1. Wetin mek wi fɔ put wisɛf ɔnda Jiova?

WI FƆ put wisɛf ɔnda * Jiova bikɔs na in na di Wan we mek ɔltin. Na dat mek i gɛt di rayt fɔ tɛl wi wetin wi fɔ du. (Rɛv. 4:​11, NW) Bɔt wan ɔda rizin we mek wi de obe Jiova na bikɔs na in gɛt di bɛst we fɔ rul. Fɔ lɔng tɛm naw, bɔku mɔtalman dɛn dɔn de rul oba ɔda pipul dɛn. Bɔt we wi kɔmpia di we aw dɛn de rul wit di we aw Jiova de rul, wi si se Jiova gɛt sɛns pas ɔlman, i rili lɛk wi, i de fɔgiv, ɛn na Rula we gɛt sɔri-at pas ɔl.—Ɛks. 34:​6; Rom 16:​27; 1 Jɔn 4:​8.

2. Frɔm wetin de na Di Ibru Pipul Dɛn 12:​9-11, us rizin dɛn wi gɛt fɔ obe Jiova?

² Jiova want wi fɔ obe am nɔto jɔs bikɔs wi de fred am, bɔt na bikɔs wi lɛk am ɛn wi si am as wi Papa we lɛk wi. We Pɔl bin de rayt lɛta to di Ibru pipul dɛn, i bin ɛksplen se wi fɔ rɛdi fɔ “put wisɛf ɔnda wi Papa” bikɔs i de tren wi “fɔ ɛp wi.”—Rid Di Ibru Pipul Dɛn 12:​9-11.

3. (a) Aw wi go sho se wi de obe Jiova? (b) Us kwɛstyɔn dɛn wi go ansa?

³ Wi de sho se wi de obe Jiova bay we wi de du wi bɛst fɔ du ɔl wetin i de tɛl wi fɔ du, ɛn bay we wi de tray tranga wan nɔ fɔ abop pan wi yon sɛns. (Prɔv. 3:​5) I izi fɔ wi fɔ obe Jiova we wi lan mɔ bɔt in fayn fayn kwaliti dɛn. Wetin mek? Na bikɔs wi de si dɛn kwaliti dɛn ya pan ɔl wetin i de du. (Sam 145:​9) Di mɔ we wi de lan bɔt Jiova, na di mɔ wi  de lɛk am. Ɛn we wi lɛk Jiova, wi nɔ nid lɔng list we gɛt lɔ dɛn we de sho wi wetin wi fɔ du ɛn wetin wi nɔ fɔ du. Wi de tray fɔ lan fɔ tink ɛn fil di we aw Jiova want wi fɔ du ɛn fɔ avɔyd wetin bad. (Sam 97:​10) Bɔt sɔntɛnde, i nɔ kin izi fɔ wi fɔ obe Jiova. Wetin mek? Wetin ɛlda dɛn kin lan frɔm Gɔvnɔ Nɛimaya in ɛgzampul? Wetin papa dɛn kin lan frɔm Kiŋ Devid in ɛgzampul? Wetin mama dɛn kin lan frɔm di ɛgzampul we Jizɔs in mama, Meri, bin sɛt? Wi go ansa dɛn kwɛstyɔn dɛn ya insay dis atikul.

4-5. Frɔm wetin de na Lɛta Fɔ Rom 7:​21-23, wetin mek i nɔ kin izi fɔ obe Jiova?

⁴ Wan rizin we mek i nɔ kin izi fɔ wi fɔ obe Jiova na bikɔs wi ɔl gɛt sin ɛn wi nɔ pafɛkt. So nɔto ɔltɛm wi kin want fɔ obe Gɔd. Afta we Adam ɛn Iv nɔ bin obe Gɔd bay we dɛn it di frut we i bin tɛl dɛn nɔ fɔ it, dɛn bin disayd fɔ dɛnsɛf wetin gud ɛn wetin bad. (Jɛn. 3:​22) Tide, bɔku pipul dɛn nɔ de obe Gɔd jɔs lɛk Adam ɛn Iv, ɛn dɛn want fɔ disayd fɔ dɛnsɛf wetin rayt ɛn wetin rɔŋ.

⁵ Pan ɔl we wi nɔ tan lɛk dɛn bikɔs wi sabi Jiova ɛn wi lɛk am, i nɔ kin stil izi fɔ wi fɔ du di tin dɛn we i want. Dis sem kayn tin bin apin to di apɔsul Pɔl. (Rid Lɛta Fɔ Rom 7:​21-23.) Jɔs lɛk Pɔl, wi want fɔ du wetin rayt na Jiova in yay. Bɔt wi fɔ de tray tranga wan ɔltɛm fɔ avɔyd fɔ de du rɔŋ tin dɛn.

6-7. Us ɔda rizin mek i nɔ izi fɔ wi fɔ obe Jiova? Gi wan ɛgzampul.

⁶ Wan ɔda rizin we mek i nɔ izi fɔ wi fɔ obe Jiova na wi kɔlchɔ ɛn di we aw pipul dɛn de tink na di say usay dɛn mɛn wi. Bɔku pipul dɛn go tɛl wi tin dɛn we difrɛn frɔm wetin Jiova se. So wi nid fɔ kɔntinyu fɔ tray tranga wan fɔ avɔyd nɔ fɔ tink lɛk aw dɛn de tink. Lɛ wi tɔk bɔt wan ɛgzampul.

⁷ Na sɔm say dɛn, na kɔmɔn tin fɔ lɛ dɛn mɔna yɔŋ wan dɛn fɔ fɛn bɔku mɔni. Wan sista we nem Meri * bin gɛt dis sem prɔblɛm. Bifo Meri lan bɔt Jiova, i bin atɛnd wan pan di bɛst yunivasiti dɛn na in kɔntri. Meri in famili bin tray fɔ fos am fɔ gɛt wok we go mek i gɛt bɔku mɔni ɛn we go mek ɔda pipul dɛn rɛspɛkt am. Insɛf bin want dat. Bɔt afta we i bin lan bɔt Jiova ɛn kam fɔ lɛk am, i bin chenj in gol dɛn. Bɔt stil i nɔ bin izi fɔ am. I bin tɔk se: “Sɔntɛnde, a kin si fayn we dɛn we a kin ebul mek bɔku mɔni, bɔt a no se dat go stɔp mi fɔ mek a nɔ ebul fɔ sav Jiova lɛk aw a de du rayt naw. Bikɔs ɔf di we aw a mɛn, i nɔ bin stil izi fɔ mi fɔ se nɔ. A bin gɛt fɔ beg Jiova fɔ ɛp mi fɔ tinap tranga wan ɛn nɔ gri fɔ tek wok we go stɔp mi fɔ sav am.”—Mat. 6:​24.

8. Wetin wi go kam tɔk bɔt?

⁸ We wi obe Jiova wi de bɛnifit wisɛf. Bɔt di wan dɛn we de oba wi lɛk di ɛlda dɛn, papa dɛn, ɛn mama dɛn gɛt mɔ rizin fɔ obe Gɔd, bikɔs if dɛn du dat dɛn go ebul ɛp ɔda pipul dɛn. Lɛ wi tɔk bɔt sɔm ɛgzampul dɛn na di Baybul we go tich wi aw fɔ yuz di pawa we Jiova gi wi di kayn we we go mek i gladi.

9. Us prɔblɛm dɛn Nɛimaya bin gɛt?

⁹ Jiova dɔn gi di ɛlda dɛn wan impɔtant wok we na fɔ kia fɔ in pipul dɛn. (1 Pit. 5:​2) Di ɛlda dɛn kin lan mɔ frɔm Nɛimaya  in stori ɛn si aw Jiova bin trit in pipul dɛn. As gɔvnɔ na Juda, Nɛimaya bin gɛt bɔku pawa. (Nɛi. 1:​11; 2:​7, 8; 5:​14) Tink bɔt sɔm pan di prɔblɛm dɛn we Nɛimaya bin gɛt. I bin si se di Ju pipul dɛn bin de yuz di tɛmpul fɔ du tin dɛn we de sho se dɛn nɔ gɛt wan rɛspɛkt fɔ Jiova. Dɔn bak, dɛn nɔ bin de gi kɔntribyushɔn fɔ di Livayt dɛn di we aw Jiova in Lɔ bin tɛl dɛn fɔ du. Di Ju pipul dɛn nɔ bin de obe Jiova in lɔ bɔt di Sabat, ɛn sɔm pan di man dɛn bin de mared uman dɛn we kɔmɔt na ɔda neshɔn dɛn we nɔ bin de wɔship Jiova. Gɔvnɔ Nɛimaya bin nid fɔ sɔlv dis siriɔs prɔblɛm.—Nɛi. 13:​4-30.

10. Wetin Nɛimaya bin du bɔt di prɔblɛm dɛn we bin de mit am?

¹⁰ Nɛimaya nɔ bin yuz in pawa fɔ fos di pipul dɛn fɔ fala wetin i de tink. Bifo dat, i bin pre to Jiova ɛn aks Am fɔ ɛp am, dɔn i tich di pipul dɛn bɔt Jiova in Lɔ. (Nɛi. 1:​4-10; 13:​1-3) Dɔn bak, Nɛimaya bin put insɛf dɔŋ ɛn ivin wok wit di pipul dɛn fɔ ɛp fɔ bil bak di wɔl dɛn na Jerusɛlɛm.—Nɛi. 4:​15.

11. Frɔm wetin de na Fɔs Lɛta Fɔ Tɛsalonayka 2:​7, 8, aw ɛlda dɛn fɔ trit di wan dɛn we de na di kɔngrigeshɔn?

¹¹ Di ɛlda dɛn nɔ go gɛt di sem kayn prɔblɛm dɛn we Nɛimaya bin gɛt, bɔt dɛn kin ebul fɔ falamakata am bɔku we dɛn. Fɔ ɛgzampul, dɛn de wok tranga wan fɔ ɛp dɛn brɔda ɛn sista dɛn. Ɛn dɛn nɔ de fil se dɛn bɛtɛ pas ɔda pipul dɛn bikɔs dɛn gɛt pawa. Bifo dat, dɛn de trit dɛn brɔda ɛn sista dɛn fayn. (Rid Fɔs Lɛta Fɔ Tɛsalonayka 2:​7, 8.) Bikɔs dɛn ɔmbul ɛn dɛn rili lɛk ɔda pipul dɛn, dat de mek dɛn de tɔk fayn to dɛn. Wan brɔda we nem Andru we dɔn bi ɛlda fɔ lɔng tɛm bin se: “A dɔn kam fɔ si se we ɛlda dɛn nays ɛn dɛn de trit ɔda pipul dɛn fayn, dat kin tɔch di brɔda ɛn sista dɛn at. Dɛn kwaliti dɛn ya kin ɛnkɔrej di kɔngrigeshɔn fɔ  wok wit di ɛlda dɛn.” Wan ɔda brɔda we nem Toni we dɔn bi ɛlda fɔ lɔng tɛm bin tɔk se: “A de tray fɔ fala di advays we de na Lɛta Fɔ Filipay 2:​3 ɛn a kin tray tranga wan fɔ si se ɔda pipul dɛn bɛtɛ pas mi. Dis dɔn ɛp mi fɔ lɛ a nɔ tray fɔ fos ɔda pipul dɛn fɔ du wetin a want.”

12. Wetin mek i rili impɔtant fɔ lɛ ɛlda dɛn ɔmbul?

¹² Di ɛlda dɛn fɔ ɔmbul jɔs lɛk aw Jiova ɔmbul. Pan ɔl we na Jiova de pantap ɔlman na dis wan ol wɔl, i de “bɛn dɔŋ fɔ luk” ɛn blɛs di wan dɛn we ɔmbul. (Sam 18:​35; 113:​6, 7) Infakt, di Baybul tɛl wi se Jiova et di wan dɛn we prawd.—Prɔv. 16:​5.

13. Wetin mek pɔsin we na ɛlda nid fɔ “tek tɛm wɛn i de tɔk”?

¹³ Wan we aw ɛlda kin sho se i de obe Jiova na bay we i de “tek tɛm wɛn i de tɔk.” If i nɔ du dis, i go tɔk bad to sɔmbɔdi we nɔ rɛspɛkt am. (Jems 1:​26; Gal. 5:​14, 15) Andru we wi bin dɔn tɔk bɔt bin tɔk bak se: “Sɔntɛnde, a kin want fɔ tɔk bad we to di brɔda ɔ sista dɛn we nɔ kin rɛspɛkt mi as ɛlda. Bɔt we a tink gud gud wan bɔt di ɛgzampul dɛn bɔt sɔm fetful man dɛn na di Baybul, dat dɔn ɛp mi fɔ lan se i impɔtant fɔ bi ɔmbul pɔsin ɛn pɔsin we nɔ de vɛks kwik.” Di ɛlda dɛn kin sho se dɛn de obe Jiova bay we dɛn de tɔk fayn wan to dɛn brɔda ɛn sista dɛn, ɛn ivin to dɛn kɔmpin ɛlda dɛn.—Kɔl. 4:​6.

14. Us wok Jiova dɔn gi papa dɛn? Wetin i want mek dɛn du?

¹⁴ Jiova dɔn gi papa dɛn di wok fɔ de oba di famili, ɛn i want dɛn fɔ tich, gayd, ɛn kɔrɛkt dɛn pikin dɛn. (1 Kɔr. 11:​3; Ɛfi. 6:​4) Bɔt dis nɔ min se papa dɛn fɔ yuz dɛn pawa we dɛn gɛt fɔ de oba dɛn famili ɛni aw we dɛn want. Jiova na di Wan we mek famili, so papa dɛn gɛt fɔ ansa to am fɔ di we aw dɛn de trit dɛn famili. (Ɛfi. 3:​14, 15) Papa dɛn kin sho se dɛn de obe Jiova bay we dɛn de yuz di pawa we dɛn gɛt di rayt we we go mek Gɔd gladi. Dɛn kin lan mɔ bay we dɛn de stɔdi bɔt wetin bin apin na Kiŋ Devid in layf.

15. Wetin mek papa dɛn fɔ tink gud gud wan bɔt Kiŋ Devid in fayn ɛgzampul?

¹⁵ Jiova nɔ bin jɔs pik Devid fɔ de oba in famili nɔmɔ bɔt i bin pik am bak fɔ de oba di wan ol neshɔn na Izrɛl. Devid bin gɛt bɔku pawa bikɔs in na bin kiŋ. Sɔntɛnde, i bin de yuz in pawa di rɔŋ we ɛn i bin de mek siriɔs mistek dɛn. (2 Sam. 11:​14, 15)  Bɔt Devid bin sho se i de obe Jiova bay we i bin de gri fɔ lɛ Jiova kɔrɛkt am. We i bin de pre, i bin de tɛl Jiova aw i de fil. Ɛn i bin tray tranga wan fɔ fala di advays we Jiova bin de gi am. (Sam 51:​1-4) Dɔn bak, Devid bin ɔmbul ɛn i nɔ bin jɔs de tek advays frɔm in kɔmpin man dɛn nɔmɔ, bɔt i bin de tek advays bak frɔm uman dɛn. (1 Sam. 19:​11, 12; 25:​32, 33) Devid bin lan frɔm in mistek dɛn ɛn di tin we bin impɔtant pas ɔl na in layf na fɔ sav Jiova.

16. Us lɛsin dɛn papa dɛn kin lan frɔm Kiŋ Devid?

¹⁶ Lɛ wi tɔk bɔt sɔm lɛsin dɛn we papa dɛn kin lan frɔm Kiŋ Devid: Papa dɛn nɔ fɔ yuz di pawa we Jiova gi dɛn di rɔŋ we. Gri se yu dɔn mek mistek, ɛn lisin to di advays dɛn we ɔda pipul dɛn de gi yu frɔm di Baybul. If yu du dat, yu famili go rɛspɛkt yu bikɔs yu ɔmbul. We yu de pre wit yu famili, tɛl Jiova aw yu de fil, mek lɛ dɛn si se yu rili abop pan am fɔ ɛp yu ɛn gayd yu. Di tin we fɔ impɔtant pas ɔl na yu layf na fɔ sav Jiova. (Dit. 6:​6-9) Di gift we gɛt valyu pas ɔl we yu go gi yu famili na yu gud ɛgzampul.

17. Us wok Jiova dɔn gi mama dɛn?

¹⁷ Jiova dɔn gi mama dɛn wan impɔtant wok insay di famili, ɛn i dɔn gi dɛn sɔm pawa oba dɛn pikin dɛn. (Prɔv. 6:​20) Infakt, di tin we mama dɛn kin du ɛn tɔk kin afɛkt dɛn pikin dɛn te go. (Prɔv. 22:​6) Notis wetin mama dɛn kin lan frɔm Meri, we na Jizɔs in mama.

18-19. Wetin mama dɛn kin lan frɔm Meri in ɛgzampul?

¹⁸ Meri bin sabi di Skripchɔ dɛn gud gud wan. I bin gɛt dip rɛspɛkt fɔ Jiova ɛn tayt padi biznɛs wit am. I bin rɛdi fɔ du wetin Jiova want pan ɔl we i go min se ɔltin na in layf go chenj.—Lyuk 1:​35-38, 46-55.

¹⁹ Mama, yu kin falamakata Meri bɔku difrɛn we dɛn. Aw yu go du dis? Fɔs, yu nid fɔ kɔntinyu fɔ gɛt tayt padi biznɛs wit Jiova bay we yu de du pasɔnal stɔdi ɛn pre ɔltɛm. Sɛkɔn, yu nid fɔ rɛdi fɔ chenj sɔm we dɛn na yu layf so dat yu go mek Jiova gladi. Fɔ ɛgzampul, sɔntɛm, yu yon mama ɛn papa we mɛn yu bin de vɛks kwik ɛn tɔk bad to dɛn pikin dɛn. So sɔntɛm, yu go de tink se i nɔ bad if yu trit yu pikin dɛn da sem we de. Ivin afta we yu dɔn lan bɔt aw Jiova want yu fɔ trit yu pikin dɛn, i stil nɔ kin izi fɔ yu fɔ lɛ yu nɔ vɛks ɛn fɔ peshɛnt wit yu pikin dɛn, mɔ we dɛn nɔ de obe yu di tɛm we yu taya. (Ɛfi. 4:​31) Dɛn tɛm dɛn de,  i go rili fayn fɔ lɛ yu aks Jiova fɔ ɛp yu. Wan mama we nem Lidia bin tɔk se: “Sɔntɛnde, a bin gɛt fɔ pre gud gud wan to Jiova so dat i go ɛp mi fɔ lɛ a nɔ vɛks we a de tɔk to mi bɔypikin we i nɔ obe mi. A dɔn ivin stɔp misɛf we a de tɔk ɛn pre na mi at fɔ lɛ Jiova ɛp mi. Prea de mek mi at kol.”—Sam 37:​5.

20. Us prɔblɛm dɛn sɔm mama dɛn gɛt? Aw dɛn go ebul chenj?

²⁰ Wan ɔda prɔblɛm we sɔm mama dɛn kin gɛt na dat, i nɔ kin izi fɔ lɛ dɛn sho dɛn pikin dɛn se dɛn lɛk dɛn. (Tay. 2:​3, 4) Bɔku pan dɛn mama dɛn de mɛn na os usay dɛn mama ɛn papa dɛn nɔ gɛt tayt padi biznɛs wit dɛn pikin dɛn. If na so dɛn mɛn yu, yu nɔ fɔ mek di sem mistek we yu mama ɛn papa bin mek. Mama we de du wetin Jiova want go nid fɔ lan aw fɔ sho se i lɛk in pikin dɛn. I nɔ go izi fɔ am fɔ chenj di we aw i de tink, fil, ɛn du tin. Bɔt i pɔsibul fɔ lɛ i chenj ɛn dat go bɛnifit in ɛn in famili.

21-22. Frɔm wetin de na Ayzaya 65:​13, 14, us bɛnifit wi go gɛt we wi obe Jiova?

²¹ Kiŋ Devid bin no di bɛnifit we pɔsin go gɛt we i obe Jiova. I bin rayt se: “Di tin dɛn we Jiova de tɛl wi fɔ du rayt, dɛn de mek wi at gladi; Jiova in lɔ dɛn klin, dɛn de mek wi yay shayn. Na dɛn yu dɔn de yuz fɔ wɔn yu savant; we wi fala dɛn, wi go gɛt bɔku blɛsin.” (Sam 19:​8, 11, NW) Tide, wi de si di difrɛns bitwin di wan dɛn we de obe Jiova ɛn di wan dɛn we nɔ de gri fɔ obe am. Di wan dɛn we obe Jiova go “siŋ bikɔs dɛn at gladi.”—Rid Ayzaya 65:​13, 14.

²² We ɛlda dɛn, papa dɛn, ɛn mama dɛn gri fɔ obe Jiova, dɛn layf de go bifo, dɛn famili de gɛt gladi-at, ɔlman na di kɔngrigeshɔn de gɛt wanwɔd mɔ ɛn mɔ. Ɛn di tin we impɔtant pas ɔl, dɛn de mek Jiova gladi. (Prɔv. 27:​11) Dis na di tin we go mek wi gladi pas ɛni ɔda tin!