1. Frɔm wetin de na Matyu 11:​28-30, us prɔmis Jizɔs bin mek?

JIZƆS bin mek wan wɔndaful prɔmis to wan krawd we bin de lisin to am. I bin tɔk se: “Una kam to mi,” ɛn “a go pul di lod kɔmɔt pan una ed.” (Rid Matyu 11:​28-30.) Dis nɔto jɔs wɔd dɛn we nɔ gɛt minin. Fɔ ɛgzampul, tink bɔt wetin i bin du fɔ wan uman we bin de sɔfa frɔm wan bad bad sik.

2. Wetin Jizɔs bin du fɔ wan uman we sik?

² Wan uman bin rili nid ɛp. I dɔn go to bɔku dɔktɔ dɛn bikɔs i want lɛ dɛn mɛn am. I dɔn de sɔfa fɔ 12 ia, bɔt nɔbɔdi nɔ ebul fɔ ɛp am fɔ wɛl. Frɔm wetin de na di Lɔ we Jiova bin gi Mozis, dis uman nɔ bin klin. (Lɛv. 15:​25) Dɔn i yɛri se Jizɔs ebul fɔ mɛn di wan dɛn we sik, so i bin go fɛn am. We i bin si am, i bin tɔch di dɔŋ pat pan Jizɔs in klos, ɛn wantɛm wantɛm i bin wɛl! Jizɔs nɔ bin jɔs mɛn di uman bɔt i bin mek i gɛt rɛspɛkt bak. Fɔ ɛgzampul, we i bin de tɔk to am, i bin sho se i lɛk ɛn rɛspɛkt am bay we i kɔl am “Mi pikin.” Di uman bin rili fil fayn ɛn gɛt trɛnk bak!—Lyuk 8:​43-48.

3. Us kwɛstyɔn dɛn wi go ansa?

³ Notis se di uman bin tray tranga wan fɔ go to Jizɔs. Semweso, tide, wisɛf fɔ tray tranga wan fɔ “kam to” Jizɔs. Insay dis wi yon tɛm, Jizɔs nɔ de yuz mirekul fɔ mɛn di sik dɛn we di wan dɛn we de “kam to” am gɛt. Bɔt  i stil de invayt wi se: “Una kam to mi, . . . a go pul di lod kɔmɔt pan una ed, mek una go blo.” Insay dis atikul, wi go ansa fayv kwɛstyɔn dɛn: Aw wi go “kam to” Jizɔs? Wetin Jizɔs bin min we i se wi fɔ bi in disaypul? Wetin wi go lan frɔm am? Wetin mek di wok we i dɔn gi wi fɔ du go mek wi fil fayn? Ɛn aw wi go kɔntinyu fɔ fil fayn we wi bi Jizɔs in disaypul?

4-5. Us we dɛn wi go “kam to” Jizɔs?

⁴ Wan we aw wi go “kam to” Jizɔs na bay we wi de lan di tin dɛn we i bin de tɔk ɛn du. (Lyuk 1:​1-4) Nɔbɔdi nɔ go du dis fɔ wi, na wisɛf sɛf fɔ stɔdi di tin dɛn we di Baybul tɛl wi bɔt Jizɔs. Dɔn bak, wi go “kam to” Jizɔs bay we wi de disayd fɔ baptayz ɛn bi in disaypul.

⁵ Wan ɔda we aw wi go “kam to” Jizɔs na bay we wi de go to di ɛlda dɛn na di kɔngrigeshɔn if wi nid ɛp. Jizɔs de yuz dɛn “man dɛn [ya] as gift” fɔ kia fɔ in ship dɛn. (Ɛfi. 4:​7, 8, 11, NW; Jɔn 21:​16; 1 Pit. 5:​1-3, NW) Wi nid fɔ tray tranga wan fɔ aks fɔ lɛ dɛn ɛp wi. Wi nɔ fɔ tink se di ɛlda dɛn go ebul no wetin de na wi maynd ɛn ɛp wi. Lɛ wi tɔk bɔt wetin wan brɔda we nem Julian bin tɔk. I bin se: “A bin gɛt fɔ lɛf mi Bɛtɛl asaynmɛnt bikɔs a bin gɛt wɛlbɔdi prɔblɛm. Dɔn, wan pan mi padi dɛn bin tɛl mi se a nid fɔ aks di ɛlda dɛn fɔ kam fɛn mi ɛn ɛnkɔrej mi. Fɔs, a bin tink se a nɔ nid am. Bɔt leta a bin aks fɔ lɛ dɛn ɛp mi, ɛn we di ɛlda dɛn bin kam fɛn mi ɛn ɛnkɔrej mi, dat na bin di bɛst gift we a dɔn ɛva gɛt.” Jɔs lɛk di tu ɛlda dɛn we bin go fɛn Julian, di ɛlda dɛn de ɛp wi fɔ no “aw Krays de tink,” dat na fɔ ɔndastand ɛn falamakata di we aw i de tink ɛn biev. (1 Kɔr. 2:​16; 1 Pit. 2:​21, NW) We dɛn ɛp wi dis kayn we, dat na di bɛst gift we dɛn go ɛva gi wi.

6. Wetin Jizɔs bin min we i se: “Una opin una at fɔ di tru tin dɛn we a de lan una”?

⁶ Wetin Jizɔs bin min we i se: “Una opin una at fɔ di tru tin dɛn we a de lan una”? I go bi se i min “Gri fɔ obe mi.” I go bi bak se i min “Una bi mi disaypul ɛn wi go wok togɛda fɔ Jiova.” Dɛn tu we ya aw dɛn ɛksplen dɛn wɔd dɛn de min se wi gɛt fɔ wok.

7. Frɔm wetin de na Matyu 28:​18-20, us wok Jiova dɔn gi wi fɔ du? Wetin wi fɔ biliv?

⁷ Wi bin gri fɔ kam to Jizɔs bay we wi gi wi layf to Jiova ɛn baptayz. Jizɔs de kɔl ɔlman, ɛn i nɔ go ɛva dinay ɛnibɔdi we rili want fɔ sav Gɔd. (Jɔn 6:​37, 38) Ɔl di wan dɛn we de fala Krays gɛt di chans fɔ du di wok we Jiova bin dɔn tɛl Jizɔs fɔ du. Wi fɔ biliv tranga wan se Jizɔs go de wit wi ɔltɛm fɔ ɛp wi fɔ du dis wok.—Rid Matyu 28:​18-20.

8-9. Wetin mek pipul dɛn we ɔmbul bin want fɔ de nia Jizɔs? Us kwɛstyɔn dɛn wi fɔ aks wisɛf?

⁸ Di pipul dɛn we ɔmbul bin de kam nia Jizɔs. (Mat. 19:​13, 14; Lyuk 7:​37, 38) Wetin mek? Tink bɔt di difrɛns bitwin Jizɔs ɛn di Faresi dɛn. Dɛn bigman dɛn ya pan Gɔd biznɛs nɔ bin lɛk pipul dɛn ɛn dɛn bin prawd. (Mat. 12:​9-14) Jizɔs bin lɛk pipul dɛn ɛn i bin ɔmbul. Di Faresi dɛn bin lɛk fɔ lɛ ɔlman sabi dɛn ɛn tek dɛn se dɛn impɔtant. Jizɔs bin se i nɔ fayn fɔ de da kayn we de. I bin tich in disaypul dɛn se dɛn fɔ ɔmbul ɛn dɛn nɔ  fɔ tink se dɛn bɛtɛ pas ɔda pipul dɛn. (Mat. 23:​2, 6-11) Di Faresi dɛn bin de yuz dɛn pawa fɔ kɔntrol ɔda pipul dɛn bikɔs di pipul dɛn bin de fred wetin go apin to dɛn if dɛn nɔ obe di Faresi dɛn. (Jɔn 9:​13, 22) Jizɔs bin mek ɔda pipul dɛn fil fayn bay di tin dɛn we i bin de du fɔ sho se i lɛk dɛn ɛn di fayn we aw i bin de tɔk to dɛn.

⁹ Yu dɔn ɛva lan bɔt dɛn lɛsin dɛn ya frɔm Jizɔs? Aks yusɛf dɛn kwɛstyɔn dɛn ya: ‘Ɔda pipul dɛn de si mi as pɔsin we nɔ de vɛks kwik ɛn ɔmbul? A rɛdi fɔ du simpul wok dɛn fɔ sav ɔda pipul dɛn? A de du gud to ɔda pipul dɛn?’

12-14. Wetin mek wi de fil fayn fɔ du di wok we Jizɔs gi wi?

¹² Wetin mek wi go fil fayn we wi du di wok we Jizɔs bin gi wi? Bɔku rizin dɛn de, bɔt wi go tɔk bɔt sɔm.

¹³ Wi gɛt di bɛst ovasia dɛn. Jiova we de pantap ɔlman nɔto wikɛd masta ɛn i nɔ ɔngretful. I valyu di wok we wi de du. (Ibru 6:​10) Ɛn i de gi wi di trɛnk we wi nid fɔ du di wok we i dɔn gi wi. (2 Kɔr. 4:​7; Gal. 6:​5) Jizɔs we na wi Kiŋ dɔn sɛt fayn ɛgzampul bɔt aw fɔ trit ɔda pipul dɛn. (Jɔn 13:​15) Dɔn, di ɛlda dɛn we de kia fɔ wi de tray fɔ falamakata Jizɔs we na di “shɛpad we pas ɔl.” (Ibru 13:​20; 1 Pit. 5:​2) Dɛn de tray tranga wan fɔ du gud, ɛnkɔrej wi, ɛn fɔ gɛt maynd fɔ tich ɛn protɛkt wi.

¹⁴ Wi gɛt di bɛst padi dɛn. No ɔda pipul dɛn nɔ de we gɛt di kayn gud padi dɛn we wi gɛt ɛn di kayn fayn wok we wi gɛt. Jɔs tink bɔt dis: Wi gɛt big big ɔnɔ fɔ wok wit brɔda ɛn sista dɛn we gɛt di bɛst we fɔ biev bɔt we nɔ de tink se dɛn bɛtɛ pas ɔda pipul dɛn. Dɛn sabi fɔ du bɔku tin dɛn bɔt dɛn nɔ de bost fɔ dat, ɛn dɛn de si am se ɔda pipul dɛn bɛtɛ pas dɛn. Dɛn nɔ de jɔs si wi as dɛn kɔmpin wokman dɛn bɔt dɛn de si wi bak as dɛn padi dɛn. Ɛn da lɔv so strɔng dat dɛn rɛdi fɔ day fɔ wi!

15. Aw wi fɔ fil bɔt di wok we wi de du?

¹⁵ Wi gɛt di bɛst wok. Wi de tich pipul dɛn di tru tin bɔt Jiova ɛn tɛl dɛn di lay lay tin dɛn we Setan de tɔk. (Jɔn 8:​44) Setan de mek pipul dɛn de sɔfa bay we i de tɔk lay lay tɔk dɛn we de mek dɛn fil lɛk se dɛn nɔ gɛt wan op. Fɔ ɛgzampul,  i want wi fɔ biliv se Jiova nɔ de fɔgiv wi sin dɛn ɛn wi nɔ fit fɔ lɛ pɔsin lɛk wi. Dɛn lay lay tɔk dɛn ya de mek pipul dɛn at rili pwɛl! We wi “kam to” Krays, Jiova de fɔgiv wi sin dɛn. Ɛn di tru tin na dat Jiova rili lɛk wi. (Rom 8:​32, 38, 39) We wi ɛp ɔda pipul dɛn fɔ lan fɔ abop pan Jiova ɛn we wi si aw dis dɔn mek dɛn layf bɛtɛ, dat de mek wi rili gladi!

16. Aw di lod we Jizɔs tɛl wi fɔ tot difrɛn frɔm di ɔda lod dɛn we wi kin tot?

¹⁶ Di lod we Jizɔs bin tɛl wi fɔ tot difrɛn frɔm ɔda lod dɛn we wi kin tot. Fɔ ɛgzampul, we bɔku pipul dɛn de kɔmɔt wok, dɛn nɔ kin jɔs taya bɔt dɛn nɔ kin gladi. Bɔt afta wi kin dɔn spɛn tɛm fɔ du di wok we Jiova ɛn Jizɔs gi wi, wi kin rili gladi ɛn satisfay. Sɔntɛm wi kin taya we wi kɔmɔt wok ɛn wi kin nid fɔ fos wisɛf fɔ atɛnd mitin. Bɔt bɔku tɛm we wi kam na os frɔm di mitin dɛn, wi kin fil fayn ɛn wi kin gɛt trɛnk. Na di sem tin kin apin we wi prich ɛn du wi pasɔnal stɔdi. We wi tray tranga wan fɔ du dɛn, wi kin fil fayn ɛn wi kin gɛt trɛnk!

17. Wetin wi fɔ no bɔt wetin wi ebul du? Wetin wi fɔ tek tɛm du?

¹⁷ Wi fɔ ɔndastand se wi ɔl nɔ gɛt di sem ɛnaji. So wi fɔ tek tɛm tink gud wan bɔt wetin wi de tray fɔ du. Fɔ ɛgzampul, wi kin west wi ɛnaji we wi de tray fɔ gɛda bɔku mɔni ɛn prɔpati. Notis wetin Jizɔs bin tɛl wan yɔŋman we bin jɛntri ɛn we bin aks am se: “Wetin a fɔ du fɔ mek a gɛt layf we go de sote go?” Di yɔŋman bin de obe di Lɔ. I go mɔs bin se na gud pɔsin bikɔs Mak in gɔspɛl tɔk se Jizɔs “lɛk am.” Jizɔs tɛl di yɔŋman se: “Go sɛl ɔl wetin yu gɛt” ɛn “kam bi mi lanin bɔy.” Di man bin want fɔ bi Jizɔs in disaypul. Bɔt i nɔ bin ebul fɔ lɛf in bɔku prɔpati. (Mak 10:​17-22) Dat mek i nɔ gri fɔ bi Jizɔs in disaypul ɛn i kɔntinyu fɔ “bi slev to mɔni.” (Mat. 6:​24) If na bin yu, wetin yu bin fɔ du?

18. Wan wan tɛm, wetin wi fɔ de du? Wetin mek?

¹⁸ Wan wan tɛm, i fayn fɔ mek wi tink gud wan bɔt wetin wi de put fɔs na wi layf. Wetin mek wi fɔ du dat? Wi fɔ du am so dat wi go mek shɔ se wi de yuz wi ɛnaji di rayt we. Tink bɔt wetin wan yɔŋman we nem Mak bin tɔk. I se: “Fɔ lɔng tɛm, a bin de tink se a bin de liv simpul layf. A bin de payɔnia, bɔt ɔltɛm a bin de tink bɔt mɔni ɛn fɔ liv gud layf. A bin de tray fɔ ɔndastand wetin mek layf nɔ izi fɔ mi. Na da tɛm de a kam fɔ si se na wetin a want a bin de put fɔs ɛn na di af tɛm ɛn ɛnaji we lɛf a bin de gi Jiova.” Mak bin ajɔst in layf ɛn di we aw i bin de tink so dat i go ebul fɔ du mɔ fɔ sav Jiova. Mak tɔk se: “Sɔntɛnde, a kin wɔri bɔt mɔni, bɔt Jiova ɛn Jizɔs dɔn ɛp mi fɔ stɔp fɔ fil da we de.”

19. Wetin mek i impɔtant fɔ tink di rayt we?

¹⁹ Wi go kɔntinyu fɔ fil fayn we wi bi Jizɔs in disaypul dɛn if wi du tri tin dɛn. Fɔs, kɔntinyu fɔ tink di rayt we. Na Jiova in wok wi de du, so wi fɔ du am di we aw i want am. Wi na wokman dɛn ɛn Jiova na wi Masta. (Lyuk 17:​10) If wi tray fɔ du di wok wi yon we, i nɔ go izi fɔ wi. Ivin kaw we pawaful go mɔs wund insɛf ɛn i go taya pasmak if i tray fɔ go usay in want ɛn nɔ gri fɔ tek in masta in kɔntrol. Bɔt if wi du Jiova in wok di we aw in want am, wi go ebul fɔ du tin dɛn we wi nɔ bin tink se wi go ebul du ɛn tin  dɛn we nɔ bin izi. Mɛmba se nɔbɔdi nɔ ebul stɔp Jiova fɔ du wetin i want!—Rom 8:​31; 1 Jɔn 4:​4.

20. Wetin fɔ bi di rizin we mek wi fɔ bi Jizɔs in disaypul dɛn?

²⁰ Sɛkɔn, du tin fɔ di rayt rizin. Wi gol na fɔ briŋ prez to wi Papa we lɛk wi, Jiova. Insay Jizɔs in tɛm, di pipul dɛn we bin want ɔltin fɔ dɛnsɛf ɔ we bin jɔs bisin bɔt dɛnsɛf nɔ bin gladi igen ɛn dɛn bin kɔmɔt biɛn Jizɔs kwik kwik wan. (Jɔn 6:​25-27, 51, 60, 66; Fil. 3:​18, 19, NW) Bɔt di wan dɛn we nɔ bin jɔs bisin bɔt dɛnsɛf ɛn we lɛk dɛn neba dɛn bin gladi fɔ bi Jizɔs in disaypul dɛn te dɛn day ɛn dɛn bin gɛt di op fɔ go wok wit Jizɔs na ɛvin. Jɔs lɛk dɛn, wi go kɔntinyu fɔ bi Jizɔs in disaypul dɛn fɔ di rayt rizin.

21. Frɔm wetin de na Matyu 6:​31-33, wetin wi no se Jiova go du?

²¹ Tɔd, no se Jiova go sɔpɔt wi. Wi nɔ jɔs bisin bɔt wisɛf ɛn wi rili de wok tranga wan. Jizɔs bin wɔn wi se pipul dɛn go mek wi sɔfa. Bɔt wi no se Jiova go gi wi di trɛnk fɔ bia ɛni prɔblɛm. Di mɔ we wi de bia, na di mɔ wi de gɛt trɛnk. (Jems 1:​2-4) Wi no bak se Jiova go gi wi wetin wi nid, Jizɔs go shɛpad wi, ɛn wi brɔda ɛn sista dɛn go ɛnkɔrej wi. (Rid Matyu 6:​31-33; Jɔn 10:​14; 1 Tɛs. 5:​11) Wi gɛt ɔl wetin wi nid fɔ bia ɛni prɔblɛm we wi gɛt!

22. Wetin wi fɔ gladi fɔ?

²² Di uman we Jizɔs bin mɛn bin fil fayn di de we i mɛn am. Bɔt i go kɔntinyu fɔ fil fayn sote go if i kɔntinyu fɔ de biɛn Jizɔs. Wetin yu tink se i bin du? Imajin di blɛsin we i go gɛt if i bin gri fɔ bi Jizɔs in disaypul. I go gɛt di chans fɔ wok wit Jizɔs na ɛvin! Ɛnitin we i givɔp fɔ fala Jizɔs nɔ go valyu rich da kayn blɛsin de. Ilɛk us op wi gɛt, wɛda na fɔ go na ɛvin ɔ na fɔ de na dis wɔl, wi fɔ gladi we wi dɔn gri fɔ tek di inviteshɔn we Jizɔs gi fɔ se: “Kam to mi!”