan in wɔl wantɛm wantɛm jɔs lɛk aw i bin du insay Noa in tɛm. Bifo dat, i go dɔnawe wit wan pat pan Setan in wɔl fɔs, dɔn i go dɔnawe wit di ɔda wan dɛn leta. Fɔs, i go dɔnawe wit Babilɔn di Gret, we na ɔl dɛn lay lay rilijɔn dɛn na di wɔl. Dɔn, we Amagɛdɔn go kam, i go dɔnawe wit ɔltin we de na Setan in wɔl lɛk pɔlitiks, wɔ, ɛn di kayn we aw pipul dɛn de du biznɛs na di wɔl. Lɛ wi tek tɛm tɔk bɔt tu men tin dɛn we gɛt fɔ apin.
10. Frɔm wetin de na Rɛvɛleshɔn 17:1, 6, ɛn 18:24 (NW), wetin mek Jiova go dɔnawe wit Babilɔn di Gret?
10 Di jɔj we dɛn go “jɔj di raregal we ɔlman sabi.” (Rid Rɛvɛleshɔn 17:1, 6; 18:24, NW.) Babilɔn di Gret dɔn briŋ bɔku badnem pan Gɔd. I dɔn de tich bɔku lay lay tin dɛn bɔt Gɔd. Jɔs lɛk raregal, lay lay rilijɔn nɔ fetful to Jiova bikɔs dɛn de sɔpɔt mɔtalman gɔvmɛnt. Lay lay rilijɔn de mek pipul dɛn sɔfa ɛn dɛn de tek mɔni na pipul dɛn an. Lay lay rilijɔn dɔn kil bɔku pipul dɛn, ivin Gɔd in savant dɛn. (Rɛv. 19:2) Aw Jiova go dɔnawe wit Babilɔn di Gret?
11. Wetin di “wayl animal we gɛt brayt rɛd kɔlɔ” tinap fɔ? Aw Gɔd go yuz am agens Babilɔn di Gret?
11 Jiova go yuz di “tɛn ɔn dɛn” we di “wayl animal we gɛt brayt rɛd kɔlɔ” gɛt, fɔ dɔnawe wit di “raregal we ɔlman sabi.” Da wayl animal de tinap fɔ di United Nations. Di tɛn ɔn dɛn tinap fɔ di gɔvmɛnt dɛn we de sɔpɔt da ɔganayzeshɔn de. We Gɔd in tɛm go rich, dɛn gɔvmɛnt dɛn ya go atak Babilɔn di Gret. Dɛn go “tek ɔl wetin i gɛt, ɛn lɛf am nekɛd” ɛn mek ɔlman no aw i wikɛd. (Rɛv. 17:3, 16, NW) Da kwik kwik we aw dɛn go dɔnawe wit Babilɔn di Gret go tan lɛk se na jɔs wangren de i apin. So ɔl di wan dɛn we de sɔpɔt lay lay rilijɔn go sɔprayz, mɔ we i bin dɔn de bost fɔ se: “A sidɔm lɛk kwin, mi man nɔ day yet, ɛn a nɔ go ɛva kray.”—Rɛv. 18:7, 8, NW.
12. Wetin Jiova nɔ go alaw di neshɔn dɛn fɔ du? Wetin mek?
12 Gɔd nɔ go alaw di neshɔn dɛn fɔ dɔnawe wit in pipul dɛn. Gɔd in pipul dɛn gladi fɔ gɛt in nem, ɛn dɛn dɔn obe wetin i tɛl dɛn we na fɔ kɔmɔt na Babilɔn di Gret. (Akt 15:16, 17, NW; Rɛv. 18:4) Dɛn dɔn wok bak tranga wan fɔ ɛp ɔda pipul dɛn fɔ kɔmɔt de. So Jiova in savant dɛn nɔ go “sɔfa lɛkɛ aw [Babilɔn di Gret] gɛt fɔ sɔfa.” Bɔt pan ɔl we Jiova go protɛkt in savant dɛn di tɛm we i go dɔnawe wit Babilɔn di Gret, stil dɛn go nid strɔng fet fɔ bia di tin dɛn we go apin nɛks.
Ɛnisay we Gɔd in pipul dɛn go de na dis wɔl, dɛn go abop pan am di tɛm we dɛn go atak dɛn (Luk na paregraf 13) *
13. (a) Udat na Gɔg? (b) Frɔm wetin de na Izikɛl 38:2, 3, 8, 9, wetin go mek Gɔg atak Gɔd in pipul dɛn?
13 Di atak we Gɔg go atak. (Rid Izikɛl 38:2, 3, 8, 9.) Afta we Jiova go dɔn dɔnawe wit ɔl dɛn lay lay rilijɔn dɛn, na wangren rilijɔn go de na di wɔl. Na Jiova in savant dɛn nɔmɔ go lɛf. Fɔ tru, dat go mek Setan vɛks bad bad wan. I go sho se i vɛks bad bad wan bay we i go yuz “mɛsej dɛn we nɔ klin” we na lay lay tɔk dɛn we go kɔmɔt frɔm di dɛbul dɛn. Dɛn lay lay tɔk dɛn de go mek di neshɔn dɛn kam togɛda fɔ atak Jiova in savant dɛn. (Rɛv. 16:13, 14, NW) Di Baybul kɔl dɛn neshɔn dɛn de we go kam togɛda, Gɔg we de na Megɔg. We di neshɔn dɛn atak Gɔd in pipul dɛn, na da tɛm de Amagɛdɔn go stat.—Rɛv. 16:16.
14. Wetin di neshɔn dɛn go kam fɔ no?
14 Gɔg go abop pan in “mɔtalman an,” dat na in sojaman dɛn. (2 Kro. 32:8) Bɔt wi go abop pan wi Gɔd Jiova, we go mek di neshɔn dɛn tink se wi nɔ gɛt sɛns. Wetin mek? Bikɔs Babilɔn di Gret bin pawaful, bɔt in gɔd dɛn nɔ bin ebul fɔ sev am frɔm di “wayl animal” ɛn in “tɛn ɔn dɛn”! (Rɛv. 17:16, NW) So di neshɔn dɛn go tink se dɛn go dɔnawe wit wi izi wan. Di Babyul se “lɛk klawd we de kɔba di kɔntri,” na so dɛn go atak Jiova in pipul dɛn. (Izi. 38:16) Bɔt i nɔ go te, di neshɔn dɛn go kam fɔ si se dɛn dɔn wɛr pan trap. Jɔs lɛk Fɛro na di rɛd si, Gɔg go kam fɔ no se na agens Jiova i de fɛt.—Ɛks. 14:1-4; Izi. 38:3, 4, 18, 21-23.
15. Wetin Jizɔs go du we Amagɛdɔn go kam?
15 Krays ɛn in enjɛl dɛn na ɛvin go fɛt fɔ Gɔd in pipul dɛn ɛn dɔnawe wit di neshɔn dɛn ɛn dɛn sojaman dɛn. (Rɛv. 19:11, 14, 15) Bɔt wetin go apin to Jiova in men ɛnimi we na Setan, we na in lay lay tɔk dɛn mek di neshɔn dɛn kam fɔ atak Gɔd in pipul dɛn na di wɔ we dɛn kɔl Amagɛdɔn? Jizɔs go trowe Setan ɛn in dɛbul dɛn na di ol we nɔ gɛt bɔtɔm, usay dɛn go lɔk dɛn fɔ wan tawzin ia.—Rɛv. 20:1-3.
AW YU GO SEV DI TƐM WE AMAGƐDƆN GO KAM?
16. (a) Aw wi go sho se wi “no Gɔd”? (b) Wetin go apin to di wan dɛn we no Jiova di tɛm we Amagɛdɔn go kam?
16 Ilɛksɛf wi jɔs kam na di trut ɔ wi dɔn te na di trut, wi nid fɔ “no Gɔd” ɛn “obe di gud nyuz bɔt wi Masta Jizɔs,” so dat wi go sev di tɛm we Amagɛdɔn go kam. (2 Tɛs. 1:7-9, NW) Wi go “no Gɔd” we wi no wetin i lɛk, wetin i nɔ lɛk, ɛn fala in lɔ dɛn. Wi go sho bak se wi no Gɔd we wi lɛk am, obe am, ɛn wɔship in wangren. (1 Jɔn 2:3-5; 5:3) We wi sho se wi lɛk Gɔd, wi go gɛt di ɔnɔ fɔ lɛ insɛf no wi, ɛn dat go mek wi sev di tɛm we Amagɛdɔn go kam! (1 Kɔr. 8:3) Aw? Bikɔs we Gɔd no wi dat go mek i gladi fɔ wi.
17. Wetin i min fɔ “obe di gud nyuz bɔt wi Masta Jizɔs”?
17 “Di gud nyuz bɔt wi Masta Jizɔs” gɛt fɔ du wit ɔl di tru tin dɛn we Jizɔs bin de tich we wi kin rid bɔt na Gɔd in Wɔd. Wi go obe di gud nyuz we wi du wetin wi de lan. Wi go obe di gud nyuz bak bay we wi de put Jiova in savis fɔs na wi layf, obe in lɔ dɛn, ɛn prich bɔt in Kiŋdɔm. (Mat. 6:33; 24:14) Dɔn bak, wi fɔ sɔpɔt Krays in anɔyntɛd brɔda dɛn as dɛn de du di impɔtant wok we Krays bin dɔn gi dɛn.—Mat. 25:31-40.
18. Aw Krays in anɔyntɛd brɔda dɛn go du gud tin fɔ di ɔda ship dɛn?
18 I nɔ go te igen, Gɔd in anɔyntɛd savant dɛn go du gud tin fɔ di “ɔda ship dɛn” fɔ ɔl di ɛp we dɛn bin de ɛp dɛn. (Jɔn 10:16) Aw dɛn go du dat? Bifo Amagɛdɔn go stat, ɔl di 144,000 anɔyntɛd Kristian dɛn go dɔn gɛt layf bak fɔ go na ɛvin as spirit dɛn we nɔ de day. Dɛn go jɔyn Gɔd in ami na ɛvin fɔ nyamanyama Gɔg ɛn protɛkt di “bɔku bɔku pipul” dɛn we na Jiova in pipul dɛn. (Rɛv. 2:26, 27; 7:9, 10) Fɔ tru, na big big ɔnɔ dɛn bɔku bɔku pipul dɛn ya gɛt fɔ sɔpɔt Jiova in anɔyntɛd savant dɛn we stil de na dis wɔl!
AW WI GO KƆNTINYU FƆ DE FETFUL WAN AS DI ƐND DE KAM NIA?
19-20. Ilɛk us prɔblɛm wi gɛt, aw wi go kɔntinyu fɔ de fetful wan as Amagɛdɔn de nia?
19 Insay dis las dez we tin rili tranga, bɔku pan Jiova in pipul dɛn de bia plɛnti prɔblɛm dɛn. Pan ɔl dat, wi de bia ɛn gɛt gladi-at. (Jems 1:2-4) Wan men tin we go ɛp wi na we wi de kɔntinyu fɔ pre ɔltɛm. (Lyuk 21:36) Wi nɔ fɔ jɔs pre nɔmɔ, bɔt wi fɔ stɔdi bak Gɔd in Wɔd ɛvride ɛn tink gud gud wan bɔt wetin wi dɔn rid, lɛk di tin dɛn we di Baybul bin dɔn tɔk se i nɔ go te igen dɛn go apin. (Sam 77:12) If wi du dɛn tin dɛn ya ɛn du wi bɛst pan di prichin wok, wi go kɔntinyu fɔ gɛt strɔng fet ɛn op!
20 Tink bɔt di kayn we aw yu go rili gladi di tɛm we dɛn go dɔnawe wit Babilɔn di Gret ɛn di tɛm we Amagɛdɔn go dɔn! Dɔn, di tin we impɔtant pas ɔl na we ɔlman go rɛspɛkt Gɔd in nem ɛn di rayt we i gɛt fɔ rul, dat go rili mek yu gladi! (Izi. 38:23) Na dat mek di wan dɛn we no Gɔd de obe in Pikin, ɛn de bia te di ɛnd kam as dɛn de wet fɔ Amagɛdɔn.—Mat. 24:13.
SIŊ 143 Kɔntinyu fɔ De Wach ɛn Wet, Nɔ Taya
^ par. 5 Jiova in pipul dɛn dɔn de wet fɔ Amagɛdɔn fɔ lɔng tɛm. Insay dis atikul, wi go tɔk bɔt wetin na Amagɛdɔn, wetin go apin jɔs bifo Amagɛdɔn kam, ɛn aw wi go kɔntinyu fɔ de fetful wan as di ɛnd de kam nia.
^ par. 71 SMƆL TIN BƆT DI PIKCHƆ: We dɛn go anawns se “wi dɔn gɛt pis ɛn natin nɔ de fɔ fred,” wi go stil kɔntinyu fɔ prich wans wi gɛt di chans fɔ du dat. We dɛn go dɔnawe wit lay lay rilijɔn, wi go stil kɔntinyu fɔ de stɔdi. We Gɔg we de na Megɔg go atak wi, wi go kɔntinyu fɔ abop pan Gɔd fɔ protɛkt wi.
^ par. 85 SMƆL TIN BƆT DI PIKCHƆ: Polisman dɛn rɛdi fɔ go insay wan Kristian famili dɛn os, ɛn dis famili biliv tranga wan se Jizɔs ɛn in enjɛl dɛn de si wetin de apin.
