1. Aw pɔsin kin fil we dɛn disfɛloship pɔsin we i lɛk?

 DƐN dɔn ɛva disfɛloship pɔsin we yu lɛk? Dat kin rili mek wi at pwɛl. Wan sista we nem Ilda se, “We mi man day afta wi bin dɔn mared fɔ 41 ia, a bin fil se dat na di wɔs tin we dɔn ɛva apin to mi. * Bɔt we mi bɔypikin lɛf di kɔngrigeshɔn, in wɛf, ɛn in pikin dɛn, dat bin wɔs fa fawe pas di tɛm we mi man day.”

2-3. Akɔdin to Sam 78:​40, 41 (NWT), aw Jiova kin fil we in savant stɔp fɔ sav am?

² Tink bɔt aw Jiova in at go dɔn pwɛl we sɔm pan di enjɛl dɛn we bin de na in famili, bin tɔn dɛn bak pan am. (Jud 6) Ɛn imajin aw in at go dɔn pwɛl bak we i si in pipul dɛn we i bin lɛk, we na di Izrɛlayt dɛn, de tɔn dɛn bak pan am igen ɛn igen. (Rid Sam 78:​40, 41, NWT.) Mɛmba se wi Papa we de na ɛvin, we lɛk wi, insɛf kin rili fil am we pɔsin we yu lɛk stɔp fɔ sav am. I de ɔndastand di pen we yu de fil. Bikɔs i gɛt sɔri-at, i go gi yu di kɔrej ɛn sɔpɔt we yu nid.

³ Insay dis atikul, wi go tɔk bɔt wetin wi go du fɔ gɛt ɛp frɔm Jiova we pɔsin we wi lɛk stɔp fɔ sav Am. Wi go tɔk bak bɔt aw wi go ebul ɛp ɔda pipul dɛn na di kɔngrigeshɔn we gɛt fambul we dɔn disfɛloship. Bɔt fɔs, lɛ wi tɔk bɔt di rɔng we aw wi nɔ fɔ tink.

4. Aw bɔku mama ɛn papa dɛn kin fil we dɛn pikin stɔp fɔ sav Jiova?

⁴ We pikin lɛf fɔ sav Jiova, bɔku tɛm in mama ɛn papa dɛn kin tink se dɛn bin fɔ dɔn du mɔ fɔ ɛp dɛn pikin fɔ  kɔntinyu fɔ sav Jiova. Afta wan brɔda we nem Lyuk in bɔypikin bin disfɛloship, Lyuk bin se: “A bin blem misɛf. A bin ivin de gɛt bad drim dɛn bɔt dat. Sɔntɛnde, a bin de kray ɛn mi at bin rili pwɛl.” Wan sista we nem Ilizabɛt, we in bɔypikin sɛf bin disfɛloship, bin de tink ɔltɛm to insɛf se: “Sɔntɛm a mek bɔku mistek dɛn as mama. A bin fil se a nɔ du ɔl wetin a fɔ du fɔ tich mi pikin fɔ lɛk Jiova.”

5. Udat fɔ blem we pɔsin stɔp fɔ sav Jiova?

⁵ Wi nid fɔ mɛmba se Jiova dɔn gi wan gift to ɔlman, we na di fridɔm fɔ disayd wetin wi want fɔ du. Dis min se i lɛf to wi fɔ disayd if wi go obe am ɔ wi nɔ go obe am. Sɔm pikin dɛn nɔ bin gɛt mama ɛn papa dɛn we sɛt gud ɛgzampul fɔ dɛn, bɔt dɛn dɔn disayd fɔ sav Jiova ɛn kɔntinyu fɔ fetful to am. Ɔda wan dɛn bin gɛt mama ɛn papa dɛn we tray tranga wan fɔ tich dɛn fɔ lɛk Jiova, bɔt leta dɛn stɔp fɔ sav Am. So, wi ɔl fɔ disayd fɔ wisɛf if wi go sav Jiova. (Jɔs. 24:​15) So mama ɛn papa dɛn, if una at pwɛl bikɔs una pikin dɔn stɔp fɔ sav Jiova, una nɔ tink se dat na una fɔlt.

6. Aw yɔŋ pipul dɛn kin fil we dɛn mama ɔ papa stɔp fɔ sav Gɔd?

⁶ Sɔntɛnde, sɔm mama ɛn papa dɛn kin stɔp fɔ sav Jiova ɛn ivin lɛf dɛn famili. (Sam 27:​10) If i bi se dɛn pikin dɛn bin de rɛspɛkt ɛn kɔle dɛn, dis tin we dɛn du kin rili mek dɛn pikin dɛn at pwɛl. We wan sista we nem Ɛsta in papa bin disfɛloship, i se: “A bin de kray ɔltɛm bikɔs a bin no se i nɔ jɔs de lɛf di trut smɔl smɔl, bɔt na in bin dɔn disayd se i nɔ want fɔ sav Jiova igen. A lɛk mi papa, so we dɛn disfɛloship am, a bin de wɔri bɔt am ɔltɛm. A bin de ivin gɛt panik-atak.”

7. Aw Jiova de fil bɔt yɔŋ pɔsin we in mama ɔ papa disfɛloship?

⁷ Yɔŋ wan dɛn, if una mama ɔ papa dɔn disfɛloship, wisɛf de rili fil am fɔ una. Duya mɛmba se Jiova rili no yu pen. I lɛk yu, ɛn i gladi we yu de kɔntinyu fɔ sav am fetful wan. Ɛn wi, yu brɔda ɛn sista dɛn na di kɔngrigeshɔn, rili gladi fɔ yu. Mɛmba bak se di tin we yu mama ɔ papa disayd nɔto yu fɔlt. Jɔs lɛk aw wi bin dɔn tɔk, Jiova dɔn gi ɔlman di fridɔm fɔ disayd if i go sav Am ɔ i nɔ go sav Am. Ɛn ɔlman we dɔn gi in layf to Jiova ɛn baptayz fɔ “tot in yon lod.”—Gal. 6:​5.

8. Wetin disfɛloship pɔsin in famili we stil de sav Jiova go du di tɛm we dɛn de wet fɔ lɛ i kam bak to Jiova? (Rid bak di bɔks we nem, “ Kam Bak to Jiova.”)

⁸ We pɔsin we yu lɛk stɔp fɔ sav Jiova, i nɔmal fɔ lɛ yu kɔntinyu fɔ abop se i go kam bak to Am. Bɔt wetin yu go du di tɛm we yu de wet fɔ lɛ i kam bak to Jiova? Du ɔl wetin yu ebul fɔ mek yu kɔntinyu fɔ gɛt strɔng fet. We yu du dat, yu go sɛt fayn ɛgzampul fɔ di ɔda wan dɛn na yu famili, ɛn sɔntɛm fɔ di pɔsin we disfɛloship. Dɔn bak, yu go gɛt di trɛnk we yu nid fɔ bia yu pen. So,  wetin yu go du fɔ mek yu kɔntinyu fɔ gɛt strɔng fet?

9. Wetin yu go du fɔ lɛ yu kɔntinyu fɔ gɛt strɔng fet? (Rid bak di bɔks we nem, “ Skripchɔ dɛn we Go Ɛnkɔrej Yu if Pɔsin we Yu Lɛk Dɔn Stɔp fɔ Sav Jiova.”)

⁹ Du ɔl wetin yu ebul fɔ kɔntinyu fɔ gɛt strɔng fet. I rili impɔtant fɔ lɛ yu kɔntinyu fɔ ɛp yusɛf ɛn di ɔda wan dɛn na yu famili. Aw yu go du dat? Alaw Jiova fɔ gi yu trɛnk bay we yu de kɔntinyu fɔ rid in Wɔd, tink gud wan bɔt am, ɛn atɛnd di mitin dɛn ɔltɛm. Wan sista we nem Joana, we in papa ɛn in sista dɔn lɛf di trut se: “We a de rid bɔt pipul dɛn na di Baybul lɛk Abigɛl, Ɛsta, Job, Josɛf, ɛn Jizɔs, dat de mek a nɔ de wɔri tumɔs. Dɛn ɛgzampul de ɛnkɔrej mi ɛn ɛp mi fɔ tink di rayt we. Wi orijinal siŋ dɛn bak kin rili ɛnkɔrej mi.”

10. Aw Sam 32:​6-8 (NWT) de ɛp wi fɔ bia we wi at pwɛl?

¹⁰ Tɛl Jiova bɔt ɔl wetin de mek yu wɔri. Ɛnitɛm we yu at pwɛl, nɔ stɔp fɔ pre to am. Beg wi Gɔd we gɛt lɔv fɔ ɛp yu si tin di we aw i de si am ɛn fɔ “gi yu sɛns ɛn sho yu usay yu fɔ go.” (Rid Sam 32:​6-8 NWT.) Na tru se i nɔ go izi fɔ tɛl Jiova aw yu de rili fil. Bɔt Jiova rili ɔndastand di pen we yu de fil. I lɛk yu pasmak, ɛn i de ɛnkɔrej yu fɔ tɛl am ɔl wetin de na yu at.—Ɛks. 34:​6; Sam 62:​7, 8.

11. Akɔdin to Ibruz 12:​11, wetin mek wi fɔ biliv se na di rayt we Jiova de kɔrɛkt wi? (Rid bak di bɔks we nem, “ Fɔ Disfɛloship Pɔsin De Sho se Jiova Lɛk Wi.”)

¹¹ Sɔpɔt wetin di ɛlda dɛn dɔn disayd. Fɔ disfɛloship pɔsin, na wan fayn we aw  Jiova de kɔrɛkt wi bikɔs i lɛk wi. Dis na di bɛst we aw i de ɛp ɔlman, ivin di wan we dɔn lɛf fɔ sav am. (Rid Ibruz 12:​11.) Sɔntɛm sɔm pipul dɛn na di kɔngrigeshɔn go tɔk se we di ɛlda dɛn disfɛloship pɔsin, dat nɔto di rayt tin fɔ du. Bɔt mɛmba se bɔku tɛm, dɛn pipul dɛn de nɔ kin want fɔ tɔk bad tin bɔt di pɔsin we dɔn stɔp fɔ sav Jiova. Di simpul tin na dat wi nɔ no ɔl wetin apin. So i mek sɛns fɔ lɛ wi trɔst di ɛlda dɛn we de na di judishal kɔmiti, bikɔs dɛn bin tek tɛm du wetin di Baybul se ɛn dɛn jɔj “fɔ PAPA GƆD [“Jiova,” NWT].”—2 Kro. 19:​6.

12. Us gud tin dɛn dɔn apin we sɔm pipul dɛn sɔpɔt Jiova in arenjmɛnt fɔ kɔrɛkt wi?

¹² We yu sɔpɔt di tin we di ɛlda dɛn disayd, we na fɔ disfɛloship pɔsin we yu lɛk, sɔntɛm yu go ɛp am fɔ kam bak to Jiova. Ilizabɛt, we wi bin dɔn tɔk bɔt se, “I bin rili at fɔ lɛ wi nɔ tɔk to wi big bɔypikin atɔl.” Ilizabɛt tɔk bak se, “Bɔt afta i kam bak to Jiova, i tɔk se i bin bɛtɛ we dɛn disfɛloship am. Leta, i se i bin dɔn lan bɔku fayn lɛsin dɛn. Misɛf lan se na di rayt we Jiova kin kɔrɛkt wi ɔltɛm.” Ilizabɛt in man, we nem Mak, insɛf tɔk se: “Afta lɔng tɛm, wi pikin tɛl wi se wan pan di rizin dɛn we bin mek i want fɔ kam bak na we wi nɔ bin de spɛn tɛm wit am atɔl. A rili gladi we Jiova ɛp wi fɔ obe Am.”

13. Wetin go ɛp yu we yu at rili pwɛl?

¹³ Tɔk to padi dɛn we ɔndastand aw yu de fil. Spɛn tɛm wit ɛkspiriɛns brɔda ɛn sista dɛn we go ɛp yu nɔ fɔ giv-ɔp. (Prɔv. 12:​25; 17:​17, NWT) Joana, we wi bin dɔn tɔk bɔt, se: “Insay mi at, a bin de fil se na mi wangren de. Bɔt we a tɔk to mi padi dɛn we a trɔst, dat bin ɛp mi fɔ bia.” Bɔt wetin yu go du if sɔm brɔda ɛn sista dɛn na di kɔngrigeshɔn se sɔntin to yu we mek yu fil bad mɔ ɛn mɔ?

14. Wetin mek wi nid fɔ “kɔntinyu fɔ bia [wi] kɔmpin dɛn ɛn fɔgiv dɛn fɔ fri”?

¹⁴ Peshɛnt wit yu brɔda ɛn sista dɛn. Wi nɔ fɔ ɛkspɛkt se ɔlman go se di rayt tin ɔltɛm. (Jems 3:​2) Wi ɔl nɔ pafɛkt, so nɔ sɔprayz if sɔm nɔ no wetin fɔ se ɔ if dɛn se sɔntin we mek yu fil bad pan ɔl we dɛn nɔ min fɔ du so. Mɛmba Pɔl in advays. I se: “Una kɔntinyu fɔ bia una kɔmpin dɛn ɛn fɔgiv dɛn fɔ fri ivin if una gɛt rizin fɔ vɛks pan dɛn.” (Kol. 3:​13) Wan sista we in bɔypikin bin disfɛloship tɔk se: “Jiova dɔn ɛp mi fɔ fɔgiv brɔda ɛn sista dɛn we bin tray fɔ ɛnkɔrej mi bɔt we se sɔntin we mɔna mi.” Wetin di kɔngrigeshɔn go du fɔ ɛp fetful wan dɛn na di famili?

15. Wetin wi go du fɔ ɛp di ɔda wan dɛn na di famili we pɔsin we dɛn lɛk dɔn disfɛloship dis biɛn tɛm?

¹⁵ Du gud ɛn bi padi to di ɔda wan dɛn na di famili we de sav Jiova fetful wan. Wan sista we nem Miriam tɔk se i bin  de wɔri fɔ go na mitin afta i brɔda bin disfɛloship. I se: “A bin de fred bɔt wetin pipul dɛn go se. Bɔt bɔku brɔda ɛn sista dɛn bin de we dɛn at bin rili pwɛl fɔ wetin apin. Ɛn dɛn nɔ bin se ɛni bad tin bɔt mi brɔda. A de tɛl dɛn tɛnki bikɔs nɔto mi wangren bin fil di pen.” Wan ɔda sista tɔk se: “Afta wi bɔypikin disfɛloship, wi padi dɛn we lɛk wi bin kam fɔ kɔrej wi. Sɔm bin tɛl wi se dɛn nɔ no wetin fɔ se. Dɛn bin kray wit mi ɛn ɔda wan dɛn bin sɛn lɛta fɔ ɛnkɔrej mi. Wetin dɛn bin du bin rili ɛp mi.”

16. Aw di kɔngrigeshɔn go kɔntinyu fɔ kɔrej ɛn ɛp di wan dɛn we dɛn fambul disfɛloship?

¹⁶ Kɔntinyu fɔ sɔpɔt di ɔda wan dɛn na di famili we de sav Jiova fetful wan. Dɛn nid yu lɔv ɛn ɛnkɔrejmɛnt dis tɛm pas ɛni ɔda tɛm. (Ibru. 10:​24, 25) Sɔntɛnde, pɔsin we disfɛloship in famili dɔn notis se sɔm na di kɔngrigeshɔn nɔ de tɔk to dɛn igen, lɛk se dɛnsɛf disfɛloship. Wi nɔ want dɛn fɔ fil da we de. Wi fɔ ɛnkɔrej yɔŋ wan dɛn we dɛn mama ɛn papa dɔn stɔp fɔ sav Jiova, ɛn tɛl dɛn tɛnki. Wan sista we nem Maria, we in man bin disfɛloship ɛn lɛf di famili, tɔk se: “Sɔm pan mi padi dɛn kam na os ɛn kuk fɔ mi ɛn ɛp mi fɔ stɔdi wit mi pikin dɛn. Dɛn bin fil mi pen ɛn kray wit mi. Dɛn bin tɔk fɔ mi we pipul dɛn bin de lay pan mi. Dɛn bin rili ɛnkɔrej mi.”—Rom. 12:​13, 15.

17. Wetin ɛlda dɛn go du fɔ ɛnkɔrej di wan dɛn we dɛn at pwɛl?

¹⁷ Ɛlda dɛn, una yuz ɛni chans we una go gɛt fɔ ɛnkɔrej di ɔda wan dɛn na di famili we de sav Jiova fetful wan. Una gɛt spɛshal wok fɔ ɛnkɔrej una kɔmpin Kristian dɛn we dɛn fambul dɔn stɔp fɔ sav Jiova. (1 Tɛs. 5:​14) Fɔ ɛnkɔrej dɛn, tɔk to dɛn bifo ɛn afta di mitin dɛn. Go fɛn dɛn na dɛn os ɛn pre fɔ dɛn. Wok wit dɛn na fil savis, ɔ sɔntɛnde, invayt dɛn fɔ jɔyn yu fɔ famili wɔship. Ɛlda dɛn nid fɔ kia fɔ di wan dɛn we dɛn at pwɛl, ɛn sho dɛn di sɔri-at ɛn lɔv we dɛn nid.—1 Tɛs. 2:​7, 8.

18. Akɔdin to 2 Pita 3:​9, wetin Gɔd want di wan dɛn we dɔn stɔp fɔ sav am fɔ du?

¹⁸ Jiova “nɔ want fɔ dɔnawe wit ɛnibɔdi, i want mek ɔlman ripɛnt.” (Rid 2 Pita 3:​9.) Pan ɔl we pɔsin go kɔmit siriɔs sin, in layf stil valyu to Gɔd. Mɛmba se Jiova dɔn pe ay prayz fɔ wi ɔl, we na in Pikin we i lɛk, in layf. Jiova de tray fɔ ɛp di wan dɛn we dɔn lɛf am fɔ kam bak to am. I op se dɛn go disayd fɔ du dat, as wi kin lan frɔm Jizɔs in parebul bɔt di bɔypikin we bin lɔs. (Lyuk 15:​11-32) Bɔku pan di wan dɛn we bin dɔn lɛf di trut, dɔn kam bak to dɛn Papa we de na ɛvin, we lɛk dɛn. Ɛn di brɔda ɛn sista dɛn bin gladi fɔ wɛlkɔm dɛn bak. Ilizabɛt, we wi bin dɔn tɔk bɔt, bin gladi we in bɔypikin bin kam bak to Jiova. We i bin de tink bɔt wetin apin, i se, “A rili gladi we bɔku brɔda ɛn sista dɛn bin ɛnkɔrej wi nɔ fɔ giv-ɔp.”

19. Wetin mek wi fɔ kɔntinyu fɔ abop pan Jiova?

¹⁹ Wi kin abop pan Jiova ɔltɛm. In advays kin ɛp wi ɔltɛm. In na Papa we gɛt fri-an ɛn sɔri-at, ɛn i rili lɛk ɔl di wan dɛn we lɛk am ɛn we de wɔship am. Mɛmba se Jiova nɔ go lɛf yu di tɛm we yu at pwɛl. (Ibru. 13:​5, 6) Mak, we wi bin dɔn tɔk bɔt, bin se, “Jiova nɔ ɛva lɛf wi. I go ɛp wi ɔltɛm we wi gɛt prɔblɛm.” Jiova go kɔntinyu fɔ gi yu “di pawa we pas mɔtalman in yon.” (2 Kɔr. 4:​7) Fɔ tru, yu go ebul fɔ kɔntinyu fɔ fetful ɛn gɛt op ivin we yu fambul stɔp fɔ sav Jiova.