STƆDI ATIKUL 40
“Ɛp Bɔku Pipul dɛn fɔ Du Wetin Rayt”
“Di wan dɛn we de ɛp bɔku pipul dɛn fɔ du wetin rayt go tan lɛk di sta dɛn, sote go.”—DAN. 12:3, NWT.
SIŊ 151 Gɔd Go Kɔl Dayman Dɛn
WETIN WI GO LAN? *
1. Us wɔndaful tin dɛn go apin insay Krays in Wan Tawzin Ia Rul?
I GO rili wɔndaful we di wan dɛn we dɔn day go gɛt layf bak na di wɔl di tɛm fɔ Krays in Wan Tawzin Ia Rul! Ɔl di wan dɛn we dɔn lɔs pipul dɛn we dɛn lɛk rili want fɔ si dɛn bak. Na da sem we de Jiova sɛf de fil. (Job 14:15) Imajin aw ɔlman go gladi ɔlsay na di wɔl we di wan dɛn we dɛn lɛk go gɛt layf bak. Lɛk aw wi bin dɔn lan na di atikul bifo dis wan, “di wan dɛn we du wetin rayt,” we dɛn nem dɛn de na di buk we de sho se pɔsin go gɛt layf, go “gɛt layf bak fɔ liv.” (Akt 24:15; Jɔn 5:29) Sɔntɛm bɔku pan di wan dɛn we wi lɛk go de pat pan di fɔs wan dɛn we go gɛt layf bak na dis wɔl. * Dɔn bak, “di wan dɛn we nɔ du wetin rayt,” lɛk di wan dɛn we nɔ bin gɛt bɛtɛ chans fɔ no Jiova ɔ fɔ sav am bifo dɛn day, go “gɛt layf bak fɔ mek dɛn jɔj dɛn.”
2-3. (a) Akɔdin to Ayzaya 11:9, 10, wetin wi go tich pipul dɛn we wi de du di tichin wok we dɛn nɔ ɛva du na di wɔl? Wetin mek? (b) Wetin wi go tɔk bɔt insay dis atikul?
2 Ɔl di wan dɛn we go gɛt layf bak go nid fɔ mek dɛn tich dɛn. (Ayz. 26:9; 61:11) So wi go nid fɔ du di big tichin wok we dɛn nɔ ɛva du na di wɔl. (Rid Ayzaya 11:9, 10.) Wetin mek? Wan rizin na bikɔs di wan dɛn we nɔ du wetin rayt we go gɛt layf bak go nid fɔ lan bɔt Jizɔs Krays, Gɔd in Kiŋdɔm, di day we Jizɔs day fɔ wi, di we aw Jiova in nem impɔtant ɛn wetin mek na in nɔmɔ gɛt di rayt fɔ rul. Ivin di wan dɛn we du wetin rayt go nid fɔ lan bɔt wetin Jiova dɔn du smɔl smɔl fɔ tich in pipul dɛn bɔt wetin i want fɔ di wɔl. Sɔm pan dɛn fetful wan dɛn ya bin day lɔng lɔng tɛm bifo dɛn rayt di Baybul dɔn. So di wan dɛn we du wetin rayt ɛn di wan dɛn we nɔ du wetin rayt go gɛt bɔku tin dɛn fɔ lan.
3 Insay dis atikul, wi go tɔk bɔt dɛn kwɛstyɔn dɛn ya: Aw wi go du dis big big tichin wok? Wetin go apin to pipul dɛn if dɛn lisin to wetin dɛn de lan? Wetin go apin if dɛn nɔ lisin? Di ansa dɛn to dɛn kwɛstyɔn dɛn ya rili impɔtant to wi tide. As wi go si, sɔm fayn fayn prɔfɛsi dɛn we de na di Baybul buk dɛn we nem Daniɛl ɛn Rɛvɛleshɔn go ɛp wi fɔ ɔndastand klia wan wetin go apin we di wan dɛn we dɔn day go gɛt layf bak. Fɔs, lɛ wi tɔk bɔt di fayn tin we di prɔfɛsi na Daniɛl 12:1, 2 (NWT) tɔk bɔt.
“PIPUL DƐN WE DE SLIP NA DI DƆTI . . . GO WEK”
4-5. Wetin Daniɛl 12:1 (NWT) tɔk bɔt di tɛm we di ɛnd go kam?
4 Rid Daniɛl 12:1, NWT. Di Baybul buk we nem Daniɛl tɔk bɔt di we aw di fayn tin dɛn we go apin insay di tɛm we di ɛnd go kam go apin wan bay wan. Fɔ ɛgzampul, Daniel 12:1 (NWT) tɔk se Maykɛl, we na Jizɔs Krays, de “tinap fɔ [Gɔd in] pipul dɛn.” Da pat de pan di prɔfɛsi bigin fɔ apin insay 1914 we Gɔd pik Jizɔs fɔ bi Kiŋ na di Kiŋdɔm ɔp ɛvin.
5 Bɔt di enjɛl bin tɛl Daniɛl bak se Jizɔs go “tinap” insay di “tɛm . . . we trɔbul go de.” I go bi “di kayn we nɔ wande bi yet frɔm we neshɔn bigin fɔ de, te da tɛm de.” Dis “trɔbul” na di “big big trɔbul” we Matyu 24:21 tɔk bɔt. Jizɔs go tinap, ɔ fɛt fɔ Gɔd in pipul dɛn di tɛm we dis trɔbul go dɔn, dat na Amagɛdɔn. Di Baybul buk we nem Rɛvɛleshɔn kɔl dɛn pipul dɛn ya di bɔku bɔku pipul dɛn we “kɔmɔt pan di big big trɔbul.”—Rɛv. 7:9, 14.
6. Wetin go apin afta di bɔku bɔku pipul dɛn go sev di tɛm fɔ di big big trɔbul? Ɛksplen. (Rid bak di atikul na dis Wachtawa we nem “Kwɛstyɔn dɛn we Pipul dɛn Kin Aks,” we tɔk bɔt di layf we pipul dɛn go gɛt bak na dis wɔl.)
6 Rid Daniɛl 12:2, NWT. Wetin go apin afta di bɔku bɔku pipul dɛn go sev dis tɛm we trɔbul go de? Trade, wi bin ɔndastand se Daniɛl 12:2 (NWT) de tɔk bɔt di bɔku wok dɛn we wi de du afta i bin lɛf smɔl fɔ lɛ dɛn stɔp wi prichin wok insay 1918. * Bɔt naw, wi ɔndastand se dɛn wɔd dɛn ya de tɔk bɔt di layf we di wan dɛn we dɔn day go gɛt bak na di nyu wɔl we de kam. Wetin mek wi se so? Di wɔd dɛn “di dɔti” de bak na Job 17:16 ɛn i min “di Grev.” Bikɔs “di dɔti” min “di Grev,” dat min se Daniɛl 12:2 (NWT) go mɔs de tɔk bɔt di layf we pipul dɛn go gɛt bak afta di las dez dɔn ɛn afta Amagɛdɔn.
7. (a) Wetin di Baybul min we i se sɔm pipul dɛn go gɛt layf bak fɔ mek dɛn “de te go”? (b) Aw dis layf we dɛn go gɛt bak “go bɛtɛ” pas di ɔda wan dɛn yon?
7 Bɔt wetin Daniɛl 12:2 (NWT) min we i se we sɔm pipul dɛn gɛt layf bak, dɛn “go de te go”? I min se di wan dɛn we go gɛt layf bak ɛn we go no, ɔ kɔntinyu fɔ no, ɛn obe Jiova ɛn Jizɔs insay di 1,000 ia go leta gɛt layf we go de sote go. (Jɔn 17:3) Dis layf we dɛn go gɛt bak “go bɛtɛ” pas di wan we sɔm pipul dɛn bin gɛt bak trade. (Ibru. 11:35) Wetin mek? Na bikɔs dɛn pipul dɛn de we bin gɛt layf bak trade bin leta day.
8. Aw ɔda wan dɛn go gɛt layf bak fɔ mek dɛn go “shem ɛn . . . et dɛn sote go”?
8 Bɔt nɔto ɔl di wan dɛn we go gɛt layf bak go want fɔ mek Jiova tich dɛn. Daniɛl in prɔfɛsi tɔk se sɔm dɛn go gɛt layf bak fɔ mek dɛn “go shem ɛn . . . et dɛn sote go.” Bikɔs dɛn go sho se dɛn nɔ want fɔ tek kɔntrol, dɛn nem dɛn nɔ go de na di buk we de sho se pɔsin go gɛt layf, ɛn dɛn nɔ go gɛt layf we go de sote go. Bifo dat, dɛn go “et dɛn sote go,” ɔ dɔnawe wit dɛn. So Daniɛl 12:2 (NWT) de tɔk bɔt wetin go faynali apin to ɔl di wan dɛn we go gɛt layf bak, ɛn na wetin dɛn du afta dɛn gɛt layf bak dɛn go yuz fɔ jɔj dɛn. * (Rɛv. 20:12) Sɔm dɛn go gɛt layf we go de sote go, ɛn ɔda wan dɛn nɔ go gɛt.
“ƐP BƆKU PIPUL DƐN FƆ DU WETIN RAYT”
9-10. Akɔdin to Daniɛl 12:3 (NWT), wetin bak go apin afta di big big trɔbul go kam? Udat dɛn “go shayn lɛk di skay”?
9 Rid Daniɛl 12:3, NWT. Wetin bak go apin afta di “tɛm . . . we trɔbul go de”? Apat frɔm wetin de na Daniɛl 12:2 (NWT), vas 3 tɔk bɔt sɔntin we go apin afta di tɛm we da big big trɔbul go kam.
10 Udat dɛn “go shayn lɛk di skay”? Di wɔd dɛn we Jizɔs tɔk na Matyu 13:43 go ɛp wi fɔ no. I se: “Da tɛm de, di wan dɛn we de du wetin rayt go shayn brayt brayt wan lɛk di san na dɛn Papa in Kiŋdɔm.” Frɔm wetin Jizɔs bin tɔk na di vas dɛn bifo dis wan, wi si se Jizɔs bin de tɔk bɔt “di wan dɛn we de go na di Kiŋdɔm,” we na in anɔyntɛd brɔda dɛn, we go rul wit am na di Kiŋdɔm we de na ɛvin. (Mat. 13:38) So Daniɛl 12:3 (NWT) go mɔs de tɔk bɔt di anɔyntɛd dɛn ɛn di wok we dɛn go du insay di Wan Tawzin Ia Rul.
Di 144,000 go wok wit Jizɔs Krays fɔ dayrɛkt di tichin wok we go apin insay di 1,000 ia (Luk na paregraf 11)
11-12. Us wok di 144,000 go de du insay di 1,000 ia?
11 Aw di anɔyntɛd dɛn go ɛp “bɔku pipul dɛn fɔ du wetin rayt”? Di anɔyntɛd dɛn go wok togɛda wit Jizɔs Krays fɔ dayrɛkt di tichin wok we go apin na dis wɔl insay di 1,000 ia. Di 144,000 nɔ go jɔs rul as kiŋ dɛn, bɔt dɛn go sav as prist dɛn. (Rɛv. 1:6; 5:10; 20:6) So, dɛn go ɛp fɔ “mɛn di neshɔn dɛn.” Smɔl smɔl, dɛn go ɛp fɔ mek mɔtalman pafɛkt bak. (Rɛv. 22:1, 2; Izi. 47:12) Dat go rili mek di anɔyntɛd dɛn gladi!
12 Udat dɛn go de pat pan “di bɔku pipul dɛn” we dɛn go ɛp fɔ du wetin rayt? Di wan dɛn we go de de go bi di wan dɛn we go gɛt layf bak ɛn di wan dɛn we nɔ day insay Amagɛdɔn wit ɛni pikin we dɛn go bɔn insay di nyu wɔl. Bay di tɛm di 1,000 ia de dɔn, ɔl di wan dɛn we go de na di wɔl go dɔn pafɛkt. So ustɛm dɛn go rayt dɛn nem dɛn sote go wit pɛn, ɛn nɔto wit pɛnsil na di buk we de sho se pɔsin go gɛt layf?
DI LAS TƐST
13-14. Wetin ɔl di pafɛkt pipul dɛn we go de na di wɔl go nid fɔ du bifo dɛn gɛt layf we go de sote go?
13 Wi nid fɔ mɛmba se jɔs bikɔs pɔsin dɔn pafɛkt nɔ min se i go gɛt layf we go de sote go wantɛm wantɛm. Tink bɔt Adam ɛn Iv. Dɛn bin pafɛkt, bɔt dɛn bin nid fɔ sho se dɛn go obe Jiova Gɔd bifo dɛn go gɛt layf we go de sote go. Ɛn i sɔri fɔ no se dɛn nɔ bin obe am.—Rom. 5:12.
14 Wetin go apin to di wan dɛn we go de na di wɔl bay di tɛm we di 1,000 ia go dɔn? Dɛn ɔl go dɔn pafɛkt. Fɔ se ɔl di pafɛkt pipul dɛn go sɔpɔt Jiova in rul sote go? Ɔ sɔm dɛn go tan lɛk Adam ɛn Iv, we pan ɔl we dɛn bin pafɛkt, dɛn nɔ bin fetful? Wi nid fɔ ansa dɛn kwɛstyɔn dɛn ya, bɔt aw?
15-16. (a) Ustɛm ɔl mɔtalman go gɛt di chans fɔ sho se dɛn de biɛn Jiova? (b) Wetin go bi di las rizɔlt fɔ dis tɛst?
15 Setan go de na prizin fɔ di 1,000 ia. Insay da tɛm de, i nɔ go ebul fɔ ful ɛnibɔdi. Bɔt we di 1,000 ia dɔn, dɛn go pul Setan kɔmɔt na in prizin. I go tray fɔ ful pafɛkt mɔtalman. Insay di tɛst, ɔl pafɛkt mɔtalman we go de na di wɔl go gɛt di chans fɔ sho klia wan if dɛn rɛspɛkt Gɔd in nem ɛn de sɔpɔt in rul. (Rɛv. 20:7-10) Wetin dɛn go du da tɛm de go sho if Jiova fɔ rayt dɛn nem sote go na di buk we de sho se pɔsin go gɛt layf.
16 Di Baybul tɛl wi se jɔs lɛk aw Adam ɛn Iv nɔ bin fetful, na so sɔm pipul dɛn nɔ go fetful, ɛn dɛn nɔ go sɔpɔt Jiova in rul. Wetin go apin to dɛn? Rɛvɛleshɔn 20:15 tɛl wi se: “Dɛn ib ɛnibɔdi we in nem nɔ rayt na di buk we de sho se pɔsin go gɛt layf, na di lek we gɛt faya.” Fɔ tru, dɛn go dɔnawe wit dɛn wan dɛn we nɔ want fɔ tek kɔntrol kpatakpata. Bɔt di bɔku pafɛkt pipul dɛn go pas dis las tɛst. Dɔn dɛn go rayt dɛn nem dɛn sote go na di buk we de sho se pɔsin go gɛt layf.
WETIN GO APIN INSAY “DI TƐM WE DI ƐND GO KAM”?
17. Wetin wan enjɛl bin tɛl Daniɛl se go apin insay wi tɛm? (Daniɛl 12:4, 8-10)
17 Wi de rili gladi we wi tink bɔt dɛn tin dɛn ya we go apin tumara bambay! Bɔt wan enjɛl bin tɛl Daniɛl sɔm impɔtant tin dɛn bɔt wi tɛm, we na “di tɛm we di ɛnd go kam.” (Rid Daniɛl 12:4, 8-10; 2 Tim. 3:1-5) Di enjɛl bin tɛl Daniɛl se: “Pipul [dɛn] go gɛt plɛnti sɛns.” Fɔ tru, na Gɔd in pipul dɛn go ɔndastand di prɔfɛsi dɛn na Daniɛl in buk gud gud wan. Di enjɛl bin tɔk bak se insay dis tɛm, “di wikɛd pipul dɛn go du mɔ wikɛd tin dɛn; ɛn nɔn pan di wikɛd pipul dɛn nɔ go ɔndastand.”
18. Wetin go apin to di wikɛd wan dɛn jisnɔ?
18 Tide, i luk lɛk se dɛn nɔ de pɔnish di wikɛd pipul dɛn fɔ di wikɛd tin dɛn we dɛn de du. (Mal. 3:14, 15) Bɔt i nɔ go te igen, Jizɔs go jɔj di wikɛd wan dɛn we tan lɛk got ɛn sɛpret dɛn frɔm di wan dɛn we tan lɛk ship. (Mat. 25:31-33) Dɛn wikɛd pipul dɛn ya nɔ go sev di tɛm fɔ da big big trɔbul, ɛn dɛn nɔ go gɛt layf bak fɔ de na di nyu wɔl. Dɛn nem dɛn nɔ go de na di ‘buk fɔ mɛmba’ we Malakay 3:16 tɔk bɔt.
19. Wetin wi fɔ du naw? Wetin mek? (Malakay 3:16-18, NWT)
19 Naw na di tɛm fɔ lɛ wi du tin dɛn we de pruv se wi nɔ de wit di wikɛd wan dɛn. (Rid Malakay 3:16-18, NWT.) Jiova de gɛda ɔl di wan dɛn we i de si as “spɛshal prɔpati,” ɔ prɔpati we i valyu. Wi rili want fɔ de pat ɔf dɛn.
I go rili fayn fɔ si Daniɛl, di wan dɛn we wi lɛk, ɛn bɔku ɔda wan dɛn “tinap” na di ples we dɛn kip fɔ dɛn na di nyu wɔl! (Luk na paregraf 20)
20. Us las prɔmis Jiova bin mek to Daniɛl? Wetin mek yu want fɔ si da prɔmis de kam tru?
20 Fɔ tru, wi de na tɛm we wɔndaful tin dɛn de apin. Bɔt tin dɛn we go mek wi kɔle mɔ go apin jisnɔ. I nɔ go te igen, wi go si we dɛn go dɔnawe wit ɔl di wikɛd tin dɛn. Afta dat, wi go si we Jiova go du wetin i prɔmis Daniɛl, we i se: “Yu go tinap na di ples we dɛn dɔn kip fɔ yu we di tɛm kam we ɔltin fɔ dɔn.” (Dan. 12:13) Yu rili want fɔ si we Daniɛl, wit ɔl di wan dɛn we yu lɛk, go “tinap” bak? If na so i bi, du yu bɛst naw fɔ kɔntinyu fɔ fetful, ɛn yu kin biliv se yu nem go kɔntinyu fɔ de na Jiova in buk we de sho se pɔsin go gɛt layf.
SIŊ 80 “Tes ɛn Si se Jiova Gud”
^ Dis atikul go ajɔst di we aw wi bin ɔndastand di big tichin wok we Daniɛl 12:2, 3 tɔk bɔt. Wi go tɔk bɔt ustɛm dis go apin ɛn udat dɛn go tek pat pan am. Wi go tɔk bak bɔt aw dis tichin wok go pripia di wan dɛn na di wɔl fɔ di las tɛst we Krays in Wan Tawzin Ia Rul go dɔn.
^ Sɔntɛm na bay tɔn pipul dɛn go gɛt layf bak, dat na, jɛnareshɔn bay jɛnareshɔn. Sɔntɛm na Jiova in savant dɛn we bin day fetful wan insay di las dez go gɛt layf bak fɔs, dɔn di jɛnareshɔn we day bifo dɛn go gɛt layf bak, ɛn na so i go kɔntinyu te ɔl di wan dɛn we Jiova de mɛmba gɛt layf bak. If na so i go bi, dat min se ɛni jɛnareshɔn go gɛt di chans fɔ wɛlkɔm di wan dɛn we dɛn bin sabi. Ilɛk wetin go apin, di Baybul se na “bay tɔn” pipul dɛn go gɛt layf bak fɔ go na ɛvin, ɛn i pɔsibul bak se na di sem we i go bi fɔ di wan dɛn we go gɛt layf bak na di wɔl.—1 Kɔr. 14:33; 15:23.
^ Dis tin we wi ɛksplen dɔn ajɔst wetin wi bin rayt na di buk we nem Pay Attention to Daniel’s Prophecy! chapta 17, ɛn di Julay 1, 1987 Wachtawa pej 21 to 25.
^ Bɔt di wɔd dɛn “di wan dɛn we du wetin rayt” ɛn “di wan dɛn we nɔ du wetin rayt” we de na Akt 24:15 ɛn di wɔd dɛn “di wan dɛn we bin du gud tin dɛn” ɛn “di wan dɛn we bin de du wikɛd tin dɛn” we de na Jɔn 5:29 de tɔk bɔt wetin di wan dɛn we gɛt layf bak bin du bifo dɛn day.
