1. Ustɛm i nɔ kin izi fɔ sav Jiova?

USTƐM mɔ yu tink se i nɔ izi fɔ sav Jiova? Na di tɛm we yu gɛt bɔku prɔblɛm dɛn ɔ di tɛm we yu nɔ gɛt bɔku prɔblɛm? We wi gɛt prɔblɛm dɛn, i kin izi fɔ lɛ wi abop pan Jiova. Bɔt wetin wi kin du we wi nɔ gɛt prɔblɛm? Wi kin fɔgɛt se i impɔtant fɔ sav Jiova? Jiova bin wɔn di Izrɛlayt dɛn fɔ tek tɛm lɛ dat nɔ apin.—Dit. 6:​10-12.

2. Us ɛgzampul Kiŋ Esa bin sɛt?

² Kiŋ Esa bin sɛt fayn ɛgzampul ɛn sho se i gɛt sɛns bay we i bin rili abop pan Jiova. I bin sav Jiova di tɛm we tin bad ɛn di tɛm we pis de. Frɔm tɛm, Esa “bin mek shɔ se ɔl in at de wit PAPA GƆD [“Jiova,” NWT].” (1 Kiŋ 15:​14) Wan we aw i sho se i de rili wɔship Jiova, na we i pul ɔl di lay lay gɔd dɛn na Juda. Di Baybul se: “I pul pul dɛn fɔrin ɔlta dɛn ɛn dɛn ay ples dɛm, ɛn brok di pila dɛn ɛn chap chap di Asherim [sekred pol dɛn].” (2 Kro. 14:​3, 5) I mek Meaka we na in grani nɔ bi fɔs ledi igen na di kiŋdɔm. Wetin mek? Bikɔs na in bin de ɛnkɔrej pipul dɛn fɔ wɔship lay lay gɔd dɛn.—1 Kiŋ 15:​11-13.

3. Us kwɛstyɔn wi go tɔk bɔt insay dis atikul?

³ Esa nɔ bin jɔs pul di lay lay gɔd dɛn, i bin ɛp di pipul dɛn na Juda fɔ bigin wɔship Jiova bak. Jiova bin blɛs Esa ɛn di pipul dɛn na Juda bay we i bin mek dɛn gɛt pis. * Insay di fɔs tɛn ia we Esa bin de rul, “di land  bin gɛt alafia.” (2 Kro. 14:​1, 4, 6) Insay dis atikul, wi go tɔk bɔt wetin Esa bin du di tɛm we pis bin de. Wi go tɔk bak bɔt di fɔstɛm Kristian dɛn we bin du gud tin di tɛm we pis de jɔs lɛk Esa. Dɔn wi go ansa dis kwɛstyɔn we se: If yu de na kɔntri usay di gɔvmɛnt nɔ de ambɔg Jiova Witnɛs dɛn, wetin yu go du fɔ sho se yu gɛt sɛns we pis de?

4. Akɔdin to Sɛkɛn Kronikul 14:​2, 6, 7, wetin Esa bin du di tɛm we pis de?

⁴ Rid Sɛkɛn Kronikul 14:​2, 6, 7. Esa bin tɛl di pipul dɛn se na Jiova bin “gi [dɛn] kolat ɔloba.” Esa nɔ bin fil se na da tɛm de dɛn fɔ de ɛnjɔy layf. Bifo dat, i bigin fɔ bil siti dɛn, wɔl dɛn, tawa dɛn, ɛn get dɛn. I bin tɛl di pipul dɛn na Juda se: “Na wi stil gɛt di grɔn.” Wetin Esa bin min? I min se di pipul dɛn fri fɔ bil ɛn du wetin dɛn want fɔ du na di land we Gɔd dɔn gi dɛn, ɛn dɛn ɛnimi dɛn nɔ go stɔp dɛn fɔ du ɛnitin. I bin ɛnkɔrej di pipul dɛn fɔ du gud tin di tɛm we pis de.

5. Wetin mek Esa bin gɛda mɔ fɛtman dɛn?

⁵ Esa bin yuz di tɛm we pis de fɔ gɛda mɔ fɛtman dɛn. (2 Kro. 14:​8) Fɔ se dis min se i nɔ bin abop pan Jiova? Nɔ, nɔto so i bi. Esa bin no se as kiŋ, i fɔ rɛdi in pipul dɛn fɔ ɛni prɔblɛm we go kam. Esa bin no bak se sɔntɛm di pis we Juda de ɛnjɔy nɔ go de sote go, ɛn na dat bin apin.

6. Wetin di fɔstɛm Kristian dɛn bin du di tɛm we pis de?

⁶ Pan ɔl we i bi se dɛn bin de mek di fɔstɛm Kristian dɛn sɔfa bɔku tɛm, dɛn  bin de ɛnjɔy pis ɔda tɛm dɛn. Wetin dɛn bin de du dɛn tɛm dɛn de? Dɛn fetful man ɛn uman dɛn de nɔ bin taya fɔ prich di gud nyuz. Di Baybul buk we nem Akt tɛl wi se dɛn “bin de fred Jiova.” So dɛn nɔ bin stɔp fɔ prich di gud nyuz, ɛn dat bin mek dɛn “kɔntinyu fɔ bɔku.” Fɔ tru, Jiova bin blɛs di zil we dɛn gɛt bikɔs dɛn bin de prich di tɛm we pis de.—Akt 9:​26-31.

7-8. Wetin Pɔl ɛn di ɔda Kristian dɛn bin gɛt chans fɔ du? Ɛksplen.

⁷ Di fɔstɛm Kristian dɛn bin yuz ɔl di chans we dɛn bin gɛt fɔ prich di gud nyuz. Fɔ ɛgzampul, we apɔsul Pɔl bin kam fɔ si se i go ebul prich to bɔku pipul dɛn na Ɛfisɔs, i bin kɔntinyu fɔ de na di siti fɔ prich ɛn mek disaypul.—1 Kɔr. 16:​8, 9.

⁸ Pɔl ɛn di ɔda Kristian dɛn bin gɛt chans fɔ prich to bɔku pipul dɛn insay di ia 49 we di apɔsul ɛn ɛlda dɛn bin sɔlv di prɔblɛm bɔt fɔ sakɔmsayz ɔ nɔ fɔ sakɔmsayz. (Akt 15:​23-29) We dɛn bin tɛl di kɔngrigeshɔn wetin di apɔsul ɛn ɛlda dɛn dɔn disayd, di disaypul dɛn bin tray tranga wan fɔ tɔk bɔt “di gud nyuz bɔt Jiova in wɔd.” (Akt 15:​30-35) Wetin bin apin we dɛn du dat? Di Baybul se “di kɔngrigeshɔn dɛn kɔntinyu fɔ gɛt fet mɔ ɛn mɔ ɛn bɔku pipul dɛn bin de jɔyn dɛn ɛvride.”—Akt 16:​4, 5.

9. Wetin de apin na bɔku kɔntri dɛn tide? Wetin wi fɔ aks wisɛf?

⁹ Na bɔku kɔntri dɛn, pipul dɛn nɔ de ambɔg wi prichin wok. Yu de na kɔntri usay dɛn nɔ de ambɔg yu we yu de wɔship Jiova? If na so i bi, aks yusɛf dis kwɛstyɔn, ‘Aw a de yuz dis tɛm we dɛn nɔ de ambɔg mi?’ Insay dis tɛm we di wɔl want fɔ dɔn, bɔku fayn tin dɛn de apin to Jiova in pipul dɛn bikɔs dɛn de prich ɛn tich di kayn we we nɔ ɛva apin na di wɔl. (Mak 13:​10) Bɔku tin dɛn de we Jiova in pipul dɛn go ebul fɔ du.

10. Wetin 2 Timoti 4:​2 de ɛnkɔrej wi fɔ du?

¹⁰ Wetin yu go du di tɛm we pis de? (Rid 2 Timoti 4:​2.) I go fayn fɔ mek yu tink if yu ɔ wan pɔsin na yu famili go ebul fɔ ajɔst wetin i de du so dat i go ebul fɔ du mɔ na di prichin wok, ɔ fɔ ivin payɔnia. Nɔto naw fɔ bigin gɛda bɔku mɔni ɛn prɔpati bikɔs dɛn tin dɛn de nɔ go sev wi insay di big big trɔbul.—Izi. 7:​19; Mat. 6:​31-33; 1 Jɔn 2:​15-17.

11. Wetin sɔm brɔda ɛn sista dɛn dɔn du so dat dɛn go ebul fɔ prich to bɔku pipul dɛn bɔt di gud nyuz?

¹¹ Bɔku pɔblisha dɛn dɔn lan nyu langwej dɛn so dat dɛn go ebul fɔ ɛp ɔda pipul dɛn fɔ lan bɔt Jiova. Jiova in ɔganayzeshɔn de mek bɔku buk, magazin, ɛn ɔda tin dɛn fɔ mek wi go ebul fɔ prich to pipul dɛn we de tɔk difrɛn langwej dɛn. Fɔ ɛgzampul, insay 2010, wi buk ɛn magazin dɛn bin de insay lɛk 500 langwej dɛn. Tide, di nɔmba dɔn go ɔp, naw i de insay pas 1,000 langwej dɛn!

12. Aw pipul dɛn kin bɛnifit we dɛn yɛri di Kiŋdɔm mɛsej insay dɛn langwej? Gi wan ɛgzampul.

¹² Aw pipul dɛn kin fil we dɛn de lan bɔt Jiova insay dɛn langwej? Lɛ wi tɔk bɔt wan sista we bin bɛnifit frɔm wan kɔnvɛnshɔn we i bin atɛnd na Mɛmfis, Tɛnɛsi, insay Amɛrika.  Di langwej we dɛn tɔk na di kɔnvɛnshɔn na Kinyaruwanda. Di men say dɛn we dɛn de tɔk dis langwej na Ruwanda, Kongo (Kinshasa), ɛn Yuganda. Afta di kɔnvɛnshɔn, dis sista bin se: “Na di fɔs tɛm dis we a dɔn ɔndastand ɔltin we dɛn tɔk na kɔnvɛnshɔn insay di 17 ia we a dɔn de na Amɛrika.” Dis sista bin rili gladi we i lisin to di program insay in langwej. Yu go ebul fɔ lan ɔda langwej fɔ ɛp pipul dɛn we de na yu tɛritri? Yu tink se dis go fayn if i bi se bɔku pipul dɛn na yu tɛritri lɛk fɔ tɔk ɔda langwej? Yu go rili gladi if yu tray tranga wan fɔ du dis.

13. Wetin wi brɔda dɛn na Rɔshia bin du di tɛm we pis de?

¹³ Na sɔm kɔntri dɛn, wi brɔda dɛn nɔ gɛt fridɔm fɔ prich bikɔs di gɔvmɛnt dɔn ban di prichin wok. Fɔ ɛgzampul, tink bɔt wi brɔda dɛn na Rɔshia. Dɛn bin mek dɛn sɔfa fɔ lɔng tɛm, bɔt insay Mach 1991, di gɔvmɛnt bin gi dɛn fridɔm fɔ wɔship Jiova. Da tɛm de, na bin lɛk 16,000 Jiova Witnɛs dɛn bin de na Rɔshia. Afta 20 ia, di nɔmba bin pas 160,000. So wi brɔda dɛn bin sho se dɛn gɛt sɛns di tɛm we dɛn bin gɛt fridɔm fɔ prich. Pan ɔl we da fridɔm de nɔ bin las fɔ lɔng, wi brɔda dɛn stil gɛt zil fɔ sav Jiova. Dɛn de kɔntinyu fɔ du ɔl wetin dɛn ebul fɔ sav am.

14-15. Aw Jiova bin yuz in pawa fɔ ɛp Esa?

¹⁴ Pis nɔ bin kɔntinyu fɔ de insay Esa in tɛm. I pas wan milyɔn fɛtman dɛn we bin kɔmɔt Itiopia fɔ kam fɛt dɛn. Dɛn kɔmanda we na Zera bin biliv tranga  wan se in ɛn in fɛtman dɛn go win Juda pan fɛt. Kiŋ Esa nɔ bin abop pan in fɛtman dɛn, bɔt i bin abop pan in Gɔd, Jiova. I bin pre to Jiova ɛn se: “Duya PAPA GƆD [“Jiova,” NWT] we na wi Gɔd, ɛp wi, bikɔs na yu wi abop pan, na insay yu nem wi kam fɔ fɛt dɛn bɔku bɔku pipul dɛn ya.”—2 Kro. 14:​11.

¹⁵ Pan ɔl we di Itiopian fɛtman dɛn bin dɔbul Esa in yon fɛtman dɛn, Esa bin no se Jiova gɛt pawa ɛn I no wetin fɔ du fɔ ɛp In pipul dɛn. Jiova nɔ bin disapɔynt Esa, I bin mek i win di Itiopian fɛtman dɛn.—2 Kro. 14:​8-13.

16. Aw wi no se di pis we wi gɛt naw nɔ go de sote go?

¹⁶ Wi nɔ no ɔl wetin gɛt fɔ apin to wi tumara bambay, bɔt wi no se di pis we Jiova in savant dɛn gɛt naw nɔ go de sote go. Infakt, Jizɔs bin se “dɛn go et [in disaypul dɛn] na ɔl di neshɔn dɛn.” (Mat. 24:​9) Apɔsul Pɔl bak bin se “ɔl di wan dɛn we want fɔ fetful to Gɔd ɛn we gɛt wanwɔd wit Krays Jizɔs, pipul dɛn go mek dɛnsɛf sɔfa.” (2 Tim. 3:​12) Setan “vɛks bad bad wan,” ɛn wi go ful wisɛf if wi tink se wi go ebul du sɔntin we go mek i nɔ pul in wamat pan wi.—Rɛv. 12:​12.

17. Wetin go apin we sɔntɛm go tɛst wi fet?

¹⁷ I nɔ go te igen, tin go mit wi ɔl we go tɛst wi fet. Di “big big trɔbul we nɔ wande apin frɔm we Gɔd mek di wɔl te naw,” go kam jisnɔ. (Mat. 24:​21) We da tɛm de rich, sɔntɛm wi fambul dɛn go tɔn agens wi, ɛn di gɔvmɛnt dɛn go ban wi wok. (Mat. 10:​35, 36) Wi go tan lɛk Esa we bin abop pan Jiova fɔ ɛp am?

18. Akɔdin to Ibruz 10:​38, 39, wetin go ɛp wi fɔ rɛdi fɔ di tɛm we pis nɔ go de?

¹⁸ Jiova de ɛp wi fɔ gɛt strɔng fet so dat wi go rɛdi fɔ wetin gɛt fɔ apin tumara bambay. I de ɛp di “slev we fetful ɛn gɛt sɛns” fɔ gi wi “it di rayt tɛm” so dat wi go gɛt ɔl wetin wi nid fɔ gɛt strɔng fet. (Mat. 24:​45) Bɔt wisɛf nid fɔ tray tranga wan fɔ gɛt strɔng fet pan Jiova.—Rid Ibruz 10:​38, 39.

19-20. Akɔdin to Fɔs Kronikul 28:​9, us kwɛstyɔn dɛn wi fɔ aks wisɛf? Wetin mek?

 ¹⁹ Jɔs lɛk Kiŋ Esa, wi nid fɔ “fɛnɔt wetin [“Jiova,” NWT] want.” (2 Kro. 14:​4; 15:​1, 2) Wi go sho se wi de tray fɔ no wetin Jiova want bay we wi lan bɔt am ɛn baptayz. Wi de du ɔl wetin wi ebul fɔ mek wi lɛk Jiova mɔ ɛn mɔ. Ɛn fɔ lɛ wi no if wi rili lɛk Jiova, wi fɔ aks wisɛf dis kwɛstyɔn: ‘A kin atɛnd mitin ɔltɛm?’ Di mitin dɛn de ɛp wi fɔ kɔntinyu fɔ sav Jiova ɛn fɔ gɛt ɛnkɔrejmɛnt frɔm wi brɔda ɛn sista dɛn. (Mat. 11:​28) Wi kin aks wisɛf dɛn ɔda kwɛstyɔn dɛn ya: ‘A de stɔdi di Baybul ɔltɛm?’ If yu de wit yu famili, una kin du famili wɔship ɛvri wik? Ɔ ilɛksɛf na yu wan de, yu kin stil mek tɛm fɔ stɔdi lɛk se yu de wit yu famili? Dɔn, yu kin du yu bɛst fɔ prich to ɔda pipul dɛn ɛn tich dɛn bɔt Jiova?’

²⁰ Wetin mek wi fɔ aks wisɛf dɛn kwɛstyɔn dɛn de? Di Baybul se Jiova de luk wetin de insay wi at ɛn wetin wi de tink bɔt, so wisɛf fɔ du di sem tin. (Rid Fɔs Kronikul 28:​9.) If wi si se wi nid fɔ chenj wi gol dɛn, di we aw wi de biev, ɔ wetin wi de tink bɔt, wi fɔ beg Jiova lɛ i ɛp wi fɔ mek dɛn chenj dɛn de. Na naw wi fɔ rɛdi wisɛf fɔ ɛnitin we go tɛst wi fet. Nɔ alaw ɛnitin fɔ stɔp yu fɔ mek yu nɔ sho se yu gɛt sɛns di tɛm we pis de.