1-2. Wetin Ɛkliziastis 11:​6 gɛt fɔ du wit di prichin wok?

INSAY sɔm kɔntri dɛn, bɔku pipul dɛn kin want fɔ lan mɔ we dɛn yɛri di gud nyuz. Dɛn kin dɔn de wet fɔ dat fɔ sɔm tɛm! Bɔt insay sɔm ɔda kɔntri dɛn, pipul dɛn nɔ kin want fɔ no bɔt Gɔd ɔ di Baybul. Yu tink se pipul dɛn de lisin to di gud nyuz na di say we yu de? Ilɛksɛf dɛn de lisin ɔ dɛn nɔ de lisin, Jiova want wi fɔ kɔntinyu fɔ prich te i tɛl wi se di wok dɔn dɔn.

² Jiova dɔn ɔlrɛdi disayd ustɛm di prichin wok go dɔn, ɛn na afta dat “di ɛnd go kam.” (Mat. 24:​14, 36) Bɔt bifo da tɛm de rich, aw wi go du di prichin wok ɛn “nɔ blo”? *—Rid Ɛkliziastis 11:​6.

3. Wetin wi go tɔk bɔt insay dis atikul?

³ Insay di atikul bifo dis wan, wi bin tɔk bɔt 4 tin dɛn we wi nid fɔ du so dat wi go bi Jizɔs in disaypul ɛn prich di gud nyuz. (Mat. 4:​19) Insay dis atikul, wi go tɔk bɔt tri tin dɛn we go ɛp wi fɔ kɔntinyu fɔ prich ilɛk wetin de apin to wi. Wi go lan wetin mek i impɔtant fɔ (1) kɔntinyu fɔ put di prichin wok fɔs na wi layf, (2) fɔ peshɛnt, ɛn (3) kɔntinyu fɔ gɛt strɔng fet.

4. Wetin mek wi fɔ put di wok we Jiova dɔn gi wi fɔs na wi layf?

⁴ Jizɔs bin dɔn tɔk bɔt bɔku tin dɛn we go apin we go sho se wi de insay di las dez, ɛn i bin no se dɛn tin dɛn de go ambɔg in disaypul dɛn fɔ mek dɛn nɔ kɔntinyu fɔ put di prichin wok fɔs na dɛn layf. I bin tɛl in disaypul dɛn fɔ “go de wach.” (Mat. 24:​42) Insay Noa in tɛm, bɔku tin dɛn bin de mek pipul dɛn nɔ pe atɛnshɔn to  wetin i bin de tɛl dɛn. Tide, dɛn sem tin dɛn de kin mek pipul dɛn nɔ pe atɛnshɔn to wetin wi de tɛl dɛn. (Mat. 24:​37-39; 2 Pit. 2:​5) Na dat mek wi want fɔ kɔntinyu fɔ put di wok we Jiova dɔn gi wi fɔs na wi layf.

5. Wetin Akt 1:​6-8 tɔk bɔt di prichin wok?

⁵ Tide, wi rili nid fɔ pe atɛnshɔn pan di wok fɔ prich bɔt di Kiŋdɔm. Jizɔs bin tɔk se dis wok go rich plɛnti say dɛn, ɛn i go kɔntinyu ivin afta i go dɔn day. (Jɔn 14:​12) Afta we Jizɔs day, sɔm pan in disaypul dɛn go bak to dɛn fishin wok. We Jizɔs gɛt layf bak, i pafɔm mirekul fɔ mek sɔm pan in disaypul dɛn kech bɔku bɔku fish dɛn. I yuz da tɛm de fɔ mek dɛn no se di prichin wok impɔtant pas ɛni ɔda wok. (Jɔn 21:​15-17) Jɔs bifo Jizɔs go na ɛvin, i bin tɛl in disaypul dɛn se di prichin wok we i dɔn stat go rich fa fa say dɛn na di wɔl. (Rid Akt 1:​6-8.) Afta sɔm tɛm, Jizɔs bin mek apɔsul Jɔn si wan vishɔn bɔt wetin go apin “na di Masta in de.” * Wan pan di wɔndaful tin dɛn we Jɔn bin si na wan enjɛl we “gɛt gud nyuz we go de sote go” we i bin de prich to “ɔl di neshɔn dɛn, pipul dɛn, trayb dɛn, ɛn pipul dɛn we de tɔk difrɛn difrɛn langwej dɛn.” (Rɛv. 1:​10; 14:​6) Dis sho klia wan se Jiova want wi fɔ kɔntinyu fɔ du di prichin wok te i se di wok dɔn dɔn.

6. Wetin go ɛp wi fɔ kɔntinyu fɔ put di prichin wok fɔs na wi layf?

⁶ Wi go kɔntinyu fɔ put di prichin wok fɔs na wi layf if wi de tink bɔt ɔl di tin dɛn we Jiova de du fɔ ɛp wi. Fɔ ɛgzampul, i de mek wi gɛt buk, magazin, ɛn ɔda tin dɛn we de ɛp wi fɔ gɛt tayt padi biznɛs wit am. Wi kin  yuz di wan dɛn we dɛn kin print, di wan dɛn we kin de na wi fon, tablɛt, ɔ kɔmpyuta, odio ɛn vidio rɛkɔdin dɛn, ɛn JW TV. Jɔs tink bɔt dis: Di tin dɛn we de na wi wɛbsayt de insay pas 1,000 langwej dɛn. (Mat. 24:​45-47) Pɔlitiks, rilijɔn, ɛn mɔni de mek pipul dɛn nɔ gɛt wanwɔd na di wɔl. Bɔt i pas et milyɔn Jiova Witnɛs dɛn we de ɔlsay na di wɔl, ɛn dɛn rili gɛt wanwɔd. Fɔ ɛgzampul, Frayde Epril 19, 2019, Jiova Witnɛs dɛn ɔlsay na di wɔl bin wach wan fim we de sho wan Gɔvnin Bɔdi mɛmba we de tɔk bɔt di deli tɛks fɔ da de de. Da sem ivintɛm de, 20,919,041 pipul dɛn bin gɛda fɔ mɛmba Jizɔs in day. Ɛnitɛm we wi de tink bɔt di big big ɔnɔ we wi gɛt fɔ si di fayn tin dɛn we de apin naw, dat de mek wi kɔntinyu fɔ put di prichin wok fɔs na wi layf.

7. Aw Jizɔs in ɛgzampul de ɛp wi fɔ put di prichin wok fɔs na wi layf?

⁷ Wan ɔda tin we go ɛp wi fɔ kɔntinyu fɔ put di prichin wok fɔs na wi layf na we wi fala Jizɔs in ɛgzampul. I nɔ bin alaw ɛnitin fɔ pul in maynd pan di prichin wok. (Jɔn 18:​37) I nɔ bin alaw Setan fɔ tɛmt am we i bin sho am “ɔl di kiŋdɔm dɛn na di wɔl wit ɔl di gud tin dɛn we de de,” ɛn i nɔ bin alaw pipul dɛn fɔ mek am kiŋ. (Matyu 4:​8, 9; Jɔn 6:​15) I nɔ bin alaw mɔni ɛn prɔpati fɔ ful-ɔp in yay, ɛn i nɔ fred di pipul dɛn we bin de agens am. (Lyuk 9:​58; Jɔn 8:​59) We sɔntin tɛst wi fet, wi go put di Kiŋdɔm fɔs na wi layf if wi mɛmba apɔsul Pɔl in advays. I ɛnkɔrej Kristian dɛn fɔ fala Jizɔs in ɛgzampul so dat dɛn “nɔ go taya ɛn giv-ɔp”!—Ibru. 12:​3.

8. Wetin i min fɔ peshɛnt? Wetin mek wi rili nid fɔ peshɛnt naw?

⁸ Pɔsin we de peshɛnt kin bia wet fɔ lɛ wetin de apin chenj. Wi nid fɔ peshɛnt fɔ difrɛn tin dɛn. Wi go want mek di bad tin we de apin dɔn ɔ i go bi se wi dɔn de wet fɔ lɔng tɛm fɔ mek gud tin apin. Di prɔfɛt Abakɔk bin de wet fɔ di tɛm we fɛt-fɛt go dɔn na Juda. (Aba. 1:​2) Jizɔs in disaypul dɛn bin fil se di Kiŋdɔm go “kam wantɛm wantɛm” ɛn fri dɛn frɔm di Roman pipul dɛn. (Lyuk 19:​11) Wi de wet fɔ di de we Gɔd in Kiŋdɔm go pul wikɛd pipul dɛn na dis wɔl ɛn briŋ di nyu wɔl usay pipul dɛn we de du wetin rayt go de. (2 Pit. 3:​13) Bɔt wi nid fɔ peshɛnt ɛn wet fɔ Jiova in tɛm. Lɛ wi tɔk bɔt sɔm we dɛn we Jiova de tich wi fɔ peshɛnt.

9. Us ɛgzampul dɛn de sho se Jiova peshɛnt?

⁹ Na Jiova sɛt di bɛst ɛgzampul fɔ peshɛnt. I bin gi Noa ɔl di tɛm we i bin nid fɔ bil di ak ɛn fɔ “prich bɔt wetin rayt.” (2 Pit. 2:​5; 1 Pit. 3:​20) Jiova bin lisin we Ebraam aks am bɔku kwɛstyɔn dɛn we I bin want fɔ dɔnawe wit di wikɛd pipul dɛn na Sɔdɔm ɛn Gomɔra. (Jɛn. 18:​20-33) Fɔ lɔng tɛm, Jiova bin rili peshɛnt wit di Izrɛlayt dɛn pan ɔl we dɛn nɔ bin fetful. (Nɛi. 9:​30, 31) Insay wi yon tɛm bak, wi de si se Jiova de peshɛnt bay we i de alaw tɛm fɔ mek pipul dɛn we i want fɔ bi in padi “ripɛnt.” (2 Pit. 3:​9; Jɔn 6:​44; 1 Tim. 2:​3, 4) Jiova in ɛgzampul de ɛp wi fɔ peshɛnt as wi de kɔntinyu fɔ prich ɛn tich. Apat frɔm dat, i yuz wan ɛgzampul insay in Wɔd fɔ tich wi aw fɔ peshɛnt.

10. Wetin di ɛgzampul bɔt fama na Jems 5:​7, 8 de tich wi?

 ¹⁰ Rid Jems 5:​7, 8. Di ɛgzampul bɔt fama de tich wi aw fɔ peshɛnt. Na tru se sɔm plant dɛn kin gro kwik kwik wan. Bɔt bɔku plant dɛn, mɔ di wan dɛn we de bia frut, kin tek lɔng tɛm fɔ gro. I bin de tek lɛk siks mɔnt fɔ lɛ plant dɛn gro na Izrɛl. Di fama bin de plant in sid dɛn we di ren jɔs bigin kam, ɛn i bin de avɛst dɛn we di ren sizin de dɔn. (Mak 4:​28) Wi go sho se wi gɛt sɛns we wi falamakata di we aw fama dɛn de peshɛnt. Bɔt dat nɔ kin izi fɔ du.

11. We wi peshɛnt, aw dat go ɛp wi we wi de du di prichin wok?

¹¹ Bɔku tɛm, wi kin want fɔ si rizɔlt fɔ wi wok kwik kwik wan. Bɔt if wi want fɔ lɛ di tin dɛn we wi plant na wi gadin kɔmɔt fayn, wi fɔ de kia fɔ di gadin ɔltɛm. Wi fɔ de dig, plant, rut gras, ɛn wata am. Semweso, if wi want fɔ mek disaypul dɛn, wi nid fɔ wok tranga wan. I kin tek tɛm fɔ lɛ wi ɛp wi Baybul studɛnt dɛn fɔ sho lɔv to ɔda pipul dɛn ɛn fɔ lɛ dɛn nɔ tek wan pɔsin bɛtɛ pas ɔda pɔsin. We wi peshɛnt, wi at nɔ go pwɛl we pipul dɛn nɔ lisin to wi. Ivin we pipul dɛn lisin to wi, wi fɔ stil peshɛnt. Wi nɔ go fos wi Baybul studɛnt dɛn fɔ gɛt fet. Sɔntɛnde, ivin Jizɔs in disaypul dɛn bin slo fɔ ɔndastand wetin i bin de tich dɛn. (Jɔn 14:​9) Lɛ wi mɛmba se wi kin plant ɛn wata, bɔt na Gɔd de mek i gro.—1 Kɔr. 3:​6.

12. Wetin go ɛp wi fɔ peshɛnt we wi de prich to wi fambul dɛn we nɔto Jiova Witnɛs?

¹² Wan tin we kin mek i nɔ kin izi fɔ lɛ wi peshɛnt, na we wi de prich to wi fambul dɛn we nɔto Jiova Witnɛs. Di advays we de na Ɛkliziastis 3:​7 (NWT) go ɛp wi. I se: “Tɛm de fɔ sɛt mɔt, ɛn tɛm de fɔ tɔk.” Di  fayn we aw wi de biev go mek wi fambul dɛn want fɔ lisin to wi mɛsej, bɔt i go fayn bak fɔ mek wi rɛdi ɔltɛm fɔ tɔk to dɛn bɔt Jiova. (1 Pit. 3:​1, 2) Wi fɔ gɛt zil we wi de prich ɛn tich, bɔt wi fɔ peshɛnt wit ɔlman ivin wi fambul dɛn.

13-14. Us ɛgzampul dɛn bɔt pipul dɛn we bin peshɛnt we wi go falamakata?

¹³ We wi lan bɔt fetful pipul dɛn fayn ɛgzampul dɛn we de insay di Baybul ɛn insay wi yon tɛm, dat go ɛp wi fɔ peshɛnt. Abakɔk bin de wet fɔ di tɛm we bad tin dɛn go lɛf fɔ apin, bɔt i bin sho se i de peshɛnt we i bin tɔk se i “go tinap na wan ay ples de wach.” (Aba. 2:​1) Apɔsul Pɔl bin se i rili want fɔ “dɔn” in wok. Bɔt i bin peshɛnt ɛn kɔntinyu “fɔ prich di gud nyuz.”—Akt 20:​24.

¹⁴ Lɛ wi tɔk bɔt wan brɔda ɛn in wɛf we bin gradyuet na Giliad. Jiova Witnɛs dɛn nɔ bin bɔku na di kɔntri we dɛn sɛn dɛn, ɛn bɔku pan di pipul dɛn nɔto bin Kristian. Bɔku pipul dɛn nɔ bin want fɔ stɔdi di Baybul. Bɔt dɛn kɔmpin dɛn we dɛn ɔl kɔmɔt Giliad we bin de na ɔda kɔntri, bin de tɛl dɛn bɔt ɔl di pipul dɛn we dɛn de stɔdi di Baybul wit ɛn di wan dɛn we dɛn dɔn ɛp fɔ sav Jiova. Di brɔda ɛn in wɛf bin peshɛnt ɛn kɔntinyu fɔ prich pan ɔl we bɔku pipul dɛn na dɛn tɛritri nɔ bin want fɔ lisin. Afta dɛn dɔn prich fɔ et ia na da kayn tɛritri de, dɛn bin gladi we wan pan dɛn Baybul stɔdi bin baptayz. Wetin wi lan frɔm di ɛgzampul dɛn we wi dɔn tɔk bɔt? Jiova bin blɛs dɛn fetful pipul dɛn ya we bin peshɛnt fɔ du di prichin wok bikɔs dɛn bin kɔntinyu fɔ gɛt zil ɛn dɛn nɔ bin de blo. Lɛ wi “falamakata di wan dɛn we bin bɛnifit frɔm di prɔmis dɛn bikɔs dɛn gɛt fet ɛn dɛn peshɛnt.”—Ibru. 6:​10-12.

15. Wetin na wan we aw fet kin ɛp wi fɔ lɛ wi kɔntinyu fɔ du di prichin wok?

¹⁵ Wi biliv se wetin wi de tɔk na tru, so wi rili want fɔ tɛl bɔku pipul dɛn bɔt am. Wi biliv di prɔmis dɛn we de na di Baybul. (Sam 119:​42; Ayz. 40:​8) Wi dɔn si we di tin dɛn we di Baybul tɔk de apin insay wi yon tɛm. Wi dɔn si aw pipul dɛn dɔn chenj dɛn layf we dɛn bigin fɔ fala di advays dɛn na di Baybul. Dis dɔn mek wi biliv tranga wan se ɔlman nid fɔ yɛri di gud nyuz bɔt di Kiŋdɔm.

16. Akɔdin to Sam 46:​1-3, aw di fet we wi gɛt pan Jiova ɛn Jizɔs go ɛp wi fɔ kɔntinyu fɔ prich?

¹⁶ Wi gɛt fet bak pan Jiova we na di Wan we de tɛl wi wetin fɔ prich, ɛn wi gɛt fet bak pan Jizɔs we i dɔn gi pawa fɔ bi Kiŋ na di Kiŋdɔm. (Jɔn 14:​1) Ilɛk wetin de apin to wi, Jiova go gi wi trɛnk ɛn ɛp wi ɔltɛm. (Rid Sam 46:​1-3.) Apat frɔm dat, wi gɛt kɔnfidɛns se Jizɔs de yuz in pawa we Jiova dɔn gi am fɔ dayrɛkt di prichin wok frɔm ɛvin.—Mat. 28:​18-20.

17. Gi wan ɛgzampul we de sho wetin mek wi fɔ kɔntinyu fɔ prich.

¹⁷ Fet de mek wi gɛt kɔnfidɛns fɔ se Jiova go blɛs wi wok, ɛn sɔntɛnde i kin du dat we dɛn we wi nɔ de ɛkspɛkt. (Ɛkli. 11:​6) Fɔ ɛgzampul, ɛvride bɔku pipul dɛn kin pas nia wi kat ɛn tebul dɛn we wi kin put wi buk, magazin, ɛn ɔda tin dɛn. Yu tink se dis na fayn  we fɔ prich? Yɛs, i rili fayn! Wi Kiŋdɔm Ministri fɔ Novɛmba 2014, bin tɔk bɔt wan studɛnt na yunivasiti we bin want fɔ rayt sɔntin bɔt Jiova Witnɛs dɛn. I nɔ bin sabi ɛni Kiŋdɔm Ɔl, bɔt i bin si wan tebul we gɛt wi buk ɛn magazin dɛn na in yunivasiti kɔmpawnd, ɛn i bin ebul fɔ fɛn sɔntin we i bin yuz fɔ di tin we i bin want fɔ rayt. Leta, i bin baptayz ɛn naw in na rɛgyula payɔnia. Dɛn kayn ɛkspiriɛns dɛn ya de mek wi want fɔ kɔntinyu fɔ prich bikɔs dɛn de sho se pipul dɛn de we stil nid fɔ yɛri di Kiŋdɔm mɛsej.

18. Wetin mek wi shɔ se di Kiŋdɔm prichin wok go dɔn di we aw Jiova want?

¹⁸ Wi shɔ se di prichin wok bɔt di Kiŋdɔm go dɔn di rayt tɛm. Tink bɔt wetin bin apin insay Noa in tɛm. Jiova bin sho se ɔltɛm, i de du tin di rayt tɛm. Fɔ lɛk 120 ia bifo di Flɔd, Jiova bin dɔn disayd ustɛm di Flɔd go kam. (Jɛn. 6:​3) Afta lɔng tɛm, Jiova bin tɛl Noa fɔ bil di ak. Noa bin kɔntinyu fɔ wok tranga wan fɔ lɛk 40 ɔ 50 ia bifo di Flɔd bigin. Pan ɔl we pipul dɛn nɔ bin de lisin to am, i kɔntinyu fɔ wɔn dɛn te Jiova tɛl am se tɛm dɔn rich fɔ briŋ di animal dɛn insay di ak. Jiova bin “lɔk di ak in [domɔt]” di rayt tɛm.—Jɛn. 6:​3; 7:​1, 2, 16.

19. Wetin wi de wet fɔ si tumara bambay if wi kɔntinyu fɔ prich ɛn nɔ blo?

¹⁹ I nɔ go te igen, Jiova go se di tɛm fɔ prich bɔt di Kiŋdɔm dɔn dɔn. Dɔn i go dɔnawe wit Setan in wikɛd wɔl ɛn briŋ di nyu wɔl we go ful-ɔp wit pipul dɛn we de obe am. Te da tɛm de, lɛ wi falamakata Noa, Abakɔk, ɛn ɔda pipul dɛn we kɔntinyu fɔ prich ɛn nɔ blo. Lɛ wi kɔntinyu fɔ put di prichin wok fɔs na wi layf, lɛ wi peshɛnt, ɛn kɔntinyu fɔ gɛt strɔng fet pan Jiova ɛn in prɔmis dɛn.